الموت الحي الفصل الخامس وخمسون 55 - بقلم براء الموسوي

مرحبا حبايبي العسل شلونكم ❤️❤️

عظم الله اجورنا واجوركم بأستشهاد قمر بني هاشم العباس (عليه السلام) 🖤

#الموت الحي
#للكاتبة براء الموسوي

زبيدة : ضل يمشي بالسيارة لا ساعة ولا ثنين ظهري فركس من الكعدة ومن اسأله ميجاوب

لمن وصل لمكان معين خلاني افتح حلكي لدرجة احس فگي تشنج

ضليت باهته ، يا ربي هاي شنو

شنو هذا الجمال ، المكان جان عبارة عن ريف يزين ارضه العشب الاخضر لكن مجان خضاره عادي لا تحس وكإن لونه ينطيك شعور بالانتعاش تقائًيا
اول ما تشوفه

خلفه مجموعة من الجبال الضخمة والي تاخذ العقل بجمالها

والبيوت شي ثاني مو نفس بيتونا لا تحسهم شلون البيوت الي تطلع بالافلام كارتوب

لونهن ابيض والسقف احمر وبشكل مثلث ، حرفيًا داحس نفسي عايشه بكارتون مو حقيقة الداشوفه

سبحان الله اخلق فأبدع شي خيالي

صافنه على المكان احير على شنو اباوع وشنو اوصف
لكن كالعادة زبيدة ميصير تكون مستمعه ولازم يجي شي ينغص عليها

هارون : حلكج طبت بي ذبانه

زبيدة : اني سمعته شگال ووجهي تلقائيًا انعفس ، سديت حلكي وكمت احرك لساني اتاكد فعلاً اكو شي بحلكي

بدون شعور كمت اهوع ، مجرد فكرة انُ ذبانه دخلت لحلكي مقرف ، ضليت احوم بمكاني انوب دخلت اصبعي اريد اتقيئ

بس وكفني هارون الي شال الغراض ومشه كدامي

هارون : جذب ماكو شي طب بحلكج ، جيبي باقي العلاليك ولحكيني

زبيدة : ضليت واكفه بمكاني واصبعي بحلكي شلون الثولة

هذا صدك يحجي بله !! ما جاي افتهم شبي يشاقة عود ؟ لو شيريد بالضبط !!

طلعت اصبعي من حلكي وسحبت كلينس مبلل من الجنطة ومسحته ، عدلت ملابسي وسحبت العلاليك العايفها ، شلتهن ولحكته

ضليت امشي ورا لحد ما وكف يم بيت ، اباوعله طلع مفتاح من جيبه ، فتح الباب ودخل

دخلت ورا ومشيت عيوني على المكان ، جان بيت صغير عبارة عن صالة جبيرة هي صالة هي مطبخ
جزء منها بي قنفات بسيطة للكعدة والحزء الثاني
مطبخ

واكو درج مبين من المحرج مالته غرفة فوك

اول سؤال اجه ببالي ، هو التواليت وين شو ماكو ؟

رجعت نظري على هارون الي دخل للمطبخ وخله الغراض بي

رحت ورا خليت الغراض الي بأيدي على الميز بالصالة ورحت كعدت

اباوعله غسل الخضروات وخلاهن بمصفا وفور مي خله بي البصل ، وراح طلع تمن وصار يحفر بالخضروات ورجع جهز الحشوة من حركته عرفته يريد يسوي دولمة

كملها بس شنو ركض ركض ، انوب طلع اللحم سوا قطع متوسطة وتبله وسلفنه

وراح جاب صينية خله بيها الخضروات وطاسة الحشو وخاشوكة وراح جاب صينية ثانية خله بيها اللحم وسياخ على جهه

اخذ وحدة من الصواني وطلع من البيت ، استغربت هذا وين راح

شويه ورجع صعد فوك بسرعة ، نزل وبأديه شرشف لونه احمر وابيض وعلاكة جبيرة

اشرلي على المطبخ

هارون : جيبي صينية اللحم ولحكيني يله

زبيدة : كمت بدون لا اتجادل ويا اخذت الصينية ولحكته ، طلعنا من البيت وضلينه نمشي باتجاه الزرع

اقل العشر دقايق ووصلنا لبحيرة تجنن ، ابتسم اول ما شفتها

خليت الصينية يم المكان الفارش بي هارون والي جان قريب علىيها

تقربت وكفت كبالها ، والله العظيم من كد ما جان المي البيها نقي ونظيف من وكفت شفت انعكاس وجهي

على الرغم المكان بي سكان هواي بس نظيف للاسف هذا لو بالعراق جان لكينا مليان بطالة مي وبقايا اكل

هارون : ضلي هنا ولتتحركين من مكانج

زبيدة : ما رديت عليه وهو راح ورجع ويا ولد شايل هو ويا منقله جبيرة ، خلوها على صفحة

الولد راح بعد ما تشكر منه هارون وهارون بده يخلي حطب جوه المنقله ، شغلة وبده يهفي عليه بكارتونه

وره ما وج النار اجه كعد وضل يحشي بالدولمة ، ردو اكله خلي اساعدك بس بطلت لان هو ما طلب مني

اباوعله شلون يحشي ويصفط بالجدر ، لمن كمل كام يسوي الصوص

شفته ترسه ترس ليمون ما كدرت اتحمل ، على كولته كفر بالاكله

مو دولمة صارت عصير ليمون واني من توصل السالفة للاكل ما اتحمل ما اعلق

حاجيته ، يمعود شجاك ما شايف ليمون شدعوه هالكد
راح تخرب كل شغلك وتطلع حامضة متنجرع لان انت
خال بالحشو ليمون دوزي

اكسر الحموضة بخاشوكة شكر لو تمر هند اذا عندك راح تطلع تخبل وطعمها متوازن مو هيج سويتها طرشي من كثر الحامض

هارون : مالج علاقة

زبيدة : حرام نعمة الله تنذب بالزبالة من وراك

هارون : اني آكلها عود

زبيدة : بكيفك ، ضميت اديه وانداريت على المي وهو مستمر ولا كإنما حاجيته

كمل وكام خلاها على النار ورجع يخلي اللحم بالسياخ

شويه وسمعت صوت ضجة ورايه ، انداريت لكيت زياد يمشي باتجاهنه وويا مرة وثنين اطفال صغار عمرهم بحدود العشر سنوات

من شفت هارون كاملهم اني هم كمت الاطفال ركضو على هارون حضنو وهو بوسهم وحضنهم لصدره ويضحك وياهم

افتكار : هلاووو عريسنا شلونك ، الف الف مبروك على زواجك فرحتلك من كل گلبي والله

هارون : شكراً

افتكار : اويييي هاي الحلو مرتك ، شلونج كلبي تعاي ابوسج ياعيني صدقة شكد حلوة

زبيدة : اجتي البنية بوستني وباركتلي واني بادلتها السلام

ابتعدت وباوعتلها جانت كلش حلوة ما محجبة وملابسها كلها الوان ، كلش عجبتني رغم مبينه اكبر مني بس اليحجي وياها يحسها كلها طاقة وحيويه

زياد : هاا هارون شسويتلنا اليوم

هارون : اعمى متشوف مو هاي كدامك الجدر

زياد : طبعًا زبيدة رجلج ابد ماعنده اسلوب

زبيدة : لاحظت هالشي

افتكار : هههههه عزه هارون بس لا دتضوج هالحلوة

هارون : لا اطمئني ، اكعدو شبيكم واكفين

زياد : حبيبتي طاسه الكباب وين

افتكار : هياتها اخذها ، لك عيني شلون كباب سويتلكم اليوم يموووت حتاكلون اصابعكم ورا

وكطفتلكم الطمامة من حديقتي خصيصًا واني هالطماطة ما اشلعها بس للعزاز

زياد : اي والله حتى احنه حارمتنا نمد ايدنا على حديقتها بس لخاطرج اليوم تنازلت وكعدت تكطف بهالفواكهه والخضروات وترجع لوره

زبيدة : ابتسمت وباوعتلها عاشت ايدج

افتكار : ايدج العايشة حبيبتي قابل انتِ كل يوم تجينا لازم ندللج

زبيدة : ابتسمتلها وكعدت وياها ، هارون وزياد كامو يسوون الكباب بالشياش واطفال زياد يلعبون كدامنا

افتكار : تدرين والله كلش زعلت لان ما قبلتو تجون عدنا وبيومها سويتلكم دولمة وقوزي تالي ما اجيتو على العشه كلش انقهرت

زبيدة : بأسف عاشت ايدج بس والله اجينه تعبانين كلش وكبل نمنا وحتى ثاني يوم هارون انشغل وما كدرنا نطلع

افتكار : اي ادري بي رجلج خبيث ويستحي وتره هاي مو اول مرة ينكت بينه

بس يله مو مهم عاد زين هو اقترح علينا ننجمع ببيتكم هنا هم نغير جو وهم نتعرف عليج

زبيدة : باستغراب بيتنا ؟

افتكار : اي لعد شنو متدرين هالبيت لهارونو

زبيدة : لا والله ما ادري

افتكار : ياا لعد اكيد ممسولفلج باعي حبي هارون من جان عايش هنا استقر بهالبيت فترة كلش طويلة وما عافه الا لمن رجع للعراق

زبيدة : هاا واني عبالي جان عايش بالمنتجع

افتكار : لا حبيبتي هالمنتجع جان بس يشتغل بي ومن رجع واستقر بالعراق كام يجي بين فتره وفتره

وحسب كلام زياد لان البيت بعيد عن المنتجع نوعاً ما اضطر هارون يستقر بالفترة اليجي بيها بالمنتجع علما يكمل شغلة ويرجع

زبيدة : هزيت راسي وباوعت لاطفالها ، ابتسمت ما شاء الله اطفالج كلش حلوين

افتكار : حبيبتي ربنا يرزقج مثلهم واحلى

زبيدة : ابتسمت بدون ما اجاوبها

ضليت كاعدة ادردش وياها وللامانة البنية طلعت كلش لطيفة وتدخل للگلب بسرعة ، فرفوشة كلش وتحسها تحب الحياة

حتى ما حسيت بالوقت واني اسولف وياها ، كلش حبيتها وهالشي نادراً يصير وياي إني اندمج هيج ويه احد صعب كلش عليه

زياد : يله عيني فرشو السفرة كملنا

زبيدة : كامت افتكار طلعت من جنطتها سفرة وانطتني افرش وياها

فرشنا السفرة وخلينا مواعين الطماطه الشوي وطوس الزلاطة بالسفرة واجه زياد نزل الكباب والتكه بالصواني ولحكه هارون گلب الدولمة بنص الصينية
وراح صاح لجهال زياد ( ايهم ، ايهاب)

اجوي كعدو وبلشنا ناكل ومثل ما توقعت الدولمة طلعت حامضة تكطع الزردوم ما عدى البصل جان كاسر بحلاته على الطعم

زياد : ولك الدولمة حامضه كلش

هارون : اكل وانجب

زياد : رحم الله والديك

زبيدة : ابتسمت بشماته وباوعتله ، حيييل هذا الميسمع كلامي

رجعت اكل ، اغلبنا اكلنا مشاوي ما عدى افتكار اكلت نص الدولمة والي افتهمته بعدين هي حامل ونساتها
على الحوامض فكلش عجبتها الدولمة

كملنا اكل وعزلنا السفرة ، وكفنا على النهر نشرب جاي

افتكار : تدرين انتِ ابد متشبهين هارون ولا جنكم ولد عم ذرة شبه ماكو بينكم

زبيدة : اخذت رشفه من الجاي وجاوبتها ، شلون يعني

افتكار : يعني انتِ هسه ما شاء الله ملامحج مغرية وتجذب العين بينما هارون اذا تنتبهيله ملامحه كلش حزينة تحسي وجهه مهموم

زبيدة : باوعت لهارون وركزت بملامحه ، صدك اليركز بوجهه يحسه حزين

هارون صاحب عيون لوزية مسحوبه ولونهن اسود ، بشرته تتميز بالسمار اللامع و وجهه رغم السمار بس تحسه يلمع عبالك مخلي اضاءة (هايلايت)

نزلت عيوني على خشمه ، خشمه طويل جنه مزليكه

حواجبه ثخان بس حاجبه الايسر مطبور مدري هو الطابره عود ستايل وكذا يعني

وميحتاج اكول انه اكرع طبعًا اذا اريد احجي الصدك هو مو اكرع بس زيانه كلش خفيف

شكله مو راحة وهاي الصراحة تحسه مو مريح لو عنده شي خو نظراته توتر و تحسس المقابل انه لازم عليه شي

فزيت على افتكار وباوعتلها شو هاي تضحك وتغمز

افتكار : وين رحتي عيني صارلي ساعة اسولف وياج وانتِ بالج مو يمي

ادري شدعوه اكلتي الرجال اكل بعيونج

زبيدة : باوعتلها والله لو تدرين جنت اتنمر عليه جان ما حجيتي هالحجي

افتكار : امشي امشي هذا زياد ديأشرلنا

زبيدة : مشيت وياها للمكان الي همه بي

زياد : يله تصعدون بالقارب

افتكار : اي والله ياريت

زياد : يله خوية اخذ مرتك واني اخذ عائلتي خلي ناخذلنا جوله بهالجو الحلو

هارون : روحو واحنه نلحككم

زبيدة : صعدو بيت زياد واحنه صعدنه بغير قارب ، حرك هارون القارب بالمجادف

ابتسمت من شفت جهال زياد يضحكون ويأشرون علينا ويسوون هلو وهارون يسويلهم هلو ويضحك

الاجواء تجنن ، الاشجار والجبال داير مدايرنا صدك منظر مينشبع منه

مديت ايدي على المي وابتسمت

هارون : ايدج طلعيها ليختل توازن القارب ونوكع

زبيدة : غلست عنه وضليت العب بالمي واباوع على الطيور

لهناك ولفت نظري طير شكله كلش غريب ، يشبه البطة بالضبط بس منگاره حاد وممود لكدام

سألت هارون باستغراب ، اكلك هذا شنو

هارون : شنو ؟

زبيدة : ذاك الطير الي هناك

هارون : شبي ؟

زبيدة : شكله غريب مو يشبه البطة ؟

هارون : صحيح بس مو بطة

اسمه طائر القطرس

زبيدة : اول اسمع بي بس حلو

هارون : تدرين هالطير يعيش طول عمره على الماي

زبيدة : يعني ابد ميطلع لليابسة

هارون : لا يطلع مرة وحدة بس بوقت التزاوج

زبيدة : ليش

هارون : حتى يدور على الانثى المناسبة اله

زبيدة : عشتو حتى الحيوانات تدور مناسب ومو مناسب

هارون : طبعًا وخصوصاً القطرس يتزوج انثى وحده من هو عمره خمس سنوات ويستمر وياها لحد ما يموت

واذا ماتت الانثى مالته يبقى عايش على ذكراها وميفكر يتزوج غيرها ابد لذلك يطول باختيار شريكته

زبيدة : هزيت راسي حتى القطرس طلع احسن منكم

باوعلي بنظرة غريبة ، شبيك

هارون : خلي نرجع

زبيدة : بكيفك

حرك المجادف ورجعنا لنفس المكان النزلنا منه ، سلم هارون القارب لصاحبه ومشينه لبيت زياد

زياد : يله حبيب احنه لازم نرجع ورانه طريق طويل

هارون : براحتكم

زياد : يله بابا شيلو الغراض ويايه

زبيدة : اجتي افتكار سلمت عليه

افتكار : حبيبتي تشرفت بمعرفتج واتمنى تجين تزورينا قبل لترجعين للعراق لان والله اني كلش حبيتج

زبيدة : ابتسمت اني هم كلش حبيتج واذا كدر هارون يجيبني مرة ثانية اكيد راح اجي

افتكار : لعد متفقين

زبيدة : ودعونا وراحو واني وهارون لمينا باقي غراضنا ورجعنا للبيت

راح هو غسل المواعين واني تشفتهن وانوب طلعنا راجعين للسيارة

صعدنا بالسيارة ورجعنا للمنتجع ، بالطريق سألني هارون سؤال غريب

هارون : خوما حجيتي شي كدام افتكار

زبيدة : شي مثل شنو يعني

هارون : يعني بخصوص علاقتنا وسبب زواجنا

زبيدة : لا وليش حتى احجيلها

هارون : خوش وابد لتفكرين تحجين لاحد اي شي حتى لاهلي

زبيدة : يعني امك هسه معقولة متدري

هارون : ميهمني اذا تدري لو لا المهم عندي انتِ لسانج مينطق بشي حتى اليحجي سوي نفسج طرشة ابد لتعلقين

زبيدة : تمام ، وصلنا للمنتجع نزلنا وبوجهنا للغرفة نمنا وكعدنا ثاني

وانعاد نفس الروتين وهيج مرن الاسبوعين ولا حسيت بيهن ركضن ركض عبالك يومين مو اسبوعين

الحمدلله خلال هالاسبوعين سوه معين العملية والف الحمدلله نجحت عمليته وبقى بس يبلش بالعلاج الطبيعي

وشغلة علاجة راح تطول لشهور لذلك اضطر عمر يحيى بعد عشر ايام من العملية يرجع للعراق

واني اليوم واكفه داسد اخر جنطة ، خلصت 14 يوم بهالبلد الرائع ، يعز عليه اترك هذا الجمال

بس تبقى هالرحلة مؤقته ولازم نرجع لحياتنا الطبيعية

هارون : عندج شي بعد لو نطلع

زبيدة : لا كملت ، سحبت الجنطة وطلعت ويه هارون

طلعنا من المنتجع ورحنا للمطار ، مناك هارون سلم السيارة ودخلنا لصالة الانتظار

وانعاد نفس االشي الصار ويانا بالروحة ، اختصرها انه وصلنا للعراق واحنه هلكانين من التعب

نزلنا بالمطار واستقبلنا صاحب

صاحب : الحمدلله على السلامة

هارون و زبيدة : الله يسلمك

صاحب : تأخرتو صارلي 3 ساعات كاعد انتظركم

هارون : ليش هو يايوم الطيران العراقي التزم

صاحب : هو هذا الطيران ، يله امشونه بيت جدي منتظريكم على الغدة جدي ما قبل تتغدة اله انتو تجون

زبيدة : حنين بعد روحي

صاحب : اي والله

زبيدة : طلعنا من المطار وبوجهنا للبيت

وصلنا للبيت ونزلنا داخلين جوه ، استقبلونا الكل بالباب

اني اول ما شفت دادا وخالة وئام ركضتلهن

وئام : بعد عمري الحمدلله على سلامتج ، اشتاقيتلج والله

زبيدة : ابتعدت عن حضنها مبتسمة ، الله يسلمج والله اني هم كلش اشتاقيت الكم

رغم الونسه الي تونستها هناك بس احس بفراغ لان انتو مو وياي

ام حسن : يا حبيبتي تعاي اشبكج

زبيدة : حضنتها وبستها اوووف دادا شكد احبج

ابتعدت وسألتها لعد خواتي وين

وئام : ديمة رجلها عنده شغل ما كدر يجيبها ودنيا عدها دوام وهم ما كدرت تطلع

خطية كتلن رواحهن على الجيه بس ما كدرن وكللي اليوم ان شاء الله بالليل يجن

زبيدة : والله ياريت يجن لان كلش مشتاقتلهن

وئام : يمه بيت جدج يخوزرون بيج روحي سلمي عليهم فشلة احنه لاحكين تشبعين منه

زبيدة : رحت سلمت على جدي ، شلونك جدو

النوح : الحمدلله على السلامة

زبيدة : اباوعله مد ايده كدامي عود يريدني ابوسها ، لزمتها بأيدي وتقربت بسته من راسه

الله يسلمك جدو

قبل ليعلق ابتعدت وبوست بيبتي وعماتي والباقين وصلت لام هارون ضليت واكفه ، اشرتلي بيبتي ابوسها واسم عليها

دنكت بستها من وره خشمي حتى مو بوسة بس انطيتها خدي ، شلونج خالة

هيام : اني مو خالتج صيحيلي عمة

زبيدة : تنهدت وجاوبتها كلمة خالة اخف على لساني

هيام : واحنه نمشي على مزاجج ام الرجل يكلولها عمة مو خالة

زبيدة : ولا يهمج خالة ان شاء الله اصيحلج عمة

النوح : يله وين الغدة الجماعة جايين تعبانين

حمزية : جاهز هسه نصب ، كومن يبنات يله بسرعة

زبيدة : اني وهارون صعدنا لغرفتنا ، دخلنا لكيناها نظيفة ومجهزة نفس ما عفناها الظاهر اليوم منظفيها

راح هو للحمام واني رحت طلعت تراك وويا عباية خليجيه مالت بيت مو مال البس وارجع انزع هلكانه من التعب

طلع هارون من الحمام بطرك المنشفة ، هلووو هاي شنو

هذا موديل جديد مالت المنشفة انوب

هارون : شبيج صافنه متطبين

زبيدة : شكلك مو نظامي وانت طالع كدامي بهذا المنظر

هارون : ليش بالبحر مو جنت افتر كدامج بطرك البرمودة شو ما علقتي

شنو اختلاف المنشفة عن البرمودة ذيج تسترني من جوه وهاي نفس الشي بس انتِ تحبين الدراما

يا ما جاي تكدرين تسيطرين على نفسج وغريزتج بس تستحين تكولين

زبيدة : هاي طباعكم انتو الزلم وهالسوالف سوالفكم اهل النفوس الدنايه مو سوالفنا

اباوعله شال المنشفه الي ينشف بيها شعره وخلاها على جتفه وتقرب وكف كبالي

استغربت من شفته دنك عليه وصار حلكه قريب على اذاني

همسلي بصوت ناصي كوه سمعته

هارون : لتحاولين تستفزيني لان ورب الكعبة لو تتصلخين كدامي ما راح تتحرك مني شعره تجاهج

زبيدة : ابتعد وكرصني من خدي

هارون : وصلتلج المعلومة لو اعيد

زبيدة : نترت ايده من وجهي وخزرته ، هاي اخر مرة اسمحلك تمد ايدك عليه اما كلامك السابق فما راح اعلق عليه لانه تافه وماله معنى مثلك

اخذت ملابسي وعفته داخله للحمام ، سبحت وبدلت بسرعة وطلعت صليت ونزلت لكيتهم كاعدين ينتظروني ، اجيب اكعد يم خالة وئام وعاط بيه جدي

النوح : وين رايحه جدي

زبيدة : اكعد غير

النوح : غير تكعدين يم رجلج يا جدي مكانج صار يمه بعد

زبيدة : تنهدت بضوجة ، استغفر الله سوالف حريم السلطان هاي شوكت يبطلوها

مشيت كعدت يم صخمون

بلشنا ناكل ولعبت روحي من روحي ، هارون يسراوي واني يمناويه ومن ناكل ايدنا وحدة تطخ بالثانية

الغدة طلع زقوم عليه حتى ما اكلت مثل الاوادم لان كلما اشيل الخاشوكة ايده تضرب ايدي وتوكع

تالي من شفت هيج الوضعية انسدت نفسي وضليت كاعدة اشرب لبن علما يخلص جدي ونكوم

كمل جدي واني طفرت حتى اصعد فوك وصدك قبل لا واحد يلكفني طفرت فوك وبوجهي للغرفة

فتحتها ودخلت ركض اخذت مخدة ولحاف ورحت نمت بالكاع لان ماكو دوشك والقنفات تكسر ظهري
المهم من التعب كبل غفيت

ما كعدت غير بالليل على دكة الباب ، فتحت عيوني لكيت الغرفة ظلمة هندس ، جريت الموبايل فتحته لكيتها بالتسعة

فتحت الفلاش وكمت لكيت هارون نايم على الجرباية
بدون غطة ومصلخ حضرته يسوي بالعناد نايملي بالبجامة

طلعت فتحت الباب واني اتثاوب شفتها نور اخت هارون ابتسمت هلوو نور شلونج شو ما شفتج اليوم

نور : هلا زبد حبيبي اي والله جنت صايمة ونايمة وما كعدوني من اجيتو

زبيدة : ليش صايمة ؟

نور : اليوم اثنين والصيام بي ثواب

زبيدة : عاشت ايدج والله وصيام مقبول ان شاء الله

نور : امين يارب للجميع

صدك قبل لتلهينا السوالف كعدي هارون ونزلو خواتج اجن هنه ورجولتهن

زبيدة : ابتسمت يله هسه شويه ونازلين ، سديت الباب ركضت علكت الضوه

هارون : ليش علكتي الصخام

زبيدة : كوم اجوي خواتي ورجولتهن

هارون : طز بيج وبيهم طفي الضوه اريد انام

زبيدة : طز بيك انت لتحجي عليهن وكوم يله فشلة انزل وحدي

باستهزاء هسه يكلولي وين رجلج يبعدهم كوم يالشفيه مالي خلك لسان جدك

هارون : من دانعل ابويه لابو حتى جدي

زبيدة : ما علقت لان شتم روحه ما شتمني عاد طبه مرض اني شكو رحت غسلت وبدلت وكعدت انتظره

من طول عفته ونزلت داخلة للاستقبال واول ما شفت خواتي ركضت عليهن

دنيا : يروحي زبد اخذتي البيت ورحتي وياج وحشه عليج والله

زبيدة : حبيبتي شلونج طمنيني خوما جاي تتعبين نفسج

دنيا : لا والله ابد

ديمة : يله عيني ما وصل دوري

زبيدة : ابتعدت عن دنيا وحضنتها ، ام لسان اشتاقيتلج

ديمة : هههههه والله اني احس بنقص وانتِ ماكو

زبيدة : ابتسمت وبستها ، شلونج شخبارج مرتاحة

ديمة : الحمدلله كلش مرتاحة وامين واهله مدلليني دلال

زبيدة : الحمدلله ، باوعت لتيم خاتل وره دنيا ويباوعلي ويضحك

يمه بعد گلبي الخديدات ، اجيت شلته وبوسته ، شلونك حبيبي

تيم : لتعڤيني

زبيدة : هههههه لا والله ما اعڤك يبعد كلبي يمه يمه افييييش شهالخدود التنكرط

حضنته وباوعت ليوسف وامين ، شلونكم عيني عذروني اتاخرت ياله سلمت عليكم التهيت ويه تمتم

يوسف : الحمدلله على سلامتج زبد بشري شلونها صوغاتنا

زبيدة : ضحكت اطمئن صوغاتكم تخبل ، شلونك امين

امين : الحمدلله على سلامتج بعد اخوج شلونج

زبيدة : الحمدلله اسأل عنكم ، كعدت وشويه ودخل هارون

هارون : السلام عليكم

زبيدة : الكل رد عليه ، اباوعله تقدم على يوسف الي مدله ايده

يوسف : ببرود الحمدلله على السلامة

هارون : صافحه ، هله

امين : الحمدلله على السلامة

هارون : الله يسلمك

زبيدة : الكبر شكد يفشل ويصخم الوجه يرد من وره خشمة مان عليهم منيه

شكد كرهته بهالموقف احس تصرفه حرجني كدامهم خصوصاً من ما سلم على خواتي

انوب بصلافه راح كعد وهمه من شافو الجو متوتر ما تأخرو شويه وطلعو وهو طلع صاعد فوك

صعدت ورا ، طبيت للغرفة وركعت الباب ، عطت بي انتتتت عود لييييش تسوي هيييج

هارون : ليش شسويت ؟

زبيدة : شسويت !! لا ابد كلشي ما سويت بس طبيت شايل خشمك وتسلم من طرف لسانك لك حتى خواتي ما كلفت نفسك تسلم عليهن

من البداية اذا متريد تسلم وتكعد مثل الناس گلي حتى اطلعلك حجة بدال لا تنزل وتفشلني

هارون : والله عاد اني ما مجبور اجامل ناس ما اطيقهم وانتِ خبصتيني على النزلة اذاً تحملي

زبيدة : متطيقهم شنو قابل همه بحالك يدوروك بالشمس لو بالفي همه اجو علمودي ومن باب الذوق المفروض تنزل تستقبلهم باحترام كونك زوجي حتى لو زواجنا مو صدك

بس يا اخي على الاقل من باب الذوق كون متحرجني هيج

هارون : ومنو كلج اني صاحب ذوق

زبيدة : ما ظام انت تدري بروحك بلا ذوق فليش اناقشك اسكت احسلي

عفته وطلعت من الغرفة

___________________________________

دنيا : يوسف الطريق كله يفرفح من وره هارون وامين يحاول يهدئ بي وميكدر

يوسف : اااخ لوما عين زبيدة جان نعلت والد والديه
ابن النعال يرد علينا بتعالي عبالك مان علينا منيه يكول نشتغل عند ابو

امين : هسه انت ليش تفرفح يا خوية احنه العلينا رحنا وادينا الواجب لخاطر زبيدة

عاد شنو ردة فعل رجلها متهمنه احنه ما رايحين اله ولا محتاجين مجاملاته

يوسف : ولك اني والله ما ردت اروح واختلط بي لان ادري زمرته شنو اني هاي النماذج حافظها واعرف دواخلها

بس والله الوكفت بعيني زبيدة ، اني حاسبها اختي ما اكدر اكسر بخاطرها وما اجي بس هالابن النعال حركلي اعصابي

امين : يمعود شسالفه موضوع وانتهى هسه واذا استقبلنا بوجه ناشف اليسمعك يكول رايحين اله احنه

يوسف : اني قابل بحاله بنعال ما اشتري بس اكول حريمة والله زبيدة تاخذ واحد عـ**** وسربوت
مثله

دنيا : خطية يوسف احترك دمه من هارون وصدك هارون طب علينا تكوم هداد ، لا سلم ولا حجه
يادوب رد على سلامنا وكعد على اعصابه
تكول كاعدين على گلبه

واحنه من شفنا هيج گبل طلعنا لان ندري اذا يوسف بقى شويه راح تصير مشكلة بينه وبين هارون لان يوسف من النوع الماعنده حوصلة وميتحمل

مو مثل امين رزن ويكدر يسيطر على الموقف ، يوسف كلش عصبي حجاية حجايتين ويگب ميتحمل

وصلنا ديمة وامين للبيت واحنه رحنا لبيتنا

لزمت ايده كافي حبيبي خلي يولي ليش تتلف اعصابك علموده وهو ميستاهل

يوسف : شفتي ولج سلمنا عليه باحترام رغم كل السو وحضرة جنابه يتكشخ علينا عاد جان خله احترام لمرته خطية حرجها وخله وجها جنه فلس

دنيا : خلي يولي يروح فدوة لطولك بعد عمري

بست ايده وحضنتها ، اروح فدوة للي يضوج وعيونه الخضر تظلم ويروح لونها

ابتسمت من شفته ضحك وغمزلي

يوسف : خوش تقشمرن الزلم انتن

دنيا : هههه عاد زين تدرون بنفسكم قشمر ، اباوعله غندب ودمغني اااخ شبيك

يوسف : قشمر شنو ولج شو صايره تجفصين

دنيا : ههههه اسفه حبيبي ما اقصد والله اشاقة وياك

يوسف : اروح فدوه لليشاقه

دنيا : حبيبي انت

يوسف : هاا تيم نام

دنيا : باوعتله ، حبيبي شلون غافي سوده عليه نام جوعان

يوسف : هسه نرجع ننام وعود اذا كعد اني اسويله اكل لو اشربه حليب

دنيا : وصلنا للبيت ونزلنا تلكتنه سجى بالمطبخ

سجى : هاا ست الله يساعدج

دنيا : ويساعدج حبيبتي

سجى : اباوعلها مرتبكة تباوع ليوسف وتباوعلي حتى يوسف لاحظ عليها

انطيت تيم ليوسف ، هاك حبيبي اخذه وياك خلي بغرفته واذا كدرت بدله فدوة واني شويه ولاحكتك

يوسف : جيبي

دنيا : اخذه يوسف وراح واني باوعت لسجى ، شكو حبيبتي شبيج مرتبكة صاير وياج شي

اباوعلها رسن بجت

شبيج يمعوده وكعتي كلبي

سجى : سست ااا اني خايفه

دنيا : ليش شنو الي مخوفج ؟

سجى : اا استاذ يحيى

دنيا : عمو يحيى ، اي شبي !!

سجى : تتـ تحرش بيه

دنيا : شنووو !!!!

_________________________________

زبيدة : مر اسبوع على جيتنا للعراق

اني عازله نفسي ومالي علاقة باي احد انزل كل يوم اشوف بيبي شتريد واصعد مالي خلك احد ولا اريد اختلط باحد

وهارون رجع من ثاني يوم يداوم لان اجازته خلصت وهالشي بصالحي صار لان خلصت منه

ولو هو حتى لو يبقى وياي بنفس المكان ما احس عليه لان دومه ساكت وميحجي ابد

يعني اني انصدمت من مرة كعدت بالغرفة وهو كعد ما يقارب اربع ساعات ساكت ما نطق بحرف

تنهدت وطفيت النار من على البيض وخليته بالماعون وطلعت

حمزية : عاشت ايدج بيبي

زبيدة : ابتسمتلها الف عافية ، كعدت وبديت اتريك وياها وويه جدي هالفترة كمت من الملل انام من وكت واضطر اكعد من وكت لان شبعانه نوم

النوح : زبيدة

زبيدة : خليت زيتونه بحلكي وجاوبته ، نعم جدو

النوح : هارون شلونه وياج

زبيدة : داجاوبه وفزيت من حسيت بأيد تنحط على جتفي

هارون : صباح الخير جدي ، شنو شو اشوفك مستفتح بينا تحقيق من الصبح

النوح : حقي اطمئن على حفيدتي

هارون : اطمئن وخلي ببطنك بطيخة صيفي مثل ميكولون حفيدتك بخير وما ناقصها شي

واسألها احجيله حفيدته كلامي صحيح لو لا

زبيدة : نترت ايده من جتفي وجاوبته ، صحيح

حمزية : اكعد حبيبي تريك

هارون : ما اشتهي بس جاي

حمزية : بعيني هسه اصبلك

هارون : استريحي اني اصب لروحي

زبيدة : خله سويجه على الطاولة وراح للمطبخ صوب زهرمان لروحه وطلع يشرب

النوح : شخبار الدواجن

هارون : اخذن كل اللقاحات ووضعهن جدًا ممتاز

النوح : والدواب

هارون : نفس الشي هنه واحواض الاسماك بصحة زينه وكلشي جاي يوصل تازه للمحلات

حتى البيض بيومه جاي يتجمع وينباع

النوح : عاشت ايدك

زبيدة : صدك جدو انت شتشتغل

النوح : والله يا بنيتي اني بذاك الوقت درست بكلية الشرطة ورجعت درست إدراة واقتصاد حتى شهاداتي
تنفعني وترقيني بسرعة وهم بديت استثمر بورثي وادخل بمشاريع

واول ما بديت بالعقار استثمرت كل فلوسي بي وربحت خير وبركة من الله

انوب وسعت شغلي ودخلت بمجال ثاني ويه العقار ، استغليت الاراضي العندي وسويتهن حضيرة للحيوانات ، دواجن ودواب وحتى احواض للسمج

كمت اجيب ناس اخصائيين يعتنون بالحيوانات وبديت استثمر بيهن ، بيض ولحم من الدجاج ومن الدواب لحم وحليب واجبان وكيمر وزبد خير من الله

خو السمج ميبقى عدنا وربج باركلي برزق الحلال
وزادت فلوسي وفحت كومة مشاريع غير هاي وبفضل ربج الرزق صار اكثر من الهم على الكلب ما اعرف وين اودي

وهسه رجلج لازملي الحضيرة وما شاء الله عليه مثل البلسم ايده تنصاغ بالزمرد هم مو بس بالذهب حتى شغلة وحرصة بعمله ماكو منه

هارون خوش هارون يا زبيدة

زبيدة : اباوع لهارون باوع لجدي صفح وكام طالع من البيت

حمزية : لج بيبي هذا رجلج نسى سويجه كومي ودي اله فدوة اروحلج

زبيدة : اخذت السويج وطلعت لكيته يم البواية ، عفيه رجل شنو يمشي لو يشبخ هذا شبسرعة وصل هناك

صحتله وهو على صوتي اندار لحكته بسرعة حتى انطي السويج وادخل بس استوقفني صوت الحارس

اباوع اكو مرة لابسه عباية واكفه يم السياج

هارون : شنو هالهوسه من الصبح

: استاذ هاي فقيرة صارلها ساعة تصيح وتريد تدخل واني اكلها ممنوع وهي مصرة تدخل

هارون : وشتريد

: مساعدة قابل شتريد

زبيدة : خطية هارون انطيها فلوس منك اني طلعت هيج ومخاله فلوس بجيبوبي ، انطيها انت هسه واني من ترجع انطيك

: هاا استاذ اصيحلها

هارون : اصرفها منا بسرعة ما ناقصنا هيج شكول من الصبح

زبيدة : ضليت صافنه على ردة فعله ، هذا شنو من بشر شهالحقارة قابل الخردة الراح ينطيها شتأثر عليه

انداريت دارجع اجيب فلوس حتى انطيها ، مشيت للبيت ووكفت مباوعه للسويج

يبووو نسيت انطي اله ، رجعت بسرعة لنفس المكان ما لكيته اكيد صاف سيارته بره وراحلها

طلعت ورا بسرعه وفعلا لكيت سيارته بره

تقدمت دانطي السويج بس توقفت من شفته واكف يم المرة الفقيرة وديخلي خمسة وعشرين بايدها

انوب اندار وشافني كام يبلعم ، تقدمت خليت السويج كدامه

سويجك نسيته جوه

هارون : جيبي وامشي طبي جوه

زبيدة : رجعت دخلت وبالي يمه ، زين هو مو كل للحارس يطردها ومينطيها شي لعد ليش من طلعت لكيته دينطيها فلوس

طيب اذا هو من البداية يريد يساعدها ليش ما قبل يساعدها كدامي ، ليش ذمها وطلع انطاها

يربي هالهارون شبي وليش ديسوي هيج ، تصرفاته كلش غريبة ما جاي اكدر احزر هو شنو

زين موزين تاهت عليه

دخلت جوه ومر اليوم طبيعي ، اني رجعت نمت وكعدت بالتسعة نظفت الغرفة وعزلتها

انوب دخلت للحمام حتى اسبح واذب التعب ، سبحت وكملت ، لفيت المنشفه على جسمي وطلعت لان الشفيه ماهو

طلعت من الحمام ، رحت طفيت السبلت واجيت نشفت جسمي زين ورطبته علما نشف جسمي

كمت فتحت المنشفه وذبيتها عن جسمي ، دنكت على الجرباية واخذت الداخليات دالبسهن

وكفت حتى البس وما احس الا باب الغرفة ينفتح ويدخل هارون ويشوفني بهالمنظر

اني شفته منا واحس گلبي وكع منا ، عزه العزاني شافنيييي

انوب هو بس شافني اندار وغمض عيونه واني رسن سحبت المنشفه وغطيت جسمي

بس شنو كلي ارجف اول مرة احس إني اريد اختفي
وويه حظي الاغبر بنفس اللحظة انخبص موبايلي بالاتصالات اريد الحك الزمه ماكو

لفيت جسمي وركضت على الموبايل وهارون مازال واكف ومنطيني ظهره شلون المصدوم واني دموعي تنزل عشرة عشرة اريد اسيطر عليهن ما اكدر

شلت الموبايل بسرعة لان انخبصت خبص ، بس فتحت الخط اجاني صوت ديمة تبحي

ديمة : الوووو زبييييدة لحكيلييييي

***************************************
لهنا يكون خلص البارت ان شاء الله يكون عجبكم ❤️
+لتنسون التصويت والتعليق برأيكم ❤️

شنو رأيكم بالأحداث ؟

شنو تتوقعون حيصير بالبارت الجاي ؟

.