الموت الحي الفصل الثامن وخمسون 58 - بقلم براء الموسوي

مرحبا حبايبي العسل شلونكم ❤️❤️

°•••••••••••••••••••••••••••••••••°

بسم الله الرحمن الرحيم

(وَلُوطًا إِذْ قَالَ لِقَوْمِهِ أَتَأْتُونَ الْفَاحِشَةَ مَا سَبَقَكُمْ بِهَا مِنْ أَحَدٍ مِّن الْعَالَمِينَ* إِنَّكُمْ لَتَأْتُونَ الرِّجَالَ شَهْوَةً مِّن دُونِ النِّسَآءِ بَلْ أَنتُمْ قَوْمٌ مُّسْرِفُونَ* )

صدق الله العلي العظيم

°•••••••••••••••••••••••••••••••••••°

#الموت الحي
#للكاتبة براء الموسوي

ولاء : نفس ما اسمع منج هسه بسرعه تنزعين الملابس العليج والا اذبحج هنا

زبيدة : بهتت ملامحي من سمعتها ، اا انتِ شجاي تحجين

ولاء : مثل ما سمعتي نزعيي يله

زبيدة : انزع شنو انتِ شكاعده تمسلتين

ولاء : كتلج ما اريد اسمع صوتج تفذي بدون كلام

زبيدة : تره انتِ اذا اذيتيني متضرين غير نفسج بالنهاية انتِ تعرفين اني بنت منو

والله يإذا مسني شي اهلي ما راح يرحموج فخليني اطلع منا بسلام وبدون مشاكل

ولاء : ما راح يرحموني في حال لو لكوج واني العندي كلته الج اذا متنفذين اوامري ما راح يكون مكانج غير جثة ومدفونه وره البيت

والاريده راح اخذه منج حتى لو جنتِ جثة ومدده كدامي

كافي لهنا وبس اني صارلي اسبوعين صابرة عليج وكوه اجبر نفسي ما اتسرع اكول عسى ولعل تجين باللين بس الظاهر انتِ متجين غير بالتهديد

فسمعي الكلام وانطيني الاريده بالحسنى والا

زبيدة : غمضت عيوني بألم من حسيتها تخدش مقدمة صدري براس المكص

ولاء : هاا شكلتي تحبين نشتغل بهدوء ونتونس لو نشتغل بعنف وانتِ التتاذين اني عن نفسي بالحالتين متونسه

زبيدة : بلعت ريكي وهزيتلها راسي ، ميخالف اني راح اسوي التردي بس لتأذيني

ولاء : لا يروحي اني ما اذيج ما دام ماراح تعارضيني وتتعبيني ليش ااذيج

يله امشينه للغرفة الفوك اني من يوم الشفتج جهزتها لاستقبالج

زبيدة : فزيت من شفتها مدت ايدها على صدري ، دفعت ايدها وخزرتها

ولاء : هاا شو اشوفج تخوزرين

زبيدة : انطيني مجال خلي اخابر

ولاء : تخابرييين منووو لج انتتتتِ شنووو تضحكيييين علييييه

زبيدة : ما اضحك عليج بس اريد اخابر السايق اكله ليجيني لحد ما اني اخابره

ولاء : ولج انت ذني تمشيهن عليه ، لج اني ولاء اوديج للشط وارجعج عطشانه جايه انتِ تقشمريني من بعد هالعمر

ولج حتى لو حرتي شسويتي بواب البيت كلها مقفلة واريد اشوفج شلون تطلعين منا وتفلتين مني

زبيدة : تره اذا اريد لو على موتي ما اسلمج نفسي ببـ بس اني ععـ عجبني كلامج من صفنت بـ بي

كلت ششـ شكو بيها الواحد يجرب شي جديد وانتِ هم حلوة وتجذبين العين

ولاء : تدرين من اول ما شفتج حسيت عينج مني

زبيدة : هاا ايي وهم حتى اثبتلج اني ماعندي شي من اخابر السايق راح افتح المايك واعلي الصوت واحجي كبالج

واي شي يبدر مني شتردين تسوين سوي وبكل الاحوال اني ما راح اكدر اتصرف اي تصرف ضدج بالنهاية انتِ خالة المگص على صدري يعني اقل حركة راح تنهين حياتي واني ما اريد اموت

ولاء : هسه بديتي تفهمين وتحجين عدل

خابري يله وسوي الحجيتي بالتفصيل وديربالج تجربين حظج وياي ادمرج يا زبيدة والله ادمرج

زبيدة : هزيت راسي وجريت جنطتي من الطاولة فتحتها مطلعه موبايلي واديه يرجفن

فتحت سجل المكلمات صار بوجهي رقم هارون والسايق ، بلعت ريكي احس حلكي ناشف

بوقتها حسيت افضل خيار إني اتصل بهارون ، دكيت على رقمه وضليت انتظر الرد

ولاء : هاااااا فضينااا ماعندي صبر بعد

زبيدة : بس خلي يجاوبوني ، رجعت اتصلت مرة ثانية واول ما فتح الخط سبقته وحجيت

الووو عقيل (السايق) اليوم لتجيني بنفس الموعد راح اتأخر شويه يم الخياطة ومن اكمل اني اتصل عليك

هارون : شبيج ؟

زبيدة : اباوعلها تخوزر بيه ، مابيه شي عقيل يله اني لازم اروح واذا سألك هارون عليه بلغه انُ اني خابرتك وكتلك لتجيني بنفس الوقت

واني من اكمل اتصل عليك يله باي ، قبل ليجاوبني سويت روحي اسد الخط و بسرعة نصيت صوت الجهاز وطفيت الشاشه والخط بعده مفتوح شمرت الموبايل وباوعتلها

هاي اني سويت الي تردي نزلي المكص عني لان انجرح صدري

ولاء : منو هذا هارون

زبيدة : زوجي

ولاء : هاا يعني هارون ابن هيام الصغير

زبيدة : ااا اي اي

ولاء : وهم صاك مثل امه

زبيدة : اي

ولاء : خرب عرضها هالهيام شكد حلوة ولج بذاك الوكت حاولت وياها لمن طحت على صفحة وما حصلت لا منها ولا نن من خواتها شي

اييي على كل حال يله مو نصيبي ، راويني بضاعتج يله

زبيدة : سويت روحي ما افتهم ، ششـ شقصدج

ولاء : نزعي تيشيرتج خلي امتع عيوني بجمالج

زبيدة : ميخالف بس وخري المكص عني

تنهدت من شالت المكص عن صدري ، نزلت اديه على اطراف التيشرت ورفعته على كيفي

نزعته واديه يرجفن ، اباوع لعيونها القذرة شلون تباوع على مفاتني ، قشعر جسمي منها حسيتها شيطان وكاعد كدامي

ما تحملت اشوفها تباوعلي هيج ، نزعت التيشيرت وبدون سابق انذار لفيته على ايدي وضربتها على وجها واول ما حاولت تقاومني لويت ايدها اللازمة المكص

ولاء : حقييييرة جذبتيييي علييه

زبيدة : بنتتتت النعال جايه عليه ترديني اشاركج شي نكس مثلج لا وتهددينيي هم

لج انتِ متعرفينييي وحق رب الكعبة انعل والد والديج گ*** عبالج اسكتلج واكلج صار ، ابوج احركه اليوم

ولاء : ايدييي ايديييي

زبيدة : ايدج ؟ بنت الحرام تردين تسوين ويايه الفاحشة وتردينييى اكلج اييي

عفت ايدها وخنكتهااا ، المفتاح بسرعة وكلمه ما اسمع منننج

جسمي كله يرجف من وراها اول مرة بحياتي انحط بهيج موقف وين وصل بينا الزمننن ويييين حتى النسوان كامت تدنى نفسها على بعضها

عطت بيها المفتااااح طلعيييي لا اطلع بروحج والله ، اششش اششش لتحاولين تنطقين بحرررف المفتاح طلعييي وخلينييي ارووح لا اني الاذبحج هنااا والله

ولاء : ببـ بصدري المفتاح

زبيدة : طلعييي من نعاااالج وانطيني يااا استنكس اني المسسسسج

ولاء : زز....

زبيدة : يييييييله جاييي اكول

اباوعلها خلت ايدها بثوبها وطلعت مجموعة مفاتيح منه

مديت ايدي داخذ المفاتيح وما احس الا بشي ينحط على وجهي ويخنكي ، لزمت الايد الخانكتني بالشال من وره ولويتها بسرعة

ويه ما لويت الايد وسحبت الشال عن وجهي وشفت الشي الواكف كبالي ضليت باهته

جانت مرة ضخمة ومن اصحاب البشرة السودة واكفه وتخوزر بيه ، يربي هاي منين طلعت انوب

بعدني ممستوعبه الموقف وما حسيت بولاء غير تجتفني بقوة

ولاء : هههههه عفيه عليج ميلا

ميلا : انت تدلل ماما

زبيدة : حاولت اتملص منها بس مجتفتني حيل ، رجعت راسي عليها وضربتها بخشمها بقوة حتى تعوفني

وفعلا عافتني وكامت تصيح عاد اني دفعتها واخذت المفاتيح من القنفه وركضت ناوية اطلع من البيت

ولاء : ميلااا بسرعة جيبها

زبيدة : ركضت بكل سرعتي احس انفاسي تتسابق من الرهبة والخوف

بعدني حتى ما وصلت لباب الخروج وعثرت من جرتني العاملة من رجلي وكعتني بباب الاستقبال

انخمط گلبي من شفتها كعدت على رجليه وجتفت اديه ، جسمي كله تقيدت حركته وهي منا كلش ضخمة حتى النفس كطعته عني

كمت اصرخ واستند بالعالم عسى ولعل واحد ينجدني يا نااااسسسس يا عاااالممممم ساعدونييييي يممممه
وللللجججج ييييمه

اباوع لولاء اجتي تركض شدت شعري و خلت ايدها على حلكي مانعه صوتي يطلع

ولاء : يله ميلا شوفي شغلج

زبيدة : اني شفتها مدت يدها على صدري كمت ارفس بمكاني

لزمتني بطريقة مقرفة فرفحت روحي وبجيت بقهر ووجع من شفتها تتلمسني وتكرص بيه

ولاء : ههههه هاا ميلا حلوة مو

ميلا : كلش حلوة ماما

ولاء : لعد نزعيها وتونسي وياها شمتانيه

زبيدة : كمت أهز راسي برفض من كامت العاملة الملعونة تبوس ببطني وتجر بحمالة صدري

ونيت وصحت اااااخ بس صوتي ميطلع ، ياارب دخيلك لتخليني بهالموقف دخيلك يارب

بجيت من كل كلبي من كامن يمدن اديهن على مفاتني ويسون اشياء مقرفة

انوب من شفت العاملة تبوس برجليه وتعض باصابعي كمت اشيل بجسمي وانفضه بالكاع

ما تحملت فكرة انُ جسمي ينتهك بهالطريقة والله الموت اهون عليه من السونه بيه لا خلن قطعه بجسمي ما نكسنها باديهن

اخر شي من شفت العاملة تجر ببنطروني محاولة تنزعني يا انهاريت وبدون شعور وخرت راسي عن اديها وصرخت

ربيييي اني تحتتت رحمتك لتعوفنييي فدوووة رحتتتتتلك لتعوفينيييي ماليييي غيرككك انييييي ارحمنييييي ياااااارب ارحمممم ضعفيييي ربيييي

ويه ما كملت جملتي وما احس الا باصوات الطلق تنتشر بكل مكان والمكافحة يحاوطون البيت

ميلا : هدا شنو ماما

زبيدة : سبحان الله الانسان رغم ضعفه الا انه اذا حس بخطر يضل يقاوم لاخر لحظة بس في سبيل ينقذ نفسه

واني هذا السويته اول ما سمعت اصوات سيارات الشرطة ما اعرف شلون الله انطاني القوة ادفعهن واسحب رجليه واكوم اركض ، رجعت وكعت على وجهي

شفت ولاء جرتني ، دفرتها بوجها واخذت المفتاح وكمت بسرعة انوب حاصرتني العاملة ركعتها بالمكص وجريت شال خليته على صدري

فتحت باب الاستقبال وطلعت اصرخ ودموعي عشره عشره استقبلوني الشرطة بالطرمة

نسيت وضعي وشكلي كلشي جنت افكر بي إني اريد اطلع لوهله حسيت وكإني فقدت عقلي

شفت باب البيت مفتوح واحس كإنما شفت باب الحنة مفتوح الي ، دفعت الشرطي الي حاول يلزمني وطلعت من البيت اركض

شفت هارون بوجهي اني شفته منا وكعدت بالشارع اصرخ يشوغة

اااااااااخ وللللج ييييييمه المن عفتيتييي

حسيت بهارون يحضني بنص الشارع والوادم التمت عليج

ويييينك رااادن يعتدنننن عليه ويدفننيييي برررره لييييش تاخرت ليش

هارون : اهدي اهدي اني يمج والله يمج ما اعوفج بس اهدي

وزبيدة : شديت على قميصه وبندت من البجي

هارون : والله لاراويهن الويل واخذلج حقج من عيونهن بس اهدي

زبيدة : نزعنييي ملابسي

هارون : والكعبة الشريفه لنزعهن العافية واخليهن بحسرة الهوى والله

زبيدة : اسمعه يحجي ساعة ويايه وساعه ويه الناس وماعندي القدرة احجي ، فرفحت روحي من البجي

الله ليعيش احد الشعور الشعور الحسيته ، وحيدة اثنين ملتمات عليه ويردن ينتهكن حرمة جسمي بكل حقارة

هارون : حجي بلا زحمه عليكم انطونه عباية بطانية اي شي من الاهل

: حاضر بوية حاضر

هارون : كومي وياي العالم جابولج عباية ، حبابه عينيني وكومي حتى اغطيج بيها

عفيه بالسباعيه يله كومي

زبيدة : كومني ولفني بالعباية ورجع حضني لصدره

هارون : حضرة الضابط اني مضطر اخذ زوجتي واروح وجدي راح يلحكم للمركز ويكمل كل الاجراءات

يله امشي ، على كيفج شويه شويه

زبيدة : مشيت ويا ومن وصلت للسيارة صعدني بالصدر واجه يسد الباب

لزمت ايده بسرعة وبجيت ، وين رايح حباب لتعوفني

هارون : ما اعوفج والله راح اصعد يمج ونرجع للبيت ، هاي كدامج شوفي

زبيدة : اباوعله ركض وصعد محرك السيارة

هارون : ما سونلج الشي الي ببالي مو

زبيدة : بجيت لا

هارون : هين يصير خير

زبيدة : وصلنا للبيت واني اصلا ما حاسه الطريق كله صافنه وما مستوعبه الي صار ويايه

وكف السيارة ونزل واجه فتحلي الباب

هارون : انطيني ايدج وعلى كيفج نزلي

زبيدة : نزلت ومن اجيت اوكف اختل توزاني ولزمت قميصه

هارون : الله الله على كيفج

زبيدة : ما اكدر اوكف

هارون : ميخالف اني اسندج كمشي بيه زين

زبيدة : عدل العباية على راسي وحاوطني بايده ، سندت راسي على صدره ومشيت

دخلنا جوه وتلكونا الكل بالباب

حمزية : يمه سوده بوجهي كسر بايدها هالگ**** الساقـ****

بدرية : الحمدلله على سلامتج بعد روحي

هيام : الله لا يوفقها والله ما عبالنا تطلع هيج خسيسه
وتريد

بيداء : واحنه قابل شمعرفنا بيها هيج نكسه من الله لا ينطيها

هارون : مو محل الحجي هسه وخرو عن طريقي خلي اصعدها

نور بسرعة تعاي لحكيني ، اطب للغرفة الكاج وراي

نور : صار

زبيدة : صعدت ويه هارون فوك ، دخلني للغرفة وكعدني على الجرباية

اباوعله ثنه ركبته وكعد بمستواي

هارون : اعرف الصار مو سهل عليج بس الحمدالله رغم كل الصار الايجابي بالموضوع انُ احنه لحكنا عليج قبل ليصيرلج شي

زبيدة : باوعتله وونيت بوجع ، اذني هواي كلش هواي
اول مرة احد يمد ايده عليه بهالطريقة هاي ،جنت مربطة وما اكدر اسوي شي ولا ادافع عن نفسي

سون بيه اشياء اقرف حتى انطقها ، تأذيت اني هارون كلش تأذيت

هارون : قسمًا بالله العلي العظيم والخلقني وخلقج للاستردلج حقج من عيونهن وباجر

والله باجر اذا ما خليتج تشوفيهن يبجن بدل الدموع دم اني مو هارون ولا محسوب على الاوادم

وهسه اهدي وكومي للحمام اسبحي وارتاحي واهم شي تنامين وكلشي محلول

صدكي يحرم عليه النوم اذا ما اخذت حقج وحق كل وحدة عاشت العشتي من عيونهن وباجر البرهان على كلامي يوصلج

زبيدة : اباوع لنور طبت وهو كام يوصيها عليه

هارون : باعي طلعيلها هدوم واخذيها للحمام خلي تسبح وطلعي ساعديها بالتبديل واتصلي عليه حتى ارجع

نور : بعيني لتشيل هم

زبيدة : طلع هو ونور اجتي باستني من راسي

نور : حبيبتي الف الحمدلله على سلامتج والله كلبنا راد يوكف من الخوف عليج

زبيدة : شكراً الله يسلمج

نور : يله كومي ادخلج للحمام حتى تسبحين وان ي اروح اطلعلج ملابس

زبيدة : كمت وياها ، دخلتني للحمام ، كعدتني يم البانيو وفتحتلي الدوش وطلعت

كمت اني ذبيت العباية ، باوعت لروحي بالمرايه واكفه بدون شي من فوك وباقيه بطرگ البنطرون

كعدت بالكاع وبجيت ، اني طلعت هيج كدام الناس والشرطة يادوب جنت مغطية صدري بشال

شعري ، ظهري ، باقي جسمي كله طالع ، متت قهر اني زبيدة الملتزمة والله اني شعراية من راسي مجنت اطلع

تالي متالي اطلع بهالمنظر وكل الناس تشوفني وتنكشف مفاتني كدام الكل

الله لا ينطيجن يا حقيرات شسويتن بيه ، عساجن بالسل كون

تنهدت ومسحت دموعي ، مع كل الصار لكن الف الحمدلله من كدرت اخلص منهن والفضل كله لهارون من بعد الله لوما هو يستعجب ويجيب الشرطة مجان كدرت اطلع

كمت سبحت وتوضيت ، دكيت الباب انطتني نور ملابسي بدلت ولفيت راسي بخاولي وطلعت

اجتي هي لزمتني ومشتني ، ابد مداكدر امشي عدل من جهه العاملة مالت الجلبه من كعدت على رجليه وشنجتهن ومن جهه ثانية من الهبطة الاكلتها كوه داكدر اوكف

اباوعلها سحبت الغطة عن الجرباية

نور : يله حبيبتي تمددي

زبيدة : اخذي راحتج انتِ اني اريد اصلي قبل لا انام

نور : لعد خلي افرشلج السجادة

زبيدة : فرشتلي السجادة واني كعدت ، بيومها صليت واني كاعدة ، كملت الفرض وصليت ركعتين شكر لوجه الله لوما سبحانه رحم بحالي جان اني هسه بخبر كان

كملت صلا وانسندت على الجرباية وكمت لكيت هارون بالغرفة ، كد ما اندمجت بالصالة ما انتبهت على اي احد

هارون : روحي نور ووصيلي العاملة تسوي شوربة وجيبها لهنا

نور : ميخالف

زبيدة : من شفت نور طلعت تمشيت على كيفي ، فتحت الكنتور ، دفعت الدوشك والمخده

دنكت حتى اسحلهن لان ما اكدر اشيلهن وسمعت صوته وراية

هارون : عوفي الي بايدج وتعاي نامي على الجرباية

زبيدة : لا شكراً ما اريد

هارون : لتعاندين انتِ جسمج مخضوض وتعبان مو مال تنامين بالگاع ، تعاي نامي على الجرباية

بكل الاحوال اني ما راح انام هنا اليوم ، عندي شغل ولازم اطلع يله تعاي

زبيدة : اباوعله اجه سحب الفراش من ايدي رحعه بالكنتور وسحب ايدي مددني على الجرباية وغطاني

هارون : يله نامي ونور بس تكمل الشوربة تصعدها الج وتنطيج مسكن لان جسمج يسبب الرهبة راح يأذيج واحتمال تصخنين فالافضل تاخذين دوه وتنامين زين

زبيدة : هزيتله راسي وغمضت عيوني وهو طلع

_________________________________

يوسف : كاعدين اني وامين وحليم نتعشى بالمطعم ودگ موبايلي

فتحت الخط الوو

: انت وين

يوسف : منو وياي

: هارون

يوسف : كشولت ، هلا بيك تفضل

هارون : انت بالبيت

يوسف : لا طالع

هارون : دزلي موقعك بسرعة

يوسف : استغربت طلبه ، خير صاير شي ؟

هارون : من اشوفك نتفاهم

يوسف : سد الخط ودزيتله الموقف ، خليت الموبايل على الميز مستغرب

امين : شبي وجهك انگلب منو خابرك

يوسف : هارون

حليم : يا هارون

يوسف : خايب متاكل تبن قابل جم هارون نعرف احنه هو بس رجل زبيدة

امين : وشيريد منك

يوسف : والله ما اعرف بس گلي يريد يشوفني ضروري فدزيتله الموقع

حليم : عود يريد يوطد العلاقات

امين : انت ليش متنجب هو سلام ميسلم شيوطد متگلي

الظاهر الموضوع مهم هلي اصر يشوفك

يوسف : والله ما اعرف هسه يجي ونشوف ، وصدك شويه وشفته يمشي باتجاهنا

هارون : السلام عليكم

يوسف : ردينا عليه واني اشرتله ، استريح

هارون : ميحتاج تعال وياي اريدك بموضوع خاص

يوسف : باوعت للشباب وكمت ايييي تفضل

مشيت ورا بره كعدنا بالحديقة مالت المطعم ، خير ان شاء الله صاير شي

هارون : حسب علمي انت ضابط مو

يوسف : جنت

هارون : ميشكل فرق محتاجك بخدمة

يوسف : كعدت عدل وباوعتله ، من كلامه مبين عنده موضوع جدي

احجيلي اذا اكدر اساعدك ما اقصر

هارون : عندي جماعة بالسجن واريد ادخل وياهم لغرفة التحقيق واصور

يوسف : شتريد !!!

هارون : الي سمعته

يوسف : بغض النظر عن انُ هالشي ممنوع بس شنو السبب

ضليت صافن من حجالي الصاير ويه زبيدة بس بشكل مختصر وسطحي جداً

هارون : هذا كل الي صار

يوسف : لا يا بنات الكلب ، ااااخ لو جنت بعدني بهالوظيفة جان زوعتهن حليب امهن هالـ*****

هارون : المهم عندي هسه اعرف اكدر عن طريقك ادخل لغرفة التحقيق وانفرد بيهن

اني حاجيت جدي يتوسطلي في سبيل ادخل وما قبل لان ميريد يكبر المشكلة بس اني مصر وگلت اشوف اذا تكدر تساعدني

بواسطة اكيد عندك جماعة داخل المركز وحسب علمي انت عندك رتبة يعني ما اعتقد يرفضولك طلب

وطبعًا كلشي بمقابل لتخاف الي راح تسوي اسدده الك مباشرة وره ما اطلع من المركز

يوسف : احترم نفسك شنو هذا الكلام ، زبيدة قبل لتصير مرتك هي اختي ومعزتها عندي غالية ومحفوظة فعيب عليك تساومني على هيج موضوع

احنه زلم وعرضنا غالي والوالد الله يحفظة ما علمنا ندور مصالح ويه العالم سواء جانو غربه ولا گرابه

هارون : ما دامك تعتبرها اختك اذاً صار واجبك تساعدني

يوسف : اني راح اجرب بس ما اعتقد ممكن يخلوك

هارون : اني ما اجيتك حتى تنطيني احتمالات جاي اكول اريد ادخل بمقابل بدون مقابل اريد ادخل وشيردون كلهم اي

يوسف : اوكفلي لحظة هسه اخابرلك ، اتصلت على ولد صديقي يداوم بالمركز

الوووو هاا آكرم حبيبي شلونك ، اني الحمدلله اسال عنك ، اكلك اكرم اخيك محتاجك بشغلة مهمه

خادم ربك ، اي والله عدكم اليوم ثنين نسوان من الـ**** قابضين عليهن المكافحة بتهمة التحرش والتشريع بالقتل

اشرت لهارون على اسمائهن ، انطاني اسمائهن ورديتهن لأكرم هاا عرفتهن

اكرم : روح هسه واني كايم اسألك ما دام اليوم خفر

يوسف : سديته ، طمني هسه شلون صارت زبيدة هسه

هارون : بخير

يوسف : عساها دوم بخير ان شاء الله باجر اجيب دنيا واهلي نشوفها ونطمئن عليها

هارون : هله بيكم

يوسف : رجع اكرم دك عليه ، جاوبته هاا ولك بشر

اكرم : طبعًا هسه جان يمنا جد البنية التعرضن الها ذني الگ**** الرجال جاب محامي ويا ورفعو قضية عليهن ثنينهن

والمحامي قدم طلب بالتفتيش على بيتها والحجز على الكاميرات وان شاء الله لو باجر لو عگبه يطلعله الكشف علمود تبدي اجراءات اكلان التبن على أصولها

بس ما كتلي انت شتريد منهن

يوسف : اريد منك خدمة

اكرم : اامرني ابو تيومي اني خادم

يوسف : خادم ربك ابو عبد ، اسمعني اكرم اخيك اذا تكدر تخلي واحد من طرفي يشوفهن على انفراد اكون ممنونك

اكرم : بس انت تدري ممنوع

يوسف : اخيك دبرها من يمك لعد عقيد وهلا هلا متكدر تدبرها

اكرم : جا اذا عقيد اخرق القوانين

يوسف : ميخالف لخاطري بس هالمرة

اكرم : باوع مادام اليوم ماعدنه رقابه خلي يجي بس غير النص ساعة ما اكدر اعوفه وياهن اخاف يجي مسؤول لو شي للدائرة وينزل بينا عقوبة

يوسف : هاهي رحم الله والديك وكثر الله خيرك

اكرم : انت تدلل ابو تيومي

يوسف : سلمت عليه وسديت الخط ، باوعت لهارون هاا نص كافية عليك

هارون : كلش كافيه

يوسف : لعد روح واسأل هناك على عقيد اكرم هو راح يتكفل بكلشي

هارون : خوش ، يله من رخصتك

يوسف : الله وياك بس ما كتلي ليش تريد تنفرد بيهن

هارون : اريد اشكرهن على السونه باخت مرتك لكن بطريقتي

يله في امان الله

يوسف : راح هو واني رجعت يم الشباب لكيت حليم يكفخ بالنركيله ويرجع لوره

امين : تاخرت

يوسف : كعدت متنهد اي والله صارت شغلة لا على البال ولا على الخاطر

حليم : خير شصاير

يوسف : حجيتلهم السالفه وردة فعلهم ما جانت اقل من ردة فعلي

الله يلعنهن دنيا واخره هن وكل واحد يسوي سوايتهن دمرو البلد ونزلو غضب الله علينا

___________________________________

زبيدة : غافيه واحس بشي دافي يمشي على شعري
فتحت عيوني وانداريت بجسمي لكيت هارون كاعد ورايه ويمسح على شعري

اباوع للدنيا صايره الصبح ، والله من التعب ذبيت روحي من البارحة وهستوني ياله كعدت

هارون : هاا شلون صرتي

زبيدة : الحمدلله

هارون : تعشيتي

زبيدة : غمضت عيوني من خله شعري وره اذاني ، احم اي الحمدلله

هارون : خوش ، زين بيج حيل تكعدين

زبيدة : كعدت عدل ولميت شعري متنهده ، اكو شي ؟

اباوعله اندار اخذ موبايل من الميز الي يم الجرباية وانطاني يا ، هذا مو موبايلي

هارون : اعرف بس اريدج تفتحي وتدخلين تشوفين اول فيديو بالاستوديو

زبيدة : فتحت الموبايل مجان بي رمز ، دخلت على الاستوديو وضغطت على اول فيديو

اول ما فتحته اجاني صوت صريخ خلاني افز ، حسيت بهارون يلزمني من جتفي

هارون : اسم الله اسم الله

زبيدة : بلعت ريكي وباوعت للفيديو ، جانن بي ثنين نسوان باقيات بالملابس الداخلية شاديهن واكو واحد
واكف يضربهن

ما اخذت وقت حتى اتعرف عليهن هاي ولاء وعاملتها الجايفات لكن الفاجأني انُ الواكف يضربهن بالسوط

هارون !!

انداريت بسرعة عليه ، ههـ هاي شنو ؟

هارون : لتباوعيلي اني لو منج ما افوت فرصة إني اشوف الاذوني يتعاقبون بهالطريقة

زبيدة : رجعت عيوني على الموبايل واسمعهن يصرخن ويستنجدن وهارون ويه كل صرخة يزيد عليهن الضرب بالسوط

انوب شفته تقرب لولاء وشعل شعرها بالجداحة مالت الجكاير ، كزبر جسمي وغمضت عيوني من شفت شعرها يشتعل وهي تصرخ

ضليت اتابع الفيديو للنهاية ومن شفت الشرطي نزلهن واجه هارون لوه اديهن من منطقه الجتف

اول ما سمعت صوت ضلوعهن تتكسر ما تحملت گبل طفيته

رفعت راسي على هارون لكيته يباوعلي ، للـ ليش سويت هيـ هيج

هارون : اني قسمتلج البارحة بالله العلي العظيم إني اجيب حقج باجر واجه باجر واني نفذت قسمي

والله ما عفتهن الا لمن اغمى عليهن من الالم ولوما الضابط يمنعني اتهور اكثر جان نهيتهن خلاص

زبيدة : ليش

هارون : لان مئات البنات مثلج ومثل غيرج كل يوم يتعرضن لنفس الموقف العشتي انتِ ويمكن اتعس منج هم

حتى اكون صريح وياج اني السويته مو بس علمودج
اني متأكد اكو بنات غيرج تكرر عليهن نفس موقفج ويه ذني النكسات

فالي سويته جان رد اعتبار بسيط عسى ولعل يبرد من النار الي بداخلجن ولو شويه

زبيدة : ابتسمتله بأمتنان ، شكراً

هارون : العفو

زبيدة : شفته كام يتثاوب ويطگ بركبته ، وخرت الغطة عني وكمت

هارون : وين رايحه ؟

زبيدة : اريد اغسل وانزل جوه انت نام

هارون : ميحتاج رجعي ارتاحي اني اصلاً عندي شغلي وراح اطلع هسه

زبيدة : هزيتله راسي وكعدت ، اباوعله راح للحمام وشويه وطلع لاف المنشفه على خصرة

انوب راح للكنتور ووكف يطلع لروحه هدوم ، عيوني صارت على ظهره

وشم العقرب مرسوم بدقة واحتراف ونازل على جتفه بسلاسه ، اباوع لايده الخالها على راسه حاملة نفس شكل العقرب وتفاصيله لكن بزاويه مختلفة

يا ترى شنو السبب الي يخلي يوشم هيج وشم على جسمه

تنهدت يله اني شعليه ، اباوعله اخذ ملابسه ودخل للحمام بدل وطلع تعطر وتقرب للجرباية اخذ العلبه
السودة وطلع منها علج

او اني جان عبالي علج ومن انتبهتله هسه طلع هيل ، طبغًا اني منتبها اله يكرط ثلج ويرجع لوره

من طلع كمت اني دخلت للحمام غسلت وطلعت بدلت ونزلت جوه تلكتني خالة وئام ودادا يبوسن بيه

سوده عليه والله مخترعات خرعة عود البارحة جانن رايحات للنجف يزورن وراجعات سامعات الصار

وئام : يمه سوده بوجهي الحمدلله على سلامتج بعد روحي والنبي هستوني سمعت الصار وروحي فرفحت
من الله لا ينطيهن وبجهنم يحركهن بحق الحبيب محمد

زبيدة : حضنتها اهدي خالة اني الحمدلله هسه زينه

ابتعدت وبوست دادا التبجي ، شبيج يروحي ليش تبجين

ام حسن : خفت عليج

زبيدة : يا عمري انتِ فدوة لحنيتج ، كعدت يمهن وهنه خطية يبوسن بيه وكل شويه يكلبني خاف متعوره لو مجروحه واني اطمنهن

اباوع انوب طبن خواتي يركضن ذبن نفسهن عليه

دنيا : يمه هذا شنو السمعته اليوم من يوسف اجه يوكف كلبي والله

ديمة : والنبي اني هبط سكري بذاك الليل وتخربطت ودخلوني مستشفى من الهبطة وهاج شوفي الكانوله بايدي

زبيدة : حبيبتي شجاج

ديمة : ولج شنو شجايه غير ردت اموت عليج من الخوف

يمه سكتي زبيدة سكتي غير من سولفلي امين گبل وكعت واهله خطية احتارو بيه بالليل انوب امين خطية ميت قهر عليج وللصبح ما نام

انوب صعد لبصائر وحذرها تروح لو تستقبل اي بنية وياها بعد

بدرية : والله يا عمه حقه الدنيا صارت متتأمن

حمزية : هاي كلها دلالات على اقتراب ظهور الامام المهدي المنتظر (عجل الله فرجه وسهل مخرجة )

زبيدة : كلنا خلينا ادينا على راسنا وصحنا آمين

دنيا : طمنيني زبد انتِ شلونج هسه

زبيدة : مديتلها ايدي هاج باوعي لسه الرجفة بيه كوه داكدر اوكف على حيلي

دنيا : الله لا يوفقهن

ديمة : زين شعجب زبيدة معقولة ما كدرتيلهن

زبيدة : لو مهما جانت قوتي هنه اثنين واني وحدة بالإضافة انُ العاملة كلش ضخمة ورغم قوتي ما كدرت اقاومهن كل وحدة بيهن تعادلني مرتين بالوزن

غير هيج الخوف والرهبه سيطرن عليه خفت لا يروحن يسولي شي ولوما هارون جان اني هسه الله اليعلم بحالي

نور : سكتي زبيدة هارون نزل علينا يرجف كوه كدرنا نفهم شبي ومن الخوف عليج اجته النوبة ومع هذا ما قبل يبقى بالبيت واخذ السايق وطلع

حمزية : لعد شنو يمه غير رجلها ويحبها شلون متردي يخاف عليها

وئام : يمه الف الحمدلله من عدت سلامات

دنيا : اي والله يمه گلبي زبد لو صاير عليج شي جان متنا وراج

ام حسن : اي والله شعدنا غيرها احنه الحنينة ام لسان

زبيدة : ابتسمت فدوة اروحلكم اني

ضلينا كاعدين شويه وصعدنا لغرفتي بطلب من ديمة

دخلنا للغرفة ، كعدنا وعيونا على ديمة الي وجها مخطوف اول ما دخلت

دنيا : احجي ديمة شبيج وليش ما خليتي امي ودادا يجن ويانا

ديمة : اريد احاجيجن بموضوع وما اريد امي ودادا يسمعن

زبيدة : خير ان شاء الله

ديمة : ولج هبه راسلتني

دنيا : شلون شلون ، قصدج نفسها ذيج الحقيرة

ديمة : اي نفسها

زبيدة : وشجاب رقمج الها على حسب علمي انتِ بدلتي خطج وموبايلج اول ما تزوجتي امين

ديمة : تنهدت اي صحيح بس الحقيرة مدري شلون عارفه مكان سكنا واجتي سألت بالمنطقة وحظي المصخم وداها على محل بابا حبيبي الله يرحمه

وهناك شايفه اسلام وسائلته عني وكايله انها صديقتي وهو مبلغها إني مرت اخو ومنطيها رقمي

وقبل اسبوعين اتصلت عليه

دنيا : اي وشتريد مالت السم

زبيدة : اباوعلها گبل بجت ، احجي ديمة شكلتلج

ديمة : تريد خمس ملايين وكلتلي منا لشهر اذا ما دبرتيلي المبلغ راح ادز صورج انتِ وراسل لرجلج

وهاي مر اسبوعين ويوم واني ما كدرت ادبر المبلغ

دنيا : والله صلفه بعد كل السوته والها عين تجي وتهدد هم

زبيدة : ليش يا يوم ذيل الجلب انعدل ، على كل حال مو هذا المهم

اريدج تكليلي انتِ فعلاً عندج صور ويه ذاك النكس الاسمه راسل ، جاوبيني بدون بجي خلي نفتهم

ديمة : هزيت راسي

دنيا : يعني انتِ جنتِ تاخذين صور ويا

ديمة : اي بس والله ما عبالي راح يستغلهن ضدي وينطيهن لهبه

زبيدة : زين الصور جان بيها شي مخل

ديمة : لا والله بس اغلبها جانت بالمطاعم والسيارة يعني مبينات للي يشوفهن انُ اكو بيناتنا شي

دنيا : استغفر الله ياربي منين طلعتلنا هالسالفه ، تنهدت باعن اني راح اگل ليوسف

ديمة : لالا عليج الله كلشي لتحجين ما اريد تنهز صورتي بعينه وبعد ميحترمني

دنيا : لعد شنسوي ديمة تردينا نكعد ونسكت حتى ينهجم بيتج لو شتكولين زبيدة مو لازم نحجي لاحد يساعدنا لهالبلوه

زبيدة : هزيت راسي ، جؤ ، كلشي لتحجن ولا توصلن الموضوع لاحد

ديمة : لعد شنسوي

زبيدة : خلن الموضوع عليه اني اتصرف ، كتيلي خلص من شهر اسبوعين ويوم

ديمة : اي

زبيدة : بعد عدنا وكت ، تعاي فتحتلها اديه اجتي حضنتني ، بستها من راسها لتخافين ديمة ان شاء الله الموضوع محلول

دنيا : شراح تسوين

زبيدة : الجن الصافي انتن ، شديت بحضني على ديمة كسرت خاطري شلون تبجي وخايفة

المهم ما طولت بكعدتهن وطلعن ، هنه راحن واني كعدت انتظر جدي على نار

هارون اجه بالليل من الشغل ، على كد السلام ، الكلام كالعادة منعدم بيناتنا وهالشي صار تعويد بالنسبة الي

واكفه بالبلكون اباوع لباب الدخول اكول هسه يدخل بعد شويه يدخل وماكو

تالي بـ12 بالليل ياله اجه ، انتظره يصعد فوگ وفعلا اول ما صعد وسمعت باب مكتبة ينسد اخذت حجابي لبسته وطلعت

دكيت الباب على مكتبة ودخلت وهو اول ما شافني گام

النوح : هلا زبيدة جدي الحمدلله على السلامة

زبيدة : تقدم باسني براسي وتحمدلي بالسلامة ، رديت عليه وكعدت

النوح : همزين اجيتي استوني اجيت اصيحلج

زبيدة : خير ان شاء الله

النوح : هاج هاي الورقة وقعي عليها

زبيدة : شنو هاي ؟

النوح : اقامة دعوة باسمج على الخياطة الزفته ولاء وعاملتها

زبيدة : وقعت بدون تردد وانطيته الورقة

النوح : والله لخيسهن الج بالسجن والله

اني النوح وانتو احفادي وما عاش ولا كان اليفكر يمسكم بنسمه وراسي يشم الهوى لا والله

زبيدة : متقصر ، المهم اني اجيتك لان عندي موضوع وياك

النوح : كلي اذن صاغية

زبيدة : انت مو كتلي تزوجي هارون واحققلج كلشي تردي

النوح : واني عد كلامي

زبيدة : وينه كلامك شو بس سفرت معين خواتي كلشي ما سويت بشغلتهن ولا دليتنا على مبين

النوح : انتِ ما طلبتي واني ما انفذ اذا متطلبين

زبيدة : ليش لعد مو هذا جان اتفاقنا

النوح : صحيح بس اني ردت اشوفج صدك متمسكه باخوتج وتردين تستردين حقهم لو هيج كلاوات بس ردتي سبب يخليج ترفضين وتتعاندين وياي

زبيدة : لا طبعًا اكو واحد يشمر روحه بهاي التهلكه والله شنو عناد ششايفني مسودنه

النوح : عوفج من الحجي الجانبي هسه انتِ شتردين

زبيدة : ديمة اختي

النوح : شبيها

زبيدة : البنية الي تعاونت ويه الولد قبل وابتزوها هسه رجعت نفس البنية تبتزها مقابل خمس ملايين
واذا منا لاسبوعين ما دبرت المبلغ راح تدز صورها
لامين

النوح : ديمة كلتلج

زبيدة : اي واجتي اليوم منهارة

النوح : اني شكتلج قبل شويه

زبيدة : شكتلي ؟

اباوعله قرب راسه من الطاولة عليه وهمس

النوح : وما عاش ولا كان اليفكر يمسكم بنسمه وراسي يشم الهوى لا والله

اطمئني وامني هاي البنية من طخت ديمة جنت على روحها وخلي تتحمل الراح يصيبها هاي اذا كدرت تتحمل

زبيدة : اتمنى توافيني بكلشي راح تسوي

النوح : لتخافين كلشي بالملي راح يكون يمج امني وارتاحي

زبيدة : تمام ، يله تصبح على خير

النوح : وانتِ من اهل الخير

زبيدة : طلعت وسديت الباب ورايه ، اجيت اروح للغرفة وحسيت نفسي ما اريد ادخل جوه حيل مختنكه

غيرت وجهتي ونزلت جوه ، فتحت باب البيت وطلعت اتمشى بالحديقة واستشق هوى بارد ونظيف بهالجو

كعدت على المرجيحه ولفلفت روحي ، رفعت راسي للسما وتنهدت براحه من لفحتني نسمات الهوى الطيبة

ضليت كاعدة مرجعه جسمي على المرجوحة اهز بيها وعيوني على السما

ما خليت شي ما فكرت بي لمن تعبت وحسيت نفسي اريد انام ، كمت حتى اطب جوه وصار بوجهي هارون بأيدة كوب جاي

هارون : بيج شي ؟

زبيدة : لا

هارون : لعد شعندج طالعه بهالليل وحدج

زبيدة : جنت مختنكه وهسه نعست فـرايحة انام

هارون : براحتج

زبيدة : اباوعله راح كعد على المرجوحة يشرب جاي ويكلب بموبايله

رجعت كعدت يمه لكن على بعد مسافة ، سألني وعيونه بموبايله

هارون : مو على اساس تردين تنامين

زبيدة : اكو سؤال بداخي كلما اشوفك يجي على بالي واتمنى اسأله الك

هارون : اذا سؤال شخصي لتسألين

زبيدة : لا مو سؤال شخصي ، اكدر اسألك ؟

اباوعله طفه موبايله وخله عيونه بعيوني

هارون : سألي

زبيدة : ليش حرگت وجهه معتز ابن عمة بيداء ؟

**************************************
لهنا يكون خلص البارت ان شاء الله يكون عجبكم ❤️
+لتنسون التصويت والتعليق برأيكم ❤️

شنو رأيكم بالأحداث ؟

شنو تتوقعون حيصير بالبارت الجاي ؟

.