الموت الحي الفصل التاسع وخمسون 59 - بقلم براء الموسوي

مرحبا حبايبي العسل شلونكم ❤️

#الموت الحي
#للكاتبة براء الموسوي

زبيدة : اكو سؤال بداخي كلما اشوفك يجي على بالي واتمنى اسأله الك

هارون : اذا سؤال شخصي لتسألين

زبيدة : لا مو سؤال شخصي ، اكدر اسألك ؟

اباوعله طفه موبايله وخله عيونه بعيوني

هارون : سألي

زبيدة : ليش حرگت وجهه معتز ابن عمة بيداء ؟

انتبهتله عبس ملامحه وزم شفايفه بعدم رضا

هارون : وشنو تستفادين اذا عرفتي السبب ؟

زبيدة : ما راح استفاد شي بس عندي فضول اعرف شنو السبب الخلاك تأذي انسان بهاي الطريقة البشعه

هارون : هه بشعه كلتيلي

زبيدة : ليش انك تشوه وجه انسان وتخرب ملامحه بهالطريقة يعتبر جريمة بشعه لو لا ؟

هارون : لا ابدًا بالعكس يستاهل

زبيدة : شنو السوا الك حتى تعتبر السويته مو جريمة بحقه

هارون : ليش هو يتجرأ يسويلي شي ظهره افصمه

زبيدة : انتفضت من جوابه ، لعد اذا ممسويلك شي ليش اذيته هيج خطية شوهت وجه ودمرت نفسيته

متخاف من الله انت باجر عكبه تكوم امامه شتريد تكله والله عجبني اشوف خلقة احد عبادك وبدون سبب انت شتحس

اباوعله ابتسم وكام وكف مقابيلي

هارون : حتى اكون صريح اني ما جنت ناوي اجاوبج لانج عجولة بالدرجة الاولى وغبية بالدرجة الثانية

لكن مع هذا اني راح اجاوب على هالسؤال حتى انطيج درس مهم بالحياة وهو انج تكونين صبورة ومتتفاعلين ويه احد لمجرد انه سردلج سطر واحد من كتاب كامل الجوهر الي بي موجود بعمقه مو بمقدمته

زبيدة : باوعت بعيونه منتظرته يكمل وهو افتهم نظراتي وبده يحجي

هارون : يوم 4/2 جان موعد تزاوج تيمور واني متعود اجيبله الاثنى للبيت واهيئ الهم المكان والاجواء المناسبة في سبيل تتم عملية تزاوجهم بسلام وبدون ازعاج

ومثل العادة تواصلت ويه العيادة مالت صديقي ودبرلي واحد عنده بزونة طالبة تزاوج اخذت رقمه وتواصلت ويا واتفقنا على كلشي

رحت اني اخذتها من العيادة وجبتها هنا وخليتها هي وتيمور بمكان معين بالحديقة اني مخصصه لتيمور بفترة التزاوج حتى ياخذ راحته وميخبص البيت

المهم اني عفتهم على راحتهم مثل كل مرة وطلعت للمحمية ، بيومها جان عندي لبوة ستوها والدة وبقيت يمها فترة كلش طويلة علما اطمأنيت عليها ورجعت
للبيت بالليل

رحت اطقس على تيمور ما لكيته لا هو ولا البزونه ، افتريت بالحديقة والبيت نفس الشي لا تيمور ولا البزونه موجودين

سألت الكل عنهم محد شافهم عاد اني من ايست الكاهم داخل البيت طلعت ادورهم بالبساتين الخارجية

طبعًا هذا الحجي الساعة بـ12 بالليل ، اخذت لايت وطلعت ادور عليهم بالساتين والجو بارد يكص كص

وفعلاً ما اسمع الا مواء تيمور يجي من بين البساتين
لحكت الصوت ودخلت جوه البساتين

زبيدة : اباوعله من وصل لهالنقطه من الحديث توقف ، اخذ نفس ورجع يكمل

هارون : بيومها شفت منظر ما اتوقع اكو بشر طبيعي يكدر يتحمل يشوفه

البزونه جانت كدامي عبارة فحمة سودة لاحس ولا نفس وتيمور كاعد يمها ويصيح بصوت يقشعر اله البدن

ما استوعبت الموقف الصار وبدون شعور ركضت للبيت حتى اشوف الكاميرات واعرف شنو
الصاير

وفعلاً طبيت للبيت وفتحت الكاميرات وياريتني ما فتحتها

لكيت معتز وجماعته جايين لهذا البستان العصريات ومسوين لمة بيناتهم وواكفين يشعلون حطب علمود يتدفون لان بفترها جان شهر الثاني والدنيا كلش باردة

المهم ابن عمتج الي مقهورة عليه وتدافعين عنه من شاف البزازين طبن للبستان حب يبين رجال فكاهي ويضحك جماعته وكام جر ورقة من الشجر شعلها نار من الحطب وشمرها على البزونه بدم بارد

زبيدة : لطمت على صدري يمه عزه بعينه

هارون : البزونه نوع هملايا شعرها يصير كلش كثيف وطويل فبسرعة اشتعلت النار بيها وبدت تصيح و تركض كدامهم في سبيل تطفي نفسها

وهمه يشوفوها ويضحكون كل ضحكة ولا الثانية وكإن الكدامهن عرض مسرحي مو كائن كاعد يصارع من شدة الالم والخوف

ما طولت البزونه ووكعت والنار تاكل بجسمها اكل لمن واحد بيهم فجأة قرر يتفضل عليها ويدر دولكة ماي عليها

سكنت النار وبقت البزونه تنتفض وتصدر مواء بصوت خافت من الوجع لمن سكتت وماتت وتيمور كل هالوكت يصيح ويحاول يطفيها ومو كادر

زبيدة : طول ما هو يحجي اني لا اراديًا دموعي تنزل

خصوصاً من تخيلت منظرها شلون تركض في سبيل تطفي نفسها وهي لا حول ولا قوة كلشي متكدر تسوي

مسحت دموعي وحاجيته ، وانت بيومها جويت معتز واني شفتك مو

هارون : جؤ ، بيومها رحت دفنتها واخذت تيمور طببته للغرفة ولا كأنما شي صاير

سكتت على الموضوع وما حجيت شي نهائيًا ، ثاني يوم اتصلت على صاحب البزونة وبلغته انُ احنه عدنه برميل تيزاب وهي وكعت بي وماتت

طبعًا الرجال استلمني سب وفشار ولعب لعب واني ما الومة الحيوان من تربي تحسي قطعة من روحج كلش صعب تتحملين فراكة

عاد اني رحت دفعت فلوسها لصديقي ورجعت للبيت حتى اتفرغ لتيمور الي دخل بصدمة وفقد الثقة بالكل

صار عدائي بشكل ميتقبل اي واحد يتقربله ويتهجم على الكل ما عدايه اني

واني هم تفرغت لعلاج تيمور من هالصدمة فوك الاربع شهور ياله كدرت احسن من حالته شويه

زبيدة : ومعتز ؟

هارون : جنت مضطر ادوس على روحي وانتظره ينسى الجريمة السواها

زبيدة : ليش ردته ينساها ؟

هارون : حتى من اجي اعاقبه على السوا ميكدر يجمع ويربط الاحداث وساعتها يعرف اني الجويته

ضليت انتظر يوم يوم وشهر شهر لمن الله جمعني بي وصارت سالفة روحة بيت جدي للزيارة وطبعًا اني تعمدت بيومها ما اروح حتى اتفرغله

ومن طلعو بيت جدي بسرعة تلثمت وطفرت على بيتهم واول ما صار بوجهي خدرته وسحلته وره البيت ، جتفته وربطته مثل الجلب وانتظرته يكعد

عاد من راح مفعول المخدر وكعد ضوكته جزء بسيط من الضاكته الحيوانة الي لا حول ولا قوة ومن انتِ
طلعتيلي تعرفين بعد الباقي شنو

زبيدة : زين والحرس وين جانو عنك وليش اصلاً اختفو

هارون : الحرس قبلها بشهر كل الي بالبيت انعزمو على مناسبة خارج المحافظة وكلهم راحو

بقيت بس اني وهم ما رجعت للبيت بقيت بالمحمية ومن رجعت بالليل لكيت وضعيتهم مو تمام وعددهم ما كامل

غلست على الموضوع ورجعت للكاميرات لكيت تلث ساعات من الوقت محذوف ومن سألتهم ارتبكوا وكلولي الكهرباء طفت

وبحجايتهم هاي جنو على رواحهم لان اصلا البيت مالتنا كهربائه مركزية ونادرًا متطفه وهمه من ارتباكهم نسو وكامو يجيبون ويلزكون

واني من شفتهم هيج رحت على الكاميرات المخفية بين الشجر ولكيتهم جايبين بنات للكرڤانات ومسويلي ياها سكر وعربده

عاد طلعت الفيديوات راويتها الهم وجلقتهم بره البيت وحذرتهم ارجع اشوفهم ومن رجعو بيت جدي ما لكوهم

واني من شفت الجو خلالي هيج لا حرس ولا بيت جدي استفردت بذاك الجايف بس انتِ مدري منين طلعتيلي

زبيدة : تدري بيومها لوما ستر الله جان متت من الخوف

ابد ما توقعت السويته بمعتز يكون لهالسبب ولا خطر ببالي انه ممكن يكون مسوي هيج شي حقير

هارون : لتثقين باحد وعمرج للتوقعين الزين من احد كلنا البشر حقراء ومؤذيين لابعد حد بما فيهم اني

وهسه تاخر الوقت لازم اروح انام تصبحين على خير

زبيدة : دخل جوه واني بقيت كاعدة بره

ساعة اصفن بإلي سوا معتز الكلب وساعة افكر بكلام هارون الاخير

هارون تركيبة غريبة عجيبة واول مرة يمر عليه هيج انسان غامض حتى كلامه بي الغاز تخلي الواحد غصب عنه يفكر بي

حرت ويا ما اعرف احسبه على الزينين لو على الموزينين دخيل الله شكد يحير هالانسان

تنهدت وكمت دخلت جوه لاحكته ، صعدت فوك ، فتحت باب الغرفة ودخلت لكيته متمدد على الجرباية
وعيونه على السگف

نزعت العباية وبقيت بالتراك ، رحت فرشت لروحي وتمددت ، اجيت انام بس تذكرت شغلة

اني وهارون من يوم الي تزوجنا وتيمور ما شفته بعد هنا

اكول هارون لعد تيمور وينه شو ما هو هنا

هارون : طالب تزاوج

زبيدة : هاا يعني بمكانه بالحديقة

هارون : لا

زبيدة : لعد ؟

هارون : كمت اني الاودي للانثى ومن يكمل منها يخابروني واروح اجيبه

زبيدة : همهمت بتفهم ، غمضت عيوني ونمت

ثاني يوم الصبح كعدت من وكت ، كمت غسلت وبدلت ، نزلت جوه وهارون بعده نايم

وكالعادة بيبي وجدو كاعدين بالصالة يسولفون ، صبحت عليهم وبيبي من شافتني فتحت اديها

حمزية : صباح الورد تعاي حبيبتي

زبيدة : كعدت يمها وهي حضنتني وباستني من خدودي

حمزية : شلون صرتي بعد گلبي

زبيدة : الحمدلله بيبي بخير

النوح : هارون كعد لو بعده

زبيدة : لا بعده نايم

النوح : لعد كومي سويلنا بيضات عيون وخدريلنا جاي علما ينزل رجلج حتى نتريك سوه

حمزية : عوفها نوح متشوفها سودة عليها مرضوضه رض اني اكوم اسوي الريوك

النوح : لا اني اريد زبيدة بالذات هي التسوي الريوك
انتِ خليج يمه هي مو حفيدتنا خليها تدللنا شويه شيصير

زبيدة : اي بعيني ، كمت حتى ادخل للمطبخ وسمعت صوت جدي ورايه

جدي : البيضات مو تطگين صفارهن احبهن عدلات

زبيدة : جاوبته تدلل ، دخلت للمطبخ ، سويت الجاي وعفته يتخدر ورحت طلعت اجبان وزيتون وخليت الخبز بالفرن حتى يحمى وطكيت البيض اخر شي وعفته يستوي

طلعت خليت كلشي على الطاولة واخر شي رحت جبت طاوة البيض وطلعت لكيت هارون نازل وكاعد وياهم

خليت الطاولة على الطاولة وصحتلهم ، يله تعالو كمل الريوك

اجوي كعدو واني هم كعدت

النوح : ليش كاعدة يم بيبيتج بوية كعدي يم رجلج

زبيدة : ماكو مشكلة بعد كعدت ، شلت الخبز وزعت عليهم وبدينا نتريك

النوح : هارون عوف الجبن واكل من بيضات مرتك خوش مسويتهن

هارون : عندي دوام وما اريد تصير بيه ريحة زفر

النوح : على راحتك

حجية شراح تسويلنا غدة اليوم

حمزية : انتو شنو عاجبكم تاكلون

النوح : ام لسان شعاجبها اليوم تتغدة

زبيدة : بكيفكم اني بالنسبة الي كلشي اكل

النوح : لعد ما دام هيج حجية سويلنا تشريب لحم اليوم وكثريلنا البتيتات

شبيج زبيدة شو تباوعيلي شنو بس لا متحبين التشريب

زبيدة : احم لا بس بابا الله يرحمه هم جان يحب البتيته هواي بالتشريب ومن حجيت انت تذكرته

اباوع لبيبتي عافت الاكل وكامت وجدي صفن بوجهي وهز راسه

النوح : ايي ياسر هواي يشبهني

زبيدة : لا ميجي ذرة منك اني ابوية ماله شبيه لتشبه بيك

النوح : الله يرحمه يله اني تأخرت لازم اطلع ، صدك هارون شصار على شغلة الطير الوصيتك بيها خوما نسيتها

هارون : امن الطير صدنا من زمان وذاك ويا كاعد وينتظر امر منك حتى يطب للقفص

النوح : عاشت ايدك سبع ، يله استودعناكم في امان الله

زبيدة : طلع جدي وبقه هارون كاعد ويشرب جاي

ضل كلام جدي ويه هارون يدور براسي ، توقعته جان يحجي على موضوع ديمة فسألته

جدي شنو جان رايد منك وشيقصد بهذا التلميح ؟

اباوعله نزل الاستكان وسحب منديل مسح حلكة وكام على حيله واجه دنك عليه واني كاعدة

قطبت حواجبي باستغراب من شفته خله ايده على حنچي ومسح عليه

هارون : شوفي اني صحيح تعاطفت ويه مشكلتج وساعدتج من باب الانسانية والبارحة هم جاوبتج على اسألتج وما فشلتج بسبب وضعج

بس هذا ميعني انج تزيحين الحدود بيناتنا وتضربين ميانه وياي وكإني راضع وياج من الصغر

لزمي حدج وبعد لتدخلين بشي ميخصج والا راح يكون الي غير تصرف وياج ، صيري حبابه حتى اني هم اصير حباب وما اراويج وجهي الثاني الي تعودتي عليه خوش

زبيدة : نتر وجهي بايده ودار وجهه وطلع

لزمت حنجي وغمضت عيوني بألم ، بسيطة يا هارون الجلب بسيطة اني اعلمك

كمت لميت المواعين وخليتهن بالمطبخ وصعدن لغرفتي رتبتها وغسلت ملابسي وعفت ملابس هارون وفراشة خلي هو يعزلهن عمت عيني بعد اذا اساعده بشي

كملت ترتيب الغرفة وصفنت على الثلاجة ، حيييل هاي الثلاجة اني اصلا ناسيتها ومن كعدت بهالغرفة ما فتحتها غير مرتين تلاثة

اكيد الكاها تلعب النفس هسه ، فتحتها ونفس ما اول مرة فتحتها لكيتها مليانه خبز بس هالمرة لكيت مرطبانات مليانه ملي مكدوس

حيييل شدعوة هالكميات ، سحبت واحد منهن وفتحه ، شميت الريحة وغمضت عيوني افييييش

اموت على ريحة المكدوس ، الحجي بيناتنا دنت نفسي على وحدة واشتهيت اكل منه بس خفت هذا هارون يخوف هسه يطلع حاط بي شي

اني هذا ما اامن بي كلشي يطلع منه ومو مال اجازف واكل وانوب من اموت يكولون هاي ماتت من وره نفسها الدنيه

رجعت المرطبان وشفت الثلاجة نظيفة وريحتها طيبة سديتها ورحت سبحت وبدلت ونزلت جوه

لكيت بنات عمامي كاعدات بما فيهن بنات عمي فاضل وعاد اني شلون منا كلش ارتاحلهن

سلمت من بعيد حتى اطفر بس للاسف حاصرني

هدى : شلونج زبيدة الحمدلله على سلامتج

زهراء : ضل بالنا عليج وما صارلنا مجال نجي نشوفج اسفين

زبيدة : شكراً الله يسلمجن ، ميحتاج تعتذرن الحمدلله اني بخير ممنونه منجن

اشواق : وين رايحة زبيدة تعاي كعدي خلينا نتعرف عليج من يوم الشفناج واحنه ما بيناتنا غيرالسلام

زبيدة : خرب شلون سالفة هاي ، كعدت يمهن وهنه ما صدكن نزلن عليه بالاسئلة

خيال : سمعنا المرة اعتدت عليج صحيح هالكلام

زبيدة : حاولت بس ما كدرت الشرطة اجت وقبضت عليها

اشواق : هاا يعني ما سوتلج شي

زبيدة : لا ، اباوعلهن وحدة تباوع للثانية ويبسمن

اكو شي يضحك سولفلي داضحك وياجن

حنين : هههههه سوري زبيدة بس احنه السمعنا يختلف عن الدتحجي

زبيدة : ليش شسامعات حضرة جنابجن

اشواق : يكولون المرة وعاملاتها منزعاتج هدومج ومعتديات عليج اثنينهن وبالعلامة طلعتي مصلخة
كدام كل الوادم

زبيدة : هذا الكلام مو صحيح

حنين : شلون مو صحيح حتى يكولون هارون كتلج بنص الشارع لان طلعتي مصلخة ولوما الناس مخلصيج منه جان موتج

زبيدة : ههههههههه اخاف المعلومة واصلتحجن غلط

هارون ويضربني اني !! الظاهر انتِ متوهمه روحي سألي جدج وابوج شسوه هارون وخليهم يشرحولج

غيداء : شنو يعني قابل خالة غفران تجذب

زبيدة : لا ياا شنو تجذب خلي اتفل بزيگي حشاها

اسمعن انتن كلجن اذا مرة ثانية اسمع اي واحد بهالبيت يحجي عني بكيفه راح يكون الي غير تصرف ويا

حنين : شنو بس لا حتعتدين علينا مثل ما اعتدت عليج الخياطة ههههه

زبيدة : طفيت موبايلي وباوعتلها لا بس من راح يجي جدي ويسمع كلامجن السجلته عود ساعتها هو الراح يتصرف وياجن مو اني

زهراء : شبيج زبيدة جنه نشاقة وياج شبيج متتحملين شقه

زبيدة : واني ما احب واحد يشاقه ويايه فلحد تتشاقه وياي بعد

عفتهن وكمت للمطبخ لكيت بيبتي ونسوان عمامي كاعدات بالطبخ

شفت نور واكفه تسقي الورد الي على شبابيك المطبخ ، رحت يمها ، صباح الخير

نور : صباح الورد زبد هاا شلونج اليوم

زبيدة : لا الحمدلله كلش زينه

نور : الحمدلله

زبيدة : اكول لعد شعجب كاعدة هنا انتِ مو ويه البنات بالصالة

اباوعلها باوعت منا ومنا وتقربت هامستلي

نور : الحجي بيناتنا هارون محذرني اكعد بمكان مجتمعات بي حنين وغيداء سوه واني اخاف اكسر حجايته ويشوفني ويكتلني

زبيدة : زين شنو السبب

نور : والله ما اعرف هو من زمان گلي اذا شفتج كاعدة ويه غيداء وحنين رجلج اكسرها واني من يومها بطلت اكعد بأي تجمع بي هنه حتى لا اضطر احجي وياهن خصوصاً هنه يلزكلي

زبيدة : هزيت راسي ، شي غريب والله

سألت بيبيتي اذا محتاجة شي وساعدت نور بكم شغلة وصعدت

_______________________________________

ديمة : كاعدة اسوي زلاطة ودگ موبايلي ، شفت رقم غريب

اهووو منو هذا ، ذبيت السجينه وجاوبت ، الوووو

النوح : شلونج ديمة

ديمة : منو وياي

النوح : جدج

ديمة : كمت من مكاني وخالة باوعتلي واشرتلي تستفهم منو على الخط

هااا جدو خير صاير شي

النوح : هو هيج الواحد يسلم على جده

ديمة : هاا العفو جدي بس تفاجئت لان متصل عليه على غير العادة

احم شلونك جدو شخبارك

النوح : الحمدلله ومشتاقلج

ديمة : حتى اني مشتاقتلك

النوح : ما دام مشتاقتلي بدلي وطلعيلي حتى تشوفيني

ديمة : هاا شنو ابدل عفيه جدو خوما صاير شي

النوح : وداعة عيونج ماكو شي بس اني مشتاقلج وكلت امر عليج اخذج ونطلع نكعد بمكان هم اشوفج وهم اسولف وياج شويه

ديمة : زين ليش متجينا للبيت وتشوفني

النوح : ميصير بنتي شلون ترديني ادخل لبيت مابي رجال

رجلج وحماج ماموجودين على يا اساس اطب لبيتهم بعد حضورهم ، يله عوفج من السوالف وبدلي وطلعيلي منتظرج اني مو تتأخرين

ديمة : زين جدو بس خلي اكل لامين

النوح : ميحتاج اني خابرت رجلج كتله اريد اخذج اتريك اني وياج ارجعج وهو ما گال شي

ديمة : تمام لعد ربع ساعة واني يمك

النوح : بانتظارج

ديمة : سديت الخط وباوعت لخالة

هناء : خير يمه شيريد منج جدج

ديمة : يكول مشتاقلي وعازمني على ريوك

هناء : شعجب

ديمة : والله يا خالة اني هم حالي من حالج مستغربة ، جدي من اول ما شافنه وهو ولا مرة باوع بوجوهنا لا اني ولا زبيدة

شنو هالاشتياق الظهر فجأة من ناحيته ما ادري

هناء : شكو بيها يمه يجوز الرجال حس نفسه مقصر وحب يعوضجن عن تقصيره

ديمة : يجوز

هناء : مو يجوز اكيد ، يله يمه روحي بدلي وطلعي تونسي وسلمينا على الحجي والاهل هواي

ديمة : يوصل ان شاء الله سلامج خالة ، رخت غسلت اديه ودخلت بدلت واخذت موبايلي وطلعت لكيت سيارة جدو واكفتلي على الشارع

نزل الجامة من شافني وابتسم مأشرلي اصعد ، فتحت الباب وصعدت

شلونك جدو ، بوسني وطبطب على اديه

النوح : اني زين بشوفتج بعد جدج

ديمة : اشر للسايق يتحرك وباوعلي

النوح : اريد اسألج سؤال

ديمة : اسأل

النوح : شوكت اخر مرة صار وياج موقف يفرحج

ديمة : من نجحت عملية معين

النوح : غير عملية معين

ديمة : تنهدت قبل وفاة بابا بفترة ولهذا يومنا ما صار شي يفرحني من گلبي غير نجاح عملية معين

النوح : والي يفرحج اليوم شتسويله

ديمة : ضحكت ما اعرف شكلك والله

النوح : لعد امشينا نكيف شويه وعود بعدين نتناقش
شتكولين ؟

ديمة : هاهي ، ضلينا نسولف بامور عامة علما وصلنا للمطعم

نزلنا ودخلنا لصالة العوائل وكعدنا بمكان مغلق وهالشي فاجأني لان المطعم جانت الكعدة بي عربية
وبالكاع

كعدت وسحبت كوشه خليتها بحضني وباوعت لجدو
شعجب جبتنا لهنا

النوح : ردت مكان مغلق اكدر اسولف بي وياج براحتي وهذا افضل مكان

يله اذا تحبين تطلبين شي اطلبي بسرعة

ديمة : جدو والله اني متريكة ومو جوعانه اصلاً

النوح : والله تردين الصراحة حتى اني مو جوعان بس شنو رأيج نطلب شي بارد نشربه

ديمة : ابتسمت تمام ، طلب جدو عصير نومي بصرة واني طلبت كوكتيل

اجه الطلب اخذت عصيري احرك بالقصبه واباوع لجدو مدري ليش احس اكو كلام بحلكة وكلما يريد يحجي يتردد

جدو احس عندك شي وتريد تحجي بي بس ما ادري الظاهر اكو شي مخليك تتردد

النوح : ما شاءالله كدرتي تقرين ملامحي بدون ما احجي ما مبين عليج والله

ديمة : شنو قصدك يعني غبية

النوح : هههههه لا بنتي حشاج

المهم خليني ادخل بالموضوع واحجيلج الي بكلبي

باعي ديمة اني اعرف بسالفة الولد راسل والبنية صديقتج الاسمها هبه ، الله الله بوية شبيج انتفضتي

كعدي بويه ليش وكفتي وعليمن هالبجي بعدني ستوني كلت بسم الله

ديمة : ححـ حباب جدو الله عليك لتسويلي شي والله اني مالي ذنب وانضحك عليه الله يخليك جدو والله بعد ما أعيدها بس لتكتلني لو تكل لامين ابوس ايدك

النوح : تنكسر ايدي اذا ارفع على واحد بيكم ظلم ، كعدي بنتي اني زبيدة حجتلي كلشي واعرف الصار من الالف للياء ولا يمكن افكر ااذيج وانتِ مظلومة

ديمة : كام على حيله وكعدني ، انوب اني حلكي نشف وجسمي كله كام يرجف

شربني مي ومسح على راسي محاول يهدئني

النوح : اهدي بويه شجاج راح يرتفع سكرج ، اني وياج مو ضدج والله

وحقج استرديته ولهالسبب جبتج لهنا

ديمة : ششـ شلون استرديته يعني مدافهك

النوح : مو كتلج زبيدة حجتلي كلشي واني استنادًا على كلامها دورت على الولد الاسمه راسل حتى الكا واحاسبه على كل السوا بيج

لكن للاسف لكيته بس ما لكيته عدل

ديمة : لعد ؟

النوح : النكس بنفس اليوم الاخذ بيهن الفلوس منج انقتل وانشمر بسطلة الزبالة وحتى تقريرة الطبي موجود من شرحو لكو مطعون بسجين بظهره ومنخب تنخيب بالرصاص

واصلا لوما الناس شايفه الجلاب تنهش بلحمه ما جان انعرف انه مقتول

ديمة : مسحت دموعي من سمعته وباوعتله ممصدكة صصـ صدك يعني راسل هسه ميت !!

النوح : اي راح والله لا يرحمه دنيا واخره ، اخذ جزاته بهاي الدنيا وان شاء الله لايكي جزا الابشع بالاخرة

ديمة : بجيت اي والله ربنا لا يرحمه دمرني ودمر اهلي وياي النذل

النوح : كافي بجي وباوعيلي هسه اريدج تكليلي تعرفين هذا الشخص لو لا

ديمة : اباوعله طلع موبايله وطلعلي صورة خلاها بوجهي ، من صفنت عليها كبل عرفت صاحبها

ججـ جدو هذا نفسه الولد الي استلم مني الفلوس وقت الصارت السالفة

النوح : عفية عليج

زين تدرين هذا هو نفس الشخص الكتل راسل والي تم القبض عليه اليوم وهم بعد التعذيب اعترف انه هو القتل راسل علمود الفلوس

ديمة : زين وهبه

النوح : هاي البنية هم البارحة تم القبض عليها ببيت مشبوه هي وامها وخواتها

ديمة : ياا

النوح : اي للاسف هاي البنية هي وامها وخواتها ناس مو سويين والحمدلله اخذو جزاتهم هم

ديمة : بس جدو ديمة مو موسوية

النوح : موسوية شنو لج بابا اقصد انها مو سوية يعني موزينة

ديمة : يعني هسه الموسويين مو زينين

النوح : لج بويه شجايج عالموسويين هسه اني جاي اكول مو سوية فصليهن بويه فصليهن ، الشخص المو
سوي يعني الموزين ما اقصد عشيرة الموسوي شلون سالفة هاي

ديمة : هاا هسه فهمتك

النوح : الحمدلله انج فهمتي ، المهم اني هسه استغليت نقطة القبض على هاي البنية ورفعت عليها قضية بتهمة الابتزاز وراح اخذ موبايلج اقدم بي الادلة للمحامي وهو يتصرف

ديمة : بس جدو اخاف امين يعرف

النوح : لتخافين الامن الوطني كل شغلة بسرية يعني ما راح يمسج شي وحتى لو لا سامح الله يصير شي
اني موجود ومحد يكدر يطلع معلومة وحدة عنج
بدون علمي

وحتى سالفة صورج انتِ وذاك النكس همه راح يحذفوهن ويفلشون الموبايل على راسها هم ولا يهمج واصلا لتخافين

ديمة : اباوعله اتصل على واحد وكله جيب الامانة ، شويه ودخل الحارس بايده جنطة خلاها يمنه وطلع

النوح : هاج جدي فتحيها وشوفي

ديمة : سحبتها وفتحتها ، ضليت صافنه من لكيتها مليانه فلوس

ششنو هذني جدو

النوح : هذني الـ100 مليون مالت اخوج معين والفلوس العراقية ذني العشر ملايين مالت زبيدة

ديمة : نزلت دموعي ممستوعبة كلامه

النوح : شبيج بنتي

ديمة : وو وين لكيتهن ذني

النوح : الجماعة الكلفتهم يجيبون هذا الخسيس وقت القبضو عليه لكو بحوزته ملايين كومه

عاد جابولي المبالغ الباكها منج هو وذاك النكس وسلمو الباقي للقضاء

ديمة : زز زين هو ليش لسه ما صارفهن

النوح : الطمع يا جدي الطمع مشكلة والمثل ذولة عصابات والفلوس على كلوبهم مثل الهم يخافون يصرفوهن يجيبون ويكدسون بيهن ميدرون الرزق اذا مو حلال الله لا يبارك بي ولا يهنيهم بي

وهاي شوفه عينج ما دام فلوسكم حلال ما شاء رب العالمين انه يحرمكم منهن وهاي رجعهن الكم بدون مينقصن ربع واحد والحمدلله اني جنت الوسيلة الدنيويه لاسترجاع هذا الحق بمشيئة من الله

ديمة : حضنت الجنطة لكلبي وبندت من البجي ، وينج زبد رجعت فلوسج وينك معين يروحي هاي فلوس بيتك رجعن

الف الحمدلله يارب هذا الحمل جان نايم على گلبي وانت الزحته عني فدوة لاسمك إلهي

النوح : هسه ليش تبجين

ديمة : هدئت شهكاتي وجاوبته ، متتخيل يا جدو اني شصار بيه بسبب هالموضوع

خسرت بابا وصحتي وثقة اخواني وفلوسهم انحرمت من دراستي اني تدمرت والله يا جدو تدمرت

خانتني صديقة عمري وهدمت حياتي وكسرت ظهر ابوية ، والله ياجدو حتى موتت بابا صارت من القهر

مبين والظروف واني جملتها عليه كسرنا ظهره احنه سوده عليه انت ما شفته

جان يطلع من الصبح و يادوب يجي الظهريات يتغده ويطلع ومنشوفه اله نص الليل

ياما حبيبي نام جوعان اشوفه بعيني يفتح الثلاجة ياكل طماطة نيه ويعوف الفواكه واللحم النا خاف هو ياكل شي بنفسنا

وحتى من جان ماعنده اذا شافنا محتاجين شي ميكدر يجيبه يكعد ويضل يبجي شلون الاطفال لان ماعنده امكانية يجيبه

تالي اني شسويت هديت حيله بسوايتي هاي خاف هو جان عايز كسران اجيت اني هديت ما بقى من حيله

النوح : الله يرحمه ، هو هذا ياسر مو غريبة عليه طول عمره حنين ومرضي الله يرضى عليه ، مكانه الجنة ان شاء الله

ديمة : تدري جدو بابا شكد جان يبجي عليكم وخصوصاً على بيبي ، ليش هيج سويت بي وحرمته منكم ليش

اباوعله يمسح بدموعه ومملحك وكوه مسيطر حتى ليطلع صوته وهو يبجي

النوح : انتِو تعرفون شي يا جدي واني اعرف شي

الله يرحمه ويرحمنا ويسامحنا جميعًا

يله بنتي لتبجين ، كافي مسحي دموعج وابتسمي ، الصار اليوم يندفن هنا وتنسي الى يوم يبعثون

وهاي الفلوس تحبين تعوفيهن عندي تاخذيهن وياج وانتِ تنطيهن لاخواتج بكيفج بعد

ديمة : مسحت دموعي وتنهدت ، لا خليهن عندك اخاف اني اضيعهن

النوح : هاهي لعد راح اخلي فلوس معين بالبنك وفلوس زبيدة راح انطيهن الها

ديمة : عاشت ايدك

النوح : وايدج بويه ، يله امشينا خلي اوصلج واروح لشغلي اليوم تأخرت علمودج

ديمة : كمت ولزمت ايد جدو وحضنته ، شكراً جدو ما اعرف بشنو اجازيك على السويته الي

النوح : هذا واجبي انتو احفادي وطالعين مني ما اسمح لواحد يمسكم واني عايش

والله اليشمركم بماي اشمره برصاص كلشي بهالدنيا عندي يهون الا انتو

ديمة : ابتعدت بست ايده حبيبي جدو فدوة لكلبك

النوح : ههههه يله حبيبتي امشينا

ديمة : طلعنا من المطعم ووصلوني للبيت وراحو

___________________________________

زبيدة : كاعدة وطبت العاملة كلتلي جدي يريدني ، كمت بسرعة رايحة لمكتبة

فتحت الباب ودخلت لكيته منتظرني ، هاا جدو بشرني

النوح : انطيني الحلوان

زبيدة : حلوان شنو

النوح : كعدي اسولفلج

زبيدة : كعدت وبده يسولفلي

ييييمه برد گلبي من سمعت الكلب والانجاس الويا شصاير بيهم

فتحت زيك تراكي وصحت افيييييش ربيييي فدوووة لاسمك ميضيع حق احد ييييمك يووووم لمبين وللجايف الهدمو حياة اختييي يوم الالهم يااررررب

النوح : ههههه فرحانة

زبيدة : بس فرحانة كول طايره من الفرح ، قسم بالله لوما استحي من بابا جان طكيتها بهلهوله اطرش بيها كل الي بالبيت

ييييمه يييمه اليوم احلى يوم بحياتي هههههه احلى خبر هذا يعني خلص بعد ماكو راسل ولا هبه ولا بطيخ

النوح : هههههه لا خلص ذوله احتركت ورقتهم والى الابد

وهسه خلينا نتفرغ لسالفة دنيا

زبيدة : شراح تسوي

النوح : الج الصافي

زبيدة : اي واني منتظرة

النوح : بالمناسبة فلوس معين اخوج رحت خليتهن بحسابي ومن يرجع انطيهن اله بس فلوسج بعدهن هنا تحبين تاخذيهن

زبيدة : لا ما احتاجهن

النوح : عندج حساب بالبنگ

زبيدة : جان عندي وانسد لان سحبت كلشي منه

النوح : مو مشكلة شوكت متفرغين اخذج نفتحلج حساب ونخلي هالفلوس بيهن

زبيدة : ماكو مشكلة

النوح : يله اخذي راحتج

زبيدة : ابتسمت تصبح على خير ، طلعت وكبل اتصلت اتصال جماعي على خواتي

فتحن الخط واني نزلت دك غلط على ديمة لان ما خابرتني وكلتلي ودنيا خطية كلشي ما مفتهمه

عاد اني سولفتلها وحبيبتي كامت تبجي ومناك تيم يصيح ولي ذبيدة

غير خربت ضحك الادبسز كام يعد ويصف علينا ويبوس بدنيا

ضلينا نسولف شويه وسديت الخط وطبيت للغرفة ما لكيت هارون سمعت صوت المي عرفته ديسبح

ابتسمت والله اني اعلمك

مشيت على اطراف اصابعي لكفت العلبة مالت الهيل مالته ، فتحت الكنتور وصعدت على الخانات الفوك دالوح اعلى منطقة بي وخليت العلبة فوك الكنتور

نزلت وسديت الباب وكملت مشي طفيت اضويه الغرفة وتقربت طفيت ضوه الحمام عليه

ومشيت بسرعة نمت بفراشي وتغطيت ، طلعت بس عيوني حتى اشوفه شحيسوي

سمعت صوته يصيح من جوه

هارون : هاي ليش انطفت الكهرباء ، انتتتتِ هييي شغلي اللايت كاعد اسبح

يمعودددده تسمعينييي لو لا

زبيدة : غلست سويت روحي ما اسمع ، خرب انوب هو مصدك الكهرباء انطفت لان اضوية الغرفة مطفيه
وما باقي بس ضوه خافت لونه اصفر

عفته يصيح على راحته لمن سمعت باب الحمام ينفتح كتمت انفاسي حتى لينتبه عليه كاعدة

هارون : وينج **** الهوش من ***** بساعة الشفتج بيهااا علكيييي النعال

زبيدة : اباوعله طلع لاف الخاولي على خصرة علباته وظهرة ورجليه كلهن شامبو

حصرتني الضحكة الظاهر جان كاعد بالبانيو هلي جسمه كله رغوة هيج

انوب الاثول ما انتبه على الضوه الاصفر وراح اخذ موبايله وشغل الفلاش واخذه للحمام

ولان رجليه كلهن شامبو وهو يمشي زلك ووكع على ظهره

يمه اني شفته وكع وطكيتها بضحكة يمكن وصلت للشارع العام

انوب كام وباوع للضوه ورجع باوعلي شلون المصدوم واني كمت ارفس من الضحك ههههههههههه ولج يمه

هارون : هاي ليش مطفيه الاضويه

زبيدة : حتى اشوفك من تزلك ههههههه

اباوعله راح علك الاضويه ورجع للحمام واني مستمرة بالضحك

احس شكلت الضحكة بحلكي حتى دموعي نزلت ، تنهدت وخليت ايدي على صدري اهدئ انفاسي على الضحك الضحكته

يمه الف رحمه على والديك هارون ضحكتني من كلبي اليوم ، عدلت نومتي وتغطيت

احلى نومة راح انام اليوم ، غمضت عيوني وتدثرت زين من سمعت باب الحمام انفتح

اسمع صوت رجليه يفتر بالغرفة ، شويه وحسيت صوت رجليه اختفى

بلعت ريكي هذا وين راح والله وخرت الغطة كلت خلي اسوي روحي اروح للحمام واشوفه وينه

بعدني حتى ما انداريت وما احس الا هارون يسحب اديه لوره ويثني رجله على ظهري يمه غير نفسي انكطع عني صخام بوجهي

هارون : تطفين عليه الضوه مو

زبيدة : وخرررر هايييي وين كاعددد انتتتتت انزززل عن ظهرييي ولك

هارون : اني مو كتلج تأدبي ولتخليني اراويج وجهي الثاني ليش تتحارشين

زبيدة : انززززل الله ياخذك راح ينكسر ظهرييييي ، ااااخ اااخ ولللللك ايديييييي

هارون : كولي التوبة

زبيدة : خايب ******* فزيت من صفكني راشدي لتضررررب لتضررررب

هارون : لتغلطين

زبيدة : لتتقاوى عليه واني مجتفه وشوف شسوي بيك

هارون : خاف اهدج وتطهريني

زبيدة : تادددددب والله اله اكل لجدي عليك

هارون : شتكليله هارون كاعد على ظهري

زبيدة : صرخت من جرني من شعري

هارون : احذرج للمرة الثانية لتحتكين بيه صدكيني بالثالثة اذيتج تصير مو سهلة يله انطمري

زبيدة : حسيت بي يكوم عني ، انداريت ودفرته برجلي على فخذة وكمت

انتتتتت تخبلت لو كاسرررر ظهريييي هسه متكليييي راسك شمحشه

هارون : تمن

زبيدة : هو مبين

ما جاوبني واندار منطيني ظهره ، دفعته حيل لطمته بالميز وركعته دفره بكلاته

شفته لزم خاصرته واندار عليه موسع عيونه

هارون : انتِ كدها هاي الضربة ؟

زبيدة : لوما كدها ما اسويها ومرة ثانية اذا متحترم نفسك اسوي وياك الاتعس ، ايدك هاي لتمدها عليه بعد افتهمت لو

اباوعله رفعلي حاجبه وتقدم عليه ، ما انكر إني ما حسيت بتوتر نوعًا ما من شفته هيج يتقدم بس مع هذا عناد بي ضليت واكفه بمكاني

والله لو يكطعني اليوم ما اتحرك من مكاني ولو اني لو هو كافي هواي استهتر

رفعت عيوني عليه من وكف مقابلي ميفصلني عنه غير سانتيمترات ضئيلة

اباوعله مد ايده وسحب كذلتي خلاها وره اذني

هارون : صيري حبابة بنت ياسر اني ما احب ااذي احد لان ادري بروحي اذا خليت بالي يم واحد ااذي اليوم راح اكظم غيضي واسكت عنج مرة الثانية والله راح تشوفين شي ميسرج

زبيدة : عندك بطانيات

هارون : شنو !!

زبيدة : بطانيات عندك هنا

هارون : شتسوين بيهن

زبيدة : كلت اتغطى مو من الخوف كمت ارجف شوف اديه يرعصن من الرجيف غير متت خوف منك

هارون : ايييييه على راحتج

رايح اني اجيبلج بطانية

زبيدة : ابتعد عني اندار ديمشي وما احس بي غير رجع عليه مطلني بالكاع ونام عليه عاضني من ركبتي

***************************************
لهنا يكون خلص البارت ان شاء الله يكون عجبكم ❤️
+لتنسون التصويت والتعليق برأيكم ❤️

شنو رأيكم بالأحداث ؟

شنو تتوقعون حيصير بالبارت الجاي ؟

.