الموت الحي الفصل السابع وستون 67 - بقلم براء الموسوي

مرحبا حبايبي العسل شلونكم ❤️❤️

#الموت الحي
#للكاتبة براء الموسوي

زبيدة : رفعت اديه محاوطه ركبته على كيفي

وكفت على اطراف اصابعي و بسته من فكه،الحمدلله على سلامتك ، شلت راسي وباوعت لعيونه وهمست .... حبيبي

خفق گلبي من شفته ينزل راسه على كيف ويخلي بمستوايه غمضت عيوني من طخ انفه بأنفي

حسيت بي يحرك انفه على مقدمة انفي والمنطقة الفاصلة بين شفايفي وانفي

لزم اديه الي على ركبته وهمس بصوت ناصي

هارون : اولاً اني مو حبيبج ، وثانيًا نزليييي اييدج

زبيدة : فزيت من نتر ايدي عن ركبته بقوة وابتعد

شديت على فكي محاولة اهدئ نفسي

هارون : ااا انتتتِ شعندج هناا وشنو هاي المهزلة المستويتها

زبيدة : ضميت اديه وجاوبته ، حبيت اخذ فترة نقاهه ورجعت من ارتاحيت

اما عن المهزلة فـ ، انداريت ماخذه نظرة على الغرفة
مداشوف اي مهزلة هنا مكتفية بالمهزلة الدتسويها انت

رحت وكفت على ميز التواليت وكمت اعدل بشعري واباوعله ، ما كتلي شلونها سفرتك هالمرة الظاهر مجانت زينه لان وجهك ميبشر بالخير

هارون : لج انتِ شنو من بشر ، بعد كل الحجيته وياج
وبعدج واكفه هنا اني لو منج وواحد يسوي السويته وياج بخلقته ما اباوع بعد

زبيدة : ملابسك بالحمام اذا تحب روح اسبح وبدل حطلعلك منشفة لان ذيج وكعت مني وتبللت

مشيت فتحت الكنتور وطلعت منشفة ، اخذتها وداريد اروح اخليها بالحمام بس وكفت من سمعت كلامه

هارون : بس اريد افتهم شعندج باقية هنا ، واحد وميريدج تفرضين نفسج عليه ليش ؟ ، ماعندج كرامة انتِ !!

زبيدة : شديت على الخاولي الي بإيدي ودمعت عيوني ، ذبيته من ايدي ورحت تحت انظارة فتحت كنتوري وطلعت القران

اخذته ورحت امشي باتجاهه بسرعة ، وكفت كدامه وقدمت القران

شفته يباوعلي باستفهام ، حاجيته بكل هدوء

احلف على كلام الله انك متريدني وكلامك هذا انت تعني بالحرف واني والله ما ابقى ولا لحظة وحدة هنا

ومستعدة هسه منا وبوجهي لاقرب مكتب محامي
واقدم طلب للمحكمة واتطلك منك وبعد متشوفني
طول حياتك

اباوعله ضل صافن بوجهي ، عطت بي متتتتحلف
شبيييك كمت تتراجف

احلف يله حتى من صدك تشيلني كرامتي واطلع منا
انت مو متريدني اثبتلي كلامك صحيح واحلف يييله
احلف

هارون : وانتِ متوقعة إني ممكن احلف بكلام الله على سوالف تافهه وسخيفة مثل هاي

زبيدة : حجي زايد لتحجي ، تحلف لو متحلف ؟ ، هاا شو اشوفك سكتت ليش متريد تحلف

تخاف من الله لان جذاب

عاط بيه بصوت عالي

هارون : احترمييي نفسسسج

زبيدة : خليت القران على الجرباية وباوعتله ، لك فهمني انت شوكت تصير رجال وتحس على نفسك

مو كافي جذب رجال شكبرك شكدك كاعد تجذب بس فهمني يعني انت هسه دتضحك على روحك لو عليه

تره السالفة خلص صارت واضحة وكلاواتك هاي وفرها لنفسك وهالمجهود الكذاب عوفه لان اني بعد ما اصدكك

من باب اكرهج وعمري ما فكرت بيج وكل السويته انتقام ومن باب تتراجف جنك سعفه ضاربها هوى عالي لان عفتك

من باب متريدني وما مهتم ومن باب ثاني بس سمعت بيه داخله مستشفى عفت كل شغلك واجيت تركض للعراق

هارون : هذا الكلام مو صحيح لتضلين تمسلتين

زبيدة : لااا صحيييح وكافييي ، صفكت اديه جذبتك خلص انكشفت واوراقك انفضحت

هاي السوالف بعد متمشيها عليه ، لك انت حتى من سافرت فسافرت وهربت لان تخاف تواجهني حتى
لا اطلع جذبتك يا جذاااب يا ابو الجذذذب

وديربالك تحاول تكول ماكو هيج شي ، اني صحيح ما عاشرتك هواي وكل البيني وبينك ما صارله حتى سنة بس متكدر تنكر إني اعرفك اكثر من كل العاشو وياك
عمر

شوكت تصارح نفسك وتعترف انك تحبني مثل ما اني احبك ويمكن اكثر هم

هارون : انتِ شهالخيال الواسع العندج ، اشفق عليج بصراحة مسوية سيناريو تحفه لا وعايشته هم

زبيدة : دك على راسي باصابعه وكام يصيح

هارون : لج بابا اني ما احبج ما احبج افهميها هاي الحجارة الي هنا خليها تستوعب

زبيدة : هزيت راسي وجاوبته ماشي اني وياك ، اني غبية وهذا كله سيناريو وانت الصح

طيب فسرلي وانطيني اسباب مقنعة عنك ، انت هسه مو انتقمت مني ، مو المفروض تكون سعيد وينهااا هالسعادة وييينها

اشو وجهك بي سبع لطامات

انت مو تعتبر السويته انجاز؟ زين الي يسوي انجاز غير يفرح يكون سعيد بإلي ححقه

سعادتك وينهاا انتتتت مو وكعت وشكلت عندك النوبة 3 مرات مو ردتتتت تمووووت لان عفتك

مو ثاني يوم طگيت التذكرة وطلعت هسسسه غير افتهم اذا انت ذكي واني غبية غير تفسرلي ليش صار وياك كل هذا

عوفك من الصار قبل ، تقربت لزمت اديه ، يله فسرلي جسمك ليش كله ديكزبر هسه

تگلي جسمي كزبر لان لعبانه نفسي منج اكلك ليش عيونك تباوعلي هيج

التلعب نفسه من احد يباوعله بهيج نظرات ؟ ضغطت على ايده ليش ترجف وتغمض بعيونك انت مو دتكول الحجيته اني مجرد سيناريو اشرحلي انت

يجوز اني غلطانة فعلاً ، يجوز اني عايشة الدور مثل متكول ، اثبتلي حقيقة مشاعرك وخليني اطلع من حياتك ليش دتعبني وتتعب نفسك

متحجي شبيك تباوعلي هيج ، ليش تضل جبان احجي مو رجال انت وخابص الدنيا بروحك احجي

هارون : احجي عدل

زبيدة : اني جاي احجي عدل بس انت الدتسمع بالاعوج

بس تدري على راحتك اني ما راح اضغط عليك تعرف ليش لان ادري بحبل الجذب كصير

وانت مصيرك اليوم او باجر راح تنكشف واني كاعدة ومترقبة الله شلون راح يفضح الجذب الجذبته

نترت ايدي من ايده ورحت رجعت القران لمكانه وانداريت عليه وهسه ادخل اسبح حتى تنزل تتغده وياهم

شفته باوعلي صفح ودخل للحمام ، انوب النادر كد ما جان متنرفز طب اخذ جنطة السفر ويا ورجع طلع يتأفأف شمرها بره ورجع دخل للحمام

هزيت ايدي وضحكت والله يا الله ، رحت سديت بردة البلكون وكعدت اگلب بالتلفزيون

شويه وشفته طلع من الحمام وراح صله ، كمل وگام يلم السجادة

اندكت الباب كمت فتحتها شفتها نور ، ابتسمت بوجها تعاي حبيبتي دخلي

نور : خرب عرضج لج شهالجمال

زبيدة : ضحكت دطبي طبي

نور : ااا السلام عليكم

هارون : وعليكم السلام شلونج

نور : الحمدلله

هارون : بيج شي ؟

نور : هاا لا مابيه بس اجيت اكلكم الغدة جاهز نزلو يله

هارون : خوش روحي انتِ واحنه نجي وراج

زبيدة : راحت نور واني سديت الباب ورجعت كعدت

هارون : حسبي حسابج ماكو نزله بهذا المهرجان المسويتة بخلقتج لو تمسحين عيونج وحلكج لو ماكو نزله

زبيدة : اعصابك اعصابك على كيفك ويه نفسك ، لتخاف عزيزي اني ما راح انزل اصلاً ، استمتع

هارون : وليش حضرة جنابج الكسيف متردين تنزلين

زبيدة : ما اشتهي

هارون : طبج مرض

زبيدة : مرض يطب اليكرهني واكيد انت مو من هاي الفئة حبيبي

اباوعله كام يستغفر وطلع من الغرفة راكع الباب حيل ورا

تنهدت ولزمت راسي يربي دخيلك قويني وخليني اتحمل سوالف هارون اني المشيت بهذا الطريق وادري بصعوبته بس محتاجة القوة منك قويني يا رب

_________________________________

دنيا : يوسف اخذ تيم وطلع يشتريله من الاسواق واني استغليت الفرصة وكعدت ارتب غرفة تيم
الصايرة هوسة من الالعاب

سمعت الباب يندگ ، ذبيت الي بأيدي وكمت فتحت الباب صارت بوجهي سجى

يربي هالبنية شكد صايرة تنرفزني ولا اطيق اشوفها
خصوصاً بعد سالفة الدشداشة كمت ما اشتهي حتى اباوع بخلقتها

سجى : السلام عليكم ست

دنيا : وعليكم السلام نعم

سجى : ممكن احجي وياج شويه ست اذا تقبلين يعني

دنيا : اشرت بأيدي تفضلي

دخلت كعدت على القنفة وكامت تفرك باديها ، اي احجي شنو عندج

سجى : ست انتِ اكثر وحدة حبابه هنا واني لان اشوفج حبابه ما راح اخجل اطلب منج هذا الطلب

دنيا : احجي بدون مقدمات رجاءًا

سجى : ست حبابه عليج الله اريدج تحاجين ست رميم

دنيا : بخصوص شنو ؟

سجى : مو عقد الاستاذ بعد جم يوم

دنيا : اي ؟

سجى : اي وست رميم تريدنا نلبس زي رسمي بالحفلة

دنيا : وشنو المشكلة واذا لبستن زي رسمي ؟

سجى : ماكو مشكلة بس بصراحة ست احنه منريد نلبس زي رسمي ، يعني عاجبنا كلنا نبدل ونكشخ

خصوصاً المثلنا بالسنة حسنة تصحلهم الفرصة يحضرون هيج مناسبات فنريد نبدل ونفرح والله هواي ندعيلج اذا تقنعين الست تغير رأيها

دنيا : ولو اني والبنات منحب نتدخل بهاي السوالف لكن مع هذا راح احاجيها الكم واشوف شتكول

سجى : صدك والله ست

دنيا : اي

فزيت من كمزت وحضنتني

سجى : اسفة اسفة ست ادري ميصير احضنج ، اعرف ضوجتج وضايفج تصرفي بس تحمست شويه والله من فرحتي ما كدرت اسيطر على نفسي

دنيا : اشرتلها على الباب ، اخذي راحتج

سجى : هاا ايي اي ست راح اطلع ومشكورة هواي

دنيا : اباوعلها طلعت من الغرفة تضحك ، للامانة اني ما ضجت لان حضنتني عود لان هي العاملة

بالعكس لو هالموقف صاير ويه اي وحدة من العاملات ابد ما جان راح يشكل فرق عندي لان كلهن احبهن وهن ما شاء الله عليهن ادب واخلاق وحشمة لا الهن علاقة بأحد ولا يتدخلن بشي ميخصهن

الا هاي وين ما اشوفها الكاها تباوعلنا من بعيد لبعيد
لو تكعد تتنصت علينا من نكعد نسولف

تصرفاتها تنرفز ، كمت طلعت حتى احاجي خالة مو علمودها علمود باقي العاملات

دكيت باب الغرفة على خالة ودخلت لكيت ابريز يمها لازمات كتلوگ ومدري شديسون

السلام عليكم

رميم : هلا امي وعليكم السلام تعاي استريحي

دنيا : كعدت وباوعتلها اكول خالة سمعت تردين العاملات يلبسن رسمي بحفلة العقد ؟

رميم : اي

دنيا : شعجب متخليهن يبلسن الي يعجبهن خطية خلي يبدلن ويغيرن جو حالهن من حالنا

ابريز : لا على يا اساس ، الناس هناك تحتاج شي تريد شي خوما تجي تسخرني لو تسخرجن

لازم اكو عاملات يلبن طلبات المعازيم من خدمة وتوزيع واكيد مو احنه الراح نفتر ونوزع ادري نگابل المعازيم والحفلة لو نلتهي بالخدمة

دنيا : اي بس شكو بيها اذا لبسن اليعجبهن وخدمن المعازيم

ابريز : والمعازيم شلون راح يتعرفون عليهن مثلًا اذا ما لابسات رسمي شنو عدهم جهاز استشعار ياشرلهم على العاملات

رميم : اني ويه ابريز بهاي النقطة

ابريز : وهم اني اتفقت ويه المنظمة على كلشي ، راح نخليهن يلبسن تنورة سودة وقميص ابيض يعني ما راح نطببهن بالدشاديش حتى يعترضن

دنيا : يعني ما بيها مجال

ابريز : لا ابد كتلج كلشي اتفقنا عليه ويه المنظمة مو مال نكنسل والخياط ديشتغل الهن الملابس على مقاساتهن

رميم : صدك دنيا انتِ ليش متردين العاملات يلبسن رسمي

دنيا : لا خالة مو اني بس اكو وحدة من العاملات حبت تبدل وطلبت مني احاجيج لان هي تستحي

رميم : عجيب بس اني من بلغتهن كلهن كيفن ولا وحدة اعترضت

دنيا : كتلج استحت تكلج

رميم : ماكو مشكلة هسه خلي نحير بالمشيه هسه السوالف التافهه هاي غلسي عليها

الجمعة المشيه ووراها باسبوع العقد تكولن بصائر تلحگ اني سألتها وكلتلي الحگ

ابريز : اني بس اريد افتهم انتو ليش مستعجلين

رميم : البنية راح يبلش دوامها ما بقالها شي وهالسنة تتخرج وهي تريد العرس ببداية دوامها يعني وره العقد بشهر شهرين بالزايد

دنيا : خو تخلي العرس على عطلة نصف السنة عليمن هالخبصة هاي

رميم : هي البنية كالت بس حليم ما قبل يكول عنده شغل ويريد كلشي بسرعة واني من بلغت ام امين كالت براحتكم اهم شي العرس ميأثر على دراسة بصائر

دنيا : الله يقدم الي بي الخير الهم بحق الحبيب محمد

يله خالة اني طالعة اخذو راحتكم ، طلعت من الغرفة وشفت يوسف وتيم

اباوع لتيم يسحل بالعلاكة ويأشرلي

تيم : ثوفي ماما ثوفي جابلج هاجات

دنيا : كعدت بمستوا يمه بعد روحي اليجيبلي جاحات
شو ابوسك افيييييش يمه

اخذت العلاكة منه وباوعت ليوسف ، بيك شي ؟

يوسف : لا يگلبي سلامتج يله امشينا نروح لغرفتنا

دنيا : يله ، اخذت ايد تيم ورحنا للغرفة

فتحتله التلفزيون مالتنا وفتحتله جبس وانطيته عصير ويوسف دخل للحمام ، شويه وسمعته يصيحلي بصوت عالي

يوسف : دنيا يا دنيا وينج تعاي بسرعة

دنيا : كمتله بسرعة ، شبيك شبيك ليش تصيح خرعت الطفل

يوسف : تعاي جوه اريدج

دنيا : دخلت للحمام لكيته واكف ومتخصر ، شكو شبيك ؟

يوسف : دنيا انتِ عمليتج بيها شي وانتِ ضامة عليه ؟

دنيا : صدك تحجي جاي تصيح علمود هاي السالفة

يوسف : سألتج جاوبيني

دنيا : لا مابيها شي الحمدلله مو هياتني كدامك واكفه
وكلشي مابيه

يوسف : اذا عمليتج مابيها شي ليش جاي تنزفين وما كايلتلي

دنيا : اني انزف !!

يوسف : اي

دنيا : انت منين جايب هالحجي هاي منو كايلك اني جاي انزف اسم الله

يوسف : لعد هذا شتفسري

دنيا : شفته يأشر على المقعد ، صفنت بوجهه وتقدمت مستغربة

باوعت للمقعد وفتحت عيوني مصدومة ، جان المقعد (مكرم القارئ) مليان دم واكو بصفه فوطة صحية مفتوحة وملوثة بدم

ضليت باهته هاي شنو !! انداريت على يوسف يكرم الله بس والله العظيم هاي مو اني

يوسف : لعد منو

دنيا : والله ما اعرف بس مو اني

يوسف : غير افتهم منو يعني قابل اني الانزف وما ادري بروحي

دنيا : هاا اي اي تذكرت هاي اني كلت لوحدة من العاملات تجي تعزل الغرفة بين ما اروح لخالة وارجع
والظاهر هي جانت عليها الدورة ومستخدمة الحمام وناسية تنظف وراها

يوسف : هاي يا طايحة حظ وماعدها خجل مسويه هيج وبعدين على يا اساس تستخدم الحمام مالتنا شنو قلة حمامات عدهن

دنيا : هسه ما صار شي يا يوسف ليش تكبر الموضوع

يوسف : لج شنو ما صار شي غير اني ضغطي هبط هسه كل وعبالي انتِ جاي تنزفين دربي كمت ما اشوفه عبالي شو شبيج

دنيا : تعال وياي ، اخذت ايده وطلعت من الحمام ، خليته يكعد ورحت جبت جهاز الضغط ولكيت ضغطة صدك هابط

باوعتله ، ضغطك هابط ، هيج خفت عليه

يوسف : والله العظيم تخبلت ليش اني شعندي غيرج ، انتِ وتيم روحي من الدنيا واخاف عليكم من الهوى الطاير

دنيا : حضنته بقوة ياروحي انتِ ، ابتعدت وبست ايده احبك اني

يوسف : واني هم احبج وبالنسبة للعاملات بعد لتخليهن يطب لهنا رحمة للكعبة

دنيا : هاهي ما راح اخليهن بعد يدخلن لهنا ، كمت وهو باوعلي

يوسف : وين رايحة

دنيا : انظف الحمام

يوسف : وانتِ شكو تنظفين الحمام خو صيحي للماعدها مستحى القذرة العافت وصاختها تجي تنظف

دنيا : مالك علاقة انت ولتضل تفرفح وكوم اشرب لبن حتى يتوازن ضغطك

دخلت للحمام نظفته وشلت الفوطة ذبيتها وطلعت كعدت يم تيم العصريات نزل يوسف يم الشباب واني اخذت موبايلي متصلة بغرفة العاملات

طلعتلي وحدة من العاملات

: نعم ست تفضل

دنيا : دوجاني وين ؟

: لحظة ست هسه يصيح الها

دوجاني : نعم ست دندون تفضل

دنيا : صعديلي لغرفتي اريدج

دوجاني : حاضر ست

دنيا : شويه واندكت الباب ، تعاي دخلي

دوجاني : نعم ست

دنيا : طبي وسدي الباب وراج وتعاي كعدي يمي

سدت الباب واجتي كعدت بصفي

دوجاني انتِ تدرين بيه شكد احبج ومن يوم الي تزوجت يوسف واني اعتبرج وحدة منا وبينا واثق بيج هواي

دوجاني : صحيح ست حتى هو هواي يحبج

دنيا : ولان ادري بيج تحبيني اريد اطلب منج طلب

دوجاني : كولي ست هو يسمع

دنيا : بس اريد الموضوع يبقى بيني وبينج متفقين ؟

دوجاني : متفقين

دنيا : باعي اريدج تعرفيلي منو من العاملات اليوم عليها الدورة

دوجاني : ليش

دنيا : بدون ليش لتسأليني بس اعرفيلي منو اليوم مجازة ورديلي خبر

دوجاني : اطي نص ساعة ويجيج

دنيا : واني بانتظارج

طلعت بره واني كعدت انتظرها

تيم : ماما

دنيا : هاا امي

تيم : تاكلين

دنيا : مسحت على شعره الك حبيبي الف عافية على كلبك

ضليت كاعدة وماكو ربع ساعة وصعدتلي ، كمتلها بسرعة هااا ؟

دوجاني : عرفلج منو عليه دورة

دنيا : منو

دوجاني : سجى

دنيا : غمضت عيوني والله عرفتها بس ليش سوت هيج

تنهدت وهزيت راسي رايحة للدرج طلعت فلوس وانطيتهن الها ، شكراً حبيبتي دوجاني ما قصرتي

دوجاني : شنو هدا ست والله يزعل عليج هو يريد مساعدة ما يريد فلوس

دنيا : خليتهن بايدها ميخالف لخاطري اخذيهن تره ازعل منج والله

ابتسمت من اخذتهن

دوجاني : شكراً ست

دنيا : العفو حبيبتي ، طلعت واني لزمت راسي لالا اني هالبنية بعد ما اطيق تصرفاتها ولازم الگالي حل وياها

اخذت موبايلي متصلة على زبيدة

الووو زبيدة انتِ وين ؟

___________________________________

تقى : ايييي واخيرًا اجيتي يمي يرادلها هلهوله

ديمة : ههههههه

تقى : استريحي ولج ليش واكفه

ديمة : كعدت وباوعتلها ، اكلج شو بيتكم هدوء شنو بس انتِ بالبيت

تقى : اي امي معزومة ويه صديقاتها وطلعت من الدوام الهن وابوية طلع يتسوگ

ديمة : شنو معندج خوات او اخوان انتِ

تقى : لا عندي بس كلهم متزوجين والولد طالعين ببيوت وحدهم

ديمة : هاا

تقى : اكلج صدك سمعنا من ام كاظم انُ اخت رجلج الصيدلانية راح تتزوج

ديمة : اي صحيح

تقى : هااا ورجلها حلو لو لا

ديمة : اوكفي خلي اراويج يا ، طلعتلها صورته ودرت الموبايل عليها

تقى : دخيلك ربي شهالكيك

ديمة : هههههههه

تقى : ولج هذا وين لكيتو

ديمة : هههه ما لكينا هو لكانه

تقى : هاا يعني يحبها وخطبها اكيد صيدلاني مثلها مو

ديمة : لا ولج مو صيدلاني محامي وخطبها خطوبة تقليدية ماكو شي بينه وبينها

تقى : لعد اذا ماعنده علاقة بيها ولا وياها بالكلية وين لكاها

ديمة : باعي هو يصير حمى اختي الصغير والوحيد باخوانه ممتزوج وامه عجبتها بصائر وخطبتها اله

تقى : هاا وامورة زينه يعني متعين

ديمة : شوف هاي البطرانة حبيبتي تره اهله عدهم شركات وهو مستلم كل الامور القانونية الي بالشركة
يعني أصلاً هو مو بحاجة التعيين

تقى : ما شاء الله هيج ميسورين

ديمة : اي

تقى : زين شعجب اذا هيج حالتهم زينه اختج ما اقترحت عليهم يخطبوج الج

ديمة : اني اخذ حليم !! لا بره شسوي بي وغير هيج هو اصلاً جان يريد اختي على يا اساس اخذه اني

تقى : واختج ليش ما قبلت بي

ديمة : متحبه

تقى : والله بطرانه لج بابا حتى لو ما تحبه المهم يعيشها عيشه زينه منو بهالوكت بعد يفكر بالحب

ديمة : تره اختي ماخذه ابن عمي وعايشه عد بيت جدي وبيت جدي حالتهم المادية فوق الممتازة اوكفي خلي اراويج بيتهم

تقى : حييييل هذا كله بيت

ديمة : كلولي ما شاء الله ولج

تقى : ما شاء الله شبيج ولج هسه قابل راح احسدكم

ديمة : ضحكت ميخالف الحذر واجب

تقى : اكول ديمة يعني انتِ اهلج ما شاء الله حالتهم مبينه كلش زينه شعجب يعني انطوج لهيج ناس

العفو اني ما اقصد شي همه خوش ناس وحبابين والله بس للصراحة فرق السما عن الكاع بينكم وبينهم

ديمة : تنهدت بدون ما اجاوبها

تقى : لتزعلين مني اني اسفة احتمال اكون تدخلت بشي ميخصني

ديمة : لا ما زعلت بس عبالي اني الوحيدة الي ملاحظة هذا الشي

تقى : لعد اذا ملاحظة ومن البداية شورطج هاي الورطة

ديمة : هاا ، هي هاي بعد قسمتي

تقى : قسمة شنو !! تره الزواج اختيار شعليها القسمة
بس كولي انتِ حبيتي واخذتي رغم كل هالفروقات

ديمة : ابتسمت تصدكين اذا اكلج كل مشاعر تجاهه ماعندي

تقى : عزه العزاج لعد ليش تزوجتي ولج بس لا غلطانة ويا

ديمة : احترمي نفسج غلطانة ويا شنو بس مريت بظروف صعبة جبرتني اوافق عليه

تقى : وظروفج هاي خلصتي منها لو بعدج

ديمة : لا الحمدلله خلصت

تقى : احجي ومتزعلين

ديمة : لا احجي

تقى : اذا ظروفج الصعبة خلصت وانتِ مدتكدرين تعيشين ويا ليش متنفصلين

حرامات هذا العمر ديروح هيج منو يستاهل تضيعين حياتج وشبابج علموده

ديمة : ما اجذب عليج واكلج ما فكرت بالموضوع بس ما اكدر ، تقى امين يحبني

تقى : وباجر عگبة اذا كبرتي وعجزتي وروحتي عليج احلى ايام عمرج بهذا الفگر وويه انسان متحبي شراح تكلين لروحج

يعني مشاعر امين مهمة عندج بس مشاعرج انتِ مو مهمة هو عادي يضل طول حياته وياج لان يحبج بس انتِ مو عادي تعوفي لان متحبي

برأيج هو لو بمكانج جان راح يكمل وياج وهو ميحبج لا طبعًا الله وكيلج شهر شهرين ويطفشج من يمه يكلج روحي شوفي حياتج اني ما اريدج

ديمة : لا امين مستحيل يسويها ، انتِ متعرفي شكد انسان خلوق ومحترم ماعنده هالسوالف

تقى : حتى لو كلامج صحيح بس انتِ ما مجبورة تبقين ويا والله شنو لان يحبج زين ومشاعرج انتِ
شنو ذنبها

ديمة : متتخيلين شكد اتمنى انفصل بس اخاف احجيها وادمره

تقى : وليش انتِ التطلبين الانفصال خو خلي هو يطلبه

ديمة : مستحيل امين ميسويها لو يموت داكلج يحبني

تقى : انتِ لتطي وجهه ونكدي عليه وشوفي شلون راح يطفش منج

ديمة : هاا يطفش

تقى : اي طفشي يمعودة وخلصي كلمن يصيح يا روحي وانتِ كاعدة تفكريلي بمشاعرة

ديمة : داجاوبها ودگ موبايلي ، شلته الووو دنيا ، حتمرين عليه ؟ ليش خو ماكو شي

يله يله حطلعلج على الشارع العام ، تمام تمام ، بيباي
سديته وباوعت لتقى اني اسفة بس مضطرة اطلع

تقى : براحتج گلبي بس رجعي زوريني حتى نكمل كلامنا

ديمة : ان شاء الله ، طلعت منها وخابرت امين بلغته ومشيت

____________________________________

زبيدة : لبست جنطتي ورحت يمه ، ندسته حتى يكعد
هارووون حبيب اكعد

هارون : شتردين

زبيدة : اني طالعه

هارون : واني شكو

زبيدة : كلت انطيك خبر خاف تكعد متلكاني وانوب تتخربط

اباوعله وخر الغطه وكام على حيله ، اني شفته كام وطلعت اركض من الغرفة واسمعه يغلط عليه جوه

ضحكت ونزلت جوه ، تلكتني بيبتي بالباب

حمزية : ضحكة خير ان شاء الله ، شنو طالعة

زبيدة : حبيبتي بيبي ، اي طالعة اتعشى ويه خواتي

حمزية : اي شكو بيها روحي وتونسي

زبيدة : هو هيج ، يله باي

حمزية : صدك ذكرتني ما دام رايحة تشوفين خواتج كليلهن باجر معزومات هن ورجولتهن على حفلة عرس الساعة بـ8 بالليل

زبيدة : عرس منو ؟

حمزية : صديق جدج وابن عمة ، حفيدة الوحيد راح يعرس وخابر جدج عزمة وكله اريد عائلتك كلها تجي
وجدج اصر الكل يحضر

زبيدة : حتى هارون ؟

حمزية : ليش هارون وحد شنو شعره اخضر واني ما ادري

زبيدة : ضحكت على حجايتها لا مو اني سامعة بي ميحضر اعراس

حمزية : مو بكيفه هو بالذات لازم يروح

زبيدة : شمعنى ؟

حمزية : غير يشتغل هو واولاد عمامج ويه جدج والكل هناك راح يسأل عليهم واهل جدج من النوع
الياخذون على خاطرهم من كلشي فإذا احد ما حضر يزعلون

زبيدة : هاا كتيلي ، لعد يله خلي اروح اني دزيتلها بوسة وطلعت

اخذني عقيل للمطعم ذبني بالباب وراح ، نزلت ودخلت جوه لكيت دنيا وديمة كاعدات سلمت عليهن وشمرت جنطتي

خير دنيا جبتيني مناك اركض ، شكو شصاير وياج هلي ردينا ننحمع بمكان عام ونحجي

ديمة : تعاي شوفيها جابتني الطريق كله تفرفح اريد افتهم كلمة منها ماكو

زبيدة : احجي دنيا

دنيا : ولجن سكتن اريد اموت

ديمة : خير شصاير هسه غير نفتهم

دنيا : قبل حوالي شهرين او اكثر اجتي عاملة جديدة عدنه استلمت مكان امها بالبداية اني نفسي تعاطفت ويه البنية لان شابة ومبينه انسانة بسيطة وجنت احجي واسولف وياها طبيعي

بس ولجن البنية مريبة ، تتبلى على بيت عمو بكلام اصلاً ما صايرة

تخيلن مرة من المرات كلتلي عمو يحيى ديتحارش بيها

زبيدة : تاكل تبن جذابة بنص عينها عمو يحيى ميسويها

دنيا : ولج هنا المشكلة اني ما صدكتها بس هي بندت من البجي وتحجي بحرگة گلب حفزت الشكوك بكلبي
وخلتني اشك بعمو

تالي سمعتهم يحجون بالمطبخ وعمو جان ديحجي وياها بكل الاحترام ومن واجهتها تكلي يجوز اني متوهمة

ديمة : اييييع هاي شتحس

دنيا : ومو بس هيج احسها تحاول تسوي اي شي في سبيل تفتح موضوع وياي

وهم داشوفها هواي حاطة بالها يم يوسف وتيم تخيلن مرة دندور على تيم كلبنا البيت كلاب عليه
تالي لكينا يمها ومن رزلها يوسف سوت كيكة اله واجتي تعتذر منه

زبيدة : وعلى يا اساس تسويله كيك شنو ابن عمها الربعي

دنيا : ياريت لو السالفة بس على الكيك ، تنهدت ولجن بالجديد داحس اكو بينها وبين يوسف شي

ديمة : لا دنيا كلشي ولا هاي السالفة يوسف يحبج يموت عليج ميسويها

دنيا : واذا اكلج من بتنا عند اهلي رجعت لكيت دشداشتي مالت النوم ملبوسة ومشمورة بالشلة
واني اصلا ملابستها ومن شميتها لكيت عطرها بيها

زبيدة : وانتِ شلون عرفتي العطر الها

دنيا : سولفتلها الي سويته بالتفصيل

زبيدة : باعي هو يوسف مستحيل يسويها بس منكدر نجزم بهالشي بالنهاية الزلم نفوسهم دنيه حتى على الچلبة

ديمة : لا زبيدة انجبي يعني هو سنين باقي بدون مرة وما سوالها تالي من رجعتله دنيا يسويها شنو مخبل

زبيدة : والله ما اعرف بس السالفة مو منطقية

دنيا : تدرن هسه قبل لا اجيجن جنت احجي ويه يوسف تخيلن صاحلي راوني المقعد لكيته كله دم واكو فوطة كلها دم يم المقعد

ويوسف تخبل كل وعباله اني جاي انزف ومن كلفت وحدة من العاملات تتطقسلي فنجن منو الطلعت
عليها الدورة من بين كل العاملات ، سجى !!

زبيدة : عود يعني هي من خلال هالتصرف الغريب شتريد تحقق

ديمة : اكلج دنيا اخاف هاي البنية مريضة لان هاي التصرفات مو تصرفات شخص عاقل

زبيدة : قصدج تصرفات وحدة بـ****

ديمة : عزه زبيدة شهالالفاظ

زبيدة وهذا واقع هي لوما هيج متتصرف بهاي الطريقة

دنيا : عوفجن من هالحجي هسه وكللي شسوي راح اتخبل والله

ديمة : حاجي يوسف عنها وخلي هو يحطلها حد

زبيدة : جؤ اكبر غلط تسوي هذا لان حتى لو عنده شي وياها راح ينكر وبالعكس محتمل انوب يتحذر حتى لا يخليج تحسين على شي

دنيا : لعد شسوي فهميني دماغي صار طبل واخاف اتصرف تصرف اتندم عليه بعدين

زبيدة : حكيت حاجبي بتفكير ، سمعي الراح اكوله ونفذي بالحرف الواحد

بديت اشرحلها شتسوي بالتفصيل الممل وهي صافنه بوجهي لمن كملت واشرتلها هااا وصلتج المعلومة لو اعيد

دنيا : واذا لكفني يوسف شكله

زبيدة : لتخافين ميكلفج

دنيا : واذا طلع الي ببالي صح شسوي

زبيدة : اقرب مكتب محامي وتتطلكين كلشي ينغفر الا الخيانة واذا طلع يوسف يخونج تمحي من حياتج
كلها

دنيا : وتيم

زبيدة : يبقى عندج لتخافين من هالناحية تيم روحة بيج ومتعلق بيج مو شلون ما جان مستحيل يتحمل فراكج وهو ما راح يكدر يسيطر عليه بعد ما تعود عليج يعني مصيرة بالنهاية يمج

دنيا : يارب ميطلع يوسف عنده شي وياها

ديمة : رغم كل الحجينا بس اني متأكدة يوسف ميسويها

دنيا : اني هم هيج اكول ، يله خلي اطلبلجن اكل

زبيدة : طلبن خواتي اكل واني كعدت اشرب جاي ، باوعن صدك بيبي كالت انتن معزومات ويه رجولتجن باجر على عرس الساعة بـ8 بقاعة الـ******

دنيا : اني احتمال ما اجي روحي مالي خلگها

زبيدة : مو بكيفجن بيبي تكول لازم الكل يحضر

ديمة : اني بالنسبة الي ضايجة واكيف صدك دنيا هسه ثبتو المشية على الخميس

دنيا : اي على نفس الموعد

زبيدة : يعني هاهي بصائر انطت الموافقة

ديمة : طايرة طيور اصلا

زبيدة : الله يسعدلها ويساعدها

ديمة : ههههه هسه ما فهمنا يسعدها لو يساعدها

زبيدة : الاثنين ، كملن اكل وكعدنا نسولف شويه ودگ موبايلي شلته شفته هارون ، رديت الووو

هارون : انتِ وين

زبيدة : بالمطعم كاعدة ويه خواتي

هارون : خلصتي لو بعدج

زبيدة : لا خلصت

هارون : يله جايج

زبيدة : تمام اني بمطعـ... قاطعني

هارون : اعرفه

زبيدة : سده ، باوعت اخواتي هارون حيجي

دنيا : لعد احنه هم خلي نطلع ما دام كملنا ، يله دمودم امشي

ديمة : بيباي زبد

زبيدة : ابتسمت بيباي ، طلعن هن واني كعدت انتظر الشفيه

ربع ساعة ورمش عليه ، اخذت غراضي وطلعت لكيته واكفلي بالباب ، فتحت الباب وصعدت يمه ، سلام

هارون : هله

زبيدة : تمغطت وسألته ، ليش انت اجيت

هارون : جنت طالع وكلت اخذج بطريقي للبيت

زبيدة : بس اني ما اريد ارجع للبيت

هارون : ليش وين تردين تديحين بعد

زبيدة : للمول

هارون : شعندج

زبيدة : اريد اشتري فستان لعرس حفيد كرايب جدي
اذا متحب تاخذني نزلني هنا اخابر عقيل

لو اكلك عليمن اخابر عقيل انت تاخذني شنو يمه بس محسوب عليه رجال وكلشي ما مستفادة منك

هارون : لسانج

زبيدة : شبي

هارون : گصري لا اكصه الج

زبيدة : طلعتله لساني ، يله گصه

اباوعله اندار عليه وصفن بوجهي ، رجعت لساني وكعدت عدل عشتو يكص لساني ، رجفت كمت ارعص منك

هارون : لا اله الا الله

زبيدة : الف مرة مو مرة

وين راح تاخذني ؟

هارون : للصخام مو تردين للمول

زبيدة : اي عفية ، ضل يسوق وهو ساكت واني مليت من الاجواء

مديت ايدي على المسجل علكته وطلعلي تسجيل مالت عزف

باوعتله تدري اني كلش احب الفن خصوصاً الكتابة والرسم والعزف ، ابتسمت بالذات على الكلارنيت

هارون : تحبين الكلارنيت ؟

زبيدة : تنهدت اموت عليه

هارون : احم ، يا مول تردين ترحين

زبيدة : انطيته اسم المول ورجعت اباوع للطريق واسمع من وصلنا صف السيارة بالكراج

هارون : نزلي اشتري التردي واني انتظرج هنا مو تتأخرين

زبيدة : اوك ، نزلت من السيارة ومشيت باتجاهه فتحت بابه ومديتله ايدي

هارون : شكو ؟

زبيدة : انزل وياي

اشرلي بايده

هارون : روحي روحي مالي خلكج

زبيدة : انحنيت جريت ايده حيل ومشيت ساده الباب برجلي

هارون : انتِ مسودنة شلون تتجرائين تلزميني هيج كدام العالم

زبيدة : انداريت عليه ، حبيبي اني لو ما مسودنة ما جان حبيتك

يله امشي لتعوفني وحدي استحي من الشباب خاف واحد يتعرضلي

سوالي حركة بايدة

هارون : هوهو

زبيدة : ههههههههه عزه هارون شهالحركة هاي

هارون : علساس استحيتي هسه

زبيدة : ابتسمت وشديت على ايده ماشيه وهو وياي

دخلنا لداخل المول وضلينا نفتر ، دخلت لاول محل وما عجبتني الملابس

هارون : استعجلي اريد ارجع تعبان

زبيدة : سويت روحي ما اسمع ، تعال ندخل هنا ، دخلنا لمحل كله فساتين مال محجبات

عجبني واحد على العارضة لونه اسود وبي لمع كلش بسيط بس يجنن

باوعتله شنو رأيك ؟

هارون : بشنو ؟

زبيدة : بهذا الفستان حلو مو

هارون : واني شعليه قابل اني الراح اللبسة

زبيدة : لتكسر واهسي فدوة گلي حلو لو لا

اباوعله لزم الفستان كلبه ورجع باوعلي

هارون : حلو

زبيدة : يعني اخذه ؟

هارون : بكيفج

زبيدة : انت شتكول اذا البسه يطلع حلو عليه لو لا

هارون : وشمدريني اني

زبيدة : بره منك شكد كئيب ، اشرت للوظفة اريد هذا فدوة وانطيتها قياسي

راحت جابتلي يا اخذته وتشكرت منها ، انداريت انطيته لهارون واشرتله ، يله حبيب روح ادفع

هارون : واني شكو حتى ادفع قابل اني الراح البسه

زبيدة : انت زوجي يعني غصبًا ما عليك لازم تصرف عليه خوما اني ادفع وحضرتك نايم عالفلوس نيوم

وحتى لو نفرض اني الردت اني ادفع راح تجي انت تحطلي فلوسه يم راسي شبعت من سوالفك المفستكه هاي

هارون : دخيل محمد على هالعضلة العندج ، جيبيىي

زبيدة : اخذ الفستان دفع فلوسه واجه شايل الكيس البي الفستان

هارون : تفضلي ست

زبيدة : حبيبي انت

اخذته منه ولزمت ايده ومشيت

هارون : وين مولية بعد مو اشتريتي فستان

زبيدة : اريد اشتري حذاء وشال بعد

هارون : اللهم طولج يا روح

زبيدة : دخلت لمحل الاحجبة اخذت شال ستن لونه بيجي وطلعت اشتريت حذاء بلون الشال واكسسوات

وهارون بعدله شويه وينفجر عليه كدام الوادم من كد ما صار عصبي

هارون : ما خلصتي صارت بـ12 بالليل

زبيدة : يله كملت بقى بس انت

هارون : اني !!

زبيدة : اي غير نشتريلك قاط

هارون : ومنو كلج ماعندي حتى اشتري كنتوري مليان قوط امشينه

زبيدة : حتى لو نشتري جديد شخسرانين ، امشي امشي هذا المحل مبين بضاعته حلوة

اخذت ايده ومشيت داخله للمحل ، انطيته الغراض وضليت افتر بالمحل ، عجبني قاط اسود شلته وافتريت على هارون هااا ؟

هارون : شنو ؟

زبيدة : شنو رأيك حلو مو

هارون : حلو

زبيدة : باوع راح اخذلك هذا القاط وننسق ويا قميص اسود ومنديل بيجي والحذاء اسود شنو رأيك بالتنسيق

هارون : حضرتج بس لا ناوية تنسقيلي وياج ؟

زبيدة : حركت كتافي شكو بيها

هارون : شهالسوالف مال المراهقين هاي

زبيدة : ديله يالعجوز هو كلك 33 سنة لتعيش الدور كلش

باوعت للموظف من رخصتك اريد هذا القاط وهم هذا الموديل مالت القميص بس لون اسود ومنديل بيجي
اذا متوفر

اخذنا كلشي على قياسه وطلعنا بس محملين غراض
طلعنا من المول وبوجهنا للبيت

دخلنا لكينا البيت اظلم طبعًا لان جانت الساعة بالوحدة ونص ، صعدنا فوك فتحت الباب وخليت هارون يدخل وهو شايل كل الغراض خوما اني اشيل

عشتو خلي يشغل عضلاته شويه المن مربيهن اذا منستفاد منهن

تمغطت اوووف تعبت ، شكراً حبيب تعبتك

هارون : وخري عن وجهي روحي جزعانة منج تره

زبيدة : دخل للحمام واني رحت علكت الملابس وبدلت واجيت تمددت على الجرباية

شفته طلع من الحمام ينشف بوجهه وباقي بس بالبجامة ، شافني وقطب حواجبة مستغرب

هارون : هاا خير شو نايمة هنا ؟

زبيدة : ليش وين المفروض انام ؟

هارون : كومي كومي اني ما احب واحد ينام يمي

زبيدة : بس اني مو اي واحد حبيبي

هارون : للمرة الاخيرة اكول كومي منا وكافي استهتار
عود عبالج بهاي التصرفات يعني راح احبج

زبيدة : انت مو راح تحبني انت اصلاً تحبني حبيبي

هارون : شوفي اني جاي من سفر وتعبان من غير الفرة الي افتريتها هسه راسي صاير طبل وكلش مالي خلك سوالفج

زبيدة : عجيب هسه اني يمك كرباك ، اني نايمة بجهه بعيده عنك وانت ذاك وينه مكانك متنام بي منو يمك
والله يا الله

انداريت وانطيته ظهري غمضت عيوني داريد انام وحسيت الفراش ينخفض عرفته نام

اسمعه يدردم بينه وبين روحه

غلست ونمت بس كل شويه افز بسبب حركته ورايه
ضليت كاعدة ما كدرت انام احس روحي متوترة ما اعرف ليش

رغم إني ابين مدايرة بال بس كلامة حيل يوجعني لكن مع هذا داضغط على نفسي لان اعرف صعوبة
الموضوع بس بالبداية ومتأكدة بالنهاية راح يتحقق الي اريده وهالشي مخليني بقمة صبري

حسيت بي يصير قرب على ظهري ، كزبر جسمي من حسيت براسة قريب على ركبتي واول ما حسيته يدنك ديريد يبوسني انداريت عليه ولزمت راسه

لزمتك ، شكاااعد تسوووي هااا منو الديتحرش ويتلزگ بالثاني هسه انييي لو انت ابووو الجذب

جر راسه من ايدي ودفعني وكام ولا كإنما مسوي شي ، دنك اخذ مخدته وكام يباوعلي ويخوزر

هارون : تأدبي واحترمي نفسج وكلمة جذاب بعد اذا اسمعها حلكج افركه

زبيدة : شفته يريد يمشي باتجاه الكنتور صحتله هاروون

هارون : شكو

زبيدة : جريت المخدة من جوه راسي ، تعال اخذ مخدتي بيها ريحتي لتروح تدور على فراشي ما راح
تلكا بالغرفة

هارون : شكاعده تمسلتين انتِ

زبيدة : دهاك اخذها يمكن تفيدك صحيح ماعدها ركبة صالحة للبوس بس بيها عطري مشي امرك بيها هههههههه

هارون : سخيفة

زبيدة : ضحكت بصوت ولزمت بطني خرب عرضك شكد راسك يابس وجذاب

تغطيت عدل وغفيت حتى ما عرفت وين راح نام ، من التعب ما كعدت غير ثاني يوم بس شنو مرتاحة

كمت من الفراش ما لكيته بالغرفة باوعت للقنفه لكيته نايم هناك وعايف مخدته ، كمت عدلت الفراش ورجعت مخدته على الجرباية ودخلت للحمام

غسلت وفرشت اسناني وطلعت حتى ابدل وانزل
ويه طلعتي لكيته بالغرفة بس وجهه ميبشر بالخير

صباح الخير

هارون : اسمعي نقطة على السطر هاي اخر مرة اسمحلج تنامين على فراشي افتهمتي لو لا

زبيدة : اش اش تعال اريد اشبگك ، تقربت حضنته وتنهدت براحة ، هو جمد بمكانه ومابده اي ردة فعل همستله احضني هارون

حسيت بي يرفع اديه ويشبكني بقوة ، غمضت عيوني وشديت على اديه الحاضنته

شميته وجريت نفس اااااخ شكد مشتاقتلك ، متتخيل شكد ارتاح من اصير بحضنك ما بودي ابتعد عنك ابد

حسيت بي يقربني عليه اكثر

هارون : ضعفانه

زبيدة : ابتعدت وباوعت لعيونه ، رفعت ايدي خليتها على لحيته ، البارحة قبطت 23 يوم

23 يوم بدونك هدن حيلي هد ، تعبت نفسيًا لدرجة متتخيلها ، 23 يوم جانن من اصعب الايام المرن عليه بحياتي

هارون : وانتِ من شفتيني اذيتج لهاي الدرجة ليش رجعتي يا زبيدة ليش

زبيدة : مسحت على لحيته ، لوما بداخلي يقين يگلي
هالهارون جذاب ويحبج يموت عليج ما جنت راح افكر إني ارجع

تقدمت بسته من خده بعمق وابتعدت ، اني ما اعرف
شنو السبب الي مانعك تبوح بمشاعرك تجاهي بس متأكدة انُ حيجي يوم وتجي انت من ذاتك تصارحني بهذا الشي

ومنا لذاك الوقت ، رجعت بسته بخده مرة ثانية ، اني راح اضل احبك وما راح اعوفك ولا راح امل منك ولا
اجزع من حبك

بالعكس اني بالدقيقة الوحدة حبي ديزيد الك بدال المرة الف وانت قيس اني شكد هيمانه بيك

سحبت اديه عنه وابتعدت ، انت بعدك ممتريك مو ؟

جاوبتي وصوته كوه ديطلع

هارون : لا

زبيدة : ابتسمت لعد انتظرني هسه بس ابدل وانزل اسويلك ريوك

رحت لبست عباية فوك هدومي ولبست حجابي ونزلت للمطبخ مالكيت احد بس العاملات حتى بيبتي وجدي ماكو تفاجئت

طلعت اجبان وسويتله جاي ، رتبت الميز وصحتله اجه تريك واني كعدت بصفه سانده ايدي على خدي
وصافنه بالفراغ

فززني صوته

هارون : ليش متاكلين

زبيدة : ما اشتهي

هارون : البارحة انتبهتلج كلشي ما اكلتي وهسه جاي تكولين ما اشتهي

زبيدة : لان فعلاً ما اشتهي واذا جبرت روحي اضل اتقيء واتخربط فما اكل

هارون : ما رحتي للدكتور

زبيدة : جؤ لا

هارون : ليش ؟

زبيدة : مجان الي خلك

اباوعله هز راسه وسوه لكمة صغيرة وقرب ايده من حلكي

هارون : فتحي حلكج

زبيدة : كتلك ما اشتهي

هارون : حتى لو جبري روحج وان تقيئتي شويه شويه تتعود معدتج مرة ثانية على الاكل

زبيدة : ما اكدر والله

هارون : لخاطري اقصد يعني اكلي بس هاللكمة ميصير تبقين هيج

زبيدة : اكلت من ايده ، اباوعله شال استكانه وشربي جاي ورجع سوالي لكمة ثانية اكلتها كوه ومن سوالي بعد لزمت ايده كافي حباب ما اكدر بعد

هارون : على راحتج

زبيدة : ضليت كاعدة وبحدود الربع ساعة هاجت عليه معدتي وركضت للمطبخ كمت اتقيء

حسيت بايده على ظهري

هارون : ميخالف ميخالف حتى لو تقيئتي المهم اكلتي

زبيدة : كمت من السطلة ورحت تمضمت وغسلت

هارون : هاا ارتاحيتي

زبيدة : هزيتله راسي وتنهدت يمه طلعت روحي

هارون : روحي بدلي بس استعجلي

زبيدة : ليش ؟

هارون : لازم نروح للمستشفى محتمل صاير عندج جرثومة بالمعدة ولهالسبب ما جاي تكدرين تاكلين

ومن هسه اي تعليق ما اريد بوجهج فوك تبدلين وتنزلين بسرعة يله

زبيدة : صعدت بدلت ونزلت لان صدك داحس روحي جزعانة من القيء واللعبان نفس هذا

طلعنا من البيت واني سألته ، انت مو عندك دوام ؟

هارون : اكو من يشيل مكاني المهم انتِ هسه

زبيدة : كرصت خده للللك صدقة

نترت ايدي وعاط بيه

هارون : تأدبييي

زبيدة : ضحكت يربي شكد اتونس من انرفزة

وصلنا للمستشفى قطعنا وصل ورحنا للطبيب ، كعدنا ننتظر ولمن اجه سرانا دخلنا ومن شرحتله حالتي طلب اسوي تحاليل وسونر للمعدة

طولنا علما كملنا كلشي ودخلناله

: تحاليلج سليمة واعضائج كلهن نظيفات

هارون : لعد اذا ما بيها شي شنو سبب القيء جسمها ما جاي يتقبل كلشي

: احتمال السبب نفسي لان هاي التحاليل كدامي سليمة والسونر هم مابي شي

هارون : كتلي سبب نفسي

: احتمال جبير

زبيدة : اباوعله هز راسه وكام تشكر من الدكتور واخذ ايدي وطلعنا

هارون : الدكتور يكول مرضتج سببها نفسي ، لهالدرجة جنتِ تعبانة نفسيًا

زبيدة : بكد ما جنت انت تعبان ويمكن اكثر

اندار باوعلي ، جر حسرة شكبرها ورجع يسوق

هارون : حاولي اليوم تشربين شوربات وشوية شوية راح نزيد الاكل بوجباتج حتى تستعدل معدتج

زبيدة : تمام ، وصلني للبيت ودخلنا سوه بعد مراح لدوامه لان رجعنا بـ12 الظهر من المستشفى

تغدينا وبده الكل يتحضر يتحضر للعرس اني صعدت نمت وهارون طلع

كعدت العصر سبحت وطلعت لبست الملابس الي اشتريهن وخليت مكياج ترابي بسيط كلش ووكفت لفيت شالي ولبست حذائي

سمعت الباب ينفتح ، شفت هارون يدخل جان مبدل
ومكمل كلشي

حرفيًا جان طالع يجنن مدري اني لان احبه اشوفه هيج حلو

انتبهتله يباوعلي ، سألته شنو رأيك شلون طالعة ؟

هارون : تخـ.... مرتبة طالعه مرتبة

زبيدة : ابتسمت ورحت فتحت الكنتور مطلعه المنديل ، تقربت خليته بالجيب مالت الستره على شكل مثلت

مسحت عليه وعدلت السترة ، باوعتله بالمناسبة انت هم طالع تخبل

هارون : احم ، نطلع ؟

زبيدة : يله ماعندي شي بس اجيب جنطتي ، اخذت جنطتي وموبايلي ومشيت

طلعنا من البيت احنه وبيت عمي فاضل لان الكل سبقنا

وصلنا للقاعة صف هارون السيارة ونزلنا دنريد ندخل للقاعة وصار بوجهنا حليم

تفاجئت من شفته گبالي هذا شجابه ، اباوعله من شافني ابتسم وتقدم مادلي ايده

حليم : شلونج زبيدة

زبيدة :

*************************************
لهنا يكون خلص البارت ان شاء الله يكون عجبكم ❤️
+لتنسون التصويت والتعليق برأيكم ❤️

شنو رأيكم بالأحداث ؟

شنو تتوقعون حيصير بالبارت الجاي ؟

.