الموت الحي الفصل السادس وستون 66 - بقلم براء الموسوي

مرحبا حبايبي العسل شلونكم ❤️❤️

#الموت الحي
#للكاتبة براء الموسوي

زبيدة : سميت بسم الله ودفعت الباب داخلة لجوة ، طلبت موعد وكعدت

شويه وسمحلولي ادخل ، كمت دكيت الباب وخلت

السلام عليكم

: وعليكم السلام

زبيدة : شلونج سهير

سهير : اهلاً وسهلاً زبيدة نورتي العيادة ، تفضلي استريحي

زبيدة : كعدت وباوعتلها ، اشوفج ما استغربتي من شفتيني

ابتسمت وجاوبتني بكل هدوء

سهير : وليش استغرب ، انتِ إنسان حالج من حالي وحال باقي البشر شنو الغريب اذا جنتِ تمرين بمشاكل نفسية واجيتِ هنا دتطلعين الي
بداخلج

بالنهاية احنه كائنات حساسة وطبيعي تكون بداخل ارواحنا جروح تحتاج العلاج ومو غلط نبحث ونسعى
حتى نعالجها

زبيدة : هزيت راسي ، صحيح كلامج بس اني اليوم اجيت لهنا علمود موضوع شاغل بالي ومتحاجة الكاله حل والاتمنى منج انج تساعديني

سهير : اكيد راح اساعدج

زبيدة : وهم ما اريد اعرف يعرف بجيتي لهنا ولا حتى دنيا اختي

سهير : لتخافين الي راح يدور بيني وبينج ما ممكن يتجاوز حدود العيادة فاطمئني

زبيدة : تمام

سهير : قبل لا نبلش الجلسة تحبين تشربين شي ؟

زبيدة : مي اذا ممكن

سهير : اكيد

زبيدة : كامت طلعت من الثلاجة بطلين مي وخلتهن كدامي

سهير : اشربي وارتاحي وشوكت متحسين نفسج مستعدة نحجي بلغيني

زبيدة : شربت وخليت البطل على الطبلة ، اني جاهزة واريد نبلش هسه

سهير : واني كُلي اذن صاغية تفضلي ، افتحيلي قلبج يا جميلة

زبيدة : باعي هو اا اني ، هو ااا شوفي اني ااا ، اشرتلي بأيدها وقاطعتني

سهير : زبيدة حبيبتي

زبيدة : نعم

سهير : اهدي حبيبتي ماكو داعي لكل هذا التوتر ، احنه كاعدين نسولف ليش متوترة هيج

زبيدة : لا ما متوترة بس عادي اكوم اتمدد هناك ما اريد اباوعلج واحجي

سهير : وين متردين كعدي المهم تسوين الشي الي يريحج حبيبتي

زبيدة : رحت تمددت وغمضت عيوني

سهير : اذا جاهزة تفضلي

زبيدة : تنهدت وبديت احجيلها ، باعي بدون لف ودوران اني احب واحد وبالجديد اكتشفت هو ميبادلني نفس المشاعر

سهير : وشلون اكتشفتي هذا الشي

زبيدة : اعترفتله

سهير : وشنو السبب الخلاج تبادرين وتبوحين اله بمشاعرج

زبيدة : جان بداخلي احساس فضيع يأكدلي انه يحبني مثل ما اني احبه لكن انصدمت من ردة
فعله الفاقت كل توقعاتي

سهير : طيب شنو الي اكدلج انه يحبج مثل ما انتِ تحبي

زبيدة : دمعت عيوني ، حنيته عليه ، التمست منه اهتمام ما شفته غير من والدتي الله يرحمها ، حتى نظراته الي ابد ما جانت عادية

سهير : شلون يعني

زبيدة : لمن جنت اكعد واسولف ويا الكه عيونه تلمع بشكل غريب ، جنت احس نفسي مميزة من اباوع
بعيونه شلون وليش ما اعرف

سهير : طيب ومن اعترفتيله شنو جانت ردة فعله

زبيدة : ضحكت من بين دموعي وفتحت عيوني

كل ما بالموضوع انه طلع ديمثل عليه حتى يخليني اتعلق بي واحبه ومن حبيته صدك واعترفتله بحقيقة مشاعري تجاهه صارحني بالمخطط الي بباله حتى ينتقم مني ويكسرني

بس تدرين من صدك عاشت ايده ، خطط ونفذ بدون لا يحط نفسه موضوع شك ولو للحظة وحدة وفعلاً
سوه اليدور بباله بالحرف ، انتقم مني ، كسرني ، هشملي روحي وبدون ليرفله جفن

سهير : اكدر اعرف منو هذا الشخص ؟

زبيدة : هارون

سهير : زوجج !!

زبيدة : اي

سهير : طيب ليش راد بنتقم منج

اذا امكن تحجيلي كلشي يخص علاقتكم من اول ما شفتي لحد ما اعترفتي اله

زبيدة : بديت احجيلها كلشي من اول ما اجينه لبيت جدي لحد اخر موقف صار بيني وبينه ومن وصلت لاخر حدث انهاريت وكمت انشغ حتى صوتي راح

سهير : اشربي مي حبيبتي على كيفج ويه نفسج كلشي اله حل بأذن الله

زبيدة : شربت ومسحت عيوني

سهير : اذا تحبين اليوم نوكف ونكمل حجي بالجلسة الجاية

زبيدة : لا اريد اكمل ، الموضوع الاساسي الاجيت علموده لسه ما حجينا بي

سهير : الموضوع ما طاير ، اعتبري جلسة اليوم عبارة عن كعدة فرغتي بيها الي بداخلج

وخلي الحديث عن الموضوع الي ببالج على الجلسة الجايه

زبيدة : بس اني اريد اخلص اليوم

سهير : ما انصح بهالشي صارلنا ساعتين وانتِ حاليًا منهارة وكثرة الضغط عليج مو صحيح

المهم اليوم انه كدرنا نطلع الي بكلبج ونخليج تفرغين ولو جزء بسيط من الي بداخلج

اني افضل ترحين هسه للبيت ترتاحين وان شاء الله الاسبوع الجاي تجيني ونكمل حديثنا وين ما توقفنا
تمام ؟

زبيدة : تمام ، كمت عدلت ملابسي وباوعتلها

شكراً سهير لان سمعتيني جنت كلش محتاجة احجي وانتِ مقصرتي بالاستماع

سهير : اني موجودة وبأي وقت تحتاجيني راح تلكيني وياج

زبيدة : هزيت راسي وودعتها وطلعت ، اخذت تكسي ورجعت للبيت

وصلت للبيت ، فتحت الباب ودخلت للصالة لكيت خواتي ودادا وخالة كاعدات وبس شافني كامن

دنيا : وييين جنتتتتِ انتتتتِ من الصبح اتصل عليج ليش جهازج مغلق

زبيدة : اسفة جنت حابه اكعد ويه روحي شويه

وئام : صارلج تسع ايام كاعدة ويه روحج ما شبعتي

زبيدة : خالة رجاءًا تره مالي خلك

ام حسن : يا حبيبتي يا زبد تصرفج مو صحيح اولاً انتِ مريضة ومو مال تطلعين وحدج وثانيًا قافلة موبايلج وناسيتنا

يعني ما فكرتي بينه كلتي ذولة خطية راح يخترعون من يشوفوني ما موجودة وفوكاها قافلة موبايلي

زبيدة : اني اعتذر بس صدقًا بالي مو يمي ومداجمع اعذروني

من رخصتكم

دنيا : تعاي وييين رايحة وييين ، شنو هذا الحال الي انتِ بي ، اني البارحة ما ردت احجي كلت اعوفج على راحتج

بس هسه لا ما اكدر اسكت ، انتِ شايفة روحج ؟ شايفة وضعج شلونه ؟ ، صدك تحجين شصاير وياج
حتى واصلة لهالمرحلة

عمي انعل ابو الراح ويابو الاجه شنو الوضع الواصلته انتِ حرام عليج نفسج

وجهج صاير جنه حبة عدس ، الهالات نازلة على خدودج من قلة النوم ، منو اليستاهل تسوين بنفسج هيج علمودة

زبيدة : انتِ لشنو كاعدة تلمحين ؟

ديمة : هذا السؤال جوابه يمج زبيدة ، احجي فهمينا شنو الي بيج يا حبيبتي احنه خواتج اذا النا متحجين لعد المن تحجين

ليش ضامة كلشي بكلبج ، حتموتين من الكتمان واحنه منريد نخسرج والله

زبيدة : اني تعبانة بنات واريد ارتاح ، انتن اخذن راحتجن اني رايحة انام

دنيا : عافتنه وصعدت فوگ ولا كإنما دنحجي وياها ، يربي هالبنية مينوخذ منها لا حق ولا باطل

كعدت ولزمت راسي ، يربي شلون بيها هالبنية شلون ما جاي اعرف اتصرف وياها لا طبيب تقبل تروح لا اكل تقبل تاكل لا حجي تقبل تحجي حيرتني والله

ديمة : اهدي دنيا شجاج تره زبيدة تعبانه لتلحين عليها زايد عن اللزوم

دنيا : هسه اني غير افتهم ليش تعبانه حتى انجب واسكت وما افتح حلكي

ديمة : ميخالف لتلحين عليها خلي نعوفها ترتاح وبعدين نحاجيها لا احنه طايرين ولا هي طايره

دنيا : تنهدت وجاوبتها هو غصبًا ما علينا مجبورين نعوفها على راحتها دنشوف وين راح توصل

ام حسن : اني هسه جاي افكر بشغلة وحدة ، اكول هذا رجلها وينه شو لا خابر لا سأل عنها ولا كإنما عنده مرة

دنيا : من البداية جان زواج زبيدة وهارون غلط شتتوقعيها يعني من اخذته علمود الفلوس شراح تحصل منه مثلاً الحب والعشق الابدي

هي من البداية مبينه نهاية هاي العلاقة شنو

ااخ منج يا زبيدة ااخ طول عمرج عاقلة ورزنه بتصرفاتج شبيج من وصلتي لاهم قرار بحياتج
تخبلتي

وئام : لتحجين هيج كدامها تره البيها مكفيها وما عايزة تأنيب

دنيا : لا لتخافين ما راح احجي كدامها شي اصلاً هسه صاعدة احجي وياها واطيب خاطرها مدري شجايه كمت اعيط عليها وهي مريضة متتحمل

كمت صعدت فوگ دكيت الباب عليها ودخلت لكيتها متمدده على الجرباية ومطيتني ظهرها

تقدمت كعدت وراها ومسحت على شعرها ، باوعتلها لكيتها صافنه ودموعها مبلله وجها

حبيبتي زبيدة اني اسفة لان صيحت عليج قبل شويه

والله من حرگة كلبي عليج ما كدرت اسيطر على اعصابي ، زبيدة انتِ بالنسبة الي اقوى بنية
شفتها بحياتي

فكلش صعب عليه اشوفج بهذا الحال واضل ساكته ليش هيج دتسوين بروحج يا گلبي انتِ وينها زبيدة الميهزها شي وينها ام لسان الماكله العالم بوكاحتها
وقوتها

ليش هيج فجأة ضعفتي ورخه عودج ، ما متعودين عليج هيج حبيبتي انتِ

انداريت عليه وضمت روحها بحضني وكامت تنشغ بست راسها ، ابجي حبيبتي ابجي فرغي الي بكلبج
بلكي ترتاحين

زبيدة : گلبي كلش يأذيني دنيا

دنيا : سلامة گلبج يا روحي ، ضليت امسح على راسها واهدئها لحد ما سكتت

اباوعلها كعدت وكامت تمسح بعيونها حيل ، لزمت اديها اليرجفن ، اوكفي عورتي عيونج مو هيج

مسحت دموعها على كيفي وحضنتها ، اباوع للباب انفتحت ودخلت ديمة تبجي

الظاهر جانت تسمع زبيدة ، فتحتلها ايدي اجتي بسرعة حضنتنا اني وزبيدة

ديمة : حبابة زبيدة حبابة لتبجين والله راح اموت من القهر عليج

احجي منو المزعلج هيج والله اروح اطيح حظة وابجي مثل ما بجاج بس لتنقهرين انتِ

دنيا : ابتعدت زبيدة ، حضنت ديمة وباوعتلي

زبيدة : لتخافن عليه والله اني زينة واتمنى متضغطن عليه لان اني اذا اريد احجي من البداية جان سولفتلجن بس اني ما اريد احجي

وهم فدوة اروحلجن اريد ترجعن لبيوتجن ، اني مقدرة حرصجن وخوفجن عليه بس صدكني
بقيتجن هنا مابيها فائدة

اني بكل الاحوال محتاجة ابقى وحدي وما اريد التقي باحد لان تعبانة فالافضل انُ تروحن عوائلجن اولا بيجن

واني هياتني موجودة هنا وموبايلي راح اعوفه مفتوح ما راح اغلقه بعد شوكت متردن خابرني
بس لتبقن هنا روحن

دنيا : بسـ...

زبيدة : رجاءًا دنيا ، اني من اشوفجن هنا واشوف نفسي عايفتجن وكاعدة هنا كلش انقهر

ففدوة لتضغطن عليه روحن واني وياجن بيناتنا اتصال وراح اطمنجن عليه

ديمة : ردت احجي واشرتلي دنيا

دنيا : هاهي حبيبتي الي تردي يصير ، اني وديمة راح نروح بس نرجع نشوفج اكيد

وهاا طيبي بسرعة وراج عرس نريدج تفرحين وتغيرين جو مو تبقين هيج وتفوتج الاجواء الحلوة

زبيدة : عرس منو ؟

دنيا : حليم

ديمة : صدك حليم حيتزوج واخيراً

دنيا : اي وفنج منو الراح نخطبها اله

ديمة : منو

دنيا : بصائر

ديمة : يا بصائر !! بصائر اخت امين ؟

دنيا : اي شبيج مستغربة

زبيدة : شمعنى ؟

دنيا : خالة رميم ميته عليها وبس گال حليم اريد اتزوج گبل كالت لو بصائر لو ما اخطبله

ديمة : يعني مو حليم الرادها

دنيا : لا خالة اختارتها اله بس شتكولين ينطوها

ديمة : والله يا دنيا ما اعرف بس بصائر وردة وحبابه
كلش ونيال حليم اذا صارت من نصيبه

دنيا : الله يقدم الي بي الخير الهم وهم ديمة مو تجفصين وتكلين للعالم ، احنه عكب باجر جايين نخطبها فإنتِ بلغي خالة هناء انه نريد نسير عليهم
مو نخطب

ديمة : ميخالف

دنيا : هاا زبد شو ما شفتج علقتي

زبيدة : شعلق يعني ، الله يتمم الهم على خير

دنيا : آمين يارب

يله حبيبتي اخذي راحتج ونامي انتِ من الصبح طالعة واكيد هسه تعبانة ، بوسناها ونزلنا جوه

بلغت امي ودادا علمود خطبة حليم وخابرت يوسف حتى يجينه

رحت بدلت وحضرت غراض تيم وكعدت اني وديمة ننتظره

ام حسن : يعني بشرفجن بله هذا وكت طلعه مو حتى الغدة جهز

دنيا : ليش منو الي اله نفس ياكل يا دادا

وئام : اي والله بهاي حقج

دنيا : اجه يوسف يادوب دخل سلم واخذنا وطلعنا

يوسف : شلونها زبيدة

دنيا : والله يا يوسف مو زينة

يوسف : شبيها ؟

دنيا : هنا المشكلة منعرف شبيها

يوسف : ما حاولتن تحجن وياها

ديمة : متقبل تحجي شي هو احنه نتوسل بيها علمود تروح للطبيب ومتقبل

يوسف : لو كايلاتلي جان اني الحاجيتها

دنيا : حتى لو محاجيها كلشي ما راح تستفاد طاحت وصله من لساناتنا وكلشي ما استفادينه

يوسف : زين رجلها وينه ما سألتنه

دنيا : حضرة جنابة مسافر وغالق جهازة ومحد كادر يوصله

يوسف : خير ان شاء الله مبينه السالفة جبيرة

دنيا : والله ما ادري يا يوسف ، وصلنا ديمة ورجعنا للبيت ، تلكتني خالة بالباب جانو بعدهم ممتغدين
خطية منتظريني

كعدت وياهم بس ما اكلت شي يادوب وكلت تيم واخذته وصعدت نيمته بفراشة وطلعت اخذت ملابس
حتى اسبح

دخلت للحمام ، بدلت وشلت ملابسي داخليهن بالسلة وشفت دشداشتي الوردية مالت النوم بالسلة

شلتها متفاجئة ، هاي شجابها هنا اني ملابستها اصلاً
قربتها من خشمي جان بيها عطر نسائي غريب
واصلاً معندي منه

ذبيت الدشداشو ولفيت الخاولي عليه بدون لا اسبح وطلعت لكيت يوسف كاعد يكلب بالتلفزيون

اكول حبيبي

يوسف : هاا حبيبتي ، لحظة لحظة شهالكيك هذا

دنيا : عوفك مني هسه ، انت هم طلعت البارحة من البيت

يوسف : لا كضيت اليوم هنا نايم حتى ما نزلت

دنيا : زين اكو احد دخل لهنا ؟

يوسف : لا ابد ، ليش تسألين ؟

دنيا : لا هيج

رجعت للحمام اسبح وعيني على السلة ، كملت وطلعت نشفت شعري ولبست حجابي

يوسف : وين رايحة

دنيا : اريد اروح يم جمانة شويه ، انت ابقى هنا علما ارجع مو تعوف تيم

يوسف : ميخالف

دنيا : طلعت من الغرفة بسرعة ونزلت جوه ، دورت عليها لكيتها واكفه تغسل مواعين ومندمجة ويه العاملات

مشيت بسرعة بدون لتنتبه عليه ورحت بوجهي للسويت مالتهن ، دخلت بسرعة وسديت الباب لكيت 3 من العاملات كاعدات يتغدن بس شافني كامن

: تفضل مدام انت شنو يريد

دنيا : استريحن حبيباتي هذا تيومي مميته مدري وين ذابها ودادور عليها كلت يجوز من جان يلعب ويه ولد عمامه ذبها هنا

كملن اكلجن انتن ، طبيت لغرفتهن الي بيها الاسرة ، رحت بسرعة للكناتير ، فتحتهن بسرعة واني اتلفت خاف واحد يدخل عليه

جانت الغرفة بيها كنتور واحد بي 6 ابواب وكل عاملة الها باب

فتحت الاول والثاني ما لكيت بيهن شي ولان هي اجت اخر وحدة توقعت اخر باب يكون الها ففتحت اخر باب وفعلاً صارن بوجهي ملابسها الي لبستهن
من اجت ويانا لمدينة الالعاب

دورت بكنتورها بسرعة ، شفت معطر جسم لونة بيجي محطوط على صفحة

فتحته بسرعة وقربتها لانفي ، غمضت عيوني وعضيت شفايفي يربي نفس العطر الي بالدشداشة

شجاب عطرها على هدومي وليش دشداشة النوم بالذات ، يربي دخيلك ليطلع الي بگلبي صحيح

اهدي دنيا اهدي لتتسرعين وتخسرين حقج ، اخذت نفس ، رجعت كلشي لمكانه وطلعت من الغرفة

لاكتني هي بالباب

سجى : هاا ست شلونج والله ردت اجي اسلم عليج بس استحيت اسلم كدام الكل كلت خاف ميقبلون
اسلم تعرفين بعد اني هنا خدامة

دنيا : لا ابد احنه هنا نحترم العاملات ونخليهم على راسنا ونعتبرهن من اهل البيت بشرط يكونن محترمات نفسهن

سجى : واحنه نعتبركم اهلنا ست ، صدك شعجب منورتنا اليوم

دنيا : تيم مضيع مميته واجيت ادور عليها

سجى : تحبين اجي ادورلج عليها اني خدامتج ست

دنيا : لا ميحتاج وعود اذا لكيتها ذبيها بالزبالة

عفتها وصعدت فوگ ، دخلت للغرفة ذبيت حجابي وتمددت ، شويه وحسيت بيوسف ينام ورايه

باسني من ركبتي وقربني عليه ، من شفته مد ايده يفتح دكم الدشداشة لزمتها

يوسف : مشتاقتلج البارحة احس فراشي بارد لان انتِ مو بي

دنيا : تعبانة يوسف اجلها على غير مرة

يوسف : شبيج ليش تنترين

دنيا : مابيه يوسف بس تعبانة رجاءًا لتضغط عليه ، سحبت نفسي عنه وتغطيت وهو ابتعد عني من شافني مابيه مجال احجي ولا اتناقش

_________________________________

زبيدة : كاعدة وادك باظافري على الموبايل ، مترددة اسوي الشغلة الي ببالي ما اريد اتحطم اكثر بس لازم
الكه جواب وارتاح راح يكتلني القلق

اخذت الموبايل ودزيت رسالة لنور

"نور اذا تكدرين قبل لتصير الوحدة تعالي يمي عندي شغلة وياج"

جاوبتني " اخلص شغلي واجيج "

طلعت من الواتساب ورحت للانستگرام ، عدت الستوري مالت زياد للمرة المدري شكد

باوعت للساعة جانت بـ8 بالليل ، تنهدت يربي شيجيب الوحدة

ضليت كاعدة والوب بالغرفة لمن صارت بـ12واجتي نور

نور : هاا زبد

زبيدة : تعاي كعدي هنا

نور : خير

زبيدة : اريد اطلب منج طلب

نور : عيوني الج

زبيدة : انتِ مو كتيلي هارون كل يوم يخابرج بالوحدة بالليل ، اريدج من يخابر تجاوبي يمي وتكليله إني مريضة وكلش متخربطة

نور : ياا سهلة الف طلب مثل هالطلب

زبيدة : بس ما اريده يعرف اني يمج

نور : على بختج تردي يلعب النعال على ظهري

زبيدة : ليش هو يضربج !!

نور : لا بس يخزر يييمه وشلون خزرة عليه تعادل عشر نعالات

زبيدة : انتِ لو فطيرة لو غبية

نور : ثنيناتهن هههههههه

زبيدة : ابتسمت على ضحكتها

نور : اي ابتسمي يمعودة الدنيا خلصانه

صدك جبتلج وياي هاي النستله بكتها من كنتور بيبتي
وكلت اجيبها الج اكليها ترفعلج هرمون السعادة

زبيدة : شكراً ما اكدر اكل

نور : شبيج كسرتي واهسي وفشلتيني واني البكتها وتحملت ذنبها علمودج

زبيدة : جيبها ، اخذتها خليتها على الميز ، بس اشتهي وعد اكلها

نور : اييي عفية

زبيدة : ما اتصل عليج ؟

نور : لا هسه بـ12 ونص هو بالوحدة يفتح موبايلة

زبيدة : زين هو ليش غالق جهازة

نور : هو گايل لجدي راح اقفل جهازي لحد يقلق عليه ومن سائلة جدي كايله عندي شغل وما اريد واحد يزعجني

زبيدة : يعني ما خابر احد غيرج

نور : لا ابد

زبيدة : هزيت راسي خوش

نور : تدرين امي وعماتي سألني عليكم

زبيدة : شسألنج

نور : كللي هارون وزبيدة متعاركين ، اصلا امي من شافت هارون اجته النوبة اكثر من مرة تخبلت ورادت تهد عليج كل عبالها انتِ السبب وجدي ما خلاها توصل

بس تدرين زبيدة اني لو بدالها جنت حسوي نفس الشي ، اتخيل إني اشوف ابني بهذا الحال ومرته مو يمه اكيد ما راح اسكت

زبيدة : لا بله

نور : حقج تستهزئين مو انتِ ما شفتي هارون شصار بي راد يموت من وره النوبات لوما ستر الله ، عصبيته زادت ، وعلى اقل شغلة يتنرفز ويصيح

مدري شبي تحول حتى من رحنا اني ودنيا لغرفتكم
علمود الفستان لگينا نايم بالگاع

زبيدة : لحظة لحظة ، لكيتي نايم بالگاع ؟

نور : هو ما لكيته يعني شفته بس من دخلنا لكينه اكو فراش ممدود بالگاع ويمه باكيت جكاير ونفاضة
والفراش جان مهوس فخمنت انه يكون نايم بالكاع

كلت يعني معقولة لان متعاركين انتِ ويا ميريد ينام على الجرباية عود لان انتِ جنتِ نايمة عليها وبيها ريحتج

زبيدة : صفنت وهزيت راسي ، كتيلي عاف الجرباية ونام بالكاع لان جنت اني نايمة عليها

نور : اني كاعدة اخمن لتاخذين كلامي صك احتمال جان عنده ارق وغير مكان نومته

زبيدة : اي احتمال

باوعت للساعة بعد عشر دقايق تصير بالوحدة ، كمت شربت مي وضليت افتر بالغرفة

نور : هيج مشتاقتله

زبيدة : انداريت عليها ، مشتاقتله شنو !! شفتيني داشلع بشعري عليه

نور : لعد شبيج تلوبين

زبيدة : دجاوبها ودگ الموبايل ، باوعت للساعة صارت بالوحدة ضبط

نور : هذا هارون زبيدة

زبيدة : كعدت يمها بسرعة ، باعي احجي ويا طبيعي وديربالج تحسسي اني كاعدة يمج

نور : اي اي

زبيدة : يله فتحي الخط ، جرت نفس هي وفتحت المكالمة

نور : الووو

هارون : الووو وينج انتِ مو كايلج اني خلي موبايلج يمج حتى من ادك عليج گبل تجاوبين

نور : جنت بالتواليت

زبيدة : اسمعه يجر حسرات ويحجي ، غمضت عيوني من استشعرت نبرة صوتة وهو يحجي

هارون : ششـ شلونها

نور : هارون زبيدة ابد موزينة

هارون : شبيها شنو مريضة

نور : اي كلش مريضة ، خالة وئام كلتلي متقبل تاكل وبس تتقيء

هارون : وهمه مطايه مياخذوها للدكتور شلون عايفيها هيج احتمال صاير عدها جرثومة بالمعدة

نور : والله ديتوسلون بيها ومتقبل ، مكضيتها بس نوم حتى متقبل تشوف احد

شكد راحن عليها بيبي وعمتي وما قبلت تنزل ولا تشوفهن اصلاً يكولون متكدر تكوم من الفراش

حتى اني مرتين رحت وما قبلت تشوفني ولوما الح
عليها واحلف إني ازعل منها متسمحلي اصعد واشوفها

هارون : اني راح اخابر جدي واخلي ياخذها للدكتور مو بكيفها هي شنو تريد تموت روحها

نور : ما راح تستفاد جدي اجه وحجه وياها وهم ماقبلت

هارون : اااخ يا عنادها اااخ

نور : لا تره السالفة مو سالفة عناد اني رحت شفتها ، اووووف يا هارون كون تشوفها

الوجه اصفر والخدود ذبلانة والشفايف مفطرة والعيون مبگگه من البجي حيييل تعبانة زبيدة حيييل

هارون : لهالدرجة

نور : واكثر هارون واكثر

زبيدة : سمعت صوت حركة يمه مبين كام يفتر ويحجي

هارون : ببـ باعي اني هسه راح اكتبلج ورقة بيها فيتامينات واكلات معينة طبخوهن الها وانطوها حباية فيتامينات كل يوم

وحاولو تكوموها لتخلوها نايمة تره يتراكم عليها المرض طلعوها لاي مكان وخلوها تغير جو

نور : ماشي يله محتاج شي لازم اروح

هارون : لا اخذي راحتج

زبيدة : سده ونور باوعتلي

نور : شفتي شلون صوته يرجف عليج ، زبيدة هارون كلش يحبج حبابه حلي المشكلة البيناتكم

زبيدة : الله كريم

نور : يله اني راح اروح تحبين باجر اجيج بنفس الوقت

زبيدة : لا ميحتاج

نور : تمام يله تصبحين على خير

زبيدة : طلعت نور واني رحت وكفت بالبلكون ، جريت نفس وغمضت عيوني

يربي صبرني حيلي انهد والله

دگ موبايلي ، شلته لكيته رقم دولي غريب ، تنهدت
معقولة هو الديتصل

بلعت ريكي وجاوبت ، الووو

ما اجاني صوت بس اسمع صوت انفاس ، ما اخذت وقت داعرف انُ المتصل هو

رجعت حجيت ، الووو منو وياي

لا رد ، ماكو اي صوت ، تنهدت وعفت الخط مفتوح ، كل الجنت داسمعه بس صوت انفاسه المتسارعة
ومع هذا ما سديته

مرت نص ساعة ولا هو حجه ولا اني الحجيت اخر شي هو سده من يمه ، رجعت راسي على الباب وبجيت

مو متحبني ، مو تكرهني ليش تسأل عني ، ليش صوتك يرجف عليه هيج

مو متريدني ليش دتتصل عليه ليش دتعبني وتعب
روحك

لشنو تريد توصل يا هارون ، اذا عندك مشاعر تجاهي ليش جذبت وجرحتني هيج ، شنو الصعب بأنك تگلي انك تحبني مثل ما اني احبك

مسحت دموعي وكمت سديت باب البلكون ودخلت نمت ثاني يوم مر مثل اي يوم بالنسبة الي

نوم وتفكير وهيج مكضيه اليوم ، لمن اجه الليل سمعت موبايلي يدك كمت بسرعة اخذته من الشحن

شلته واني ملهوفه بس تفاجئت من شفت الاسم المكتوب على الشاشة

حليم !!! هذا شيريد

فتحت الخط وجاوبت الووو

حليم : الووو زبيدة اني حليم

زبيدة : اي اعرف مسيڤه رقمك يمي

حليم : شلونج

زبيدة : الحمدلله

حليم : سمعت بيج مريضة

زبيدة : هاا اي شويه مالي خلك ، خير حليم محتاج شي ؟

حليم : ردت اكلج باجر اهلي رايحين يخطبولي

زبيدة : اي اعرف والف مبروك

حليم : ليش وصلتينا لهاي المواصيل زبيدة ليش

زبيدة : ما مواصيل هاي حليم انت ملاحظ نفسك شجاي تخربط

حليم : لو مخليتنا نتزوج ونعيش مرتاحين سوه ، مرتاحة انتِ بشلاع الگلب هذا لا انتِ تحبين رجلج
ولا راح احب الاخذها والسبب انتِ

زبيدة : اولاً اني متزوجة هسه وعلى ذمة رجال فحرام عليك قبل ليكون عيب انك تحجي وياي بهيج مواضيع

وثانيًا انت مو باجر رايحين يخطبولك ما استحيت على روحك تخابرني تحجي هذا الحجي الماصخ

لو انت بمكان البنية تقبل قبل خطوبتكم بيوم تروح تخابر واحد وتكعد تعاتبه ، شنو قلة الادب هاي

وهاي اول واخر مرة اسمحلك تخابرني ، انت ان رحت وان اجيت حمى اختي وبالنسبة الي غير اخ متصير
فلتتعب نفسك

ما انطيته مجال يحجي سديته الخط بوجهه ، حقير
اني من يمي احترگ كلبي على بصائر شنو ذنب هالمسكينة تاخذ واحد مو كفو مثل هذا

شمرت الموبايل ولزمت راسي ، خاف اني عايزة انوب عليه حليم ابو سوالف المكسرة

صفنت وهزيت راسي اني لازم اتصرف مال اسكت على تصرف حليم واعيد نفس الغلط السويته ويه ديمة مستحيل اسويها

نزلت جوه لكيت دادا وخالة كاعدات بالصالة ، السلام عليكم

وئام : وعليكم السلام نورت الصالة يبعد گلبي

ام حسن : اجيتي بوكتج حبيبتي اليوم سويت جرك تعاي كعدي خلي اكوم اصبلج جاي ويه الجرك

زبيدة : الف عافية ما اريد

اكول خالة انتو باجر حتروحون العصريات لبيت امين علمود تخطبن بصائر مو

وئام : اي حبيبتي ان شاء الله باجر رايحين

زبيدة : زين عادي باجر اروح وياجن

ام حسن : شعجب

زبيدة : يعني ضايجة وعود كلت اغير جو شويه

وئام : شكو منها حبيبتي اصلًا اني كيفت بلكت الله من تطلعين ترتاح نفسيتج شويه

زبيدة : هو هيج ، زين باجر شوكت ترحن

وئام : العصريات بالاربعة ياخذنه السايق

زبيدة : خوش يله اني صاعدة

عفتهن وصعدت وثاني يوم العصر اخذنه السايق لبيت عمو ومناك طلعنا

جانت جايه خالة ودنيا وجمانة واحنه ، سلمنا عليهم ومشينا لبيت امين

وصلنا واستقبلتنا خالة هناء ذاك الاستقبال ، ما شاء الله عليها هالمرة شكد موجبة

دخلتنا للغرفة مالتها ، طبعًا شكد ما بيتهم بسيط شكد ما نظيف ومرتب ينكرط كرط من النزاكة

هناء : هلا ومية هلا بيكم نور البيت والله

رميم : بعد گلبي ام اموني الوردة منور بوجودكم

هناء : شلونج عيوني ام معين

وئام : حبيبتي الحمدلله بكل الخير لعد وين ديمة وبصائر

هناء : ديمة بالحمام ماشاء الله بنتج جنها بطة كل ساعة نلكاها مطبشه بالحمام وبصائر فوك هسه تنزل

وئام : بعد كلبي دمدم لعابتي هاي

هناء : بنات حبيباتي شلونجن امي

زبيدة : ردينا عليها وطلعت ديمة بوست الكل وسلمت عليه

ديمة : صدقة للبومة العافت عشها وقررت تطلع

زبيدة : ابتسمت على سوالفها

نزلت بصائر ، سلمت على الكل وراحت للمطبخ تجيب مي مدري تسوي جاي

شاورت ديمة ، ديمة اريد اكعد ويه بصائر وحدنا

ديمة : ليش ؟

زبيدة : بعدين افهمج

ديمة : طيب انطيني ثواني

زبيدة : راحت ديمة للمطبخ وطلعت هي وبصائر

رميم : تعاي حبيبتي بصورة كعدي يمي

زبيدة : راحت بصائر كعدت يم خالة وخالة رميم ما قصرت طاحتلها بوس ومحاضن وذيج راح تموع روحها يكول رجال الجاي يبوسها

رميم : ما شاء الله شنو هالجمال شتاكلين ولج

بصائر : شكراً خالة

رميم : صدقة دباع الصوت شحلاته

ديمة : هاي بس كدامكم خالة

زبيدة : يربي اختي شكد غبية وتجفص

رميم : هههههه والله يا ديمة سوالفج

زبيدة : انتبهت لخالة تأشر لبصائر تكوم وبصائر كامت صعدت فوك ، كرصت ديمة واشرتلها على الدرج

ديمة : صدك زبيدة بصائر اللابتوب مالتها مدري شبي كتلها اني انتِ تعرفين للابتوبات متصعدين تشوفي الها

زبيدة : هاا اي اي هسه صاعدة

هناء : حبيبتي زبد انتِ مبينة مالج خلك لتعبين نفسج

زبيدة : لا خالة شنو السالفة من رخصتكم

كمت بسرعة صعدت فوك ، لكيت غرفة مفتوحة دكيت الباب ودخلت

سلام

بصائر : هلوو وعليكم السلام

زبيدة : ممكن احجي وياج شويه

بصائر : اي اكيد اهلاً وسهلاً تفضلي

زبيدة : ابتسمتلها ، شكراً ، كعدت وباوعتلها شوفي بصائر اني اعرف ان علاقتي بيج مو قوية ولا اصلاً
الي حق اتدخل بحياتج الشخصية

بس اني مسؤولة امام الله ولازم احجيلج الي بگلبي حتى ما اتحمل خطيتج بعدين

بصائر : خير زبيدة شصاير خوفتيني

زبيدة : باعي اليوم خالة رميم اجتي خصيصاً حتى تخطبج لحليم ، اباوعلها شهكت وغطت حلكها

بصائر : صدك ؟

زبيدة : اي واني لهالسبب اجيت احاجيج ، بصائر لتوافقين حليم مو مثل ما انتِ متوقعته زواجج منه
راح يأذيج

وانتِ بعدج صغيرة والحياة كدامج راح تجيج هواي فرص احسن من حليم لتذبين نفسج بهيج تهلكة
محد راح يتعب بيها غيرج

اباوعلها صفنت بوجهي وهزت راسها

بصائر : تصدكين من سلمت عليج عبالي مريضة اثاري طلع وجهج اصفر وحالتج حالة لان حليم يريد
يخطبني

زبيدة : عفوًا

بصائر : لتسويلي عفوًا وما عفوًا ، مع الاسف عليج ما توقعتج مسمومة لهاي الدرجة

لا وبعين جريئة جايه تكليلي رفضي ليش ؟ كل هذا
لان انتِ ما اخذتي كلتي خلي اخرب عليه واكسر
فرحة اهله

زبيدة : هيووو على كيفج لترحين زايد شنو اخرب عليه هو اني الرفضته مو هو

بصائر : اي وهسه يمكن حسيتي على غلطج وعرفتي قيمته وقررتي تخربين الخطبة يعني عبالج اني زوج وتمشي عليه هاي السوالف

زبيدة : اني اسفه بس انتِ غبية وزوج هم ، وتره اني من داحجي وياج هيج فلمصلحتج ولان اعتبر امين اخوية وما اريدله ولا اريدلج المضرة

واخاف ماعندج علم خلي اكلج انُ احد اسباب عدم موافقتي بحليم فلان يشرب ويدور نسوان حياته
كلها طول بعرض حرام بحرام

واني لان ما اقبل على نفسي اخذ هيج واحد ما اقبلها على غيري هم

الشكل والفلوس مو اهم شي ، مو مبارك هو عنده فلوس وحلو معناها اكيف عليه وهو صاحب علاقات
وليلة ونهارة بالملاهي

بصائر : انتِ جذابة ومتعمدة تسممين تفكيري حتى
ابطل ، حليم لو جان فعلًا مثل ما انتِ تكولين
ما جان اخواني صاحبو

زبيدة : اييي على راحتج اني حبيت ابري ذمتي امام الله وبالمناسبة الكلام الحجيته اني متأكدة منه بالحرف

حليم قبل ليخطبني بهووواي وكت الجنت بعمرج جان عندي صديقة اسمها ورود اخوتها يصيرون اصدقاء حليم

وجانو دائمًا يطلعون ويا للملاهي ويصورون فيديوات همه والراقصات وبنات الليل ويراوون اختهم وهي تجي تراويني

ومن يومها اني كامت تلعب نفسي منه وهم اذا تحبين سألي كليله من سافرت لاذربيجان مو رجعوك مريض لان نمت ويه وحدة مريضة ولوما ستر الله عليك
جان صاير بيك ايدز

كمت ، اني طالعة اخذي راحتج ، نزلت جوه لكيتهم يسولفون بتفاصيل الخطبة وكاعدين يصبغون بحليم

صارت الدنيا مغرب واحنه طلعنا راجعين للبيت

_________________________________

حليم : كاعد بالكوفي ودگ موبايلي ، شلته لكيته امين
جاوبته هلااا ابو حسين شلونك

امين : انت وينك

حليم : كاعد بالكوفي النكعد بي دائمًا

امين : يله جايك

حليم : منتظرك ، نص ساعة واجه بس وجهه ميبشر بالخير

هاا ولك شو خلقتك تلطم ، اكعد خلي اطلبلك نركيله

امين : ما اريد زقنبوت

حليم : شبيك امين ليش تحاجيني هيج

امين : حليم بدون لف ودوران ليش دزيت اهلك يخطبون اختي الك

حليم : هاا ليش شكو بيها بس لا انت ما موافق

امين : لا طبعًا ما موافق

حليم : ليش مو گد المقام اني

امين : لا حشاك بس انت تحب زبيدة وهاي اول عثرة والعثرة الثانية انك تشرب واني مستحيل انطي اختي لواحد ماشي بطريق غلط

حليم : بالنسبة لزبيدة فانت بلسانك كلتها احبها يعني لاعندي علاقة بيها ولا ماس اظفر من اظافرها خطبتها
رسمي من اهلها ومو مرة وحدة بس البنية رفضت وهسه تزوجت وراحت لحال سبيلها

حالي حال غيري شنو اول واحد اخطب وانرفض
السالفة كلش عادية وميحتاج كل هالعصبية منك

اما الشرب فاني وعدتك راح اتركه وتركته ، بصلاتي ملتزم وعندي شهادة وجاي اشتغل والله رازقني
وحالتي المادية ممتازة

شنو العيب البيه بعد عود لان جنت اشرب يا اخي جل من لايخطأ

هسه انت اذا متقبل تنطيني اختك انت حر اني ما اجبرك بس ما مسموح تحاجيني بهذا الاسلوب

امين : حليم انت صديقتي وبحسبة اخوية وما اريد صداقتنا تخرب بس اني ما اكدر اجازف باختي الوحيدة من رخصتك

حليم : على راحتك اني ما اجبرك بس خلي الوالدة تبلغ اهلي

امين : ان شاء الله يومين والوالدة تخابركم

حليم : امين اني ما اريد اخسرك واي علاقة تخلي اخوتنا على المحك اني ما اريدها

امين : ابتسمت لتخاف انت اخوية وراح تبقى اخوية لومهما صار

كمت وطلعت لشغلي ، كملت الشغل ورجعت للبيت لكيت الكل نايمين

غسلت وبدلت ملابسي وصعدت فوك حتى احجي ويه بصائر

دكيت الباب عليها ودخلت لكيتها كاعدة ترسم ، ابتسمت من شفتها كاعدة ومندمجة

حمحمت حتى تنتبه الي وهي من شافتني ذبت الاقلام وكامت

بصائر : هاا حبيبي الله يساعدك

امين : بستها وحضنتها ، حبيبة گلبي انتِ ، شلونج

بصائر : الحمدلله

امين : خوما محتاجة شي

بصائر : لا يگلبي اني بجالك كلشي ما احتاج

امين : زين اكدر اكعد وياج شويه لو مشغولة

بصائر : اني والشغل نروحلك فدوة ، تعال اكعد انت تنور شوكت متجي

امين : كعدت واشرتلها ، تعاي كعدي بصفي ، كعدت يمي ، مسحت على راسها

امي بلغتني اليوم اجو اهل حليم صديقي وخطبوج اله

لتدنكين راسج اريدج تباوعيلي ، شوفي بصائر اني معودج من زمان إني صديقج قبل لا اكون اخوج مو صحيح

بصائر : اي صحيح

امين : ولان اني صديقج ما راح اخجل إني احجي ياج بهذا الموضوع وانتِ هم ما اريدج تخجلين مني
وتسمعيني زين

باعي حبيبتي البنية مثل الجسر كل الناس تمر عليها الزينة والموزينة اشكال والوان بس السباعية التعرف تختار صح

اني احجيها الج بكل صراحة صحيح حليم صديقي واخوية ولد حباب وصاحب نخوه واخو بالمواقف الصعبة

لكن مع هذا عنده عيوب ما اكدر اتغاضى عنها نهائيًا
ورغم اني ما اعرف رأيج بخصوص الموضوع شنو الا
إني راح اصارحج بالي اعرفة عن الولد

شوفي بصائر ، حليم يشرب وبأفراط هم ، جان يحب زبيدة اخت مرتي ، بله اني اكدر اتغاضى عن سالفة زبيدة لان هو خطبها حاله حال الناس وما صارت
قسمة بينه وبينها وانتهى الموضوع

بس سالفة الشرب يا بصائر واكفة بعيني ، يعز عليه
اقبل واني ادري بي جان ماشي بهذا الذنب

هو صحيح وعدني وحلفلي على كلام الله انه بطل يشرب بس مع هذا ما اكدر اجازف خصوصاً الخمر
سلعة مو بسهولة تنترك

اني اكدر اكلج اني موافق وشكو بيها الولد تغير وفعًلا هي مابيها شي بس انتِ شلج بشلاع الكلب

باجر عكبة الله يقسملج الافضل منه ، انسان ملتزم ويحبج ويخاف الله بيج ليش تقبلين وتعبين نفسج
ويا انتِ ما مضطرة

بصائر : ممكن احجي بس لتزعل مني

امين : لا حبيبتي ازعل منج شنو اني جاي اسولف وياج

بصائر : انت ليش ناظر للموضوع بهاي السلبية ، الله سبحانه وتعالى مو گال بسورة المائدة

(فَمَن تَابَ مِن بَعْدِ ظُلْمِهِ وَأَصْلَحَ فَإِنَّ اللَّـهَ يَتُوبُ عَلَيْهِ إِنَّ اللَّـهَ غَفُورٌ رَّحِيمٌ).

فما دام الولد تاب ليش متعتبر هذا الشي ماضي وتتخطى ، اني مالي علاقة بالولد بس داحجي بشكل عام ، اذا اني وانت وغيرنا ننظر للشخص التايب بهاي النظرة شلون تريده يكمل حياته بسلام

وهو يحس ذنوبه ما زالت عائق راح تستمر ويا طول حياته حتى وان تاب

بتصرفك هذا ممكن تمنعه عن الاستمرار بالتوبة واحتمال يرجع للذنب مرة ثانية لمجرد انه حس انُ
ماكو فائدة لتوبته

امين : الي يريد يتوب يتوب لله كلام الناس ونظرتهم ما راح تفيد ولا تغير شي

بصائر : بهذا الشي اختلف وياك ، الرسول (صل الله عليه وعلى آله وسلم) يكول ( الكلمة الطيبة صدقة)

الرسول لوما يشوف بالكلمة تأثير قوي على النفس مجان نطق بهذا الحديث

الكلام هواي يأثر يا امين ، كلمة حلوة ممكن ترفع انسان لاعلى مراحل السعادة وكلمة جارحة ممكن تأدي بانسان للموت

الله سبحانه وتعالى خلا لسانة شاهد علينا يوم القيامة لان يعرف اذيه ومنفعه هذا اللسان شنو

ففكرة انُ كلام الناس ميغير شي هذا شي مو صحيح يمكن الواحد يبين ممتهم ويبين مسيطر بس لتكلي
من جوا ما راح يكون متأثر ومجروح

امين : الله ينطيج العافية على هذا الكلام الحلو

بصائر : حبيبي انت

امين : يعني افهم من كلامج انج موافقة على حليم
لان حسب كلامج احسج راغبة هذا الزواج وحابه تنطين فرصة للولد

بصائر : هاا

امين : حبيبتي احجي لتخجلين مني اني سندج وظهرج ومصلحتج وسعادتج عندي بالدنيا

بصائر : ما اعرف امين

امين : ليش تتعبيني يا خوية كليلي رأيج بكل صراحة هسه قابل اني راح اكص راسج شبيج وجهج گلب اصفر

بصائر : اي موافقة

امين : تمنيت اسمع غير هاي الكلمة اني ما موافق وبنفس الوقت مالي حق اضغط عليها وافرض عليها
ترفض

هزيت راسي ، هاهي حبيبتي الي تشوفي والف مبروك مقدمًا

____________________________________

سهير : يعني اخته كلتلج انه ضرب اخو لان تجاوز عليج وبيوم الي رحتي اجته النوبة 3 مرات

زبيدة : اي

سهير : طيب بالاول خلي لنعتبر تصرفه ويه اخو نابع من محبته الج

الرجل بطبعه كائن متملك يحس زوجته شي ملك اله ومتصل بي ، يرفض احد يتقربلها او يقلل من احترامها

مو شرط حبًا بيها وانما لان يحسها محسوبة عليه والي يضرها يضره ، يعني شلون اشرحها الج

يحس الي يأذيها ويتجاوز عليها كإنما متجاوز عليه شخصيةً دماغة مبرمج على انها تعتبر زوجته
والنصف الثاني منه اليقلل من شأنتها يقلل من
شأنه

ولهالسبب تشوفين اكو رجال يعنفون نسائهم بشكل فضيع لكن بالمقابل ميقبلون اخوانهم او اي احد عابر
يعيط بيهن او يقلل من احترامهن

اما عن موضوع النوبة فنكدر ناخذه بشكل ايجابي من ناحية انُ حسب ما كلج انه جان ديحاول ينتقم منج

المفروض من حقق هذا الانتقام يفرح ويتغير مزاجه
للاحسن مو يتعارض وتجي النوبة 3 مرات

تراكم نوبات الصرع تعني انُ المريض نفسيًا تعبان وديمر بموقف صعب

وحالة هارون تدل على انه جان ضايج ومقهور لدرجة
خلته ينهار ويدخل بنوبات كلش صعبة من سنين ما ماره عليه

وهسه كمليلي شنو العرفتي عنه بعد

زبيدة : سمعت من اخته انه عاف الجرباية الجان ينام عليها ونزل نام بفراشي الي بالكاع

وهم كل يوم يخابرها بوقت محدد يسألها عني واني سمعت المحادثة الدارت بيناتهم ولمن سمع إني مريضة وضعه كله تخربط واني حسيت بهذا الشي من خلال نبرة صوته

سهير : بما انُ هو جان نايم بفراشج معناها ما تخطى
عدم وجودج ويا وديدور عليج بكل مكان

وهذا يعني انه ديرتاح وياج وابسط شي منج ديحسسه بالامان لهالسبب جان نايم بفراشج
يمكن ريحتج تحسسه بوجودج وتهدئه

وسؤاله المتكرر عنج فيحتمل احتمالين

الاول انه يحس بالذنب على السوا وياج وديحاول يريح ضميره بهاي الاتصالات

والثاني يكون خايف عليج ، خايف يخسرج ، فكرة انُ الامان الي بحياته خلص راح مجننته لدرجة هو نفسه
ما متقبلها

وانتِ بنفسج دتكولين انه غالق جهازة وميتصل باي احد غير اخته علمود يسأل عنج انتِ بالذات

وهذا كله اذا يدل على شي واحد وهو انج مهمه بالنسبة وهواي هم

حتى سفرة اني ما اعتبره احتفال مثل ما انتِ حجيتي ، ارشح انه هرب من المواجهه بهذا السفر

يخاف يبقى ويواجهج احتمال حس بنفسه ضعيف امامج لهالسبب حب يبتعد حتى لا يضعف ويكشف نفسه ويفضح اوراقه كدامج

زبيدة : مسحت دموعي ، زين وكلامه الحجا من اعترفت اله

سهير : ما اكدر اجزم انه جان ديكذب عليج احتمال فعلًا جان يريد ينتقم واثناء تنفيذه لهاي الخطة
حبج وتعلق بيج بدون لا يحس على نفسه

زبيدة : معقولة ؟

سهير : كتلج احنه كائنات حساسة والله سبحانه خلقنا كتله من المشاعر ان رحنا او اجينا تبقى المشاعر تنبض جوانه

وانتِ تكولين هارون شخص انطوائي لابعد حد لا يحب يحجي ويه احد ولا يسمح لاحد يدخل لداخل القوقعه مالته

وانتِ رغمًا عن الظروف وعنه صرتي ويا وعاشرتي ، احتمال لكه بيج الما كدر يلكا بأي احد مر بحياته

يجوز هو انسان فاقد للحب والحنان ومن لكه هالشي عندج اثر بي وترك بصمة بداخله

وهم هو مبتعد عن النساء وعمره ما عاش شعور ان يكون الرجل واكو امراة مباحة اله وملكة كل هاي الامور تشعل الرغبة بداخله تجاهج بالاضافة لتعلقه بيج وهالشي مو غلط

انتِ بالنهاية زوجته ومو غلط يشعر بالرغبة تجاهج وبالمناسبة هو لوما حاس برغبة جبيرة تجاهج ما جان تجرأ وباسج اكثر من مرة

وللعلم تكرار التقبيل بنفس الوقت يعني انه عجبه هالشعور وياج وحب يكرره اكثر من مرة

بالإضافة هو حب وجوده وياج ، حب شعور الامان بجانبج ، حب فكرة انه رجل وانتِ الانثى مالته الخاصه بي

وتره شخص مثل هارون مستحيل يحس بهالمشاعر تجاه امراة بغضون شهور فعاشت ايدج انتِ تاثيرج
قوي عليه

زبيدة : الي افهمه من كلامج انه يحبني

سهير : خلي لنرفع سقف توقعاتنا هواي ونكول يحبج

خلي نبدل الكلمة ونكول معجب او متعلق بيج لكن هالاعجاب والتعلق بده يتحول لحب لهالسبب هرب
حتى هالمشاعر لتسيطر عليه

زبيدة : وكلامه صدكيني مداكدر اتخطى ابد

سهير : زبيدة اني متأكدة هارون عنده سبب خاص لا اني وانتِ نعرفه

اكو سبب جبير مخلي ينفر النساء لدرجة من حس بمشاعر تجاه وحدة منهن بدون سابق انذار هرب حتى ليواجه نفسه قبل ليواجه صاحبة الشأن

هو نفسه يخاف يعترف بهذا الشي ، اكو شي صاير ويا مخلي يخاف من الارتباط والحب هيج

زبيدة : كعدت وباوعتلها ، زين انتِ هسه شتنصحيني اسوي

سهير : انتِ تحبي ؟

زبيدة : اي

سهير : شكد تحبي

زبيدة : هواي

سهير : لعد لتخسري لان هو هم مبين عنده مشاعر قوية تجاهج

صحيح راح تكون صعبة عليج من ناحية انه جرحج واذاج لكن بالنهاية منكدر ننكر انه يميل الج ويريدج

زبيدة : انتِ لو بمكاني شجنتِ راح تسوين

سهير : ما اكدر اخلي نفسي بمكانج كل انسان بينا شخصيته تختلف عن الثاني

مشاعرنا تختلف ، حياتنا تختلف ، ظروفنا تختلف ، كل واحد بينه عايش ببيئة مختلفه عن الثاني

فما اكدر احط نفسي بمكانج ولا انتِ يصير تحطين نفسج بمكان احد

زبيدة : تمام ، كمت صافحتها ، شكراً جزيلاً سهير تعبتج

سهير : بالعكس اني بكامل السعادة لان داساعدج ولو بشي بسيط

زبيدة : ابتسمتلها ، يله مع السلامة

سهير : مع السلامة ومو تنسين توافيني بالاخبار

زبيدة : ان شاء الله ، طلعت من العيادة ورجعت للبيت

طول اليوم اني افكر بالموضوع ، كلام سهير مديروح من بالي

"ديمر بموقف صعب"
"ما تخطى عدم وجودج "
"يرتاح وياج"
"خايف عليج "
"خايف يخسرج "
"مهمة بالنسبة اله "
"تعلق بيج بدون ليحس"
"حب شعور الامان وياج"
"الاعجاب والتعلق بده يتحول لحب"

كل هذا الكلام يدك براسي ومال اكول انه ما اثر بيه اطلع جذابة

رفعت راسي وصار انعكاس وجهي بالمراية كبالي ، باوعت لروحي وصفنت

اني ما عمري ردت شي وما حصلت عليه ، طول عمري اسعى واعافر في سبيل احصل الشي الي اريده وحتى لو جان هالشي مو بصالحي اسعى في سبيل احققه
ولا اخلي بنفسي

وهذا احد عيوبي الما اكدر انكرها ، اني متملكه والشي الاريده مستعدة كلشي اسوي في سبيل احصل عليه
المهم عندي الاسوي ميتعارض مع قوانين الله سبحانه وتعالى

تذكرت امي وانعادت عليه المأساة الجانت عايشتها بسبب حبها لابويه

اني مستحيل اصير مثلها ، هي ضحت بابوية وقبلت على نفسها تعيش كل عمرها بحسرته وماتت وهي بحسرته

واني ما راح اسمح لنفسي اعيش نفس العاشته هي لو اعرف اموت

اني مرة وحدة بحياتي كلها حبيت واكون اكبر غبية اذا افرط بالانسان الحبيته حتى لو ما جان يحبني
غصبًا ما عليه وعلى الخلفه راح يحبني

اباوع للباب انفتحت ودخلت نور تخرمش بخدودها

شبيج ولج ؟

نور : لج زبيدة لحكيلي تورطت ورطة شكبرها

زبيدة : خير ان شاء الله شمسوية ولج

نور : لج اني عود كلت اريد اصلح الأمور بينج وبين هارون

زبيدة : اي

نور : اي من غبائي رحت كتله زبيدة تخربطت ودخلوها مستشفى كلش معتارضة

زبيدة : صخام الصخمج على هالجذبة وهو شسوه

نور : شسوه كام يفرفح وگلي بعد يومين راح يرجع للعراق علمودج

زبيدة : هو كلج راح يرجع للعراق بعد يومين علمودي ؟

نور : اي والله گلي هسه طالع احجز طيارة لقطر ويرادلي يومين واوصل

شراح اسوي ياربي والنبي هسه يمسح بشعري الاسطبل اذا سأل ودرة جاي اجذب عليه وانتِ مداخلة مستشفى

زبيدة : ومنو گال انتِ دتجذبين

نور : شنو !!

زبيدة : امشي صيحي للسايق خلي يحضرلي السيارة

نور : ليش

زبيدة : غير حتى اروح للمستشفى

نور : صدك تحجين

زبيدة : والله يله روحي ، طلعت هي واني بدلت بسرعة ونزلت لاهلي كتلهم اني متخربطة وفعلًا اني
جنت مالي خلك

وهن خطية انهبطن عليه وركضن بيه للمستشفى هن وجدي

سوولي هناك تحاليل وقاسولي ضغطي وطلع صاعد

خلولي مغذي ومن خلص رجعت للبيت ، دخلت لغرفتي وكعدت ثاني يوم الافكار تاكل وتشرب
وياي

اخر شي خصمت الموضوع بالليل وقررت ارجع لبيت جدي

حركت الموبايل بأيدي وهزيت راسي ، بسيطة يا هارون الجذاب اذا ما اخليك دربك متشوفه بعد
اني مو زبيدة ولا محسوبة على النسوان

ابتسمت ورحت نمت ، كعدت الصبح سبحت ونزلت
بلغت خالة ودادا إني اريد ارجع

وئام : صدك تحجين

زبيدة : رجلي راجع باجر شله داعي ابقى هنا بعد

ام حسن : كلامج عين العقل حبيبتي بس شنو التغير المفاجئ هذا

زبيدة : نفسيتي ارتاحت وصار الوقت ارجع لبيتي

ام حسن : عاشت ايدج

زبيدة : ابتسمت شكراً لان تحملتني بالفترة السابقة واسفة اذا قلقتجن عليه

وئام : انجبي ولج احنه اهلج شهالحجي

زبيدة : احبج اني

طلعت من البيت وانداريت عليهن ، اكول خالة المركز الجنتِ ترحيله قبل شنو اسمه بله ذكريني

انطتني اسمه ، ابتسمت ومشيت ، رغم بعدني مريضة واحس روحي مريضة بس الشي الي بداخلي مغطي
حتى مرضتي

دخلت لبيت جدي وصارو الحباب بوجهي

السلام عليكم

حمزية : هلا بعد روحي هلا

زبيدة : حضنتني وبوستني

حمزية : حقيرة اجي امر عليج ليش متقبلين تطلعيلي

زبيدة : ابتعدت وبست ايدها بعدين راح افهمج كلشي مو وقتها هسه

هيام : اشوفج غطيتي هناك راح يصيرلج شهر وبس سمعتي بهارون راح يرجع لفيتي علينا

زبيدة : اي رجعت حتى استقبله

يله من رخصتكم ، صعدت فوك اخذت المفتاح من نور ودخلت

اباوع للغرفة مكلوبة كلاب ، الهوسة واصله للضالين
باوعت لفراشي لكيته فعلاً مثل ما حجتلي نور

مهوس وباكيت الجكاير والنفاضه على حطتهن ، سديت الباب وتقربت نمت على فراشي

شميت المخدة واجتني ريحته ، ابتسمت وغمضت عيوني ، تريد تنتقم مني مو هه اني اعلمك وحق هو
الله

كمت طلعت من الغرفة جبت المنظفات ورجعت انظف الغرفة ، حرفيًا نكثتها نكث ما خليت شي ما سويته

حتى الكناتير صفطتهن من جديد وغيرت الفرشة عن الجرباية

اما فراشي طلعته بره الغرفة ميحتاج بعد انام بالگاع
كملت العصر ونزلت انطيت خبر لبيبتي إني طالعة

رجعت بدلت وصحت لعقيل ياخذني للمركز ، ذبني هناك

دخلت وطلبت منهم يسوولي عناية كاملة ، حفيت وسويت عناية ومساج لكل جسمي

عفت شعري ما ماهو ما لعبت بي ، كملت كلشي بالليل وخابرت عقيل يجيني

اجه رجعني للبيت ، دخلت وسمعت اشكال والوان الحجي من جوه لجوه بس اني جنت بيومها مفعلة
خاصية التغليس

شافني جدي واني اصعد ، جملة وحدة سمعتها منه

النوح : سبعة زبيدة

زبيدة : اكتفيت بابتسامة صفرة دخلت نمت ثاني يوم الصبح اجتني نور بلغتني انه يوصل الظهريات

نزلت شربت بس جاي لان للان اني ما اكدر اكل معدتي مدري شبيها واذا اكلت اكوم اتقيء
واني ما اريد بهذا اليوم اتخربط

بعد ما كملت الجاي صعدت لغرفتي ، سبحت مرة ثانية وطلعت ادور بالكنتور على شي البسه

صار بوجهي ثوب لونه اسود وبي ورد ، صفنت محاولة اتذكر منين اشتريته بعدين تذكرت إني
اخذته وكت الجنه نجهز لعرس ديمة

رحت جففت جسمي ورطبته ، اخذت الثوب لبسته
صفرت بأعجاب طالع يجنن

كعدت سشورت شعري وبرمت بس اطرافه ونكشتهن حتى يطلع شكلي فرش

خليت كحلة وكثرت منها وضفت لشفايفي حمرة بلون احمر

لبست بأذني تراجي فضة طوال واسوار ناعم بأيدي
وحجل برجلي

تعطرت وباوعت لنفسي بنظرة اخيره ، اختصر الموضوع واكول إني طالعة بيرفكت

باوعت للساعة ، صارت بالـ11 الصبح ، خابرتني نور كالت اتصل عليهم كلهم اني طلعت من المطار وهسه
جاي للبيت

كمت وكفت على البلكون انتظره ، ماكو نص ساعة وشفته يدخل للبيت ويسحب جنطته ويا

اباوعله لابس قميص جوزي وبنطرون اسود لا ومزين هم ، منعول الصفحة حليان

شفته يدخل جوه ، اجتني اصواتهم من جوه الكل جان ديرحب بي

شويه ودزتلي نور رسالة كلتلي صعد

وفعلاً ثواني وانفتحت الباب ودخل للغرفة ، اباوعله سحب جنطته ودخل ساد الباب ورا

اندار وشافني بوجهه

اباوعله فتح عيوني شلون الممصدك انه شافني

اني شفته صافن بوجهي ويبلعم ، ابتسمت وتقدمت متقربه منه

ومن صرت كباله ، رفعت اديه محاوطه ركبته على كيفي

وكفت على اطراف اصابعي و بسته من فكه ، الحمدلله على سلامتك ، شلت راسي باوعت لعيونه وهمست .... حبيبي

***************************************
لهنا يكون خلص البارت ان شاء الله يكون عجبكم ❤️
+ لتنسون التصويت والتعليق برأيكم ❤️

شنو رأيكم بالأحداث ؟

شنو تتوقعون حيصير بالبارت الجاي ؟