الموت الحي الفصل التاسع وستون 69 - بقلم براء الموسوي

مرحبا حبايبي العسل شلونكم ❤️❤️

#الموت الحي
#للكاتبة براء الموسوي

ديمة : لازمة موبايلي وافتر بالغرفة ، اكو تردد بداخلي يمنعني اسوي الراح اسوي

اني صح ما احب امين بس ولا مرة تعمدت ااذي بكلام لو اجرحه بقصد ، دائمًا جانت ردات فعلي حقيقية ما امثلها ولا اتعمد اكون حادة ويا حتى اجرحه

بس اليوم اني وللمرة الأولى اكون متعمدة اتصرف بطريقة مو حلوة وبكامل ارادتي بس في سبيل احسسه انُ احنه منرهم سوه وعلاقتنا ما لازم تستمر

ماعندي حل ثاني احس الحياة هواي ظلمتني وصار الوقت إني افكر بنفسي اريد اصير انانية بلكت انانيتي تخليني الكه السعادة الفقدتها من سنين

شتت تفكيري صوت باب البيت الي انسد ، اخذت نفس بقوة ورحت كعدت على الجرباية ، انطيت ظهري للباب وسويت روحي العب بموبايلي

شويه وسمعت الباب ينفتح ويتبعه صوت امين

امين : السلام عليكم

ديمة : ما رديت عليه ضليت كاعدة بمكاني ، حسيت بصوت رجليه تبتعد عرفته طلع من الغرفة وراح يسبح

دقايق ورجع دخل للغرفة وسد الباب واني مازلت على كعدتي ما تحركت خطوة وحدة من مكاني

اباوعله اجه كعد يمي على بعد مسافة ، تحمحم وحجه بكل هدوء

امين : ليش لسه ما نايمة الساعة راح تصير بالـ2 ونص
موزين تضلين لسه كاعدة

ديمة : بكيفي شنو حتى على هاي راح تحاسبني

امين : شبيج ديمة ليش تحاجيني هيج هالفترة ابد وضعج ما عاجبني صارلج شهرين مدري شبيج

حجيج كله تنتر بس تتذمرين حتى احترام ما عندج
احاجيج حجاية تردين بعشرة وكله من ورة خشمج

ديمة : اسأل نفسك

امين : فهميني اني شنو البدر مني تجاهج ، احجيلي يجوز اني مسوي شي مضايقج بدون لا احس على نفسي وهالشي جارحج ومتردين تصارحيني

اذا اني مسوي شي عليج بداعة ابوج احجي خليني اعرف شنو الغلط الي مسوي حتى صاير تعاملج هيج وياي

ديمة : شمرت موبايلي وباوعتله امين اني راح احجي الي بكلبي لان بعد ما اتحمل

امين : واني اريدج تحجين احجي ولتضمين شي بكلبج

ديمة : من الاخير انت ما عاجبني

امين : شلون يعني

ديمة : ما جاي تستوعب انك تزوجت انسانة مو عادية
حياتها مو عادية واهلها وناسها مو عاديين

والمشكلة كلما احاول اخليك نفس بيئتي ومستواي الكاك تنفر وتعترض

احجيها الك بكل صراحة اني كمت اخجل من منظري
كدام خواتي وبيت جدي كلهم

امين : ليش اني شنو مسوي حتى اخليج تخجلين !!

ديمة : حياتك تخجل ، شغلك يخجل ، بيتك يخجل
هدومك تخجل كلشي بيك يخليني احس بالنقص

بكل مناسبة داحضرها احس بالخجل والنقص لان اشوف نفسي اقل من كل الموجودين

حتى اقل من خواتي ما شاء الله كل وحدة منهن زوجها موفرلها كلشي وما مخليها بعازة شي واني
من تزوجتك لليوم داراوح بمكاني ما تقدمت خطوة
وحدة والسبب انت

امين : صدك تحجين انتِ !! يعني هسه هي هاي الاسباب الي مخلية علاقتج بيه تتوتر هيج ؟

ديمة : اي هي هاي اني تعبت امين وبعد ما بيه اتحمل هيج حياة ، شعور إني قليلة وزوجي مو كد المقام مقارنةً بأهلي ديموتني

نزلت دموعي وكمت ابجي والله يا امين والله

نظرة الاستهزاء والاستحقار الي اشوفها من اهلي تجاهك لا مو من مستواهم تخليني اتمنى اختفي
من الدنيا كلها

كل طلعة وكل روحة وجيه ارجع دمعتي على خدي
اني المدلله عايشة هيج حياة ليش شنو فرقي عن خواتي وبنات عمامي شنو العيب الي بيه حتى
اعيش هيج عيشة تعيسة شناقصني؟

ما انكر انت حباب ومؤدب وحنين كل الصفات الحلوة بيك وتتمناك الف بنية بس يا امين اني بيئتك ما جاي تناسبني ولا جاي اكدر اتعايش وياها شكد حاولت بس مداكدر والله مداكدر

اباوعله ابتسم وهز راسه

امين : انتِ ملاحظة نفسج من اول ما حجيتي لسه ما ذكرتي شي واحد اني مقصر بي

حجيج كله على المادة ، حجة اللبس وكالت الفلوس وكال المستوى وحجن خواتج وكالن بنات عمامج

اشياء كلها سخيفة وتدل على طمع صاحبها وهاي الصراحة واني للامانة ما مصدوم باهانتج الي كد ما مصدوم انج طلعتي عبدة مالت فلوس وفخفخة

وهالشي صدمتي ابد ما توقعت بيوم إني انظرلج بهالطريقة تصدكين والله ما اعرف شكلج وبأي
طريقة المفروض ارد عليج

اكو كومة حجي بداخلي اتمنى اطلعه واحجي ومن باب ثاني مستحسف اتعب لساني واحجي حجي كل نتيجة مابي

بس كل الاكدر اكوله إني كاعد احفر الصخر واذل نفسي لليسوه والميسوه في سبيل ما اقصر وياج

بس الظاهر ماكو فائدة لان انتِ تفكيرج بالعالي ، كلش فوك واني حتى اكون صريح وياج مال اكدر اوصل
للمستوى التحلمين بي ، احتاج سنيييين وهم يمكن
ما اوصل

وانتِ من كلامج مبينه متكدرين او متردين تصبرين وخلي نحجيها من الاخير انتِ بايعة هاي العلاقة

والظاهر يا بنت الناس من خلال كلامج جاي توصليلي
رسالة مبطنه وترديني افهمها

واني فهمتها انتِ تردين تتطلكين ولتباوعيلي هيج التتغير بشهرين وتنكلب أحوالها هيج وكأنها شخص
ثاني

معناها تريد المقابل يحس ويجي يسألها حتى تطلع الي بداخلها واني اجيت سألتج ولله الحمد فضفضتي وطلعتي البكلبج وزايد

ديمة : ااا امين اني اسفة ، صدكني حاولت هواي اخلي علاقتنا تنجح بس تعبت بعد ما بيه اتحمل

امين : هاهي التردي يجرالج ومن هالعين قبل هالعين
بس اصبري عليه علما يفض عرس بصائر وتدللين
اطلكج واني الممنون هم

اني صحيح الله سبحانه وتعالى ما انطاني فلوس وجاه بس انطاني عزة نفس تخليني ادوس على كلشي

في سبيل احافظ على كرامتي وصورتي امام نفسي حتى لو جنت الدايس عليه گلبي ومشاعري

وهسه الاريده منج تتحملين بيئتي المو گد المقام شويه هالفترة وبس تروح بصائر لبيت رجلها ثاني يوم ابلش بمعاملة الطلاك

ومنا لذاك اليوم ياريت تلتزمين الادب حتى مثل ما دخلنا بالمعروف نطلع بالمعروف وبدون اي مشاكل

وهسه من رخصتج

ديمة : اباوعله كام طلعله ملابس نظيفة واخذ مخده وطلع من الغرفة

غطيت وجهي وكمت ابجي ، صحيح كيفت لان تفهمني واحترم رغبتي بس متت قهر على نبرة صوته وهو يحجي احسني كسرته وقهرته وهو ميستاهل

تنهدت يارب سامحني يارب والله ما ردت احقر ويا هيج بس انجبرت ما اكدر بعد اضغط على نفسي
اكثر والله ما اكدر

مسحت دموعي من دگ موبايلي شفت تقى دتتصل جاوبتها

الووو هاا تقى شلونج

تقى : هاا ولج بشري شصار

ديمة : سويت مثل ما كتيلي

تقى : اي وشرد عليج هو ؟

ديمة : زعل واخذ هدومة وطلع نام بره

تقى : اييي همزين عاد فك ياخه عنج

ديمة : بس انقهرت احس نفسي هواي جرحته

تقى : لعد شتسوين متكليلي هذا الحل الوحيد اليخلي ياخذ موقف وميقربلج بعد ياهو الاحسن برأيج يلزكلج اربعة وعشرين ساعة ويجبرج على فراشة

لو يزعل ويفك ياخه منج ، لتاخذج العاطفة انتِ نفسيتج متدمرة وحالتج حالة صايرة ، كافي فكري بس بنفسج ولو لمرة وحدة ما طيح حظج غير نفكيرج بالناس وبمشاعرهم

يمعوده كلمن يصيح ياروحي بهالدنيا ، طز بي وبمشاعرة شنو لزكة الف مره حسستي بعدم رغبتج ويرجع يدحس ويتعذر دخيل محمد شكد ماعندة كرامة

ديمة : بس تره هو خطية كلش حباب

تقى : اكلج لتنرفزيني واذا حباب يعني شنو قابل تدوسين على روحج وتفرضي عليج جبر

ديمة : هيج رأيج ؟

تقى : طبعاً ، يله هسه طبي سبحي واسترخي وكعدي شوفيلج فلم ما دام فرغلتج الغرفة

ديمة : تمام ، سديت الخط وانداريت لكيت بصائر واكفه ورايه وعيونها تجدح نار من العصبية

عززه شكلها سمعتنا اني وتقى

بلعت ريكي هاا بصائر شوكت اجيتي ما حسيت عليج
شنو محتاجة شي ؟

اباوعلها سدت باب الغرفة واندارت عليه

بصائر : تصدكين يوم عن يوم جاي انصدم بيج

للاسف احنه كلنا بهذا البيت طلعنا زوج وانخدعنا بيج اعتبرناج منه وبينا لكن مع الاسف طلعتي مستاهلين

حريمة وحدة مثلج تاخذ امين اخوية ، انتِ مستحقين انسان شريف مثله يرادلج واحد منحط مثلج بس هاي النوعية من الزلم تفيد وياج وتناسبج

ديمة : احترمي نفسج بصائر ولتتجاوزين

بصائر : جان انتِ الي احترمتي نفسج قبل لا تطلعين اسرار بيتج وتتفقين ويه وحدة منحطة مثل هاي

على رجلج سترج وغطاج مثل ميكولون ، الي قصر على نفسه وما قصر عليج ، الي كاسر ظهره عليه من السبعة الصبح وللـ2 بالليل في سبيل يوفرلج التردي

ما خفتي الله وانتِ كاعدة هنا تجرحي وتكسرين بي
تكليله انت مو من مستواي ؟

ليش انتِ شنو مستواج !! نسيتي نفسج انتِ واهلج وين جنتو عايشين لو تغير احوالكم خلاج تنسين السنتين العشتوهن هنا تتغدون متتعشون

اشو من جنتو فكر لاطي جنتِ حبابة وبسيطة فجأة من رجع صار طحين باظافرج كمت تتعيقلين علينا

بس الظاهر الناس المثلج تطلع وجوهم الحقيقية من الله يزيل عنهم الكربة

ديمة : بصائر والله اني مو هيج بـ...

بصائر : اش اششش صوتج ما اسمعه عينج صلفة وبعدج تبررين لج اني سمعتج بإذاني

جنت جايه اشوف امين يتعشى لو لا وانصدمت من سمعت كلامج لج ما خفتي الله وانتِ تبتين سهام بكلبه كن من وره حجيج

ما كلتي خطية راح تحز بكلبه كل حجاية توجع طلعت من گلبه ليش بشنو اذاج هو ؟ جبرج تتزوجي

اذا جابرج كليلي حتى اعذرج واكول يستاهل هو فرص نفسه عليها متحجيييين شبييييج اخوووية
جبرج عليه

ديمة : مسحت دموعي وجاوبتها ، لا

بصائر : لعددد لييييش تعاتبي وتعيري وانتِ من ذاتج وافقتي عليه وبكامل ارادتج

بس تدرين انتِ ليش هسه تخبلتي ، شفتي خواتج رجعن لنفس مستواهن المادي وانتِ من غيييرتج منهنننن كمتي تحاولين بكل الطرق تطفشين اخويه

حتى تتطلكين وتاخذين واحد عنده فلوس وتصيرين متساوية ويه خواتج يا غيييورة يا مريييضة

ديمة : لا بصائر لا والله اني مو هيج

بصائر : لا هيج انتِ وخواتج كلجن مسمومات وتنكطن سم

الجبيرة ضحكت على طليقها وخلته يطلگ مرته وباكت من المرة رجلها وابنها

والثانية من شافت حليم تخطاها وحب يشوف حياته كتلتها الغيرة واجت تموت وكامت تحرضني حتى ارفض عبالها اني زوج

وهسه انتِ بعد ما تغيرتو كمتي تلوبين وتتكبرين على اخوية علمود يطلكج

كلجن حقيرات وتنكطن سم الله لا يوفقجن ولا ينطيجن على هالانانية الشايلاتها

تفففف عليجن ذرة شرف ماعدجن يالمتخافن الله

ديمة : اباوعلها عافتني وطلعت راكعه الباب وراها ، ضليت باهته بمكاني والدمعة واكفه بعيني

زين اني غلطت خواتي شعليهن تحجي عليهن هيج بشنو اذنها هن !!

________________________________

زبيدة : تلكتنا خالة هيام تبجي بالباب بس شنو مفرفحة روحها وشعرها مكفش كد ما مملخته

اني شفتها وانخمط گلبي خير يا ستار

اباوعلها اجت تركض ذبت روحها على هارون وكامت تنشغ

هيام : ولك يمه الحك اخيك موسى اكو ناس رامي بسلاح وشاردين واخوك حالته موزينة سودة بوجهي عليه ولد الحرام ماردي مرد

زبيدة : اباوع لهارون دفعها عنه وخزرها

هارون : واني شكو جايه تكليلي

هيام : ولك شنو انت شكو اخوك بالمستشفى بين الحياة والموت وتكول اني شكوووو

هارون : منو گال اخوية !! اني ماعندي اخوان وهسه وخري عن طريقي مالي خلكج

حجية اني صاعد فوگ عود من يصير الغدة صيحولي تره ميت جوع

زبيدة : صعد هارون فوگ والجماعة كامو يعدون ويصفون عليه

بيداء : اني كلشي شفت بس مثل حقارة ابنج والله ولا شفت

هيام : ابني مو حقير لتحجين عليه هيج

افكار : لا عمه حقير شفتي شلون مبين ذاك وينه متشمت

علياء : هو هذا هارون عمرة ما راح يتغير ولا بيوم راح يبطل حقد وحقارة ويه اهل هالبيت ولا جنهم اهله اليشوفه يكول عدوانه

بيداء : ومنو كلج هو ميشوفنه عدوان هذا واحد حاقد

حمزية : سدي حلكج بيداء ولتضلين تشمرين زيت على النار خلينا حايرين بسالفة موسى هسه مالج علاقة بهارون

بيداء : وانتِ شبيج تباوعيلي هيج

زبيدة : اكيد مو معجبة بشكلج يعني

باوعت لبيبتي ، بيبي اني صاعدة عود طمنوني عنده العافية ان شاء الله

افكار : صعدي صعدي ما اوصيج احتفلي زين رايتج بيضة اليوم انتِ ورجلج

زبيدة : الوضع الانتِ بي يجبرني ما ارد عليج ، ويفضل تكعدين تدعين ربج يكومة الج بسلامة هذا الحجي ما راح يفيدج

صعدت فوگ ، فتحت الباب ودخلت لكيت هارون واكف كبال الشباك مالت البلكون

هارون انت سويت هيج باخوك ؟

جاوبني بدون ما يندار عليه

هارون : اي بقدرة الله طلع عندي روحين وحدة جانت وياج والثانية راحت رمته ورجعت

زبيدة : رحت يمه لتضل تستضرف اني مداشاقة وياك
اعرف جنت وياي لكن مع هذا مو شرط انت تكون مأذي بايدك اكو طرق ثانية !

باوعلي بطرف عينه وابتسم

هارون : معلومة عني انتِ متعرفيها اني حقي اخذه بايدي ، عندي القوة وعندي العقل اودي احد ياخذلي حقي ليش ؟ شناقصني !!

لتخافين مو اني الصوبته صحيح جنت اتمنى اني المسويها لكن ارادة رب العالمين جانت اقوى مني

هه تخيلي عظمة رب العالمين ما راد إني اخذ حقي بإيدي واتحمل ذنبه ، هو الي تكفل بالعقوبة وما اعظم عقوباته

احب الله من ينتقم بكد ما عطفة عظيم الا ان انتقامة اعظم وهذا الشي الي مفرحني

زبيدة : لتتشمت

هارون : ومنو گال اني جاي اتشمت اني جاي اشكر ربي ، غلط ؟

زبيدة : اباوع على الابتسامة المرسومة على وجهه مجانت ابتسامة عادية ابدًا ، احس بداخلها غل وحقد
فضيع

مشيت عنه ورحت فتحت الكنتور طلعت ملابس الي واله ، شمرت ملابسي على الجرباية ورحت يمه

هاك روح اسبح وبدل ، ملابسك رطبة لتروح تتمرض

هارون : عندي ادين تره

زبيدة : مو لسواد عيونك اني داساعدك حتى من احتاجك وتساعدني متكعد تمن عليه وحدة بوحدة يعني

خليت الملابس على صدرة ورحت كعدت وهو دخل للحمام سبح وطلع واني دخلت ورا كملت وطلعت صليت

نزلت جوه حتى اصبلنا غدة لكيت بيبتي تخابر والكل ملتم عليها

حمزية : الحمدلله الف الحمدلله خوش خوش الله وياك

هيام : هاا عمة بشريني

حمزية : الحمدلله طلعت الرصاصة واكعة برجله وكدرو يطلعوها اله

بيداء : الف الحمدلله زين وضعه شلونه

حمزية : ابوج يكول زين بس ما انطاني تفاصيل

هيام : وما عرفتي شوكت يطلعو

حمزية : گال اليوم بالليل ان شاء الله

هيام : الحمدلله يارب دعيتك وما قصرت

حمزية : هاا يمه زبيدة ليش واكفة هناك تعاي

زبيدة : اباوع لافكار المدنكة على القبلة وتبجي ، هاا بيبي الحمدلله على سلامة موسى

من رخصتكم حروح اصب غدة واصعد

بيداء : شلون الكم نفس تاكلون هسه على الاقل اكلو بالسكته والله عيب عليكم

زبيدة : اشو من هارون جان مربوط فوگ حضرتج جنتِ كاعدة على هالقنفة وحاطة ماعون الفواكه بحضنج

هسه على الاقل لو ماكلته بغرفتج وبالسكته والله عيب عليج ابن اخوج مسلسل وبدون اكل 3 ايام
وانتِ كاعدة تمزمزين بالفواكه ولا على كلبج شي

بيداء : طايحة الحظ كلبه هاي ويامن هالحجي

حمزية : لحظة لحظة هذا ياهو المسلسل بس لا تقصدين هارون

زبيدة : خلي بنتج صاحبة الصون والعفاف تسولفلج
شسوت هي وولدها وابن اخوها بهارون

دخلت للمطبخ فتحت الجدور لكيتهن مسوين تمن باكلة ومي لحم صبيت واخذت الاكل بصينية وصعدت

باوعت للباب هاي شلون افتحها ، شلت رجلي ركعتها دفرة حتى الشفية يسمع ويكوم يفتحها

بس حضرته الظاهر ما سمع ، صحت هارووون كوم افتح الباب الصينية ثكلية ومابيه حيل انزلها بالكاع وارجع اشيلها

استغفر الله ، شلت رجلي حتى ادفر الباب والشفية فتح الباب ، نزلت رجلي بسرعة همزين ما تهورت
ورفعتها اكثر جان راح مستقبل الرجال

هارون : هاي شجاي تسوين انتِ وشلون كدرتي ترفعين رجلج هيج ؟

زبيدة : هسه انت حرت برجلي ما حرت بالصينية النامت على گلبي

دخلت للغرفة خليت الصينية على الطبلة ونزعت حجابي ، اشرتله ، يله تعال ليبرد الاكل

اجه كعد انطيته خاشوكة وبدينه ناكل

اكول هرهر

هارون : هرهر شنو احترمي نفسج

زبيدة : بلعت اللكمة وضحكت شسويلك شكد احاول الكة دلع لاسمك بس ماكو

هارون : محد طالب منج تدلعيني

زبيدة : اني اطلب من نفسي غير سوجي انت

هارون : حلكج

زبيدة : شبي ؟

هارون : عدلي لا اعدله الج

زبيدة : رفعتله حاجبي وشلون حتعدله الي ؟

اباوعله شال راسه وباوع لشفايفي وتنهد

هارون : استغفر الله شكد تحجين

زبيدة : عندي سؤال عادي اسأل

هارون : لا

زبيدة : شكراً حبيبي كلك ذوق ، سؤالي هو ..

هارون : مو كتلج لتسألين

زبيدة : صدك ؟ ما سمعتك المهم انت عود ليش جامد ويه اخوانك وخواتك هيج

جاوبني بكل بساطة

هارون : ما احبهم

زبيدة : متحبهم !! اكو واحد ميحب اخوانه

هارون : اي اني بس نور شوية اتقبلها

زبيدة : زين ليش ؟

هارون : اني ما احب غير 3 بالدنيا ، نفسي ، حيواناتي ، الحجية حمزية وبس

زبيدة : اي والله اني بهاي وياك ، انت تحب نفسك وحيواناتك والحجية بس تعشقني بس اني

فدوة لكلبك حبيبي اني هم اعشقك ، دزيتله بوسة بالهوى

هارون : ثقتج بنفسج فضيعة

زبيدة : فوك متتخيل

كملت اكل وكمت غسلت وانتظرته علما كمل شلت الصينية نزلتها وصعدت

ماكو لليل اجوي الكل من المستشفى وطلعو موسى ، نزلنا اني وهارون لكينا الكل متجمع على موسى الي حاطيله جرباية بالاستقبال ويون من الوجع

النوح : عوفو بوية وطلعو خلي يرتاح

زبيدة : الكل تحمدله بالسلامة عدايه اني وهارون وطلعو بقت بس مرته واطفاله وامه

اباوع لجدي قبل ليطلع خزر هارون وكله يصعد فوك وهو شويه و لاحكه

صعد هارون واني ما تحملت الفضول كتلني لحكته بسرعة ودخلت بوجهي للكنتور سويت روحي اخذ هدوم

هارون : نعلعلا يومج على هالفضول

زبيدة : حصرتني الضحكة وغلست ما رديت عليه

شويه واندكت الباب ودخل جدي بس شنو غادي اعصاب

النوح : انتتتت وينك ليييش ادگ علييييك مترررد اخوك جان بالمستشفى ويييينك ليش ما اجيت
شفتتته

هارون : جنت تعبان ما كدرت اجي

النوح : للللك اخووووك هذااا اخوووك يا تعبان يا صخام شنو من بشر انتتتت

هارون : الله اكبر يعني جبر اجي للمستشفى شراح تسوي جيتي تطلعله الرصاصة مثلاً

اني طبيب بيطري مو بشري للمعلومة يعني جيتي ما راح تسوي شي

النوح : حتتتتى لو اخوك بشدة ليييش ما اجيت شفته

هارون : ماعندي بانزين

النوح : لا اله الا الله شنوووو قلة سيارات بالبيييت شهالحججج الغبييية

هارون : انت بنفسك تعرف هاي حجج واني ما اريد اجي بعد ليش تتعب نفسك وتسأل

النوح : بسيطة هارون بسيطة اني اعلمك لك اخوك الدكتور يكول عليه رجله راحت الطلقة اجت بركبته
وتسكطت رجله

هارون : اييييه الله يشافي

النوح : مع الاسف عليك ابدد ما عندك محنة على اخوتك ولا تكول ابوك عبدالله اليبجي بدموع دم على اخوته لو مسهم الهوى

هارون : اهدى جدي اهدى ، تفضل اشرب ماي وجر نفس موزين عليك لتروح تتخربط محد يفيدك لا اني ولا غيري

زبيدة : اباوع لجدي نتر الكلاص من ايد هارون وطلع وهارون صاح ورا

هارون : سد الباب وراك طلعت البرودة من الغرفة

زبيدة : يربي شكد مستفز والله لو اني بمكان جدي جان لطيته على حلكة

هارون : شبيج تباوعيلي

زبيدة : معجبة بيك اوكف اخذلك صورة

هارون : ما احب التصوير

زبيدة : عايش الدور

هارون : طالع عليج

_____________________________

دنيا : دكيت الباب مالت المكتب وانتظرته يأذنلي بالدخول ، بس سمعت صوته دخلت

لكيته كالعادة كاعد يشتغل ، بدون لا انطق بحرف خليت الملفات على مكتبه وضليت واكفه

يوسف : هاي وجبة وحدة لو كل الوجبات

دنيا : لا كل الوجبات

يوسف : استريحي

دنيا : مرتاحة هيج

يوسف : اريد اشتغل على راحتي لتوكفين على راسي كعدي

دنيا : كعدت وهو ضل يشتغل لمن كمل ياله شال راسه عليه

يوسف : هاج اخذيهن

دنيا : اخذتهن وطلعت اكمل شغلي

خلص الدوام والكل طلع ، واني رحت لحليم ، اكول حليم عادي اطلع وياك اليوم

حليم : اي طبعًا عادي بس يوسف وينه

دنيا : موجود بس اني عندي كم حاجة لتيموي اريد اجيبهن من الماركت اذا تكدر اخذني انت لان يوسف
تعبان ويريد يطلع گبل للبيت

حليم : اي يله اني هم محتاج جم شغلة هم اجيبهن وهم اخذج

دنيا : يله لعد اجيب جنطتي واجيك ، جبت جنطتي وطلعت ويه حليم

بالطريق ودگ موبايلي ، شلته لكيته يوسف انطيته كتم وضميت الموبايل

حليم : الظاهر السالفة مالها علاقة بتيم والحبايب ما متصافين مو

دنيا : انداريت عليه داريد اجاوبة وصارت عيوني على ركبته

جانت ركبته بيها اثر

اباوعله اندار وشافني اباوع لركبته الي مبينه من القميص وهو من انتبه على عيوني وين مصوبة رفع ياخة القميص وعدلها

حليم : احم ما جاوبتيني

دنيا : لا متوهم

حليم : يجوز

دنيا : رحنا للماركت واني فعلاً جنت محتاجة غراض لتيم حفاظات وحليم ونمنمات ، اشتريت كل الاحتاجة وحليم اشتره نمنمات وجكاير

دفعنا الحساب ورجعنا للبيت ، اول ما وصلنا تشكرت من حليم ونزلت ماخذة غراضي

دخلت جوه لكيت تيم واكفلي بالباب ، شوففف ماما شنو جابتلك

تيم : هلا هلا

دنيا : هههههه دنكت بوسته وسلمت على الكل واخذته وصعدت

شلونك اليوم حبيبي

تيم : ذين

دنيا : يمه صدقة للزين ، فتحت الباب ودخلت لكيت يوسف كاعد على الجرباية بس وجهه ميبشر بالخير

يوسف : انتتتت شنوووو هالتصرفاااات مالتتتت الزعاطيط العندج شنووو رايحة ويه حليم ومن اخاااابرج لييييش متردييين

تجاهلته ورحت طلعت الي ملابس وانداريت داخذ تيم واطلع بس فاجأني من كام يصيح

يوسف : مووو احجيييي ويااااج

دنيا : من تتعلم تحاجيني باسلوب محترم عود اجاوبك واني الممنونه هم

تعال ماما ، اخذت تيم وطلعت لغرفة الضيوف سبحت هناك وبدلت ملابسي ونزلت تغديت وصعدت فوك

تمددت ونيمت تيم بحضني هستوني داغفه واندكت الباب

كمت فتحتها

سجى : السلام عليكم ست

دنيا : خير ؟

سجى : ممكن اخذ من وقتج شويه

دنيا : جايه تعبانة واريد انام

سجى : بس خمس دقايق

دنيا : ضميت اديه وباوعتلها ، احجي

سجى : ست اني اجيت اعتذر على سوء التفاهم الصار البارحة والله اني ما ردت تصير مشكلة بينج وبين الاستاذ يوسف

والله اني ما شفت الاستاذ واكف ولا انتبهت اله وهو اكيد فهم نقاشنا غلط واني مستعدة احاجي واوضحله كلشي

دنيا : على شنو تحاجي مدافهم

سجى : على مشكلتكم ما اريدكم تتعاركون بسببي

دنيا : اولاً احنه ما متعاركين وثانيًا حتى لو جنه متعاركين انتِ مالج اي حق تدخلين بيناتنا

سجى : العفو ست اني ما اقـ...

دنيا : قاطعتها ، اني ما كملت كلامي

اسمعي عزيزتي انتِ هنا عندج وظيفة مثل ما اني بالشركة عندي وظيفة

ومثل ما اني هناك شغلي ماله علاقة بالادارة المفروض احفظ احترامي لنفسي وما اتدخل بشي هو اصلاً مو شغلي

وانتِ هم هنا وظيفتج تساعدين بامور البيت اي شي خارج نطاق الشغل اذا تدخلتي بي معناها مدتحفظين احترامج لنفسج

خليج بشغلج وبرزقج افضلج واني دانصحج نصيحة لوجه الله ، يمكن اني حاجيتج باسلوب حتى تفهمين بس الباقين ما راح يتفاهمون وياج بس يشوفوج تدخلين گبل ينطوج راتبج ويكلولج مع السلامة

سجى : بس ست انـ..

دنيا : خلصت الخمس دقايق من رخصتج اريد انام ، طبكت الباب ودخلت

عفية صلافة ووقاحة ماكو هيج والله

اباوع لتيم فتحلي اديه

تيم : يله ماما يريد ينام حتى يكعد يلعب

دنيا : اجيتك حبيبي ، نمت بصفه واخذته بحضني ، ضليت العب بشعره لحد ما نام واني هم نمت

ما كعدت غير العصرية كمت غسلت وكعدت تيم انطيته كيكة وفتحتله التلفزيون وكعدت اتابع ويا

شفت الباب ينفتح ويدخل يوسف

يوسف : السلام عليكم

دنيا : رديت عليه ، اباوعله راح لتيم راد يشيله بس تيم دفعه

يوسف : تعال حبيبي مشتاقتلك اني ما بوستك اليوم

تيم : ولي ميحبك هو

يوسف : ليش حبيبي

دنيا : اباوع لتيم نزل من الجرباية ووكف كبال يوسف

تيم : اتتتته تسيح على ماما البالحه وكامت تبجي روووح رووح بعد ميحبوك

دنيا : كام يعد ويصف على يوسف انوب غطه وجهه وكام يبجي

تيم : ولي بعد ميحبك هو ولا ينام يمك

يوسف : لا يگلبي لا يحبيبي لتبجي اني احبك انت وماما والبارحة اني وننه جنه نشاقة وهسه راح نرجع لغرفتنا ونبدل ونطلع نفتر سوه مو ننه

دنيا : هاا اي اي حبيبي

يوسف : يله حبيبي تعال ابوسك ، افييييش بويه يمه اليحب امه وميقبل عليها

نروح نشرب ازبري لو ناكل موطة شتكول

تيم : عسير

يوسف : هههههه ولا يهمك عصير عصير يله امشي نروح نبدل بسرعة

دنيا : اباوعله كام على حيله بعد ما شال تيم وباوعلي

يوسف : خلي نطلع شويه ونحجي وحدنا ، جاءًا

دنيا : هزيت راسي ورحت للغرفة وهو اجه وراي

يوسف : روحي انتِ بدلي واني راح ابدل لتيم ولروحي

دنيا : ماشي ، بدلت وطلعت لكيته مبدل لتيم وكاعد يلبسه حذائة

يوسف : ااااالله شنو هالجمال بووييييه كييييك كييييك شو تعال اعضك

تيم : هههههه لا بابي لتعڤني

دنيا : ابتسمت على ضحكة تيم ورحت لبست حجابي وانتظرته علما كمل وطلعنا

دنمشي وميحتاج اكول ست الحسن متربصة للكل بالمطبخ خاف تفوتها سالفة

يوسف : السلام عليكم

سجى : اهلا استاذ وعليكم السلا..م

دنيا : انتبهت عليها من سلم عليها يوسف ردت بحماس وبس شافتنا ويا كملت السلام من وره خشمها

طلعنا ورحنا لكافيه عائلي وكعدنا

يوسف : شطلبلك حبيبي

تيم : عسير

يوسف : اي اعرف عصير شنو

تيم : تربقال

يوسف : ههههههه تربقال تربقال تدلل

دنيا : طلبنا لتيم عصير تربقال على كولته واني ويا طلبنا كهوة باردة

اباوع ليوسف يشرب بالكهوة ويباوعلي

يوسف : احم باعي دنيا اني يجوز شويه دست بالكلام وياج

دنيا : يجوز ؟ وشويه !!

يوسف : هواي واعذريني ادري هواي ضوجتج بحجيي بس الموقف استفزني خصوصاً اني ما متعود اشوفج تتعاملين ويه احد بهذا الاسلوب

دنيا : وبما انك تعرفني مستحيل اتعامل بتكبر او تعالي ويه احد المفروض تخلي ببالك انُ اكو شي
مخليني هيج اتصرف

يوسف : وشنو المخليك تتصرفين ويه البنية هيج

دنيا : يوسف

يوسف : شنو ؟

دنيا : سد الموضوع افضل

يوسف : هسه غير افتهم ليش

دنيا : احنه مطالعين نتعارك خلي نعدي هالليلة على خير

اباوعله تنهد ومد ايده لزم ايدي

يوسف : اني اسف على البدر مني تجاهج والله ما ادري بروحي شلون انفعلت هيج ومن طلعتي الليل كله اني ما نمت

وجودج بحياتي رجعلي السكينة الجنت فاقدها ولا يمكن اقبل انج تعوفيني بعد

نتعارك نتكافش نصير من الروس نتزاعل بغرفتنا شيلي من راسج سالفة النومة بره رجاءًا

دنيا : هزيت راسي ماشي ، شفته رفع ايدي ديريد يبوسها جريتها بسرعة

احنه بمكان عام بالمناسبة يعني

يوسف : احم نسيت والله

دنيا : رجعت اشرب كهوتي واسولف ويه تيومي وهو يباوعلي بس اني مطنشه

حتى لو اعتذر المفروض يعرف انُ السوا غلط ومو بسهولة هيج بس گال اسف انتهى كلشي

اذا امشيها اله هيج وما اخذ موقف راح يتعود يصيح ويتجاوز عليه بحجة بس اعتذر ينتهي الموضوع واني ما اريد علاقتنا هيج تصير

صحيح اني اموت عليه مو بس احبه بس الاحترام واجب علينا اثنيناتنا ولازم اليغلط تنكرص اذانه
حتى ليتجاوز بعد وان جان الموقف تافه

كملنا الكهوة وطلعنا افترينا شويه بالشوارع ورجعنا للبيت وبيومها رجعت نمت بالغرفة بس مالي علاقة بي

ثاني يوم طلعت ويا للدوام وكلمن التهى بشغلة

سفير : ست دنيا رايح اشرب جاي اجيبلج

دنيا : ابتسمت اله الف عافيه سبقتك

رجعت اكمل شغلي واجتي رسالة على موبايلي ، عفت الملفات وفتحته لكيت رسالة من يوسف

يوسف : اذا كملتو الملفات جيبيهن الي اريد اشوفهن بسرعة حتى اطلع عندي موعد غداء بره

دنيا : جاوبته ربع ساعة ويكملن

رجعت اشتغل بيهن ومن كملتهن كمت رايحة لمكتبه ، دكيت الباب واجاني صوته

فتحت الباب ودخلت بس تفاجئت من ما لكيته ، سديت الباب ووكفت

مو هستوه گال تفضل وين راح لعد ، يله خلي اخلي الملفات على مكتبة واكعد انتظرة احتمال بالحمام

داتحرك وفزيت من حسيت بروحي انجر من خصري
عطت مخترعة من الصار

بعدني حتى ممستوعبة الموقف وشفت بوكيه ورد بنفسجي يصير بوجهي

حسيت بشفايف تتحرك يم اذاني

يوسف : احبج

________________________________

زبيدة : داعزل بالغرفة واغني

انا ما بدي تقلي كلام بيذوب قلبي حنين وغرام بيكفيني تقلي بحبك هيدي الكلمة بتقتلني

نفضت القنفات بالمضرب مالت الذبان ، اي والله يا نانسي بتقتلني

رجعت اشتغل واغني خرب هالاغنية والله لزكت بلساني تاكل وتشرب وياي

احسها تشرح الي بكلبي للشفية ، صفنت عود صدك كلمة احبج شلون ممكن تطلع بصوت هارون

كزبر جسمي من تخيلته يكولها نعلعلا يومج زبيدة لالا كلش منتهيه ومستهترة انتِ

وعلى سيرة الشفية طب عليه مثل القضى المستعجل ووجهه كالعادة يلطم

نزعت الكمامة وباوعتله ، هاا حبيب الله يساعدك

هارون : هله

زبيدة : ذبيت المضرب ورحتله ، شنو شبيك ليش صاير عصبي ؟

هارون : هذا جدج حالف اله يجلطنيييى

زبيدة : ليش اسم الله شسوالك ؟

هارون : اليوم اجه للعيادات مالتنا وشاف الاطباء الي وياي وهمه بدورهم من باب الاصول والذوق تحمدوله على سلامة موسى

وهو رد عليهم وبكيفه قرر يكلهم إني باجر عازمهم يمي على غدة بمناسبة كومة موسى بالسلامة وعود اني راح ازعل اذا ما اجو وردو العزيمة

زبيدة : اي وشنو يعني واذا عزمهم شكو بيها

هارون : ما بيها شي بس هو ليييش يحجييي عن لساني شي اني ما كايله ميييبطل سوالفه

زبيدة : عادي ما صار شي هارون شدعوة هالعصبية قحط غدة

هارون : انييي مو على الغدة بس اني ماعندي علاقة بيهم وكل البيني وبينهم السلام على يا اساس يعزمهم

واني اصلاً لا احب اروح لاحد ولا احب احد يجينيي
كوووه مروة يريدنييي اختلط بفلان وعلان كوه هي خوما كوه

زبيدة : اباوعله كل عقله يفرفح ووجهه غادي احمر من العصبية ، تقربت لزمت اديه باديه ثنيناتهن

خلص خلص اهدئ ميستوجب كل هالعصبية شي صار بعد ليش دتحرك بروحك

هارون : ليييش هو حدج يرتاح اذا مينرفزني

زبيدة : بصراحة ولتزعل مني بس منتبه الك هواي تنطي للمواضيع اهمية اكبر من حجمها وبالتالي متأذي
غير نفسك بهاي العصبية

عزمهم جدي عادي خلي يجون اهلاً وسهلاً نقوم بواجبهم حسب الاصول ومن يروحون تروح انت بكل هدوء تحاجي جدي

كله جدو اني علاقتي بزملائي مو قوية وماعندي صداقة بيهم يفضل بعد متحجي شي عن لساني بدون
لتنطيني خبر حتى لا انصدم وانحرج كدام المقابل

وهاهي ينتهي الموضوع بكل سهولة ، مسحت بأبهامي على ايده ماله داعي تضوج روحك هيج

واذا على الغدة فلتشيل هم اني باجر اكعد واطبخ الهم واقوم بواجبهم وزايد هم ، تدلل انت وياهم

اباوعله سحب اديه ومسح على شعري

هارون : ميحتاج تتعبين نفسج اجيب من برة

زبيدة : عيب عليك عندك ام الزبد وتروح تجيب من بره واذا على التعب فلتخاف اني اصلاً اتونس بالطبخ

بسته من خدة وابتعدت ضاربته على جتفه

يله حبيب روح اسبح وذب تعب الدوام واطلع صلي وانزل اني حسبقك جوه

رحت بسرعة عدلت الطبلة ورتبت المزهريات ولبست حجابي ونزلت اساعد البنات

افكار اخذت صينيها وراحت هي واطفالها للاستقبال حتى تتغدة ويه موسى

ضحكني منظرها جنها بطة وجهالها يفترون وياها

شلنه الاكل وخلينا بالصالة ، نزل هارون وبلشنا نتغدة
بحضور جدي طبعًا

النوح : حضرو رواحكم باجر جماعة هارون معزومين يمنا على الغدة

حمزية : كل الهلا بيهم

النوح : الشباب اول مرة راح يجونا نريد توجبيهم خوش واجب حجية

حمزية : بعيني بس جم نفر همه

النوح : يعني يطلعون عشرين واحد

حمزية : هاهي ابشر انت وهارون

زبيدة : بيبي حبيبتي انتِ تعبانة ومو مال توكفين بالمطبخ فترة كلش طويلة زين منج اصلاً دتبطخين الغدة

فارتاحي انتِ اني باجر راح اطبخ

علياء : ليش انتِ تعرفين تطبخين ؟

زبيدة : لا ما اعرف بس عادي اتعلم من اليوتيوب

هيام : دكعدي كعدي تردين تجربين براس العالم وتحرجين رجلج وياهم اني باجر اطبخلهم لتشيل
هم حبيبي هارون شتحب اني باجر اسوي الك ولجماعتك

هارون : زبيدة تطبخ

هيام : مو هياتها دتكول متعرف يا حبيبي اني اطبخ اله تفشلك يعني

هارون : كلت زبيدة تطبخ

حمزية : كلنا نتساعد سوه كافي سدو الموضوع

هارون : اعتقد كلامي واضح كلت مرتي الراح تطبخ

حمزية : هاهي بيبي على راحتك مرتك مرتك ولا يهمك

زبيدة : اباوع لخالة هيام تخوزر بيه

هسه اني فتحت حلكي متخوزر بابنها مو هو الما قبل هي تطبخ ، عفية زبيدة الحايط النصيص مالتهم
عشتو

كملنا غده وكمنا لمينه المواعين ، صبيتا جاي وطلعنا نشرب بالاستقبال يم موسى

طبعًا انتبهت لهارون حتى الحمدلله على السلامة ما كله

عبدالله : بويه احنه كلشي ما افتهمنا منك ما عرفت منو الي تعرضلك ما شفت سيارته وجهه اي شي يخصه

موسى : يابه كلشي ما شفت جاي اسوق وصار عندي بنجر ، نزلت اشوف شنو السالفة وما احس الا الرصاص يمطر عليه

ما ادري شلون الله ستر عليه وما وكعت رصاصة بگلبي عاد الحمدلله اجت برجلي وعدت بسلامة
اسبوع اسبوعين واكوم على حيلي

زبيدة : اباوع لجدي وعمي عبدالله واحدهم يباوع للثاني ومبين على ملامحهم التوتر

النوح : لتخاف جدي اني رفعت طلب للمركز وراح يدورون بكاميرات المكان الجنت بي حتى نعرف منو
الخسيس الي اعتدى عليك

بس خلي الزمه اله اندمه على هاي الفعله ومصيرة السجن بعد اكلان التبن الراح ياكله مني

موسى : هااا جدي لا ميحتاج ما دام السالفة عدت لتلح بالموضوع

النوح : شنو هي هيته غير نفتهم ليش صار وياك هيج
حتى السوه هالفعلة يتحاسب ويتأدب

زبيدة : ضلو يتناقشون واني اشرت لنور وكمت

نور : هاا زبد

زبيدة : امشي نصعد لغرفتج اريد افكر شطبخ باجر

نور : يله

زبيدة : صعدنا لغرفتها ، اخذت ورقة وقلم منها وتربعت بالكاع

نور : شنو ببالج تطبخين انتِ

زبيدة : باعي اول شي ولازم دولمة

نور : خوش

زبيدة : هارون كال راح يذبحلهم ذبيحة شتكولين لو اسوي تمن وعليه حشو ولحم هيج اكله مرتبه وتسوي واهس للاكل

احسن من الباجة لان تلوص والجو ميتحمل باجة ابد

نور : اي والله الباجة مالت برد

زبيدة : اني هم هيج اكول ، عضيت القلم ، نسوي زلاطات وشويه مقبلات بسيطة علمود خاف يحبون
ياكلون زلاطة ويه التمن مثلنا

نور : اني اسوي هالسوالف

زبيدة : خوش ، هاا تذكرت التمن خاف ميحبون ويا روبة لو تشريب شتكولين لو اسوي ويا مركة

نور : سوي فاصولية

زبيدة : شمرت عليها القلم هاهي على كولتج

نور : هههههه عورتيني شبيج تحمستي

زبيدة : ههههه دشمري القلم

اخذته ورجعت اكتب ، هسه خلصنا الغدة بعد الضيافة

شتكولين لو اسوي بتيفور وبقلاوة وكيك جاي

نور : انتِ ناوية تنحترين بروحج شدعوة

زبيدة : لعد شلون العالم اول مرة يجون خوما نفشل هارون وياهم

وانتِ متعرفين الزلم بره منهم بس يعيبون وينتقدون واني ما اريد واحد يحجي على هارون

نور : هااا عيني عيني شهالرومانسية

زبيدة : دمج خفيف

نور : طالعة على رجلج

زبيدة : ضحكت انجبي يله خلي نكمل ، شطبت على الورقة هسه كملنا الغدة والضيافة بقن بس الفواكهه والعصائر عود اوصي السايق يتسوك

نور : هسه ذني مو مشكلة بس الاكل التردين تطبخي تتوقعين ممكن تلحكين تكملي كله

زبيدة : باعي الدولمة راح اكملها هسه وباجر بس اطبخها والحلويات هم راح اسهر اسويهن

حتى للباقي باجر

نور : خوش واني اساعدج

زبيدة : دزتلها بوسة حبيب انت

نور : يمه زبد سوالفج تخبل

زبيدة : هههههه يله ولج خلي اروح اخذلي كسرة وراي سهرة طويلة

نور : يله اني هم وياج خلي انام حتى اكعد اساعدج

زبيدة : طلعت من غرفتها ورحت نمت ما كعدت غير المغرب صليت ورحت لبيبي راويتها شأريد اطبخ

حمزية : اني اساعدج متكدرين لكل هذا وحدج ظهرج ينكسر

زبيدة : ابتسمت متذكرة قبل شلون جنت اطبخ كلشي وحدي شكد جانت ايام صعبة بس حلوة حيل حلوة

تنهدت هاهي لعد خلي اروح اجهز الدولمة حتى نكعد نلفها سوه

طبيت للمطبخ وجهزت الحشو والخضراوت ، خابرت دادا وخالة وئام اجوي يساعدونا باللف

اني ونور ودادا وخالة وئام وبيبي كعدنا على الدولمة بساعة كملنا 3 جدورة وغطياهن

انطيتهن لدادا وخالة وئام لان ما اامن يروحون يخربون الاكل واني كلشي اتوقع منهم

كملت الدولمة وارتاحيت لليل كمت اسوي الحلويات
ماكو للـ2 بالليل ياله كملت وصعدتهن فوك اني ونور
خليتهن بغرفتي

هارون : خير شنو كل هذا ؟

زبيدة : شتشوف انت ؟

هارون : حلويات بس شدعوة هالكد ؟

زبيدة : مالك علاقة انت

هارون : حلكج عـ..

زبيدة : قاطعته عدلي افتهمنا

اخذت دشداشة تعلاكة وطبيت سبحت وطلعت تمددت على بطني

اااخ ولج يمه ظهري

هارون : شهالنومة السخيفة هاي

زبيدة : غمضت عيوني وجاوبته ليش شبيها

هارون : ليش نايمة بالعكس وحاطة رجليج بوجهي

زبيدة : هارون

هارون : نعم

زبيدة : اسكت عني وغطيني مابيه حيل اتغطه

شفته كام سحب الغطه غطاني ورجع لمكانه يستغفر
عشتو نزل عليه الدين فجأة

غفيت وما كعدت غير بالستة على صوت المنبة ، تمغطت وباوعت لكيت روحي حاطة رجليه على بطن هارون

ضحكت عمي همزين ما طيح حظي ، كمت غسلت وبدلت ونزلت مكعدة بيبتي

دخلنا للمطبخ اني وياها جان عقيل جايب الذبيحة منظفة ومقطعة

تريكنا وكمنا عزلنا الكسور وبدينا نشتغل وبيبي فدوة لايدها رغم كبر عمرها بس هميمة بالشغل وكلش نادرة

ضلينا نشتغل اني واني للثمانية نزلت نور تريكت وكعدت تسوي المقبلات حتى تعوفهن يبرد

استمرينا بالشغل للظهر انهد حيلنا ، كملنا كلشي وبقت بس الدولمة

اجوي الجماعة وجدو وكل الشباب استقبلوهم وبعد صلاة الظهر بلشنا نصب

وصيت صاحب يرتب السفرة ويصورها الي ، رجعت اكمل كلبت جدورة الدولمة وانطيتها الهم

كملنا ولله الحمد بس شنو صايرين خردة

راحو الزلم يتغدون واحنه كعدنا بالمطبخ نتغدة بيومها دادا وخالة وئام تغدو يمنه هنه وعمتي بيداء

بيداء : خوش دولمة هاي ما مبين عليج ولج تعرفين تطبخين

زبيدة : ومنو گال اني اعرف اطبخ

بيداء : لعد شلون طبختي يمه

هيام : من اليوتيوب يختي من اليوتيوب

زبيدة : جاوبتج

بيداء : والله زين يوتيوب وضبطتيها

زبيدة : اي اليريد يتعلم ميصعب عليه شي

اكلت شويه وكمت بوست بيبي ونور ودادا وخالة لان ساعدني ورحت غسلت وصليت ونزلت

صبيتا الجاي وره ما كملو الجماعة ودزينالهم الضيافة
من كمل كلشي ياله ارتاحيت

صعدت لغرفتي وكتلهم لحد يصيحلي ابد اريد انام

طبيت للغرفة بوجهي للحمام كعدت ساعة جوه لمن كلش فك جسمي ياله خليت الخاولي على راسي وطلعت

دامشي وانشف بشعري وشفت هارون يطب للغرفة ، ابتسمت هااا حبيب بشر شلونه الاكل

شفته واكف بمكانه وباوعلي

شنو شبيك بس لا ما عجبكم الاكل

اباوعله تقدم وكف كبالي ودنك عليه باسني من شفايفي بخفه وابتعد

هارون : شكراً وعاشت ايدج الاكل يخبل

زبيدة : بلعت ريكي وحكيت ركبتي

اا الف ععـ عافية

_________________________________

ديمة : كاعدة بغرفتي ودخلت خالة عليه مبتسمة

هناء : السلام عليكم

ديمة : هلو خالة حبيبتي وعليكم السلام تفضلي

اجت كعدت يمي واخذت ايدي حاطة بيها فلوس

هناء : ما اكدر بعد روحي ام كاظم هستوها اجتي وكاعدة بره

اجيت انطيج ذني الفلوس امين گلي انطيهن لديمة علمودي تطلع وياجن لو ويه خواتي تشتري فستان للعقد

ديمة : هو كلج انطيهن الها

هناء : اي وروح ابوية ولو اني ما راضيه على سوالفكم ومعارككم هالفترة بس ما احب اتدخل بحياتكم الشخصية

لذلك عايفتكم على راحتكم بس اذا طنكرت متخلصون من لساني

يله يمه اخذي فليساتج ضميهن ومن يرجع رجلج ذبي روحج بحضنه وتصالحو بعد كلبي اني ميهون عليه
اشوفكم متزاعلين

ديمة : تمام خالة

طلعت خالة واني فتحت الفلوس وحسبتهن طلعن 150 الف

اخذت موبايلي واتصلت عليه ، يدك وميرد رجعت ادك عليه وهم ميرد كمت الح عليه فوك العشر مرات ياله رد

امين : الووو

ديمة : الوو امين شلونك

امين : احجي بسرعة عندي شغل

ديمة : احم امين ليش دزيتلي فلوس بأيد خالة انت مو حتطلكني ممجبور تضل تصرف عليه وتنطيني فلوس

امين : انتِ هسه على ذمتي ومسؤولة مني امام الله ومنا لمن نتطلك عود اسحب ايدي من مستحقاتج
وهسه من رخصتج عندي شغل

ديمة : بس امـ.. سد الموبايل بوجهي

سديته ودمعت عيوني ، تصرفاته هواي دتخجلني من نفسي والله كمت استحي احط عيني بعينه

كمت داضم الفلوس وتفاجئت من طبت عليه بصائر تركض

بعدني داسألها شبيها وما احس بيها الا جرتني من شعري وكامت تصفكني راشديات بكل قوتهااا

بصائر : ااااالله لا ينطيييج حقييييرة والله اليييييوم اشررببببب من دمج

****************************************
لهنا يكون خلص البارت ان شاء الله يكون عجبكم ❤️
+ لتنسون التصويت والتعليق برأيكم ❤️

شنو رأيكم بالأحداث ؟

شنو تتوقعون حيصير بالبارت الجاي ؟

.