الموت الحي الفصل السبعون 70 - بقلم براء الموسوي

مرحبا حبايبي العسل شلونكم ❤️❤️

#الموت الحي
#للكاتبة براء الموسوي

ديمة : كمت داضم الفلوس وتفاجئت من طبت عليه بصائر تركض

بعدني داسألها شبيها وما احس بيها الا جرتني من شعري وكامت تصفكني راشديات بكل قوتهااا

بصائر : ااااالله لا ينطيييج حقييييرة والله اليييييوم اشررببببب من دمج

ديمة : ما استوعبت الموقف ودخلت بحالة ذهول لدرجة ما كدرت حتى ارفع ايدي واوخرها عني

كل الكمت احسه ضربات متتالية تنزل على وجهي بقوة وشعري الكاعد يتشلع من جذورة ومع
هذا اني فاصلة ولا كإنما اكو شي ديصير

بصائر : لج ما كفاج الحجييي الحجيتييي اله رحتييي تلفقييين عليييه حجي ما صاييير بس في سبييل تكسرييي اكثررر ولج ليييش

ديمة : غمضت من لطمتني باصابعها على عيوني

بصائر : فهمينييي بس فهمينييي هو بشنو اذاج بشنووو

ديمة : مجنت كادرة انطق حرفيًا ما اعرف شنو الصارلي بوقتها ضليت صافنة بوجها لحد ما احت خالة هناء تركض وجرتها عني

هناء : للللج بصااائر هاييي شنووو انتِ شلوووون تمدييييين ايدج على دييمة هييج اخييتج هاي
اخييتج شلون تضربيها

بصائر : تخسى تصير اختيي تخسسى

هناء : انجبببييي

بصائر : بعد كل السمعتي وبعدج تدافعيلهااا انتتتِ شنووو

هناء : واضل ادافعلها ما دامني ما متأكدة من السمعته وحتى وان السمعنا من ام كاظم صحيح لا اني ولا انتِ ولا حتى امين النه حق نمد ايدنا عليها ابد

ديمة : اني عفت كلشي وركزت على شغلة وحدة انهم سامعين شي عني من ام كاظم

جسمي كله كام يرجف من تخيلت انهم سمعو بسالفة راسل ، وشراح اكلهم لو طلعو صدك سامعين بالسالفة
شنو موقفي كدامهم !

نسيت الحالة الاني بيها وباوعت لخالة ، ششـ شنو سمعتو خالة ؟

هناء : ماكو شي كومي وياي خلي اغسل وجهج خشمج كاعد يصب دم

ديمة : ممـ ما اريد عوفي خشمي ، شنو السمعتو
من ام كاظم ؟

بصائر : احجيها يمه سولفي لجنتج المصون عن السمعنا من ام كاظم احجيلها عمايلها بنت الاصول
الزوجة الصالحة المتربية ام الاخلاق العالية

هناء : كافي كلتتتت

ديمة : فدوة خالة الله يخليج احجيلي شسمعتي

اباوعلها تنهدت وكامت تستغفر وتمسح على وجها

هناء : يمه انتِ صدك حاجية على امين بالموزين كدام الجوارين ؟

ديمة : اني لا والله لا

بصائر : انجبييي جذابة

ام كاظم هسه تسولف لامي تكلها جنتج فاضحة رجلها بالمنطقة

وين متروح تكول عليه وصخ وريحته تكتل عبالك ريحة ميت

وعلى اساس هو بخيل وموزين وياج ، يضربج ويحاسبج حتى على الاكل ومانعج من اهلج
وحارمج من كلشي لا ومو بس هيج

الطامة الكبرى حضرتج كايلة انه على علاقة بمرة تطلع كد امي وهي تصرف عليه مقابل انه ينام وياها

لج امين ينام ويه مرة بگد امييي حتى تصرف علييييه من الله لا ينطيج

لج انتتتتِ شوهتتييي سمعة امييين بالمنطقة اخوية الصايم المصلي اليروح بدربة ويرجع بدربة الجوارين
كامو ينظروله بالعين الصغيرة والسبب انتتتِ

ديمة : ججـ جذب ، باوعت لخالة والله العظيم يا خالة كل هالحجي جذب اني ما حاجية على امين هيج والله ما حاجية

بصائر : حجي يفيدج

ديمة : والقران الكريم ما حاجية هيج عليه ومستعدة هسه اخلي ايدي على كلام الله واحلفلج

اصلاً هاي ام كاظم جذابة وكاعدة تسفط حجي بكيفها اني مستحيل اتبلى على امين هيج شنوووو هو عدوي حتى اشوه سمعته هيج

اا انـ ا انييي هسه رر رايحتلهااا الحقيرة منين جايبه هالحجي السخيف هذااا

هناء : ميحتاج ترحين يمه المرة مالها دخل تره ، هي اجتي هنا تبلغني السمعته من الجوارين لا اكثر ولا اقل

هاي البنية الصارلج فترة تروحيلها تسيرين يمها اسمها تقى على ما اعتقد هي وين متروح تحجي وتكول انج حاجيتلها كل هذا عن رجلج

وانتِ تعرفين احنه كاعدين بمنطقة شعبية والناس هنا واحد طاب على الثاني وعن طريق الصدفة ام كاظم مسيرة على الخياطة علمود تجيبلي الدشداشة الوصيتها عليها

وهناك الخياطة من سمعت بالدشداشة النا سائلتها عنه وحجايه تجر حجاية هي والنسوان لمن وصلن
لهاي السالفة وذبنها بحلگ ام كاظم

ومن سألتهن ام كاظم منين سامعات كل هذا گالن الها من بنت ابو فائز الي هي نفسها تقى صديقتج

ديمة : رجفت شفايفي ، تقى !! تقى حاجية هيج

بصائر : اي تقى ست الحسن العقل المدبر الي يخطط ويحرضج على اخوية

ديمة : باوعت لخالة ، باعي خالة اقسملج وداعة بابا وانتِ تدرين بيه ما ممكن اتجرئ إني احلف بمعزته جذب

الحجي الناقلته تقى عن لساني كله جذب بجذب وماله اي صحة اني مستحيل الفق على امين هيج كلام

هناء : لعد سالفة المرة منين جابتها البنية وماكو احد يعرفها غيرنا بهالبيت غير انتِ حاجية يا يمه

بصائر : مو اكلج جذابة وراح تكوم تلزك

ديمة : لالا والله ما جاي اجذب ، باعي خالة اني راح احجيلج الصدگ وما راح اجذب عليج بحرف واحد والله يشهد على الراح احجي

اني فعلاً جنت احجيلها كلشي وصدك جنت اشتكي من امين دائمًا بس والله ما جنت احجي عنه بهاي الطريقة

بجيت وخليت ايدي على حلكي محاولة اهدئ شهكاتي ، بلعت الغصة ورجعت اكمل

والله يا خالة على سالفة النظافة اني ما كايلة عليه وصخ ابد ابد

صحيح جنت اكلها انُ امين فوضوي وما معتني بنفسه كشاب وهالشي زاعجني بس والله ما كتلها وصخ ولا كتلها ريحته تكتل

وعلى التقصير اي اني كتلها مصاريفي هواي وامين ما جاي يكدر يدبرلي كلشي اريده بس ما كتلها هو مقصر ولا مرة خالة ولا مرة طلعته موزين دائمًا اكول انُ اني الما جاي اكتفي مو هو المقصر

وبالعلامة بصائر ذكرت انُ اني كايلة هو مو من مستواي صدك اني كايلة هيج بس ما كلت عنه
مقصر اني اني الدينطي الي ميكفيني واتذمر
بسبب هالشي

بصائر : وسالفة المرة يالبريئة

ديمة : وداعة ماما وسيلة جذب اني وياها مرة دنسولف ونحجي عن امين فاثناء الحديث داضحك وياها وكتلها انُ امين يحبنه النسوان الكبار

ومن سألتني ليش سولفتلها القصة حتى حجيتلها شلون تصوب بسبب المرة هاي لا كتلها جان ينام وياها علمود الفلوس ولا اصلاً تطرقنا لهذا الموضوع

لزمت ادين خالة هناء ، باعيلي خالة اني صحيح حجيت هواي حجي يمكن ما جان لازم ينحجي
بس والله هذا الكلام الي انقل الكم كله مو صحيح

اني ما حاجية حرف من الي انگال وهاي تقى ماخذة
السالفة وكالبتها كلاب ومزودة حجي اني اصلاً ما
كايلته

خالة والله امين بالنسبة الي شخص حباب ويخاف الله تتوقعين إني ممكن اتعمد واروح اشوه صورته
هيج اني ما افكر والله حتى ما افكر اسويها

بصائر : ههه صدكناج

ديمة : ههـ هسه راح اخابرها واحجي كدامجن والله اني مو جذابة

جريت موبايلي واتصلت عليها ، ههـ هسه تجاوبني وتتأكدن اني محاجية

ضليت اتصل عليها بس مترد ، لغيت المكالمة ورجعت اتصل وهم متجاوب ، يطلعلي يرن بس مترد

هناء : كافي ديمة كافي عوفي الموبايل من ايدج ما راح ترد عليج وحتى لو ردت شتريد تكول

ديمة : لالا خالة اني لازم اثبتلج الحجي هذا كله جذب ومو صحيح وهاي تقى اكبر جذابة

هناء : كافي امي كافي خلص اني مصدكتج

بصائر : شنو صدكتيهااا كل عقلج تحجين انتِ !! هيج اثرت بيج دموع التماسيح مالتها

هناء : انتتتِ انجببيييي وحسابببج بعدييين والله العظيم اله اكل لاخوج على سوايتج والله

امشيييي وليييي لغرفتج يييله ما ارييييد اشوفج

ديمة : طلعت بصائر واجتني خالة كومتني من الكاع

هناء : كومي انتِ الثانية خلي اغسلج حالتج حالة صايرة ، اسم الله اسم الله شويه شويه

كافي لتضلين تبجين موزين عليج يا يمه انتِ مريضة سكر هسه تتخربطين

ديمة : مشيت وياها واني انشغ ، هاي تقى ليش سوت هيج اني والله ما حجيت هيج ليش لفقت عليه كلام
اني مكايلته

ودتي خالة للحمام غسلتلي وجهي واخذتني للغرفة كعدتني على الجرباية وراحت تجيبلي كطن حتى تحطة على خشمي البعده ينزف واني حاطه الخاولي عليه

صفنت على الكاع خصلات شعري ماليه الزولية ملي
واكو قطرات دم ملوثة المكان

اباوع لخالة دخلت للغرفة وبأيدها الكطن

هناء : رفعي راسج خلي اخليلج الكطن ، هاج لزمي زين ، اي عاشت ايدج

ديمة : لزمت ايدها وبجيت خالة الله يخليج لتحجين لامين الي صار ،صدكيني والله الحجي السمعتي كله مو صحيح وهاي تقى جذابه

كعدت يمي وطبطت على ايدي

هناء : هاهي يمه اني مصدكتج ولتخافين هذا الموضوع ما راح يوصل

ديمة : واذا بصائر سولفتله ؟

هناء : شحدها حلكها افركه بايدي اصلاً اني اعلمها هالادبسز اله اخلي يطيح حظها لان ضربتج بس خلي
يجي

ديمة : لا خالة فدوة لتكلين لامين عليها ، مسحت دموعي وتنهدت خطية مشيتها بعد اربع ايام
لتخلي يزعل منها ويكسر فرحتها

اصـ اصلاً هي حقها اني هم لو اسماء طليقة معين ملفقة على اخوية هيج حجي ما جنت راح اسكتلها ففدوة لتحجين شي لامين

هناء : تعاي يمه تعاي حبيبتي كافي لتضلين تبجين

ديمة : حضنتها وكمت انشغ

هاي ثاني مرة انغدر ، ثاني مرة اامن وينضحك عليه
اني بس اريد افتهم شنو الغلط السويته حتى اوكع بهيج صديقات

هاي جزاتي لان امنت بيهن واعتبرتهن خواتي وفتحتلهن گلبي !!

الاولى باعتني علمود الفلوس والثانية ما لحكت حتى اتعمق بصداقتي وياها وراحت الفت عليه حجي ما انزل الله به من سلطان

بس ليش !! اني شسويتلها شنو البدر مني تجاهها حتى تحجي هيج عني ، شلون كدر لسانها ينطق كلام زور اني اصلاً ما انحجه

هناء : نصيحة يا يمه مشاكلج انتِ ورجلج خليها بينج وبين نفسج لتطلعيها بره بيتج تتأذين وتعلمي لتثقين بياهو الجان البشر مينعرف يا يمه

امين موزين وياج اكو مشاكل بينج وبينه حلوها بيناتكم غلط تطلعين اسرارج للناس

اني خو عمتج ام رجلج ميصير تجين تطلعيلي الي ببطنج كله ، اكو امور شخصية بين الزوجين زحمة احد يدري بيها

يعني فرضًا لو امين فعلاً مو نظيف حشا ما المفروض
ترحين تحجين لصديقتج ، اكعدي ويا كليله عجبني هذا العطر الك ، احجي عن النظافة كدامه حببي
بالاشياء الترديها منه وهو ما راح يكلج لا

المثل يكلج ابنج على متربي ورجلج على ما تعودي

الرجال مثل الطفل ياخذ من مرته مثل ما ياخذ من امه

ديمة : بس خالة اني والله مكتلها امين مو نظيف

هناء : اني كاعدة اضربلج مثل يا امي ما اقصد انج حاجية يله شو كافي مسحي دموعج هسه يجي امين يسألج شبيج شتكليله

ديمة : مسحت دموعي وباوعتلها ، شكراً خالة لان صدكتيني

هناء : انتِ بنيتي واني اثق بيج ، يله اعوفج ترتاحين ومالج علاقة ببصائر شما تحجي وياج غلسي عنها وتعاي كليلي اطيحلج حظها

ديمة : هزيتلها راسي وهي طلعت

كمت دنكت لميت شعري الواكع من الكاع وذبيته بالزبالة ، كعدت على ميز التواليت وباوعت لروحي

عيوني حمر دم ووجهي كله مشخط بأظافر بصائر واصابعها مطبعات على خدودي

تلمست شعري وغمضت عيوني بألم ، راسي كد ما عتت بي كام يوحعني

وكفت ايدي على مكان معين براسي ونزلت دموعي من حسيت بالمكان فارغ لعد شكد جانت دتجرني حيل بحيث موكعه مني خصل مو شعرات بسيطة

عدلت شعري ورحت كعدت على الجرباية ولميت رجلية لحضني ، سندت راسي عليهن وكمت ابجي

ضليت على هالحال ما اعرف شكد ، لمن حسيت بالباب ينفتح ياله رفعت راسي

امين : السلام عليـ... هاي شبي وجهج

ديمة : مسحت دموعي ودرت راسي ، احم وعليكم السلام لا مابيه شي

اباوعله اجه يمشي بسرعة وكف على راسي ولزم حنچي

امين : هاي شنو ، وين تعورتي وليش خدودج هيج
لحظة لحظة شنو هذا الدم اليابس بخشمج

ييييمه يييييمه يا ييييمه وييينج

هناء : خير خير شبيك يمه تصيح

امين : ديمة شبيها !!

هناء : هاا هاي هي وبصائر جـ....

ديمة : قاطعتها اني وبصائر جنه دننظف البيت واني وكعت من الدرج على وجهي ، تعورت وخشمي كام ينزف لان البايات حادات وجرحني

هناء : اي يمه خطية وكعت على وجها

امين : هاهي يمه اخذي راحتج

ديمة : طلعت خالة وهو كعد گبالي

امين : تأذيتي ؟

ديمة : لا لا ما تأذيت

امين : لعد ليش جنتِ تبجين ؟

ديمة : نزلت دموعي وجاوبته ، مو عقد بصائر قرب واني تعورت ووجهي تأذه يعني تخربطت خلقتي
واحنه عدنه مناسبة

امين : على هاي جاي تبجين !!

ديمة : ايي ايي لعد على شنو مثلاً اريد ابجي

امين : اخذج للدكتور ؟

ديمة : شكراً متقصر بس ميحتاج اني زينه

انت جاي تعبان هسه روح اسبح وارتاح

امين : هاا اسف نسيت وطبيت بهدومي هسه اطلع

ديمة : لالا اني مو علمود هيج بس اقصد لتخلي بالك يمي روح ارتاح واني حكوم احميلك الاكل

امين : ماكو داعي امي تحميلي الاكل

ديمة : كمت لا لا اني اكوم

امين : كلت امي تحميلي الاكل رجاءًا انتِ مالج علاقة بيه

ديمة : طلع وعافني بعد ما كمل كلامه

كعدت وتنهدت اني لازم اروح لهاي الحقيرة وافتهم منها ليش هيج سوت كلشي ما اريد بس اريد افتهم
اني شنو سويتلها حتى تسوي هالدكه الناقصة وياي

_____________________________

يوسف : احبج

دنيا : انداريت عليه بسرعة لكيته واكف بكفه الباب ولازم بوكية الورد بأيده ومبتسم

يوسف : تفضلي

دنيا : ابتسمت هذا الي ؟

يوسف : ليش منو عندي يستاهل اهدي ورد غير امي وغيرج

دنيا : اخذته منه وشميته مغمضة عيوني اااالله

يوسف : بالمناسبة جبته بلون بنفسجي اردي بيج تحبين هاللون

دنيا اني اسف لان ضوجتج هواي هالجم يوم ما جنت متقصد والله ، انتِ اخر بشر بهالدنيا ممكن افكر اني ااذي متعمد

احبج اني لتضلين زعلانة مني

دنيا : ابتسمت وحضنته ، احببيك

بادلني بقوة

يوسف : واني اموت عليج يا روحي

دنيا : ابتعد وباسني من خدودي

يوسف : اوووف يهالخدود شكد حركتلي گلبي ، 3 ايام !! ، 3 ايام يا ظالمة النفس حارمتني منج

دنيا : تستاهل حتى تبطل تدوس ببطني بعد

يوسف : لا عمي هاهي التوبة

دنيا : نشوف

يوسف : ماكو بوسة ؟ شو بس اني بستج

دنيا : بسته من شفته هاا هيج زين

اباوعله ذب ظهره على الباب وعاط

يوسف : افييييش بوية

دنيا : هههههه عزة فضحتنا ، يله وقعلي الاوراق بسرعة خلي اطلع

يوسف : تدللين ست اني بخدمتج ، يله جيبي الملفات وتعاي

دنيا : خليت الورد على مكتبة ورحت انطيته الملفات
ضل يقره بيهن وامي واكفه يمه

يوسف : هنا شكاتبين ما جاي اشوف الاحرف

دنيا : وين

يوسف : هنا

دنيا : شو اشوف ، دنكت داقراله وفزيت من جرني كعدني بحضنه

عززه يوسف شبيك ليطب احد فشلة

يوسف : ويطب ، تعاي مشتاقلج

دنيا : قربني عليه وكام يبوس بيه

صخام الصخمني ولك عوفني حنتخزة اذا احد شافنا بهذا المنظر

يوسف : شو انت صايرة طيبة

دنيا : غمضت عيوني وهزيت راسي ضاحكة اني شلون بسوالفك المكسرة هاي

يوسف : عمي والزهرة مشتاق

دنيا : ههههه ميخالف عوفني وبالبيت عود عبرلي عن اشتياقك

يوسف : بالمناسبة اريد اكلج شي

دنيا : خير

يوسف : ابن عمج موسى سمعت بي متصوب

دنيا : اي كلتلي امي وعلى اساس اكلك نروح نشوفه ونتحمد اله بالسلامة

يوسف : ماكو مشكلة اصلاً بلغني انه كاعد يدور على الضربة وكلف جماعة بالمركز حتى يلكفو

دنيا : اي احسن خطية الضربة خلي يتحاسب شنو ارواح الناس رخيصة

يوسف : لك صدقة للمنفعل

دنيا : باوعت للساعة ، ييوو حيصيرلي فوك النص ساعة كاعدة هنا والله حنفضح من وره سوالفك المكسرة

جريت روحي اريد اكوم وهو مثبتني بحضنه ، شلون يعني حضل بحضنك طول اليوم

- ببرود حلالي و بكيفي عندج مانع

- تنهدت ماسحة على كصتي ، لا إله الا الله ، يعني طول ذيج الفترة اني مزروعة بخلقتك كلشي ما سويت من صرت بعيدة عنك حليت بعينك وعجبك تحصرني هالحصرة بالدوام

- هو اني احب الختلة

- استغفر الله واتوب اليه ، عمي عوفني لخاطر الله ادري جبر هي وبعدين تره انت مديري هنا عيب عليك تتصرف هيج

- شو اشوف العيب

- ضربت ايده تأدب شكد مستهتر ومتستحي وحق هذا الله

- ههههههه بشرفج تره اعصابي كلش تعبانة

- خزرته انت تدري الوضع الاحنه بي هسه هاي اولا وثانيا تره على ساعة يطب علينا واحد من الموظفين وساعتها عود من يشوفوني كاعدة بحضنك تعال سولفلي على سلامة اعصابك

- طز بيهم اخر همي المهم عوفج من هالسوالف التعبانة اريد اكلج شغلة بخصوص موضوع جدج بس عليج الزهرة اذا تكلين لاحد لان الموضوع حساس وما اكدر احجي كدام احد

- خير ان شاء الله

- تعاي دنكي خلي اشوارج

- وليش تشاورني ؟ قابل اكو احد هنا

- كلشي يصير دتعاي

- دنكت عليه والسخيف اول ما صرت قريبه منه باسني من شفايفي وجتفني حتى ما اتحرك

حاولت ادفعة عني بس ما كدرت وبدون شعور ما حسيت بنفسي الا مبادلته ومقربته عليه

ما اعرف شكد مر وقت واحنه على هالحال ، ما فزينا الا على صوت الباب ينفتح

راشدة : استاذ ممكن توقعلي على هالاور....

هاي شنو !!!

دنيا : كمزت من حضن يوسف وهو كام يمسح بشفايفه ويأشرلها

يوسف : تعاي جيبيهم وانتِ دنيا روحي لشغلج اني من اكمل الملفات ادزهن الكم

دنيا : ببـ..

يوسف : طلعي حبيبتي ، اني وست راشدة راح نحجي شويه

دنيا : هزيت راسي وطلعت من المكتب بس اذا تذبحوني متلكون قطرة دم بجسمي على الفشلة الي
تفشلتها

شعور يخزي يربي شلون طبت وشافتنا بهالوضع ، اني بالبيت ما اخلي يوسف يتصرف اي تصرف مو تمام كدام تيم وهو طفل مو عاد اخلي احد يشوفنا
بهالوضع

رحت للحمامات غسلت وباوعت لروحي الحمرة ملطختني تلطخ حتى لخشمي واصلة ، انوب صفنت
مسترجعه الموقف

غطيت وجهي وكمت ابجي من الفشلة ، عزه يربي شلون حضل اباوع بوجه المرة ثانية

حسيت باحد يدخل للمغاسل مسحت دموعي بسرعة وسويت روحي اغسل

باوعت للمرايه شفتها ست راشدة

راشدة : شبيهن عيونج ؟

دنيا : انداريت عليها باعي والله العظيم الموقف الشفتي مو مثل ما انتِ متخيله تره والله استاذ يوسف زوجي يعني ااا انـ..

والله ما اعرف شكلج ، الموقف الشفتي مو صحيح وغلط كلش بس اني مرته والله يعني الشفتي ممـ مجان حرام واني مو موزينة صدكيني ومستعدة حتى اراويج جنسيتي

راشدة : اهدي اهدي على كيفج تره استاذ يوسف كلشي حجالي هسه

دنيا : اباوعلها تحجي وتبتسم ، يعني صدكتي

راشدة : ههههه وليش ما اصدك صحيح استغربت لان انتِ صارلج هواي ويانا بس ولا مرة لاحظنا عليج شي

ومع هذا عاشت ايدج طول هالفترة انتِ زوجة احد المدراء وما حجيتي لو وحدة غيرج جان تشيخت
هنا وما خلت واحد ما كلتله

دنيا : هو اني ما ردت احد يعرف ببـ بس بعد صارت

راشدة : ولا يهمج اعتبريني ما شفت شي وهسه امشينا نكمل الشغل انتِ مرت الاستاذ يمشيها الج
اذا تأخرتي بس احنه لا هههههه يله يله

دنيا : طلعت وياها راجعه للمكتب

عواطف : وينج ولج كلش طولتي

راشدة : اني وياها طلعنا شربنا جاي ورجعنا

جيهان : شعجب !!

راشدة : شكو بيها خلي نغير جو ملينا من الكعدة

عواطف : الملفات وين دندون شو ايدج فارغة

دنيا : هاا الاستاذ كال بعدين يقراهن ويوقعهن ويدزهن

عواطف : هاا لعد كعدي خلي نكمل

دنيا : رجعت اكمل شغل

_______________________________

زبيدة : كاعدة ارتب الهدوم ودگ موبايلي ، كمت اخذته وجاوبت الووو

ميلاد : هلوو زبيدة حبيبتي شلونج

زبيدة : هلو بيج اني الحمدلله انتِ شلونج خالتي شلونها

ميلاد : بخير بعد گلبي اكلج حبيبتي والله ردت اكلج شي بس خجلانة منج

زبيدة : خير شصاير احجي لتخوفيني

اباوع لهارون ذب موبايله وباوعلي مأشر بايدة

هارون : شكو ؟

زبيدة : اشرتله هيج

رجعت احاجي ميلاد يمعودة متحجين وكعتي گلبي

ميلاد : والله يا زبيدة ام رجلي متخربطة ورجلي يريدني اروح ابقى يمها اسبوع وامي ما اكدر اعوفها
تبقى وحدها فگلت اكلج بلكت اذا تكدرين ترحين تبقين يمها

زبيدة : خواتج وين شو ما شاء الله عندج بدل الوحدة 3 ميرحن يبقن يم امهن ليش عايفاتها بس عليج

ميلاد : هو احنه مقسمات الشهر كل كل اسبوع على وحدة وبالكوه قانعين رجولتنا

وهسه من كتلهن يكيفن بس رجولتهن ميقبلون حتى خطية تسولن بيهم بس ما قبلو

وانتِ تعرفين شكد رجولتنا صعبين لا بيهم يتحاجون ولا يتناقشون

فكلت اكلج بلكت اذا تكدرين ترحين تبقين يمها شلون ذاك اليوم تفضلين عليه

زبيدة : طيب ماكو مشكلة بس انطيني شويه واخابرج
سديته منها وباوعت لهارون الكاع وعاگد حواجبه بتساؤل

هارون : ويامن جنتِ جاي تحجين

زبيدة : بنت خالتي دتكول انُ عمتها ام زوجها مريضة وتريدني اروح ابقى يم امها لحد ما ترجع

هارون : اي روحي

زبيدة : هو اني مقررة اروح هو اسبوع يطب منا يطلع منا

هارون : اسبوع !!!

زبيدة : اي هي كالت تريدني ابقى اسبوع

هارون : كلش هواي اسبوع شدعوة كل هالكد

زبيدة : رفعت اكتافي شسوي بعد مرة جبيرة خوما اعوفها وحدها

هارون : بكيفج

زبيدة : اباوعله كلب خلقته ورجع يگلب بموبايله ، ابتسمت ورحت كعدت يمه

شبيك ضجت معقولة متكدر تبقى اسبوع واحد بدوني

هارون : بدت رحمة الله

زبيدة : لزمت ايده ، عوفك من هالحجي شنو رأيك تجي وياي

هارون : لا

زبيدة : حباب تعال هم انت تغير جو بعيدًا عن البيت والخطار المكتض على موسى وهم حتى لتعوفني وحدي

هارون : لا عندي دوام

زبيدة : هارون شنو السالفة تره عشرين موظف اكو وانت الواحد والعشرين وياهم يعني شيصير اذا اخذت اجازة واجيت وياي

هارون : انتِ ليش تلحين مو كتلج ما اكدر

زبيدة : على راحتك

عفت ايده وكمت رديت خبر لميلاد إني باجر راح اجي ورحت اكمل ترتيب الملابس ، كملت ونزلت جوه اساعد الجماعة بالعشه

حمزية : شبيج زبد

زبيدة : هاا لا مابيه بيبي بس حروح يم خالتي عقيلة اسبوع وارجع

هيام : شنو متعاركة ؟

زبيدة : لا ابدًا اني وهارون منتعارك

بيداء : ليش وحد

زبيدة : لا مو وحد بس احنه ولله الحمد متفاهمين وحتى لو تعاركنا منطول نتصالح بنفس الساعة

افكار : لعد اني شو سمعت انه قبل لا ياخذج فشخ راسج وطببوج مستشفى من ورا

زبيدة : صفنت متذكرة الصار ، سؤال طرحته على نفسي وقتها

اني شلون حبيته بعد كل السوا ؟!

لا جديات يعني السوا هارون ابد مو قليل شلون بعد الزواج كدر يأثر عليه هيج ويخليني احبه

معقولة لان جان شخص غريب يحمل صفات جديدة وغريبة اول مرة تمر عليه واثناء اكتشافي اله حبيته بدون لا احس

طيب و هالشي طبيعي !!

لازم اسأل سهير

افكار : اشو سكتي

زبيدة : هاا لا عليمن اسكت بس داتذكر المواقف والاكشن الجان بيني وبينه

رجعت اكلب الكبة ، كملنا اني وياهن وطلعنا نتعشه
كملنا واني صعدت اجهز جنطتي

اباوع لهارون دخل نزع تيشيرته بالباب وشمره بوجهي ، صحت بوجع وعطت بي

انت ليييش متبطل هاي السالفة السخيفة

هارون : لتغلين وامشي طلعيلي هدوم

زبيدة : مال شنو ؟

هارون : مو تردين اروح وياج

زبيدة : اي ؟

هارون : اي راح اروح

زبيدة : جذااااب

هارون : انجبي

زبيدة : يعني هسه انت حتروح وياي باجر

هارون : مو كلنه الي

زبيدة : شمرت التيشرت وركضت حضنته ، ههههه شكراً شكراً

هارون : اخ منج اخ

زبيدة : بسته من ركبته وضحكت ، ابتعدت وخليت اديه على صدره ، حروح احضرلك ملابس وباجر الصبح نطلع

هارون : انتِ ليش هيج فرحانه

زبيدة : جنت شايله هم شلون حروح اسبوع كامل وما اشوفك

سألني بصوت خاف بالكاد ينسمع

هارون : ليش ؟

زبيدة : رفعت كتافي ببساطة اشتاقلك

اباوعله اخذ ايدي خلاها على شفايفه وانفه وغمض عيونه

كزبر جسمي من حسيت بملمس شواربه على ايدي
ضل فتره لازمها ويبوسها على كيفه

ما تحملت اضل واكفه سحبت ايدي منه وبلعت ريكي

ححـ حروح احضر ملابسك

عفته ومشيت بسرعة ، ركعت الجنطة دفره بطريقي ودخلت للحمام سادة الباب وراي

سندت ظهري على الباب ولزمت كلبي ، يمه گلبي حيوكف كد ما يدك بقوة

نعلعلا يومك هاي شسويت بيه

مسحت على وجهي ورحت غسلت بمي بارد عسى ولعل اخفف التوتر شويه

تنهدت ورحت نشفت وجهي وطلعت لكيته كاعد يگلب بالتلفزيون ولا كإنما مسوي شي

رحت طلعت جنطة صغيرة اله وكمت اخليله كم حاجة تراكات على خاوليات ملابس داخلية وملابس طالعة
يعني شغلات تكفي لاسبوع

كملت غراضة وسديت الجنطة مخليتها على صفحة
رجعت اكمل غراضي

ما طولت ساعة كملت كلشي وعزلته على كتر

باوعت للساعة جانت بالعشرة بالليل ، كمت خابرت خواتي ومعين داطمئن عليهم بس صوت ديمة اختي ما عجبني ابد

وكل الي افتهمته منها انها تريد تشوفني واني كتلها
من ارجع اجي اشوفج

سديته منها ورحت نمت

___________________________

دنيا : خليت الكرسي وجريت الموبايل من فوگ الكنتور

اخذته وكعدت اسمع تسجيل اليوم لان يوسف طالع فاكدر اخذ راحتي

طبعًا اني كل يوم داخذ موبايلي اشوف شنو سجل
واسمعه اكول عسى ولعل اسمع شي لكن للاسف
للان ماكو شي

فتحت التسجيل وضليت اسمع وامشي الوقت لو اسرع الصوت ومن ندخل اني ويوسف للغرفة اعبر
الوقت لحد ما نطلع

ضليت كاعدة وايدي على راسي كلشي ماكو يربي هياته التسجيل كلشي مابي

لعد وين حجي زبيدة حطي الموبايل وسجلي كلشي راح تفتهمين

شكول عليج زبيدة صوجي اني امشي بـ...

فززني صوت الموبايل ، عليت الصوت ودحست الهيتفونات اكثر بأذاني

سمعت الباب يندگ ويتبعه صوت يوسف

يوسف : تفضل

دنيا : سمعت صوتها بالغرفة ، بلعت ريكي وكمت اسمع المحادثة الدارت بيناتهم

سجى : السلام عليكم استاذ

يوسف : اهلاً سجى وعليكم السلام

سجى : العفو استاذ بس ست دنيا وينها

يوسف : كاعدة يم نسوان اخواني اذا ترديها روحيلها تلكيها بغرفة بيت كريم

سجى : لا استاذ ميحتاج بس جبتلكم كيك اذا تحب ضوگه هذا اني سويته

يوسف : والله اجه بوكته جيبي الماعون

سجى : هاا عجبك

يوسف : عاشت ايدج كلش طيب

سجى : مليون عافية

يوسف : لتضلين واكفه اخذي راحتج

سجى : استاذ بلا زحمه بس ردت احاجيك بخصوص الموضوع السولفته الك

يوسف : لتخافين طليقج اخذته للمركز وكتبته تعهد انه ميتعرضلج مرة ثانية

اطمئني ولتشيلين هم ، هو من بعد ما تعهد امام القانون انه يختفي من حياتج معناها مستحيل
يظهر بحياتج بعد

سجى : صدك استاذ يعني هاهي خلص بعد ما راح اشوفه

يوسف : لا ما راح تشوفي

سجى : شكراً استاذ متتخيل شكد فرحتني اني وامي كلش ممنونين منك

والله لوما الحرام جان دنكت وبست ايدك على الفرحة الفرحتني ياها

يوسف : عيب هذا الحجي تبوسين ايدي شنو انتِ اخيتي وواجبي اساعدج

سجى : استاذ كلش مشكورة انت كلش شهم وحباب ، ياريت كل الزلم مثلك اني عمري ما شفت شخص مثلك

صدك هنيال الست بيك ، نادرًا ما الوحدة تلكه انسان مثلك ما شاء الله عليك صدك خلقة واخلاق

يوسف : هههههه رحم الله والديج

سجى : من رخصتك استاذ

يوسف : مرخوصة الله وياج

سجى : استاذ بس طلب صغير اريده منك ياريت محد يدري بموضوع طليقي حتى ست دنيا

يوسف : اطمني اني ما حجيتلها شي وما راح احجي هم

سجى : شكراً

يوسف : العفو

دنيا : سمعت صوت الباب ينسد ، غمضت عيوني متنهدة الحمدلله يارب طلع يوسف ماعنده شي وياها

بس هاي الحقيرة شنو من وقاحة شايله ، شلون تحاجي وتنعم بصوتها اصلاً كوه سمعتها كد ما جانت
تمط بروحها

ايييع صدك لعبت نفسي ، هسه هو مو رجلي ولا مرة فكرت انعم صوتي حتى ااثر بي لو اغري

هاي شنو من بشر لا وجايبتله كيك هم شلون تصرفات يربي شهالخفيه هاي عود لشنو تريد توصل مثلاً

دزيت التسجيل لزبيدة وكتبتبها سمعي من الدقيقة الفلانية وشمرت الموبايل

دخيل محمد اني شلون حتصرف ويه هاي لا والوقحة تأكد عليه ميحجي بالموضوع كدامي حتى لا اتفهم
الموقف واخلي الامور طبيعية

احسها تتعمد عود حتى تخليني اتعارك ويه يوسف لو اشك بي ولو ليش احس اني متأكدة

بس بسيطة اني اعلمها ، صحيح اني مو راعية مشاكل بس اذا حطيت احد براسي اصير انكس من زبيدة

كمت عدلت الورد الجابه الي يوسف ونزلت جوه لكيت الكل كاعد بره لان الجو كسر وصار بي برودة ، يسوي
واهس للكعدة بره خصوصاً بالليل

باوعت ليوسف كاعد هو والولد سوه وخالة والبنات
متجمعات ، مشيت عيوني على الاطفال ما لكيت تيم

رحت للمطبخ وطبعًا لكيت ست الحسن حاطته بحضنها ، تبوس بي وتسولف ويا

بس والله صفنتني على الكلام الكاعدة تحجي يربي هاي عود شتحس

سجى : حبيبي تيومي بابا يحب ماما

تيم : اي

سجى : شكد يحبها

تيم : هواي

سجى : وانت تحب ماما

تيم : عبيبتي ماما

سجى : هاا حبيبتك زين بابا هم يبسط ماما ، اقصد يعني هم يسويلها اوا

تيم : اي يسيح عليها

سجى : هاا زين متعرف ليش

تيم : ولي اوفي (عوفي) يريد يروح يلعب

سجى : زين باوع هاي جبتلك كيكة

تيم : الله

سجى : هاي الكيكة الك بس بشرط خلي ابوسك وصيحلي سجاوي

دنيا : اباوع لتيم انطاها خده وصاحلها مثل متريد وهي انطته الكيكة

دخلت للمطبخ وهي شافتني وگبل فزت ونزلت تيم من حضنها

تيم : عبيبتي ماما ثوفي

دنيا : تعال تيم ، اخذت ايده وباوعتلها

سجى : سسـ ست اا اني

دنيا : انتِ منو سمحلج تاخذين تيم وتجين لهنا ، يوسف مو حذرج من اخر موقف وكال اي وحدة ممنوع ياخذ تيم بدون اذن

سجى : ست والله

دنيا : استأذنتي قبل لا تختلين بي هنا ؟

سجى : اني هو ...

دنيا : اعتقد سؤالي واضح الجواب لو اي لو لا لتضلين تلفين وتدورين

سجى : لا ست ما استأذنت

دنيا : هالمرة راح امشيها الج بس المرة الجاية راح يكون الي غير تصرف وياج

اخذت تيم ومشيت صاعدة فوك بطلت حتى ما كعدت وياهم ، دخلته للغرفة وسديت الباب

كعدته الجرباية وكعدت بمستوا ، حبيبي عادي اخذ الكيكة الي بأيدك

تيم : اخديها

دنيا : عفية بالورد ، شلت الكيكة من ايده خليتها على صفحة وباوعتله مبتسمة

شوف حبيبي اني هسه شفتك تسولف ويه البنية بالمطبخ وسمعتك تسولف وياها

تيم : اي هو جان يحجي وياها وانطته هاي الكيكة

دنيا : ادري شفتك

باوع حبيبي بعد اليسألك عن ماما وبابا اي شي تكله ما اعرف لان ميصير نحجي الي يصير بغرفتنا

فأي واحد بعد يكلك بابا يحب ماما ، بابا شيجيبلك ، بابا هم يتعارك ويه ماما تگله ما اعرف

شتكله ؟

تيم : ميعرف

دنيا : يمه عفية بوليدي السبع

اخذت الكيكة ، باوع والينطيك اي حاجة لتاخذها
خاف بيها كُخ لو اوع وانت تاكلها ويصير ببطونك اوا

اذا تريد شي تعال گلي واني وبابا نشتريلك كلشي تريده خوش ؟

تيم : خوش

دنيا : وهسه هاي الكيكة تاخذها تاكلها ؟

تيم : لا ميريد ايع بيها كُخ

دنيا : يمه صدقة لليسمع الكلام ويفتهم ، يله لعد روح ذبها بالسطل وتعال نختارلك نمنمات ونكعد ناكلهن
ونباوع كارتون

اباوعله نزل من الجرباية ، راح ذب الكيكة بالزبالة واجاني يهرول

تيم : ذبها

دنيا : سبع حبيبي ، يله امشينا ، فتحت الثلاجة طلعتله نستله وكيكة وعصير ورحت فتحت المجر طلعتله جبس ليز بالطماطة هو يموت عليه

خليتهن يمه وهاي النمنمات لحبيبي اليسمع كلام امه
احبك اني تدري

تيم : هو هم يحبج عبيبتي

دنيا : بسته وحضنته ياروحها لحبيبتك انت

ضليت كاعدة ويا وما عفته ، والله خفت ما اامن لتروح هاي منطيته شي منتهي الصلاحية لو بي شي موزين كلشي اتوقع منها

واصلاً الحمدلله من صار كدامي هيج موقف حتى ابدي اعلم تيم ما شاء الله عليه ديكبر حيصير عمره
3 سنوات

هسه وكتها لازم ابدي ارسخ براسه عادات صحيحة تنمي وتعلمه الخطأ من الصح لان كلما يكبر تصير
طريقة تربيته والتعامل ويا اصعب

______________________________

زبيدة : كعدت على صوت المنبه ، طفيته وانداريت على ندسته

هارون يله كوم الساعة بثمانية ونص هم ياله نبدل ونتريك حتى نطلع

هارون : يله كعدت ، صباح الخير

زبيدة : صباح النور ، كمت رتبت الفراش ودخلت ورا للحمام غسلت وفرشت اسناني

طلعت وحاجيته ، حبيب اني راح انزل اسوي ريوك انت جيب بدل ونزل الجنط وياك

هارون : ماشي

زبيدة : نزلت سويت ريوك بسرعة وشلت الصينية وطلعت لكيت هارون منزل الجنط ومبدل

خليت الصينية وكعدنا تريكنا وسلمنا على الكل وطلعنا
خله هارون الجنط بالسيارة واني صعدت

حرك السيارة ، اخذت نفس من الجو الهوى جان يجنن
لا حار ولا بارد كلش

هارون : اكو شي ناسينه لو تحبين ناخذه من الطريق

زبيدة : اي همزين ذكرتني اريد نروح للماركت نشتري كم شغلة لان احنه حنبقى اسبوع عند خالتي مو مال نكلفها

هارون : خوش

زبيدة : طلعنا للماركت ونزلنا سوه ، اخذنا سلة وكمنه نتسوگ ، هارون راح اشترى خضروات واني اشتريت بيض ونمنمات اجبان

وطبعًا ما نسيت الكوكاكولا اخذتلها صندوگ حتى لتضل كل ساعة مطلعتنا

هارون : هاي شتسوين بصندوگ الببسي

زبيدة : ديربالك لتسمعك خالتي تسمي الكوكاكولا ببسي لان ما راح تخلص من لسانها

باوعت للسلة الي بأيدة ، شجبت

هارون : من كلشي شويه واذا احتاجينا شي عود مناك نجيبه

زبيدة : تمام عاشت ايدك ، يله امشي ادفع

هارون : اني ادفع ؟

زبيدة : لعد اني

هارون : ادري هي خالتج لو خالتي

زبيدة : تقربت عليه ، تريدني اني الادفع ؟

اباوعله كام يبلعم واندار يباوع للعالم

هارون : هاا لالا اني راح ادفع بس وخري فضحتينا خرب يومج

زبيدة : ابتسمت ولحكته ، دفعنا فلوس الغراض وطلعنا

ضليت اباوع للطريق مليت والشفيه ميسوي واهس للسوالف ذابها على الصامت

اخذت موبايلي وفتحت بلوتوث خلي اسوي اجواء شويه بالسيارة ورانا طريق طويل

مو مال اكضيها صفنات خصوصاً اني مو نعسانة وما اريد انام

هارون : شجاي تسوين ؟

زبيدة : اريد اسمع اغاني

هارون : اغاني الصبح انتِ شتحسين

زبيدة : احس بالاحساس

اسكت اسكت معليك بيه لتضل تنكد عليه

شغلت الاغنية وعليت الصوت وكمت ادندن وياها طبعًا هالفترة نانسي صايرة جوي واجوائي

اباوعله يسمع ويهز بأيده

هارون : هسه هاي هم اغنية

زبيدة : لتضل تدردم جنك عجوز اسمع بهدوء

عليت الصوت اكثر وكمت ادندن لمن وصل المقطع الاحبة من الاغنية كمت اغني وياها

أنا عم بلش حبك أنا لما بشوفك بتلبك مع إنك
بتظلك ساكت قلبي عم يسمعك

اي والله هارون عود انت ليش دائمًا ساكت ليش متسولف

هارون : حتى محد يكول عليه لغوي مثلج

زبيدة : غلست عليه ورجعت اكمل
أنا عم حبك هلأ أنا بعيونك عم بتعلق
بالإيام اللي جاي حدي عم بقشعك

عود شنو يعني عم بقشعك ؟

هارون : شمدريني يمكن تقشعرين عود

زبيدة : هاا يعني نفسك

هارون : هم رجعت عليه

زبيدة : شبيك والله حتى شوف ، مشيت ايدي على زندة وگبل جسمه قشعر وشعر ايده وكف

ضحكت شوف هاي ديقشعر جسمك ، عزه هاي هيج متأثر بيه جؤجؤ

اباوعله باوعلي صفح ورجع يسوق

ضميت اديه وكملت الاغنية

كلٌّ عم يحكوني كل شوية بيسألوني
شو إتغير فيّ شو صار لي، عنهن عم بختفي
شو بقلن عشقانة بقلن بعيونك غرقانة بقلن
على قلبك هربانة تركني إتخبى فيه

هارون : وين اخبيج صماخج شكبره

زبيدة : ضربته على صدره احترم نفسك اني غزالة

هارون : اي مبين

زبيدة : غصبًا ما عليك

اباوعله هز ايده وكام يضحك

هارون : والعباس انتِ مو صاحية

زبيدة : ضحكت وداعتك اني لو صاحية ما جان حبيتك بكرعتك هاي

هارون : هاي اكرع ومجفيه على وجهج لوما اكرع شتسوين

زبيدة : انجفي اكثر

هارون : ههههههه

زبيدة : ههههه طبعًا هارون ضحكته تخرب ضحك خصوصاً هو صوته كلش خشن ومن يضحك مدري شلون تطلع ضحكته بس تضحك

جريت علاكة النمنمات طلعتلي نستلة وباوعتله ، تاكل شي ؟

هارون : لا بس كسرلي صودة

زبيدة : بيمن اكسرها الك

هارون : يمج بالچكمچه اكو مكسارة

زبيدة : فتحت الچكمچه طلعت المكسارة فتحتله الصودة وانطيتها الها

رجعت اكل بالنستلة ، بالمناسبة اني كلش احب الحلا على عكس هارون الذاب روحه على الموالح اكثر شي

تاكل ؟

هارون : جاي اسوق

زبيدة : قربت النستله من حلكة اكل شويه واني رجعت اكملها

كملت النستلة وذبيتها بعلاكة فارغة وضميت روحي
وباوعت للطريق ماكو شويه وغفيت

كعدت قبل لا نوصل بنص ساعة ، هاا حبيبي تعبت اسوق اني ببدالك

هارون : لا ميحتاج وصلنا ما بقى شي

زبيدة : صدك ما طولنا شويه ودخلنا لبابل ، دليته على بيت خالتي

وصلنا وهو صف السيارة ونزلنا ، رحت اني بسرعة دكيت الجرس ورجعت اشيل الغراض ويا

طلعت ميلاد شافتنا واجتي سلمت علينا

ميلاد : هلا حبيبتي والله زحمتج

زبيدة : لا عادي ماكو اي زحمة خالتي هي هم

ميلاد : هذا رجلج

زبيدة : اي هارون هاي بنت خالتي ميلاد

ميلاد : شلونك خويه اعذرنا والله زحمناكم بس شنسوي مجبورين والله

زبيدة : اباوع لهارون اندار عليه باوعلي وباوعلها
خزرته حتى يجاوبها ليروح يغلس ويفشلني

هارون : لا عادي

ميلاد : تفضلو تفضلو أهلا وسهلا نورتونا

شوف شكد عيب ليش متسوكين وجايين مو عيب قابل احنه غربة حتى تسوون هيج

زبيدة : ولان احنه مو غربة دناخذ راحتنا فميحتاج
تكولين هيج احنه اهل

خلينا غراضنا بالمطبخ ودخلنا جوه لكينا خالتي كالعادة كاعدة لو تثرم خضرة للدجاج لو تلگط تمن

السلام عليكم شلونج خالة

ما ردت عليه حتى ما باوعت بخلقتي ، اتبعت نظرها داشوف عليمن دتباوع لكيتها فاتحه عيونها وتباوع لهارون من فوگ لجوه

بلعت ريكي ، ششـ شبيج خالة

عقيلة : منو هذا المدگدك ؟

***************************************
لهنا يكون خلص البارت ان شاء الله يكون عجبكم ❤️
+ لتنسون التصويت والتعليق برأيكم ❤️

شنو رأيكم بالأحداث ؟

شنو تتوقعون حيصير بالبارت الجاي ؟

ملاحظة : حبايبي حبيت انوه عن شغلة مهمة ، هنا اني الكاتبة واني الاحدد فيما اذا كانت الاحداث الدتنسرد مهمة لو مو مهمة وطول الرواية وعدد
بارتاتها اني الاحدده لان اني الداسرد الرواية

فرجاءً هاي التعليقات السلبية حاولو تبتعدون عنها
(للبعض)ماكو شي اسمه حوار ماله داعي ماكو شي اني اذكره بالرواية ماله داعي ولا اكو شي اسمه
اختصري

هالرواية حقيقية والاشخاص الداسرد قصتهم بشر مثلي ومثلكم مو ابطال فيلم اكشن حتى تكون حياتهم كلها اكشن وحوارات تحبس الانفاس طبيعي جدًا تكون اكو احداث بسيطة ولطيفة تمهد للبارتات الجايه

وبالمناسبة الروايات الي كلهن شد اعصاب تملل القارئ بسرعة لان دائمًا تشتغل على استنزاف طاقته النفسية وتحسسه بالسلبية وبالتالي تخلي يحس بالملل لدرجة بس يتمنى الرواية تخلص

اقدر اني حبكم وكل ارائكم احترمها لكن حاولو تبتعدون عن التعليقات السلبية ❤️