الموت الحي الفصل الثمانون 80 - بقلم براء الموسوي

مرحبا حبايبي العسل شلونكم ❤️❤️

•••••••••••••••••••••

وإني في حُبِك اَتذوقُ اشهى أنواعَ المشاعر

"زبيدة"

•••••••••••••••••••••

#الموت الحي
#للكاتبة براء الموسوي

زبيدة : ياا هاي شنووو

شفت هارون واكف يم يخت ابيض مليان نفاخ ابيض واحمر

ضحكت ، هاي شكو اليوم ؟

اباوعله نزل من اليخت وتقرب واكف كدامي ، اخذ ايدي باسها وباوعلي مبتسم

هارون : كل عام وانتِ بالف خير يا احلى شي صار بحياتي

زبيدة : صفنت بوجهه للـ لحظة ببـ بس اليوم مو عيد ميلادي

هارون : اعرف ، عيد ميلادج صادف قبل شهر وللأسف ما جنت وياج حتى نكدر نحتفل بي

وبما انُ اليوم يصادف 4 بالشهر وهو نفس اليوم الي انولدتي بي فگلت خلي نحتفل بي حتى لو متأخر

زبيدة : باوعت لعيونه ، ممـ ما اعرف شنو اكلك بس شكرًا شكرًا هواي

رفع اديه ثنيناتهن بوسهن وجرني عليه

هارون : لتكولين شي ولا تشكريني بس كوني وياي وهذا اجمل شي ممكن تقدمي الي

زبيدة : هزيت راسي مبتسمة ، اني وياك ولأخر يوم
بعمري هم

ابتسم وتقرب باسني من شفتي ، خليت ايدي على خده ودابادله بس فجأة استوعبت ودفعته عني

صخام بوجهي هارون تخبلت انت

هارون : شكو شبيج ؟

زبيدة : احنه بنص الشارع والناس داير مدايرنا

هارون : اوو اسف تحمست شويه

زبيدة : ابتسمت على ردة فعله وهو من شافني ابتسم ضحك

هارون : شنو رأيج ندخل لجوه

زبيدة : خليت ايدي بايده يله

مشيت ويا ، صعد هو بالإول واندار شالني وصعدني ويا

بلغ السائق حتى يحرك وتقرب جرني من ايدي ومشه بيه لمقدمة اليخت ، لمعت عيوني من شفت كيكة بيضة مزينة بأحمر تترأس الطاولة

انداريت عليه ، اااالله هارون حتى كيكة جايب

هارون : مو عيد ميلادج هو شلون نحتفل بي بدون كيكة وشموع

زبيدة : حضنه بقوة يااااربي شكددد لطييييف انت والنبي راح اعضك

هارون : ههههههه

انتِ استثانية بكلشي حتى غزلج وتعبيرج عن مشاعرج اسثنائية

زبيدة : شلت راسي وباوعتله ، واكبر دليل على إني اسثنائية إني حبيتك ، بأيجابياتك وبعيوبك وبكلشي بيك

انت الاثبات الوحيد على هذا الاستثناء

ما حصلت منه جواب ، قطبت حواجبي مبتسمة ، ليش متجاوبني ؟

اباوعله حاوط جتافي بإديه نزل راسه عليه هامس

هارون : بعيدًا عن الموضوع ، تدرين اني عندي القابلية اضل اليوم كله حاضنج هيج وابوس هالشفايف الترفة منا لمن امللج واكرهج بالساعة السودة الخليتي بيها هذني الحلوات مباحات الي

بس هسه جابر نفسي ااجل هذا الفعل المقدس لان لازم نحتفل بيج ونعيش اجواء السفرة الحالف اعيشج بيها احلى ايام حياتج

زبيدة : باسني من شفايفي بخفه وابتعد

هارون : فهمتيني

زبيدة : هزيت راسي

هارون : وهسه يله تعاي اطفي الشمع وتمني

زبيدة : ابتعد عني واني واكفه بمكاني صافنه استرجع حركته وكلامه

كزبر جسمي وتحمحمت منداره عليه ، سمعت صوت اغنية اجنبية مالت ميلاد تصدح باليخت وشفت هارون يشغل الشمعه ويحاوطها باديه

هارون : ركضي بسرعة تمني وطفيها قبل لا يطفيها الهوى بسرررعة ولج

زبيدة : ابتسمت وتقربت طفيتها بعد ما تمنيت

وبيومها ولأول مرة بحياتي اتمنى شي لنفسي ، تمنيت اكون سعيدة

وحرفيًا جنت اعني هاي الإمنية ، صدك تمنيت اعيش سعيدة على الاقل ويه الناس الاحبهم

ضحكت من بعد هارون اديه وكام يصفكلي

هارون : كل عام وانتِ وياي

زبيدة : هههه يا روحي انت آمين

تعال شو تعال خلي احضنك ، حضنته وبوسته من خدودة ، اروح فدوة اني للي يحتفل بيه

هارون : يله حبيبي هاج السجينة كطعي الكيكة

زبيدة : اباوع للسجينة ملفوفه بشريط احمر

واو حبيب شنو هالذوق والترتيب ، اخذتها منه واشرتله

يله ايدك بإيدي خلي تقطعها سوه ، خله ايده فوك ايدي وكصيناها سوه

اخذت القطعة خليتها بالماعون واخذت جزء بالجطل وانداريت عليه

شفته ابتسم واكل شلون المتردد ضحكت على ردة فعله لان ادري بي يكره الحلويات

هارون : جيبي دوري دوري

زبيدة : وكلني وشال الماعون خلا على الميز وسحبني
مكعدني على القنفة

هارون : استريحي يا حلوة

زبيدة : وين رايح

هارون : ثواني بس

زبيدة : شفته نزل لداخل اليخت وشويه وطلع بأيده علبة

استغربت من شفته يكعد على ركباته ويفتحها كدامي
ابتسمت من شفت حلقة بوجهي

هارون : بصراحة ما اعرف شلون الواحد يكون رومانسي ويسوي شغلات حلوة للبنية اليحبها

فحبيت التجئ لسوالف الافلام والمسلسلات ، اعرف هاي الحركات تعجبجن انتن البنات

زبيدة : خليت ايدي على خدي وابتسمت ، اممم كمل

هارون : اي فآني شفت انُ اني وياج متزوجين يعني مو مال اعرض عليج الزواج مرة ثانية ونرجع نعقد ونسوي عرس احس هيج سوالف سخيفة وتافـ...

ااا اسف اسف اقصد يعني مالها داعي

شبيج زبيدة ليش تضحكين والله مو صوجج صوجي اني الكاعد اعترفلج

زبيدة : اباوعله عافني وگام ، هههههههههه والنبي اسفة مداستهزأ تعااال حبيبي

يااا هذا صدك زعل وعافني وراح وكف بطرف اليخت انوب اني الله ذب عليه الضحك اريد اسكت ما اكدر

كمت واني اضحك حضنته من وره وبسته من ظهره
افييييش يمه رجلي حبيبي اليحاول يعترفلي

شو باوعلي ، يله احجي والله العظيم مجنت استهزأ بس حركاتك وارتباكك يخبل وغصب عني ضحكت

وكفت عدل يله كمل بداعتي عندك هارون شبيك لتخرب اللحظة احجي يروحي انت

هارون : ما عندي شي اكوله بس حاب نبدي بداية جديدة وهاي حلقة جديدة اشتريتها على ذوقي وحبيت تلبسيها وتكون شاهدة على زواجنا الحقيقي

الزواج الي الله محلله والي راح يصير برضى الطرفين
برضاج وبرضايه ، بدون مساومات وبدون ضغط من احد علينا

هذا الزواج راح يصير بس لان اني وياج نحب بعض ونريد بعض بس هذا الردتج تسمعي

زبيدة : مديتله ايدي ، لبسني الحلقة يا احلى واجمل واحن والطف واغرب كائن شفته بحياتي

ابتسم ولبسني الحلقة ، باوعتلها جانت حلقة زواج عاديه جدًا بس المميز بيها انُ اسم هارون محفور
داير مدايرها من بره

درت ايدي عليه ، شنو رأيك

باس ايدي وشمها

هارون : جانت حلوة الحلقة وزاد جمالها من دخلت بين اصابعج

زبيدة : احبك

هارون : واني اموت عليج

تعاي بحضني

كعد على طرف اليخت وكعدني بحضنه ، حاوط خصري واني رجعت راسي على صدره

هارون : خوما ملانه

زبيدة : لا بالعكس الأجواء يجنن ، مديت ايدي بجيني طلعت موبايلي

باوع حبيب خلي ناخذ صورة

اخذنا صور هواي وكلهن طلعن يجنننننن ، مو لان التصوير حلو بس لان مشاعرنا بيها جانت حقيقية

هارون : كافي زبيدة شكد تصورين خلينا مستمتعين بالجو

زبيدة : ولا يهمك حبيبي هياتني طفيته للموبايل ، شمرت الموبايل وانداريت حاوطت خصره وصعدت رجليه على الطرف

اكول حبيبي

هارون : كولي يا روحي

زبيدة : هههههه

هارون : والله يا زبيدة اذا تضلين تضحكين كلما احاجيج اركعج ميت جلاق وانعل ابو لابو الجابه اليحترمج

زبيدة : ههههه مو باوع اني ممتعودة عليك هيج

عدلت كعدتي ، اني من يوم الي التقيت بيك وانت عاگد النونه وساكته واذا ردت تحجي فيا اما تكول اي او لا يا اما تضل تتعارك

فهسه من داشوف منك هذا الجانب داتفاجئ ، يعني من اصفن عليك اكول معقولة هذا هارون نفسه ذاك اليصيح

لتلزميني ، لتتقربيلي ، اني ما احبج ، لتضلين تمسلتين اني ماعندي مشاعر تجاهج ووووو الخ

هسه داباوعلك واكول عود صدك زبيدة هذا هارون ؟

هارون : هو حتى اني مستغرب نفسي لان ما متعود اعامل احد هيج

بس مع هذا مرتاح لان من اصفن اشوف نفسي جاي ابذل هالمجهود ويه نفسي لشخص يستحق

زبيدة : اخذت نفس ورجعت راسي على صدره ، بردت اشبگني حيل خلي ادفه

باسني من راسي وحضني حيل

ضلينا نفتر باليخت فترة طويلة لحد ما عبرنا على الساحل الثاني

هارون : انطيني ايدج

زبيدة : وين

هارون : نفتر

زبيدة : خليت ايدي بايده ، يله

_________________________________

دنيا : اني ما مرتاحتلج جمانة ، الجوهرة المحصورة ببلعومج ذبيها وريحيني

جمانة : سكتي ولج لتحجيني وتحمليني ذنب والدنيا مغربيه

دنيا : خير ان شاء الله شصاير ولج لتخوفيني

جمانة : ما صاير شي بس هاي بنت الكلب الاسمها سجى هي وامها وجودهن ويانا بنفس البيت كلش صار مضايقني

دنيا : شنو سون الج شي ؟

جمانة : يخسن يسونلي شي ، بس تصرفاتهن مو منطقية وما جاي تعجبني

كلما نكعد الكاها واكفة تتسمع علينا لو من ننام باليل تضل تتسمع على ابواب غرفنا واني شفتها بالكاميرات

اخلص منها بره الغرفة ادخل الكاها جواها

تخيلي ذاك اليوم اطب للماسنجر مالت كريم الكاها تتراسل ويا

استاذ اسويلك جاي ؟
سويت كيك تحب اصعدلك ؟
استاذ انزل مسوية خوش حلويات
استاذ جاي اكوي ملابسكم باجر شتلبس حتى اكويلك

وغيره وغيره من الحجي

بنت النعال انتِ شعليج يريد جاي يريد زقنبوت يريد يتصخم انتتتِ شكو

لا انوب مرة جاي اطب للمطبخ الصبح اسمها تگله عذرًا استاذ ما اكدر ما اكلك بس تره قاطك اليوم
يخبل

لا وتسبل بعيونها وتسويلي حركات سخيفة عود يعني هي بريئة وذاك رجلي كلش سايح ومتفاعل

دنيا : هي هاي البنية استغفر الله من ذنبها حيل خفيفة

بس مع هذا ما اتوقع كريم عده شي وياها ، يعني عادي مو شرط اذا تغزلت بي او حاولت تتقرب منه كون هو عنده شي وياها

جمانة : اني ادري بكريم ماعنده شي ومتأكدة ميه بالمية لان نبشت ورا وما لكيت شي حتى من الكا يسولف وياها فحجيه كلش عادي

بس يختي واحد يحجي الاله والعليه الزلم مثل الزعاطيط وابد مينعطون وجهه يمكن هسه هو ماعنده شي وياها بس المستقبل مينعرف
كلشي يصير

دنيا : لا من ناحية كريم امني ، كريم فقير وگلبه طيب يجوز تعاطف وياها او دياخذها على كد عقلها

بس مو مال عنده شي اني اعرفه من چنه صغار وهو وجياد الوحيدين بين الولد مالهم شغلة بهالسوالف

جمانة : ولج تصدكين ذاك اليوم الادبسز تدك عليه بالـ2 بالليل تصيح الحكلي استاذ امي ماتت

وذاك طلعلج بطرگ روحه زين لحك يلبس فانيلته الداخلية واخذها هي وامها وطلعو وما رجعو غير
الصبح

دنيا : هي تحجي واني اجه ببالي نفس الموقف

تصدكين اذا اكلج هي سوت نفس الموقف ويه يوسف تصدكين ، هم مرة طلع وللفجر ما رجع ومن رجع سألته وين جنت گلي ويه سجى وامها بالمستشفى المرة متخربطة

جمانة : يمه يالبـ***** يمه

ولج انتِ كل عقلج مصدگة دروبهن اني هالنماذج اعرفهن وحافظتهن

شنو يمه قلة سواق وحرس بالبيت حتى تركض ليوسف وكريم

وبعدين عمو مو مخصص للعاملات سايق خاص ياخذهن وين ميريدن اذا صار عدهن شي فبعد
شنو هاي اللواكة واللكلكه

بس اني اكلج ذني جاي يرسمن لبعيد بس عليمن على هامان يا فرعون والله لربيهن واخليهن يمشن مثل الساعة

بس خلي الزم عليهن شي قوي اله اركعهن بميت جلاق واريد اشوف منو يطلع وراهن

والله يا الله بعد علينا بس هالزبالة ام نجاح وبتها

_______________________________

زبيدة : بشرفك هارون صدك تحجي

هارون : اي

زبيدة : روح حبيبي روح لو اموت ما اسويها

هارون : مو بكيفج

زبيدة : لا بله

هارون : وداعة هالشفايف مو بكيفج

زبيدة : والله ما اصعد انداريت امشي وعثرت من جرني من هدومي ومشه

عوفنيييي ما اصعددد

رد عليه ببرود

هارون : انجبي وامشي

زبيدة : اذا متعوفني اتمددلك هنا وافشلك والنبي عوفني هارون ما اريد اصعد شنو تخبلت اكمز من طيارة

هارون : تمشين بأحترامج لو اوفر على روحي كثرة الحجي واشيلج تره ماعندي مانع وانتِ تدرين

زبيدة : بشرفك هارون والله اني اخاف من المرتفعات وانت جايني تريدني اقفز قفز حر

هارون : لتضلين جبانة غامري شويه حتى تحسين بطعم الحياة

زبيدة : ما اريد اغامر عوفني

هارون : انجبي

زبيدة : يوووو هارون اني ويامن احجي

هارون : انجبي گلت

زبيدة : سوه البراسه وسحلني ورا مدخلني جوه

حباب هارون بعد گلبي خلي نرجع والنبي اني اخاف من المرتفعات

اباوعله اندار لزم اديه

هارون : لخاطري اني كلش عاجبني نجرب سوه القفز الحر

ووعد اذا ما تونستي شتردين اسويلج ، صدكيني هالتجربة راح تكون من احلى التجارب بحياتج

ووالله متخوف مثل ما انتِ متخيله اني مجربها فوك العشر مرات وبكل مرة اتونس بيها وكإني اول مرة مجربها

زبيدة : باس ايدي وشد عليها

هارون : لخاطري خلي نجربها سوه

زبيدة : تنهدت وهزيت راسي يله لخاطرك حجرب بس والله ياهارون اذا اخترعت وصار بيه سكر اله اعضك من كرعتك

هارون : هههههه واني قابل ، يله امشي اجه سرانا

زبيدة : سحب ايدي ومشينا داخلين جوه ، اباوع لهارون طلع بطاقة الحجز وبلغو نروح نبدل

هارون : تعاي

زبيدة : مشيت ويا ، دخلنا لغرفة بيها كل وسائل الحماية النحتاجها بهيج جولة

اجت بنية ركبتلنا كلشي وتأكدت من كلشي تمام ياله راحت

باوعت لهارون الي لبس الخوذة والجنطة ، بلعت ريگي
عززه السالفة صارت صدك

هارون : شبيج وجهج صار اصفر تره والله متخوف

زبيدة : هاا لالا عليمن يصير اصفر هي كمزة شسالفة عشتو

هارون : والله

زبيدة : لعد اجذب عليك

هارون : هههههه خوش يصداگه لعد تحركي

زبيدة : جرني ورا وطلع متوجه لمكان الطيارة

هارون : تعالي

زبيدة : صعدني وصعد وراي ، اجه ولد ربطنا سوه اني وهارون بحيث صرنا شلون الجسم الواحد

صعدت بينا الطيارة واني بلعت العافية

اني بله شحسيت من قبلت اجاري هارون واجرب القفز من الطيارة بالمظلات

هارون بله بايعها ومخلص لا يخاف ولا يستحي هسه اني هم ما استحي بس اخاف

فززني صوت هارون اليهمسلي

هارون : لتخافين حبيبي اني وياج

زبيدة : هزيت راسي بدون لا اجاوبه

ارتفعت بينا الطائرة مسافة جبيرة واني لساني كام يلهج بالدعاء

انوب انفتح الباب واني اجت تموع روحي ، اباوع احنه داير مداير الغيوم والارض صارت بعيدة علينا

عزززه العزاج زبيدة انتِ شجابج على هذا الماعنده گلب صخام بوجهك بهارون على هالعملة

هارون : جاهزة ؟

زبيدة : غمضت عيوني وهزيت راسي بتردد

هارون : اخذي نفس عميق وابد لتباوعين لجوه

زبيدة : سويت مثل ما گال

هارون : يله 1،2،3 ......

زبيدة : خلص عد وبدون سابق انذار نط من الطيارة ساحبني ويا

بلحظة وحدة صرت عبارة عن ريشة وتتحرك بالهوى
اني شفت روحي هيج وكمت اصرخ

يبوووو ييووووو حنمووووت حنمووووت

ضليت اصيح خصوصًا من كمنه نفتر بالجو كدما الهوى عالي

دقايق وبديت شويه شويه اهدئ ، فتحت عيوني وشفت أبداع الخالق الكدامي

منظر الغيوم وشكل الارض من جوه والبحر ياخذ العقل بغض النظر عن الشعور الي اصلاً ياخذ العقل

ههههههههه ااااالله هارررون

اسمعه يحجي وبسبب الضغط ما اكدر اسمعه بوضوح وهم الخوذة اللابسها مدتخليني اسمع شي

شفت بنية كدامنا تصورنا ، ابتسمت من رفع هارون ايده سوه علامة الانتصار ، ضحكت وسويت نفسه والبنية تصورنا

فتحت اديه مستقبله الهوى اليجننن ، باوعت لهارون الضرب راس الخوذة اللابسها براسي

والله يمكن لو اكول هالتجربة جانت احلى تجربة جبرتها بحياتي يكولون هاي دتبالغ

بس حقيقة الشعور التحسو وانتو بحضن الجو ، متوسط بين الارض والسما وويه اكثر انسان تحبه
بالدنيا اجمل شعور

خلصت الجولة ونزلنا بالمنطاد للگاع

فتح هارون حزامي واني من الفرحة كمت اكمز وافتر على نفسي واني اضحك

هارون : ههههههه مو كتلج راح تتونسين

زبيدة : ضحكت وركضت حضنته واني اكمز ، ههههههه احببببببك احببببببك اموووووتتتتت علييييك اني

ابتعدت ابوس بي وهو يضحك

هارون : لهالدرجة تونستي

زبيدة : بس تونست ؟ كووول طررررت طررررت

شكراً ياروحي انتتتت شكراً

ضحك وتقرب حضني وشالني فرني بالحديقة واني اضحك ، نزلني وبوسني من خدودي وحضني لصدره ومشينا طالعين من المكان

هارون : انوب من اكلج على شي طاوعيني وانتِ ساكته

زبيدة : خلص حبيب اني من هاللحظة حخيط لساني وانت شتريد تسوي سوي اني قابلة مادام حتونسني هيج

هارون : بعدج ما شفتي

زبيدة : ليش اكو بعد

هارون : مو كلنا راح تخيطين لسانج

زبيدة : خليت ايدي على حلگي هاهي سكتت انت تأمر امر

هارون : هههههههه

زبيدة : مشينا نفتر بشوارع ميلانو الشعبية والي اجوائها تجنن

هارون : سؤال

زبيدة : جواب

هارون : هم مجربة احد يهديج شي بنص الناس

زبيدة : لا

هارون : لعد شنو رأيج تجربين

زبيدة : وكفت مباوعتله بأستغراب ، ما فهمت ؟

اباوعله ترك ايدي وابتعد واكف بنص الناس ، انتبهتله اخذ الجنطة العلى ظهره نزلها وفتحها

اباوع طلع آله الكلارينت مالته وباوعلي مبتسم

هارون : هاي المقطوعة اهداء الج

زبيدة : دزلي بوسة بالهوى وبلش يعزف مقطوعة حماسية بنص العالم

ضليت صافنه عليه شلون يعزف بحماس والفرح يشع من وجهه ، ما مستوعبه الموقف خصوصًا من هارون

اني الاعرفة والمتعودة عليه هارون شخص انعزالي وخجول نوعًا ما يعني ما ممكن تبدر منه هيج تصرفات

بس اليوم صدمني

وبكثر الصدمة الاني بيها نسيت انه زوجي للحظات وبدون شعور تعالت ضحكاتي وكمت اصفكله ويه الناس الي التمو يصورو ويصفكوله

وهو مستمر وعيونه عليه

خلصت المقطوعة والكل صفكله واني اديه وجعني كد ما صفكت بحماس وفكي تشنج من الابتسامة الحقيقية الكدر هارون بدقايق يرسمها على شفايفي

اباوعله ابتسم بخفه ممتن لتفاعل الناس وتقرب وكف كدامي

هارون : احبج

زبيدة : واني هم هواي كلش هواي

سألني وعيونه تلمع

هارون : عجبج عزفي

زبيدة : حركت اديه بحماس يجننن هارووون يجننن
مو بس العزف انت كلك على بعضك تجننننن

يربي احبك اني اموت عليك والله

هارون : هههه تعاي ابوسج ام لسان

زبيدة : ضحكت وتقربت انطيته خدي باسني وحاوطني ومشه تحت أنظار الناس

ضلينا نفتر ورحنا تغدينا بيتزا بأقدم مخبز بإيطاليا يقدم البيتزا الإيطاليه التقليدية والي جانت خرافية

لكن ما انسى مكافشنا اني وهارون لان صلبنا ساعة ونص بالشارغ علما وصل طلبنا

وانتهت العركة ببوسة خفيفة من شفايفي بالشارع ومن رزلته القى عليه مثله الخلص السفرة وهو خابصني بي

هارون : منو يعرف فطيمة بسوگ الغزل

دمشي امشي هو انتِ منو والعالم تركز وياج

زبيدة : وما احتاج اكول انه كالعادة لصمني على حلكي وسوه اليريده

بيومها رجعنا للفندق بالليل وبوجهنا للصلا وبعدها للنوم

جان يوم جميل ويشع سعادة بكل ما تحمل الكلمة من معنى

_______________________________

بصائر : كاعدة ودك موبايلي ، شلته شفته حليم انطيته كتم وعفته

ماعندي القابلية حتى اسمع صوته

شويه ووصلتني رسالة منه

حليم : اذا متردين اجيج للبيت فتأدبي وردي

بصائر : رجع اتصل ، فتحت الخط ، نعم ؟

حليم : السلام عليكم

بصائر : شتريد

حليم : شوكت ترجعين صارلج يومين ما شبعتي

بصائر : لتگلي مشتاقلي تره اتأثر

حليم : لا طبعًا اشتاقلج شنو بس امي خبصتني بيج كل ساعة جايتني تسأل عليج

كلت خلي اخابرج واخلص من لسانها احسلي

بصائر : توقعت بدون متحجي ادري بيك مو رجال وتفكر بمسؤولية لدرجة تخابر وتسأل عن زوجتك

حليم : لتمسلتين زايد شوكت ترجعين

بصائر : ما اعرف ويله ولي بعد لتدك عليه

سديت الخط بوجهه وتنهدت طالعة من الغرفة ، داروح للمطبخ ومريت من غرفة امين

باوعت لديمة واكفه تكوي ملابس امين وتعلكهن بالكنتور ، اباوعلها شلون تتحرك بنشاط

ومثل عادتها دائمًا مبتسمة ونادرًا ما الواحد يشوفها معبسة حتى لو جانت ضايجة تبقى محافظة على
ملامحها

دخلت للمطبخ شفت امي واكفه تسوي حلاوة ، اكول يمه عود ديمة شنزل عليها هاي الطيبة فجأة

هناء : ديمة من زمان طيبة بس عيبها انها مو صاحبة موقف وحجاية تجيبها وحجاية توديها

غير هيج هي وردة ومن اول ما اخذت امين هي ما مقصرة وهاي صارلها سنة ويانه لا فديوم علت صوتها عليه ولا سوت ضوجتني

مداريتني وتعاملني وتعامل اسلام وكإنما جاي تتعامل ويه امها واخوها

غير وحدة تشوف رجلها من جانبها تشيخ على العمة وتضل تتذمر من الحموين والبنية الشهادة لله ما فديوم طلع منها هيج شي

بصائر : بعد بعد سويها نبي

هناء : اني ما كلت نبي بس احنه ورانا حساب ويوم قيامة فلازم احجي ضميري

بصائر : يا ضمير هذا يمه هاي وحدة حقيرة المفروض تكوميها بإهانة وتكعديها بإهانة شنو الحقيرة هاي وانتِ كاعدة تدافعيها

هناء : ما اقبل تحجين عليها هيج تأدبي بصائر ، البنية رغم كل السوته ويه اخوج الا انها صحت واعتذر وجاي تحاول بكل الطرق تصحح علاقاتها بأخوج

بس اخوج كلبه ثخين نعلعلا بليسه ولا يلين ولا اصلاً جاي ينطيها فرصة وهي سودة عليه اذا الحايط حجه هي حجت

فعلى شنو هالحجي الماصخ مالت بعد

بصائر : وعسى ما لان وياها ، ان شاء الله يارب تمل ويطلگها ويخلص منها على الاقل ياخذ التناسبه

ديمة : ومنو انتِ حتى تقررين اذا جنت اني مناسبة لأمين لو لا

من رخصتج خالة ، باوعت لبصائر ، اسمعي بصائر اني ماجاي احتك بيج ولا الي اي علاقة بيج

فليش جاي تدورين مشاكل لو صعبة عليج تشوفيني اني واهلج متصافين

اني اكدر اردج غير رد وحتى امد ايدي عليج مثل ما مديتي ايدج عليه سابقًا بس اني ما اريد مشاكل

تعرفين ليش لان هالبيت يهمني وما اريد اهجمه بالمشاكل والعرك والسلبية

فياريت انتِ هم يكون هدفج هيج ، انتِ جايه هنا جم يوم خلي جيتج طيبة وروحتج طيبة ولتضلين تخبثين عليه

وارجع واكرر علاقتي اني وامين مالج علاقة بيها ، التهي بنفسي وبزواجج الخربان وحيري شلون تصلحي

افضل ما تتدخلين بحياة اخوج وتحاولين تخربيها او سوري تصلحيها مثل ما تعتقدين

بصائر : ولج شنو زواجي الخربان ، شو انتِ متعرفين تحجين

ديمة : حبيبتي وفري على نفسج تره الشارع ضيگ وكلنا نعرف تحت الغطاء شكو

هناء : شتقصدين ديمة

ديمة : اني ما ردت احجي واصلًا خجلانة من نفسي واني واكفه اتجاوز بوجودج خالة بس بصائر مصختها

وكاعدة عينك عينك تحرضج عليه ودتحاول بكل الطرق تخلق فجوة بيناتنا ولوما انتِ عاقلة جان اخذتي بكلامها وشديتي وياي

بصائر : بس لا عبالج امي عربانة مثلج وبسهولة ينضحك عليها

ديمة : احترميييي نفسج ولتتجاوزييين

بصائر : امشييي لج جايه تعلميني الاحترام دروحي شوفي روحج

اذا ناسية ماضيج ورسولي وهباوي فخلي اذكرج بيهم اخاف ناسية يالعفيفة

ديمة : بهت وجهي من سمعت كلامها

احس الدنيا اسودت بعيني واني اشوفها تتبسم بشماته وتباوعلي ، اخر شي سمعته صوت خالة التستفسر بإستفهان قبل لا ينكتم على نفسي
واوكع مغمى عليه

___________________________________

زبيدة : نايمة واحس بشي يدغدغ رجليه ، حكيت وحدة بالثانية ورجعت نمت

شويه وتكررت نفس الحالة ، غلست مرة ثنين بالثالثة انطيت دفرة للهوى وسمعت عيطت هارون

هارون : ااااخ نعلعلا يومج خشمي راح

زبيدة : فزيت من مكاني لكيته واكف يفتر ولازم خشمه

هارون : كام ينزف وخرييي

زبيدة : انشدهت وكمت افتر ويا ، شبيك حبيبي شوف اشوف خشمك شبيك والله ما ادري بيك عبالي ذبانه

شو اشوف ، هسسسه غيررر توكف حتى اشوفك ، يربي ماكو يفتر ولازم وجهه ويون واني افتر ورا
جني مرصع

اخر شي عطت بي دااااووووكف شبييييييك

اباوعله وكف وفجأة نزل ايده وطكها بضحكة خلاني صافنة

هارون : هههههههههه

زبيدة : الشفية خربان ضحك واني صافنه عليه بعدين استوعبت جان يجذب لان خشمة كلشي مابي لا طاك دم ولا ابد

هزيت راسي والله انت فد واحد سخيف

هارون : انجبي لج

زبيدة : بشرفك هارون اكو واحد يكعد مرته هيج

هارون : هو انتِ مال رومانسية مال واحد يطيحلج جلاليق ، ساعة يخنكج وساعة يخوفج وساعة يطك ظهرج هو بس هذا يفيد وياج

زبيدة : تمشيت فتحت علبته مالت الهيل اخذت هيلايه مضغتها وحاجيته

لو كل الزلم تترومس ويه نسوانها مثلك جان بطلت العالم تترومس بعد

هارون : والله هذا الموجود عاجبج اهلاً وسهلاً ما عاجبج نتعلم ونعجبج مابيها شي

زبيدة : ضحكت وتقربت بسته من خدة ، اشاقة وياك حبيبي انت شما تسوي تاخذلي عقلي

رجعت بسته مرة ثانية يله ريكني تره جوعانة اني

هارون : يله بدلي حتى نطلع نتريك بس لبسي ملابس طلعة ثخينه لان باردة اليوم وبيها مطرة

زبيدة : تمام

رحت طلعتلي بنطرون بيجي فاتح وبلوز ابو الركبة ابيض ولبست وياهن كوت نيلي

كملت لبس وكعدت اخلي شويه مكياج حتى البس حجابي

كملت كلشي وشفت هارون يطلع من الحمام لابس اسود

شفته تقرب وكف يمي وصفن على لبسي ومسح على لحيته

سألته ، شنو ملابسي مو حلوة ؟

هارون : لا بس ثواني

زبيدة : اباوعله رجع دخل للحمام شويه وطلع لابس بنطرون بيجي وقميص أبيض فوكا يلگ نيلي

فتح اديه ورفع حاجبة

هارون : اعتقد هيج نطلع اشيك

زبيدة : ابتسمت ودزيتله بوسه اروح فدوة اني للي ينسق وياي

ابتسم واجه تعطر وكعد ينتظرني اكمل ، كملت ونزلنا
شفت هارون يتوجه لباب الخروج

حبيبي المطعم منا وين رايح انت

هارون : ومنو گال راح نتريك

زبيدة : لعد وين

هارون : شكلنا احنه

زبيدة : هااا اي اي سوري راح اسكت

مشيت ويا طلعنا للكراج ، شغل السيارة وحرك مبتعد عن المنتجع

افتح بلوتوث حبيبي

هارون : هم راح تطلعين اغانيج السخيفة

زبيدة : رجاءًا ما اسمحلك ، تقربت فتحت البلوتوث وشغلت لحبيبتي المواسيتني نسنوسه (نانسي)

وكالعادة لازم تكون الأغنية اما توصف مشاعري لو توصف هارون

عليت كل الصوت وكمت اغني وياها

كأنّه بيعرفني وحسو قلبو شو عندي حنين
وأنا إسأل حالي شو خصّو
عم يسألني بصفته مين

جرني كعدني بحضني ، حاوطت ركبته وبسته من خده وغنيت

فكّرتو مجنون
وما توقّعتو يكون
حبيبي ونصّي التاني
اللي راح حبه بجنون

كانت قصة إعجاب صارت حب وعذاب
تاري شيخ الشباب حبو بيكوي كوي

اي والله يكوي كوي ، اااااخ احتركت روحك شلعتلي گلبي

هارون : هههههه سودة عليه

زبيدة : اسم الله عليك بعد روحي

ضليت كاعدة بحضنه واغني وهو يضحك عليه واني مطنشه وكلش مندمجة

عاد الحمدلله بيومها ما سوينه حادث ولا اخذنا مخالفة من وره كعدتي بحضن الشفيه وهو هم استغل الفرصة وطلع على طريق زراعي حتى اكدر اخذ راحتي

ومن وصلنا لطريق عام وخرت عنه وضليت اغني وساعة اصورنا وساعة اصور الطريق وهيج مضت ساعة بالطريق

هارون : يله حبيبي نزلي

زبيدة : نزلت وباوعت للمكان مبتسمة

هارون : جايه لهنا ؟

زبيدة : تحسرت وجاوبته ، اي جنت اني وامي نجي لنص ميلانو حتى نتسوك

هارون : الله يرحمها ويقدرني اخليها مرتاحة بگبرها وهي تشوفج سعيدة

زبيدة : آمين

هارون : يله حبيبتي خلي نستغل الفرصة ونروح نتريك انوب نفتر

زبيدة : اوك ، لزمت ايده ودخلنا لأحد المطاعم اليغلب عليها الطابع الاثري

كعدنا وطلبنا اكل ، اكلنا وكملنا وكمنا نفتر

اول شي سوينا تصورنا يم كنيسة الدومو

وبعدها ضلينا نفتر بشارع بيازا دومو ، اشرينا ملابس
وما انسى اذكر انُ الملابس بإيطاليا فد شي خرافي
بس للأسف اسعارهن غالية

فززني صوت هارون

هارون : تحبين الككو ؟

زبيدة : اكيد

هارون : لعد تعاي

زبيدة : اخذني ودخلنا لمكان مخصص لصناعة الشوكلاتة بكل انواعها واصنافها

هارون : مجربة الككو بالفلفل

زبيدة : لا

هارون : تعاي نجربه اني عاجبني اجربه من زمان واليوم صحتلي الفرصة

زبيدة : رحت ويا اشترى قطعتين واجاني

هارون : خلي نجربة هالقطعتين هسه واذا طلع طيب عود نشتري

زبيدة : خوش اخذت قطعتي اكلتها وگبل ذبيتها

ايييع حشا نعمة الله شهاللعبان نفس حارة وبيها مرورة مدري شلون اوصفها بس لا تطاق

باوعت لهارون لكيته مغمض عيونه ومبين ديحرك لسانة بباطن فمه شلون الديستطعم وهو مستمتع

ندسته عود عجبك ؟

هارون : كلش

زبيدة : بشرفك

هارون : هههههه انتِ شعدج ويه شرفي

زبيدة : ابتسمت لا جديات صدك عجبك

هارون : والله كلش عجبني ، شنو انتِ ما عجبج

زبيدة : لا ايع امشي اشتريلي مي حلكي صار بي طعم جكاير

هارون : وانتِ وين مجربة الجكاير

زبيدة : مرة جربتها من مبين الحقير ، عوفك هسه امشي حتقيء

اخذني اشترالي مي شربت ورحنا اشترينا انواع معينة ومعروفة مالت ككو وطلعنا

اخر شي هارون اخذني لشارع مونتي نابوليوني ، اول ما وصلنا هناك تعاركت ويا

انت وين جايبنا ، تعرف الهدوم هنا ببيش ، شنو حضرتك ناوي تفلس بهالسفرة

هارون : انجبي ونزلي ما عليج اني الراح ادفع مو انتِ

زبيدة : ليش يمه لعد هي فلوسك مو فلوسي

هارون : نزلي وانجبي جاي اكول

زبيدة : كيفك عود لتنجلط عليه اذا سمعت الأسعار هنا

هارون : سدي حلكج وامشي

زبيدة : رفعت كتافي بكيفك عليمن عشتو حارگه دمي اني

مشيت ويا داخلة للمحلات ، اباوعله يفتر ويكلب بالفساتين ويباوعلي

اباوعله تخصر وحاجه الموظفة مأشر عليه

بس فهمني على شنو دتدور

هارون : عاجبني نشتريلج فستان منا بس ما جاي اعرف شأختارج انتِ جسمج كلشي يوالمه

زبيدة : باوعتله بغرور وتحمحت ، حتى تعرف النعمة العندك ابو الهراهير

هارون : هههههه تعاي عيني مدام خبزة شوفي هالفستان فدوة لكلبج

زبيدة : ضحكت ورحت يمه اسوي روحي داباوع للفساتين واني جذب اقره بالاسعار والطم بگلبي

اباوعله يجيب ويكوم اخر شي عضيته بنص المحل ورجعت كل الفساتين واكتفيت بـ3

لان اشترينا كومة اني ويا من بيازا

كملنا كلشي وطلعنا تغدينا باستا ولازنيا ورجعنا للفندق العصر

اني نمت وهو ضل كاعد ، وميحتاج اكول إني اذا نمت اصير جني ميتة لا اسمع لا ارى لا اتكلم

كعدت بالليل شفت الساعة بـ8 كمت توضيت وصليت
كملت واتصلت على هارون

الووو هاا حبيبي وينك ، اي هستوني كعدت وما لكيتك

هارون : اكو فستان بالجنطة الحمرة لبسي وتمكيجي ونزليلي للمطعم

زبيدة : ابتسمت اوك

سديته ورحت فتحت الجنطة لكيت علبة جبيرة لونها اسود مخملي وداير مدايرها حذاء ابيض شاموا وحجاب ستن بيجي ويا

فتحت العلبة ابتسمت من شفت فستان ستن بلون الحجاب وويا فرودة جوزية مضربة ببيجي

اخذتهن ورحت بدلت طلعت تمكيجت ولبست الحجاي والفروة والحذاء

شكلي طلع خرافي

اخذت جزداني ونزلت جوه متوجهه للمطعم ، لكيت ناس قليلين ، انطيت النادل رقم الطاولة الگلي عليها هارون وهو وصلني الها

مشيت ويا وشفت هارون لابس قاط اسود وكاعد يدخن ، اباوعله اول ما شافني ابتسم وكام على حيله

شال بوكيه ورد احمر انطاني يا وتقرب باسني من خدي وسحبلي الكرسي

هارون : شنو هذا الجمال الخلاب

زبيدة : ابتسمت شكرًا حبيبي كلك ذوق ، انت هم طالع تخبل

كعدت وهو راح كعد بمكانه ، انتجيت بخدي على ايدي
وباوعتله

بس اريد افتهم انت ناوي توكفلي گلبي بهاي السوالف التجنن

هارون : لو شما اسوي قليل بحقج

زبيدة : ابتسمت ، جديات منو معلمك تسوي هيج

يعني فستان ومطعم وشموع وورد شي غريب

هارون : خلفله على المسلسلات والافلام والا اني لو اموت لا اسأل ولا اخلي واحد يعلمني استحي

زبيدة : ضحكت على صراحته ، صراحة انت كلش لطيف وتخلي الواحد جبر يكزكز عليك

هارون : احم تحبين هسه نتعشه

زبيدة : ابتسمت بكيفك

طلبلنا الاكل وبلشنا ناكل وندردش

اكول حبيبي احنه شوكت نرجع

هارون : شنو مليتي

زبيدة : لا بالعكس اني لو ابقى العمر كله هيج مكابلتك وكاعدة مستحيل امل

بس سألتك من باب الفضول

هارون : اني حاجز اسبوعين

زبيدة : اي عاشت ايدك

هارون : شبيج تضحكين

زبيدة : فرحانة كلش هيج احس كلبي حيوكف من الفرح

هارون : واني هم لدرجة لحد الان ما مصدك

زبيدة : همستله تدنه شويه هارون ، تقرب عليه واني هم تقربت ، كل عقله حبوسه ، مديت ايدي كرصته من جتفه

هارون : طيح الله حظج

زبيدة : هههههه غير انت ممصدك

ابتسم وباس ايدي

اوووو حسستني بتأنيب الضمير

هارون : حقيرة

زبيدة : هههههه

رجعنا نسولف ، مرة نتغازل ومرة نضحك وثانية نتعارك وكالعادة كل جمعة ننجمعها تترك اثر
يجنن بداخلي

هارون : كملتي اكل

زبيدة : اي حبيبي الحمدلله

هارون : نروح نتمشى على البحر

زبيدة : وفستاني

هارون : عادي ينغسل

زبيدة : تمام لعد

كام وقدملي ايده ، حاوطت جتفه ومشيت وياا ، جانت الساعة بـ12 بالليل واغلبية الناس نايمين

تمشينا على الشط بدون احذيتنه ، اني رافعه فستاني ومطلعة جزء من اقدامي ولان محد موجود والاضائة
خفيفه اخذت راحتي

باوعت للبحر وتنهدت ، اكول شعجب ما سبحت بالبحر لحد الان

هارون : الجو كلش بارد اذا اطب اسبح اتمرض وانوب تعاي احتاري وابتلي بيه وبنوباتي

زبيدة : انداريت عليه لزمت خده ومسحت على لحيته
ليش تحجي هيج احتار بيك شنو

اني فطرتي وحبي الك يخليني ادير بالي عليك واخاف على صحتك من الهوى فبعد لتكول تبتلين
ومن هالكلام ازعل منك والله

هارون : تتذكرين من مرة كتلج انتِ حنينة

زبيدة : هزيت راسي

هارون : اني جنت وما زلت اعنيها انتِ فعلًا حنينة وهالحنية احد الاسباب الخلتني متعلق بيج واحبج

زبيدة : لعد مادامك تحبني احضني بردت

هارون : تعاي

زبيدة : دخلت بحضنه وحاوطت خصرة ، ضلينا نفتر والرمل البارد ويه المي يضرب رجلينا

بحدود النصف ساعة واشتد البرد فاضطرينا نصعد لغرفتنا

فتح هارون الباب ودخلنا لكينا الاضوية مطفاية ، دخلت اني قبله

تمشيت خليت البطاقة واجت الكهرباء ، انداريت على هارون يمه الغرفة تخنك وهي ظلمـ...

هاي شنو !!

باوعت للغرفة صايرة عبارة عن حديقة ورد احمر ، الجرباية مزينة بورد وزينة تجنن

ابتسمت مباوعه لهارون الضام أديه ومنتجي على الباب

انت شنو ؟ لالا حرفيًا على كيفك وياي تريد تموتني
انت تره جسمي ميتحمل هاللڤل العالي من هرمون السعادة

هارون : كلشي مستعد اسوي المهم اشوفج مبتسمة هالإبتسامة التاخذلي روحي يا روحي انتِ

زبيدة : اباوعله تقرب وكف كدامي ودنك بايسني من شفايفي بخفه

هارون : احبج واريد اكمل حياتي وياج ، زبيدة اريد روحي وروحج يتشابكن قبل اجسادنا واليوم

اريد احس إني مالك كل جزء بيج ، روحج ، مشاعرج
شخصج وحتى جسمج

تقبلين تسلميني كل ذني بدون ضغط من احد وبإرادتج

زبيدة : دمعت عيوني وهزيت راسي مبتسمة

ايي ايي اقبل

هارون : صدك زبيدة

زبيدة : اي وطول ما اني بيه نفس يحرم عليه كل رجال خلقة الله غيرك

واول ما ختمت جملتي البسيطة بلفظها والعميقة بمشاعرها قبلني من شفاهي بقوة وقربي عليه

بادلته بنفس القوة واللهفة ، ابتعد عني يفتح حجابي
ذب الحجاب عني ورجع باسني وايده امتدت تفتح
فستاني من وره

بيومها جردني من كلشي ، خجلي ، ترددي ، خوفي ،
وحتى ملابسي

ايدي البريئة اتجهت لقميصه تفتح ازارة متبعه مشاعرها وتاركه حيائها وخجلها

فعل ايدي كان لا شيء مقارنةً بشفايفي الي احتجت وعاندت الهوى متخليه عنه في سبيل تحتفظ بأحساس الحب الدينتقل الها عن طريق شفاف
الرجل الوحيد الحبيه بحياتها

بيومها عرفت شنو معنى إني اكون امرأة ، اترك قوتي
وكل لباس كذاب جنت البسه حتى احمي نفسي وذاتي

بيومها وبين ادين هارون ظهرت زبيدة الاثنى الرقيقة
التبحث عن حضن محبوها تاركة كلشي وظاهرة
على حقيقتها بين ايده

مضت الليلة وطلع الصبح واني داخله بين احضانه اسمع اشهى انواع الغزل والتمس الذ انواع المشاعر

ما اعرف شلون غفيت ولا ادري شوكت غمضت عيني
بس كل الاعرفه إني اخر شي خليت راسي على صدر
هارون العاري وبعدها سافرت لعالم المنام

ثاني يوم كعدت من النوم اثر الهوى الداعبني واني نايمة

فتحت عيني واستوعب الصار البارحة ، اكتسى وجهي بعض الخجل

تحسست خدودي وابتسمت من حسيت بحرارة تطلع منهن

اخذت هيلاية مضغتها واني افر عيوني على أرجاء الغرفة ما لكيت هارون

كمت من الفراش ماخذه روبي التركته البارحة لبسته وتقربت داسد شباك البلكون وتتوقف من شفت هارون

اباوعله باقي بطرك البجامة منطيني ظهره المرسوم بدقة وواكف ديحضر الريوك على الميز المزين بالورد الابيض والاحمر

اندار عليه ومن شافني ترك كلشي بأيده وتقرب مني

احم صصـ صباح الخير

اباوعله حك شواربه ومد ايده خلاها وره راسي وسحبني عليه حيل بايسني من شفايفي ، ابتعد يباوع لعيوني ويتنهد

هارون : صباح الورد يا اجمل ما شافت عيني

**************************************
لهنا يكون خلص البارت ان شاء الله يكون عجبكم ❤️
+لتنسون التصويت والتعليق برأيكم ❤️

شنو رأيكم بالأحداث ؟

شنو تتوقعون حيصير بالبارت الجاي ؟

.