الموت الحي الفصل التاسع وسبعون 79 - بقلم براء الموسوي

مرحبا حبايبي العسل شلونكم ❤️❤️

#الموت الحي
#للكاتبة براء الموسوي

زبيدة : كاعدة اتصفح بموبايلي وشفت هارون يجي من بعيد بأيده اكواب جاي

اجه كعد بصفي وانطاني كوبي ، اخذت رشفه وباوعتله ، عندي سؤال

هارون : جواب

زبيدة : شوكت لحگت تحجز ولتگلي واسطة ماكو واسطة تحصل تذاكر لدولتين بساعتين

اباوعله ابتسم وحك حاجبه

هارون : تردين الصراحة ؟

زبيدة : اكيد

هارون : اني مكمل كلشي وحاجز قبل اسبوعين

زبيدة : فزيت من مكاني لدرجة انجويت وشركت بالجاي

هارون : اسم الله ، اسم الله ، شو اشوف خوما انجويتي ؟

زبيدة : وخرت ايده عني وباوعتله ، عوفك مني ،
ششـ شنو يعني حاجز قبل اسبوعين !!

تنهد وجاوبني

هارون : قبل شهر دريت بأخوج صار زين وبده يشتغل على إجراءات الرجعة وقبل اسبوع بالضبط هو اتصل بجدي وبلغه بموعد رجوعه للعراق بالمضبوط

وطلب منه ميكول لاحد لأن يريد يسويها مفاجأة الكم
واني عن طريق مصادر موثوقة عرفت انج ناوية وره ما يرجع معين تخلي يحاجي جدي حتى ننهي كلشي وتطلعون من البيت

زبيدة : مصادرك الموثوقة ديمة مو ، شفته ابتسم ، ضربت على فخذي اااااخ يالبلبل الفتان ااااخ

والله عرفتها هي لان محد لسانه يفلت ويجفص غيرها ، متعرف تضم نعالها بحلكها غير تموت اذا
سكتت

هارون : ههههه بالعكس تره كلش لطيفة اصلاً هي الي جانت ذيج الفترة كلها تتصل عليه وتطمني عنج والا اني ما احصل من اهلج ونور لا حق ولا باطل

زبيدة : اي وبعدين ؟

هارون : اي فآني بصراحة قررت إني احاجيج واحاول اصلح الامور البيناتنه من اشوفج رغم إني خفت انج متجين

بس ديمة اكدتلي انج راح تجين واني على هذا الاساس رحت حجزت وجهزت كلشي

رغم إني اصلاً ما متأكد اذا انتِ راح تطيني فرصة او حتى تسمحيلي احجي وياج لو لا بس مدري ليش حسيت بوقتها انُ بجيتج هاي راح يتصلح كلشي

وجانت هاي احد المرات القليلة الي امشي بيها على اليملي عليه گلبي مو عقلي والمنطق

زبيدة : واني هيج مبينه سهلة حتى جنت متأكد لهالدرجة إني راح ارضى ؟

حاوط اديه اللازمة الكوب وتقرب مني

هارون : يخسى اليكول هيج ، الله شاهد اني ولا اجه ببالي هيج تفكير

ما اعرف ليش سويت هيج ولا اصلاً سألت نفسي ليش متأكد هيج ، كل الاعرفه إني سويت الشي
الحسيته وبس

زبيدة : ولو رافضة ابقى وانطيك فرصة شجنت راح تسوي ؟

هارون : جنت راح اضل احاول ولأخر يوم بحياتي وحتى لو لا سامح الله اضطريت احقق رغبتج واطلكج هم جنت بعد الطلاگ راح احاول وياج مرة وثنين وعشرة منا لمن ارجعج مرة ثانية لحياتي

زبيدة : واذا محاولاتك ما فادت

هارون : راح اضل وراج منا لمن اموت واذا ما رجعتيلي على كولة ديمة راح اكتفي بشرف المحاولة

زبيدة : احس ارتبكت من كلامه اني ممتعودة عليه يحاجيني هيج

احم عاد زين قبلت اصالحك حرامات تروح عليك هالتكاليف وانت حاجز وتعبان

هارون : فدوتج ما رهمت مرة احجزلج الف ووين ميعجبج المهم تكونين وياي

زبيدة : رفعت الكوب لشفايفي وابتسمت موخرة عيوني عنه

الادبسز شلون خجلني انوب اني طلعت استحي وما اعرف اجاوب

والله زمن يا زبيدة

____________________________________

بصائر : داكل وشلت راسي شفت دنيا وكل الكاعدين يباوعولنا بريبه

نزلت عيوني ، صار انعكاس وجهي على جامة الميز ، باوعت لعيني وتحسرت متذكرة الصار

"عودة "

حليم : صباح الخير

بصائر : ما رديت وهو من شافني صافنه بوجهه وما ارد اجه وكف كدامي

حليم : جاي احاجيج بيج شي ؟

بصائر : فتحت جهازه ودخلت على اخر فيديو ، عليت الصوت ودرت الموبايل عليه

اباوعله كام يبلعم ، من شفته كام يتأتأ ويحاول يبرر لروحه ما تحملت

ذبيت الموبايل على القنفه وگبل كمت صفكته راشدي

وبنفس اللحظة شال ايده ورجعه الي بقوة لدرجة احس فچي تشنج ومع هذا ما هزني شي وبقيت
واكفه بمكاني اخزره

حليم : انتِ شلون تتجرأين ترفعين ايدج بوجهي هيج

بصائر : حاجيته واني ارجف من الشفته ، لك انت الك عين وتحجي هم

شنو هالوقاحة والقباحة الشايلها انت واحد غيرك يدنك راسه ويدفنه بالكاع

عززه شلون متحمل نفسك ، داباوعلك وفكرة وحدة تجي ببالي

هو عادي يكون الانسان قذر لهاي الدرجة ، اني كلشي سامعة بس اجهار وتفاخر هيج بالمعصية مشايفة

انتتت هسه دتزني تصووور ليييييش فرحااان بروحك رجال ودتنامممم وييييييه الساق***

حليم : كافييي انجبي ولتتجاوزين

بصائر : انت الي تنجب وتاكل تبببببن فوكاهاا لك انت من تباوع لروحك بالمراية متلعب نفسك ، اني هسه داباوعلك واريد اتقيء

عجييب شكد وصخ وقذر ونكس ، واني اكول الله ليش دائمًا معرقلك حياتك ومدتشوف توفيق

اثاريك مستاهل لان القذارة والوصخ البيك مستحيل تجذب الرحمة والتوفيق لحياتك

فزيت من صفكني راشدي ثاني

حليم : بتتت النعال كتلج لتتجاوزييين ليش تخليني أمد ايدي عليج واني ما احب اتجاوز

بصائر : نعال اليترس حلكك ياعار الزلم لك تروح فدوة لقندرة ابوية العتيكة ذاك الرجال الشريف الصايم المصلي

منوووو انتتتتت وتنكس شخصه وتجيبب طاررري ااااصلاً ، خنيوة عار الزلم

عطت من جرني من شعري

حليم : والعباس ابو فاضل اذا متسدين البلوعة الفتحيها اسويج جنازة هنا لتخيلي ااذيج واني اخوتج واكفين بعيني

بصائر : ولك همه لو صدك واكفين بعينك ما خدعتهم وضحكت عليهم ، واكفين بعينه ابو العرك ابو النسوان

دفعته وخرررر وايدك اكسرها اذا تمدها عليه بعد مو تايهتلك اني عندي اخوه اذا يمسني الهوى يگلبون الدنيا

مشيت من يمه وجسمي يتراجف مثل السعفه ، فتحت كنتوري وكمت البس بالصاية عسما اطلع بطرك روحي ما ابقى عنده هالحيوان هذا

حليم : وين موليه

بصائر : ما علييييك خليييك ملتهي ويه گ****

شلت جنطتي وموبايله بايدي ، اني اعلمك اذا ما افضحك فضيحة واخلي اخوتي يدكوك بالنعال اني مو بصائر

انتبهتله شاف الموبايل بايدي ركض عليه واني بسرعة فتحت الباب وركضت على الدرج وهو يركض وراي

حليم : اوكفييييي راح تكعدين اهلي وتسويلي هوووسه بتتت القندرة

بصائر : ما رديت عليه ضليت اركض ، اخر شي جرني من صايتي وحصرتي بنص الدرج

كمت اصيح وهو صم حلكي وجرني للغرفة وسد الباب

حليم : سكتي فضحتينا الله يفضحج

بصائر : وخرررر

حليم : جيبي الموبايل

بصائر : مااا

حليم : جيبيييي كلت

بصائر : دوليي

عطت من مطلني بالكاع وحاول ياخذه ، انطويت على روحي وضميته بين رجليه وهو تسودن

حليم : جيبيييي الـ***

بصائر : شبيك صفريت تخاف خاف اطلعلهم سوالفك المكسرة وخياساتك

خليهم يعرفوك على حقيقتك ويشوفون وجهك الثاني

حليم : تجيبين الموبايل لو لا

بصائر : كلت لا

حليم : خوش لعد اني اعرف شلون اخذه منج

بصائر : ااااخ شاغت روحي ، الجلب عضني ومن كد ما توجعت ما تحملت جريته من شعره

حليم : شعري ولج شعري

بصائر : بس شفته شال راسه ، طلعت الموبايل وركعته على حلكه

حليم : لا يا *****

بصائر : كمت على حيلي من شفت حلكه فاض بالدم

والله برد كلبي ، رغم اني ابد مو هذا طبعي ولا من النوع العدوانية بس من حرگة گلبي مدري منين اجتني القابلية اضربه هيج

اباوعله كام حاط ايده على حلكه

حليم : بسيطة اني الج

بصائر : الصار بيك هسه لا شيء من الحسيت بي اني

ما تحملت گبل نزلت دموعي ، الله لا يوفقك بيش مأذيتك اني اشو انت الخطبتني واجيت عليه مو اني الجبرتك

اذا تدري بروحك خاين ومتتحمل تبليني بيك ليش

حليم : اكلج لتسويلي روحج كلش علساس يعيني انتِ خذتيني مخدوعة بيه لو متدرين بماضيي

بصائر : لك انت شنو الكباحة الشايلها ، يعني اني شكد شايفة ناس مستحي بس مثلك لا والله ما شفت

حليم : اسمه واقع مو كباحه

يعني من ماخذه واحد متعود يلعب اشكال الوان شمتوقعه مثلًا بيوم وليلة يكعد عليج ويبطل كلشي

بصائر : وانت اذا تدري بروحك متكدر تبطل بيوم وليلة المننننن عرستتت

حليم : الكلام هذا وجهي لنفسج ليش اخذتي واحد عنده ماضي سيء وانتِ ما ناقصج شي ؟

هذا الزواج محد جبرج عليه اني خطبت وانتِ قبلتي فلتضلين تلغين زايد وتسويلي روحج المظلومة المخدوعة

بصائر : مسحت دموعي وباوعتله ، اني راح اروح لأهلي واريد ورقة طلاقي توصلني لهناك وخلقتك اصلاً ما اريد اشوفها

حليم : شوفي بصائر انطيها الج من الاخير اني مال اطلكج هسه واخرب العلاقة البيني وبين اخوتج لو اموت ما اسويها

واصلاً اذا رجعتي هسه لأهلج راح تأذيهم قبل لا تأذين نفسج لان وحسب فهمج انتِ بعدج عروس فمن تتطلكين وانتِ حتى نص سنة ما صارلج

عبالج الناس راح تفوت حالج لو حال اهلج ، انتِ تقبلين يطعنون بيج وبشرفج وتربية اخوانج الكبروج وتعبو عليج ؟

امج راح تتحمل حجي الناس وهمه يكولون ياا خطية تطلكت وبعدها عروس واني وياج ندري احنه بمجتمع احب ما على گلبه يذب اللوم على المرة

كلها راح تكول هي لوما مسويه شي ما جان رجلها طلكها محد راح يكول رجلها شمسوي وقررت تطلك منه

اني كاعد احجي لمصلحتج ، صبري عليه وعلى نفسج
وان شاء الله حالنا حال كل الازواج ويه مرور الوقت نتأقلم ويه بعض

وهم حطي ببالج انُ امج وامي علاقتهن كلش قوية وطيبة وابويه واخواني يحسبون اخوتج منهم وبيهم فحريمة تجين انتِ من بعد هالسنين تخربين هاي العلاقة الحلوة بسبب سوء اختيارج

واني لخاطر اخوتج اوعدج راح احاول ابطل الشغلات هاي بس محتاج وقت

اعتبريني مدمن وكاعد اتعالج

كعدي ويه روحج وفكري بكلامي زين ، اني طالع واعتذر لان مديت ايدي عليج ، اخذي راحتج

بصائر : عافني وطلع واني واكفه بمكاني استرجع كلامه

كلام الناس عمره ما همني ولا فكرت بي بس الوكف بعيني اهلي ، اذا رجعتلهم واني صارلي شهور قليلة من متزوجة شراح الناس تحجي عليهم ؟

وصدك هو بالنسبة للناس رجال ماعليه عيب واني الراح اطلع موزينة واهلي الراح يطلعون موخوش اوادم وما عرفو يربوني

انتِ وين ذبيتي روحج والمن جازفتي ، هو هذا الكسرتي حجاية اخوج واخذتي ؟

"عودة للحاضر"

يحيى : بابا بصائر

بصائر : فززني صوت عمو ، باوعتله ، هاا عمو تفضل

يحيى : ليش ما جاي تاكلين ؟ وشبيها عينج

بصائر : لا جاي اكل بس شويه شردت وعيني البارحة من كعدت على الصلاة كمت واني مغمضة فانضربت

رميم : شوف سودة عليه عينج رايحة ، خوما توجعج

بصائر : لا حبيبتي خالة اسم الله عليج واصلاً مداحس بألم

يحيى : عذريني بنتي اذا جاي اتطفل عليج بس احسج مو طبيعية ، اكو شي تحبين تحجي

بصائر : اي والله عمو

يحيى : كول حبيبتي كلنا هنا اهلج ونسمعج

بصائر : والله عمو كل ما بالموضوع اني اريد اروح لأهلي لان كلش مشتاقتلهم وهم اريد اغير جو مختنكة من اجواء الدراسة

باوعت لحليم الغص بالأكل

حليم : احم شعدج رايحتلهم مو ذاك اليوم شفتيهم

يحيى : شكو بيها بويه خلي مرتك تروح تشوف اهلها همه هم الهم واجب عليها ولازم تزورهم وبعدين انت
عبالك كعدة ساعتين تلاثة تكفي

خليها تروح تغير جو وتشوف اهلها

حليم : هاا اي على راحتها

بصائر : كملنا اكل واني كمت صعدت فوك وهو دخل وراي وطبك الباب حيل

حليم : احنه شتفقنا ، مو كلتي بطلتي وراح تبقين ومتحجين شي شنو تضحكين عليه حضرة جنابج

بصائر : اخذت ملازمي وكعدت ، داحاول ابتعد ولو جم يوم مداتحمل اشوف خلقتك كدامي

خليني اروح بلكت ارتاح شويه ولتخاف ما راح احجي شي ومو لسواد عيونك علمود لا اكسر بأخوتي واقهرهم بصاحبهم الطلع زبالة وهمه ميدرون

حليم : راح اسوي نفسي ما سمعت اخر جملة

بصائر : اخر همي

حليم : على كل حال روحي براحتج بس غير الـ3 ايام متبقين هناك لتجيبلنه الشبهه

بصائر : عندي دراسة لو تكعد بدون لتطلع صوت لو تطلع بره وتجفيني شرك

طلع بره واني نزلت دموعي ومسحتهم بسرعة مو وكت بجي هسه عندي امتحان

فتحت الملزمة وكعدت اقره بس اجذب اذا اكول قريت لو افتهمت شي

بالي سارح ومو يمي وياريته لو سارح بشي يريحه
كله قهر بقهر

___________________________________

زبيدة : باوعت للساعة وخليت راسي على جتفه

هارون : نعستي ؟

زبيدة : غمضت عيوني وهزيت راسي ، حسيت بي يشابك ايده ويه ايدي ويرفعها يبوسها

هارون : يله هانت ما بقى شي بعد ساعة على طيارتنا

زبيدة : هم راح نطلع لقطر ومناك نسافر لإيطاليا مو

هارون : اي

زبيدة : وشكد يرادلنا حتى نوصل

هارون : يعني من قطر لميلانو يمكن 6 او 8 ساعات تقريًبا

زبيدة : فتحت عيوني و ابتسمت مباوعتله ، حنروح لميلانو يعني

ابتسم وجاوبني

هارون : تحبيها ؟

زبيدة : هواي ، بس شعجب مو لـ*****

هارون : ما اريد نروح لمكان انعرف بي وبعدين اني رايح وماخذج حتى نتونس مو حتى اضل اشتغل والتهي عنج

هاي السفرة الي والج ، لا اريد اتواصل ويه احد ولا التقي بأحد ولا حتى اشتغل ، اني وانتِ وبس

فهمتيني ؟

زبيدة : ابتسمت وهزيت راسي ، رجعت روحي على جتفه اكلب بموبايلي

نص ساعة وكمنا سوه نكمل الإجراءات حتى نطلع بالطيارة ، لازمة ايده ودامشي وانتبهت على جوازي
الطلعه من جيبه

وكفت وهو اندار عليه

هارون : ليش وكفتي ؟

زبيدة : لحظة لحظة ، صدك انت جوازي مالت السفر ومستمسكاتي منين جبتهن ؟

ياا شبيك تضحك ؟

هارون : اسف بس ديمة من اجتج قبل فترة وصيتها تجيبهن الي وطلعت سباعية وجابتهن

زبيدة : بشرفك ؟

هارون : هههههه والله

يله امشي راح نتأخر

زبيدة : مشيت ويا واني صافنه على روحي شكد مطية يعني ديمة اجت واخذتهن واني اصلاً محاسة

عفية ثول ، يا فشلة الفشلة يعني ديمة الفاهية طلعت احسن مني ، هههه عزه لعد شكد جنت مثولة ذيج الفترة

كملنا كلشي وصعدنا ، جانت طيارتنا الصبح فأول ما صعدنا اخذنا مقاعدنا

اني وهارون كعدنا سوه اباوعله شال الحاجز البين مقعدي ومقعده ، طلع غطه خفيف غطاني و طفه الضوه مأشرلي

هارون : تعاي

زبيدة : ابتسمت ودخلت بحضنه ، بسته من صدره وغمضت عيوني وغفيت

كعدنا اني ويا وكت وصول الطيارة لقطر ، نزلنا تريكنا بالمطار لان ما اكلنا بالطيارة وكعدنا ننتظر الطيارة

3 ساعات ونص ياله وصلت الطيارة واخذتنا

هارون : جوعانة تردين اطلبلج الغدة

زبيدة : لا مو هسه ، شنو رأيك نشوف فلم وناكل نمنمات هم نضيع وقت ونتونس مدامنا شبعانين نوم

هارون : يله

زبيدة : طلعت ايبادي ودخلت على سينمانا ، جنت منزلة افلام اجنبية ومصرية ممخلية شي يعتب عليه

درت القائمة عليه ، شتريد نباوع ؟

هارون : اي شي بكيفج

زبيدة : والله انت فلا تسوي واهس صوجي اني سألتك

هارون : احم شو جيبي

زبيدة : اخذ الآيباد من ايدي وكام يگلب بي

هارون : هذا الفلم

زبيدة : اكس لارج ، شايفه ؟

هارون : لا بس احب الممثل ، حلو ؟

زبيدة : يخبببببل احلى ما اختاريت ، عدلت الايباد ، جيب علاكة النمنمات

اخذت منه العلاكة طلعت جبس وشامية فتحتهن وخليت واحد بحضنه والثاني بحضني

فتحت الفلم وكعدنا نباوع وناكل ، عبرت ساعتين واحنه كد ما مندمجين حتى ما حسينا على الفلم من خلص

هارون : طبعًا منتبهلج هواي تحبين تتابعين مصري

زبيدة : امم كلش تعجبني اجواء افلامهم همه والهنود

صح الهنود يبالغون بأفلامهم شويه بس للأمانة تمثيلهم مقنع ويجنن ، هيج تحسهم يمثلون بمشاعر لدرجة اني الما ابجي بسهولة من اتابع افلامهم كلش اتأثر وابجي

تدري اكو فلم مصري اسمه زهايمر بكد ما هو حلو ويضحك بكد مابي لقطات تقهر وتبجي

شبيك هارون ليش دتباوعلي هيج تره وترتني

هارون : عيونج اليلمعن من الحماس ، اديج التحريكهن وانتِ تسولفين ، الابتسامة التزين شفايفج دلالة على استماعتج وانتِ تحجين

كل ذني يجذبني بيج اكثر من الحديث نفسه ولهالسبب تشوفيني مندمج وياج دائمًا واباوعلج هيج من تحجين

زبيدة : انت ملاحظ نفسك بيوم وليلة صرت رومانسي
واني هالشي مديركب ويه الصورة الراسمتها عنك

هارون : اني مو رومانسي بس احبج

زبيدة : بلعت ريكي وعضيت شفايفي مبتسمة ، احم اكلك شو اني احس روحي نعست ، انت ما نعست

هارون : لا نعست تردين ننام ؟

زبيدة : لا اريد اضغط على روحي شويه وااجل النومه لحد من نوصل

هارون : طيب شتحبين نسوي شي ثاني نمضي بي الوقت ؟

زبيدة : شنو رأيك نشوف بعد فلم ؟

هارون : ماكو مشكلة

زبيدة : ابتسمت وانطيته الآيباد يله اختار

_______________________________________

ديمة : وصلني السايق للباب ، سلمت على البنات ونزلت

فتحت باب البيت ودخلت ، نزعت حذائي بباب المطبخ وشلتها

صحت واني ادخل جوه وييينج گلببببب انييي اجيييت شمسويتلنااا غده اليوم تره مييييته جـ...

سكتت من شفت بصائر بوجهي ، كاعدة بالصالة يم خالة

سلمت بالمطلق ، السلام عليكم

هناء : هلا يمه حبيتي وعليكم السلام ، الله يساعدج

ديمة : حبيبتي خالة ويساعدج

اني حطب اسبح وابدل واصلي علما يجي اسلام حتى نتغدة سوه

هناء : براحتج يمه

ديمة : دخلت لغرفتي طلعت لروحي ملابس ودخلت للحمام سبحت وطلعت صليت بغرفة خالة

كملت ورحت للمطبخ ، فتحت الجدورة لكيت خالة مسوية بامية وتمن

شكد ما اني ميته جوع بس انسدت نفسي من شفت بصائر ، ما ادري ليش من بعد اخر موقف صار بيني وبينها وكت المدت ايدها عليه

واني كمت احسها شي وجوده يهدد راحتي وسعادتي رغم هي من زواجها لسه ما اجت وبقت عدنه بس اني مدري شبيه ممرتاحة

تنهدت وسميت بسم الله ما اريد انكد على نفسي ، خليت الاكل على النار وطلعت اخذ السفرة حتى من يجي اسلام گبل اصب

هناء : ليش ما صحتيلي يمه اني اكوم

ديمة : شنو السالفة خالة ، فرشت السفرة وطلعت انقل الخضرة والزلاطة

سمعت الباب ينفتح عرفت اسلام اجه ، اباوعله دخل وبس شاف بصائر ذب مفاتيحه وركض حضنها وهي گبل بجت

اسلام : لج بذاته مشتاقلج

بصائر : ليش ما اجيت اول البارحة لبيت النوح ، عبالي اشوفك والله مشتاقتلك

اسلام : استحيت اجي ، عوفج مني طمنيني شلونج شخبارج هذا رجلج الدايح شلونه

بصائر : مسحت دموعي وباوعتله الحمدلله ويسلم عليكم

اسلام : الله يسلمه وبعدين ولج ليش جاي تبجين

بصائر : مشتاقتلكم وكلت اجي ابقى يمكم جم يوم

اسلام : اي كل الهلا بيج بيتج ولج هذا المن تكليلنه

ولج باربي وينج وين صار الغدة متنه جوع

ديمة : يله رايحة اصب ، دخلت للمطبخ صبيت الاكل ، نقلته وكعدنا نتغدة

اسلام : اي هاي مرگة مو مرگتج الشايطة

ديمة : احترم نفسك غير داتعلم وبعدين شبيها مرگتي تخبل ، هاا خالة

هناء : تخبل والله خلي يولي يمسلت وحدة هذا

بصائر : شنو ديمة كايمه تطبخ

هناء : اي بعد گلبي ايدها بأيدي بكلشي بالبيت حتى الطبخ هي بالعطلة تسوي الغدة والعشه ممقصرة فدوة لكلبها

اسلام : اي والله صح مركتها شايطه بس مدللتنا دلال
ورد ديومه

بصائر : اي الله يهديها

ديمة : من شفتها علقت بأستهزاء غلست وما رديت عليها ، انتظرتهم يكملون اكل كمت لميت السفرة اني واسلام هي ضلت كاعدة

صبيت جاي للكل ورحت اغسل المواعين ، كملت المواعين وحسيت باحد يدخل للمطبخ

انداريت شفت بصائر شايله صينية الجاي وجايه ، خلت الصينية على الميز وكعدت

اني تجاهلت وجودها ورجعت امسح بالطباخ

بصائر : شعجب رجعتي على حسب علمي اخويه طردج من البيت

ديمة : جاوبتها واني مطيتها ظهري ، اخوج ما طردني وحتى لو طردني اني ويا بيناتنا نتجازة

نتعارك نتصالح نتمالخ من الشعر رجال ومرته محد اله حق يتدخل ويتطفل على حياتنا الشخصية

بصائر : عود عبالج يعني هاي السوالف راح تنفع

ديمة : تنفع او متنفع انتِ معليج

بصائر : صاير عندج لسان وتعرفيم تردين

ديمة : ذبيت الوصلة وانداريت عليها ، اسمعي بصائر انتِ اجيتي وحتبقين هنا كل الهلا بيج اني مالي اي حق اكلج ولو كلمة بهذا الخصوص

بس علاقتي اني وامين خليج بعيدة عنها ، انتِ من يوم الي تزوجتي واني داعافر حتى اعيش بسلام
ويه امين وخالة واسلام

والف الحمدلله عايشة بهدوء وسلام مو طبيعي فالله يخليج فكي مني وعوفيني بحالي لو اكلج اعتبريني ما موجودة لطفًا منج وهذا رجاء مو طلب هم

عفتها وطلعت صاعدة فوك اخذت ملابس امين من المحجر ونزلت

هناء : متنامين يمه شبيج مو ستوج جايه

ديمة : ماعندي شي خالة هسه بس ارتب ملابس امين وانام

هناء : جيبي اني اعدلهم امشي ارتاحي ولج البارجة للصبح كاعدة تقرين

ديمة : لا يخالة شسالفة ماعندي شي انتِ ارتاحي

دخلت للغرفة وسديت الباب ، كعدت بالگاع ارتب ملابسه

طبعًا من رجعت للبيت ولليوم اني حريصه على كلشي يخص امين ، ملابسه ، اكله ، الغرفة كلشي كلشي

ملابسه كل يوم اغسلهن واكويهن واعطرهن واعلكهن احذيته كلهن امسحهن واصبغهن واعوفهن على صفحة حتى من يريد يطلع يلكه كلشي حاضر

وبصراحة اكتشفت إني من داعتني بي كلش دارتاح

حسيت الباب تنفتح ، شلت راسي شفت امين يدخل للغرفة

وكالعادة من يشوفني يتجاهلني ، اباوعله نزع قميصه شمره على الجرباية وبقه بالفانيله الداخلية وراح يطلعله ملابس

كمت من مكاني ، عوف الكنتور هياتهن ملابسك حضرتهن الك ، شلت التراك خليته بأيده

تفضل واني شويه وحروح احضرلك الغدة

نتر الملابس من ايدي وطلع ، طلعت ورا حميت الاكل اله ومن طلع صله واني صبيتله

كعد يتغده واني منتجيه على ايدي واباوعله ، فزيت من طبت بصائر للمطبخ

بصائر : سلاااام

امين : هاي شنو بصورة ، حبيبتي هاي شوكت اجيتي

بصائر : بوسته وحضنته بعد عمري انت ، اليوم الصبح أجيت

امين : لعد ما خابرتيني حتى اخذ اذن وارجع من وكت

بصائر : مو مهم يگلبي ، اصلاً اني باقيه هنا هالجم يوم

امين : شعجب حليم خلاج صارلي شهرين اتوسل بي يجيبج وميقبل

بصائر : صدك

امين : والله طايح الحظ اكله جيبها يگلي ما شبعتو منها عوفوها

بصائر : هااا اي هههه هو خطية كلش حاير بيه ويخاف لا اطلع والتهي عن دراستي

امين : اي حبيبتي حقه هاي سنتج الاخيرة وبالعكس تصرفه عجبني حلو حرصه على دراستج ومستقبلج

بصائر : اي ، يله حبيبي اعوفك ترتاح اني حروح اتمدد يم امي

امين : براحتج حبيبتي

ديمة : راحت بصائر واني شلت الصينية غسلت المواعين وطلعت حتى انام ، فتحت غرفة خالة لكيت بصائر نايمة بحضنها تبجي

بس دخلت عاطت بيه

بصائر : طلعي بره اني اريد اسولف ويه امي وحدنا

هناء : انجبي واحترمي نفسج بصائر ما مسموحلج تحاجين ديمة هيج

تعاي حبيبتي ما عليج بيها

ديمة : لا خالة على راحتكم ، طلعت وسديت الباب بسرعة

رحت لغرفتنا اني وامين ، فتحت الباب ودخلت لكيته يشرب جاي ويدخن

بس شافني اشرلي بأيده

امين : خير ؟

ديمة : بصائر نايمة يم خالة وما اريد انام هناك وازعجهن

امين : والمطلوب هسه شنو

ديمة : عادي انام هنا

امين : لا مو عادي

ديمة : باوعتله وهزيت راسي ، رحت تمددت بصفه وتغطيت ، حسيت بي يدغني

امين : وييين

ديمة : انداريت عليه ، اسمع تره تعبانه ومنايمه من البارحة واريد انام حتى اكعد اقره

فعوفني اناملي ساعة واعوفك لان عيوني ديلزكن من النعاس

امين : كومي طلعي بره

ديمة : اوك اسفه ، كمت على حيلي ودنكت سويت روحي كلش مقهورة

اعتذر لان زعجتك بس اني صدقً جنت تعبانه ومحتاجة ارتاح بس مدام انت مقابل هاهي حطلع

انداريت اخذت صايتي وحجابي وكمت امشي تاتي تواتي ما اريد اطلع والله حوكع من التعب

فتحت الباب ، توقعته حيصيحلي بس مصاحلي والظاهر تصرفاتي اصلاً مأثرت بي

صدك استهضمت بحيث سويتها صدك وطلعت ساده الباب وراي

طبيت للمطبخ ، كعدت على الميز وسندت راسي على اديه وبجيت

اني شكد داتعب وكلشي مداحصل ما بقى شي مسويته حتى ارضي وماكو اي تحسن تعلاقتنا

صارلنا شهور واكفين بنفس النقطة اني احاول وهو يصد حرت شسوي حتى اعتذر منه وماكو فائدة

انوب اني منا تعبانة والبارحة كاعدة للصبح واجتني بصائر سمعتني حجي مثل السم وچملها عليه امين

يعني ياربي اني مو وعدتك حمشي عدل واسوي كل الاكدر عليه في سبيل ارضي امين واكفر عن غلطي
ليش مدتساعدني

معقولة غلطي لهالدرجة مينغفر ؟

ضليت كاعدة ابجي منا لمن غفيت بدون لا احس على نفسي واني كاعدة

فترة وحسيت بايد تحركني ، فتحت عيوني شفت امين كدامي ، كعدت عدل ومسحت عيوني الكامن يحركني من البجي

صفنت من شفته شال ايده خلاها على راسي وكام يمسح على راسي

امين : هاي ليش نايمة هنا

ديمة : رجعت نزلت دموعي ، درت وجهي عنه

غير انت متريدني

امين : منو گال

ديمة : انت

سحب وجهي عليه ودنك صار بمستواي ، مسح دموعي وعدل شعري

امين : دكومي نامي بالغرفة وكافي لتبجين

ديمة : لا ما اريد ازعجك

امين : كومي كتلج

شو اطيني ايدج ، يله

ديمة : باوعت لايده المادها ، صدك ؟

امين : والله ، يله

ديمة : لزمت ايده ومشيت ويا ، دخلنا للغرفة وهو سد الباب

امين : يله امشي نامي

ديمة : تمددت وهو اجه غطاني ونام بصفي منطيني ظهره

ابتسمت بداخلي وشكد تمنيت احضنه مثل قبل بس ما ردت اضوجه

تغطيت زين وغفيت

شويه وكعدت على صوت طكطكته وهو يبدل ، فتحت عيوني ودخل الضوه بعيني عماني عمي

امين : رجعي نامي هسه اطلع واطفي عليج الضوه

ديمة : فركت عيوني وكمت وكفت ورا وهو اندار عليه ، مدري شلون تجرأت ووكفت على اطراف اصابعي بايسته من شفايفه

شكراً لان خليتني انام يمك

__________________________________

زبيدة : وصلنا لإيطاليا ميلانو بالتحديد

نزلنا من الطيارة كملنا الإجراءات واخذنا جنطنا وطلعنا

هارون : تفضلي عيني السيارة تنتظرنا

زبيدة : Grazie caro (شكرًا حبيبي)

هارون : دصعدي ام لسان

زبيدة : ههههه شبيك خليني داخله بالمود

هارون : ههههه براحتج عيني براحتج

زبيدة : ضحكت و مشيت ويا ، صعدنا بالسيارة الي طلع هارون مستأجرها من فندق المنتجع الحنكعد بي

حرك هو واني انداريت اباوع للمدينة ، وصولنا صار المغرب يعني كلشي ممبين

بس مع هذا انارة الشوارع وجمال الناس يشع منها

اكول انت هم عندك معارف هنا

هارون : اي صديقي امير اهله ساكنين هنا واني طلبت منه يتواصل وياهم حتى يحجزولي وهمه ما كالو لا

زبيدة : اشو جماعتك كلها بالخارج

هارون : اي هو اني تعرفت عليهم من سافرت وكمت اشتغل بـ*****

احنه الاربعة الوحيدين الچنه عراقيين هناك ومثل منكول لان چنه من بلد واحد تراهمنا

ومع مرور السنين كل واحد بينا شاف حياته واستقر
زياد تزوج افتكار واستقر هناك

وامير مسقط راسه روما ومن كبر حب وحدة من الدولة الاخذتج الها وتزوجها وعاش وياها هناك واني يمج وعمار ويه زياد

زبيدة : شعجب شو ولا واحد من جماعتك مستقر بالعراق

هارون : اي مو كلهم اهلهم مستقرين بره فشعدهم بالعراق

زبيدة : يعني مفكرو فد يوم يجون يزورو

هارون : لا بالعكس دائمًا يجون ويه اهلهم خصوصاً امير كل سنة بمحرم يجي ويه مرته واطفاله للعراق

يخلص محرم وصفر وبفرحة الزهراء عليها السلام يرجع

زبيدة : الله شكد حلو

هارون : اني لو السالفة

زبيدة : هههههه صراحة

هارون : اكيد

زبيدة : انت

هارون : شو تعاي ابوسج

زبيدة : ابتسمت وتقربت عليه ، حاوط خصري واندار باسني من خدي حيل وحضني

رجعتله البوسة

هارون : بوسيني بعد مشتاقلج من تلزكين

زبيدة : يعني اني لزكة ؟

هارون : والعباس ابو فاضل انتِ اللزكة الوحيدة الما اتمناها تعوفني

زبيدة : ضحكت وبسته تلث بوسات من خده وركبته ياله رجعت لمكاني

ايدي بايده وعيوني تباوع على الناس من الجامة

شويه ووصلنا للمنتجع ، ركن هو السيارة ونزلنا داخلين لجوه

اششه باردة

هارون : تعاي

زبيدة : حاوطني بإيده ودخلنا لصالة الإستقبال

انطه هارون بطاقة الحجز والاسم واستلم رقم وكارت الجناح

هارون : يله زبد

زبيدة : زبد ؟ واو

هارون : يعني لازم تعلقين هسه دعوفيني

زبيدة : ههههه لالا خلص دلعني براحتك يا گلبي انت

حضنت ايده ومشينه للمصعد ، صعدنا للطابق البي جناحنا لان حسب الفهمته من هارون ما حجز غرفة
حجز سويت كامل

يكول حتى ناخذ راحتنا اكثر

طلعنا من المصعد ومشينه لإتجاه السويت مالتنا ، فتح هارون الغرفة ودخلنا

دخل هو واني طبيت ورا ، اباوعله ذب القمصلة مالته واندار فاتحلي اديه

هارون : تعاي شبگيني

زبيدة : سديت الباب وركضت شمرت نفسي بحضنه

هارون : كسريلي ضلوعي

زبيدة : حاوطته بقوة ، حسيت بي يشمني

هارون : افيييش يا يابه شكد تحسرت على هذا الحضن

باوعيلي شو خلي اشوفج

زبيدة : بعدني عنه ولزم وجهي

هارون : دخيل ربج شنو هذا الجمال

زبيدة : ابتسمت من حرك انفه على انفي وباسني من شفايفي

حاوطت ركبته وبادلته

ولأول مرة قبلتنا اني ويا تكون حميمة لهالدرجة ، وصلت لمرحلة ورغم انقطاع انفاسي الا إني ما اريد ابتعد

ولوما حاجتي للهوى فلا اسحب نفسي عنه

ابتعدت اتنفس وشفايفي ملاصقة لشفايفه

هارون : احبج زبيدة اموت عليج

زبيدة : اني هم اموت عليك ياروحها لزبيدة

باسني بخفه وابتعد مبتسم

هارون : تعاي وياي اراويج شي

زبيدة : مشيت ويا ، فتح البردة واشرلي

هارون : شوفي الجمال

زبيدة : دخلت للبلكون واول ما شفت البحر من بعيد كدامي

ابتسمت من حاوط خصري وحضني ساند راسه على جتفي

هارون : شنو رأيج

زبيدة : ااالله هارون المنظر ياخذ العقل ، اخذت نفس وعقجت عيوني لان الهوى بارد احسه جمدني

بس مع هذا الاجواء تجنن

هارون : ادري بيج تحبين البحر هواي وحبيت اخلي صباحج ومساج يتزين يأكثر شي تحبي

زبيدة : ملت عليه وبسته من خدة ، ما احتاج شي يزين صباحي وانت موجود

هارون : خجلتيني

زبيدة : ههههههههه ليش انت تخجل

هارون : يعني شويونه

زبيدة : ههههه والله يهارون ينطيك العافية ضحكتني

هارون : any time wife

زبيدة : حبيبي الـ soul والـlung انت

هارون : هههههه حلوة هاي

زبيدة : السالفة لو اني

هارون : صراحة

زبيدة : اي

هارون : السالفة

زبيدة : دفعته عني ، شكد سخيييف

هارون : هههه تعاي تعاي اشاقه والله

زبيدة : ضحكت دطب ثلجت من البرد تره

دخلت جوه علكت التدفئة وهو دخل وسد البلكون ورا

هارون : طبي سبحي وبدلي ملابسج واني راح اكعد انتظر جنطنه توصل وادخل وراج

زبيدة : تمام ، اخذت جنطتي الصغيرة الجنت شايلتها على ظهري ودخلت للحمام

جنت حاطة بيها تراك شتائي خفيف ومجموعة داخليات وغسولات وفرشة ومعجون وموبايلي والايباد

طلعت منها الملابس ودخلت للحمام سبحت وطلعت انشف بشعري

باوعت لهارون لكيته واكف ديطلعله ملابس الظاهر خدمة الغرف جابولنا الجنط

هارون : نعيمًا

زبيدة : حبيبي الله ينعم عليك ، يله ادخل اسبح

هارون : هذا العشه وصيته وجابو النه اذا جوعانه بلشي اكلي

زبيدة : لا حبيب انتظرك روح اسبح واني حصلي علما تكمل سبح

هارون : تمام

زبيدة : راح هو واني فتحت جنطتي اخذت السجادة والچادر لبستهن ووكفت اصلي حسب القبلة الي حددتها الي بوصلة الموبايل

كملت صلا وكمت سحبت الجنط حطيتهن على صفحة ورتبت ميز الطعام

شفت هارون يطلع ، هاا حبيبي نعيمًا

هارون : الله ينعم عليج حبيبـ... حبيبتي

زبيدة : حسيته متردد وهو يكولها شلون المستحي لهذا ما علقت

يله تعال خلي ناكل تره اني ميته جوع

هارون : يله اجيت

زبيدة : كعدنا نتعشه وندردش

اكول هاروني

اباوعله تنهد وعاف الاكل يمسح على شواربه

هارون : زبيدة رجاءً لتدلعيني بعد

زبيدة : ليش شبيها ؟

هارون : لا مابيها شي بس شايفه روحج من تحورين اسمي شلون يطلع يلعب النفس

زبيدة : هاا اوك بس شلون اني احب ادلعك لازم اطلعلك اسم

هارون : تكدرين تدلعيني بغير طريقة

زبيدة : صغرت عيوني مباوعتله ، يا نوع من انواع الدلع حضرتك تقصد

هارون : ما اقصد شي بس افضل النوع الاجه ببالج

زبيدة : انت منحرف

قرب الخبزة خلاها بحلكي

هارون : منحرف بالحلال

يله اكلي حتى نكوم ننام لتخلين مخططاتي تخرب واني كوه مسيطر على نفسي

زبيدة : ما فهمت

هارون : وهذا المطلوب ، الحمدلله دايمة ان شاء الله اني كايم اصلي واتمدد

زبيدة : لميت الاكل الزاد خليته بالثلاجة ، عزلت الميز ورحت تمددت

اااخ يمه ظهري تفلش من مقاعد الطيارة ، يمكن اذا اريد انام هسه فما راح اكعد غير بعد يومين على التعب التعبته

من محافظتنا لاربيل ومن اربيل لقطر ومن قطر لإيطاليا هلاك بكل ما تحمل الكلمة من معنى

حسيت بثكل يطيح عليه والله فزيت فزة ، نعلعلا بليسك خرعتني

ما جاوبني فتح اديه ، خله راسه على صدري وحضني

بشرفك هارون هو مو المفروض اني الانام بحضنك شو انكلبت الآيه

هارون : اشش انجبي خليني مرتاح

زبيدة : امري لله حاوطته وبسته من كرعته ونمت

ثاني يوم كعدت على صوت موبايلي ، فتحت عيوني واخذته

شفت خواتي متصلات مكالمة فيديو ، باوعت لمكان هارون ما لكيته يمي

فتحت المكالمة وابتسمت اول ما صاحن خواتي

ديمة : هلاووو زبد الحمدلله على السلامة گلب

دنيا : هاي شنو الابتسامة والخدود المتفحه من الصبح

زبيدة : صباح الخير

ديمة : هو مبين صباحج خير

بعد گلبي شنو هاي الكفشه بشرفج بس لا نسيبي المكرود صبح على كفشتج

زبيدة : عدلت شعري ، دمشي لج الصفرة عود تقلد

ديمة : هههههه لا لا اشاقة طالعة تخبلين بس مو جنج مكسرة اليوم

زبيدة : فهمت قصدج ادبسز

دنيا : ديمة متهيلكه

زبيدة : ملاحظة هالشي

ضليت اسولف وادردش وياهن شويه وراحن بعد ما اطمئن عليه ، سديت الموبايل وتمغطت

باوعت للساعة لكيتها بالعشرة الصبح حيل شكد نمنا لعد الله ليجذبني يمكن صارلي فوك الـ13 ساعة غافيه

كمت من الفراش واني اتصل على هارون ، باوعت لكيت جهازه على الميز

رحت للحمام دكيت الباب ما لكيته ، غسلت وطلعت انشف بوجهي وكفت كدام ميز التواليت دارطب وجهي وشفت ورقة ملزوكة على المراية

اخذتها وقريت محتواها

"صباح الورد "
"لبسي شي يساعد بالحركة وتعاي على هذا المكان سألي موظفة الإستقبال وتدليج

هارون

ابتسمت ورجعت الرسالة بمكانها ، رحت لبست بنطرون وهودي اسود رهمت ويا حجاب ، اخذت مستلزماتي ونزلت سائلة الموظفة عن المكان وفعلاً
دلتني عليه

رحت للمكان الجان يطل على البحر اهرول واول ما وصلت لهناك شهكت

يااا هاي شنو ؟!

*****************************************
لهنا يكون خلص البارت ان شاء الله يكون عجبكم ❤️
+لتنسون التصويت والتعليق برأيكم ❤️

شنو رأيكم بالأحداث ؟

شنو تتوقعون حيصير بالبارت الجاي ؟

.