الموت الحي الفصل الحادي وتسعون 91 - بقلم براء الموسوي

مرحبا حبايبي العسل شلونكم ❤️❤️

#الموت الحي
#للكاتبة براء الموسوي

ديمة : مرت اكثر من عشر دقايق وانتِ ساكته ، شنو جايه تختبرين قدرتج على الصمت يمي لو شنو سالفتج بالضبط ؟

بصائر : اذا اكلج خجلانه احط عيني بعينج راح تصدگيني ؟

ديمة : وليش ما اصدگج ؟

بالعكس هو المثلج المفروض يستحون حتى يباوعون لنفسهم بالمراية

بصائر : شما تحجين عليه فهو حقج والسويته اني بيج ميسوي بس الحقير والماعنده ضمير

ديمة : ههه عاد زين تعرفين هاي صفاتج

شربت مي وباوعتلها ، احجي بسرعة وفضيني شعندج جايه لهنا وشتردين مني ؟

شوفة عينج اني حاليًا مديرة هنا يعني الشغل واصل لفوك راسي مفارغة للناس التافهة المثلج فحاولي
تختصرين وتتوكلين

بصائر : اني جايه هنا اوضحلج الصار قبل اربع سنين

ديمة : اعرف كلشي وماله داعي ترجعين تعيدين
نفس الموال الي اخترعتي بذاك الوقت وصدكتي نفسج ، شبعت من گدما سمعته

بصائر : بس انتِ سمعتي من كل الأطراف وما سمعتي مني اني

ديمة تره امين رغم غلطة وياج بس هو هم جان ضحية مثلج ويمكن حتى اكثر منج

ديمة : هههههه حلوة هاي ست بصائر وشلون بله اكتشفتي هذا الاكتشاف العظيم

بصائر : ياريت تنطيني فرصة احجي كل العندي واوعدج بعدها راح اروح وما راح ازعجج بعد

احم ، اذا تتذكرين بوقتها من واجهتج بسالفة راسل وهبة وتخربطتي امي بيومها علمودج ضربتني وطردتني من البيت

وبنفس الفترة تراكمت عليه المواقف الصعبة ولإني
ما جنت كادرة الوم نفسي على اختياري الخاطئ
بالزواج من شخص ميريدني

ومن غيرتي وحقدي على اختج الچان گلب رجلي يمها

خليتج سبب بإلي صارلي وردت ابرد گلبي واهجم بيتج مثل ما آني بيتي مهجوم

خابرت امين وسولفتله كلشي وثاني يوم هو اجاني للبيت يحاول يفتهم السمعه مني

"عودة قبل اربع سنوات "

امين : بصائر اني من البارحة عيني ما اخذت نوم
الوب شلون المسموم

احجيلي منين جبتي هاي السالفة ، اخاف متوهمه لو سامعة غلط

بصائر : امين اني هالكلام ما جايبته من جيبي داكلك سمعته من امي

قابل امي تجذب ؟ وبعدين انت تدري بأمي شگد تحبها لمرتك يعني مستحيل تكون جاي تتبلى عليها

اباوعله يفتر گدامي ويجر بشعره ويتحسر

امين : ما اصدگ والله ما اصدگ ديمة متسويها ، صح هي بيها هواي صفات سيئة بس اني متأكد هاي الأمور مستحيل تطلع منها

ديمة ورقة بيضة عندي استعداد اشك بروحي ولا اشك بيها ، متسويها ولج والله متسويها

بصائر : اني وياك ديمة متسويها

بس صفنلي شويه بله ، ليش من اعترفتلها بمشاعرك وطلبتها للزواج شردت منك وكامت تتجنبك

وبعدها بفترة ردتلك خبر وكلتلك تعال اخطبني ولا كإنما هي نفسها النفرتك من عرفت بحقيقة مشاعرك
تجاهها

تدري ليش ؟

اني اكلك ليش ، لأن بفترتها جانت صايرة سالفتها وحسب السمعته من امي ابوها جان كاتلها ومهددها
وكايللها على سوايتج هاي اي واحد يخطبج انطيج اله

فهي ما جان عدها خيار غير انها تقبل بيك لأن بالنسبة الها تاخذ واحد يحبها ويريدها احسن ما تاخذ واحد متعرفه ولا تعرف اخلاقه بالتالي تطلع من متاهه وتطب بمتاهه ثانية

وبالمناسبة حتى اصابتها بالسكر صارتلها من حبيبها
گام يهددها بالصور والفيديوات الجان نايم بيها وياها
ومن الكتل والخوف تمرضت

تره ديمة مو نظيفة ولا بريئة مثل ما انت متخيل ، البنية التعمل كل هالعمايل مستحيل تكون شريفة
او عدها ذرة اخلاق

وهم انت تدري منو جان يساعدها وبعدين اختلف عليها نفسها صديقتها هبة ، شبيك هاي الاجت لأسلام للمحل تدور عليها

اي جانت مصادقتها وبعدين اختلفت عليها وسوت علاقة ويه حبيبها وضحكت هي ويا عليها حتى ياكلون براسها فلوس

وهي ما گالت لا انطت روحها بأسم الحب تالي ذاك شبع منها وشمرها وصديقتها شبعت براسها فلوس وهم عافتها

ولعلمك هاي عقوبة من الله لان باعت شرفها وتربية اهلها علمود واحد ميسوه وبالحرام ياريت لو جان
عاقد عليها

امين : يمكن جانت فعلًا تحب واحد قبل لا تتزوجني بس مستحيل تكون منطيه روحها

لج اني من تزوجتها جانت بنية والقران بنية شلووون تردينييي اجذذذذب عيووونيييي

بصائر : شبيك امين ليش هيج فطير انت

علساس متعرف يعني اكو طرق ثانية النكسين المثل ذولة يگدرون يتبعوها حتى مينفضحون اذا افترگو

امين : يعني شنو ما فهمتج ؟

بصائر : والله استحي اشرحلك بس شسوي انت لازم تعرف

حجيتله اني شنو اقصد وهو گام يرجف وكوه يجر النفس

امين : استغفر الله ، استغفر الله لا لا بصائر حرام عليج تتهميها هيج اتهام ديمة متسويها

انتِ اكيد فاهمه غلط ، ولج هي ولا فرض تفوت تكسر نومتها وتگوم تصلي الفجر

التسوي هيج متطي شرفها مستحيل هاي تربية عمي ياسر ميطلع منها الحرام

بصائر : وهو ابوها شموته غير قهره منها ، سواية ديمة كسرت اهلها متشوف الرجال ما طول ومات من القهر

اذا تركز زين راح تشوف انكاستها وانتكاسة ابوها وقبولها بيك كلها صارت بنفس الفترة والعاقل
يفتهم

خلي تولي يخوية طلگها انت نظيف حريمة تكمل حياتك ويه وحدة وصخة مثل هاي

جاوبني ودموعه تنزل على خده

امين : ما جاي اگدر اصدكج اني راح اواجهها واسمع منها يمكن انتِ وامي تطلعن فاهماتها غلط

بصائر : وانت عبالك اذا واجهتها راح تكلك اي صح كلامهن واني زانية مو خوش آدمية ؟

شبيك امين منو يخلي لزمة على روحه ؟ اذا ممصدگني هسه مستعدة اخذلك موبايل سهير واصورلك المحادثات بينها وبين ديمة وادزها الك حتى تتأكد

كافي امين حاول تستوعب انُ ديمة الكاتل روحك عليها بعيدة كل البعد عن صورة الملاك المكونها
عقلك عنها

لتخليها تضل مستغلتك وعايشة دور الشريفة بنت الأكابر القبلت تتزوجك وانت فقير الي مو من مستواها والي المفروض انت تحمد الله وتشكره يوميه بس لأنها باوعت بوجهك وقبلت بيك

اطلع من دور الضحية كافي الى متى تبقى هيج ياهو اليجي يستغل طيبة گلبك ؟

ما رد عليه ، رفع ايده الترجف مسحه عيونه المغرغرة بالدموع وطلع

"عودة للحاضر"

بصائر : وهذا هو الموقف الصار بيني وبين امين بالتفصيل الممل

اني شيشته عليج واني الي حاولت لأخر لحظة اقنعه يصدك الحقيقة المزيفة السردتها اني من منظوري

والي جانت بعيدة كل البعد عن الحجته الي إمي ، اعترف اني گلبت القصة وطلعتج إنتِ الظالمة مو المظلومة

ديمة : وشستفاديتي ؟

بصائر : ردتكم تنفصلون

ديمة : وعاشت ايدج هو فعلًا احنه انفصلنا

رحم الله والديج وما قصرتي اكو شي بعد لو خلصتي ؟

بصائر : ديمة اني ما اريدج تسامحيني واصلًا مالي الحق اطلب منج هالطلب

وحتى جيتي لهنا والله العظيم مالي نيه بيها افيد نفسي ولو بقيد شعره

ديمة : لعد شعندج هنا جايه تراويني طولج

بصائر : لا ، اجيت حتى ابري اخوية ، امين ماله علاقة بإلي صارلج اني المسؤولة الوحيدة والغلط كله مني

اني الي حرضته واني الي زرعت براسة الشك لمن خليت گلبه يسود عليج

هو لأخر لحظة جان ناوي يواجهج ويسمع منج واني الجنت امنعه

لحد ما صار الي صار

اني حقيرة وسافلة وزبالة والي صار كله بسببي وهسه لو تشربين من دمي محد يحقله يكلج ليش

بس اخوية ماله شغلة ، والله هو حتى شغلة العلاقة التتم والبنية عذراء شلون تصير مجان يعرفها

واني الفطنته عليها وداعة عافيتي واني ماعندي عافية

ديمة : اي يعني انتِ هسه من كاعدة تحجين هالحجي شتردين مني ؟

ابري الذمة لأخوج هاهي مبري الذمة ومن كلبي هم بس چفيني شرج وروحي منا

انداريت امسح بدموعي ، كومي روحي ما اريد اشوف وجهج بعد كوميييي كتلج ما اريد انفعل و ادعي عليج طلعييي بره

وخرت اديه بسرعة من صار صوت بجيها قريب عليه ، باوعتها وقطبت حواجبي من شفتها كاعده
على ركباتها وحاطه اديها على ركباتي

بصائر : الله يخليج ديمة لترديني اني مستعدة كلشي اسويلج بس وافقي

ديمة : كمت على حيلي ، انت شبيج تخبلتي شنو هالحركات البايخة ، كومي كومي

بصائر : ما اگوم لحد ما تنطيني امل انج توافقين

ديمة : على شنو ؟

جاوبتني وهي تنشغ من البچي كوه فهمتها

بصائر : امين البارحة اجه لبيت اسلام وگللنا انه اليوم راح ياخذ سيارته ويسافر لشيخ عشيرتنا الجبير وياخذه ويروح لشيخ عشيرتكم

ويجيبهم ويجي لبيت جدج حتى يتوسطوله عسى ولعل هالمرة تقبلين ترجعيله

الله يخليج ، ابوس ايدج ، والله مستعدة هسه ادنك وابوس رجلج واني الممنونه بس ارضي ترجعين لأمين

والله العظيم هو متندم ومحمل نفسه مسؤولية كل الصار رغم اني ساس البلاء بهالسالفة

حبابه ديمة اني ادري بيج تحبي ابوس ايدج لتكسرين بخاطره هالمرة هو يموت عليج ومحرم على نفسه طول ما هو عايش مياخذ مرة غيرج

والقران الصار كله بسببي اني هو ماله شغلة اني اني الحقيرة الحرضته عليج والله هو بريئ اني ساس البلاء والغلط كله مني

الله يخليج انطي فرصة وحدة بس وحدة وريحي راح يكتله فراگج والله من عفتي وهو ما ارتاح

من قهره عليج جكارته ما كامت تفارگه لحد ما صار بي ربو ومن البچي والقهر على فراگج گام بالعمدًا يجهد روحه لمن صارت عنده شقيقة ويوميه
واگع علينا

وتره خاف عبالج الله ما اخذ حوبتج منه لا والله اخذها حتى من امين الچان ضحية مثلج

طول هالسنين هو مثل السمجة المذبوحة بعدج عنه هد حيله وكسر ظهره

واني ، سكتت شاهگه بصوت

واني حوبتج الله طلعها بصحتي وببنتي ، رفعتلها اديه
هاج باوعي

من بعد السويته بيج الله عاباني لأن اذيتج ، تكهربت وصارت عندي رخاوة بالأعصاب ماعون ما اگدر الزم
بأديه

رفعت كم قميصي ، شوفي الله شسوه بيه تشوهن اديه وجسمي واحتركت بالكهرباء

حتى شعري كون انزع الحجاب واراويج صاير خيوط
من القهر

وياريت لو بس هذا صاير بيه چان گلت حوبتج طلعت بصحتي واستاهل

بس يا ديمة حوبتج وصلت لعزيزة گلبي ، بنيتي الطلعت بيها من الدنيا طلعت من ذوي الاحتياجات الخاصة

لا وفوگ كل هذا عدها فتحة ولادية بالقلب والأطباء بلغوني اني حليم انُ بحالتها الحرجة هاي صعب توصل لعمر العشرين

وانُ احتمال وارد قبل لتوصل لهالسن تموت والاعمار بيد الله

ديمة انتِ متتخيلين اني وحليم شيصير بينه من يجي عيد ميلادها ، كل الأهل يكيفون ببزرهم اذا كبرو سنة

الا اني وحليم كلما تكبر حياة سنة ننصب مناحة دون الناس لأن ندري بيها كل تكبر سنة كلما تتقرب للموت اكثر

انتِ تعرفين شيصير بيه من اكعد بيني وبين نفسي وافكر باجر عكبة اذا سألتني ماما اني ليش ما اروح
للمدرسة مثل اولاد عمامي شريد اجاوبها

لو باجر عگبة اذا وصلت لسن البلوغ واجتها الدورة
شلون راح اتصرف وياها وهي متفتهم

لو شلون راح احميها من نظرات الشفقة الاشوفها من عيون كل الناس التشوفها

لو شلون راح اخفف عنها من نطلع لمكان والجهال يركضون وراها ويصيحولها المنغولية

تعرفين شيصير بيه اني من تجيني تسألني شنو يعني
هي منغولية ؟

اني يا ديمة اخذت جزاتي بالدنيا قبل الأخرة وباليوم جاي اموت بدال المرة الف

والله يومية بالليل افز احط ايدي على خشمها اشوفها عدلة لو ميتة ومن هسه شايله هم اذا حياة ماتت
اني وحليم وين راح ننطي وجوهنا

وشلون راح نعيش بلياها ؟

ديمة : هي تبجي واني ابجي وياها ، انمرد گلبي والله العظيم اريد اسكت بعد ما اگدر

دنكت عليها لزمت من اديها وكومتها

كافي كافي لتحجين هيج الله يحفظها وينطيها طولة العمر ويعافيها ويخليها الكم

بصائر : عوفيني ديمة لتلزميني وتوصخين روحج بيه ما استاهل اني تتعاطفين وياي والله ما استاهل

ديمة : لتكولين هيج تعاي كعدي حبابه فرفحت روحج تره حموتين

كعدتها وكوه شربتها مي حتى غصت گدما جانت
مفرفرة وتبجي

اخذتلها فترة ياله انتبهت على نفسها وهدأت

هاا شلون صرتي

بصائر : اا اني اسفة خبصتج بسالفتي وانتِ مالج علاقة واصلًا ما مجبورة تسمعين مني كل هذا
كل واحد بي الي كافي وانتِ ما عايزة

ديمة : ما زعجني السمعته وماكو داعي تعتذرين واتمنى منج متجين لهنا بعد حتى لتسببيلي مشاكل
ويه اهلي

بصائر : اعتذر مرة ثانية واتمنى تفكرين بموضوعج انتِ وامين من جانب ثاني

الله يخليج خليني اكون سبب برجوعكم مثل ما جنت سبب بفراقكم عسى ولعل اريح ضميري شويه واگدر
اعيش

ديمة : ختمت كلامها وگامت بسرعة اخذت جنطتها وفتحت الباب ناوية تروح

صحتلها قبل لا تطلع من المكتب

بصائر

بصائر : انداريت عليها ، نعم

ديمة : اذا جانت عدم راحتج سببها اني فروحي انتِ مبرية الذمة من كل گلبي وعسى الله يغفرلج كل السويتي

بصائر : نزلت دموعي ، بس انتِ ما مجبورة واني ما استاهل

ديمة : مو لخاطرج لخاطر حياة الأشخاص المثلها يستحقون يعيشون بسلام

وانتِ اذا ضليتي هيج تاكلين بروحج عمرج ما توصلين للسلام والسعادة

واني ما اريد أساهم بأذية هالطفلة لأن انتو أهلها والي تحسون انتو بي هي هم حتحس بي

بصائر : جنتِ وراح تضلين طول عمرج نظيفة روح واحسن مني

الله ينطيج على گد نيتج الطيبة

ديمة : آمين والج بالمثل

بصائر : هزيت راسي وطلعت من الشركة راجعة للبيت

وصلت سلمت عليهم وصعدت للمشتمل مالتي

اني وحليم صحيح رجعنا لبيت اهله بس بوقتها محد چان متقبل وجودي فحتى محد ينحرج بسببي وهم حتى متصير مشاكل

سوالي حليم غرفة الملابس مطبخ وعزلت فوگ حتى لا اضايق احد وگمت اني اطبخ ووقتي كله فوگ بس هم انزل يمهم

علاقتي ويه اهل حليم طيبة صح مو قوية كلش بس اهون من قبل وهمه مالهم علاقة بيه ولا اني فارضة نفسي عليهم

بأختصار كافيه خيري وشري وهمه هم الاوادم لا فديوم غاثني ولا مسويلي شي ومدللين بنتي دلال يموتون عليها وهالشي كلش كافي عندي

سمعت صوت الباب يندك ، صحت تفضل ، طبتلي سهير شايله شموسة

سهير : السلام عليكم عيني

بصائر : وعليكم السلام ، كمت اخذت شمس بوستها وانطيتها لأمها

سهير : بشري استقبلتج ديمة

بصائر : هزيت راسي

سهير : وشكلتلج

بصائر : سولفتلها الصار وهي كالعادة تستمع وتهز براسي بدون متنطي ردة فعل

سهير : زين تسوين همزين حجيتيلها الدتحسي حتى تعرف انج ندمانة على كلشي سويتي وتغيرتي

وهي بعد گلبي مثل ما اعرفها بعدها نفس قبل گلبها ابيض ومتعرف تحقد

شفتي بصائر بس التمست الصدق بكلامج برتلج الذمة يربي هالبنية ماكو منها

بصائر : اني اصلًا ما ردت اسولفلها شي بس انهاريت وبلحظة ضعف كتيت كلشي

البنية ما مجبورة تسمعني وحتى لو هي سامحتني اني مستحيل اسامح نفسي بيوم من الأيام

سهير : حرام عليج الجاي تسوي بنفسج تره

بصائر : يطبني مرض استاهل كلشي يصيرلي

المهم هسه ديمة بلكت الله تقبل هالمرة ترجعله ، عمت عيني على امين راح يموت يريدها ترجع وهي كل مرة ترفض

نذرًا عليه اذا ديمة رجعت لأمين لأصوم شهر كامل لوجه الله

سهير : ان شاء الله ، الله يستجيب دعائج

بصائر : اگدر اطلب منج طلب

سهير : امريني عيوني الج

بصائر : انتِ علاقتج زينة بديمة وخواتها فدوة اسعي بسالفة ديمة وامين بلكت الله تقتنع بكلامج وترضه هالمرة

والله الج ثواب اذا ساهمتي بلم شملهم مرة ثانية

سهير : ان شاء الله احاول بالأكدر عليه

بصائر : حضنتها انتِ احسن وحدة بالدنيا تدرين

سهير : هههههه ادري وانتِ هم مابيج قصور ، بصائر انتِ هواي تغيرتي وكلنا ملاحظين هالشي الا انتِ

بصائر : الشي الوحيد الممكن يخلي ضميري يهدى هو رجعة امين وديمة

سهير : ان شاء الله يرجعون

بصائر : الله يسمع منج

سهير : يله حبيبتي اعوفج ترتاحين واروح انيم شموسة حتى اغدي سيوفي وانام هلكوني اليوم
ينام واحد يكعد الثاني

بصائر : جيبي شمس خليها عندي

سهير : لا بعد گلبي متقصرين

بصائر : طلعت سهير واني كمت بدلت وصليت وحطيت الاكل على النار حتى من يجي حليم حتى نتغده

ماكو نص ساعة وطب شايل حياة النايمة على جتفه

حليم : السلام عليكم

بصائر : وعليكم السلام حبيبي ، جيب عنك جيب
الله يساعدك

حليم : ويساعدج حبيبتي ، على كيفج وياها

بصائر : بسم الله ، شلتها بوستها ونيمتها بفراشها

طلعت لكيت حليم يبدل ، طبيت للمطبخ طفيت النار على الأكل وطلعت

شفته نازع قميصه وشايل الخاولي حتى يدخل للحمام

صارت عيني على صدره وهو من شافني اباوعله حك راسه

حليم : مو كإنما نسيتي شي اليوم ؟

بصائر : شي مثل شنو ؟

ضرب الخاولي على جتافه وغمزلي

حليم : ما اعرف انتِ فكري ؟

بصائر : ابتسمت بخفه على حركته وتقربت منه واكفه على اطراف اصابعي بسته حيل من صدره وابتعدت

الله يساعدك ، هيج زين ؟

دنك راسه باسني من شفتي وابتعد

حليم : هههههه ويساعدج اي كلش زين

بصائر : يله روح اسبح بسرعة واطلع صلي تره ميتة جوع اني

حليم : يخسى الجوع هسه دقايق واكمل

بصائر : باسني من خدي ودخل للحمام ، ابتسمت ورحت احضر المواعين

اتذكر بعد ولادتي لحياة بفترة معينة اجاني حليم شايل وشم اسم زبيدة من على صدره

ومن سألته گلي الله عوضني بحبج وحب حياة ومحى زبيدة من گلبي ومشاعري تجاهها تغيرت لدرجة كمت اشوفها مثل ما اشوف نسوان اخواني

ومن حسيت بهذا الإحساس رحت وشلت اسمها من صدري لأن اذا هي ما عاد الها وجود بروحي شعندي
خال اسمها على جسمي واني ماعندي مشاعر تجاهها

ومن يومها واني يومية الفرد ابوسه من صدرة على مكان الوشم الممسوح بالضبط حتى هو تعود واذا
ما كمت ابوسه يستغرب ويجي يسألني

نسيتي شي اليوم ؟

حليم : ييييله عصائري الغدة

بصائر : ابتسمت وجاوبته اي حليبي تدلل

_________________________________

ديمة : كاعدة بالحديقة وعيوني على السماء

اباوعلها وافكر بكلام بصائر ، ما انكر تأثرت بكلامها هواي وبگد ما كرهتها سابقًا بس شفقت على حالها

هاي اني وهذا طبعي ما اگدر احقد ولا اگدر اتشفه
باليأذوني مو هيج تربيت او بالأحرى هو طبع

او يمكن تأثير شخصية ماما وسيلة عليه چان جبير
صح اني ما اشبهها بالطباع ككل بس الظاهر اخذت
منها هالصفة

تنهدت وتذكرت كلام بصائر عن امين ، ما اگدر اخش
بعينها واكول كلامها جذب

اني من زمان ادري بأمين بعده متعلق بيه ويحبني بس لهالدرجة !! ما جنت متوقعه

واذا اصفن بكلامها الگا فعلًا من جهة ما ضحية ، جان ضحية لثقته بأخته

صح هو حبني وعاشرني سنة ونص بس عاشر اخته من عمرها يوم ولحد ما تزوجت هي تكبر گدام عينه

يعرف اخلاقها ويعرف دواخلها شمدري الحب راح يغيرها ويظهر الشيطان الي چان مدفون بداخلها

اني لو احط نفسي بمكانه واتخيل تجي زبيدة لو ودنيا وتسولفلي سالفة

هل من الممكن اشك بكلامهن لو بسرعة راح اصدگهن
بالنهاية هنه خواتي اكيد ما راح يردلي المضرة لو يجذبن عليه ؟

بس مع هذا الي حجته بصائر مو مبرر للي سوا

صح اني اذيته وذليته ودائمًا جنت احسسه انه ماله قيمة وجنت كلش حقيرة ويا

وصلته لمرحلة خليته يعيش سنة ونص يعاني ازمة ثقة والسبب اني

بس بالنهاية حبه تغلب عليه وكسر عيني ، غصب عني خلاني احبه واتغير علموده

معقولة ما التمس بيه هذا الصدق ؟

اني مو بريئة ولا السويته قليل بس هم ما استاهل كل الصارلي

ولا هو يستاهل الصارله ، جاب عمره كله تعب ومن اخذني عباله الدنيا راح تبتسمله تالي اجيت اني
دمرته

زين اني اذا اريد احط افعالي وافعاله على ميزان يا كفه الي حتكون اكثر

كفة سيئاتي لو سيئاته ؟

للحظة حسيت انُ كفتي اني الي راح تنزل لأن اني سويت هواي شغلات غلط

وهو سوه غلط واحد بس هذا الغلط تفرع وادى لهواي اغلاط

حركت عيوني على النجوم

اذا ارجعله شنو الممكن يتغير بحياتي ؟

يا ترى راح احصل لذة الحياة الفقدتها من بعد انفصالنا لو لا ؟

صح اني هسه عندي كلشي ، فلوسي تارسه البنك ، احدث سيارة بالسوك عندي ، عندي وظيفة اي واحد
يحلم بيها

اهلي يحبوني ويموتون عليه واني هم اموت عليهم وما اتخيل حياتي بدونهم

بس مع هذا احس اكو شي ناقص بحياتي ، احساس الفرح احسه مفقود عندي

حتى الضحكة احسها من تطلع تكون وقتيه تنتهي بلحظتها وارجع للفراغ الداخلي

حاولت بالسنين السابقة انطي فرص لهواي اشخاص حاولو يتقربون مني بنية الزواج

گلت يمكن اذا اتزوج مرة ثانية راح تتغير حياتي للأفضل لكن اكتشفت نفسي ما صرت اشوف
الرجال مثل ما الناس الطبيعين يشوفوهم

احسهم فارغين و تافهين ، ولا واحد گدر يشدني بشخصيته حتى العنده شخصية رزنه ما جنت
اگدر اتقبله

بدون شعور جنت ادور بيهم شبيه للعامل الحبيته ، العامل الچان يغسل مواعين للـ2 بالليل حتى يوفرلي
العيشه الي اتمناها

العامل الي چان كل يوم خميس يستلم اسبوعيته
يروح يركض يجيبلي لفة برگر من مطعمي المفضل حتى يفرحني

وبالنهاية اكتشفت إني جنت ادور على شخص انتهى من الوجود وبكلامي هذا ما اقصد صاحب الشركة
الي شركته احترگت قبل كم يوم

لا اني جاي اقصد امين الضعيف صاحب الستوته

واااااخ لو ارجع الگا اكمش بي واضيع عمري ولا اضيعه

ابتسمت ومسحت الدموع الفرن من عيني من شفت هارون يجي من الاسطبل ويصير گبالي

هارون : هاا دمدم شو كاعدة بمكاني

ديمة : ابتسمتله اعذرني جنت مختنكة وگلت اكعد جوه شجرتك

هارون : لعد سويلي مكان خلي اكعد يمج

ديمة : ادنيت عنه وهو اجه كعد على بعد مسافة قليلة مني

هارون : اييييه الله بالخير

ديمة : الله بالخير والعافية

هارون : احسنتِ هذا الجواب الصحيح ربحتي وياي حب شمسي فتحي ايدج

ديمة : ضحكت بخفه وفتحت ايدي ، خله صمة الحب بأيدي واخذ كميه وطلع كلينسة خلاها كدامي

هارون : هاج ذبي هنا لتوصخين المكان مثل اختج تاكل وتزبل واني الم وراها

ديمة : ابتسمت وكمت اكرز واذب على الكلينس وهو نفس الشي

هارون : اممم خوش حب هذا مو

ديمة : اي

سكت شويه وباوع للسماء وحاجاني

هارون : شصاير وياج ؟

ديمة : ما صاير شي

هارون : جواب خطأ

ديمة : بصائر اجتني اليوم للمكتب

هارون : جواب صح ، كملي .... شتريد ؟

ديمة : تگول امين راح لشيخ عشيرتهم الجبير اليوم وراح ياخذه ويروح لشيخ عشريتنا الجبير

هارون : ليش ؟

ديمة : يعني ليش مثلًا ؟

هارون : ما ادري هو اني جاي اسألج

معقولة يريد يجيب مشية جبيرة للمرة المدري شگد حتى ترجعيله ؟

ديمة : هه هه هه دمك خفيف كلش

هارون : طالع على اختج

المهم وانتِ شنو رأيج هالمرة ، مبين اكو حجي بلسانج نطقي

ديمة : اني ما اريد ارجعله بس ، بس اكو شعور غريب
بداخلي مداگدر افسره

هارون : اكو رغبة بسيطة بداخلج للرجعة والظاهر جاي تأثر عليج وانتِ متردين تخضعيلها

مو صحيح ؟

ديمة : ماعندي جواب ، انت شنو رأيك ؟

هارون : رجعيله

ديمة : انداريت عليه ، هاا ؟

هارون : انتِ تدرين قبل چم سنة لو زبيدة باقية مصرة على الطلاگ وما راضية ترجعلي شچان راح يصير بيه ؟

اعتبرج سألتيني فراح اجاوبج

چان شفتي الكاعد يكرز حب يمج ، كاعد هناك بالأسطبل وحيد ، مبتعد عن العالم ، ساكت ، حياته باهته ، ومو بعيدة صاير بي اكتئاب هم

يصعد لغرفته يتخيل مواقفهم سوه ومن تنرسم ابتسامة على وجهه يرجع للواقع ويتذكر عدم
وجودها بحياته وينتكس اكثر

ومع مرور السنين راح تلگين الشيب ترس راسه ، عوده خوه وطاقته رايحه، الكل ماشي بحياته
وعايش الا هو

تخلص سنين العمر ويجي الموت ولا هو گدر يعيش مثل البشر الطبيعين ولا هي

وبالنهاية الأثنين خسرانين

ديمة اني زبيدة من انطتني هاي الفرصة وقبلت تبقى وياي وهي جابت الروح وحطتها بإيدي وكلتلي
هاك روح عيش

كلمة وحدة منها گلبت حياة البائس الكاعد كدامج رأس على عقب

بكلمة حولت حياتي السودة لحياة كلها الوان منين متندارين تشوفين بيها ورد بألوان مختلفة

من اصبح الصبح واشوفها نايمة بصفي لو من ارجع وتتلگاني

احس وكإني ملكت الدنيا ، اني حاليًا عايش اسعد لحظات حياتي والسبب زبيدة

نصيحة ديمة لتحرمين امين من هذا الأحساس ، صح هو غلط بس جل من لا يخطأ

محد بينه معصوم ، واني وياج اكو اخطاء متتصلح ولا الفاعلها يستحق فرصة ثانية

بس السوا امين وإن چان غلط بس هم يستحق فرصة ثانية والصارلج قضاء وقدر

لو بيومها مكتفي انه يواجهج ويرمي عليج اليمين ويطردج من حياته

يا ترى تتوقعين نفسج راح تتحملين ؟ هم من القهر راح تطلعين تبجين بالشارع وراح تجي السيارة وتسحگج وتفقدين كليتج وطحالج

هذا قدرج وچان راح يصيرلج لو شردتي منه للسماء هم راح يلحكج

القصد من كلامي يا ديمة لذبين كل اللوم على امين هو هم خطية تره السمعة عنج مو شويه ولا سهل

يا رجال يقبل على روحه السمعة عنج وإن جان مو صحيح

ردة فعله جانت غلط بس منگدر ننكر انتِ هم غلطتي واستغليتي طيبته وحبه الج

مو جنتِ تعيري بفقرة مو جنتِ تستهزأين بعيشته البسيطة وفوگ كل هذا حملتي منيه لأن قبلتي بي
وانتِ تدرين بي ما چان جابرج وانتِ وافقتي عليه
لأن ما جان عندج خيار غيره

انتِ هم ما قصرتي يا ديمة ، لتبجين اني ما جاي
احجي حتى اقهرج لو ابجيج

بس اني صريح وما اعرف اجامل وانتِ لأن اعتبرج من معزة نور ما اگدر اجاملج

انتِ وامين ثنيناتكم اذيتو بعض بلحظة من لحظات حياتكم

لكن مع هذا لابد اكو شغلات حلوة صارت بيناتكم تستاهل تنطون فرصة لبعض حتى ترجعون تعيشوها
سوه

ديمة امين يحبج ولوما يحبج ميحاول اربع سنين
وياج تره الرجال الله خالقة بسرعة يتخطى ويتعايش

الا الينغدر واليحب من گلبه مستحيل يگدر يتخطى اليحبها ولا يگدر يتعايش لأن مشاعره ويه هالأنسانة
جانت صادقة والمشاعر الصادقة عمرها متموت

اني حجيت الحاسة وانتِ فكري بكلامي وبالنهاية لتسوين الا الشي اليريحج

واذا جنتِ حاسة انُ راحتج ممكن تحصليها اذا رجعتي لأمين ولو نسبة واحد بالمية لتترددين ورجعي

وهسه تصبحين على خير

ديمة : عافني وراح بعد ما شمرتي بدوامة كلامه

خاف اني جنت عايزة واجه هارون خربطلي اوضاعي اكثر

خليت الحب بجيبي وكمت لميت الكلينس وذبيته

دخلت للبيت ونمت ، ثاني يوم داومت وكالعادة التهيت بالشغل

مر اسبوع ثاني والموضوع هذا ياكل ويشرب وياي

ساعة اگول خلي انطي لنفسي فرصة وبنفس اللحظة تغير رأيي كرامتي المجروحة من الي صار

جان اسبوع صعب عليه ، حتى النوم طار من عيوني
احس هالسالفة شلون الهم النايم على گلبي

تنهدت واني لازمة الكتاب اقرأ بي حتى التهي ، شتت انتباهي صوت زبيدة ووسيلة اليسولفلن

زبيدة كاعدة مدري شتخيط ووسيلة كاعدة بصفها

زبيدة : انتِ شنو اسمج

وسيلة : اني اسمي وسيلة معين الحلوة وانتِ

زبيدة : اني اسمي زبيدة ياسر العلم

وسيلة : خطأ انتِ اسمج زبيدة هارون العلم

زبيدة : ولج هارون زوجي مو ابويه

وسيلة : لا ابوج

زبيدة : والعباس رجلي

وسيلة : لا عمة ابوج اني شايفته يشتريلج نمنمات

زبيدة : هههههههه يعني هارون صار ابويه لأن يشتريلي نمنمات

وسيلة : اي لعد شون هو بس الابو يجيب النمنمات للأولاد والبنات بابا معين يگول

زبيدة : ااخ يسوالف بابا معين المتخلص

وسيلة : عمة

زبيدة : هاا يبعدهم كلهم

وسيلة : عمة عمو هارون ليش ماعنده راس

زبيدة : شلون يعني ماعنده راس !!!

وسيلة : هنا ماكو مثلنا

زبيدة : هاا تقصدين شعر ، اي يبعد عمتج ماعنده شعر مو ماعنده راس

هي هاي العايزة اني اخذ واحد ماعنده راس

جعت اكمل خياط وهي سكتت شويه ورجعت سألتني

وسيلة : عمة

زبيدة : هههه هاا عمة گولي

وسيلة : عمة ابوج هارون هم يجيبلج فساتين مثل ابويه معين

زبيدة : لا يعمة منين يحسرة اني الاشتري الفساتين والبسله

ابويه هارون لو عليه ناسي اني بنية وحاسبني واحد من جماعته

وعود اذا راد يصير رومانسي ويعبرلي عن مشاعره يركعني علابي

وئام : هههههه والله عدج سوالف يزبيدة

وسيلة : زين عمة اني كومة احب ابويه معين انتِ ابوج هارون هم تحبي

زبيدة : ابتسمت متنهده ، اموت عليه اني مو بس احبه
يعمة

ام حسن : ههههه هاا هاا زبد شو العيون تسبلت والحسرة شكبرها

زبيدة : ههههههه هي هاي الادبسز تدوسلي على الوتر الحساس شسوي يعني

ديمة : ابتسمت على حجي زبيدة ، اباوعلها من تسولف بهارون عيونها تلمع وخدودها تحمر بس مو من الخجل من الابتسامة العريضة والترسم على ملامحها
من تسولف بي

بعد گلبي يخبلون ، الله يحفظهم لبعض ، فتحت كتابي ورجعت اكمل قراءة لمن نعست وكمت نمت

ثاني يوم كاعدين نتريك واجه صاحب بلغني انُ جدي يريدني

كملت ريوك وطلعت رايحتله ، وصلت وصعدت لمكتبه
دكيت الباب ومن گلي تفضلي دخلت وهو بدوره من شافني دخلت گام على حيله وحضني

بادلته الحضن وابتعدت مبتسمه ، شلونك جدو

النوح : اذا انتِ بخير اني بخير

ديمة : حبيبي انت عساك دوم بالخير ، ابتسم ولزم ايدي مكعدني بصفة على القنفة

صاحب گلي انت تريدني ، خير خوما الموضوع يتعلق بالشغل ؟

النوح : لا بويه بس اكو موضوع يخصج حبيت ندردش بي اني وياج

خوما عندج شي ؟

ديمة : تقريبًا عرفت بشنو يريد يحجي ، هزيت راسي ، لا ماعندي شي جدو گول

النوح : البارحة بالليل اتصل عليه شيخنا وبلغني انُ امين رايح لشيخهم الجبير ويريد يجيبه ويجينه
مشية عليج حتى يرجعج

وهالمرة شيخهم طالب من شخينا شخصيةً انه يتوسط لأمين ويدخل طباب خير بهاي السالفة

اني ما گدرت ارفض جية الشيخ ولمة الناس الطيبة الجاية كتلهم تفضلو وكل الهلا بيكم وحددنا الموعد
بعد تلث ايام ان شاء الله

ورغم إني رضيت استقبلهم لكن مع هذا يا جدي هاي حياتج وانتِ حرة بيها

الج رغبة ترجعين لطليقج بكيفج ما الج رغبة رفضي
نفس كل مرة واني وياج بأي قرار تتخذي

المهم عندي ما اكون سبب بأذيتج والشي التردي بكل الأحوال راح يصير

اني دائمًا أعيدها عليج وهالمرة هم راح ارجع اعيدها
مالج علاقة بأحد انتِ الشي الترتاحيله سوي

لتخلين لا امج ولا اخوانج ولا اي واحد يأثر عليج
سواء بالقبول او بالرفض

صيري قائد نفسج ومالج علاقة بكل الناس المهم انتِ لأن محد راح يعيش هالحياة غيرج

وهاي القصة انتِ اختاري يا اما تكملها يا اما تنهيها
وشما كان قراراج انتِ المسؤولة عنه مو غيرج

ولهذل السبب لتسمحين لأحد يزعزع رغبتج بالشي التردي

ديمة : تنهدت وحضنته

شكرًا جدو انت دائمًا واكف بصفي ومأيدني بكل قراراتي لوما انت ما اعرف وين اروح

اخذت ايده بستها ، الله ليحرمني منك وعساك دوم
تبقى خيمة على راسي

مسح على راسي وباس جبيني

النوح : ولا يحرمني منج يالحنينة

وهسه تحبين تنطيني رأيج بالموضوع لو تردين تفكرين

ديمة : برأيك هالمرة اذا قبلت راح اكون بلا كرامة ؟

النوح : لا ابد بالعكس الولد حاول وياج كومة وهاي يمكن سادس مشية يجيبها علمودج

احنه تعبنا ولا هو ولا اهله تعبو ، الرجال حاول يجينا من كل الأبواب ورفضنا وهم بعده يحاول

وهذا الشي اذا يدل فيدل على انه رايدج ومشتريج بالغالي ولوما يحبج ويريدج ما چان سوه الجاي يسوي

وهيج انسان مو غلط اذا فكرتي ترجعيله

بالنهاية انتِ جمعتج بي عشرة والعشرة متهون ياجدي غير على ابن الحرام

ولا رجلج ابن حرام ونسى عشرتج ولا إنتِ نسيتي
اني اعرفج صح كرامتج مجروحة بس لسه اكو
بصيص امل بداخلج

جنت متوقع بيوم من الأيام راح يطغى وتحسين بي
وبكل الأحوال اني راح اعوفج تفكرين هالتلث ايام

وبيوم اليجون وتتم الكعدة راح اجي واسألج گدام الكل واريدج تكونين صادقة مثل عادتج وتنطيني
جوابج بكل صراحة

سواء قابلة لو رافضة

متفقين ؟

ديمة : هزيت راسي ، متفقين

النوح : وهسه ماعندي شي وياج اذا تحبين اخذي راحتج

ديمة : تمام جدو من رخصتك ، عدلت حجابي وطلعت راجعة للبيت

وما طول الموضوع حتى طش ببيت جدي والكل صار يعرف بي

اباوع لأهلي الي التمو بالبيت يتناقشون بموضوعي
الا انه هالمرة انضاف للقائمة حليم وسهير الي اجوي
ويه دنيا ويوسف وسبب جيتهم الظاهر معروف

وئام : يعني اني ما اعرف هاي الناس شوكت تستحي على نفسها وتحس

عفية كرامة ماكو دنگلك اعتق البنية متريدك گوه هي تريدها ترجعلك شنو من قابليات هاي

حليم : يعني اذا طلع يحبها ويريدها معناها ماعنده كرامة

وئام : انت اسكت بله

سهير : ام معين الولد شاريها ويريدها شكو بيها اذا
تفكر تنطي فرصة

وئام : صدك تحجين سهير ؟ عود هاي انتِ الدكتورة الفاهمه العاقلة تحجين هيج لعد شخليتي للباقين

كل عقلج ترديها ترجعله شنو ماعدها كرامة لو زايدة علينا ولكمتها ثكيلة حتى نرجعها

سهير : خالة اذا رب العالمين بعظمته وجبروته يسامح ويغفر منو احنه حتى نتكبر هيج ومنغفر

يوسف : وامين غلط بس متندم ولوما متندم وعارف غلطه ما چان ضل يحاول كل هالسنين يصلح الأمور ويرجعها

حليم : وبعدين هو ما خاينها ولا ماد ايده عليها حتى نكول اذا رجعتله راح تكون بلا كرامة

وئام : وكلاتها وطحالها الراحن ؟

حليم : وامين شعليه قابل هو السحگها ؟ تره الصار قضاء وقدر

وئام : انت الظاهر دازيك واسطة لأن داشوفك واكف بصفهم

حليم : محد دازني واسطة والله شاهد امين ميدري بيه راح اجي واحجي بالموضوع

بس اني اعتبر ديمة وامين اخواني وجاي اسعى واصير محضر خير بيناتهم لا اكثر ولا اقل

ديمة عوفج من كل الصار وحاولي تنطين نفسج فرصة بهالعلاقة صدگيني امين خوش امين
وما راح تخسرين اذا رجعتيله

وئام : شنو هي بكيفها ، ديمة مالها رجعة وولا واحد اله حق يتدخل

يوسف : اني برأيي الأمور متنحل هيج ، ديمة هالمرة امين وصل السالفة لشيخ العشيرة الجبير مالتهم وحسب السمعته من جدج مدخل شيوخ كبار واسطات علمودج

فلو تگعدين ويه روحج وتدانشين عقلج بخصوص هالموضوع يكون افضل

وئام : صدك تحجي يوسف تريدها ترجعله بعد كل السوا ؟

هارون : لو ابنج مبين الله يغفرله ما ميت بذاك الوكت وراجع وطالب منج تسامحي وتنطي فرصة

تقنعيني انج راح تطردي ومتسامحي ؟

وئام : وشجاب مبين الله يرحمه بالسالفة هسه

هارون : القصد من كلامي لتحللين الغفران على نفسج وعلى الناس الي من جانبج وتحرمي على غيركم

عفوًا من الكاعدين واعتذر لأن راح افتح دفاتر قديمة

بس خالة انتِ سبق وسامحتي معين لمن غلط ورجعتي سامحتي ديمة وقت الغلطت واني متأكد لو راجع مبين ندمان هم چان سامحتي

رغم انُ كلهم جانت اغلاطهم مو قليلة وسببو اذيه للعائلة كلها ولوما ستر الله بيكم چان رحتو للهاوية

بس حضرتج من التمسي بيهم الندم انطيتيهم فرصة ثانية وسامحتيهم ونسيتي السوو بفترة تتجاوز السنة

فليش رافضة هسه تخلين بنتج تنطي فرصة لشخص صارله اربع سنين متندم وجاي يحاول يصلح غلطه

وئام : يعني عود انت هسه لفيتها عليه وسكتتني

هارون : لا ابدًا اني انطيت رأيي كواحد من العائلة لا اكثر ولا اقل

لو شنو رأيك ابو وسيلة ؟

معين : ما اكدر انكر واكول كلامك مو صحيح

صح هو القرار النهائي لديمة بس اني اكول هالمرة
فكري بالموضوع حبيبتي يجوز رجعتج لأمين بيها
صالح الج

وئام : ما شاء الله شنو هالحنية التسامح النزل عليكم فجأة

وانتن المستمعات عيني ما راح تعلقن

دنيا : اني رأيي من رأي الباقين

زبيدة : واني مالي علاقة وما حابه اتدخل وااثر على ديمة هي الي تحسه خلي تسوي

وبكل الأحوال اني وياها شما چان قرارها

وئام : يعني انتِ راضية على رجعتها ؟

زبيدة : اذا جانت موافقة ترجع فهاي حياتها وهي حرة
اني العليه اوگف بصفها واذا احتاجتني راح انصحها
وبس

غير هذا الكلام مو عندي

وئام : هلا والله الظاهر السالفة طلعتو طابخيها بيناتكم

هارون : احنه ما كاعدين بمسلسل ولا بفلم عوفي هالمفردات على صفحة

انتِ مو جمعتينا حتى تسمعين ارائنا ، واحنه كل واحد بينا حجه اليملي عليه ضميره

وئام : وضميركم يملي عليكم تقنعوها ترجع للنار ؟

حليم : ليش تسميها نار ممكن رحمة من رب العالمين للأثنين لان ثنينهم انظلمو

وئام : والفصل لمرتك طبعًا ست الحسن والجمال بنت الأكابر والعز والنعيم

حليم : لا إله الا الله ، اللهم طولج ياروح

ديمة : واستمرت المناقشات بيناتهم لمن انتهت الگعدة
بعركة گبت للضالين بين هارون وامي

وهياتني اني كاعدة بغرفتي ويه خواتي

تنهدت وسألتهن ، اذا قررت اوافق هالمرة شراح تكون نظرتجن عني ؟ هم راح تگولن عني تافهة وماعندي
كرامة

دنيا : يكل تبن اليگول عليج تافهة وماعندج كرامة
والله اليحجي نص حجاية اكصله لسانه

اصلًا محد اله حق ينطق وياج حرف واحد هاي حياتج انتِ وشلون متردين تعيشيها عيشيها
مادامج ما غاضبة الله

ديمة : وانتِ زبيدة لو جنتِ بمكاني جنتِ حتقبلين ؟

زبيدة : ابتسمت طبعًا انتِ دائمًا تسأليني هالسؤال واكلج ما اگدر احط نفسي بمكانج

لأن شخصيتي تختلف عن شخصيتج ومشاعري تجاه الموقف هذا تختلف عن مشاعرج لأن انتِ العشتي هالقصة بالواقع مو اني

بس اني كزبيدة من تعرضت لخذلان من الأحبه بقصة الحب العشتها قررت ابتعد حتى ارتاح

بس اكتشفت انُ البعد مو حل ومن اجيت اواجه الاحبه حتى اتعود على وجوده واگدر اتقبل الواقع وانسى لكيت نفسي اتعلق بي واحبه اكثر

ومن تورجت عليه وشفته مكسور بفراگي وجاي يحاول يرجعني ومو گادر ولا عارف شلون

قررت ما اكسر بي وارجعله حتى لا اخسره ولا اخسر نفسي

ومن يوم الاخذت هالقرار واني مثل متشوفين طايرة من السعادة شلون الفراشة حتى شكلي صار اصغر

والكل يسألني عن السبب المخليني هيج محد يدري هارون طيبلي روحي بعد ما جانت مريضة

فإذا جانت روحج مريضة يا ديمة وتحسين انها ممكن
تطيب يم امين لتترددين وانطي لنفسج فرصة

اعتبري امين نوع من العلاج لروحج بلكت من خلاله تطيبين وترجعين ديمة الفرفوشة الخابصتنا بسوالفها
السخيفة الحلوة

اشتاقينالها والله شنو هاي الشخصية المرتكزة ابد ملايكتلج والله

دنيا : ههههه اي والله اشتاقينا لباربي الوردية وين ضمتيها طلعيها

ديمة : ابتسمت وفتحت اديه تعالن تعالن خلي اشبگجن اروحجلن فدوة اني

حضنتهن وبجيت وهنه حارن شلون يسكتني بس اني خزاني انفتح وبعد شيسده

كوه سكتني وبيومها ضلن يمي وراحن لبيوتهن لمن هدأت ثاني يوم

واني هم من بعد ما راحن ما داومت وانطيت مساحة لنفسي افكر بالموضوع بعقلانية وخليت مشاعري
على صفحة

ومنين ما اندار الگه حتى عقلي بدأ يقنعي افكر بشكل ايجابي بخصوص هالموضوع

وكلما اصر واگول لا ما ارجع اتذكر اخر لقاء صار بيناتنا والكلام السمعته من امين ويلين جزء مني

وهم اتغاضى عن هالشعور مرات ، خوفًا لا ابين بعدين ماعندي كرامة

موضوع الكرامة چان كلش مأثر بيه ويمكن هذا اكثر شي مخوفني ، خفت لا اقبل واكتشف نفسي بعدين
فعلًا بلا كرامة

وهيج مضن الـ3 ايام عليه بين مد وجزر ساعة اي وساعة لا

وهياتني كاعدة بالصالة مالت بيت جدي والمشية جوه ناس بالأستقبال وناس بالحديقة

هالمرة المشية جانت كلش جبيرة حتى اكبر من كل مرة لأن هواي شيوخ جايين من ناحية امين من صفحة ابو وامة ومن صفحتنا

ضلو يتناقشون بيناتهم فترة ومثل كل مرة جدي وعمامي يستقبلوهم احسن استقبال بس مينطون
كلمة لحد ما يسألوني

بيداء : والله طليقج هذا لزكة يعمه ادري الخلقج ما خلق غيرج شسالفة كل يوم سلام عليكم

اشواق : والله عمة هو لوما يحبها ميسوي هيج علمودها

غزل : اي والله دمدم خطية هالمرة وافقي لتكسرين بخاطره

بدرية : انتن لتدخلن بهالسوالف عيب بعدجن صغار

زبيدة : ليش ميتدخلن وبعدين هنه شسون حتى عيب
عادي حالهن حالنا حجن خوما انگلبت الدنيا

غزل : تعاي والله الج بوسة من بوسة ام يونس العلم

ديمة : راحن البنات بوسن زبيدة وهي بوستهن

طبعًا بنات عمي فاضل حيل علاقتهن قوية بزبيدة لأن هي الوحيدة الي اهتمت بيهن وبأمهن من بعد موت اختهن وعمي وهالشي وطد العلاقة بيناتهن

بعد گلبي زبد ساعات احسها هي عمود بيت جدي ، كلهم يموتون عليها من جدي لحد اصغر طفل

حتى نسوان حموينها من عاشرنها حبنها وهي فارضة احترامها بالبيت

وصح مسيطرة والبيت بأيدها بس بنفس الوقت حبابه ويه الكل و توزع حنينة واهتمام على الصغير والجبير ولهالسبب الكل يحبها

حسيت على ايد تمسح على ظهري ، رفعت راسي شفتها دادا ابتسمتلها واخذت ايدها بستها

حضنتني وخلت راسي على بطنها ، عيني على امي الكاعدة على اعصابها وبيبي حمزية تحاول تهدأها
ومو گادرة

مرت ساعتين تقريبًا وطلع جدي سألني گدام الكل

نوح : هاا جدي انتِ سمعتي كل الحديث الدار بيناتنا جوه الجماعة يگولون شتريد بنيتكم احنه قابلين بس خلي تقبل

واني كتلهم جيتكم على راسي بس الرأي الاول
والأخير لحفيدتي

وهسه گليلي جدي شنو رأيج ؟ اذا تقبلين ترجعين لطليقج حتى اروح ابلغهم واذا ما قابلة هم اروح انطيهم قرارج واعتذر منهم وينتهي الموضوع

المهم رغبتج انتِ

سولفيلي جدي قابلة ترجعين لو لا ؟

ديمة : عين على خواتي الديحاولن يطمنني بعيونهن وعين على امي التخزر بيه

اخذت نفس وبلعت ريگي

حجيت بصوت ناصي ... موافقة

النوح : موافقة ؟

ديمة : باوعت لخواتي الي ابتسمن وهزيت راسي

جرني جدي باس راسي وحضني

النوح : بيها الخير بويه ، الله يكتبلج الخير حبيبتي

ديمة : راح جدي يبلغهم واجوي الكل بوسوني وايدوني الا امي جانت تخوزر بيه وكإنما تريد تشرب
من دمي

حمزية : زين تسوين بيبي عاشت ايدج احسن قرار هذا

ديمة : ابتسمتلها بخفه وشفت هارون يطلع من الاستقبال ويتوجه الي

هارون : الجماعة جايبين شيخ وياهم ويردون يعقدولكم مرة ثانية

خوما عندج اشكال ؟

ديمة : هاا ، نعقد هسه

هارون : اي هسه ، عندج مشكلة

ديمة : للـ لا

هارون : لعد عدلي حجابج وتقربي يم الباب واذا عندج شي تردين تضيفي للعقد من يسألج الشيخ گولي لتخجلين خوش

ديمة : هزيت راسي واجتي بيبتي تركض نزعتني حجابي الاسود وانطتني جادرها مال الصلا الي لونه ابيض

حمزية : هاج يمه عقدي بهذا الچادر اني مزورته بيت الله من رحت حجيت

وما فديوم دعيت ربي واني لابسته اذا ما استجابلي ، لبسي حبيبتي بلكت الله يكون فالة خير عليج

ديمة : لبستني يا وحطولي كرسي يم الباب وكعدت

فزيت من زبيدة خلت حوض صغير جوه رجليه مليان ورد وياس واجت خلت بي مي وابتعدت مبتسمة

زبيدة : عذريني بس لازم اطبق العادات والتقاليد

ديمة : ابتسمتلها وبديت استمع للشيخ وهو يحجي
وايدي بأيد خواتي

سألني عن متطلباتي وجاوبته ماعندي شي

اخذ مني التوكيل وتم العقد بيناتنا

وانتشرت الهلاهل بالبيت

______________________________________

بصائر : فارشة سجادتي بأتجاه القبلة وكاعدة اصلي صلاة قضاء الحاجة

كملت ورفعت اديه ادعي رب العالمين يقضي حاجة امين ويرد ديمة لحياته

لزمت القرآن وختمت الحزء الثلاثون وبهيج اكون ختمت الختمة الثانية لوجه الله بنية رجوع ديمة وامين

يارب تقبلها مني وسامحني على كل السويته ولتاخذني الا وانت راضي عني

رفعت عيني عن مكان القبلة من شفت يطب للغرفة

اباوع لملامح وجهه وانتظر اي تفسير تترجمه الي معاني

نزلت دموعي وبجيت من شفته رفع ايده وهلهل هلهولة شكبرها طشت بالبيت كله

كمت من السجادة ورحتله عليك عليه قبلت ديمة قبلت ؟

حليم : قبلت والله وقبل ساعة عقدلهم الشيخ

افرحي حبيبتي افرحي نيتج ونية اخوج جانت صافية الله ما ردج ولا ردة هالمرة

بصائر : حضنته ونشغت ، الحمدلله الف الحمدلله

يمه حليم ممصدگة معقولة قبلت ؟!

حضني حيل محاول يهدأني

حليم : والله العظيم قبلت وداعة عيونج ، شو كافي بجي موزين عليج يبعد روحه لحليم

بصائر : ابتعدت اضحك وامسح دموعي

باوع ما دام ديمة وامين رجعو قباجر راح اوفي نذري ، امشي هسه انطيك فلوس تشتري ذبيحة وتوزعها باجر على الفقراء

واني هم لازم اتحضر حتى اصوم اني ناذرة اصوم شهر كامل اذا الله قضى حاجتي وفدوة لأسمه ما قصر

حليم : لهالدرجة فرحانه ؟

بصائر : هزيت راسي اضحك كلش كلش فرحانه ، حطيت ايدي على گلبي

احس هسه ياله راح اگدر انام مرتاحة وضميري بارد على الأقل ساهمت ولو شويه برجعتهم

اني عشت اربع سنوات معلعله والسبب هالموضوع هسه ياله اگدر ابدي بداية جديدة

تعال تعال خلي ابوسك على هالأخبار الحلوة ، بوست وجهه من كل مكان وهو يضحك

حليم : ههههههه اويلي يابه زمان عن هالدلال اني

بصائر : بسته حيل احبك اني اموت عليك اموت عليك
والله

حليم : هههههههه اني هم اموت عليج

__________________________________

ديمة : غافية وفزيت مخترعة على رگعة الباب ، شلت
راسي لكيت امي واكفه ووجها احمر دم

وئام : كومييييي عينيييي كوميييي رجلج وامه عد بيت جدج ويردوووج

ديمة : بسم الله الرحمن الرحيم شبيج يمه

وئام : كومييي يردوج عيني الأمير اجه عليج شوفي شيريد منج

خو كسرتي حجايتي يديمة امداج يغبرررره راح ترجعين للمدمعة واااالله اذا اجيتني فديوم زعلانة

بالنعال ادكج انتتتتِ واليتوسطلججج يمي ييييله كومي

ديمة : حرام بالحرم كلشي ما افتهمت طبت عدت وصفت عليه وطلعت

باوعت لدادا ، هاي شبيها امي ؟

ام حسن : ما عليج بيها جايتها الحالة

امشي غسلي وبدلي واكليلج لگمة وروحي لبيت جدج

ديمة : تثاوبت بيش الساعة هسه ؟

ام حسن : هسه بالأربعة العصر يمه حتى الصلاة فاتتج

ديمة : يبووو هاي هالگد نمت اني

ام حسن : عادي يمه اكيد تلكيج تعبانه نوم الهنا ان شاء الله

يله كومي صلي وتحضري ولحگينا

ديمة : هزيت راسي وكمت ، تمغطت وتنهدت داخلة للحمام سبحت وطلعت لبست فستان صيفي مال بيت
ويا ربطة ستن

ما حطيت مكياج مجرد تعطرت ونزلت اكلتلي تيناية
ورحت لبيت جدي

طبيت ما لكيت احد بالصالة والأصوات كلها جايه من الإستقبال

دخلت للمطبخ لكيت زبيدة تطلع الكيك والمعجنات للعاملة وتگلها شتسوي بيهن

اندارت وباوعتلي

زبيدة : صح النوم يا ورد

ديمة : ابتسمت وهي تقدمت بوستني من خدودي

زبيدة : صدقة لهالجمال شو وجهج متفح اليوم

ديمة : شدعوة زبيدة عفية لتستلميني الله يخليج

زبيدة : ههههه دروحي طبي للأستقبال سلمي علما اجيب الضيافة اني والعاملة ونجي

ديمة : مشيت ناوية اروح للأستقبال ورجعت باوعتلها
اكول زبيدة خوما زعلانة مني لان قبلت

زبيدة : لج بابا شبيج !! تمشين منا لا انيم هالبلم براسج

كافي سدي الموضوع ولتضلين تاكلين بروحج امشي ولي امشي

ديمة : دفعتني بايدها ورجعت تكمل ، ضحكت وطلعت من المطبخ

رحت للأستقبال وكفت بالباب تحمحمت ودكيت الباب ودخلت على كيفي

صارت خالة هناء بوجهي ، سلمت وهي كامت بسرعة
حضنتني

بادلتها الحضن وابتسمت من شميت ريحتها

هناء : يمه شگد مشتاقتلج

ديمة : ابتعدت وبوستها اني هم والله حيل معتامة عليج

هناء : مو بگدي والله ، ولج ديمة متتخيلين فرحتي برجعتج ، الله شاهد يأحس برجعتج الروح ردتلي

ديمة : ابتسمت ورجعت بوستها

شلت راسي وصارت عيني امين الواكف كدامي

ابتعدت خالة وسوتلي مجال تريدني اسلم عليه
ترددت اتقدم وهو الظاهر حس فهو الي بادر وتقدم يمي ومدلي ايده يريدني اسلم عليه

باوعت لجدو الي اشرلي بأيده بمعنى عادي سلمي عليه

مديت ايدي على كيفي خليتها بأيده ، قشعر جسمي كله من اصابعه لامست اصابعي

وعلى اثر الشعور الي اجتاحني بسرعة جريت ايدي ورحت كعدت يم خالة هناء وهي بعد گلبي كل شويه تبوسني

امين : حجي ما دام ديمة حضرت فهاي كدامها اذا هي الها رغبة نسوي عرس مرة ثانية فآني ماعندي مانع

واذا متحب فيفضل خلال هالچم يوم نجدد عقد المحكمة واني هم اجهز البيت لأستقبالها

النوح : اني افضل تگعدون بيناتكم وتتوفقون لو شتگولين ام امين تتفضلين يمنه بالصلا ونعوف الشباب على راحتهم

هناء : اي اكيد

ديمة : طلعو الكل واجت زبيدة حطت الضيافة بالأستقبال وباوعت لأمين وعوجت حلگها وهو
ابتسملها

امين : شلونج زبيدة

زبيدة : اني زينه انت شلونك

امين : الحمدلله بنص الخير

زبيدة : طبعًا غير اختي رضت ترجعلك وعلى طاري اختي اسمع امين والكعبة الشريفة اذا اسمع بيك
مضوج ديمة هالگد والنبي اخذها وما اخليها
ترجعلك بعد لو تموت

امين : هاهي متفقين

زبيدة : ابتسمت خوش

يله اعوفكم

ديمة : طلعت زبيدة وسدت الباب وراها ، تحمحمت من شفته باوع للباب وگام كعد بصفي

امين : شلونج ديمة

ديمة : الحمدلله

امين : احم عندج طلبات معينة تحبين نسويها

ديمة : اي عندي بس ما اريد عرس ولا اي شي

امين : هاهي على راحتج ، كملي

ديمة : انداريت وصرت كاعدة گباله

امين اني وافقت انطي فرصة لعلاقتنا لكن مع هذا اريدك تنطيني فترة حتى ارجع اتقبلك

لتفهمني غلط اني فعلًا حابة نرجع مثل قبل بس هم ما اگدر بسرعة اتخطى الصار وارجع وياك ولا كإنما
صار شي

ممكن تخليني على راحتي ؟

امين : عادي تنطيني ايدج ؟

ديمة : هاا

امين : اريد الزم ايدج مرة ثانية ، عادي ؟

ديمة : ما رديت عليه وهو من شافني ساكته مد كف ايده جر ايدي خلاها على لحيته وباس باطنها

حرك شفايفه محاجيني وشفايفه تتحرك على ايدي

امين : ديمة اني من بعد ما الله كتب وخلاج ترجعيلي خلص ما اريد لا منج ولا من الدنيا شي

وما اريدج تتقيدين ، الشي التردي واليريحج سوي
اني كلشي ما اريد منج بس تبقين گدام عيوني
ووياي

بس طلب واحد اريده منج بس هذا غيره ما اريد

اريد من اگعد الصبح الگاج نايمة بصفي حتى اذا مو بحضني المهم بصفي

واريد تجمعني بيج سفرة وحدة ، بس لتغيبين عن عيني هو هذا الطلب الوحيد الاريده منج

اريد استشعر وجودج حتى واني نايم

باقي الأمور ما مستعجل عليها ومستعد اصبر عليج بدال اليوم دهر كامل منا لمن ترجعين تتقبليني

هيج زين ؟

ديمة : هزيت راسي رجع باس باطن ايدي ونزلها مشابك اصابعي ويه اصابعه

امين : تدرين ديمة اني ما مصدگ انتِ هسه گبالي
من فرحتي بيج ما اعرف شسوي حتى ردة فعل
ماعندي

ديمة : ولا اني مصدگه إني انطيتك فرصة وقبلت ارجع بعد الصار

امين : وعد يا ديمة ما راح تتندمين لأن انطيتي علاقتنا هالفرصة

واذا تندمتي بيوم لأن رجعتيلي عود تعاي وكليلي امين انت طلعت مو رجال ولا گد حجايتك

ديمة : ان شاء الله تكون عند حسن ظني

امين : عادي احضنج ؟

ديمة : هزيت راسي وهو بسرعة تقرب وحاوطني بأديه

ما بادلته بس غمضت عيوني حيل ، تنهدت من حسيت بي يشمني ويتحسر

امين : اوف يهالريحة شگد تمنيت اشمها من جسمج
والله يلو ياخذني الموت هسه ما راح اگول لا

احبج ولج ديمة والله احبج

ديمة : رفعت ايدي بادلته الحضن وغمضت من شد اديه على جتافي حيل

ضلينا فترة متحاضنين بهدوء لا هو حچه بعد ولا آني

ما ابتعدنا الأ لمن اندكت الباب ، اباوع لأمين شلون الي عبالك چان غافي وگعد

دخلت خالة هناء وكلت لأمين انهم تأخرو ، گامو سلمو عليه وراحو

مرن كم يوم ورحنا عقدنا عقد جديد بمهر ومؤخر جديد رغم آني ما طلبت شي بس امين اصر وخله
مبلغ المهر كلش عالي والمؤخر جان اعلى

وعلى طاري هستوه دزلي بيجات مال غرف وطلب مني اختار وحدة حتى يروح يجيبها

لأن طلب مني نطلع سوه ونختار غرفة واني رفضت لأن مالي خلك

المهم ضليت اگلب بالغرف وعجبتني وحدة دزيتها اله
وهو انطاني لاك وراح

اخذله اسبوع مشغول بترتيب البيت ولمن كمله گلي اتحضر حتى يجي عليه

وچان تركض الأيام ويجي هاليوم وهياتني داسد جنطي واسحبهن حتى اطلعله

نزلت جوه وشفت اهلي وجوهم مؤربة ، امي ودادا الدموع مغرغرة بعيونهن ومعين سودة عليه يباوعلي
ويمسح بعيونه

تقدمت حضنتهم وبجيت

وئام : ديري بالج على روحج حبيبتي

معين : اي شي يصير وياج بس خابريني عسما بالخمسة الصبح اجيج

ام حسن : اهم شي علاجج لتهملي ادري بيج اذا محد يذكرج تنسين

وسيلة : وين رايحة دمدم ابقي حبابه

ديمة : نزلت لمستواها حضنتها وشميتها يمه يعز عليه اعوفهم ولو بأيدي اخذهم وياي

ابتعدت ابوس بيها ، ان شاء الله ما اعوفج حبيبتي دائمًا راح اجي اشوفج

كمت بوستهم كلهم وحضنت معين ومشيت طالعة ويا

رحت سلمت على بيت جدي وبوست خواتي وطلعت ويه امين

الطريق كله اني ابجي لحد ما امين وكف سيارته بنص الشارع ياله وخرت اديه عن وجهي

امين : شو باوعيلي ، ليش هالبجي ؟ قابل وين رايحه انتِ شو هذا وينه بيتنا بأي وقت يعجبج اجيبج
الهم واني الممنون هم

كافي يله شو مسحي دموعج وهاج اشربي ماي وصلِ على محمد

ديمة : مسح عيوني وشربني مي وضل لازم اديه ويهديني منا لمن سكتت ياله قبل يحرك

ربع ساعة تقريبًا وطبب سيارته لمنطقة راقية كلش شوية ووگف سيارته گدام بيت عالي

امين : يله تفضلي وصلنا للبيت

ديمة : فتحت الباب ونزلت اباوع لواجهة البيت التاخذ العقل

امين : يله حبيبتي تعاي

ديمة : انتبهتله منزل جنطي وفاتح الباب ، مشيت ويا ودخلنا للبيت

جان البيت تقريبًا مساحته 300 متر 200 بناء و100 حديقة

وشلون حديقة هي صلوات بيها اشكال ، فتح امين باب المطبخ الي تطل على الحديقة واشرلي ادخل ورا

دخلت للمطبخ وعبرت ويا للصالة ، اباوع لتصميم البيت كله ابيض والاثاث بين النيلي والابيص

حتى المطبخ كله ابيض ما شاء الله البيت يجنن
ونظيف ينگرط گرط

امين : شنو رأيج بالبيت

ديمة : كلش حلو هذا تصميمك

امين : الخريطة تصميمي والديكور اختيار بمساعدة مهندس ديكور

ديمة : عاشت ايدكم كلش نازك البيت

امين : تعالي اروايج باقي البيت

ديمة : لزم ايدي ومشاني وياا مراويني البيت

البيت جان طابقين الطابق الأرضي بي صالة و مطبخ وصحيات ومخزن

وغرفة وحدة كاملة هي وصحياتها مسويها امين مكتب يشتغل بي

والطابق الثاني بي 3 غرف كاملات هم هن وصحياتهن
واكو صالة مفروشة وبيها تخم قنفات وتلفزيون

امين : تعاي شوفي غرفتنا

ديمة : دخلت ويا لغرفتنا وشفتها ، جبيرة حيل بس تجنن

امين : عجبتج ؟

ديمة : تجنن ما توقعتها هيج حتطلع حلوة

امين : الحمدلله همزين عجبتج

هاي جنطتج البيها ملابس البيت انتِ اخذي راحتج وبدلي ومن تكملين نزلي حتى نتعشه

ديمة : تمام ، نزل هو واني اخذت جنطتي طلعتلي تراك مال بيت بدلت ومشطت شعري ونزلت

لكيت امين ويحمي جدور على الطباخ

امين : عندج شي لو اصـ...

ديمة : انتبهتله ديحجي وسكت صافن بوجهي ، شبيك ؟

اباوعله ذب الخاشوكة من ايده واجه وگف گبالي
وخله ايده على شعري يمسح عليه

غمضت من تقرب خله شفايفه عليه وكام يشمه ويبوسه

امين : افييش يا خصلات هالذهب شگد تمنيت يرجع
بيه الزمن بس حتى اشوفهن واشم ريحتهن

متتخيلين شگد اني مشتاق لكلشي بيج حتى صبغ الاظافر مالتج جنت اتحسر عليه

ديمة : لزمت ايده وتنهدت امين

امين : هاا ياروحه لأمين

ديمة : امين الاكل على النار ليحترك

امين : هاا ، اي اي صح

روحي كعدي هسه اصب حتى نتعشه

ديمة : اكعد انت اني اصب

امين : لا لتعبين نفسج

ديمة : تقربت اخذت الخاشوكة واشرتله على الميز ، استريح اني اصب

ابتسم ودنك باسني من خدي

امين : صار

ديمة : احم ، انداريت فتحت الجدور جان اكو جدرين جدر دولمة والثاني شوربة

كلبت الشوربة وسألته ، هاي خالة طابختهن

امين : لا العاملة

ديمة : باوعتله ، ليش انت عندك عاملة ؟

امين : اي

ديمة : شعجب ؟

امين : اني صار سنين عايش وحدي ومثل متعرفين
عندي شغل وما اگدر اخدم روحي وحدي

فجبت عاملة تساعدني ، تطبخ ، تنظف هاي السوالف

ديمة : تعال دليني مكان المواعين ، گام دلاني عليهن
اخذتهن وبديت اصب

زين شعجب خالة بطلت بعد متطبخ لو شنو ؟

امين : انطيني حبيبتي

ديمة : خله الأكل على السفرة وسحب ايدي كعدني وراح كعد

قدم الشوربة مني واشرلي حتى اكل ، اكلت وهو بده يسولف

امين : امي اصلًا ما عايشه وياي ولا تطب لبيتي

ديمة : ليش ؟

امين : من بعد انفصالنا اني وياج وهي حرمت على روحها تتقرب لأي شي يخصني لو يخص بصائر

صح تحجي ويانا طبيعي بس متقبل تطبلنا ولا تاكل عدنا

شگد حاولت وياها اني وجانت ترفض حتى ما قبلت تجي وتشوف البيت

واني هم ما حبيت الح عليها عفتها على راحتها وگمت من اشتاقلها اروح اشوفها عد بيت اسلام وارجع

ديمة : ولهذا السبب جبت عاملة

امين : تقريبًا اي

ديمة : زين اسلام مو چان متزوج شو سمعت يوسف وقت الي احترگت شركتك انه رايح بشهر سهر

امين : اي صح بس هاي الثانية

ديمة : عزة بعينه متزوج ثنين

امين : ههههههه لا يابه بس هو جان متزوج وما طولو هو ومرته اقل السنة تقريبا وانفصلو

ديمة : زين شنو السبب

امين : يكول جنت راجع من الشغل وسمعتها تطرد بأمي من البيت تگلها انتِ مقيدتني وما جاي اگدر اخذ راحتي بسببج واني ما ملزومة بيج وما اريدج
تعيشين ببيتي

وهو سامعها منا متهستر گايم رامي عليها الطلاق وماخذها شامرها عد اهلها وحالف ومتقسم ميرجعها
بعد

اهل البنية والبنية هم شكد تعذرو منه وكلوله غلط وميكرر هالتصرف بعد بس هو ركب راسه

الكم رب الي رب ما دامها طردت امي مالها رجعه بعد
تالي من عجزو يخلو يغير رأيه عافو

وهو هم الله رزقة وگدر يستثمر فلوسه الطلعتله بالورث وفتح مركز تسوق جبير بالمحافظة
وما شاء الله كلش نجح وصار عليه اقبال

ديمة : ابتسمت هازه راسي ، رايحتله اني صلوات ماكو محط رجل والناس كلها دتروح تتسوك منه

يستاهل اسلام ورده وهواي تعب على نفسه ، فدوة الله يوفقه بحياته اني كلش احبه

امين : واخو هم كلش يحبج

ديمة : غلست وسويت روحي اكل من خبزة الدولمة

اكول امين زين اسلام وين تعرف على زوجته الثانية
لو هم زواج تقليدي

امين : لا مرته الثانية بنية يتيمة وعايشة عد عمتها وجانت تشتغل عنده بالمركز حتى تعيل نفسها وهناك هو شافها وانعجب بيها ومن تقدملها وافقت

ديمة : وشلونها ويه خالة خوما مأذيتها نفس الأولى

امين : والله شو امي تگول عليها خوش بنية وكلش فقيرة وحبابه

ديمة : الله يهديها ويسعدها

امين : آمين

شو ما جاي تاكلين ، شنو ما عجبج الأكل ؟

ديمة : لا بالعكس كلش طيب بس اني ما اگدر اثكل
ومتبعه نظام غذائي فبسرعة اشبع

امين : ما اشوف عندج وزن زايد حتى تسوين رجيم
حتى جسمج اني اشوفه اضعف من قبل

ديمة : اني ما مسويه رجيم بس مثل متعرف اني عندي سكر وكلى وحدة فحتى احافظ على صحتي
اضطريت اتبع نظام غذائي

صح ما حارمة روحي من شي بس ابد ما اثكل

يعني بالريوك كلش كافي عليه نص صمونة وياها قطعة جبن واستكان جاي وبعدها ما اكل شي

وعود اذا جعت كلش بالدوام اكل فواكه ومن ارجع اتغده شي خفيف واضل صايمة من الغدة للعشه وأغلب الاحيان ما اتعشه الا اذا چان العشه مرتب نفس هذا

شويه شويه تعودت على هذا النظام وگمت ما اگدر اكل زيادة عن المعتودة عليه وهم كمت العب
رياضة فنزل وزني

امين : وحلويات هم تاكلين لو گاطعتها ؟

ديمة : لا عادي اكل بس يعني مو هواي بالأسبوع مره اذا اشتهيت شي حلو اكلي نستلة لو قطعة بقلاوة
واكتفي

فإذا تشوفني اكل قليل مو بمعناها الاكل ما عاجبني بس اني متعودة على نظام وما اگدر اغيره

وهسه كملت انت ، اشيل المواعين ؟

امين : كعدي انتِ اني اشيلهن

ديمة : بس اني ماعندي شي

امين : ماكو داعي هاي كدامج راح احط صينية الدولمة بالثلاجة واغسل الطوس وهالچم ماعون

تشربين چاي ؟

ديمة : اي بس خلي اني اسوي وانت اغسل المواعين

امين : هاهي الي تشوفي البيت بيتج واحنه خطارج
شتفصلين نلبس

ديمة : ابتسمت ورحت أخذت القوي وسويت جاي وهو كمل وكعدنا شربنا چاي ودردشنا شويه

تالي تأخر الوقت وامين صعد باقي جنطي

امين : تحبين اساعدج بترتيب هدومج

ديمة : لا شكراً ماكو داعي

انت نام مبين عليك هواي تعبت اليوم اني بس ارتب ملابسي واجي انام

امين : لا ماكو تعب قابل شمسوي ، تعاي اراويج الجهة الفرغتها الج وشوفي تكفيج لو لا

ديمة : مشيت ويا لغرفة الملابس لكيته مسوي جهة كاملة من الحايط للحايط اله وتقابلها جهة ثانية الي

امين : هاي الصفحة كافية عليج لو افرغلج من خاناتي ؟

ديمة : لا هاهي هذا كافي وزايد

انداريت عليه ، شكراً تگدر تاخذ راحتك اني اكمل واجي

امين : ماشي تصبحين على خير

ديمة : وانت من اهل الخير ، ابتسم وباس جبيني وابتعد طالع من الغرفة

تنهدت وفتحت الكنتور وبديت ارتب هدومي لان عيني متاخذ نوم فكلت التهيلي بشي علما انعس

والله رتبتلي اربع جنط مهمات وبقيت جنطتين گلت اعوفهن على باجر

طفيت اضوية الغرفة وطلعت لكيت الغرفة ظلمة وبيها ضوه خفيف جاي من الصالة

مشيت لاتجاه الجرباية وعيني امين النايم ، ترددت بين إني اتمدد بصفه لو اروح انام على القنفة

احس اذا اجي وانام بصفه ما ارتاح فتقربت
داخذ المخدة وشفته فتح عيونه

حجه بصوت مطبگ من اثر النوم

امين : لترحين تنامين هناك تعاي يمي

ما راح اتقربلج وعد بس اريدج تنامين يمي حتى من اكعد الصبح اشوفج بنفس مكاني

طبعًا اذا هالشي ميضوجج

ديمة : جريت نفس وعدلت المخده وتقربت متمدده بصفه على بعد مسافة

اباوعله ابتسم ورفع الغدة غطاني وخله ايده جوه خده وبقى يباوعلي ورموشة تصعد وتنزل

ضليت صافنه بوجهه لحد ما نعست وبعد معاناة گدرت اغفى

كعدت ثاني يوم متأخرة ، باوعت للساعة لكيتها بالـ11
الصبح ، طبعًا اني ماخذه اجازه ثلث ايام فما دايره
بال للوقت

باوعت داير مداير الغرفة لكيت امين مرتب المكان النايم بي بس مموجود

وخرت الغطة وكمت رتبت الجرباية وبوجهي للحمام سبحت وبدلت ملابسي لثوب بيت نص ردن

اخذت علاجي ونزلت جوه ، البيت هدوء عبالك بس اني بي والله مبينه هالعاملة هادئة

دخلت للمطبخ وصار كفاها بوجهي ، تفاجئت من شفتها لابسه دشداشة كودري ومدخله اطرافها
بملابسها الداخلية

تحمحت حتى تنتبهلي وصبحت عليها

صباح الخير

اندارت عليه ويا ريتها ممنداره

****************************************
انتظرو تكملة هالجزء بالبارت الي بعده والي ان شاء الله حيكون هو الجزء الأخير من هالرواية ❤️

شنو رأيكم بالأحداث ؟

.