رواية المصيدة ال الفصل الثالث 3 - بقلم عادل عبد الله

 روان : ميرسي أوي ، هسيبك واقفل بقي علشان معطلكش عن النوم .

بلال : لسه بدري ، لو معندكيش مانع ممكن نتكلم شوية ؟

روان : بلاش دلوقتي علشان تنام ، لو حابب ندردش شوية ، ممكن بكره تيجي بدري ساعة عن النهاردة ، جلال بيكون نايم في الوقت ده .

في اليوم التالي

ينتهي بلال من عمله مبكراً ، ويخرج متجهاً إلي منزل جلال .

يدق جرس الباب لتفتح له روان بأبتسامة عريضة : تعالي أتفضل يا بلال أدخل .

يدخل بلال يشعر بأن المكان لم يعد غريباً عليه !!

روان : تحب تقعد فين ؟ الريسبشن ولا البلكونة ؟

بلال : أي مكان .

روان : تعالي في البلكونة الجو حلو اوي فيها .

يجلس بلال ثم تأتي روان إليه بمشروب مثلج .

بلال : اومال عم جلال فين ؟

روان : ما أنا قولتلك بيكون نايم في الوقت ده ، قدامه ساعة علي الأقل علشان يصحي .

بلال : هو بينام كتير أوي ليه ؟

روان : ما أنا قولتلك مواعيد نومه متلخبطة .

بلال : ربنا يبارك في عمره .

روان : آميين يارب .

بلال : واضح من كلامك عن عم جلال أنك بتحبيه اوي .

روان : جلال زي ما قولتلك قبل كده كل حاجة في حياتي ، أبويا وأخويا وجوزي ،كل حاجة .

بلال : هو فعلاً شخصية تتحب أوي .

روان : فعلاً ، ولما تعاشره أكتر هتحبه أكتر .

بلال : أكيد .

روان : مكملناش كلامنا المرة اللي فاتت .

بلال : عن ايه ؟

روان : قولي ايه هي مواصفات البنت اللي نفسك ترتبط بيها ؟

بلال مبتسماً : يعني .. تكون زيك بالظبط .

روان تبتسم : أمممم ، أنا بتكلم بجد .

بلال بابتسامة : وأنا بتكلم بجد .

روان تضحك : بطل هزار يا بلال ، قول بقي مواصفات البنت اللي بتتمناها ، نفسي أعرف ذوقك ، يمكن أساعدك .

بلال : يعني تكون حلوة ، لطيفة ، رقيقة ، مثقفة ، شخصيتها قوية وجذابة .

روان تضحك : كل ده ؟؟

بلال : أيوه ، وفيها ايه ؟!

روان : أنت طماع أوي ، كل المواصفات دي عايزها في بنت واحدة !! صعب أوي يا بلال !! موعدكش .

بلال : لأ مش صعب ، أنتي أهو فيكي كل المواصفات دي .

روان " بدهشة " : لكن أنا متجوزة !!

بلال : قصدي إن مش مستحيل تكون كل المواصفات دي في بنت واحدة ، والدليل أنتي أهو موجودة .

روان تضحك : أنت مجامل أوي .

بلال : بالعكس ، أنا بتكلم بجد .

روان " بابتسامة " : أممممم ، علي العموم أنا عرفت المواصفات وأوعدك لو لقيتهالك هقولك علطول .

بلال " ضاحكاً " : ياريت .

هنا يأتي جلال مبتسماً : أيه ده !! بلال عندنا ؟!

يقف بلال ويصافحه : عامل ايه يا عم جلال ؟

جلال : بخير الحمد لله ، أنت هنا من بدري ؟

روان : لأ ابداً ، بلال جه من شوية ومش رضيت أصحيك قولت أسيبك تصحي براحتك .

جلال : طيب اعمللنا قهوة بقي من أيديكي الحلوين ، علشان أفوق .

روان " بأبتسامة " : حاضر يا حبيبي .

تذهب روان إلي مطبخها بينما ينظر جلال إلي بلال قائلاً : أجمل حاجة في الدنيا زوجة جميلة و بتسمع الكلام .

بلال : فعلاً .

جلال ضاحكاً : وأنت عرفت منين ؟ ده أنت لسه متجوزتش !

بلال : بسمع كده من أصحابي واللي أتجوزوا وجربوا .

جلال : تعرف يا بلال ، لو كان عندي بنت كنت جوزتهالك علطول .

بلال : ده شرف كبير وثقة كبيرة أوي يا عم جلال ، ياريت أكون قدها .

جلال : أنا بتكلم بجد ، لكن للأسف معنديش .

بلال : حضرتك معندكش أولاد خالص ؟

جلال : عندي ولدين كبار من مراتي الأولي الله يرحمها .

بلال : وهما فين ؟

جلال : الأتنين مسافرين وعايشين بره .

بلال : و مفكرتش تخلف تاني لما أتجوزت مدام روان ؟

يضحك جلال بسخرية : لأ .

يشعر بلال بالحرج !!

في ذات اللحظة تأتي روان و تضع  القهوة أمامهم .

روان تضحك : سمعتكم جايبين في سيرتي !!

جلال يضحك : كنت بقول لبلال لازم يتجوز عروسة حلوة زيك يا روان .

روان : بلال ابن حلال ويستاهل بنت أحسن واجمل مني مليون مرة .

بلال : أنا مش عارف أقولكم ايه ، أنا بجد سعيد جداً أني أتعرف بشخصيات جميلة زيكم ، مكنتش أتخيل أني أعرف شخصية بطيبة وحكمة عم جلال ولا شخصية بجمال و رقة مدام روان .

جلال : أنا كمان من أول سمعت صوتك في التليفون قولت أنك إنسان محترم وابن حلال وممكن تكون صديق أطمن أدخله بيتي ويكون صديق ليا ولأسرتي الصغيرة .

روان : أنت متعرفش يا بلال دخولك حياتنا عمل فينا ايه !! أنا وجلال كانت حياتنا بدأ يدخلها الملل بسبب قلة خروجنا من البيت ، ولما جيت أنت دخلت حياتنا ، دخل معاك طعم حلو للحياة وللبيت .

جلال يبتسم : أحممم ، تقصدي ايه يا روان ؟ أنتي كنتي زهقتي مني ولا ايه ؟

روان : لا يا حبيبي مقصدش ، ربنا يخليك ليا يارب .

جلال : شوفت يا بلال كلام روان ؟!

بلال : مدام روان متقصدش ، دي بتحبك أوي ، دي حتي كانت لسه بتكلمني قد ايه هي بتحبك قبل ما تصحي من نومك علطول .

روان : بقولكم ايه بقي ، أنا هشرب القهوة معاكم وهنزل واسيبكم تتكلموا علي راحتكم .

جلال : ليه يا حبيبتي ؟ رايحة فين ؟

روان : عندي ميعاد عند دكتور الاسنان.

جلال بدهشة : ومقولتليش ليه ؟

روان : آسفة يا حبيبي نسيت أقولك .

جلال : طيب روحي ومتتأخريش ، و خلي بالك من نفسك كويس .

روان : حاضر يا جلال ، متخافش عليا .

بلال : أنا أسف جداً ، أنا كمان مضطر أنزل .

جلال : ليه ؟ لسه بدري يا بلال !!

بلال : عندي مشوار لازم أعمله قبل ما اروح  .

جلال : يعني هتنزلوا أنتوا الاتنين وتسيبوني لوحدي ؟!

روان : ياريت تيجي معايا يا جلال ، ايه رأيك ؟

جلال : لأ ، أنا مش هقدر أنزل دلوقتي ، أنا بس هستأذن بلال يوصلك في سكته .

روان : أنت معاك عربية يا بلال ؟

بلال : للأسف لأ .

روان : مش مهم ، أركب معايا لحد عيادة الدكتور وكمل أنت مشوارك .

جلال : أهم حاجة متتأخريش يا روان علشان بقلق عليكي ، وأشحني تليفونك قبل ما تنزلي علشان أطمن عليكي لو حسيت أنك أتأخرتي .

روان " تبتسم " : حاضر يا حبيبي ، جهز نفسك يا بلال ، وأنا هدخل ألبس وأرجعلك .

بعد دقائق ...

في السيارة ...

تقود روان سيارتها ويبدو عليها الشرود ، بينما يجلس بلال بجانبها يلاحظ شرودها ثم يسألها : مالك يا روان ؟

روان " بابتسامة باهتة " : مفيش ، أنا كويسة .

بلال : لأ ، واضح إنك مش كويسة خالص !!

سكتت روان للحظات ثم سألته بصوت خافت : هو أنت دايماً كده ؟

بلال : كده أزاي ؟؟

روان : يعني بتحس باللي قدامك بسهولة ؟

بلال يحاول يبتسم : مش دايماً ، بس معاكي أنتي الموضوع واضح .

نظرت إليه نظرة طويلة للحظات " وكأنها تقرر أن كانت تتكلم أو تسكت " !!

ثم قالت فجأة بصوت مبحوح : أنا مخنوقة أوي .

بلال : طب أهدي يا روان ، مخنوقة ليه ؟

ضحكت ضحكة قصيرة تحمل من المرارة ما هو أكبر من الأبتسام :  إنت مش حاسس إني لوحدي؟

سؤالها أصابه في مكان غريب داخله !!

لم يكن يتوقع أن يسمع منها تلك الكلمة !!

بلال : لوحدك إزاي ؟ ما جلال موجود !!

ابتسمت روان بسخرية خفيفة : موجود ومش موجود .

بلال : يعني ايه ؟

روان : أنا مبعرفش أتكلم معاه يا بلال .

بلال : ليه ؟ أنا شايفكم كويسين جدا مع بعض ومفيش خلافات ، ايه اللي يمنعك تتكلمي معاه ؟!

روان : فرق الأجيال ما بينا يا بلال !! جلال مبيفهمنيش ولا أنا بفهمه .

بلال : أومال عايشين مع بعض أزاي ؟ أنا فهمت من كلامك إنك بتحبيه !!

روان : بحاول مشوفش ده وأقنع نفسي إن فيه تفاهم بينا .

بلال : كويس جداً إنك تحاولي تتعايشي مع ظروفك .

روان : لكن في نفس الوقت مش لاقيه حد يسمعني ، يحس بيا !!

بلال : مش أنتوا بتعتبروني دلوقتي حد قريب منكم ؟

روان : أكيد طبعاً .

بلال : و أنا موجود لو حابة تتكلمي .

نظرت إليه وأبتسمت هذه المرة بصدق : أنا عارفة ، علشان كده كدبت كدبة الدكتور دي علشان ...

بلال : علشان ايه ؟

روان : علشان أتكلم معاك .

بلال : ليه أنا ؟

صمتت روان لحظة !! و نظرت في عينيه مباشرة بلا تردد : علشان أنت الوحيد اللي ممكن أثق فيه دلوقتي .

سكت بلال…

لكن داخله لم يكن صامتاً ...