رواية الندم مابعد الخطيئه الفصل الخامس 5 - بقلم رونق

مساء الخير ع اجمل متابعين اتمنى لكم قراءه ممتعه

❣️❣️البارت 4❣️❣️

❣️❣️الندم ما بعد الخطيئه ❣️❣️

❣️❣️للكاتبه رونق❣️❣️

جان تكول رسول استشهد تعال بسرعه

اتخبلت شنو استشهد مريم لتمزحين ويايه

والله احجي الصدك وتبجي وتصرخ

عفت المحل ورحت ع السريع

خابرت مهند

مهند الخبر صحيح

جان يبجي اي ولك مستشهد خطيه

رحت لبيت عمي ولكيت العالم مكلوبه

لكيت البنات منتهيات

شهد متنوصف حالتها

مريم متقل عنها

امه خطيه هاي قصه بحد ذاتها

لحضات وانغمى عليها

عمي مسودن يبجي مثل النسوان

اخذنه خاله للمستشفى ومغذيات وابر

بعدها جبناها

بقينه يومين ورحنه للمطار استلمنه الجثه

خطيه قناص ضاربه براسه ناهي بالمكان

اتخبلنه علي

الولد حباب وخلوق

المشكله هالواحد عند عمي

سويناله تشيع يليق بمكانه الله يرحمه

حيل اتاثرنه بي

مريم كل شويه واتخربطت

ومو زين ع حملها

احجي وياها بس ميفيد اخوها بعد خطيه

ثالث يوم الفاتحه جان يكولون مريم  كاعد تنزف

اتخبلت هذا رابع طفل ياربي

لاتفجعنه بي

حيل تعبنه

وديتها للدكتوره

كالت هواي ماذيه نفسها والطفل مهدد بالاسقاط رغم الربط

انطوها علاجات بس مفاد ابد

وره يومين صار عدها اسقاط طبعا هاي جانت ضربه قاضيه الي

خلصت الفاتحه وبعدها التهيت وي مريم بالمستشفى

طلعت من المستشفى

حذرتها الدكتوره كلتلها مو زين عليج تسوين طفل بهاي الفتره

لان الرحم مالتج تعب وكلها صارلج اقل السنتين و4 اسقاطات

شهد رجعت مكسوره وياها طفل يموت باللحضه 100 موته

خطيه يصير ازرك وشفافه زرك

كال بابا ناخذه نسويله عمليه باربيل

لان خطيه

لزمت عده

حتى بالاربعين ماراحت لان ابنها حيل متخربط

وراه

مريم كالت اشك بنفسي حامل

كمت احجي عليها انت مو اخذتي حب شلون حامل

الدكتوره مو حذرتج

مو مهم اني اريد طفل لان حيل تعبت

لج بابا متوازين لاحكين ع شلاع الكلب

كالت هاي بعد اجه شنكله ارجع

اخذتها للدكتوره وشرحت حالتها

اتخبلت كالت ماما ميصير

لازم هسه بس تنامين ع ظهرج ابد متتحركين ولا شويه

فعلا نامت وهم ربط

كالت اروح يم اهلي احسن

هنا استحي انام والناس تخدم بيه وماكو احد بس خاله خطيه

ماقبلت بعدين صممت وراحت اخذتها

خلصت العده مالت شهد

رحنه للدكتور الي بالنجف

كال الافضل يكبر شويه لان ميتحمل بنج

كناله نطلعه لبره

كال ماكو فرق

انطا علاج وطلعنه

وره فتره بدت حالته تسوء

اجه عمي وعمتي  يشوفون الطفل

من سولفتلهم شهد اتخبلو

كالوا خل نطلع للخارج

هم خطيه حالتهم ع كدهم يعني ميكدرون علاج خارج العراق

قرروا يرحون شهد وابويه

احنه تكلفنه كلشي

سوينه الجوازات وفيزنالهم وكملنه

اتقرر السفر

سافروا وبقوا هناك قريب الشهر

كالوا نجحت العمليه وفرحنه خطيه

ورجعوا للعراق وجانت حالته مستقره تقريبا

وره رجوعهم باسبوع اتخربط بالليل وصار ازرك الطفل

اخذنا بسرعه للمستشفى

بقه يومين بالمستشفى وجانت الصدمه يتوفى الطفل

حيل اتاثرنه عليه وشهد هاي قصه بوحدها

اتخبلت ملخت شعرها وبس تبجي ليل نهار

من مات رجلها مسوت هيج

امي كالت اذا صار بيها شي احملكم المسؤليه

من وراكم وافقت وهاي تاليتها

رجلها استشهد وابنها مات وهي تخبلت

شحصلتو من جبرتوها

ماخفتوا ربكم وكلتو خطيه حرام علينه نجبرها

وبالتالي هاي النتيجه

اني كام ضميري يأنبني من ناحية شهد

كلت اكيد الي ديصير بينه من وره البنيه صديقة شهد

ياربي ظلمتها للبنيه ومااعرف شلون اتصرف

عقلي واكف عن التفكير

حتى اذا اريد اصحح غلطي واخطبها

من المستحيل يوافقون

لازم ارجع اراقبها بلكي المحها واحجي وياها

بلكي نوصل لحل اني وياها

اتذكر من دعت علينه اني وشهد

فعلا الله موفقنه ابد

لازم احجي وي شهد اريد افتهم علاقتها شلون جانت وياهم

بس حالت شهد ابد متسمح الها تحجي

بديت اراقب بيتهم تقريبا شهر

ابد ملمحتها يوم واحد

اخوها محله من بيتهم مطلعه

دخت بيها معقوله تكون متزوجه

لا مستحيل

معقوله عرفوا بيها اهلها وكتلوها

يجوز هذا الاحتمال

مااعرف شلون احصل رقم الها او المحها

مريم تقريبا بشهر الثامن وهل مرت فرحنه

لان ثبت الحمل وماكو شي

مبقيها يم اهلها واني اروح يمها

لان نخاف عليها كلش

مااخفي عليكم اكو خوف بداخلي جبير من المستقبل

اخاف هذا ابني هم ميبقى عايش

طبعا الله بالمرصاد

دائما يعاقب وعقابه عدل

يعني اتهجمت ع البنيه وهي ابيتنه

اغتصبتها وطردتها

واتصلت بيه تستنجد بيه لان حامل

اني شسويت هنتها اكثر ومنطيتها مجال

شكد احاول احجي وي شهد بس رافضه تباوع بوجهي

تكول كل الصار بيه من وراك انت

مااسامحك للموت

اليوم مقرر لازم احجي وياها وبلكي نوصل لحل

دخلت لغرفتها وجانت هادئه

حيل ضعفانه لان متاكل ابد

كعدت بصفها

شلونج شهد

دايره وجها للجها الثانيه

محجت ولا حرف

شهوده ادري بيج زعلانه

اني غلطت بحقج وبحق البنيه صديقتج

اني حتى اسمها مااعرفه ابد

حتى شكلها تقريبا ناسي

اني حاب اعرف علاقتج بيهم شنو جانت

ومن جنتي ترحين لبيتهم شلون قشمروج همه لو انت من ذاتج

كامت تبجي

كالت اذا اكول شي مراح تصدكني

كولي اسمع

وروح رسول وروح ابني الي مشبعت منه

ملامسني لمس عمار

جانت علاقتنه شريفه ونزيها

ابد ماملتقين بوحدنه

يكول خاف يحضر الشيطان ويانه

لهذا السبب جانت روان ويانه بكلشي

تكعد ويانه وتطلع ويانه

جان يخاف ع سمعتي ميقبل نطلع سويه ابد

بس مرات يوصلني اذا السايق ماجاي

جنه دائما نلتقي بالبيت

مجان بيناتنه كلام غزل وغيرها امام روان

يكول اني اخاف عليج مثل مااخاف ع اختي روان

هو حبني واني حبيته بس حبنه طاهر ونزيه

هاي السالفه كلها

هو صان اختك يخاف الله يعابي باخته

يكول ماالمسج بالحرام حتى اختي هم متنلمس

لان البشر شمايعمل يتجازه

انت بالمقابل شسويت

حطمت اخته واغتصبتها وهي ابيتك

يعني شنو الي استفاديته

اشو اني ادمرت دمار

ورجعتلكم مكسوره

انت هم الله كاعد يعاقبك بس بدون متحس

يوميه ميت طفل ابطن مرتك

مكاعد تتهنه لا بزواجك ولا بالاطفال هسه تكول انت تشمتين بيه بس لاوالله مااشمت بس هاي الحقيقه

مستحيل اوصف شعوري بهاي اللحضه

يعني اشرف ناس هو واخته وصانو عرضي وحافضوا عليها

واني اجيت بكل بساطه ودمرتهم دمار

يعني يكدر كلشي يسويلها لشهد وهي بنص بيته

طلع ملامسها حتى بالغلط

اتخبلت مااعرف شاتصرف

زين شهد شاسوي ولج خطيه البنيه دمرتها

وهاي حوبتها لبينه صدك

اريد اصحح غلطي شلون

ياغلط هذا التحجي علي

انت مثل مكلت دمرتها

مستحيل يتصحح هذا الغلط

شتتوقع بعد الصار اذاخطبتها راح ينطوك

لا مستحيل يوافقون

لعد شتريد

اريد تساعديني

اريد احصل رقمها شلون مجان

مو عندك رقمها

مقفول من يوم الي تزوجت بي لهسه

لعد اكيد غيرته من وراك

الله عالم حالها هسه شلون

فدوه ساعديني

شلون اساعدك

روحي للبيت عليها واعرفي اخبارها

شنو تخبلت انت

لك اذا تشوفني يمكن تشرب من دمي

نسيت اني مشتركه بلعبتك القذره

اني الدزيت عليها

عبالي تريد تحجي وياها

معبالي تغتصبها

يابه وروحه لرسول لو ادري هيج تسوي مجان دزيت عليها

لان مستحيل اغدر بصديقتي هيج

لعد شلون لج الليل كله ماانام افكر بيها

خطيه اذيتها وبدون سبب

يعني جانت بيناتكم حتى متخلي مجال للشيطان يحضر وياكم

والله اني توقعت مقشمرينج هي واخوها

اوووف منك مرتضى شكم واحد دمرته انت

دمرت البنيه ودمرت اخوها ودمرتني الي

وحتى بيت عمو هم دمرتهم

يعني اني لو مامتزوجه رسول مصار طفل ولا اتعلقوا بي ولا اتاذوا من مات

بس انت انسان اناني فكرت بس بنفسك

محسبت حساب للمستقبل

لج شوفيلي حل فدوه اروحلج

اني ماعليه بيك ابد

لو اموت مااروحلهم للبيت

والله تطردني هاي اذا متهجمت عليه

يعني سديتيها بوجهي

انت الي ورطت نفسك اتحمل العواقب اني ماادخل بيك ابد

كملنه حديثنا

ورحت لغرفتي

صارلي فتره الليل كله بالي يم البنيه

حيل متاذي واحس بتانيب الضمير

استعجلت هواي وبالغت اكثر بردة فعلي اتجاها

مااعرف شلون اوصل الها

لو المحها مره وحده جان كدرت اخذ رقمها باي طريقه

روان : عمار اخويه كدر يوكف ع حيله

فك الدين كله بعد ممطلوب

فك الشراكه وي الولد حسب الاتفاق  وبرضات الطرفين

وهسه كاعد يلم ع سياره اله

المحل من طلعه من بيتنه هواي فرق اله

يعني ميدفع ايجار وهذا الشي ساعده يظم  فلوس الايجار

يكول حاسب نفسي ايجار

كدر يجمع شكم فلس ع اساس يشتري سياره

ماما رفضت كالت خل ازوجك وبعدين السياره

هو رفض الزواج نهائي

بس ماما زعلت عليه وصارلها شهر متحجي وياه

حاول وياها راد مفاد

قفلت ع الزواج

اخر شي وافق وجنه فرحانين لان خطيه يتعذب

هو يحبها لشهد وهي ولا بحاله راحت اتزوجت ونست كلشي

كل لماما انت اخطبيلي ع ذوقج

ماما رادت بنت خالو ديما بس هو رفض

كللها مثل اخواتي ذني

بقت ماما ادور

شرط عليها ميريد اقارب يريد غريبه

تقريبا شهرين تسال وتشوف ومن وحده لوحده

اخر شي لكتله وحده عن طريق زوجة خالو

جيران اهلها

راحت ماما وبيبي وشافنها

كالن البنيه حلوه وبعدلها سنه وتخلص جامعه

سالوا بابا وعمار عليهم وطلعوا حبابين

اتفقوا ع يوم هو يشوفها وهي تشوفه

فعلا اتشاوفوا واثنينهم وافقوا

اتفقوا ع يوم المشيه وعقد السيد

قبلها حددوا الحاضر والغايب

قررنه يوم الجمعه نروح

طلب مني عمار ادخل لمحله حتى اختار فستان الي

اني ماعندي واهس لكلشي

بس مترهم مااروح ولا ترهم ابقى حزنانه

ع الاقل لمن يخلص الزواج

دخلت للمحل وهاي اول مره ادخل

اتفاجات بي يخبل المحل

الصراحه احتاريت شاختار

كلهن راقيات

يمكن افضل محل هنا بدون مبالغه

لك عمار شنو هاي بضاعتك

شبيها

غير تخبش

ادري

تعال اختار وياي حباب

خل اصيح ماما ويانه

اجتي ماما

وبقينه حايرين اخر شي

كلي عمار هاج شوفي هذا عليج

كلت لماما اني متاكده عمار خبيث يختارلي الموحلو

اخاف اطلع احلى من خطيبته

دولي ولج شجابج ع خطيبتي

انت تلعبين النفس وهي جنها كمر

عبالي صدك يحجي

والله اله مااروح لو تموت

وعود خل تفيدك الكمر

اي طبعا تفيدني لعد انت تفيديني قابل

ردت اطلع وجان يجرني

لج ورحه للحسين انت الاصل ياخطيبتي خل تولي

والنبي اختارلج ارقى شي

حتى يكولون هاي اخت العريس واتباها بيج يثوله

ولي تجذب عليه

لاوالله احجي الصدك

تعاي جربي وخل نحكم

ماما كالت اني راح احكم

اختارلي فستان اسود وذهبي يصير قصير

اني جسمي صار عبالك لعابه هواي ضعفت

لبست وطلعت عليهم

كام يصوفر انعل عشيرتج شطالعه ولج

لج هاي تشعلين جد جده الياخذج

هاي من يمته هيج ضعفانه

ماما كلتله استحي ولك فضحتنه

اسكت اليسمعك يكول يتغزل بصاحبته مو اخته

اختي واتغزل بيها انت منو يمج

لو هم غرتي من عدنه

تعاي اختاري فستان وهم راح اتغزل بيج

ضربته ماما

لك اسكت لا اصيح ابوك عليك

ماما شلونه عليه الفستان

يجنن عليج هو هذا البسي

اني اليوم دخلت للمحل لازم اخسره لعمار هواي

مو بس الفستان

رحت ع قسم المكياج

كام يصيح عمار

ماما كلبي كام يوجعني طلعيها لبنتج

راح اطلعني كسر بالمكياج اني متاكد

ايا بخيل هاي لو خطيبتك جان كتلها اخذي المحل كله فدوه الج

غير اشبعها كتل اذا دخلت

كول والله

اي والله

لج وحدتجن اذا انطيناها مجال تخسرنه وتسمط جد جدنه

ماما خل نطلع من هذا المحل لان صاحبه بخيل

باجر اخذيني لغير محل احسن

والله تسوين جميل عليه

هم ردت اطلع وجان يجرني

لج خبله المحل وصاحب المحل تحت امرج

اختاري الي يعجبج

رحت اختاريت شكم شغله وعطور

ماما هم اختارت فستان يجنن بس مالت محجبات

كملنه وردنه نطلع الساعه يمكن ب2 بالليل

كال تعالن وين تردن ادفعن الحساب

بقينه صافنين اني وماما

شنو يعني باقي ل2 بالليل وافتر وياجن ودوختني وبالاخير مااحصل ولا ربع منجن

كلتله ماما لك انت متجوز من سوالفك

والله ممنوع اطلعن الى كل وحده بوسه يله

لك يوم اعقل شبيك خفيت

هاي كلها ع مود العرس

هذا ياعرس متكليلي لتخليني اسب العرس والعروس همين

هاي ليش هيج تحجي يوم

ليش هيج احجي ع اساس متعرفين البيه

والله جرحي لهسه ينزف

اي شبيدي عليك يا يوم مو عافتك واتزوجت

وتلكيها هسه نايمه بحضنه وفرحانه وانت تعذب بنفسك

اكو عطر قريب عليه

شمره بالكاع فلشه

لتحجين هيج كدامي يوم

ليش تجرحيني اكثر

ليش تذكريني هي نايمه بحضنه

هاي بحد ذاتها كافيه تذبحني من الوريد للوريد

يوم والله بس تتزوجت تنسى كلشي

زوجتك تصير هي الكل بالكل

حتى اهلك تنساهم بس اصبر وشوف

سكت

حبيت اغير الموضوع

يوم هاي السالفه كلها سواها ع مود يريد ياخذ من عدنه فلوس

راح يموت ابنج ابو فليس

يكتل نفسه ع الربع

نجبي ولج دبدوبه اسكتي

هاي منو الدبدوبه

انت منو غيرج

شحال لو ماقبل لحضات تكول لعابه

غير اقشمرعليج حتى متنهبط معنوياتج

هالمره صدك الى مااروح وياك للعقد

شحدج حتى اكسر اديج ورجليج

كمنه شويه نسولف ورجعنه للبيت

اجت الجمعه والتمت الناس

قررنه نروح قبل الزلم

اجني بنات خالو وهواي ناس من اقاربنه

وحتى لابسه صايه وممخليه مكياج ابد

كلت هناك اخلي

صعدت وي كرار اني وديما وغسق اختها

الطريق كله يحشش

ويكول جهزن نفسجن اني وره عمار سرايه

كتله هاي يامخبله تقبل بيك

ليش ولج شبيه

اكبر وحده تتمناني

اذا مااخليجن تنجلطن من تشوفن خطيبتي

تخبش والعيون ملونه

خو مو مثل خلقجن جنجن فيترجيه

درنه علي كلنه كل وحده تضربه بمكان

اخر شي وكف السياره

انعل يومجن لايوم اليصعدجن وياه

هاي بس حجي هيج سويتن

لعد اذا شفتنها شتسون

نخنكك انت وياها

انتن شايفات نفسجن بالمرايه لو لا

شوفن حالجن هم حاسبات نفسجن ع النسوان

الغث منا لباجر ميهمنه حجيك

شوي بعد بالحفله نطك صور وندزهن الك عود عيب ع راحتك

اها تقصدن بعد اللبخ ههههههههههاي خل نشوف

وصلنه ودخلنه

البنيه بعدهي بالصالون

طلبنه منهن ندخل بغرفه ع مود نبدل ونتمكيج

صعدونه لغرفه

نزعت الصايه وشعري مسويته تسريحه بسيطه وبارمته الباقي

بدينه وحده تمكيج الثانيه

نسيت همي كله الصراحه

وحده تباوع للثانيه وتكول شطالعه

كتلهن وين راح كرار المخبل خل يشوفنه شلون حتى ميقلد بعد

كالت ديما خل نطك سناب

لا مااحب السناب ميطلع الشكل الاصلي

اي لج لتصيرين ثوله هو هذا المطلوب

خل يتسودن

اكلجن مطلعن بس وجهي

حتى شعري ممنوع يطلع

اخذت صور بجهازي كومه

وسويه اخذت

بعدها كالن عيب خل نطلع يله

ردنه نطلع بعدين كتلهن لحضات واجي وراجن راح اعدل المكياج

اجتي اخت البنيه خطيبة عمار

هم عدلت وياي

لحضات وسالتها اكدر اطلع هيج

لو اكو ولد هنا

لا امني ماكو احد الكل تجمع بالاستقبال

طلعت وجان انركع بولد

اني اريد اشوف دربي بعد مااشوفه

حيل خجلت ثوبي قصير ومكياج وشعري

اتخبلت

كال العفو

مركزت بعد اختفيت باللحضه

ارتبكت حيل

والله عيب منه شلون شافني هيج

اجتي ديما وسولفتلها

لج شاب لو جبير

حلو صاك لو اجكم

واني ادري والله ابد ماركزت

ونزلت ع السريع

او القسمه

جان نسقتي يحضي

هاي تحجين صدك ولج

لج والله اشاقه بس حبيت اتلاطف وياج

بدت الحفله وعقد السيد

واشتغل الركص والاغاني

كالو اجه الولد يعني عمار

الكل لبس حجاب اله اني

بقيت اركص وعشت بغير عالم بيومها

اخذت جهازه لعمار وطكيت الهم صور سويه

لبسوا الحلقات وي كل حركه طكيت صوره

اكلوا الكيك وبعدها بشويه طلع عمار

بقينه شويه وهم رجعنه للبيت

رجعنه هم وي كرار

وراونه الصور واني بغير عالم

افكر بالولد الشافني هيج عيب هسه شيكول عليه

ولو المفروض يحسب حساب وميصعد يم النسوان

محسيت الى ع صوت كرار

نحن هنا يمعوده وينج سالمين

انتبهت لكيتهن يحجن وياي واني فاصله

منو الماخذ عقلج

ماكو شي

افكر بخطيبة عمار

شبيها

معاجبتني ابد

شبيها

احسها دمها ثكيل

كام يضحك كرار

ع اساس انت الدمج خفيف

ديما كالت حتى مو حلوه هو احلى بهواي

يابه دعوفن الولد كوه قنعوا

بس يسمعجن يبطل وهو يريد حجه

هو اني هم ساكته شعليه بي

اذا هو وافق واقتنع اني شعليه

رجعنه وبقوا بيت خالو وبيبي وجدو يمنه

والباقين رجعوا كلمن لبيته

جبنه عشه جاهز

حسيت بعمار ممرتاح ابد ولاكانو عاقد

راحوا بيت خالو

راد يروح للمحل

اليوم ابد مراح مخلي ولد صانع عنده

طلعت وراه للحديقه

عمار ليش ضايج

لا عليمن ضايج اصلا فرحان

علينه لك اكثر وحده فاهمتك اني

لعد اسكتي لا تساليني اذا فاهمتني

اذا مقانع بالبنيه عوفها لتورطها وياك

لج وافقت بس ع مود نبع الحنان متزعل عليه

اصلا ممقتنع بيها البنيه

بس كاعد اقنع نفسي كوه بيها

لازم اتزوج واستقر واقبل بقسمتي واسكت

بس تعاي اكولج

سحبني من ايدي للمرجوحه وكعدنه

وضعج ابد معاجبني

ليش مطلعين ودراستج تاركتها

اني هملت موضوعج لان التهيت بشغلي

بس منا ورايح مراح اتركج

اريد تسولفيلي كلشي

احد مضايقج احد متعرضلج

هاي شبيك عمار اكلتني وشربتني

اني تركت الدراسه لان كرهتها جنت احبها لان شهد ويايه

ومن تركت شهد اني هم تركت وياها

انعل ابوها لا ابو الخلفها

هي اتزوجت وتركت انتي ليش اتركين

خل تولي ماعليج بيها ومتسوه التفكير اصلا

السنه التجي لازم ترجعين ارجعج مسائي وبيدي انقل اوراقج

وهم بيدي اخذج واجيبج

ان شاء الله

وشغله ثانيه مااريدج تحبسين نفسج بالبيت

اوك الله كريم

عافني وراح

كمت افكر بالحجي

صدك اني ليش دمرت نفسي ومستقبلي ع مود واحد بلا شرف

شحده اذا تعرضلي والله اكلب الدنيه فوك راسه

لازم ارجع روان القديمه الي تحب الطلعه والسفر

ارجع للدراسه

لازم اصير قويه

اتحدد يوم زواج عمار

اشوفه بعيني حزين ولا فرحان ولا عبالك يريد يتزوج

حيل اضوج عليه خطيه بس مابيدي شي

يوميه ادعي ع شهد واخوها

الله ليوفقهم دمرونه اني واخويه

اتمنى ميتهنون بحياتهم

اني عندي خوف من مواجهة العالم

اخاف احد يعرف بيه

احس العالم كلها تدري بيه اني فاقده عذريتي

خطيه جابلي فستان خاص من تركيا واحد الي وواحد لماما

بقت تحجي عليه ماما ليش ماجبت لخطيبتك

يكلها هواي عدها

حتى لو ياعيني غير عروسه

يوم اسكتي فدوه

صارت الحنه ورحنه يمهم بس هالمره ماصعدت فوك ابد اخاف يصير بيه نفس ذاك اليوم

دخلني بغرفه جوه

كملت وطلعت اخبش

الفستان  لون جويتي

ومخصر وطويل وبي فتحه للركبه

كوه قبل عمار يجي يحنيها للبنيه

لحضات وكام

كملت الحفله ورجعنه

بالليل تبدي الحفله مالت الولد بالقاعه

جهزنه كلشي واخذوهن وراحوا

ثاني يوم صار العرس

مااخذوا ولا بنيه وياهم بالزفه

رجعوا وكملنه العشا والهوسه وزفو عمار

لليل

وكلمن راح لبيته

بقوا يمنه جدو وبيبي

ثاني يوم كعدت ع صوت الهلاهل

عرفت فاضينها للسالفه

عمار يجاملنه من يضحك

اني متاكده ع اعصابه

بس شنسوي هاي قسمته وحضه

زوجته اسمها اسيل

بقت اسبوع كامل بالغرفه صدفه نشوفها طالعه

حتى اليجي علينه ويريد يشوفها تكول خل يصعد

ماما ضاجت من تصرفها بس ع اعصابها سكتت

خلصت السبعه وراحت لاهلها عزموهم

لليل ورجعوا

ثاني يوم طلع للشغل مالته

وره تقريبا بشهر

سحب اوراقي وقدملي بالمسائي

مااخفي عليكم اكو خوف بداخلي مينوصف

بس قراري واحد ميتغير ابد

اله بابا لو عمار يوصلوني ويرجعوني لو مااداوم

اسيل صدفه تنزل يمنه

نايمه بالغرفه 24 ساعه

ماما تكول خطيه خليها بعدهي عروس

اني بس التنظيف عليه

الطبخ ابد مااعرف كلشي اسوي بس اشياء بسيطه

اقل الشهر وبدت المشاكل بين عمار واسيل

يكول الغرفه دومها مبهذله وصخه

ملابسي كل 3 ايام زين اذا ذكرت وغسلتهن

ماما هدأته تكله ماما علمها مو تصيح عليها

من اتعارك وياها كامت تنزل يمنه

كلت لماما خلي العشه عليها والمواعين مالت العشه

وانت الغده عليج

والتنظيف عليه

كالت الله كريم

اني السنه سادس ولازم اقره واتفرغ للقرايه

بدة المدارس ومن اول يوم لازم اداوم لان سادس

عمار جابلي ملابسي كلهن من تركيا حتى الجنط

جنت خايفه كانو اول مره اداوم عبالك اول ابتدائي

الحمد لله داومت ومشى اليوم عادي

بالليل اتجمعنه بالعشه

حجه بابا كال من باجر ممنوع روان تنظفين لو اطبخين

لان انت سادس ولازم تقرين

لو البيت يحترك انت ماعليج

ومن باجر يوميه بالليل يجوج مدرسين خصوصين للبيت انت و4 طالبات

يوميه ابيت وحده من البنات

لا بابا مااريد خصوصي اني اقره

اس ولا نفس مااريد اسمع نفس منج

الرياضيات ابيتنه

الكيمياء ابيت وحده

الفيزياء ابيت ثانيه

وEnglish ابيت وحده

العربي والاسلاميه والاحياء عليج انت اقري

اني الصراحه مااقبل ادري بي بابا خطيه ماعنده

بس الظاهر متفقين هو وعمار وناهين الموضوع

بعد مااكدر اناقش سكتت

اسيل حسيت بيها ضاجت لان بابا كال بعد متنضفين بس ميهمني بعد

مرتضى : حاولت بكل الطرق اعرف شي عنها وماكو

هاي شهد متقبل تروح الها لبيتها وتسال عنها

هم صدك بيا عين تروح

هو اني الورطتها خطيه

من ورايه خربت علاقتهن خطيه

مشت الايام ودخلت مريم بشهر الثامن

الكل يدعي الها

اني حيل خايف اخاف هم افقده للطفل

حسيت بنفسي مخنوك حيل وكلبي مقبوض مااعرف ليش

اتفقت وي جماعتي نروح لكربلاء

حسيت بنفسي محتاج الزياره

صادف يوم خميس

وره صلاة الظهر صلينه وطلعنه بسياره صغيره

وصلنه ودخلنه للامام الحسين

زرنه ورحنه للعباس سلام الله عليه

هم زرنه وصلينه المغرب بالحضره

خلصت صلاه ودعيت ابو فاضل

كون احصلي اي خبر عن البنيه

ياربي سامحني اني غلطت واتمنى اصحح غلطتي واريد المساعده منك ياربي

بحق ابو فاضل ساعدني ياربي

كملنه وطلعنه رحنه اتعشينه بالمطعم

كملنه

كالو خل نزور مره لخ

فعلا زرنه وكملنه ورجعنه

كالو خل نروح للنجف فرد مره نزور

ايدنه الفكره وانطلقنه للنجف

زرنه وصلينه وكملنه

وردنه نرجع

جان يجيني اتصال من ابويه

مااعرف ليش كلبي نغزني

جاوبت ها يابه

هله ابني

وين انت

بالنجف وراح نرجع

خيرك يابه اكو شي

لا ابني ماكو شي

بس بلكي تستعجل

يابه احجي لتخليني قلق شصاير

لا ابني ماكو شي

من ترجع نتفاهم وياك

فدوه يابه احجي لتخليني بقلق

ماكو شي ابني لتقلق

طبكه

حيل قلقت

ادك عليه بعد ميجاوب

كتلهم فدوه استعجلو

لازم اكو شي صاير

دكيت ع مريم ماكو جواب

دكيت ع شهد هم ماكو جواب

دكيت ع امي همين

دكيت ع عمي

هم ماكو جواب

اتخبلت لازم اكو شي

الطريق كله ادك وماكو جواب

وصلنه للمحافظه

اتصل بيه ابويه

ها يابه ليش محد يجاوب

جان يكول استعجل ابني تعال للمستشفى بسرعه

خير يابه منو الي بالمستشفى

جان يكول ..........

توقعاتكم حبايبي منو الي بالمستشفى ؟؟؟؟؟

وشنو الي صاير ؟؟؟؟؟

لتنسوون التصويت حبايبي 🥰🥰

تحياتي للجميع 😘😘