رواية الرعناء والأشيب الفصل الحادي والعشرون 21 - بقلم زهراء العراقيه

سأنتظرك اذا كان بعد العسر يسر
مؤكد بعد الجفا وصال ، وبعد البرود فيض من المشاعر ينتظرني خلف قضبان أبواب قلبك !
نيوفر
رف گلبي رفة غريبة وغافلتني اعيوني تباوع على شفته مترجية يعيد الكلمة الي خلت گلبي يزهر بدگات مطروبة مسحورة ، و اشلون لگلبي يرفض الكلمة وما يتفاعل وياها وهي دخلت لأعماقة كأنها نطقها گلبة وسمعها اگليبي كانت لحظة دافية و صادقة بمشاعر طالعه منه بقوة لحظة ساكنه هادئة و بس اعيونه هو تتكلم و ايده تتحسس و جهي ، اخذ وجهي كله و حطه على صدرة لوين ما واصلة اني لطولة ، عانقت اديه خاصرته كزوجة مشتاقه لزوجها وكأن الزعل والخصام ضافلي مشاعر أتجاهه ،
- انشالله اكدر اعوضك و افهمك اوعدك رائد

نطق بعذوبية
- أوعديني بشي ثاني
- شنو!؟
- أتحبيني
غمضت اعيوني مسنشقة ريحته جسدة
- احبك
- ما حسيتها !؟ حبيني بمعنى ثاني ، اتمنى اشوف بعيونج لهفة العشاق واذوبين من تنطقيها مو حروف وتنطق من زوجه اعتاد علية لا اكثر

مافهمت شنو يقصد ، هاي اني عالنة اني اريده واحبه واريد رضاه بعد شنو ؟ مو هو هذا الحب !،
- اوعديني
كان دافن راسة على متني و يشم شعري المفرود عليها من فعل اديه ،
- احبك رائد
- حبج هذا حب حاجه اقل تصرف مني صورتي تزحزح ببالج ، الحب هو اظل بهذا
اشوي دناني عنه واشر على گلبي و استرسل بالكلام واعيونه تنظرلي كأني متهمة
-اظل ساكن اهنا وما تغبر صورتي بعيونج مهما صار

-كلامك نصه ما افهمه ترة ، بس ترة حيل اشتاقيت الك ،
ابتسم وابتسامته ظلت تتسع
-والله اشبيك
اخذ راسي بأثنين ادية مثل العصرة و باسني على جبيني بقوة لدرجه دفن شفته عليها وطول ،
- انت بريئة لو ازوجتي عشر مرات مراح يتغير منج شي ،
نبضي تسارع و هواجزي انزاحت ، حسيت نفسي مكتفية والندم كان اكبر أخطائي ، حضنته
ما اجه على الساني كلام غير دعوة نابعة من سباح الگلب ،
-الله يخليك الي ولا يحرمني منك

ما اريد انحرم من حضنه الي توني بديت اتعود عليه ، ولو اني اتعودت على التهجير من حضن بيبي لحضن بابا وقساوة تمارة ، لحضن فيصل ، وهسة حضن رائد حتى خفت من بدايه تعودي و تمسكي بيه لا هم يروح بغمضة عين ،

صحيت الصبح على دك جرس الباب
لكيت رائد نايم ابصفي و اني ماخذه السرير كوله مطيته الحافه المسكين اوف من نومي الي ما يتعدل اهواي اكلب وهذا الي يدك شجاه هيج يدك بستمرار كمت لبست روبي وباوعت لرائد اشلون ذاب نفسه رغم هو نومة مو ثكيل !
،
واني ورة الباب
-منو ؟
-افتحي نيوفر
فتحتها ابسرعه هذا صوت لينا
ذبت نفسها عليه حضنتي وخلت الصغيره بالارض بوسط هزازها (حافظة طفل)
-لينا اشبيج ، ليش دتبجين ،
دخلت وراها و اهز ببتها ميته بجي ،
سمعت صوت بجي توتو ،
وطلع رائد ، فرك اعيونه وركز بلينا
-لينا اشجابج ؟
ركضت عليه لينا وتبجي
- الحقيرة طلع عايش ويه وحده ، رائد طلع يخوني النذل .
كان مركز عليها ومن خلصت كلام جرها لحضنه مثل ما يسوي وياي ، اخذها وكعدها يمه
اكتفى بالتربيت على متنها وحضنها من غير كلام ، اخذت الصغيره ودخلت لتوتو لكيته واكف بحافة.الكاروك ومنتجي عليه ويبجي ،

عفت الطفلة تبجي ورحت جبت حليب بموز لتوتو انوب صوفي كعد مطنكر
اخذت الطفلة و عفتهم نارهم تاكل حطبهم رضعتها كالعاده جوعانه ، شبعتها نامت حطيتها بغرفتي
لاكاني رائد واني اطلع من الغرفة
-شسوين اهنا وعايفه جهالج يعون روحي

نتر بيه حزت بگلبي كلمة جهالج اول مرة ينطقها ،رحت لصوفي شلته غضبانه غسلت اله و حطيته بالمطبخ يمي و خبطت بيض وكليت
-هاشم غسل وجهك
يوووه انت ما اتنوش تعال
رحت غسلت اله
ياااا نسيت الطاوة يمكن ما نصيتها لكيت البيض مثعول ، دوخره
اجاني رائد جان يم اخته بالصالة واني بالمطبخ الحراري
-بيضه وحركتيها ، دطفي النار
طفيته انسطرت لكفني بالجرم المشهود
- راح اجيب كيمر وكاهي ،
-اوك اوك
كلتها بنزعاج ،

لينا مجروحة من زوجها طلع الافندي عايش ويه وحدة سويدية بشقه وحده ، هذا الحجي فهمته واني احضر الريوك ع الميز بالمطبخ وهمه بالصالة
-رائد لينا الريوك جاهز .

صحت للجهال ،
لينا ما تاكل بس تحجي عن زوجها وخيانته ،
اما رائد باوع لهاشم بنزعاج واضح جدا

- نوفة اخذي الاطفال و اكعدوا ريكهم بغرفتهم
-ها ليش
غمض اعيونه وهز راسه بهدوء وكال كومي
اخذت صينية وحطيت بيها الريوك و انقلعت عنهم بغرفة الجهال ، خلصوا غسلت الهم وهمين اخذتهم و دخلت لغرفتي ما طلعت ، ونسيت اطلع الصينية ،هيج صارت يتحسس من وجودي هو ما يريدني اسمع لو يتحسس من كعده الجهال يم اخته لأنه صفن ع هاشم صفنه مطوله وطردنا ،
والله لو ما عيب من لينا لأخذهم واروح لهلي ، دمعتي طلعت مثل الغريبة اهنا ويكلي تتحسسين دشوف تصرفاتك كلها تعالي علية ما هانت علية حيرتي من صفنت بوجه افهم ليش انكوم من يمهم
الا والله مستعر من اولادي
راد يطلع هاشم جريته وقفلت الباب كام يتوسل منا من كام يبجي يترجاني يطلع وما قبلت
كعد ومدد رجليه و يكول هو يبجي ماما اريد اطلع ، ويناشغ

- اش ما تعرف تهجع
صوفي همين غار ويريد يطلع توتو يحتاج تبديل حفاضة اوف ما يخلون الواحد يزعل ذولة ،
ندكت الباب
رائد
-ليش قافلين الباب دفتحوا

كام يركض صوفي وطلع بالصينية مال الريوك كبل.

-ادري اعمى اتدمرت دبك وجاي ،
كمت فتحت الباب لرائد
- ها

عكف اديه على صدرة
ومنتكئ على اطار الباب
-ليش ما طلعتي عزلتي المطبخ
لملمت الصينية و كمت
فتت من يمه ماحجيت شي وهو وراية
-لينا بغرفتنا مسطحة تعبانه البارحه ما نايمة من تخلصين شوفيها عود ،

صاير شي ليش كالبة الوجه ؟

من غير رد شلت الاكواب عن الميز و رحت للسنك
محسيت بنفسي غير واندار للخلف
هو دراني عليه
اشرلي بيده
-اشبيج لا يكون زعلانه لان كومتج ،رجعت لفيت ع السنك وهو راح كعد كدام ميز الطعام
- كومتج لان هاشم ذكي ونبه و لينا كلامها فوق ١٨ يعني خيانة و ذكر تفاصيلها كدام ولد صغير لاقطة غلط كومتهم لهذا السبب
اشوية هدت حركتي جنت اجلف بقوة رخيت على الاكواب من سمعت تبريره
- ما زعلت
-اها يعني ما اجتج افكار والحساسية ما اشتغلت عندج
-لا لا ابد مفكرت سوء عادي ترة
-لعد ليش حبستي نفسج بالغرفة
جاوبت من غير ما دير وجهي لان فاضحني
-على مود الجهال لا يزعجوكم !
بغير اقتناع كال ،
- سبحي مصطفى ريحته مو حلوة
-اها اي

من خلصت رحت للينا ورائد راح للدوم

،
تحجي وتشكي وتبجي وتهدد وتتوعد وتختمها بشكهه كسرت خاطري
عارفة بالخيانه من صديقه مقربه اهناك هي وزوجها بنفس المجمع السكني الي بيه زوجها ملاحظته قبل مده قليل يجي لشقته بعدها بالصدفة شايفته بكوفي مع شابه ، مطقسة عنه عارفه سالفته عايش ويه وحده اهناك سويدية من اصول اردنية مزوجه او لا ما متدري المهم ساكن وياها وقليل يجي لشقته
-الخاين كل ما اكله اشوكت نجيك يطلع حجه و
مرة يكول اريد ابني بيت كبير مرة يكول البنية صغيره مو مال تغيير جو

- يروحي يفداج الف واحد لا اسوين بنفسج هيج

-ااااه يا نيوفر انوب ماما اتلومني اني عايفته حركت قلبي بالزايد
-امج من حبها الج وخوفها عليج ، الف مرة اتصلت برائد هي وابوج يطمنون عليج
هي طالعه زعلانه من بيت اهلها ، واجتنا بسيارتها الحمدلله من ما مسوية حادث اني عبالي بس اني من ازعل واحزن اصرف تصرفات غير محسوبة طلع حتى الدارس والواعي تجي لحظات يفقد صوابه ،

الضحى اجتنا عمتي ،
- وين لينا ماما كلبي جمر عليها
حسيت بحسرة من اجتنا عمتي حتى سلام نست اسلم راحت تركض اشوف بتها وين ، وكفت بالصالة

- عمة لينا بالغرفة
،

ظلت يومين يمنا لان ما تكدر ترضع ولا اداري بتها اني ارضع و اداريها للطفلة وامها عمتي هم وياها ما تركتها ، حنية الام لا تعوض ابد ،خلتني اتحسر على ريحة امي ،
{ خلق البحر ليعانق موجة الرمال والصخور ، تشرق الشمس لتلف بدفئها الصحاري والبحور ، توجد الفراشات دائمأمع أرق الورود والزهور ، أماه يابحري ، وشمسي ،وباقة زهوري ، أحتاجك دومأ أحبك للأبد أمي.... لا تؤم القلوب إلا إليك ... ولا تلين الصخور إلا لحنانك .... أنت الحب... والجنة تحت قدميك .... أحبك أمي... أحن اليكي اذا جن ليل وشاركني فيكي صبح جميل أحن اليكي صباحا مساء وفي كل حين اليكي اميل أصبر عمري اتمنى امتع طرفي بنظرة وجهك فيه أطيل واهفو للقياك في كل حين }(مقتبس)

راحت لينا لبيت اهلها بعد ما استوعبت حجم الالم وراحت تقاسي الوجع وتتعود عليه ، ما اعرف شنو قرارها وشنو موقف زوجها ،
اما اني عشت ايام حلوة ودافيه مع رائد الي دوامه ما يثبت على فد منوال ، لا ايام يصير بين اسبوع واسبوع وايام يجيني بالليل ويروح بالنهار ،

بعد شهر

*
رائد ،
كنت بيت اهلي بغرفة لينا بالتحديد
- رائد الله يخليك ، ما اريد اقناع ولا ضغط
- بس هو ترك اهناك ورجع للعراق لخاطرج

- اهه ضحكتني رجع لأن اهله اكلوا وجه
خليني ساكته يا رائد والمختصر نزل من نظري و ما اطيقة رجائا خلوني اطلك وهاي هي

- لينا اخذي وقتج ، هسة نكول اله يرجع لشغله والله كريم منا من تهدأين لا تاخذين قرار يغير مصير بنتج

مطت بشفتها هازئة من كلامي بس ما ردت

- صدك رجائا كلمي ريما تبطل ضغط عليه

- بعدها تتواصل وياك؟

- اي تتواصل وياي واهواي تحجي وياي واني ما اكدر احرجها مهما كان ما اريد اجرحها بس اني رجال مزوج وما اريد مشاكل بحياتي ، صدكي مرات اشتت فكري ،

- اشلون يعني

- مرة مطلقه وجميلة و كلامها فطين ومدروس عكس نيوفر ادخلني برحلة مقارنه اني بغنى عنها و اشتت فكري عن بيتي ومسؤوليتي

-رائد راح اسألك بس جاوبني بصراحه ، انت مرتاح ويه نوفة ، تحب اطفالها ؟

تنهدت واخذت انفاسي مطول بالاجابه المحيرة

-ها شو طولت بالصفنة

باوعت لحوض السمك الي على ميز كدام سريرها الي كاعدين اثنينا على طرفة ،
ابعدت هي الدفتر الي جان بيدها تدون بيه ما عرف شنو قبل لا استأذن وادخل ، وانطتني اهتمامها
رحت يم الحوض ونظري على سمكة النيمو ،
-لهالدرجه الاجابة محيرة ؟
- ما اعرف احس نفسي اسرعت ،
كلشي بينا مختلف ، البيئة طريقة العيش والكلام ، غير البيئة اختلاف المستوى التعليمي الطبقي كلشي بينا مختلف ، ما عدها اسلوب التحايل ولا دلع ، هذا غير تحسسها من معاملتي لأولادها يا لينا

-كولت الك بالسابق لا تتسرع يا رائد.، على الاقل تطلع من محنتها ، يمكن يكون التفاهم بينكم افضل

-ما كلتي لا تتسرع ، كلتي لا تاخذها ع شي انتهى وراح من ماضيها وهي طفلة ،

-لا لا تنسى ، صح بالبداية هيج كولت لكن من مشى الوقت و صارت الخطبة كلت الك اتسرعت بعدها البنية عدها توابع نفسية ،
وكفت يمي
- رائد احلفك بالله لا تكسرها ، انت اختاريت وانت ردتها وكلت الي اني اعوضها ، انت كنت معجب، اتحملها و حاول تغير منها بدل ما عينك ازوغ على غيرها ترة الخيانة تكتل

مسحت على راسها واني حاس بيها وبآلمها ،
-لا تخافين لينا بعمري مراح اكسرها
-زين مكلت الي اطفالها شنو بعدهم بعاد عنك مكدرت تقترب منهن

- بالعكس ، لكن اقترابي منهن ما يجاوز الشفقه والعطف ما احسهم يقربولي بشي بصراحه بالبداية جنت اعاني منهم ولا اكدر اتعايش وياهم ونافرهم ،
بس هسة لا حيل متعاطف و حاب تعلق هاشم بيه

- اترك الامور تسري على مسارها و انت راح تحبهم من غير ماتحس يصيرون الملح الي يستطعم حياتك الخالية ، اذا كنت كاره فوضتهم بعدين تكتشف همه وفوضتهم جزء من حياتك

-ياريت

طلعت من لينا مرتاح كنت محتاج شخص قريب ابوح اله الي بداخلي بعد شجار البارحة وكل يوم على اشياء بسيطه يتحول خصام تعبت كوني اسامح وتعبت وطاقة تحملي على وشك الانتهاء حاولت اغير منها وجاي احاول ، حيل فوضويةما تحب النظام ، هذا غير التشدد الديني الي هليام نازل عليها اخر عركه النا لان من من ردنا نطلع للنادي طلبت منها خلع العباية ،

**
نيوفر
كنت اتمنى زوجي مثل رضوان وحماوته بس مع العكس رائد طلع حيل فري طلب مني انزعها ، كل مرة بس يلمح هسة لا كالها بوجهي المكان مو ملائم للعباية انزعيها ، رفضت ولح ، طنكرت و صحت بوجه ما اطلع وياك يعجبك يعجبك ما يعجبك هذا الموجود !، شو هذا عصب و وطلع واخذ وياه بس هاشم ؟
وهاي من نهدها لا اني احجايه ولا هو ،

**
سما
اليوم راس السنة الميلادية لسنة ٢٠١٦
لا احتفال ببيتنا ولا عزة ،
سمعت امي اصيح ايمن ما ايمن طلعت من غرفتي وبشرتها ايمن طالع يلعب ويه ربعه ،

- يوووه هالغبي دومه طالع ، اكلج لعد تعالي انت

-هااا شنو وين اجي مو يمج اني ؟
جانت اتحضر بصينية ببلم بيه كماج (چرك) "صمون كهربائي حلو"
و وياه كليجة (معمول)
- هاج هذا صحن حطي عباتج ع راسج وروحي وديه لبيت ام جرار سابقا كعدوا بيه ناس جدد يلا يمه

-يوم انت شايفتني عندي ضفيرتين و اكمز كدامج مرة دخلت جامعة اني ، مدرسة لغة عربية بالمستقبل صكد جذوب

خزرتني خزره غيرت رأي بيها
-وديه لا والله اطلع حركة كلبي بيج
- اوك دقيقه البس عباتي ،
وكفت كدام مرايتي وكلت لنفسي
-بالله مرة اشكبرني ادكدك بيبان كله منك ابو الوصخ ايمن لو موجود مجان طلعت اني ،
لبست عباتي حطيتها ع راسي فوك شال
يووه والله فشلة اطلع هيج زعتها ، و حطيت مبيض و كحلة ، مسكارة و اشوية حمرة و مرطب و اشوية بلشر الله وربي صرت صاكه دخل اكمل وجهي واخط خشومي بالكنتور ،ياي
لبست عدسات خضر طلعت صاكه وربي نسيت الطلعه الا بصيحه من امي عزة اخذني واهس العصريات وكعدت الطخ

اجيت امسح ،بعد معرفت امي ظلت اتلح وأصيح الي حطيت عباتي ع راسي وطلعت اركض هي منا لهنا بيت ام جرار سابقا يمنا حايط ع حايط دكيت الباب ،
مستعجلة لا واحد من اخوتي يرجع ويسوق تلطيخ وجهي وربي يعلكوني من المروحه ،
يمي بنات يلعبن و جهال تتراكض ، انفتح الباب
مديت الصحن السلام علي عل عليكم

اتخربط كياني اتبعثرت كلماتي و انشده حالي من شفت شاب اوسم من الوسامه بعيون دامعه حزينه فتح الباب
ما رد السلام و مسح خشمة بكلنس صار احمر خشمه طماطية بوسط قشطه لأنه ابببيض

-اتفضل هاي من جيرانكم بيت ابو رضوان الي بفرعكم !

- ما انريد
وسد الباب

لو سادين بوجهي باب الجنة مجان خاطري انكسر هاي الكسرة اشبيه هذا همين طالع الي يبجي ومطنكر وهم كبسني !
رجعت للبيت مكهربة من فشلتي دخلت كبل لغرفتي وغطيت البلم بمنديل
امي وهي فايته من الممر
-يوم رجعتي ، انطيتيه الهم
-اي اي
صحت واني انزع شالي ، فشلة اكول الها انكبس
فكري بهذا الشاب الي عقلي اشتغلة تفكير ، اوووي شبيج ضجتي وردتي تبجين وياه ، شاب تلكاه عندهم مشكله وانت اجيتي بوقت غير مناسب بس اويلي اشلون شاب اوف لو ماخذ الصحن جان شبعت حب وحنان اقصد جان ما اتفشلت هيج فشلة كبر اي والله كبر لا ولج شنو كبر اسم الله عليه ابو جهالي !
كان ابيض ، نحيف طوله متوسط شعره اسود بيه موجه جوزية دليل انو هو من جان طفل اشقر ، فديته ، شجاني استغبيت وكلت اله بفرعكم واحنه حايط ع حايط ،

خابرتني لهفة صديقتي صارت بت اخت حماة نوفه ، وياي بنفس الجامعة سنة ثانية ،
سولفت الها الصار ماتت ضحك عليه

-اكلج سما عندي خبر مزعج
-وهو
-ابو الخط بطل اشلون بينا
.-يلهووي ،
-اشلون بيه ماما دوامها مو ع طريقي يالرايح لبغداد مر بالسماوة ، و بابا تدرين بيه دوامه بغير محافظة ويجنا بعطلة اخر الاسبوع ،

- اني ادبرها اجدي من رضوان لو بابا توصيلة وراح اجديلج وياي

-ياي عفياتي تسلمين جدي جدي بعد اختج

-اي

- يلا اعوفج اتفكرين بابو دمعة
-ههههه اسكتي لا اذكريني بفشلتي وسدة الباب اعمل نفسك ميت ،

،
علي الي وصلنا و بابا انطاه سيارته يوصلنا ويجيبنا و استمرينا وصار هو الخط مالتنا وحسيته مهتم ب لهفة النازكة
وابو دمعة بعد ما صادفته ابد !

***
رائد
تأخرت بالدوام ١٦ يوم ادمرت واشتاقيت لهاي الي تتصل تسال دقيقه واسده واني همين مشغول بالي عنها بامور الدوام الصعب ، واكيد خابرتها كلت الها بوصولي قبل لا انزل

،
دخلت للبيت اتلكاني هاشم
-تعال يابطل اشتاقيت الك
بوستهم و رحت ادور عليها
لكيتها بالمطبخ

-ها اجيت عبالي تتأخر لليل !

- اشلونها ارنبتي ،
اجاوزت الميز و اجيتها وكلي لهفة وشوق ،
بوستها من خدودها

***
نيوفر

قرب خشمه عليه
-ماكلة بصل ؟
خجلت منه حيل ما ادري بيه اليوم ينزل المغرب الا كال واني ماكله بصل اخضر الضهر وية الحرش ( سمك زوري صغير)

- اتركي عن ايدج ابدل واطلع جيب جاهز ،
- اوك
دخلت وراه شفته يبدل

- ادري اليوم اجي غير الكاج حافه و مجهزة الي ؟

-هسة الا تحرجني كلت الك ما ادري بموعد نزولك كل ما أسالك اتكول ما ادري ،

اتريد شي لو اروح اشوف الجهال

تنر بيه
-روحي

رحت يمهم ورة عشر دقايق صاحلي ،

من ورة باب الحمام
-هاااا
- تعالي ادخلي ،
-اشتريد
انفتح الباب وجرني ودخلني وياه ، بهاي الاثناء ورة هيج دقيقه لو اكثر سمعت صوت توتو يبجي اريد اروح رائد ما يخليني . بالكوة دفعته ورحت اشوف ابني اشبيه ، لكيت صوفي يضرب بيه ،صحت بيه
-حقير غوار ،
ضربته
واخذت توتو ، وظليت محتارة بيهم
وشو رائد تأخر ما طلع يجيب اكل ،
دخلت واني شايلة الصغير
-ها شنو مراح تطلع

كاعد كدام ميز التواليت وايده على جبينة
- انتظرتج بالحمام ليش ما رجعتي

-ها ؟! نسيت !

-نسيتي مو ،بسيطة

واحنه نتعشة
- رائد صدوك مديرة الروضه خابرتني واهواي شكاوي على هاشم عنده افراط بالحركة وبس يضرب اشلون بيه

- ادري وهمه شنو شغلهم غير تربوي ، هاشم بالمسايسة يجر عدل ، باجر اروح واشوف ،

- اكولك صدوك اريد.اروح للسوك اشتري ملابس لتوتو شو احسه كبر على الاوفرات ملاته

- اوك
***
رائد
وهكذا حياتي وياها عبارة عن طلبات تنفذ
احسها مرات تتعاجز مني ومن متطلباتي ومهما اغيب عنها نفس الاستقبال مالتها البارد ، راح يصير على زواجنا ٧ اشهر تقدمت خطوة وياي وحده ووكفت عند حدها ، امنين اتلكاها منها لو من لينا و طلاقها الي سبب مشاكل بينا وبين بيت عمي لو من مشاكل و نفاق الشغل ، لو من ريما الي دوم اصارحها بالابتعاد عني و ترجع من جديد تكسر خاطري بدموعها ،
اتصلت بيه بالليل ، كنت اباوع وحدي بالصالة تقرير ورن تليفوني

-اهلا وسهلا ، اشلون امورج
- زينة انت اشلون وضعك بعدم محجوزين ما نزلت مجاز ؟
-نزلت الليلة
-اها اجازة سعيدة
-ريما مرتاحه بالعزلة
-اي كولش ، استقلال اربي بنتي على طريقه تعجبني افضل من تدخلات امي
- بس انت بعدج صغيره ، اشلون تخطين مثل هذي لخطوة
-عزيزي الي بعمري صديقاتي يسافرن دول وحد واني شقة وحدي ما يصير ، اني موظفة و كبيرة بما يكفي اكون مسؤولة عن نفسي ، مع امي مكنت مرتاحه ،وكله عراك بيني وبينها ، خاصه هي كانت سبب اكبر خسارة الي ،

عرفت حديثها لأي مسلك راح غيرت الموضوع

- اشلونها بنتج بالروضة ،خو ما تشكي من هاشم

- لا بالعكس اتكول يدافع الي ،
.-ههههه هالبطل والله حبيته
هي نقلت بتها بتفس روضة هشومي وعرفت السبب حتى تتقرب مني
صوتها مثل هدوء و سكنة الليل و عذوبة هوا منتصفة
- رائد تذكر من كنت ادافع عني ، من كنا اطفال ،

- اي اتذكر

- تذكر من جان عمري ١٥ واجه واحد اتحرش بيه واني ادك بابكم وانت اجيت ببايسكلك شفته، اخذته شبعته كتل كدامي ، واخذت نعاله ههههههههه

- هههههههههههههه والله ايام

-ههههه ما تنسي

-اي ما تنسي ،
انتهت المكالمة و اخذتني لعالم الطفولة والمراهقة سرحت بتفاصيل من عبق اجمل عمر عشته ،
صارت الساعة ١٢ وتذكرت اني ليش لوحدي كاعد وعندي مرة ، المفروض هي اشاركني سهرتي ،
دخلت للغرفة ظلمة فتحت الضوة نايمة !
شنو الفكرة الي ماخذتها اني حجر ما احس اني دوم الي ابادر ما فد يوم حاولت تبادر ، لكن وين اروح ومنو يفهمني كالعاده حاولت اصحيها ماترضى تصحى كالت نعسانه ، و طفيت شوقي مع شخص شبه متوفي !

ثاني يوم اخذتها ورحت لبيت اهلي بالاتفاق مع اخوية حتى نلتقي اهناك وهو بدورة مخبر كريمة جاية ويه بناتها فقط ابنها سافر يكمل دراسة برة زوجها يم اهلة بمحافظة اخرى الي جانت تسكنها كريمه بالسابق ،

والدتي
- نيوفر ماما تعالي وياي و ويه كريمة بالمطبخ

لينا
-هلا عيني التقى الجبلان كريمة و نوفة اليوم احلى اكل ناكل والله
ابتسمت بخجل

والدتي بحس مداعبة سألت
-واني شنو ماما سهل لو وادي
-ههههه لا ماما انت حتى ما محصلة اتكونين سهل اكلج دومه محروك

ابوية كال صدقتي

اتوعدت الهم وراحت مع نيوفر للمطبخ
تركت نوفه رائد بحضن لينا ما انتبه الها كامت ، اني رحت ارد على تليفوني ورجعت على صوت رائد يبجي ،
شفته بحضن لهفة ما ترحم بطريقة مداعبتها بالقرص والبوس
لهفة
- ولك دنفيييشه مالتي ما اهدك
يباوع بالوجوه يدور امه هذا الولد مو متألف مثل اخوته الي يلعبون بالحديقة ،

لمحني باوعلي و ركز بيه نظرته تحولت الى مناجاة
ونطق ضاهر قواطعه
-بابا بابا
وماد الي ذراعاته يستنجد بيه
بهذي الحظة سكنت حركة الكون و ناسه من حولي ، استشعرت بروح جديدة دبت بداخلي وتهللت اساريري بعأدة الكلمة منه كأني اولد اليوم اب غافلتني دمعة نست الي حولي من اهل وطلعت من عيني

يمكن لاحظوا او لا ما اعرف ما حسيت بوجود احد ،
ترس كياني فرح فريد ما عرفتة من قبل وفيض من السعادة لا توصف ، مبتسم لامع العيون وگلبي فقد الحسرة ، اخذت الصغير الي يشوف نفسة بوسط اغراب ولكاني المنقذ من الي يعرفهم ، شبيه امه دخلت بگلبي سعادة تسوى عمري كلة من نطقتها بكل صدق وفطرية
اخذته و شردت بيه محاول امده بالامان الي طلبة مني بحضني اله وهو ينهي بكائة بنشغات بدات تهدأ من طلعت بيه بالحديقة وشاف اخوته ، كعدت بيه على المرجوحه ، فاقد البصيره بالي حولي
حطيته كدامي
وسالته
-اني منو؟

- ما رد
ورجعت احتضنه مو مهم يعيدها هسة ،
لكنه كالها بشكل فطري دخلت لأعماقي وحسيتها بكل ما تعني ،

- ابني الي مو من ضهري ، انطيتني عمر ثاني ، !

يتبع