رواية الرعناء والأشيب الفصل العشرون 20 - بقلم زهراء العراقيه

أحياناً يغرقنا الحزن حتّى نعتاد عليه، وننسى أنّ في الحياة أشياء كثيرة يمكن أن تسعدنا !

رائد

سحبت ايدي بالگوة منها و صانع ابتسامة مزيفة بوجها حتى تستوعب الموقف ،
نيوفر مدت ايدها و ما بادلتها ، صكيت اسناني بغضب وبعدني مبتسم الها حتى
  لا تحرج نوفة
بلعت ريگها وباوعت الي من فوك لجوة وانطت ايدها لنوفه
-هاي
ببرود  کالت لنوفة
-مبروك
-الله يبارك بيج مشكورة
لينا
-هذي بنت  ريما

حسيت برتجاف ايد نوفه وسحبتها عنها وكعدت
الاجواء صارت مشحونه الكل خايف من حضور ريما لا تحرج نوفه بتصرف ،  اتعمدت الزم ايد نوفه الي احسها حست هاي منو رغم هي متعرفها ،
همست الها واني صافن على هيئتها
- اشبيج حبي
-  ها مبيه ، رائد هذي بت خالتك ،
-اي
للمرة الثانية وكفت كدامي ريما
- رائد صدوك التهيت بالسلام
ممكن تركن الي سيارتي وكفتها بنص الشارع ملكيت مصف .. ابليس

وكفت مستأة من تصرفاتها ، اخذت السويج وطلعت ، حسيتها ورايه بكعبها اطگطگ ،
التفتت عليها
- ريما ليش اجيتي اليوم ؟
-لهلدرجه ما اتريد شوفتي ؟
- اشوفيها مناسبة تجين ، ريما مو بس لأجلي احجي هيج ، بس انت بت خالتي و احترمج ليش اجيتي اتحرجين مرتي بسلامج ونظرات استصغارج الها
- متحملت اشوفها وهي كاعده يمك واتوكلها ،
-  من هيج مردتج تجين
اتقربت كدامي و بعيونها الدمع
- ليش استعجلت ليش مصبرت اقنع امي ليش
- ريما اني ..
قطعت حديثي من طلعت نوفة وياها هاشم
اتباوع النا باستغراب
بادرت هي بالتبرير
-اجيت امرجح هاشم
بادرت ريما بالتفات احتقار  من فاتت من يمها هي وعباتها ،
رحت للشارع مركونه اصلا يم حايطنا رجعت دخلت شفتها واكفه يم نوفه

مدري ليش حسيت برجفة وخفقة بگلبي على عصفورتي الناعمة متلحفة بعباتها ،
- نوفه يلاحبيبي ادخلي تعالي اشوفج غرفتي ايام العزوبية اخذتها وشلت هاشم وابتعدت عن ريما ،
- شنو جانت اتكول الج

- تسألني عن نفسي ، احسها متكبرة حيل
-عوفج منها لا تهتمين الها

اخذني لغرفته ، كانت كأنها  قطعة من بيتنا و محطوطه اهنا ،  لفت نظري الگيتار
-هذا شسوي اهنا ؟
- ها هذا رفيقي ايام المراهقة
كعدت على كرسي الي كدام مكتب كلش صغير
- اها والله انت لو ما مرات تجي بملابس عسكرية ولا اصدك انت عسكري ،
- اشلون ههههه
- مدري فيصل جان يكول الجيش لاموم للناس ، واهواي بيه عطلات . ومو مابيه ناس نازكه اولاد ولاية
-قصدة فئة الاغبياء
مو شرط يا نوفة اني دخلته ضابط مو جندي و هم بيئتي الها اثر عليه قوي الجيش اكتسبت منه القوة والصرامة والحزم لكن ما اثرن على اخلاقي ،

بينما هو يتكلم يمكن هو يشوفة حديث عادي لكن اني
تلخبطت مشاعري متلخبطة و مخربطة شجاب ذكر فيصل على لساني ، وكانه شخص عادي احجي عنه هيج كدام نظيره ،
شافني اباوع للفراغ ببال مبين مو يمة
**
رائد
جبتها لغرفتي  باعدها عن براثين ريما ، بس واضح عليها حاسة بشي لكن التبرير يزيدها شك ما اطلع منه السكوت اخير شي ،
- رائد عفية بعد الغدة انروح مباشرتا
زادني تيقنا هي مضايقة من ريما ،
**

نيوفر
اريد ارجع للبيت و احط راسي على مخدتي و ابللها واكون وحدي اسيرة همي ، و ندمي بأني تسرعت بهذا الزواج فيصل عايش  كلام لينا غير صحيح ، ما لازم اترك الفات بهاي السهولة والسرعة
كمت فجأة وطلعت عنه ،
على الغدة حسيت بشحنات و بالوجوه عطف علية اوف ودي انفجر بيهم واكول الهم ما تهمني ريما ولا وجودها و لا تعمدها بالكعده كدامنا اني ورائد ،  اصلا رائد بكبرة ما هامني ، عندي رغبة قوية ابجي ، خلصت العزومه على خير بالنسبة عند الكل لكن اني كنت كالعادة احس بالتحطيم لا هذا مكاني ولا مكان اولادي
اني غيرهم حتى بصلاتي لاقيت الاحراج من طلعت التربة من جنطتي وصليت ويه النساء حسيت بعمتي نظرات غير راضي كتمتها بصرف نظرها عني والبدأ بصلاتها  من اتكتفن حسيت كتفني اني بصلاتي حتى صلاتي سارعت بيها ببال مشتت !،
طريقة اكلهم متكلفة واحسهم منتبهين عليه اعرف هاي اوهام قابل يباوعون الي من جوة الميز ! بس اني اتحنطت بعباتي اخجل اخلعها الثوب مخصر عليه والي زاد حنقي وانزعاجي طلب رائد من كال اتكدرين اتنزعيها اخذي راحتج ليش احسج متحنطة اهنا ، ما تدري بالله عليك ودي اعاتبة واكله انت داخل بيتنا وشايف أجوائنا !؟ اني مثل الخفاش وسط الحمام  مختلفة بكلشي عنهم ،
رجعت للبيت هلكانه يكلك جنت بسباق حصون  ، ذبيت على جسمي ماي وطلعت ،
شايلة حزن بكد الكون من شنو معرف
حسيته يمي حاط ايده على خصري ومنطيته جانت الدنيا عصر والاطفال يمنا على الارض ،
اوف كون يبطل تودد الي اني احساسي مشلول اذا اشوية متألفه وياه فهذا قسرا او رغبة غريزية بس اني من داخل الدنيا بعد ما يلفتني بيها شي لا البهرج والغنى كفاني مثل ما ظنيت وقبلت بتغير الحال والسؤال بقى اني شنو اريد؟

- نوفة ازعتج ريما من انتقدت عباتج
سكتت اشوية دذكر ها يوه صدك حتى نسيت الموقف من نقدت كعدتي وياهم ع الغده بعباتي
- ما تهمني نسيت اصلا ، صدوك هي مطلقة مو ؟
**
رائد
-اي
رجعت دارت وجهه عني بعد ما التفتت
- نوفة لا يكون ببالج شي ترة هي ما تعن....
- ما تعني الك ادري ولا تعني الي بس هي نفسها بيك ، اشعجب ما اخذتها بعد ما تطلكت اذا هي هيج اتحبك وخلت نفسها بهيج موقف هاا

درتها عليه اريد افهم ، تحجي ببرود وبروح ميتة من ادنى اهتمام كأني اخوها وتسألني !؟

- شنو قصدج ؟ ليش ازوجها مثلا ؟
رجعت دارت راسها
- مو بينكم قصة حب ! سابقة و هي بعد تطلكت وهمين عدها بنية ، شو صفنت بكلامي ؟
رديت منرفزة
- مستغرب ومتعجب منج امنين عرفتي ب الي بينا هي كالت الج ؟  وبعدين اكو وحده تسأل زوجها هذا السؤال، ليش مزوجت غيري ؟ على العموم اني وياها غير ملائمين

-اشبيك عصبت وفتحت وياي تحقيق عرفت من اسمها ريما ، هاي صرعوني بذكر اسمها صديقات اختي اميرة بيوم عرسك

- بيوم عرسنا ، منو ذكرها
- لا لا مو عرسنا ، عرسك انت من لبنى ، يوم عرسك جان مميز لا يمكن انسى جان افخم عرس احضرة
كمت والتافيت كدامها
- انت صدك تحجين حاضرة عرسي الاول

-هههه اي والله شفت الدنيا اشلون صغيره

ذكروه كدامي قصة حبك ويه بت خالتك واشلون ظليت سنوات متأثر بعد ما تركتك ، و ازوجت ....
- كااافي

**
نيوفر
ضرب على الميز وكع شريط حبوب تبعي و طلع غضبان معرف اشبيه ليش هيج عصب حديث عادي ؟
يوه هسة اني خل احس بنفسي واعرف اشبيه وعود بعدين افكر بغيري !

**

رائد

برودها بالحديث و فتورها كدامي وعدم غيرتها الي كنت موهوم بيها وعبالي سبب تضايقها اليوم سبب الي احتقان بالقلب
مليت وأني أدور لنفسي على مرسى يريحني، حزني مكتوب علية من يوم نطقت اسمي، وصار حزني بكلّ مرسى يواجهني، ويضيّعني عن مسار الفرح ، ثلاث علاقات وما لكيت مرسى امن يؤيني، هذي نوفة دا ابذل جهدي وياها وماكو اي نتيجة ، ما انكر اني حبيتها وحبيت العيشة وياها رسائلها لي ترسلها للينا كلها عندي اصير كل يوم بيومه ، بيوم الي عرفت هي ليش رادت مهدأ من لينا حاولت افرحها بشي بسيط اخذت قياسها وجبت ثوب عانيت الا كدرت استنقيه اولا اني صعب بختيار الملابس ثاني شي ماعندي خبرة ، حتى ما رضت خلع عبايتها وحسيته ما عجبها من عرضت عليها اتلبسه بالعزومة اتقرب منها شبر تبتعد عني عشر امتار  لا وبعد فرحانه حاضرة عرسي الاول وتدري بريما جانت حبي الاول و كعدت وياها ع ميز واحد بكل هدوء وكل تصرفات ريما طلعت ما فارقة وياها !،  فقدت السيطرة على كبت اعصابي كدامها ، تركتها لا اصرف تصرف غبي واندم ، نمت عند هاشم محتمل عبثه

***
نيوفر
ذبيت نفسي بالنوم ، كعدت الصبح ما شفت رائد بصفي اضاهر كاعد قبلي ، البارحه ما دريت اشوكت دخل للغرفه ونام اصلا العصرية شو ضاج وطلع ،

سويت ريوك الي وكل ظني هو طالع للدوام اتفأجات من شفت شايل هاشم من وسطه وهاشم يضحك ويكول مو اني ،
وهو مبتسم بس من شافني اتسمر وراح دخل للغرفة تاركني مع هاشم
- شنو سويت ولك ، هاا
اجه يمي وجرني من ثوبي
-اشاولج(تعالي اشاورج)
دنكت عليه وحط حلكه ع اذني
-ماما اني بليت (ادررت) بالفلاش و عمو نايم يمي
يضحك ويحجي هشومي خجلان من نفسة العتب عليه نيمته وما حفظته عنده تبول لا أرادي مثلي بصغري صف ثاني الا بطلت تبول بالليل بسبب ثقل نومي   ،
-يوه وعمك شسوي يمك يحظي المصخم ،
دخلت للحمام سبحته ورحت اشوف رائد اوف هالحقنة  شفته طلع من الحمام الداخلي  ههههه  اليوم ما نام يمي وهمين  سبح
بسب استاذ هاشم.
- ليش نايم يمهم
مجاوب بس اعتقد حتى ياخذ عليه هاشم !
- اليوم اتروح للدوام
-اي ،
،
محتارة شسوي غده كالعاده لأن رائد ميحب التمن ، طللعت لحم وحمسته دثرم بصل فتحت الحاوية الصغيره المنزلية دذب فضلات اتعجبت من شفت سيت رائد بيها يااا هذا جان لابسه البارحه وبال عليه وجه الصبح هشومي اووف من قنقينته والله حرامات اوووف منه لو كايل الي اغسله واعقمه ،
،

بالليل رجع رائد وجان رايق والله عجيب امرة ؟

**
رائد
قريت اخر رساله الها للينا
هي ندمانه ع زواجي اتحس نفسها راح تظلمني وياها  واتريد اي وسيلة اتريحني بيها ،
باقة اشتراكي خلصت وما كملت لينا ارسال الي اعتقد اكو بعد رسائل لانها تحجي اهواي مع لينا الي متخذه وياها اسلوب المعالجه رغم انزعاجها عليه وعلى وضعي مع تقلبات نوفه اشتترجى من وحده برج الجوزاء ؟
دوم تكول الي هذي العبارة
رجعت للبيت ، محاول تسهيل عليها مهمة راحتي والي هي بس هي ترتاح اني ارتاح ،

استقبلتني كالعاده ببرود
- اتعشيت
-اي حبيبي

- ليش ذبيت سيتك جان خليته اغسلة واعقمه ترة هي بولة شدعواك ، على العموم طلعته وغسلته و عقمته
- شنو لا تكوليها بالغسالة
- هااا !

**
نيوفر
-اي بالغساله بس اكثر من مرة ، والله حرامات  ،     

شو عصب  حيل وعقدة حواجبة رعبتني عرفته بقمة غضبة ،

- انت اشبيج اكو اهنا عقل هااا اشلون اطلعين شي من النفاية و اتحطيه بالغسالة هااااا لج تلوثت الغسالة كلها

-  حرامات بفلوس  هو ترة جديد بعدين اني شسويت ترة انت منطي الموضوع اكبر من حجمة

هو يحجي ومعصب بس صوته ناصي
وكلماته اشد من حرارة الجمر على مسامعي
-  من اسوي شي لا تعقبين ورايه ولا تتصرفين من كيفج ، شي كرهته انت شعليج اتبحوشين ورايه
عندج عقل انت

عطت صارخه بيه
-انت اشكد حقنة لخاطر ربك ولك اني فيصل ابد مجان مثلك
ابسرعة البرق اختفى من وجهي وركع الباب حيل لدرجه الشباك اهتز كعدت وكل عظم بيه يرجف ، ابسرعه راجعت كلامي اخر جملة اشلون فلتت من الساني عندي حق والحق وياي واحد مبذر بيه هوس قهري بس اشلون اقارنه بزوجي السابق ؟!

***
رائد

الصمت والكلام  امام شخص تعزه تحتار شنو تختار منهن ؟  من هو يخطئ بحقك إذا تكلمت خسرته وإذا سكتت اهتزت صورته بداخلك وتبقى الحيرة بداخلك بين الكلام والصمت. الألم  يعتصر گلبي عصر سهام و اتصوبت عليه مو كلام ،   هزت صورتي كدام نفسي من قارنتني بزوجها الاول اول ما حسيت نفسي انفجرت  شردت من يمها لا اقتلها بأدية صبيت جم غضبي بعلبة كاكاو عفصتها عفص بأيدي وشمرتها على الحايط  كسرت نشرة ضوئية ،

**

نوفة

حسيت بالاستقبال ركع سترك يا الله الطف بيه ، اروحلة هسة اراضيه لو لا ،
شسوي  ؟
الله ياخذني ويخلصني من نفسي ، الصبح
دخل وكعدت ع صوت ركعه للباب ما احجي وياه احسن بعده منفعل ،
طلع ملابسه و اخذ محفظته و غراضه و طلع هم ركع الباب ، نص الليل الا رجع ، جنت متعدلة ولابسه ثوب كله لمع وجذاب ، وحاله شعري ادري بيه يحبه محلول ،
جنت كاعده بالمطبخ  انتظرة ، دخل مسلم وراح للغرفة ، رحت وراه جان يبدل

من شافني اجه ياخذ سيته ويطلع جان نازع القميص

- حبيبي ،
معرف انعم صوتي مستحية من نفسي مدري ليش استحي ادلع عليه ،
اتقربت عليه و وكفت معارضة طريقة حطيت كفوفي على صدرة ،
- اسفة ،
معرف شكول بعد الاسف و اتوسل لكلبي يهدأ و الخفق يرأف بحالي و يهدأ ،
مباوعت لعيونه كنت اباوع بعشوائية على صدرة ،
وخر اديه وطلع ، رحت وراح ،
- رائد الله يخليك لا تاخذ بخاطرك مني ،
وكفت مرة ثانيه بطريقه ،
هم ما اتكلم واجاهلني ولا كأني كدامه بكامل حلتي و طالبة منه السماح والصفح تجاهلة جرحني وهم سادني الندم لو ما منتظرته افضلي ، من شوكت جنت اعتذر اني بعمري اذا زاعلت فيصل ما اجيت بيوم صالحته بعتذار واسف هي القلوب وحدها تصفح سواء منه الغلط او مني ،
حسيت بأذلال ونمت والدموع القاسية رافقتني ،

ظل يومين ما يحجي وياي ،  وزاد الطين بلة من خابرتني تمارة جنا نتغده وهو ما يبادلني اي كلام بس وية الجهال طبيعي ،
بعد السلام سألتني عن زوجي اشلونه
- الحمدلله زين ،
سالتني اشوكت يجيبني الهم
-ما ادري اسال فيصل واشوف اوك
حسيت ضرب الماعون بالخاشوكه وكام
اشبيه ما اعرف اووف ، كمت و وصيت هاشم ينتبه ع توتو دياكل بخبزه بحجلته ،
دخلت اله للغرفة وجان واكف كدام الميز و مقوس اديه ومنسند عليهن

-رائد شنو القضية ما تكول الي والله احتاريت اشلون ارضيك ،
- روحي عن وجهي
- ادري اشبيك صارلك يومين ، اعتذر وماكو فايده كولي شنو الحل

-ماكو حل وياج انت شغلتج منتهية

-هسة شسويت ، ما فات وكت ما هدات اعصابك
- المعنى حتى ما انتبهتي لنفسج من غلطتي بأسمي مو ؟

-اني ؟ اشوكت !

-لا اني ،

تركني وراح وراجعت نفسي اريد اعرف شوكت اني غالطة بأسمه ،
ما عرفت ، لكن من خابرتني العصر سما تسال عني وجابت الي اخبار احلام صايره عدها مضاعفات بالجديد وفقر دم حاد ومحتارين بيها اهلها  ، وكالت الي اثاري مكسريها اتكسر توه والدي كال اخبارها الهم جان غضبان علينا كلنا على عملتنا ، بنهاية المكالمة كالت الي امي اتكول اختج.الثولة لهسة تغلط بأسم زوجها رائد بفيصل
اهنا تيقنت نفسي بالفعل ما استحق رائد التاف بيه الكون واحتاريت اشلون اجاوز هالموقف ، ابسرعه رحت ادورة شفته بالصالة ومركز بتلفونه زين منه ومتحمل كاعد وياي ببيت واحد
كعدت يم رجليه جان ممدد
- رائد اسفة والله مو بيدي ،
دموعي تتجارة واتمنى اتزود لأن اعرفها نقطة ضعف اي رجل حتى يلطف بحالي و يريح بالي بكلمة مصار شي ، اخذ تليفونه و طفى الشاشة وراح لغرفته ، اوووف هذا انسان صعب صعب كلش ،
اخذت وقتي  بالبكي وسكتت من سمعت صوت توتو يبجي ، ورحت الهم ،
بالليل اتخطف من يمه بالغرفة ولا كأنه شايفني وهاشم الوكح خبلني ما يخليني اصفي بالي و اعرف شسوي حتى اجتاز هاي المشكلة ،
دخلت للمرة العاشرة
مناك اعصابي منهارة على الي صار بسببي واحس الدنيا ظلمة معتمة بنظري  واني وحده سوداوية معقدة ، دمرت البنية ومناك رائد  ديضغط على اعصابي ، مر من يمي هاشم و بأيده مفاتيح رائد  جريتها منه
وضربته على علبته
- كلب ولي منا لا تدخل هاي الغرفة حقير
باوعلي رائد بنظرات هجومية من طردت هاشم بهاي الطريقة
- ليش هيج تتصرفين ؟
كام راح طلع لبرة واني غليلي ما شفى بضربة  هاشم  ، طلعت وراه لحكته للصالة كاعد و هاشم بحضنه اصلا ما يبجي متعود  علية ،
باسه من خده وشافني ودار وجه عني

- رائد الله يخليك اسمعني والله كلبي خلصان

كال لهاشم يروح يفر توتو بالحجلة ويلاعبة
طفر هاشم حيل يسمع كلامه وراح للغرفة

-اسفة .

وكف كدامي وبعيونه ملامة و آلم

-ما تكفي

- والله مقصدي،  اسفة  . لعد شكول
- تعلين صوتج وتغلطين بأسمي  وتردين كلمة  وحده تمحي ؟؟
شنو تسمين ، مقارنتج الي برجل ثاني وان كان متوفي جرحتي كرامتي كرجل ،وما كفاج هذا  كله وتجين
اتغلطين بأسمي بنفس الوقت الي گلبي شايل عليج ، مهما كان مقدار معزتج ما تشفع الج لي سويتيه فاهمه ؟!

اسبوع كامل يجي بالليل ينام يم الاطفال تاركني وحدي كمت اخذ توتو يمي ،

متحمل هاشم وعبثة بالنوم ولا يتحمل شوفة وجهي حسيته حيل قاسي وحقود ما ينسى ومايقدر الي طلع مني بلحظة عصبية ،

اشكي حالي ل لسما ، اما لينا كمت بس احجي الها على هواجز روحي ، ما ادخل وياها بتفاصيل حياتي حسيتها دوم ويه اخوها وخفت تستصغرني ،

سما وحدها الي تسمعني من غير ما اتلوم بگلبي الخلصان ولا تكول لاحد لان اميرة كبل توصلها لتمارة ويكعدن يوعضن بيه ،
عدت علينا  عشرة ايام وهو ولا يباوع بوجهي ، سما اتحثني  ابادر اني هيج نوعية صعبة تتنازل عن موقفها ، بس بطريقه مختلفه مو اعتذار بالكلام ،
دزيت اله مسج وهو بالدوام ، ((حبيبي  حضرت الك الكريب والصاج الي اتحبة تعال على العشا انتظرك ))

ما اجه ؟

ما قدر ولو هو اشمدريه اني رغم كل احاسيسي المدفونه احاول تودد اله رغم اني مرتاحه بعدم الوصال !، احسها فترة اصالح مع نفسي حتى اعرف شريد بس مع الاسف ماعرفت وشو ضجت من هجرني وبديت اكره هالجفا الي طال و محبتي لوحدتي كرهتها و كرهت زعلة من صارن ١٥ يوم     ،

خابرت لينا بعد سلامها غمضت اعيوني وسالت بالي مخابرة ع موده
- لينا اشلون اصالح رائد وشنو يحب !؟

سكتت واخذت وقت الا جاوبت

- اها متخاصمين اشوف كتابتج الي كلها سلبيه هذا السبب
- اكلج اني هسة دحجي وياج مو كمعالجه كصديقة وكأخت رائد انت اتعرفيه
-والله يا سواد ليلة الي يزعله من يخاصم احد اما يتركه للأبد وينفي من حياته
-يااا شنو هاي

-صارله اشكد الخصام
-اهواي
-مهما طال انت زوجته ووضعكم يختلف اهم شي سبب الخصام شي ما يمس كرامته وكلها فترة ويرجع وحده طبيعي حبي

سالتها بخوف  وتردد
-واذا يمسها

- هااا صدوك ، اوف ما ادري والله رائد صعب و كلنا نتحاشاه

- لينا حبابه ساعديني اشلون افك هالخصام
- مدام ما وداج يم اهلج وبس ساكت مو
-اي
-اذن هو متمسك بيج ،
راح احجي الج مختصرات اشلون اتراضيه
رائد مو محب للتواصل الجسدي فالاغراء ما يفيده
- ها اشعرفج بي
-زوجته جانت هم صديقتي
-اها
سديت منها شو كلامها ما احسه صح احسه جنسي بشكل احتاريت لا اعرف احجي ولا اعرف اصرف اشلون بيه ،
وهذا الموضوع اصلا شدخلة !
،
فاتت عشرين يوم على خصامنا رحت بيها لهلي رضوان راجع للبيت بس اكو كهرباء بينه وبين علي ما يتحاجون مثل قبل ، سما طلعت معدل جيد بلكت تنقبل بيه كلية بيها حظ ، اسبوع وهو بالدوام  ، اجه اخذنا وبهاي الفترة علاقته بهاشم حيل تطورت زعله مني ونومه يمه خلاه حيل قريب عليه لا وبعد يسولف الي هاشم يسولف الهم قصص الي اني معرف اقصها ابد وماخذ عقولهم ، هم شي حلو وهذا الي خلاني احاول اتمسك بيه من شفت بيه اب صادق ويه اطفالي الله عوضهم بيه ملازم اخسرة بعقدي لازم احافظ علية ،
من طلعت ويه تمارة من جنت يمهم حاولت اشتري ثوب نازك على ذوقه صرت اعرفه يحب الملابس الساده ،
كان لونه بيجي ، لبسته وشعري مبلل توني طالعه من الحمام وهو جان يم الجهال هذا الحجي الساعه ب ٩ بالليل ، سمعت صوت توتو يبجي بقوه انهبطت ذبيت الخاولي وطلعت وشعري ينقط ماي ، لكيته واكع وطالع دم من شفته
-توتو جريته من رائد الى راح يجيب اله قطن
- اهدي نوفه مابيه شي ،
وهو بحضني مسحه رائد وأني  اطقسته ما بيه شي ثاني واكع من اول درجه ، هاشم يضحك ويكول ماما  لابسه
باوعت لنفسي بثوب النوم الي عود حاولت اغري بيه رائد الليلة عسى ولعل هالثوب يذوب الزعل والحقد من قلبه ويرضى ،

جان قصير حيل وبيه فتحات جوانب بطني ومجسم قماشه فانيلة وصدرة عاري
استحيت من ابني الصغير يفتهم صاير كلش ، ولا وبعد كاعده يم رائد هيج كدام هاشم  ، وهو جان يسكت بتوتو  انطيته الولد ورحت لبست روب ورجعت كعدت يمه ، رحت يمه واي مود مباقي الي من الهبطة
اخذت ايده ،
-مكافي زعل رائد ؟
ما جاوب  وسحب ايده
- اني تعبت ومليت بعد لا اراضي ولا اتوسلك اتوسلت طول هاي الايام بما يكفي حتى نسيت السبب اني ، ترة احجي وانسى ابسرعه بس انت شكل قلبك قاسي واعوفك على راحتك تجي وحدك ولا تكلي ما حاولت

اخذت ابني منه وجنت جاده حيل بكلامي خالي من الدلع مو مثل من كل مرة اتوسله يرضى ،
هو طيب و يداري اطفالي هذا اهم شي بعد شلي بالاذلال . ،

رحت حطيت توتو بسريره لانه هو كايل لهاشم اوت البارحه لا تنيمه اهناك يتعود مخلي هاشم مرسال اذا يريد شي ، حتى من توتو حرمني ،
نزعت روبي وذبيت نفسي على فراشي ما اجاني نوم طلعت فلم رومانسي محبيته ، غيرته برعب ،

**
رائد
كان لازم انطيها درس جرحي ما اعديه بسهولة وهذا طبعي ، جرحها  الي حيل عميق منو يقبلها على نفسة ، التجاهل خير عقاب الها  ، عبالها طولت عليها و اتماديت عليها بالخصام ، بس اني ناوي اوصلها لشهر حتى تعرف ان الله حق و تنتبه لنفسها وتبطل رعونه بتصرفاتها وتحسب الف حساب للكلمة قبل لا تطلع، هذا مو بس وياي يخليها تكون حذره لا حتى بحياتها لازم اربي و اروض اربع اولاد مو ثلاثه همه وامهم  ، بس هسة اشلون اتنام يا رائد هااا لابسة البيجي عليها دمار ،  غاسلة شعرها بالشامبوا مالتي كلير رجالي  شعرها فايحه ريحته منها  شنو قصدها بهاي الحركة الملعونه .
ضربني هاشم الغافي على خصري عفتله سريره الي يخليني اكعور نفسي حتى يكفيني ورحت افتر بالصاله على الضوة الخافت ، وعيني على مكان غرفتها ، مشتاق الها ولهمساتها و لأنفاسها مشتاق الها وقافل عليها للنخاع الليلة ، انطرحت على القنفة ،
اهدأ يا رائد ولا تحن ولا تلين خليك صارم ،
شصبر هو الفكر تركلي طاقة للتحمل

حسيت باحد طلع ،
هاي هي
شافتني كاعد
-ها رائد ليش كاعد
جاوبت بعصبية
- وانت ليش كاعده ؟
باوعت للساعه وكالت
--الساعه ١١  كعدت  بعدني سهرانه . رفعت ايدها جرت كيس الكرزات ،
واني عيني ذابت وانحنت ويه انحنائات جسدها الطري اكيد متقصده اتخضع يا رائد ،

انتبهت الي اشلون صافن عليها واعيوني تلمع على جسدها
-اتريد
مدت الي الكيس من بعيد
شافتني مجاوبت ،
رجعت للثلاجه فتحتها ودنكت اي والله متعمده ، دورت بين العصائر على واخذت واحد منهم
سديت الثلاجه برجلها انتبهت عليها حافيه ورجلها مثل البلور صافيه وناعمه حتى الها اشتاقيت لعد اني لأي درجة من الثمل بيها واصل ومانع نفسي عنها مثل العبد الصايم ومنتظر اذان انتهاء العقاب يأذن واصفح عنها لكن بالحقيقة طلعت اني الي معاقب مو هي راحت بكل بطئ تمشي و رجعت لغرفتها ، واخذت وياها لب العقل ،
***
نيوفر
-يوووه شجاني وسديت الثلاجه برجلي اكيد هسة انتقدتي بداخله وراح اصير همجيه بنظرة اكثر لا وبعد طالعه نص الليل ادور ع اكل ، يوووه شكعده هو ينام من وكت حتى يكعد من الفجر اشلون حظ ،  يبوووه انوب نسيت اجيب طاسه احط بيها المخلافات ، طلعت لبرة بلكت رجع للغرفه مال الجهال ، شو هذا بعده كاعد على القنفة بس شافني رفع نظرة

***
رائد تمنيت لو راضي اليوم من اعتذرت استنزفت كل طاقتي لا والله اشتياقي اليوم ما يقتصرت لحاجتي الها وبس ، اني حبيتها و مشتاق الها مثل ما يشتاق اي حبيب لحبيبته هي كدرت اتفهمني حبي لريما انتهى من زمان والقلب صار ملكها الها لا غير ،
طلعت من غرفتها للمرة الثانية ، اي واخيرا  يمكن اكتفت من احتراقي كدامها ، وقدرت موقفي  واجت اسهل عليه الامر ،
افترت للمطبخ ومطتني ضهرها و انحت على الكاونتر طلعت طاسة
ورجعت من غير ما تباوع الي ،
الله يلعن الكبرياء الي خلاني انتظر عطفها الذاتي  ، ضربت الطفايه الزينه الي على الطاولة الي كدامي ، طلعت هي
-شكووو رائد شصار ؟
التفت عليها وكمت ابسرعه متوجه عليها
شفت اعيونها انذعرت حيل واتراجعت لورة
-شكو شسويت اني غطت وجه من شافتني بوضع هجوم عليها لا اضربها !؟
همست بضعف
- شسويت اني !؟
وخرت اديها وكلت الها
-  احبج يا غبية حسي ،

يتبع

مساء الورد ،، تحياتي الحارة الكم كولكم بس عندي ملاحظة واتوجب اكتبها ولحد تكلي بمكان ما اصرفين كلمات بيها اكتبي بارت ! وكاني الة تبث مشاعر مو بشر ، ما علينا
مو من عادتي اذكر شخص واخلي الباقي يذموه بس ملاحظة الج يا عمري انتي
awgawg
اقدر حماسج للقصة لكن يا عمري وداعت اطفالي تأخيري مو لدافع الشهرة او لدافع كثرة التصويت صحيح مرة حطيت شرط لان اهواي باخسين حقي لكن الحمدلله قدرتوا وكمتوا من ذاتكم من غير شرط اتوصلون البارت ل الألف ولو هو هم قليل مقارنة بالي يقرة لكن والله راضية بيه وماعندي مشكلة ولا اخر النشر على مود كسب التفاعل عندي ضروف  وسابقا وكلت الكم حسب وقت فراغي ، والله اني بطيئة بالكتابة البارت يكلفني اربع ساعات اربع ساعات انعزال اربع ساعات لازم ذهن صافي هاي اني وهاي مقدرتي بعد مكدر اسرع نفسي ورغم هذا عادي اني انشر يومي جنت بس شسوي اذا كلها تأمرت ضدي من نزلت النت الكهرباء حتى تليفوني صار يشكل ومعندي حاسبة محب اذكركم كل يوم بهذا الكلام عادي طالبوه بالبارت لكن لاتتهموني لو اتكولون الي تفقد طعمها وكأنكم اتهددوني و وحده بأحد الباراتات اتكول اسحبوه التصويت حتى تنشر الكم !! شنو هالمنية يا عيني انتي ما مطيه وقتج الي وقتج ملكج اشوكت ماحبيتي اكدرين اتعوفين القصه بس اني ملزمه اكمل . نشرت قصه حقكم عليه اكمل لكن على وقت فراغي لانه هواية وليست عمل ولا اخذ اجر عليها والتصويت مجرد حق معنوي لا اكثر لا اتمنون عليه بيه .
اسفة بنات وربي كان بودي التزم وياكم بس اعرف التزاماتي اهواي لهذا نوهت الكم حبايب وبكل بارت يمكن انوه ماعندي وقت محدد لكن اكمل القصة وهذا الشي ملزمه بيه وحقكم اكيد لكن على وقت فراغي وما ازعل من اطالبون ببارت و احب اصلا انشدادكم بس الكلمة الطيبة صدقة 🥀وها اني وربي احسن من غيري ينشر لو مرتين بالاسبوع لو بين يوم ويوم اني اطول وقت اخذته ثلاث ايام وهسة دكنك يومي او بشكل اخر حتى صار النشر من ذاته بين يوم ويوم والبارحه نشرت واليوم همين نشرت لان اني معندي وقت محدد حسب الظروف
لا ازعلون مني وهذي اخر ملاحظة اكتبها بهذا الخصوص وبعد ما احجي والكلمة واذا شفت كلمة جارحه بعد ما اقرة التعليقات حتى لا ازعلون واحبكم والله وراح اخذ وقتي بالوصف منا من اكملها 🌷🌷
وهذي اختي شاهد عليه من اجت يمنا خطار شافت حالي