رواية الرعناء والأشيب الفصل الرابع 4 - بقلم زهراء العراقيه

كيف لي أن اعيش وأنا  اكره نفسي بشدة!

رجعت على الارض كعدت ابجي
يربي طلعني منا . والحسين ع بعد ما اطلع من البيت والله ما اخلي وجهي يشوفه شاب  بحياتي بس طلعني منا .

ما اعرف وين راح مختار شو سكت وهدوء برة . بلكت طلع . طلعت من الغرفة على مهلي وكلبي يدك واتلفت لا يطلع وراية ويخدعني   باوعت للصالة امدد على الطقم وحاط ايده على عينه .
نايم؟ جنطتي عفتها جوة . بس الخوف مخلاني اروح اجيبها اهم شي عندي اطلع  منا . سمعت دك قوي مو دك دفر بالباب فز مختار عينه عليه وع الباب . ركضت للغرفة ورديت للباب حيل طبقته اجه ينكسر و كعدت ع السرير ساده اذني من صوت الدك .
اشوية وسمعت اصياح رضوان .!
و امعارك

وينها يا عار . وينها

هي منو  .

هي منو مو اني اعلمك يا ناقص

صكار اشبيك جايبلي هذا وجاي

اخوية اهنا .
يا ارض انفتحي و ابلعيني بجوفج ميته،
جميع اعضاء جسمي نملت حسيت بدوار ودوخه و بعد ما ادري بشي .

كعدت والرؤيا مغوشة . احس نفسي بشي ديمشي . اتضحت اشويه منها  . اني راسي يم نافذة سيارة . اني بسيارة . بس وعيت اكثر شميت ريحة اعرفها كلش زين ريحة عرك و جكاير ويه ريحه ثانية . ريحه اخوية . التفت عليه كاعد يمي ومدنك راسه و مغطي بيها وجهه كله . هذا بابا ديسوق . هاي اني يم اهلي !؟

حس بنفاسي تتثاقل التفت علية . عضلي شفته لدرجه حسيته راح يشلعها واعيونه الشرايين الحمر راح اطك عليه . درت وجهي . وكمت اون لأن ابجي واحاول مطلع صوت .   وصلنا كدام بيتنا اريد انزل رجلية ما تتحرك . اعتقد انشليت .
نزلوا همه . و رضوان يباوع الي . بادلته بدمعه و حسرة ما اتحمل نظراتي اله و طفح الصبر الي عنده طول الطريق و دفر الباب علية وصاح انزلي 
وفتحها وجرني وابوية و علي يردون يداركون الموقف وخره عني . وهو هاج اكثر

اتريد تحميها بوية هااااا عاي عاااار عاااار .
خل اكتلها واخلص من عارها .
الجيران طلعت من ابيوتها واكثرها زلم تتفرج علينا وعلى رضوان   .
جرني علي ودخلني . وظل رضوان يريد يسكته ابوية ميكدر . سمعت فيما بعد ضاربة بوكس مدمي حلكه ومدخله والجيران حاولت تدخلت سد الباب بوجهم

و منا بدأ تعنيفي بشكل رسمي .
واهنا من كعدت بزوية بالهول و ابوية واخوية رضوان شبعوني كتل . واهنا من خابر ابوية عمامي يستنجد بيهم . واتغير اسمي الى العار   . فقدت انسانيتي . مرتين مرة من سمحت لواحد غريب يشوف شعري و مرة من صرت حيوان حمار اشما ينضرب ظال عايش .

اشجابهم اهلي واشعرفهم بمكاني هاي الاسئلة حصلت على جواب منهم بعد شهرين وبعد ما طلع كلامي صح وما لامسني . عرفته من اميرة . من تأخرت ساعتين خابرت تمارة ام سجى تدزني ليش تأخرت. ام سجى كالت بتج ما اجتنا . كبعت وراحت الهم اشلون ما اجتكم اني بعيوني شفتها تدخل بيتكم . اني طلعت من الباب من طلعت الى ان دخلت الا دخلت . وظلت اتحلف بسجى و تتوسل الا حجت سجى وهي خايفة من امها واعترف هي دخلت نيوفر دقايق وطلعت بعد ما اتوسلت الها اتكول الهم هي يمي .

رجعت للبيت و بلغت ابسرعه والدي رجع للبيت و خابروا رضوان يروح لبيبي . وظالين اربع ساعات يدورني و حتى بابا باسط تمارة من حركة گلبة عباله اني طافشة منها   و ظالين يدوروني الا أن علي فالتها يم صديقة صكار وكايل اله احنه اندور أختنا  يمكن مخطوفة.

ابسرعه صكار عايف علي بالباب مال بيتهم واكف و اجه لبويا الي جان يريد يبلغ الشرطة  .وبلغه بالي يعرفه وابوية اجه يطلع بروح صكار ما مصدك . كايل اله بتكم عدها علاقة وية ابن خالتي . مراهق ملعب وحذرتها منه وما ادري اضاهر وياه ترة شايفها صاعده سيارته قبل فترة . طلع شايفني سابقا . ومراقبني وعارف بيه واني غافلة و حتى محاجي ابن خالته يعوفني بحالي بت ناس ومختار كايله هاي صيده سهلة واذا مو وياي ويه غيري وحده مطية مجال !

وابوية ضارب صكار . بس رضوان مصدكه . وصكار كال الهم والله اني لان عندي مخافة الله واعتبركم اهلي وماكل بيتكم اجيتكم . اخذهم وراح كحتمال يسأل مختار عني  بشقة الانس مال مختار واخوه والكبير . طبعا هو مراد ياخذهم وياه بس رضوان  لزك اله . ما اكدر اتخيل او اوصف شنو شعور
ابوية شايفني نايمه على سريرة ؟
الله يكون بعونك وبعون اخوية اشكد شايل حنية وما قتلتني بمكاني . الي صار
ما يستوعبة العقل رغم كل اخطائي استجاب الله دعائي و اخذني بابا ونقذني
هذا الي ظنيته اول ما فتحت اعيوني
لكن بعد شهر  عرفت نفسي لو ميته ومدفونه واني مستورة اهون بهواي من الهوان و العار الي لحكني اني واهلي والضرب الي اتعرضت اله و كشف الطبيبة ونظرات العمات ونسوان العمام
بابا خلال شهر لم غراض البيت بسيارة حمل و شال من المنطقة  لوحده بعيده وسكنه بيت اجار . وعرض بيته للبيع اعتقد حتى من قرر يبيعه الي يقرة القطعه يكول خطية جان خوش رجال وبته طمت وجه بالارض! المنطقة كلها عرفت بت ابو رضوان عار اخوها سحلها بالشارع ،  البيت الاجار اصغر من بيتنا و ابعد على مدارس اخواني الجديده و وسخ ينظفن بسيراميكه تمارة و اميرة وماكو. اني حبسية الغرفة .حدي للتواليت و لكمتي توصلني بيد اميرة لو تمارة ولا واحد.منهم يريد يشوف خلقتي .

بعد شهرين عمي اجه وكال اريد اميرة  لحاتم بابا كيف وفرح لأن الغريب مراح يقبل يناسبنا ابد صرنا مثل الجربانين محد يحب يتقرب منا ويناسبنا ولحد يكول بالغت هذا شي عشته وشفته بعيني بس كال اله ابنك ياخذ بتي يقصد رضوان .  وعرفت او سمعت اخبار من اميرة . ان عمي كايل اله منو ينطيكم مرة او ياخذ منكم اني اخوك خل اساعدك وانلم اولادك   . رضوان متخبل هو ما يفكر بالزواج بالوقت الحالي و بت عمي لمياء مو فتاة احلامه سمرة وقصيرة حتى عمرها ٢٨ سنة اكبر منه بسنة وما سمعنا عنها بيوم انخطبت  مو خريجه . بينما هو خريج و وسيم بنظري حيل يشبه بابا ابيضاني و طويل من النوع الي يعتني بنفسه  وشعرة و يشتغل بمحل فلافل شريك ويه صديقه بالكاظمية   .
واعترف لوالدي هو عنده وحده مستقر عليها و واعدها بالزواج بس يحصل تعين او تفرج و ما قبل يخطب لمياء . تمت خطبة اميرة و  زواج من غير معازيم اهواي بس المقربين . واني ما حضرته بأمر من والدي . تزوجت اختي وتركتني وراحت لبيت زوجها

،،
حاتم
واخيرا اخذت الي اريدها وتوسلت لوالدي يعفيني من سالفه ستر اختها  وصارت اميرة ببيتي . والحمدللة

؛؛

اباوع لنفسي بالمراية . اتغيرت اهواي .
صار جسمي احلى من قبل شعري الي بأمر من تمارة ممنوع ينقص من كنت بعمر ال١٦ اسمي باترته . هسة واصل لضهري   . جسمي تحول انوثي اكثر واني بعمر ال١٨ بس حيل كارهته وكاره شكلي . كارهه معالم وجهي احسها قبيحه مو رحمانية مثل ما اتكول الي تمارة دوم اني شكلي مو رحماني نبتت شيطان اول ما شرفت للدنيا امي راحت  اول ما وعيت طفلة وكحه ما تنگحم ومن شبيت جبت العار لهلي والله يستر من تاليي هذي الجمل صارت نغمة يومية اسمعها لازم منها . كل اشوية اذكرني بسوايتي و اكره نفسي اكثر واكثر وكمت احس نفسي قبيحه خلق واخلاق . هاي اني طول اليوم اشتغل واخيط ملابس لخوتي و للعمات والخالات و بس من يجون اخواني و ابوية واجب دخلتي لغرفتي و ما تقبل تمارة اختلط وية سما اختي  اختلاط الخوات . موبايل ممنوع طلعه للاقارب ممنوع مرة كل ثلاث او اربع اشهر زيارة بس ملابسي هي اجيب قطع واني اخيطها لنفسي كلها الوان غامقة وقريبة للأسود   كله هذا خوفا مني تمارة اتكول بس ننطيج مجال اترجعين اتغلطين نفس الغلط . انت ابتلاء

من يجون عماتي لازم بس اخدم و ادخل لغرفتي
بيبي

كلش ادهورت صحتها و ما شايفتها من اشهر . هي اتخربطت من عرفت بسالفتي وهي عدها قلب ما اتحملت و اخذها احد خوالي يمه اتعيش .

دخيط ثوب لأختي .
ودخلت تمارة
-وكفي المكينة خل احجي وياج
وكفتها

-جايج عريس
باوعت الها بتعجب

- اي لا اصفنين عليه .

وطلعت ما انطتني اي شي عنه

ورة ايام جنت بالمطبخ اطبخ . وسمعت احد دخل عبالي تمارة رجعت من السوك .
طبعا الباب مقفول عليه

دخل رضوان من باب المطبخ الي ع الممر  ولزمني من خوانيكي

-اكتلج انت اكتلج واخلص منج

-ر رضوان   شكو
بعد مكدر اتنفس دمعت وحسيت روحي دتطلع واعيوني اتباوع اله مفتوحه ع سعتها .
هدني من اجته سما اتوخر بيه عني

وكع الجدورة كلها و جدر دسلك بيه البتيته وكع ع صفحتي  صار الماي على فخذي ورجلي
سما
-اسم الله نيوفر تأذيتي

روحي شاغت الماي حار

التفت هو عليه وشاف قدمي حمرة .واباوع اله بخوف .  اتراجعت للخلف لا أراديا . وهو طلع من المطبخ .

بالليل ما نايمة رجلي تلسع بيه رغم تمارة جابت الي عصارة دهن حروق . 
اختي غاطه بالنوم واني اتحصر على راحه جسدية لأن النفسيه بالله من زمان فقدتها .
حسيت الباب انفتح . دخلنا اشوية نور من ضوة الممر و حسيته ظل رجل ماعنده شعر طويل مو مرة . عرفته من طولة رضوان
لأن بابا سمين و علي اقصر من هيج .
غطيت راسي واني ارجف كلت اول تالي يدخل علية اني ميته ميته اليوم . بس اتسأل شنو جد من اثبتت طهارتي سقط قتلي عرضوني على ثلاث طبيبات وتأكدوا من صحة كلامي وهاي مرت سنتين  .  حسيته واكف فوك راسي احس بملابسة من يتحرك يطلع منهن صوت

غصبا عني صدر مني صوت شهكة والعبرة خنكتني . رفع الغطى عرفني  كاعده . 

-توجعج رجلج ؟

حسيته من صوته باكي او تخيل الي ما ادري ما صدكت سمعي عبالي من اثر نومه .

كعدت ومددت  رجليه  واباوع اله بخوف

-شت شتريد ؟

-وجعتج

بجيت و خانكه صوتي لا يطلع
كلامنا شبه هامس و الباب اشوية مفتوح مسلل ضوة كلش ضعيف ما اكدر من خلاله اميز ملامح .
كعد ع طرف سريري .
شمر على حضني عصارة
-هذا مضاد حيوي الماني احطيه هسة يبردها .

- اشبيك . اشبيه صوتك
سألته بخوف منه واستغراب هم من تصرفة يأذيني و يجيني نادم !

مابيه شي .

سكتت

وكف .

- اليوم جان عرس غسق .  اليوم ازوجت واحد ثاني اهلها ما يرضون ينطوها من سألو علينا بمنطقتنا  وعرفوا اني اختي شنو ماضيها وجيرانه ما قصروا بتكميل النقص الي ما يعرفوه !

كالها بصوت حيل تعبان و طلع بهدوء مثل ما اجه . وعرفت سبب ثورته اليوم !

يتبع

ملاحظة مهمة
وهي لحد الآن  الاهل وبالاخص النساء ما مصدكين انها مع شاب ما متقرب الها ساعات وشاكين انها غاصبها لكن مو بالطريقة التقليدية حتى لا يتورط لكن اني مشيت على كلام واصرار نيوفر وما حطيت شي من الشكوك

تصويتكم
حتى انزل الكم الجزء الخامس  بالليل . ويضهر بيه الاشيب 😉