رواية الرعناء والأشيب الفصل الخامس 5 - بقلم زهراء العراقيه

الصراع الخامس
-أنا على ما يرام
-لكني أعيش بطريقة لا تشبهني أبدا

الطاعة والقبول و الانصياع خلف اوامر تمارة ابد مو من طبعي بصراحة ما احس بنفسي ولا احس نفسي تغيرت بذيج الايام حسسوني أني مو من حقي اعيش وهمه الهم فضل تاركيني أتنفس هذا الي فهمتة الي يخطأ لازم يظل دومه خطأ بنظر الناس و محد يسمح اله بالحياة ولا اله اي فرصة ثانية رغم هو يمكن انصلح اكثر بعد الخطيئة صارت صفاته انقى من قبل ما يخطأ لكن بعد هذا حكم العادات والتقاليد .
تفأجات برضوان يحب و رايد يخطب واني ما ادري . ولو شعرفني اني ! ،

يريد يسافر وبابا ما يخليه يهج ويروح يضيع بالغربة.
،

ورة فترة  

جنت اشطف المطبخ . وتمارة اتوجه وتعلق .

دخل علينا علي وشمر الكتب حيل ع الميز
-ما ادوام بعد  . فاهمة . اني رحت طلعت الماسحة ورجعت وكفت ع السنك اجلفة .
واسمع كلامهم حيل مشتاقه لجلسات العائلة و لأخواني

بعدم اهتمام جاوبته امه
-ليش اشبيك ولك

- يمة حظي الاغبر واحد من مدرستي القديمه ايام الابتدائي جان جيران و اجه هسه نقل النا .

-لا تحسس قابل كل الناس تعرف بسالفتنا

عاط حيل
-يمة اكلج جان جيرانه . جيرانه . مسولف لصديقي المقرب و اجه اليوم كلي هذا هيج وهيج يحجي عليك فوكاهه حظي الاغبر ذبه عليه وهو يكرهني .

- يمة شجابه الك هذا

-ابطل والله وابيع فلافل وية رضوان اشرفلي ..

كام من يمها معصب وهي اديها فوك راسها و تندب واتباوع الي
-ضاع مستقبل جهالي يربي شنو ذنبي يااارب ليش هيج ضاعوا جهالي حسبي الله ونعم الوكيل ..

رجعت درت وجهي ع السنك .
صارت هي وراية ضربتني حيل ع ضهري و اتعدد عليه

-العار ما يموت ما يموت ظاله عايشه و جهالي راح ينطمر مستقبلهم ماتت وعافتها الي .  ما اخذتج امج وياج بالكبر . جان متي بطنها .
نص الكلام كالته وهي تتوجه للخارج .

اني كعدت على الارض  وبس الدموع الحارة تعبر عن الي بيه
ذاك ما خطب الي يريدها
والثاني انفضح بمدرسته .
بقت بس سما زين منها متحملة اتباوع بوجهي

كعدت ادك ع المكينه واطلع قهري ببجامه مفتوكه لو ثوب طويل . 
واتذكر مختار وكلماته  . حبي اله الي دمرني ثقتي بيه خلتني ادمر عائلة كاملة

.

حتى تمارة كمت اجنبها شوفتي حابسة نفسي بغرفتي

بيوم اجتنا خطار اميرة . عدها صار ولد

صاحتلي 

-نيوفر .  ولج كبر تعالي سلمي عليه
سمعتها واني بغرفتي اساسا الغرفة قريبه ع الهول
بس اخوتي موجودين اني ما اطلع بجودهم كثرت الحاحها خلتني اطلع .سلمت وبست ابنها   . وكعدت يمها مدنكه راسي ..

تمارة
- كومي جيبي لأخوج نفاضة

رحت اجيبها لرضوان
وكامت وراية  تمارة

-اكلج شنو انسوي عشة رجل اختج يرجع يتعشى يمنه

-طلعي كبة الجريش من المجمدة و سوي وياها جدر دولمه
كلت الها واخذت نفاضه من ع الثلاجه .
ورحت حطيتها كدامه ع الطاولة مشفت رجل علي دست عليها بطرف أصابيعي ..
محس نفسي غير مدفوعه حيل ووكعت ع وجهي ع الارض

عمية ما اشوفين لو العار اعمى  
كالها بعد ما وكعت . 

اميرة بتحذير
-علي !

رضوان ضربة ع متنه
-ولك انت شو كدامي هيج اسوي

-لا تضرب اشبيك

-لا تضريها ولك واصيح عليها مو اكبر -منها انت فاهم

-ها وانت تحرك بيها و تضرب حلال اجت يمي صارت حرام .
اني كمت  وطلعت لغرفتي.  بس سمعت اصياحهم مدري اشصار بيه تذكرت اليوم الي لزموني بشقة مختار والضرب والصياح مال ذاك اليوم
سديت اذني .
منا من اختفى حسهم . وسمعت بابا طالع من غرفته مسكتهم
دخلت عليه تمارة

-ولج انت بلوة اخوتج اتلازموا من وراج   ورطه والله ذبها عليه كون الله ياخذج ليش ما متي ويه امج . ليش واتعض باصبعها ..

غمضت اعيوني عصرتهن عصر احاول ما ارد بس احس جوايه بركان مو بأيدي

صحت بعلوا صوتي
-يا الله    اخذ روحي .

غمتني
وبابا
اجه وصاح

-سكتيها
وراح
لطمتني على حلكي وسدته .

-كااافي كاافي بعد شتردين اسوين بينا حتى اهنا اتفضحينا  . كونج بموته ونخلص منج .

طلعت واني طلعت وراها استغربت من دفعتها واتعديتها ورحت للمطبخ  .

طلعت من المجر اكبر سجين لا باوعت الها ولا اتكلمت وجهته ع گلبي
صاحت هي .

معرف اشوف دم يتناثر  كدامي واحد لازمني من ورة  . اني من طلعت من الغرفة مثل الصم البكم عميا لا اسمع اصياح تمارة ولا اشوف الي كدامي  . معرف منو لزمني .  واشلون جرحت ايدي من ساعدي .

الي لازمني يهز بأيدي يريد يوكع مني السجينه .  بس اني لازمتها حيل واريد اوصلها لقلبي و هو يوخر  بيها  و اني اقدمها على صدري .

لحد ما تعبت وروحي شاغت من هاج وجع الجرح الي بأيدي . 
دارني عليه و راسي على صدره وهو مدري شنو يحجي . حيييل اشكثر مشتاقة لهذا الحضن سنتين ما ضامني ولا بايستك لا بعيد ولا بحزن . سنتين محرومه اباوع لوجهك   . اروح اوكف بالاستقبال اباوع بصورتك  واتمعن بيك مثل اليتيمة وانت عايش .

؛
مثل ما اتكول تمارة العار ما يموت . بعدني عايشه . اميرة اثاري جانت اتراضي بعلي لأن رضوان كاتله . وخلتني وحدي مع كلمات تمارة الي ثارت بداخلي رغبة الموت الي هي زرعتها بيه من سنتين .
مرت ايام . وطاب جرح ايدي
اهه صدك كمت اضحك على نفسي الجوي الي بفخذي لساه ما رايح وصاير قريب للبني الفاتح حيل وعلمت على نفسي علامه عار جديده  بجرح على ايدي  .

دخلت سما بزي المدرسة وفتحت الكنتور
وبدت تفتح بزرار قميصها . تذكرت لبسي و زي ومدرستي .الله من جان كل همي ما حافظة الدرس اووف لو ترجع ذيج الايام
قطع صفنتي دخلت اميرة عليه . قابلتها بستغراب وسلام

-اشعجب خلاج حاتم تجين مصارلج اسبوع من اجيتينا .

مجاوبت على سؤالي

- نونو حضري نفسج

- شنو توني نظفت لا اتكولين كراب تعبت

-لا يحبي عفى اني اكرب عليج . دكولج حضري نفسج داخذج وياي

- شنو ؟

- هههه كولت لبابا و وافق اتباتين كم يوم يمي

-لا  لا صدوك تحجين

-اي والله

طرت من الفرحه ورحت وتمارة ما راضية.انصدمت اشد الانصدام من سولفت الي واحنه بالطريق
رضوان طالب منها وبأمر منه جايه ومستأذن هو من بابا اصلا مو اكول أميرة  اشلون قنعت ابوية يطلعني من سجني وغصبا ما ع تمارة هو مسلمني الها بعد مصيبتي .

واحنه نحضر العشا بمشتمل اميرة
- حبي لا اتعيديها .. لا عبالج المنتحر يرتاح لا و وربج اتموتين كافرة . والله غضبان عليج قتل النفس حرام . ما قارية قران
(وَلَا تَقْتُلُوا أَنْفُسَكُمْ إِنَّ اللَّهَ كَانَ بِكُمْ رَحِيمًا)

انترس صدري وانملى بالعبرات وضاقت بيه الحياطين
-شكولج . اميرة . هو اني بكل الاحوال بالنار رايحه رايحه عاد اخلصكم مني
التفتت عليه وطفت عن الطاوات اني اكلي طماطه وهي كباب .
جرتني اخذتني لغرفتها . رجلها جان بالصاله يباوع مباراة.

-شنو هذا الكلام الفارغ قابل انت اتعلمين الغيب بعدين الله الغفار الرحيم انت بس كون تبتي من داخلج

-والله ما اعيدها

-مو هذا قصدي قصدي تتضرعين الله وتعترفين بتوتبج ومن صدك انت ندمانه مو بس لأن انفضحتي وخايفة . لا التوبة لازم نابعة من الگلب مو من الخوف

سكتت معرف شكول

-ترة الله يسامح

'وانتم اسامحوني ؟

-احنه ؟
سكتت وجرت حسرة كأنها مقتنعة

-اي انتم . رضوان وعطلت زواجه من الي يحبها و علي انقل لمدرسة ابعد ما يكون وبابا حاير بالاجار و مصاريف بناء بيتنا الجديد و عاف عشيرته و ما يراوي وجه لأحد
وانت  مرت عمو ظلت مطينه عيشتج بسببي و طلعتي عنها و حاتم راتبة مو هلكد

-عزااا حيلج حيلج .. ولج ناقصج بس اتكولين اني الي  هيجت الحرب العالمية الثانية . 
ولج منو مدخل هاي الافكار ببالج

سكتت

-تمارة مو .؟
خو ماكو شي
البيت وبابا من زمان جان ناوي يبيعه حتى يشتري بمنطقه اكثر شعبيه واقل سعر حتى يكبر البيت للولد . واجت وصارت والحمدلله اوشك يخلصة
اني ترة عمتي من كاعها ما تنكحم  .

بعدين تعالي شنو قصة رضوان

ليش ما تدرين ؟

-ادي حاول يخطب و اهل البنية رافضين هذا الحجي من زمان  بس امنين جبتي مال يحبها هو رضوان من اشوكت ثابت ع وحده؟

-لا انت وين  ماتدرين سوالفه مال البنات بطلهن من زمان . سمعت تمارة مرة اتكول لبابا رضوان صاير مستقيم بعد سالفة بتك

سكتت مكملت ذكرت سالفتي من غير قصدي وهمين طلعت اني السبب

ضحكت اميرة
-اهنا تمارة هم محللة ومخليتج انت السبب هههههههههههه بس صراحه احسن شي هذا صار خلاه يعتبر وكما تدين تدان

- طلع يحب وحده وثابت عليها

-اشمدريج؟

- هو كال الي اجاني بالليلة الي جواني بيها وكلي . بس مصار بينا لقاء وحدنا اني وياج واكلج ..

-اهاااا

- حتى رضوان وفي وية اليحبها مثل حاتم ورادها .
دنكت و الانكسار واضح عليه

- حبي انت كنتي بعدج اصغيرة ما اتمزين نظرة الرغبة والاستهتار من نظرة الحب الشريف . مختار العار شرد حتى عشيرته دورت عليه من عمامج طالبوه بالزواج
طلع خارج العراق كالوا الج لو لا

هزيت راسي بيي
- اي الكلب هو متونس بكندا وانت كضيتيها حياة مميتة شفتي الطيش وين ودانه

-شفت .. بس تمارة كالت عمامي شرطوا بالكعده ما يرجع للعراق اذا رجع ينكتل على هتك عرض قاصر .

حاولت اجمع معلومات من اميرة اريد اعرف معلومات اكثر مختار رجع للعراق لو بعده  اشلون عايش . مرتاح و كلشي طبيعي واني حياتي انعدمت لو شنو؟

عرفت هو لساه بالخارج يخاف يرجع . و انفضت السالفه اصلا ابوية مقابل كايل اكتلها ولا ازوجها اله بس عمامي رادو الستر ومصار .
اهواي سولفت ويه اختي بالنهاية الليلة كالت الي كبرتي يا نوفة واتغيرتي . يا حسافة الي فات انحسب عليج .

ثاني يوم حاتم بالدوام

-نونو صجمة عندي الج مفاجعة

-شنو ؟
،

المفاجئة  العصر طلعتني للمتنزه حيل تونست  وحسيت نفسي بعدني عايشة على قيد الحياة .

الحت عليه اصعد مرة لخ لعبة تدري بيه اعشق الالعاب . حاتم جان يم يمرجح بأبنه

-لا هههه يمعوده فلست حاتم

-لا ولج مصاريفج من رضوان من اخوج مو من رجلي اصدكين كروتنا منج هههه لأن حاتم نهاية شهر ومفلس

رمشت اكثر من مرة وكلت الها عيدي عيدي
- رضوان كلي طلعيها لمدينة العاب اتحب هاي السوالف نوفة وانطاني خرجية الج .
واعذريني اخذت منها كراوي مفلسين اني واخوج حاتم هههه

سرت بداخلي فرحة رغبتني بالبكاء و طغت عليها الحسرة
-نوفة احنه بمكان عام لا تبجين

- لا اصيحين نوفه اكره واكره نفسي رضوان اشكد طيب وياي .

بجيت بالزايد
ضحكت بآلم واخذتني كعدنا ع مسطبة
مسحت دموعي من اجه حاتم
اميرة
-هاا حاتم هالفصعون وينه وين المراجيح توه عمره ١١ شهر

اخذت ابنها منه

حاتم
-ها صجمة ما شبعتي نرجع للبيت
ضحكت واني مناك باجية معرف تعبير وجهي اشلون صار شكلة

.
انتهى الحلم الي نومني بيه رضوان يومين ورجعت للسجن سجلت حضور

،
الاشيب

كاعدة يمي بكامل انقاتها الروحية . مرتدية بسمتها وموسدة بعيونها نظرة الأمل و الحنية تبثة لغيرها بروح شجاعة .

- ماما طمنونا شنو النتائج
جاوبت امي على سؤالها
-الحمدللة عمة على كل حال
بفزع ردت امي
-الحمدللة . بش شنو طلع بواحد بيكم عيب ؟

ما حبيت الحاح امي عليها واجيت انطق

سبقتني هي بشجاعة وقناعة

- عمة مع الاسف اني ما اكدر املي حضنج  احفاد .

ابسرعة اجنبت النظر لأمي و ظلت تشبك أديها بتوتر واضح .

لاول وهلة امي كانت اتباوع للبنى بصدمة ما صارلنا سنتين  و هيج اكتشفنا مايصير عدنا اطفال طول العمر

- يا .  لا ماما شنو هذا الكلام اليائس انتم اليا طبيبة رحتوا .
اني مو كلت الكم روحوا لدكتور قيس ال..   لا ترحون الياهو الكان
جاوبتها لبنى
- هو رحنا اله وبمركزة كملنا التحاليل

كأن امي انحصرت بزوية 

ضحكت و كالت
- هذا يمكن هم كبر وخرف لا تهتمين ماما انروح لغيره. مافاد للخارج

هم اجزمت لبنى بجواب حصر امي اكثر
-  عمة رحمي طفولي ما اصلح للانجاب

اخذت المطفئة و رحت عنهن بروح زهكانه من الحياة . مجروحه واتمثل وتبتسم اداري خيبتها خلف قناع رضى زائف وهي البارحه الليل كله مو يمي ع سجادتها تبجي اااخ لو بيدي امحي الدموع من اعيونج الناعسة ما يلوك الها الزعل .

اسمع اصواتهم . اضاهر الوالد طلع من غرفته .  طفيت الجكارة طلعت من المطبخ
  شفتها باست ايده وهو يمسح على راسها .

-الله يساعدك حجي
التفت عليه
-هلا هلا بالبطل

بعد السلام . اخذني  لديوان الرجال .
تعال يبطل ابوك . 
اشسويت وية النقيب فنر

واخذتني السوالف على دوامي و تناسيت مشكلتي الي جدت  وانضافت الى قائمة الهموم . و ذكرني بيها اتصال لبنى تكول الي الغدة جاهز . 
؛
رجعنا لبيتنا اني وياها اتحاشت الكلام وياي واني هم  . ثاني يوم  كعدتها الفجر

-لبنى .. لبنى
فتحت اعيونها وحطت ايدها عليهم تحميهم من قوة الضوة بعد الظلام الي كانو منغمسين بيه
- ها حتروح
-اي لبنى كومي سدي الباب وراية و صلي ونامي   .

-خوش
كامت ودعتها و رحت للدوام .

؛

صاحتني تمارة .استغربت اخوتي كاعدين بالهول وبابا ديتغدون شتريد مني هسة

رحت
شفت تمارة تشرب شاي وياهم
-هاي خل الكلام كدامها ينكال
اجاج عريس . الي كلت الج عليه قبل فترة طويلة . هسة رجع من جديد يريدج
مفهمت شنو قصده شنو رجع شنو كالت الي
اذكر مرة جابت الي طاري بس  ما انطتني  ملامح عن الموضوع

رضوان نبز
- خالة اني ولا مقتنع دسديها للسالفه

تمارة
- والله يا رضوان هي ياهي الزواجه لو اظل بلا زواج منو يتقدم الها وياخذها ما اكلي وبعد بكيفيكم

رضوان يباوع لأبوية الي يشرب الجاي وساكت

-بوية انت شنو رأيك شو ساكت

واخيرا نطق
-والله يا رضوان كلام تمارة واقعي على الاقل الناس تنسى امرها من تتزوج

-بوية الناس تنسى ورة كم سنة ويجوز هسة نست . بس اذا انطيناهه لواحد مثل هذا راح ترجع علينا و نخرب حياتها فوك خرابها خراب عاد خليها اهنا مرتاحه

تمارة
- والله الناس ما تنسى الفضايح

اعترض رضوان

جاوبة بابا
-كله منك اشكد ردت الم السالفه .انت تهورت وضربتها بالشارع و شهرت بيها .

نقاشهم صار حيل حاد عفتهم وشردت اخاف حيل من حدة الرجال بعد الي شفته من ضرب ذاك اليوم اذا سمعت صوت رجال اشوية عالي انز واخترع
سديت اذني عن كلامهم ...

واختارت بالنهاية تمارة  تقنعني
 
-ولج واذا اكبر منج ب ١٥ سنة  ومطلك.. احسن من الماكو
لو هو لو بعد ماكو

- ماكو احسن الي ؛ اميرة كالت الي لا اوافق انتكس اكثر . جان يشرب ومرته عايفته لهذا السبب

-ولج اميرة شعليها . نايمة بحضن زوجها وبحضنها ولد انت يالغبرة ناوية اضلين هيج بلا جاهل يملى حضنج يكلج ماما .
و الرجال صارلة اربع سنين تايب وتحلف مرت عمي يصلي ويصوم

سرحت بكلامها وهي مثل ابليس من ظل يغوي بأدم و ضروفي جانت حواء الي رغبتني بالموافقة
اريد اصير ام اريد يكون الي بيت اريد اتخلص من نظرة الناس اطلع على حياة ثانية . بمكان ثاني ما الي بيه ماضي

بشرت والدي بموافقتي .
وعرفت  هو ابن عم تمارة من طرفها   ساكن بديالى   و يدور مرة . اهل تمارة كلشي ما يعرفون عن سالفتي من سكنة وسط ديالى وهي مثل ما كلت الكم سابقا اتروح الهم بالشهر تقضي يومين وترجع .
ورغم الكره الي احسه تكرهنيا لكنها حرصت همه ما يعرفون اكيد عدها أسبابها واولها حتى لا ينزل زوجها من نظر اهلها .
واحس الموضوع بيه خداع على ظمانتها ابن عمها رغب بالزواج من الي وصفتها اله واجوي شافوني النسوان وطارن طيور بيه

و هو دخل بنهاية الكعده شافني وشفته .
او لمحته لأن مالي عين اباوع لرجال كدام تمارة وكدام نفسي بعد الي بدر مني
طولة وسط ؛جسمه مليان غير ملتحي
من راد يطلع باوعت اله . ماعنده اي زوائد وترست جسمه  حيل حلوة وابيضاني  حسيت براحه كبيرة لمعالم وجه الهادية .
بس دكات گلبي الفضيعه مستكثرة الفرح عليه . تنذرلي وخايفة لا الفرحه ماتم ممعقولة اني الي لازم انحرم من الحياة ارجع من جديد ابلشها مع شخص صح وبطريقة صح .
تمارة جانت طايرة اطيور واتعجل بيهم بحجة عاشور راح يداهمنا . 
ورة اسبوع كطعو مهر و تم عقد السيد .

تمارة كعدتني وحطت طشت جوة رجلية وياس ولبستني روب ابيض

واميرة حيل متأثرة وخايفه من هالخداع كلشي ديمشي مثل ما مخططه اله تمارة وثقتهم ببتهم ما خلت عدهم نسبة واحد بالمية بيه خلل .

كان شي رسمي وروتيني ما يحتاج وصف
ومشاعري عبارة عن خوف مثل الطالب الي مطلع برشم يغش ويخاف المراقب لا يشوفه  . قضيتها بس خايفة رغم اني على يقيني اني انظلمت وما مسوية شي بس الكلام الي مأولته الناس فضيع فضيع لدرجة شككني بنفسي .

وصلنا لمرحلة التجهيز . تجينا اميرة اتخلي ابنها يم سما ونطلع ثلاثتنا نشتري ونجهز . مهري اثنين مليون .

خلصنا تجهيز وعقد محكمة بحضور بابا وتمارة وكلشي مشفت من الرجل قضيتها مستحيه ارفع راسي . عزمناه على الغده من ثولي ما طلعت اله ابد عفته يم الزلم . من راح

اجتني تمارة انطتني تلفونها وبيه رقمه
ااااه يا دنيا اشكد الحلال مختلف تمارة بنفسها اجيب الي التلفون وتنطيه لا وبعد اتحثني ادلع وانعم صوتي !

-خاف بابا ما يقبل
نظرتها كانها اتكلي علينا يا شريفه
بس مضهرت سخريتها بالكلام وكالت
- لا هو رجلج بعد وهو طلب مني انطيج التليفون  هاج هذا تليفوني يدك عليج بالليل من يوصل افتحي خط عليه .

؛
اني انام من وكت . وتعب اليوم طلعه و طبخ غده للضيف او عريسي  .
دنام ودك تليفون .. نسيت امرة . اصلا نسيت اشلون افتح خط لا وبعد هذا هو هي كاتبة علية فيصل .  اخترعت
هذا هو شسوي يربي وشحجي وياه  .
خفت تنتهي المكالمة وشيخصلني من تمارة .

فتحت خط من غير ما اتكلم

-الوو مساء الخير .. ام علي ؟

-هأء لا اني نيوفر

سمعت صوت تنهيدة جبيرة واخذ نفسه .. تاخر بالرد
- واخيرا  سمعته للصوت اشكد لحيت من عقدنا شيخ احجي وياج ومرت ابوج رفضت .

سكتت
-الو انت وياي

-وياك .
رايد شي

- لا والله بس رايد اتعرف . ما يصير هيج نزوج  ؛ غير ناخذ على بعض .

هم  حل سكوت من جانبي

-اكلج انت ليش وافقتي عليه بيج شي ؟

سؤاله خله التليفون يوكع من ايدي ..

يتبع

اكرر نوفة حية ترزق   . كل مافي الامر هي لا تهوى القراءة ولو متوفيه ما اخليها هي تروي ابدا .
تصووويت لا تنسون من فضلكم . احبكم 🌷