رواية الرعناء والأشيب الفصل الرابع والثلاثون 34 - بقلم زهراء العراقيه

اني الي متحملتك انت واحد مو رجال وعقيم وساكتة ! محملني منية ليش ؟

شلت صحن على السنك وشمرته بنصنا و عطت بغير ادراك كنت واصلة حدي بالعصبية و الانهيار ذبيت حملي على الكرسي ،
اعصر بجبيني واباوع للأرضية بدوخه . انتبهت اله بعد بمكانه ما متحرك يم السنك و ضهر عليه ونفس وكفته و ايده لزمت حافة السنك ،
دموعي من الاساس تجري لكن زادت مع أحساسي بالذنب المسارع
- مو قصدي ، غطيت وجهي بأدية ،
والنيران الي بيه ما ناوية تخمد واتريحني
انفاسي تضائل واختنكت جريت كلنس مسحت خشمي ، لكدر اجر انفاسي ، شفته دار كرسي عليه وكعد  ، جنبة الايمن عليه وصافن على الفراغ ،
-مقصدي ، مجنت اقصد ترة .
فرك بعيونه وكأنه شي دخل بيهم  وبصوت يتألم بكتم العبرات
- لو مكان قصدج كان اصلا نسيتي شكلتي وما ذكرتي  وبردتي  !
كام من مكانه كمت وياه
دار وجه عليه  لكن يباوع للهوى ولا كانه يباوع ناحيتي  ، يمكن لطيفي الي وكف يمي او لصورتي الطيبة واكفه مودعتني لأن يمكن انتزعت بنظرة بعد هالكمتين  !،
- هاي هي يا بت الناس اني ما افيدج ، انت طالق
وصلت لقربة ما بينا مسافة فاصلة سديت حلكه لا يكولها مرة لخ رغم الصدمة الي احتوتني لكن اصرفت بفطرية كرهي لهلكلمة ، عيني صارت  بعينه وايدي على حلكه   ،ولمحت اللمعة الي بعينه  تحولت لماي يريد ينزل من مدامع عينه ، ابعد ايدي و التاف تاركني أتألم بطلبة وهو يروح
-انتظرج بالسيارة لمي المهم اوصلج لهلج انت طالق !
عادها للمرة الثانية وكانت الرصاصة الثانية الي تقصف گلبي ، و تلوع حركتي بداخلي ، كنت شتات شخص ، يمشي ما اعرف طريقي وين ، دخلت وما اعرف شصرف والي صار حقيقة لو كابوس واصحى منه ، اجاني هاشم
-ماما يكول بابا يلا خل تعجل امك !
وين راح انروح ؟
صوفي هم اجاني يسأل و توتو يصفك عباله عدنا طلعه نونسة بيها
سابقا  محضرة كم هدمه النا انروح بيها ايام التحاقه وكم هدمه بعدها بالغسالة من الضروريات  ما فكرت بيهم سديت الجنطة الي شكلها سبورت ، و طلعت عباتي و لفيت شال ، من غير ما البس شي ثاني ، وبالي وفكري متوقف ، بس عزت عليه نفسي اتوسل اظل ، طلعت والجهال  كدامي ، شفته بسيارته كاعده و نايم على الاستيرن من كعدوا الجهال يمه رفع راسه عنه واني كعدت بالخلف واناشغ ممستوعبه لوين وصلنا ، نزل و يمشي ببطئ قاتل فتح باب الحوش و رجع كعد طلعنا و رجع سدها و صعد وكل حركاته ببطئ و حتى وهو  يسوق بطيئ وهاي مو عادته ويمكن يريد يأنبني اكثر او يشفى بدموعي اعرفة حقود يعرف اشلون يلعب بالاعصاب ، و اني بواجيي رهبت الاطفال هاشم يسال وتوتو يبجي وياي خاف ،
حاولت  اكتمها وامسح بوجهي بطرف شالي ، سكتت للحظات سكتت توتو ، واباوع للطريق وبس دموعي تجري من غير صوت و حاسه احشائي داخلي انمردت ،
وكفت السيارة فجأة و هم حط وجه على الاستيرن و شفت زنده متعرق و رگبته تهتز
الهورنات بدت تدك ورانه ، اخذ ثواني قليلة على حالة ،
-رائد اشبيك
عاود السياقة بحذر وبطئ كأنه ماشين أثنينا للموت ونأخر المسافة على قدر الامكان ، وصل لراس الشارع مال بيت اهلي و وكف ، فتح الجامه و يباوع ناحيتها ياخذ انافسة من هواها ، واني اترجى يغير رأيه ما نزلت

- انزلي يلا

شلت رائد بقهر ونزلت و الجهال فتحوا الباب و نزلوا من يمة هاشم اجه اخذ مني الجنطة وركض كدامي ينعثل بيها ، بينما اني حارنه بمكاني رجلية ما تنطيني ابتعد خطوة وحده عنه ، هو الي رجع للخلف واندار و راح و لا اثرت بيه وكفتي المترجية نداء واحد منه حتى اكعد يمه ، حتى من اختفت  سيارته عن انظاري وكفت متأملة يعاود ياخذني وياه ،
على العموم شفت وكفتي محلوة كدام المحلات دخلت للفرع وبس توتو كايدته الثانين اكيد وصلوا هسة لبيت اهلي ، دخلت و كانت تمارة تغسل بمداسات البيت واتكول للاطفال انزعو احذيتكم  ، من شافتني راحت للحنفية سدتها و اتقدمت عليه واني جايه عليها ،
هي الي بادرت بالترحيب كوني دخلت دخلت المذنب للسجن  لا سلام ولا كلام
-اشلونج
مع قبلة على الخد الايمن
-اشلونج بعد
و قبلة على الخد الايسر
-اشلونج زينه
-اشلونهم والجهال مشتاقين ، وين رائد لعد.
كل هذا السلام ما بادلته غير بالسكوت الا أن جابت طاري رائد ، اعيوني مطرن ،
- رائد طلكني خالة ،
كانت لازمه ايدي هدتها ممستوعبه الخبر
-شنو
سألت رغم هي سمعت !
- كال الي انت طالق مرتين
- ياااا
جرجتني للداخل ،
-شنو ولج فهميني تحجين صدك
بواجيي و وشكلي مو مال مزح لكنها مدا تستوعب الامر ،كعدت على القنفة و اشر بأصابيعي حطيتهم كدامها
-كالها مرتين يعني شنو مطلقة هسة ؟
- ليش ليش
-اتعاركنا وكالها
اجتي سما على صوتي ، و ظلت تتسال وامها بشرتها بطلاقي من يمها وجهه صار اصفر ،
_________________________
بعد ردة فعل تمارة و حبسي  لنفسي بالغرفة   اجانه والدي مخابرته تمارة وراجع من الكاظم عليه السلام هو كل جمعة يروح يصلي اهناك ،
واشتعلت الامور ، وكعد يحقق وياي ليش طلقني زوجي
- اي بابا اسمعج بس انطقي
اباوع بالوجوه ، رضوان وبابا وعلي ، كاعدين بالهول كنا و اني ابصف بابا يريد يفهم مني السالفه هذا الحجي الساعه ١٢ الضهر ،
-اتعاركنها ،
علي
- وليش طلكج
بابا سكته و كالي اي بابا كملي
- طلقني هو
رضوان
- سبب العركه الي بينكم سالفة لينا مو
بابا سأله شنو سالفه لينا،
واني باوعت بستفسار اله
-شنو لينا كالت الك ما جاوبني ،ورد عليه بسؤال
-همة غلطانين بحقج ، واني على خلاف مع لينا فوك هذا يطلكج هيج من غير سبب مجاي اعقلها كولي النا الي صار بالتفصيل ،
-ما كلت شي اتعاركنا و طلكني
بابا
-شكلتي اله بنص العركة وطلكج ، ترة رمى اليمين عليج هاي شغله مو هينه ، ما تطلع من رجال واعي و فاهم بهاي السهولة
بجيت واحتارو وياي ،عفتهم ورجعت لغرفتي

؛
العصر راح رضوان لرائد يفهم منه ، وخفت من ردة فعل رضوان اذا عرف السبب منه ، رجع النا هم كلشي ما فاهم غير ان رائد كايل اله ما بينا عشرة بعد ، مو قسمتنا نكمل مع بعض ، غير متوالمين ، تعبنا بعض ! الاحسن الفراق ومن هذا الكلام كله بالنسبة لهلي غير مقنع ،  تداخلت كل الاطراف اهلي واهلة حتى يفهمون المشكلة و  اجتنا عمتي ام رائد لبيتنا ، لغرفتي بالتحديد دخلتها عليه تمارة ، كانت مرة كبيرة بالعمر ، تلبس حجاب محنك مع بلوزة و تنورة و جنطة سادة سوده ، حطت نظارتها  الشمسية على الميز  هي والجنطة وكالت الي اكعد استريحي
-وجهج شاحب يا ماما شصار احجيلي
شافتني سكتت وتلكأت .
-اجيب الج حقج  منه ، ثقي بيه
بصوت يرعد ينذرها ببكائي ،
- طلعت لينا تنطيه كل رسائلي
-عرفت عرفت يا امي و الله زعلت منها ،
وهو محقوق الج ، لكن ما اصدك ابني يغلط مرتين بنفس الوقت يعني فوك غلطه الاول ويه لينا يطلك ؟

سكتت
- تجاوزتي عليه ؟  كولي يا امي خل نحلها للمشكلة قبل لا تكبر اكثر ترة اني گلبي نار عليكم هو طلع مريض وما كايل النا . منطي سرة بس الج ، لعد اشكد معتبرج شي مهم بحياته اهم من امه ،
شصار كولي شنو من عركه اتخليه يطلك هيج
- بعد كبرت وطلكني
- محلولة  يا عزيزتي ، بعدها عدتج  يكدر يرجعج بيها ، بس كون نفهم االسبب الحقيقي ،
اهنا دخلت تمارة ، قدمت ضيافه الها ما اخذتها حطتها ع الميز وكالت بالاول افهم من نوفة

-اي يا ماما احجيلي بلكت نكدر نخيط الي نفتك ،
- عيرته بعقمة
كلتها بخجل واني مطاطية راسي
تنهدت امه وجرت الحسرات ، بينما تمارة بدت تلوم و ترزل بية كدامها ،

-ايا رعنه يا غبيه اكول الرجال ما تطلع منه العيبة كلبي جان حاس السبب منج
باوعت لأمه وكلت مبررة
-والله عمة مجان قصدي ، والله بنص عركتنا كلتها ماجنت اقصد

اخذت رشفة من العصير، وما علقت اترخصت وراحت !

ثاني يوم اجت  اميرة كالت علكت امه من درت مأيدته  لأن شافته تدهور صحته بسببج !؛ و طالعه روحها ع ابنها وترة لينا  و رضوان على خصام  ، اووف ليش كبرتيها يا نوفة جان زعلتيلج يومين وسكتي مو شعلتي كل الاطراف
جنت كاعده ع السرير واعيوني تحيطها هالات بنية و شفتي يابسة وبشرتي الحنطية مائلة للصفرة
- كله من صاحبتج
-صاحبتي حالها مثل حالج ، تأنب بنفسها ،
-خل تولي
- ترة لينا والله ساعدتج اهواي
-فتنت اهواي قصدج
- ترى بكلمات عاديه او نصيحها منها ما فادتج كد تعاون رائد وياها ، لو ما فاهمج مجان كدر يتحمل عصبيتج والفترة الي مريتي بيها

- مان عليه منية خلاني اعيره الا ارتاح ، تراه ما مفضل عليه ، هو رادني لأن جهالي صغار ويكدر يحتويهم  ، انعجب بشكلي همين  وهسة يكول ما نتوالم مع بعض من مل وزهك ، لا اكثر ولا أقل جنت تجربة اله
بجيت كالعاده ،
-اصلا هو رادها حجه والا اني دوم اجفص ويسامح!
- الا رجولته يا نوفة

***
رائد
وصلتها والدوخه لازمتني ما كدرت اكمل الطريق خابرت اخوية يجي ياخذني ، رحت وياه لبيته من غير ما ابوح بشي
لكن هو اكيد عارف بيه شي تسأل عن صحتي و من عرفني بوضع قابل اللانفجار تركني مع نفسي اقاسي كلمات زوجتي المصون وتنعاد بمخيلتي  ، صدق من گال إذا رفعت احد فوق قدره فتوقع أن يحط منك بقدر ما رفعت منه ، عرفت
هسة سبب عدم احترامها الي وأستصغارها الدائم ، دائما يعلو صوتها علية واقدر واكول تعبانه مرهقة نفسيا عادي اتحمل فترة وتعرف انت شنو وتقدرك ، لكن بكد ما احترمتها وقدرتها داست على باطن كرامتي بس ارجع واكول كله مني اني الملام حطيت نفسي وية شخص الغلط ،مختلفه عني وعن اخواتها و عن اهلها كلهم  ، دورت عن وحده بسيطة وغلطت بالاختيار دورت عن الألفة والعائلة البسيطة ونسيت نفسي ودست عليها اهواي حتى انزل الها وتالي هي الي صعدت على اكتافي و خنكتني ،
كمت من مكاني بغرفة كنت لأحد اولاد عاصم ، ابعدت الستارة وفتحت الشباك مستجدي نسمة هوى ماكو ، فتحت المروحة و كعدت من جديد افكر بكل الي صار بالايام الفاتت و اشوف نفسي بشنو خطأت و طلعت من ساسي لرأسي مليان أخطاء بهاي العلاقة لا تعد   ، ثكل همي وزاد كرهي لذاتي ، صعدت سكري و سودت حياتي حولتها لجحيم صراخ عصبية تهجم عدم تماسك ، جروحي لا تعد ولا تحصى اتجاها ، حتى غلطي وياها كان من دافع افهمها ، بس طلعت ما فاهمها ابد، وحدة أنانية بحتة مع اهلها و وياي  اتريد الكل يقدرها وهي ما مقدرة احد ، اذا هي اشوفني هيج بينها وبين نفسها  لعد ابد ما حابتني ولا متألفة وياي ، كلة تمثيل لخاطر مصلحتها ، واني الغبي احاول اغمدها بعطف وحب وصرت والد و ام الها مسامح لأبعد حد شافت معاملتي ضعف ،  ملامة في ملامة والنتيجه نمت بمكاني من غير ما احس ،
اجت برودة على وجهي واصوات شتت فكري ويامن اركز ، اجفوني ثكيلة فتحتها بصعوبة ، كانت صورة لينا و عاصم وزوجته تتضح كدامي ،
مسحت وجهي ببطئ عن الماي ،
لكيت نفسي نايم على سرير ما اعرف اشلون صعدت اله كنت كاعد على كرسي صغير قبل اشوية ،  كومني عاصم مع اصوات و تسألات اختي ومرته
- رائد انت زين ؟ ليش اغمى عليك ،

ما بيه حيل اتكلم كعدت بسيارته من غير ما أسال اخذني للمستشفى ومتصل بصديقه الطبيب اجانه ودخل للعيادة لخاطر حضورنا ، والا اكو طبيب اخر بديلة كان مداوم ، نمت على السدية وبدأ بالفحص ،ويسأل كم سؤال و عاصم فوك راسي ولينا برة تنتظر ، وخرت قياس الضغط عن ايدي
-  دكتور اني مريض سكري ، طبيبي كال  الانفعالات النفسية تأثر عليه ، عندي علاج
بس اخوتي من قلقهم جابوني لهنا

كنت اتكلم بهدوء وكأني اتكلم عن نزلة برد بسيطة ، عاصم تسأولاته بدت كدام الطبيب و خوفه زاد ،
الطبيب اصر يقيس الضغط كان صاعد ، وهذا الي زودته نوفة ضغطي كأني عايز مرض جديد يضاف لقائمة امراضي ، ضغط وسكر اقوى ثنائي لهد الجبال و اجمع وياهم عقمي
-ما تلام المرة !
عاصم
- شنو رائد ما تكلي اشبيك
تداركت نفسي من كثر احتساري كلامي الداخلي طلع للخارج ، كتب الي ابرة أونسلين ضربتها تنزله لأن حيل مرتفع ،
لينا طلع متصل بيها عاصم يسالها عني كونها اقرب شخص الي من بينهم اجت ،
طلبت منهم ما يجيبون سيرة لأمي واحنه راجعين لبيت عاصم
- امي لا تعرف عن مرضي ، وانت لينا ارجعي للبيت لا اشك بشي
كلتها واني مغمض

- واحنه بالمستشفى اعتقد صار عدها علم
باوعت الها متهجم الوجه
جاوبت بتلعثم
- اي بابا خابرني يسألني وين طلعت فجأ من غير علمه وكولت اله ،
غمضت اعيوني من جديد كاتم عصبيتي داخلي لا اطلعها ع الناس ، والاتصالات من الاهل بدات ، رحنا لبيت اهلي ، و والدتي ما كفت عن البكاء  ؛ ؛ بعد يومين الاكدرت اتحرر من قلق الاهل علية ، رحت لبيتي ، دخلت واول  ماطبيت شفت كدامي الالعاب المشمرة بكل بمكان بالصالة ، و الشاشة الي ما زالت مشتغلة على قناة كارتون اطفال ، اتمشيت بحذر لا ادوس على مكعبات رائد و اباوع بكل كتر و اشوفهم بيهم بيه يفترون قبل الوداع . شلت سيارة هاشم حطيتها على الطاولة وطفيت التلفزيون ، و دخلت لغرفتهم ، رحت لسرير رائد شلت ارنب جوزي دائما كان رفيق نومه شمرته مستهجن وطلعت لغرفتي شارد من أطلالهم ، العصبية اجاتحتني كاره تعودي ورغبتي الملحة برجعتهم هسة والشعور بالوحشة الاسود ، كمت للصالة لميت شكو غرض وشمرته بغرفتهم و جريت زحليكه رائد وهم حطيتها بغرفتهم صارت شبه مخزن العاب و قفلتها  ،  رحت للمطبخ و شفت الصحن المكسور مثل كرامتي ، لميته وذبيته !
عزلت البيت وكعدت اباوع بكل زاوية بالصالة ما احترگ بعد على احد اني مجرد رماد متطاير اتحرك بتجاه ركب الحياة  ، ما اتمسك بگلبي بعد الي جرى لأن صار فجوة فارغة وتمر اكيد منه الايام دون ما اعاني ، اعدي الايام بس واعيشها اشلون ما كان ،  حضرت ملابسي و رحت للدوام الي بالكوه عفوني عن اليومين الي راحن   لولا معارفي جان ابتليت بطلب اجازة رسمية و هي عبارة عن ارسالات للمستشفى العسكري و استقطاع راتب و دوخه أجرأت، 
**
نوفة
نفسيتي محطمة خاصة بعد ما ابوية راح لرائد بنفسه بعد ما فهم السبب الحقيقي للطلاق ، وطلب منه يصفح و يرجع ومن هذا كلام الحكماء مال العمر طويل و المشاكل ما تنتهي بس ما تنحل بالطلاق ومن هذا القبيل ، وجعني كلبي من رجع بابا مكسور الخاطر بسببي ردة رائد ،
من يومها حلفت ما ارد اله لو هو رجع الي ، وصارت منيتي يجي ندمان حتى ارجعه مثل ما رجع والدي لكنه ما اجى !
واجتنا لينا اشكد اكره الي يدوس ببطني ويجيني يتعذر ويكول غير قاصد ، حتى ما طلعت الها ولا ردت اعتذارها رادت تدخل لغرفتي صيحت على سما باني ما اريدها ،وحست على دمها وراحت  ،
انتهت العدة و صرت مطقلة رسميا وما اجه القاسي على كلمات ساعة عصبية اتخلى عني ،
كنت عايطه توني بهاشم موتني بطلباته الي ما تخلص، واعتقد راح لتمارة الحقنه الي دمرتني بتأنيبها ، ابوية مو مثلها على الاقل مرة مرتين ويمكن ثلاث انبني ورزلني و من شاف ماكو امل سكت و رضى بيه مطلقة يمه ، لكنها كل اشوية اسوي بالبيت كأبة من تذكر طلاقي واني مناك متكأبة واذب حركتي بالاطفال أستأثر منهم كرامتي الي راحت بضحكة الشمات عليه ، ام منال عيني عينك اجتنا عود تطمن و هي ادري بيها كلش زين شنو نيتها ، الشامت يبين من ضحتكه الي مرسومة بوجهة خلف قناع القلق المصنع ،

اكلب بالتليفون ، و اروح وارجع لصفحة رائد ، كلها مشاركات مع الاصدقاء ، صورة مالية الصفحة ، بكد حقدي عليه مشتاقه اله وهاي المصيبة المبتلية بيها ، سمعت ابوية يكول ، اجانة شرطي وينج نوفة .
كمت متسأله وقلقه شنو شرطي
شفت بابا واكف بالهول ومن شافني رفع ورقه رفرف بيها
- هاي ورقة طلاقج الغيابي من المحكمة اجت ،
رحت اله ، جريتها واباوع الها واقرة كلمة كلمة اعلان طلاقي الرسمي واتجمعت الحسرات بگلبي باوعت لوالدي وكلت بعيون مليانه دموع
-حتى احسن ،
جريت نفسي وكملت.
-اصلا اريح الي مجنت مرتاحه وياه
دموعي نزلت عكست الي اكولة
- اصلا عادي ولا ضايجة!
صرت ابكي بصوت  
- عادي عادي
ولا انسى نظرات والدي  المستعطفة 
-لا حول ولا قوة الا بالله ،
راح من كدامي وهو يفرك ادية .
جانت سما بالدوام محد الي يحتضني غير وسادتي ابجي ادعي الله ياخذلي حقي منه دمرني عساها ببخته !

يتبع

انتظروني في الخاتمه من قصة الرعناء والاشيب
ونعتذر على التأخير كون زوجي العسكري مجاز وكون ابنتي تأخذ وقت فراغي و ايضا قصتي مع رحايتي الي يعرفوها بنات كروبي هههههههههه