رواية الرعناء والأشيب الفصل الخامس والثلاثون 35 - بقلم زهراء العراقيه

تم تعديل البارت في النهاية وصف اكثر لرجوع رائد

مساء الوداع

‏" ليسَ كُلّ شيءٍ في القلبِ يُقال، لذلك خلقَ اللهُ التنهيدة، الدُموع، النَوم الطويل، الإبتسامة الباردة، ورَجفةُ اليدين."

-نزار القباني

إن الغياب أمر مخيف مرعب! لقد قلت دومًا أن نصف وجودي وسعادتي كامن في شخصك وإنه على الرغم من المسافة التي تفرق بيننا، فإن قلبينا متصلين برباط لا يُفصم عراه. إن قلبي يتمرد على القدر فلا أستطيع رغم المسرات التي تحيط بي والتي تساعدني على الترويح عن نفسي، أن أهزم وأبدد لونًا من الحزن الدفين الذي احسّ به قابعًا في اعماق قلبي منذ فراقنا.

تولستوي/ الحرب والسلم

،
سما
دخلت للبيت و عرفت من العزاء الي ناصبته نوفة بالغرفة الخبر ، رحت بدلت و غسلت وتغديت هم، تاركتها وحدها ومثل كل يوم امي تكعد بالهول ياهو الي يجي منا احنه اهل الدوامات تكعد تصب اله وهي ما متغدية تنتظر بابا تاكل وياه اشوكت ما رجع من دوامة و اطفال رائد الصغير نايم بغرفة امي وهذا دليل هي مغديته ومنيمته والثانين على التلفزيون ال جي القديم الي بالهول لأن الشاشة عطلعت و ما جبنه غيرها نصبنا القديم ،
مشاعري متذبذبة اخاف اكعد يمها و ما اتحمل الومها  و ازيد عليها العذاب خليها وحدها افضل ، غسلت ملابسي وشريت عباتي داعي الدنيا ما تعيل بيه وتمطر ولو السنة المطر بخيل ويانه مثل الي يملكون قلبونا و ما يهلون علينا  بالضبط ، هسة توسطنا شهر الهدعش الجو كسرته السنه مو باردة دافيه حتى ما شغلنا الصوبات ، دخلت اتذمر من الجو مغيم وكئيب لا هو ماطر ولا هو مشمس من الصبح لهسة ، مرجعي لغرفتي البائسة ، كعدت على ميزي واني بقمة سخطي من واقعي دراستي حيل كارهتها ما حبيت قسمي وتوني الا انتفضت وابالي احول السنة الجاية واترك هاي السنة تلفت اعصابي يعني دمار بس الي يدرس قسم لغة عربية يفهمني ، تلف اعصاب وصلت لحالة من اليأس المواد معقده و جافه كل يوم يزداد كرهي الها ، حسيت بميولي للأعلام  وتندمت بس بعديش اخوتي من اخذت رأيهم كلهم كالو وين جنتي لعد توج علي كال حرامات يروح الي درستيه ، واميرة مثل رأيه و رضوان رافض الاعلام اصلا ، بس بابا كال شتردين سوي، اما امي اه والف اه تغني موال ثاني ، ابن بت عمتها اتريدني اله و المرة محاجيه امي عليه بس يكمل بيته تطلبني منهم  وتكلي بطلي شلج بشلاع الكلب العريس بس يجهز يجيج كامل مكمل ،خاف اني عايزة تشتت افكار ، بس اني مرة لمحته بعرس اخته قبل ما انروح للقاعة  رجال من مواليد ٨٧ مشورب و حتى شفته لابس دشداشه لونها نفطي مكرش وهمين اني همي دراستي مو زواج ابد ولا مفكرة بيه بس امي ناكه عيشتي و وحدها تقرر ،
شفت نوفة مسنحه وايدها جوه خدها كأنها مصدكت دخلت للغرفة
- لج سما كلبي محروك
ما اتحمل والله كل لحظة جان عندي امل يجي بس يعقابني مثل عقاباته  القاسية ويرجعني مو ع كلمة ينهي كلشي
- مو كلنا الج الف مرة اني واميرة قبل لا يصدك الطلاق شرعا خابريه ليني قلبه عليج بالسؤال عنه وعن صحته ، كبرت راسج وكلتي هو لو يريدني يرجعني ما يريدني الله وياه 

- لج احبه مو بيدي اشكد جرحني بس روحي محروكه عليه احس نفسي بعزة ثاني اليوم

- تمر فترة وتنسين
كلتها واني افتح كنتوري ادور على بجامه البس شو بردت
- لج شنو فترة وانسى ،  اني تعبت من العيشة اهنا ، اريد بيتي غراضي اريد اطفالي يرجعون ببيتهم لج توتو اكل كلبي بس ينج ويبجي حتى بزعت منه وشلته وشمرته بالهول الضهر  لو ما امج اسكته جان مات بجي وفرفحه

كلبي انعصر قهر على رائد تركتها تحجي ورحت اله لغرفة  امي نايم الولد و شفايفه مبرطمة
-يروحي الدنفوشي مو بخير ، يريد البابا
بسته
-اووف من امك دمرتكم عودتكم على جو ثاني و انتزعته منكم وهذا شدعواه هيج قسى وطلك يا اخي دزها زعلانه النا عوفها فترة حتى لو طويلة بس لا تطلك
اثنينكم دمرتوا هالاطفال توتو عمره حاليا سنتين و كم شهر واخذه رائد من عمرة ٨اشهر نطق على ايده و كمل اسنانه على ايده تعود عليه و عادتنا الولد يميل لبني جنسة بالتربية وهمين يحب ع مصلحته يكون حبه قوي للشخص الي يرعاه ويلعب وياه ، اجه يفز من بوساتي ، تركته ورحت لنوفه
- نوفه لازم نشوف حل بخصوص الاطفال
خاصه توتو نتفق وياه يشوفه مرة مرتين من ينزل مجاز م ..
بعدني ما مكملة سألتني بحدانية بصوتها الباكي
-منو قصدج ، رائد يشوف ابني ؟
- ابنكم نوفه الولد متعلق بيه
- ابني اني وبس لو معتبرهم اطفاله جان ما طلك جان لخاطرهم رجعني لو هو ابوهم ومن صلبه بس جيفن مو اولاده ذبني بكل بساطه على كلمه زلت لسان و اني الحقي راح وماخذته منه يجسس عليه بس كله مني  دارت كلشي عليه

فاجئتني بتقلبها قبل اشوية تبجي عليه وهسة ثارت منه وطلعت الاخطاء كلها منه اشلون ندمانه واشلون شايلة عليه ما اعرف دوختني !

***
رائد

الحياة استمرت لا قلب توقف ولا عين عمت ولا رجل انشلت ، عذاب الشوك مكدور عليه الا العذاب الي كنت بيه ، واشوف صحتي بدت بالتدهور   ، مدام بينت ضعيف امامها حل الوداع وماكو داعي للصبر ولا اانتظارها من تنضج اكثر بالعكس المرة كل ما تنضج اكثر كل ما يزيد انتقاصها لرجلها اذا من البداية مستضعفته ولو اعرف السكر يصير مرض مزمن ولا كنت افكر اتزوج من البداية هسة افتضح الامر للجميع و صرت  اكثر شخص يستحق شفقه بعيونهم   ، ابتعدت عن الناس اجمع التهيت بدوامي و كان امر ايضا مرهق الي لأن اتعامل مع الحرام واساير الامر النهاي الاعلى مني واسكت على الي يصير جوة الميز والجندي الفقير هو الواكع بيها اقل حق يريد يقدم عليه لازم يرشي من اصغر شخص لأكبره مثلا اذا ستحق ترقية مثلا الى نائب عريف لازم بالوثيقة مالته رشوة ، اقلها الارزاق مالتهم كلها سرقه بسرقة والضابط عدنا اغنى من الطبيب و سلطته تساوى ويه حكام البلاد الي فارضها على الجنود وتتفيذ كل رغباته ، و اني مثل كل البشر عندي غريزة البحث عن منصب ، وترقية اعتقد استحقها ، ما بقى شي على ترقيتي الى رائد ،
رغم انعزالي عن الاقارب وكعدات الاخوة
لكن ما ساكن ببيتي تركته شارد من ذكرياتي و وحدتي و وحشة البيت من هجرته نوفة واطفالها ، رجعت لمسقط راسي بيت اهلي بغرفة العزابي ، كان شخص ثاني وتحول الى اخر من غير ما يدري ، امي و والدي يحتاجوني واني هم احتجاهم ، نوفة خلتني اكره الوحده اكره سكونها بعد ما كنت عاشقها اشتاق لصخبها هي واطفالها لصراخها عليهم لمشاركتها بيهم ، كان حلم و انتهى
محد يفهمني ابد والدتي وياي برأي الزواج مشروع بين اثنين شركاء اذا الرسوم اندفعت من شخص واحد ينتهي،
عاصم ماخذ دور المتفرج ما ابدى راي ، لكن لينا تتهمني بالتسرع و محملة نفسها طرف بالمشكله ولهسة تتأمل ارجعها لنوفه ، ما تدري مالها دخل هي الموضوع كله مو بيدها ولا بيد نوفه زواج غير متكأف كان غلطي ، بعد تجربتي مع لبنى وريما حاولت اخذ وحده بت ناس بسطاء اتكون اكثر تعايش معي بحياة بسيطه ما بيها متطلبات ترهقني و تخالفني ، صح لكيتها اكثر عناء من غيرها فارضه اختلافها واني هم  كنت غير متساعد وياها لكن أتألفت وياها، وهذا اساسا حببني بيها بس ااه لو كانت راضية بيه مثل ما اني حبيت كل اختلافها حتى عصبيتها مستعد اتحملها ، بس لا تجي زايد عليه ، هذا فوق مقدرة اي رجل
نوفه شخصية ازدواجية ما يفيدها واحد مثلي اتريد الي يسكتها بمثل اسلوبها ، يمكن هي كانت متالفه مع زوجها فيصل اكثر مني تحسه عنده عليها سلطه اكثر ، تعودت من الصغر على تعامل اخوها وعادي يسامحوها على اي تصرف منها كونها معروفه عدهم بطباعها ماتدري الحياة ما تمشي هيج ، والطيبة غير كافية !وبالتالي زواجنا ما دام غير اكثر من سنة ونص، مرت الايام و نضجت براعم  الاشتياق  داخلي وبدت  تأرقني ، اتصلت برضوان
بعد السلام ، الثكيل من جهته ،
- ميخالف اطلب منك طلب !
***
سما
عن لسان رضوان كال الي اتصل بيه رائد و كال عندي يمك طلب و التمست منه الترجي على قبولي طلبه ،فرحت بداخلي وكلت الحمدلله من تندم على تسرعة واجه خجلان يصلح الامور ، لنت وياه بالكلام جنت حيل مثكل
- كولي خويي امرني ،
- الله يخليك حبيبي الغالي ، بس اريد اشوف رائد !
-هاا !؟ اشوف رائد
كلتها متسأل بحيرة
-اي والله انت تعرف هذا الطفل احسه ابني واكثر ، لخاطر العشرة والايام الي ظل بيها الطفل يمي خلوني اشوفه بين فترة وفترة
طلبة ازعجني يعني ما  مفكر بالرجعة ، و هم طلبه لشوفه رائد مو من حقة ولو كال الرجال طلبتك ،المهم شريد اكول غير الله كريم اشوف الاهل واردلك خبر وقصدت بالاهل نيوفر ،صارت غريبة عليه ورجعت اشفر اسمها كدامه !

***

نيوفر
مر ع طلاقي فترة بس بعدني متشائمة كارهه الدنيا كلها ، اريد اطلع من حالة التعاسة ما اكدر ، كنت اقري بهاشم و سما
كاعده تتفرج فلم بالفون
كملته و كولت اله يروح يلعب
-ما حفظته
-شسويلك مطي ورابطيه
كيف وراح يلعب ، جاورت سما بسريرها
اكلج سمسم شخبار ابو كرش

-اسكتي لا ذكريني ، امي هايجه عليه لازم اشوفه من يجون اوف ياربي اشلون ورطة
-هسة اشبيج دشوفيه خاسرة خسارة بعدين همه جايين تسيارة ماكو ورطه

-نفسيتي صفر بالكوة اداوم

- اقري وكملي واسكتي لا تركين السنه ولا تحولين ،

- اكلج صدك لينا خابرت تجينا اليوم
- لا هلا بيها
-انطيها فرصه عفيه تحجي وياي ما يصير هيج مهما يكون مرت اخونه وحامل منه
بعدين احنه لخاطرج  كلنا. اقصد هي لخا

سكتتها بنظراتي المتفحصة و المتهجمة

-شنو شنو انتم ؟
-اقصد همه
- جنتو تدرون ؟

- ممم
فرفرت بعيونها سما ما تعرف تجذب
لهذا جان باين عليها من كالت لا
- وراس بابا مو جنتو تدرون
- نوفه من حبنا الج والله ،
- اي شنو كملي
-اني اعرف راح اتهيجين ، بس اني واميرة ندري ، لينا كالت لأميرة قبل لا توافق من طلب منها رائد و بأذنها تصرفت ، حتى الرجال يعرف
-انجبي
شلت تليفوني وهي اخذت فونها وشردت ،
خابرت اميرة وكل ذرة وكل انش بيه يرجف حسيتهم متفقين عليه ،
- انت فد وحده ولا يكلك اختي سرج كله يم هاي لينا الحقيره ، و تتفقين من ورايه اكرهج
سديت الخط وحتى ما سمعتها شكالت ،
طلعت لبرة ادور ع سما ذابت عن النظر اللوتية بس مصيري اشوفها ، كالعاده اتعاركت مع امها ودخلت لغرفتي ،
كملو عليه من اجه رضوان ويكول راح يجي اليوم رائد
كلبي اهتز هز بالخبر 
-ليش
سألت متصنعه العصبية واني كلشي بيه متوتر و متحمس لكل كلمة يكولها رضوان
جان كاعد بالهول و اني بالغرفه صالحي ،
- يريد يشوف الجهال
سألت بتكشيرة واضحه
-شنو
يا جهاله
-نوفه الرجال من حقة يشوفهم ، كلت اله يجي اليوم بالليل يشوف الاطفال
- ماعنده يمي شي
-عيب نوفه تذكري بيوم جان ونعم الاب الهم
-والله ولا يشوف ضفرهم بعد اليوم ولو مو ابوهم ، لو هو اب حقيقي ما يلوعنا
حجى عليه رضوان و بالجبر اليوم راح يجي رائد لبيتنا ،علي من عرف ويه الموعد طلع ما يريد يشوفه ضايج منه ،
***
رائد
وصلت لبيتهم متردد لو رضوان موافق اشوفهم خارج البيت افضل
رنيت الجرس و تذكرت اخر مرة من دكيت بابهم طلعت الي هي بضحكتها شايله ابنها ورجليه مدندنه على خصرها ، بسمتها وفرحة اعيونها كانها بصباحية عيد ، الاشياء الحلوة ما نحس بيها الا بعد الخسارة ، استقبلوني الناس و والدها كان في غاية الطيب   ، خسارة خسرته ،

راح رضوان وبعد ما رجع ، وهسة يجي وهسة يجي ، جنت مشتري كم غرض الهم اقصد الاطفال ، لكن بالحقيقة حنيني لأكثر واحد بيهم رائد منتظرة و ومنتظر بسمته الطفولية ،

اشوية وسمعت صوتها ، هذا هو صوتها المنتفض على الدوام ،
- ما اقبل هي كوة ما يشوف احد منهم
صياح كان قوي والدها اتحرج وابسرعه كام يشوف
وكفت اتحضرت للطلعه ،

***
نيوفر
، اني بقمة غضبي من خواتي اشلون يرضن انفضح كدام رائد وما يكولن الي اني اسرهن كلشي هنه سرهن طلع وحد و يتفقن من وراية ، واجاني رضوان الا حضرة جناب رائد يشوفهم ويريد ياخذهم بالغصب منعته من هم راد ياخذهم غصبا عني حسيت نفسي قليلة حيلة بما يخصني صحت و عيطت لأول مرة بوجه رضوان كاسرة كل القواعد ، دفعني من جنت ملزمه بتوتو والطفل خاف ، تركه وعافني من عليت صوتي،
واشوية ورجع الي اضاهر رائد طلع ابسرعه ،

اجاني للغرفة رضوان صاير شرر
وبابا خلفه ،
هجم عليه بالصياح و يشمر بأديه
-صغرتيني ليش هيج قليلة عقل الرجال اجه يشوفهم لو عندج اشوية عقل جان خليتيه وما سمعتي صوتج العايق ، جان ما طول ورجعج
بابا طلعه عني جان كلش معصب اتوقتعه يريد يضرب بس بابا ما خلاه ،
اشوية بردت ، فكرت بكلام رضوان ، اخاف صدك جان اكو امل ارجع لبيتي وخسرته ¿ اوواف اني شجاي اسوي ياربي ، شريد والله تعبت تعبت ،

كعدت بوسط الغرفة ابجي واتحسر
ليش من دون الناس كل تصرفاتي غلط كلها تنتقدني تعبت ياربي تعبت اخذ عمري وخلصهم وخلصني ااااه
وانعى كأني اريد اخلص دموعي ما اهتميت لا لحريك اعيون ولا لسما الي اسكت بيه وتحتضني ، حتى كامت تبجي وياي  ،

اجتنا ورة يوم لينا وهمين ما طلعت الها ،
ومرت الايام و

بعد كم يوم مرن واعصابي تلفانه ومثل قنبلة مؤقته الكل يجنبني لا يطفر واير مني و انهار عليهم ،   طلعت وية هاشم اشترة ورجع اخاف عليه من الشارع لو تمارة اكلت كلبي اشعندي طالعه بلا جواريب لمحتني و ظلت تدردم
-يابة هي منا لهنا هيج عدهم تركيز يركزون على رجلية الصفر
- كلش مستخفه ترة ، اشعندج طالعه جان خليتي الولد يشتري
-اخاف عليه شنو يطلع وحده وهسة شصار
-يابة انت مطلكه اتعرفين شنو مطلكه الوادم واكفتلج على الزلة
راحت عن وجهي عبالي اكتفت شو  هاي جابت قرنابيط و صينية  وتخته وكعدت تثرم بيه واني جنت افتح نستلة لتوتو ، وكاعده ع القنفه و شامرة عباتي على الثانية ؛ ورجعت تحجي وسمعني  كلام حسستني اني ناقصة لو تعريت من  احترامي من تطلقت ،

-هاي لمياء شوفيها اشلون ابنية معدلة عرفت نفسها افضل الها تزوج وتخلص من خدمه نسوان الاخوة رضت بالارمل عقد عليها كم يوم وياخذها من بيتها ،
-وشنو يعني مهناية بس عادي يعني اني شعلية كلمن ونصيبة اني نصيبي اظل اربي جهالي ما اريد رجال ولا غيره
-المطلقة تعتبر ناقصة
-لا طبعا كلامج ترة بدا يزعجني 
-  اي ناقصة اتعرفين  يعني شنو ناقصة !
الناس تحجي عليج تدرين لو لا الكرابة يكلبون بالماضي القديم و سوج وحده وكحه صلفه  من تطلكتي الزمي البيت واستري على نفسج
- شنو هذا الكلام عيب ترة ، اني مو ناقصة واذا مطلقة مو جنت ارملة شو محد جان يمسني بكلمة !

هزأت من كلام
ي بعوجاج حلكها وهي تثرم القرنابيط تتبعت تأنيبها الي
- المطلقة غير وكلها تلسن عليج على ابو نوفة وكحه نوفه عايقة نوفه مابيها حظ رعنه و تطلكت  رجلها ما تحملها سنه و ٧ اشهر رجعها عليهم
تتدفق الاضطهاد داخلي من ذكرت اسمه الي صار يمثل الي القسوة والاشتياق انفجرت بوجهه
-يمعوده زهكتيني واذا لمياء انخطبت مدري عرست  بالعافية عليها  . بالرايحه والجاية اسمع تعيارات

- لمياء احسن منج اخذت واحد مبزر و مستعده تداري  جهاله وانت الخوثة رجعتي مطلقه بعد ما زوجناج رجال معدل اتكفل بأيتامج ، شنو ذنبه رائد الصغير يبجي على ابوه

صرخت بيها تكف عني اعصابي راحت وهي ما تفهمني
-عوفيني بحالي معليج بيه ، ما اشوفين نفسيتي لو بنتج اني همين هيج اسوين بيه
ذبت السجينه بغضب وكالت
-ااااخ لو بتي تمنيتج بتي والله لجرج من شعرج وارجعج لرجلج

-أهأ هههاي
اكمت امثل الضحكه واقلد على كلامها
وصحت عليها بزمخ
-والله انت ما اعرف شخلصني منج
تدخلت سما الي ما اعرف اشوكت طلعت من غرفتها
- لا اصيحين على امي
- اشبيج ولج انت الثانية
-لا اتعلين صوتج على امي
-وانت شنو ولج
- احترمي الاكبر منج وكافي ماخذتنا بصوتج
-لا والله منو يعلمني الادب
تصايحنا اثنينا
تدخلت تمارة
- لا تصايحن

-ما اشوفيها يوم اشلون تتجاوز عليج ،
-انجبي انت معليج ، امج ٢٤ ساعه تعير بيه ما تحجين
-حقها بكل كلمه، مانه علينا وتاركه اطفالج ما اتعرفين وين ارضهم خلف الله عليها الي اصيحين عليها مداريتهم الج ،

- كلكم ضدي من تطلكت لليوم ولا واحد بيكم وكفلي كلها تحجي عليه ، بس بابا مقدر وضعي

كمت ابجي بقهر وامسح بدموعي واحجي

- غير كله منج ، خسرتي زوجج الي يحبج

-انجبي كافي ، عبنة مشبعج جان  هدايا لو عزايم ببيتي ميته عليه واني هم جنت مشبعتج مشتريات وافلوس هسة انكطعت عليج مووو

كنت اهذر اي شي حتى اردعها عني لأن ملامتها كانت تذبحني بالوريد كنت لا انام ليلي ولا نهاري و بس افكر بملامتها هي واميرة الي مزودات عليه همي و ارقي ،
خزرتني كأنها  ممتوقعه مني هيج اكول و انصدمت ،اعيونها دمعت وكالت بكبرياء
- شكرا الج اختي !
اباوع الها جنت بعصبية و نيراني بدت تهدأ و حدت نظراتي انطفت ، راحت من كدامي للغرفه ، وما طلعت منها وتمارة سكتت من شافتني كلش معصبة ،
لليل اني و سما نتهرب من بعض اذا ادخل للغرفة هي اتروح واذا هي تدخل اني اتركها ،
ضميري بدأ يأدي واجبه اذا كنت بواحد صرت بأثنين اكيد سما هسة شايلة عليه اكيد هسة كارهتني والله مو قصدي اذيها بكلامي ، الساعه ١٠ وجهالي ناموا ع القنفات واني مكدر اروح للغرفة شفتها طلعت يمكن راحت للتواليت وديتهم ابسرعه ركض واحد واحد ع اسرتهم وانطرحت ، متغطية كلي ، وابكي بأسى ، حسيت بيها تدخل حطت شي ع الميز يمكن ماي يومه فديتها بروحي اخيتي تدري بهاشم دوم يكعد بالليل يشرب ماي فكل يوم تحضر  دوركه ام غلك وكلاص اله واليوم رغم زعلها مني ما نست ،  سمعت صوت ورق كتاب يتقلب يمكن شعلت الضوة ، شلت اشويه الغطة عن وجهي وضهري عليها، ماكو ضوة قوي وخرت كل الغطى و باوعت الها فاتحه لايت التلفون و كبالها الكتاب ،
كمت الها وذبيت نفسي عليه
-لا تنامين زعلانه حبابة
وخرت الكتاب وذبت التلفون و بادلتني طلعت تبجي وخدها نكعان
-اني هم حقيره غلطت عليج والله اريد اجيج وخايفه لا ما ترضين
-كلبه ساعه بالهول مشتوله
احجي وابجي وهي هم
- لج انتظرج اني اهنا تجين تحجين وياي عادي بس انت كبرتي راسج عبالي مغثوثه مني وما تجين
-كلبه انتظرج بس تباوعين الي حتى اجيج ركض اعتذر
مسحت دموعها و وخرت عني
-لا لا والله ما اريد اعتذار ، بس جنت خايفه لا تظلين زعلانه عليه

وانتهى خلافنا ما طول ليلة اساسا القلوب كانت صافية بس خايفات من بعض ،
تحاجينا بيومها اهواي حجي وهي شكت الي صعوبة دراستها ولانها كارهتها مدا تحبها ، و اني هم شكيت الها حالي
-نوفة حبي الي راح راح مراح الومج من اليوم عليه
بس نصيحة اطفالج ثم اطفالج ترة ظالين لا ام ولا اب خلف الله على بابا وماما اشوية معوضيهم ، بس هاشم مستواه بالمدرسة نازل ترى يراد متابعه ، توتو يمر بمرحله صعبه وبس يلج ع ابوه لان تأخر عليه ، صوفي همين ترة متعلق برائد بس يذكر بيه حاولي تعوضيهم والتفتي الهم

-تعبانه
-التعب ما يخلص ، عيشي نهارج ويه اطفالج
والليل ملكج انت و تعبج ،

؛؛؛؛
طبعا اقارب تمارة اجلو جيتهم ، همه اهنا ساكنين بغداد ، لكن صار عدهم ضرف ،
مرت الايام و اني التفت لأطفالي لا هم اخسرهم قبل لا احس بقيمتهم مثل الي راح !
هاشم ادرس بيه و اصيح و مرات اكون اغني الدرس بعصبيه ويمكن اصفك بحركه من ما يفهم حتى مرة هلهلت من عرف بالرياضيات ، صوفي رجعته لروضته بعد غيابه اشهر عادي هي اهلية ،
توتو شو صار زين ما يلج ع رائد والحمدلله ، ما انكر كل الي اقوم بيه من غير واهس وضايجه من بيت اهلي
اريد بيتي واستقراري بس اصبر نفسي لخاطر اطفالي ، عشت الهم ومن اجلهم خليتهم هدفي ،

***
سما
طبعا  امي هدت على نوفه  ، بوصية تهديد من بابا عليها خاف على نوفة لا يصيبها شي نوع من الانهيارات من جديد ، و حلفها و وصاني اذا رجعت تعاملها بتأنيب  اكول اله ، بابا ماعاد يريد غير اتظل سالمه لأطفالها ، رجع لدلاله الها والعناية الخاصة ، جنت اصغيره اغار من يفضلها علينا بكلشي لكن هسة حسيت اصلا هي اكثر وحده تستحق العناية  لكن يا بابا مو بالتدليل اكو امور اهم بهواي ياريت لو ملتفت الها وموصي امي بيها ، تحتاج توجيه قوية ، واني شفتها معادية الكل  رضوان ما تحجي وياه بس سلام تجنبة لان مرته لينا ! اميرة لا تخابرها ولا ترد ع اتصالاتها يا دوب ترد السلام وكلام عابر اذا التقت وياها ، بقيت اني وبس شريكتها بالغرفة شفتها تتأثر بكلامي النصوح الي من غير امر او تأنيب وحتى من بالحجي تعاندني بس ورة فترة اشوفها مقتنعه بيه ،
المهم امي ما كاعده راحه تودي توتو بيد علي لبيت رضوان و اتخلي لينا تكول لرائد وصار رائد هو يخليه اخته  من ينزل مجاز  تخابر علي بحجه يطلعهم  ، بس هاشم ما ياخذه لانه مفضوح واخاف لا ذيج المرة تدري وتعلكها علينا واني متردده أريد  اكول الها اشوفها صارت اكثر رزانه او هي اتريد تثبت شخصيتها
واتحاول تتغير
.

-يوم اليوم  همين راح تودين الجهال والله خايفه تكشفنا
- اسكتي انت معليج
جانت تنشف بالجدورة  مال غده توها نظفتهم
- زين ماما انت ليش مصرة عجيب تردين اتخبليها
- خوثه انت واختج اريد ارجعها لرجلها هالعوبة ، اودي الجهال لا ينساهم ويتعود على فراكهم خلي من خلالهم يرجعها ،
-اها
وعرفت مخطط امي واعتقد لينا حاسة بيه بس مغلسة  ،
،،

اجونا اقارب امي و كعدت وحتى نوفه طلعت الهم الفضوليه اتريد اشوف ابو كرش . اندور عليه ماكو لانه شاب اعتيادي الشكل بس مملوح اني ممركزه بمعالمه زين وهمين جان سمين ، يشتغل بالطيران وامورة توب فعرفت امي ما توكع الا وهي واكفه ،والله كلت اني الي مراح اعجبه  هذا طاك صيده دسمة للبنات ، ورة ما راحوا دزو خبر هاي هي الولد مقتنع بتكم شنو رأيها ، اخذت صفنه وكلت الهم افكر انطوني وقت  ،
بعد كم يوم

بابا سوة ثواب لجدو و عزم رضوان ولينا وعزم اميرة وزوجها و اعيالها يعني بيت عمي ابو منال ،

نوفه كامت  واخذت  جهالها وافلتي لبيت خالتج لانها تكره ام منال  و لينا ،
وعافت امي وحدها بالمطبخ و اميرة من اجت وكفت وياها اني فاشلة كلش هي الزلاطه وامرد الطماطه بيها ، المهم
الضحى الكل التم
ام منال بس اتريد تعرف شغلتي صارت لو لا امي تضايقت عرفت اميرة كايله وهي اتريد تكتم ع الامر ما اتريد اتكول منا من يصير
- اي اي انشالله يصير ،
وظلت ام منال تستدرج امي ،
-وعده اخوه لو لا وخوات خو ما تكعد بتج يم اعيال وعائلة جبيرة
-هسه هي ما صايرة اي عنده اخوه واحد منهم رايدن نوفه اله
اني من يمي فتحت حلكي عشر امتار مو بس لينا واميرة  واكدت امي حاجين  عليها وام منال تخبلت
كالت شنو من حظ عدها
امي بتباهي كالت اني ازوج ابنياتي ما اخليهن يمي دهر اشعدهن كاعدات للخدمه ، ضربت ذيج بسمار ، ولينا بالمطبخ من اتفردنا نحضر اني وياها واميرة ظلت تتسال والمصيبه قبل اشوية امي جرت اميرة ع صفحه وعرفت موصيتها ،
اي يردوها لواحد ارمل ونوفه وافقت الحمدلله ،
- اميرة انت جاده  ، شنو هيج بسرعه
جاوبتها باي بعد قسمتها وهي اشعدها كاعده مدام اجتها قسمه زينه ،

طبعا لا عنده اخ ارمل ولا شي فلم تكابر من امي و همين اكيد عدها غاية من سالنها عنها ، كالت من التقيت بام رائد قبل فترة بشقه رضوان اضوج ووجه ثكيل ، عبالها ميتين ع ابنها خل يوصلهم خبر احنه بتنا ما ظاله منتظرة اشارة من ابنهم وعود بعدين عادي انكول مصارت قسمة ! سوالف نسوان وتكيد ،
***
رائد
على وجه السنة الجديدة  الا راح يعلن ترفيعي بس ما حسيت بسعاده مع خبر من لينا حطم الاول  والتالي و كل ظني اني ناسيها و ومرحلة واتعديتها طلع كله وهم ،   نشفان ريقي عرق جبيني تضخم دكات كلبي  اصفرار وجهي وشحوبة من نزل عليه الخبر ما يعلن غير ان مصيبة حلت عليه ، لليل  كلة  اني ضغطي ما نازل  ووجع راسي  ارقني ، احس نفسي صرت مهمش فعليا هسة ، واحد ثاني يا نوفه ، بهاي السرعه  اتبدليني ، اني احتاج عمر جديد الا اكدر اتعداج ، شنو من لا أبالية عندج ، مشاعرج وين ادري انت مو مرة !؟
واحد ثاني ، ما اصدك ، زين واطفالها  لعبة كل يوم يم واحد شكل  ، ما  تخاف عليهم هاي الرعنه اكيد ردة فعلها حتى تنساني ما تتاني كله فوكه فوكه وتندم ،
تندم واشمدريك تندم ، اتكول لينا ارمل وخوش انسان يمكن هم يحتيوها  واني بالموت يكرفني
دكااافي ضربت راسي بقوة زحام افكار   ووجع وغيرة على عرضك ، اي عرضي احسه راح ينتهك بزواجها من غيري
مرن يومين مثل العلقم و استلمت الترقية واني مثل المتخوم من كثر الهموم ولا حسيت بطعم الفرحه بيها اشكد انتظرتها ،
طلعت اشتريت   صبغ شعر بزعت من الاصدقاء وتسأولاتهم وابتعادي عنهم كثر اهتمامهم ، كلت  احاول اضهر الهم بالعزيمه الي على شرف تريقتي بشكل مبهج ،

وكفت كدام المراية و بيدي كاسة الصبغ ، بين التردد والرغبة بصبغه احتاريت ، بالتالي بديت ب الي عزمت عليه الشيب مكبرني اكثر من عمري و هم ياهو الي يشوفني يسأل هاي شصاير بيك ، صبغت شعري كله الاسود والشيب ، واجيت على لحيتي الي متلونه كم شعره بيها باللون الابيض ، كلت اول وتالي اني راح اخففها لخاطر الدوام خل اتركها افضل ،
انتيهت من غسل شعري ، وكفت كدام السرير
و بداخلي احتسار لبست البدلة العسكرية لشوف الرتبة الجديدة بيها ، كان رمزها النسر الجمهوري ،
اعتلت شفتي بسمة ألم و حزن تذكرت نوفة من كانت تضحك من تكول اذا ترقيت اتصير الرائد رائد اسم على مسمى ، واني اصير مرت الرائد توتو ، حطيت الشارة على السرير وكعدت يمها وتالي وياي اشوكت اتعود على الوحده من جديد مدا اتأقلم ابد  واوهم نفسي و ما يفيد، المرة راحت لحال سبيلها واني اتعذب ! يمكن راح ترتاح وياه اكثر بس اني راحتي كانت وياها ! ،
بشنو تفكرين هسة يا نوفة أسال الله اتغيرين رأيج ، ما اريدشي بس ظلي بلا زواج ولا اقتليني هيج ،

***
نوفة
كاعدة واكل رمان  واظافري صفر صارن شسوي احب اكله بدية ،
بالي بالفلم الي شفته قبل اشوية و افكر ليش البطل خان البطله تخبل وراح لوحده زركه ، 

باوعت للساعه بهدعش بالليل امداني  كمت غسلت الماعون ورجعت للهول اخذت هدفوني وتليفوني ودخلت انام وكالعاده ، ازور متصفح الحبيب او اطلع صورته خازنه اله كومه صور ، و اسوي ازوم لملامحه  ، حتى مرات اقربها وابوسة و اتعذر لأني معرفت اشلون احافظ عليه ، ومرات اعاتب لان اتخلى  عني ومرات اشتم نفسي ،
واباوع لسما اشلون نايمه صافيه البال صدك ع طاريها  يوسف ابو دمعه من زمان شالو وهي مهتمت هلكد لان بعمره ما لمح الها بشي ولا منطيها اهمية فمر الموضوع مرور الكرام ، وهسة بدت تفكر ابو دشداشه طلع شهاده و مثقف كل ما في الامر شايفته  من زمان و همين ببيتهم فاكيد ماخذ راحته مو من شفناه انيق وكلمته معدلة ،
الله يهنيها ، ويريح بالي ،
بشهر الرابع ، سويت عمايل وهي كمت اخذ مسمنات وطبعا الامر سر بس سما تدري بيه و توعي بيه واني وطاخه براسي الا اسمن ، طبعا سما انخطبت رسمي ترة ،    وعلي يريد يخطب وحده وياه بالكلية ،و  رضوان مرته متقدمه بالحمل واعتذرت مني للمرة المليون واني تجاوبت وياها وكلت الها الصراحه موضوع توصيل مشاعري لرائد جائز فادني بس صدمني بيها وما حبيته منها بس اني ما ازعجني لان حتى اختي تدري و موافقه ، لكن الي كرهني  بيها هو من طلع حتى موضوع مختار كايلته وهو شي ما يهم بحالتي النفسية بالعكس يصغرني يمه ، اعترفت هي اصلا قبل لا يزوجني كايله اله تنبه حتى يكون على بينه وبدافع الاخوة هيج سوت وهم زعلت منها من جديد ،
اسمع اخبارة من بعيد لبعيد عرفت ترقى قبل شهرين والاهم هو حياته ما دخل الها اي ضيف جديد ، عطل هشومي وطلع اول ع الصف ، بده مفعول الادوية يشتغل صح احس مرات بوجع بالمعده بس بده اللحم ينمو بيه و غطى العظام حتى فتحت بشرتي  ،،
**
رائد بعد حركان الاعصاب مصارت قسمه الحمدلله ، بعدين لينا كالت ماعنده اخوه شو ممزوجين ولا واحد ارمل !
ما اهتميت يمكن متوهمين مو اخوه بس المهم ما تتزوج وتظل ! ،  رائد كل اجازة اشوفه وما نساني ابني ، مصطفى هم متعلق  بيه ،
بيوم عزمتني لينا على عشى ، فرحت الهم ،

،،،
سما
سمعت برضوان عازم رائد اليوم لو امي مدري اشبيها راسها والف سيف ناخذ عشانه الي محضرته نوفه قبل المغرب دولمه وانروح الهم نوفه ما فاهمه شي واني همين كيفت بلكت من يشوفها وتشوفه يحنون لبعض ،  
- لج نيوفر حطي شي لوجهج
- مبيه مو كافي عليه حروح اشوف خلقه لينا
- مو بابا امرج تحجين وياها
-اي اي احجي وياها بس ما احب اروح الها ،
***
نوفه
رحت وياهم حتى لا اصير امهم الغولة  
ومنعزلة وغصبا ما على لينا ،
و سما دكتها براسي ،  احط مكياج   واتعدل  حتى لينا ما تكول عليه مهملة ، و راسها والف سيف احط عدسات يا يابة متت الا صارن ، كان لونهم اخضر حشيشي لاك ع لوني الحنطي وخاصه اعيوني لونهم فاتح فحيل صار انعكاس حلو علي يوصلنا بابا يم عمي ابو منال كالعاده ،
صعدنا السيارة من غير عبي هي من الباب للباب همين هيج طخت ببالي اقلد لينا سابقا  لان اصلا رضوان لبسها عبايه ، بس لابسات جبب
وصلنا لباب الشقه علي وصلنا وراح ، دكينا الباب ، واني اتخيل رائد من يجي يشوف الجهال ، كالت الي سما وكلت عادي ! لان شفت الولد.وخاصة توتو يتأثر
المهم طلع النا رضوان فاتح حلكه مصدوم ويباوع النا
امي كالت ما اتريد أدخلنا شنو نظل بالشارع
- يا اهلا وسهلا
طلعت منه برتباك
-ليش ولجن بلا عبي
امي كالت هو اخوك وصلنا من الباب للباب . لا تخنك خواتك سوينا مجال ندخل
طبعا هو اني الي عرفت رائد يم اخته من اميرة لكن امي من سمعت جابتنا
***
رائد
بالصالة كنا وراح رضوان يفتح الباب وسمعت صوت نسوان ،  صوت  اني مولع بيه وكانه صوت قطرات دمي النابضه من تحجي
سمعتها اسلم على اخوها
الموقف مو سهل ابد
لينا كالت ذوله اهله شجابهم
دخلت ام علي وهي اتكول
ضوجه كلنا نجيب عشانا ونجي يمكم ، شافتني كاعد ، وكفت الها
-ها رائد يمكم

..
نوفه
سمعت خاله اتكول رائد اهنا
تجمدت اطرافي والتوة كاحلي اجيت اوكع من دخلت ورة سما ولمحته كاعد ، طليقي  ، دنك اول ما شافنه وهذا وحده الشي ذبحني من الوريد من حسيت نفسي غريبه عليه يدنك راسه من يشوفني ، ابسرعه دخلت للداخل و سما خلفي ،
-خل انروح خابري علي يرجع
-حبيبتي لا تبجين شجاج

***
رائد
انحرجت من الموقف ردت اروح بس الاطفال التمو يمي وهم رضوان رفضت صبوا العشة تركت الفطائر  و المعجنات المالحه و رحت لصحن الدولمه   اكلته بنهم من غير خبز وكمت اغسل

،،
نوفه 
اجتني لينا كالت خالتج بالمطبخ
كمت ما كلت شي اصلا اريد بس نتعشه وانولي ، اني وسما بالغرفة الداخليه حطونا العشا وخالتي حشرة نفسها يمهم
رحت بالمطبخ ويغسل بالسنك !  ، من شافني  سد الماي وظل يقطر من ايده ،
-كالو خاله اتريدني 
درت وجهي وكنت متأكده بشفايفه حجي وراح يوكفني ورائد  واعرفه بس شو رحت للغرفه وما صاح ، .
راح هو ومن طلع اكتشفت مغسلة رضوان عطلان خلاطها ،  احنه هم رجعنا وكانت ليلة تهيج المواجع و سكب العبرات الموجعة ، اشلون راجعه اله روحه وصابغ شعره شيبي الي جنت احلفه لا يلمسة  بصبغ ، حتى سمنان اشويه ، 
جا اني شجاني  هيج حالتي رجعت الهوى يخنكني ،  وطلعت لينا بوامر من تمارة صاحتني على غفلة من رضوان
***
رائد
أستأذنت ورحت بعد العشا مباشرتا
منطيهم راحتهم اكيد لينا الها يد بالموضوع و نوفه ماتدري ، بس بيها تغيرات ازعجتني ، اريدها كما كانت النحيفة البريئة ، ما اريدها تكبر ولا تصبح صورة مثل نساء اليوم ، كانت منفردة بشكلها ، لكن ما زالت اليوم منفرده بطبعها ، نظرتها الحاده وهي تبرر وجودها بالمطبخ هي هي ما تغيرت ، اليوم من شفتهم هي واولادها سقطت مقدرتي وارادتي على التحمل مثل الكرة الحجرية من قمة جبل   ، و رجعت لنفس المرسى ،
حياتي بعدها تبهذلت عايش ويه اهلي تارك بيتي ، ماعندي كيان ولا عائلة ، عائلتي اليوم دخلت عليه ما كدرت  ارفع نظري  املي ناظري بطلتهم بسبب عادات اخوها  اشكد جان موقف صعب ، اشوف شخص يعني الك وما تكدر تحاجيه كلمة .
رفعت ضهري عن فراشي واني معزم اجرب من جديد واحاول ، هاي حياتي وعمر كامل مو لحظه وتنقضي ، يراد اله شخص متعلق بيه يشاركك ،
الفكرة ازددت اصرار بتنفيذها والليل كله كاعد حتى احسم قراري واثبت عليه ، طبخها  لمساتها اطفالها  لكلشي اني مفتقد صارلي اشهر عايش معاناة

***
نوفة
ثاني يوم جنت اكنس بالبيت اجاني والدي كال ادخلي لجوة بوية ، 
جانت الدنيا ضحى ، ويوم جمعه ،
رحت ودخل ضيوف للأستقبال ، اجاني رضوان ما اعرف بيه اهنا
-ها رضوان اشوكت اجيت
-اجيت ويه رائد وابوه
- شنو رائد اهنا
طفرت من مكاني
-اي
-اها ، بس اسبح الهم توتو اشوية وادزه
-مجاي لخاطر الاطفال ،
-ها
-كلت الج جابني اني و ابوه حتى يرجعج

-جذاب
-انجبي
اداركت نفسي
-اسفة والله اعتذرك منك
-يلا شكلتي
- اي عادي احضرملابسي وهاهي
كلتها بلهفة وجدية وحماس و فرح و اني اشر اله بايدي ورايحه ناحية الكنتور
هز ايده  و وجه صار احمر وراح ، سما مكترة نفسها ما حجت شي جانت تتفرج وماتت ضحك عليه وعلى دفاشتي حرجت رضوان  ،
- لج سمعتي ممعقولة رائد يريد يرجعني

-مفعول عدساتي يلا انطيني البشارة
-لج انطيج عمري ، يااااي رائد رجعلي
افتر بالغرفة و اهفي كدام وجهي
-لج رائد رائد
ورجع الي عمري الي راد يفوتني ويعدي ،و رجعت اتنفس امان ، بودي هسة يرجعني لا تمر ساعه و يروح بعد ما يرجع لو يصير شي جنت حيل متعطشة لقا  ونفسي دانية  اتريده بلهفه وشوك مال سنين مو اشهر ،  ساعه ابجي ساعه اضحك من كالو يجبون شيخ يعقد النا من جديد العصر وصرت اكول ليش لعصر مو هسة ،

انتظرت العصر الي ما ناوي يجيني دمرني ، الانتظار ،
وسما اتكلي اصبري ، اتعدلت وانتظر منا من اجه هو والشيخ لن دمي نشف،
كاعده يم والدي والشيخ كدامي وعاصم و ابوه وهو ورضوان وعلي ، وتمارة ،
وتم العقد الجديد ، ورجعت تحصنت وصرت من املاك رائد ، توني حسيت صدك جنت ناقصة وكملت بيه وكملني ،
شعور ما يوصف ولاول مرة احسه لثالث عقد الي اني اريد بكل جورحي الي كدامي  ، وكل كل كلمه خلف الشيخ كلتها عانيتها ،  بودي جان اكول للشيخ اختصر حباب اهاف بهاي الثواني يصير شي يفصلنا من جديد ، 
خلص العقد الا باوعت لرائد كان لابس قاط رصاصي واعيونه حبات الؤلؤ الصغيره عليه مقنصة و تجعدات عينه ضاهرة والبسمة مزينه ثغرة  
،
دموع الفرح غركت وجناتي وهو هز راسه نافي ، ما قابل ، وبدت التبريكات ، عمي وعاصم ماخذين عليه ككنه ، واني هم ، ففرحت من اجه وكعد يمي ،ابسرعه حطيت ايدي على ايده الى على فخذة هو ابسرعه حط الثانيه عليها وشالها كانها ماسه برقة باسها
- مبارك علينا العوده ،
ضحكت ببتهاج يمكن جنت فرحانه اكثر منه  ودخلت سما اصور و الجهال كعدو يمنا وهو ابسرعه نحاز لتوتو وحطه بحضنه ويشم بيه واني شو غرت !
-اها على اساس ما جنت اشوفه من ورايه وكشفتكم
باوع الي وابتسم
همس
- حيل حبيت  ردة فعلج
ضحكت  .
بادلته الهمست
- صدوك اوعدك مراح تتكرر الاخطاء
حط ايده على متني ومثل الي كرصني
-ترة مشتاق !

،
هي لحظات وكال الهم يلا نترخص اخذني اني وجنطة رمزيه ندبر نفسنا بيهن وبعدين الباقي ،
رحنا لمطعم عشانه وتعب الاطفال رجعوا نامو الغريب حاط افرشه على الاسره ومعدل البيت بعدين عرفت بمساعده اهله 
ولينا .
،

اجاني  طلعني من غرفة الاطفال  ،
يمشيني مثل الطفل كدامه ، ماخذ ايدي وكاني توني دا اتعلم المشي ،
اشوية و جرني على جسده
ابعد شعري عن اعيوني و يتلمس بشفافيى، 
-  رجعنا يا نوفة ،
- كولة مرة لخ
كلتها واني مسحورة
- نوفة !!
-اي حبيبي احبها  منك  ومشتاقه لأسمي بصوتك
حطيت انفي على رقبته و اشم بيها مثل الهروين المقطوع عن مدمن صارلة فترة
- اشتاقيت الك يا قاسي ،
كان بس ساكن بمكانه و شفايفه ترتجف واعيونه ذبلانه تنظر لأنامل ايدي وهي تتلمس صدرة
- حبيبي مصدكت يجي يوم وارجعلك ، ظنيتك قاسي الي يمسك بكلمه ما تسامحه

- الي يمس كرامتي امسحه من حياتي
باوعت لعيونه الثايرة
و احتاريت اتوقفت عن حركاتي دفهم قصده
غمض وكال
-بس وياج اكسر كل القواعد
رجعت حاوطته من خصرة ،
-تعالي كافي احماء ، انت نفسج لو مبدليج !
ما يدري من كثر الشوك ممسيطرة على اعصابي و اريده بحضني الليلة

اخذني ودخلنا لعشنا من جديد ورجعت لوكري و ملاذي و اماني بيتي وزوجي ،
ما اكول صرت وحده ثانية ، شي صعب اتحول نفسك لشخص ثاني ، لكن فهمت ورائد  وفهمني اكثر صرنا نحب بعض اكثر هذا الفراق ما ولد جفا ولد حرص ، وياه بس صرت احسب للكلمه الف حساب  لا تطلع لان اعرف العواقب ، مريض مو مريض هو مكفيني وموفيني ما ابدلة بدنيا كلها ،  اغار من اقاربه ومعذبته بشكي ، من يشوفني اعصب يتركني ، و اني هم من يقفل ع شي اسويه واسكت
اكو خلافات لكن مسيطرين عليها ،
وصار هو ثوبي و غطاي لان ادري بيه يعرف عني كلشي وما فديوم ذكر شي ولا فتحنا الموضوع ابد لان صار يعرف اشلون اتصير حالتي اذا انفتح دفنا وراح اقصد سالفة مراهقتي ، لينا طاب خاطري منها ، سما تزوجت من شهر السابع وتركت السنه بسبب الحمل السريع  ،  سما صديقتي وبيت اسراري كلشي تدري عني واني هم ،
و لينا جابت بنت قمرة ثانية  اسمها  رحمة على اسم امي، علي بعده ما مسويله شي  رسمي لان معنده وارد بعده ،

هاشم صف ثاني صار ، محب ومطيع ولدي ينحلف بادبهم صح حركين بس نادرين و نعم من يساعدني بتربيتهم

لا تتركيني فلكاً
يدور دون نجمةٍ هذا فؤادي فاسكني
أو مرةً فمرةً ترددي ..

‏مظفر النواب

الخاتمة
زهراء العراقية

بعد ان ختمتم قصة الرعناء انصحكم بمتابعة جوري ام النون  هذا الحساب

jooryomalnoon
قصتها الجديدة شضايا ...
لدي معكم حديث فيما بعد اليوم جدا ارهقت و عيوني لم تكف دموع حساسية من ضوء الشاشة ..