رواية الراقصه والسلطان الفصل الحادي والخمسون 51 - بقلم hour writer 🐆

الراقصه والسلطان
#حور حيدر
#الانستغرام: enghour98
الواتباد: eng_hour

❤️ تابع الصفحه وصوت للبارت فضلا وليس امرا †

#يحلوه مشاركه للبارت ♥️

اكو بيت شعر يگول (حن وانه احن)
فرديت عليه :
حنيت گبلك الك ولا هزتك حنيتي
عايفني انته بلا سبب... والليل لمن يمر
تخنگني حتى رويحتي

اول ماشافته كل الكلام مات اخر شخص تتوقع تشوفه هنا هو عقلها وگف عن التفكير گلبها فز لشوفته متگدر تسيطر على رجفه جسمها لمن تشوفه هذه أول دگه گلب الها اول لهفه هذه الي قررت تنهي حياتها لخاطره متخيلت احد يلمسها غيره قررت تموت ولا تغدر بي ...

حاربت الكل بسببه وحاربت روحها وبعدها لهل لحظه بحرب بسببه هذه حر هذه جرحها هل اسم من مر بحياتها ما گدرت تعدي وگفت كل حياتها يمه غيرها هواي عشگته مو عشگ عادي مرت سنين وهل عشگ ما گدرت تشيله من گلبها حبها اله جرحها هواي وتعبها اذاها ...

شگد كرهت روحها على ضعفها زعلانه من روحها الشايلته جواها مخدتها تشهد كل ليله ما نشفت تبچي عليه بچي الفاگد روح... متصدك شوكت تسد بابها وتحظن صورته...

تشوف ملامحه وتحظنها تشم بيها ماكو هو ولا عطره ... بعده عنها نهش روحها الليل واوف من الليل شيسوي بيها طويل وثگيل عليها تفكيرها بي يموتها...

هسه نايم بحظن مرته هسه باسها هسه حظنها خاف اتغزل بيها معقوله غار عليها مثلي... خاف صار عنده طفل منها... گلبها ينمرد ويوج نار وهل تفكير ميفارگها...

تريده تشتاگ لنبره صوته لعگده حاجبه من يعصب لخزرته من يغار وكل ما تذكر تتعب اكثر ... مكسوره بدونه مو كسره عاديه وتعدي كسره عمر ما گدرت تعبرها وتعديها روحها معلگه بي ... وكسره روحها وگلبها للاسف اول كسره وغدر...

هذه نفسه معلمها العلمها على عشگه چانت باديه مثل الطفل خلت گلبها بين اديه چانت وتچذب على روحها لو گدرت لحظه تمشي حياتها بدونه هلك گلبها حبه استهلك كل طاقتها اذاها اذيه الله وحده اليعلم شصار بيها من وراه من حرگتها تريد تدعي عليه من لسانها مينطقها قلبها يگول اسم الله عليه قبل لا ينطق الحرف ...

اول مشافها وهو يباوعلها بلهفه وعيونه لمعت والفرح واضح بيهن المتيه يشوفه...

ضحكته من سمع لهسه ممفارگه وجهه يحس گلبه ميوسع للفرحه الگاعد يحس بيها ولا اكو كلمه تعرف توصف شعوره...
سلطان گوه صبره لحد ميطلع الصبح...

غرفته انگلبت من الملابس يلبس وينزع رجع مراهق يناطر اول موعد ويه حبيبته ... يريد يشغل تفكيره باي شي خايف اي خايف من مواجهتها شكد ما فرحان بس هم خايف اكو خوفه بگلبه خاف يطلع كل شي چذبه...

روحه تريدها هل مره ميصبر ميعرف شراح يسوي لو احد اعترض ميضمن بعد روحه...

گام وهو شايل الطفل ويباوعلها يباوع لعيونها بشوگ وبنفسه ياخذها ويشرد بيها هسه... حمحمت سلطان صحته وعرف بنفسه طول وهو يباوعلها...

شلونچ نمارق...

نمارق تباوع لاخوها وترجع تباوعله گالت بحده وهيه توجه كلامها لاخوها تريد تعرف ليش موجود ابيتهم وعيونها تخزر حر...

باحسن حال، عن اذنكم

گالت كلامها وعيونها تخزر حر وتوجهله نظرات تحدي گالت كلامها وانطته ظهرها...

مجتبى وگفها وهو يگول ويگوملها لان يعرف نمارق رد فعلها راح يكون عنيف گللها بهدوء ... اوكفي نمارق حر خطبج مني

نمارق فكت عينها بصدمه وطلعت منها شهگه لا اراديه الصدمه ثگيله عليها كلش، ردت بسرعه وعيونها لو تموت چان موتت حر من نظراتها اله... واني مموافقه

رادت تروح...

مجتبى بحده... نمارق اوكفي واسمعيني اني وافقت

نمارق اتخبلت باوعلتها وعيونها تنطق بلصدمه والقهر الحاسه بيهن هسه واول فكره اجت على بالها يريد ياخذها على مرته تصير الثانيه بحياته شلون يقبل مجتبى هيچ يسوي بيها...شلون يخليها بهيچ موقف...
گالتله بصوت عالي وعصبيه طلع لا ارادي منها فقدت كل اعصابها ...

كل شي ما اسمع منه واذا مستعجل على زواجي فكتلك موافقه على قتيبه بس هذه لا مستحيل وهيه تاشر على حر

اگفي... وگفت غصبا عليها ويه كلمته بعمرها مكسرتله كلمه وتعرفه بهل نبره هو عصبي كلش هسه

حر ما يتحمل اكثر يشوفها گدامه ويشوف نظراتها اله يحس روحه متهم گدامها هيه القاضي وهو المتهم ولازم هسه يبرئ روحه گدامها حتى يحصل البرائه منها چان كل شي متوقع منها وهيئ نفسه يحتوي غضبها بس من سمع اسم غيره على لسانها عقله طاار ...

گال وهو قابظ ايده ونفسه بده يعله وعيونها عليها اضلمت... اگفي مكانج كلامج وياي اليوم انه جاي عليچ

نمارق باوعتله تعرف هل نظرات حافظته اكثر من روحها بس مگدرت تضعف گدامه رفعت عينها اله وهبه تخزره وتباوعله بتحدي رفعت اصبعها گدامه ...ماكو شي بيني وبينك ولا راح يكون

حر صاح بيها وهو يباوعلها بنظرات تعرف شنو معناها ... لا اكو الي صار بينه مو شويه

نمارق بعصبيه اتجاهلته ودارت وجهها لاخوها وهيه تحس بكسره منه ما توقعت يكون هذه موقفه وهو اكثر واحد شاهد شسوالها هل شخص وشصار بيها بسببه ...

مجتبى الي عندي گلته بيتك هذه ما اگدر اتحكم بضيوفك ولي يدخل بي بس گعده اني ما الي هنا...

مجتبى صاح بيها... نمارق

سلطان وهو حس الامور بدت تطلع عن السيطره حمحم وشاور مجتبى وگال بصوته الهادئ والرزن... صلو على النبي من رخصت اخويه ابو حرب... استريح

حر بعصبيه گال... بس حر

سلطان بنفس الهدوء... كل شي ييجي بلتفاهم ومثل ما اخونا ابو مصطفى فهم الصار من حقها تفهم منك انته لتن الموضوع يخص حياتكم انتم الاثنين.

مجتبى لزم نمارق من ايدها رفعت عينها اله همس الها... الخاطري اوگفي اذا الي معزه بگلبچ ابقي هنا واسمعي

نمارق بحركه قلب گلتله وعيونها بدت تحمر... بس مجتبى مو هيچ تكسرني

مجتبى كمل بهدوء... بروحه لجدي اسمعي نمارق والله الگاعد اسوي لخاطرچ هذه بيتچ مو بيتي هاي وحده وياچ بس مو وكتها هسه گعدي وافتهمي الصار حر ابن عمتچ مو غريب منج...

سلطان گام وابتسم ابتسامه بسيطه وهو ياخذ الطفل من حر ويغمزله... انطيني هل نشمي هذه
اندار هو ومجتبى طلعو وسد سلطان الباب...

نمارق ما تگدر تتخيل هيه وحر بنفس الغرفه بعد هل سنين... ما تگدر تبقى رادت تطلع صوته وگفها

نمارق اگفي هين...

غمضت عينها تجمع كيانها وتشتتها اندارت عليه وطلعت منها شهگه ورجعت خطوه وره وهيه تشوفه گدامها...

مد ايده لجنطتها سحبها من ايدها وشمرها على التخم...

رادت تحجي خله اصبعه بقوه على شفايفها وهمس وهو يخلي جبهته على گصتها... اششش

غمض عينه وهو ياخذ نفس طويل همس بثگل... صارلي سنين، سنين وانه احلم بهل عطر، سنين وانه ميت بدونج

نمارق واديها زادت رجفتها تريد صوتها يطلع تستنجد بمجتبى...

باوعلها وهمس... لا تخافين انه حبيبچ

اخذ نفس طويل نزل شفته لخدها وهمس و صدره يصعد وينزل بسرعه من تنفسه السريع... بعدچ ذلني، هدني،كسرتيني، شيبت بدونچ وچ وحگ الله چنت ميت وهسه ردتلي روحي، هسع، هسع ردلي عمري هسع ردتلي عافيتي بيج

نمارق بحاله صدمه حبيبها گدامها وتسمع منه هل كلام چانت تتمنى يرجع الها ندمان وتشمت بي بس هسه حالها مو احسن منه استلمت لقربه تريد تشبع من قربه وتملي روحها بعطره تضعف گدامه رجعت ذيج المراهقه قبل كم سنه من چاتت ترجف لقربه وتخجل وگلبها يدگ طبول من لمسته همست ... حر

حر رفع ايده الثانيه يتلمس خدها رغم وجع ايده يحس كل جسمه خدر من قربها وشفايفه على خدها الثاني ومغمض عيونه حاليا هو بدنيا ثانيه همس وانفاسه تظرب خدها...

اوووف يااا نفس حر انتي...اااه ياا الله شمشتاگلچ، شفاگدچ، شگد چنت اتخيل صوتج وشفايفچ تنطق باسمي...

اصابيعه گامت تتلمس شفايفها وكمل بجنون وغيره وانفاسه الحاره تضرب خدها وملمس خدها الناعم على شفايفه خبله... اموت كل ليله الف موته وانه اتخيل جاسچ هسع ، خاف باسچ هسع افرفح بلقران روحي تصعد لله من الحرگه بلقران...
انتي تعبي انه مالتي انه،

نمارق دموعها گامت تنزل على اصابعه ضغطت بسنونها على شفايفها تريد تلملم روحها وعقلها يگلها يعني هو حلال يتزوج وهيه حرام بعدت ايده عنها ودفعته وهيه تحجي بحرگه گلب وقهر ...

حاچي نفسك الاول من عفتني ورحت اتزوجت ما گلت شنو حالي اني من دست على گلبي وعفتني واني بامس الحاجه الك.. كله بسببك كله بسببك انته وهيه تضرب باصبعها صدره...

انته السويت بينه هيچ وخر مني حر واطلع منا ما اريد اشوفك بعد شعندك جايني ما كفاك السويته بيه جاي تشوف شلون صرت ابعدك... عيونها بعيونه ودموعها تصب... ابشرك هااي اني
وهيه ترفع قميصها وتبين اثر جرح ايدها...

دمرتني شوف بعينك وافرح ...اگلك اني بخير بس من عفتني ولهسه معايشه بخير اصلا معايشه وليلي مو احسن من ليلك ليلي يخنگني، يموتني كل ليله الزم صورتك اعاتبك واشكيلك منك ... وهيه تضرب اصبعها بصدره ودموعها ملت خدها...

حر عيونه اضلمت من شاف اثر جروح على ايدها اتخبل من الشافه لزم ايدها وگال بخوف وعصبيه...

من الله لا ينطيني الله ياخذني بويه شمسويه بروحچ... الله ياخذه لحر ليش هيج
نمارق رادت تسحب ايدها منه...

سحبها اله حظنها حر بقوه ... حظنها لصدره وحاوطها باديه لمها لصدره بكل حيله...
نمارق فقدت كل اعصابها گامت تضرب بصدره وهيه تبچي وتصيح...

عوووفني... عوووفني حر، وروح ميفيدني كلامك مراح تررجع عمري الراح، صح روحي معلگه بيك بس اجبر گلبي ينساك ومثل ما عشت هل سنين بدونك اعيش باقي حياتي

حظنها اقوى برغم الم ايده وصدره بده ينهش بي ضمها الگلبه اكثر گلبه ما يتحمل يشوفها بهل حاله... اهدي اهدي يا روح حر انه حر حبيبج انه ولفچ  وچ لو بيدي اشگه لگلبي واضمج بي ولا اخلي الهوا يمسچ...

نمارق انهد حيلها تحس بلعومها مشكك استسلمت لحظنه ودموعها بعدها تنزل ما نشفت...

خله راسه على جتفها وهمس بنبره عتب ... ليش رحتي مني عفتيني المن... طگ گلبي عليچ چنت خايف اموت وما شام عطرج ولا حاظنج اووف الله لو تدرين شصار بيه وچ اتخبلت اتخيلچ وياي بكل لحظه احجي ويه طيفج واشكيله منج وجهچ اشوفه بكل الناس ...

نمارق گالتله بوجع وضعف وهيه تضرب صدره بايدها وهيه تشوف لهفته الها ولوجع الواضح بعيونه وكلامه متدري تصدگ بيه لو لا گامت ما تفهم كل شي والسوال ليدور بعقلها هو مو اتزوج وتركها ليش رجع  ... ااي ليش لعد ليش هيچ سويت ليش عفتني وحدي احارب ليش خليتني وحدي بنصهم... ليش رحت اتزوجت وعشت حياتك وكسرتني...

حر گال بضعف...ما عفتچ وحگ فراگچ تايه بدونچ ما چنت اعرف وين چانت مظمومتلي هل مصيبه الدمرت حياتي الله لا ينطي الجبرنه على هل فرگه وج انه لا متزوج ولا عيوني گدرت تشوف غيرچ وانه چنت اظن انتي بذمت غيري حرمت عليه النساوين من بعدچ كل عگلج اشوف غير هل عيون الدمرن حالي وخلني امسودن سنين ادورهن شفگان على نظره منهن...

نمارق بشهگه وحرگه ... وخر مني حر رجعت تضحك عليه لتسوي نفسك المظلوم وانته الظالم السويته بيه لعدوي ما اتمناه،، لتتوقع ارجعلك بعد ما صرت لغيري...

حر ابتعد عنها شويه رفع ايده مسح خدودها من الدموع ولزم خدها و عظ شفته وهو يبتسم ويباوع لعيونها الصارن حمر من البچي...
ول بويه انه مالتچ انه وليدچ انه المسودن مالتچ طشريني بحظنچ وردي لميني... موتيني بايدچ قابل بس كون يمچ بعد ما ارضه ثانيه ابتعد عن هذه وهو يلمس جهه گلبها...

نمارق وجهه احمر ولحد هسه ممستوعبه الحجاه وخرت ايده جمدت من كلامه كلمه ممتزوج ترن باذنها... حر يعني...

رفعت راسها اله نفسها زاد رجفت ايدها زادت... انته ما تزوجت لو گاعد تضحك عليه ... باوعتله وعيونها تترجاه يگللها اي صح...

حر والله گلبي ما يتحمل صدمات اذا تچذب عليه فدوه كافي عوفني بحالي حبك عذبني بما فيه الكفايه...

حر لزم ايدها گعد على التخم وسحبها بصفه وايدها بحظنه رفعها لشفايفه...باسها بعمق رفعها لعينه غطه بيهن عيونه دنگ راسه الها
عسى ربي يعميهن لو شايفات غيرچ يول انه بلا شوفتچ شينفعن عيوني...

انتي مزروعه ويه روحي  ... سنين ناطرچ وانتي بذمت غيري يگلولي راحت بعد مو الك لغيرك صفت وانه اناطر ترديلي من شفتچ ذيچ الليله بلمستشفى  وانتي يمه وتظحكيله اظلمت وظاگت الدنيا بيه اكثر صارت هلگدها بعيني شفتچ تباعيله بعيونچ بس هنه مالاتي ما اگدر احجي ارد اسحبچ منه اصيح عليچ واگلك عيونچ شفايفچ كالاتي لا تباعيله بس حسيت بروحي مقيد اتذكرت انتي اله باسمه وانه الغريب هنا صرت غريب عنچ ...

وبصوت كله وجع انتي لو تدرين بلصار بيه حالي بدونچ يصعب على الكافر حرگ دم و تعب واهات وهموم او وجع راحتي انسلبت يول انه وياچ شركت نفس... اني وياچ انظلمنه هواي بس كاافي لهنا ويزي
كمل كلامه اخذها لحظنه...

نمارق بخجل وهيه تبتعد عنه... حر فهمني شلون صار هل شي اذا تچذب عليه والله اموتك بايدي

حر ظمها اكثر وهو كل شي ميسمع منها حاس بنعيم بحظنها ابتسم ... كاافي اششش ما اريد مشاكل هسع بداعتي سدي الموضوع بعدين نفهم كل شي... بس خلي نتزوج وبعدين ابيتنه موتيني بيدچ قابل وچ انه وليدچ يول

نمارق بصدمه ... حر انته اتخبلت يا زواج ويا بيت 

حر والضحكه ملت خده وهو يدحس راسه برگبتها يشم بيها گال بفرح ... انطعج عليج يبعد طولي وهلي هسع راح نتزوج

نمارق بعناد ودلال وهيه تحس روحها بيده نمارق القديمه ... ومنو گلك موافقه اني بعدين جايني بعد سنين وبهل سهوله حليت الموضوع

حر وهو يدفن راسه اكثر برگبتها... اششش اموتچ غير بلا عناد اريد ارتاح، متدرين شگد محتاج الچ كافي تحرميني منچ
حست بي يوزع بوسات على رگبتها من وره الحجاب

نمارق بخجل وهيه توخره... حرر عززه وخر شو صاير متستحي كلش

حر وعيونه تباوعلها واديه تتلمس تفاصيلها همس ...الصغيروني مالتي متغير هواي

نمارق وهيه تظرب ايده خزرته وهيه ميته خجل... ايدك حر وبعدين مرت سنين مو يوم ويومين بعدك غيرني هوايه

حر بثقه وهو يباوعلها من فوگ لجوه... متغير من بره اعترف وهو يغمزلها ويعض شفته بضحكه صايره تفلگين

نمارق گامت بسرعه وبعدت ايده رادت تطلع...

حست بحر يحظنها من وره وهو يهمس باذنها... لتصدين عني يبعد كلي مو اگلج متغيره من بره بس بداخلچ بعدچ طفلتي نفس الخجل من لمساتي ونفس التوتر من قربي ونفس رجفه الجسم من الزمچ ...

دارها عليه وشاف الصدمه بعيونها وخدودها صايره حمره...
ابتسم بحب وهو
حافظچ بكل تفاصيلچ يبعد حيلي

حر بخدر... تحبيني

نمارق باوعت لعيونه گالت بهدوء عكس كل شي بيها ... لا

حر بخزره وهو يحظن خصرها بايده ويدفن وجهه برگبتها ...تالي وياج جاوبي
نمارق وهيه تبعد عيونها عنه ... مو جاوبتك ما احبك گوه قابل

حر وهو يعض شفته ويعصر شفتها بين اصابعه... هل لسان طولان هواي حسابي وياه بعدين ائادبه بطريقتي واخلي يتذكر انه حر

نمارق وهيه تلعب بطرف قميصه... اهون عليك

حر ... يولو تهديدي مثل الطفل جذاب تهديدي

نمارق رفعت عيونها اله تتامل ملامحه

حرر وعيونه بعيونها لتباوعله بشوگ ... اووف الله هل عيون لو بيدي اشلعهن واعلگهن بگلبي... بويه زلمه وذبت من نظره عيونچ رحمي حالي...

نمارق رفعت ايدها تتلمس خده وخشمه وعيونه وشفايفه حر غمض عينه بلمساتها ونفسه ثگل... ايدها صعدت لشعره تتلمس الشيب وهيه تهمسله...

متدري شمريت بي وشگد اتعذبت بس ما گدرت اخونك احس  اني شي ملكك برغم چنت اظن انته متزوج بس جيب ليقنع گلبي... اگول اكرهك بس اعرف بروحي چذابه كل شي بيه يفظحني... شكد اتقدمولي بس نفسي رافضه ما اگدر اتقبل لمسه غيرك لحد ما شفتك بلمستشفى انهاريت هنا واني اسمع الممرضات يتغزلن بيك وبحبك لمرتك ولحلقتها اللابسها وما قبلت تنزعها... الغيره عمتني ردت اقهرك وابينلك اني نسيتك وافقت على قتيبه...
حست بايد حر تعصر خصرها وصدره زاد تنفسه...

نمارق بالم وهيه تخلي ايدها على ايده اللازمه خصرها... حرر گاعد توجعني

حر رجع ايدها على شعره...همس والعصبيه واضحه بصوته
كملي

نمارق بلعت ريگها تحسه رجع حر القديم نفس الغيره... افتهمني حر السويته من حرگه گلبي وغيرتي عليك المريت بيه مو شويه واشوفك فجائه

حر ابتعد كم خطوه فتح دگم قميصه

نمارق فكت عينها وصاحت... شدسوي

حر بعد ما فتح اول دگمتين طلع زنجيل ومعلگ بنهايته حلقه سحب ايدها وخلاها تشيل الحلقه همس الها... تعرفين هل حلقه

نمارق باوعتلها رجعت باوعتله وعيونها دمعت وهيه تهز راسها و تذكر اخر عيد ميلاد الها ابيت حر... شردها من الجامعه وجان مسويلها مفاجئه حلقات خطوبه الها واله مكتوب عليهن اسمائهن...

حر ابتسم بوجع وهو يخلي ايده على ايدها اللازمه الزنجيل...
متندم بگد هل شيب المله راسي ما خذتچ وعقدت عليچ بذاك اليوم
هاي حلقتچ ما فارگتني...
نمارق وعيونها انملت دموع خلت راسها على صدره وهمست بعبره... ليش هيچ صار بينه شنو السويناه احنه حرام ما اذينه بشر حبينه...

حر رفع راسها وهو يمسح دموعها... وحگ هل دمعه عيونچ الما عندي اغله منهن لاندم السواها   واخلي يبچي دم لحد ما گلبچ يبرد منه بس خلي اخذچ لسدي وارتاح وبعدين لكل حادث حديث...

نمارق دموعها گامت تنزل وحدها ...

حر عگد حواجبه وصاح بعصبيه وقهر... لتچين ولچ

نمارق رفعت عينها اله وابتمست بين دموعها وكالتله ... اتذگرت ذيج الليله...

حر عض شفته وجر حسره همس بشوگ... اووف يذيچ الليله لو ما شفتك ذيچ الليله صدفه

رفع راسها وهمس گدام شفايفها...

من اول نظره حيل اتعلقت بيك
عشگتك ما سالتك حاب ما حاب
خصه لبيتكم لمن تعنيت ...
بديت اصرف شبابي بعتبه الباب

بره وتحديدا بمكان سلطان ومجتبى...

سلطان ... الصار انه ما اسكت عنه لازم نعرف منو الوره وشنو الصار بالضبط

مجتبى وهو گاعد على اعصابه باله يم نمارق خايف عليها...
لهسه ما مستوعب اني... بس كون اعرفه والله اطلع روحه بيدي

سلطان بهدوء... سهله سهله ابو مجتبى كل شي هين بس خلي يتفاهمون،
تليفونه دگ... رفعه وجاوب
الله حيو وليد... ها خويه جبت الشيخ
ذيب اردها الك بلافراح...
اي ثاني شارع بعد البداله... كل الهلا بانتظارك

مجتبى يباوعله باستغراب... مو تشوف استعجلت بشغله الشيخ بعدين الشغله مو سهله خاف متقتنع

سلطان بثقه وهو يخلي ايده على رجله... سهله ابو مصطفى ثواني ويطلعون منا وتشوفهم بعيونك خويي وانه اعرفه ما انتظر هل سنين من فراغ

................ ❤️❤️

صباحكم ورد...

ورمضان كريم ان شاء الله... ربي يعيده بصحه وعافيه عليكم وعلى الاهل ❤️