رواية الراقصه والسلطان الفصل السادس والخمسون 56 - بقلم hour writer 🐆

الراقصه والسلطان
#حور حيدر
#الانستغرام: enghour98
الواتباد: eng_hour

❤️ تابع الصفحه وصوت للبارت فضلا وليس امرا †

#يحلوه مشاركه للبارت ♥️

عـَـدْ لـَتـْظِنْ
تحايلني المودّه وليك روحي إتحـِنْ
و بَعـَـدْ لـَتـْظِنْ
تكـَـــاوي امشتتاتي
وبيك بس أصفـِنْ
وأبـَـد لـَتْظـِن
يضوكَ الدمع عيني
ويطفح المجمن
مالازم فرح
كون اليحب مذلول!!
وبشوفة عيونك عاليحبها إتـْمِنْ

قمر من اول ما وصلت اتلگتها امها سلمت عليها وعلى الباقين وصعدت لغرفتها جانت تتمنى تشمر،روحها بحظن امها وتشكيلها وتفرغ هم گلبها بس،متگدر تعرف سلطان اقوى منها ...

من ثاني يوم بدت التحضيرات والكل مخبوص بره وجوه البيت ...
والشيخه جمعتهن وبلغتهن بأوامر سلطان طول فتره التحضيرات لان الحديقه مليانه شباب كلهم جماعه سلطان ...
صوت عالي ممنوع ...
اي وحده ممنوع تطلع للحديقه ...

انجمعن البناات بغرفه سمر انجمعن بعد صدور الاوامر وفيان وسمر...
دخلت قمر بالاحرى دفرت الباب ودخلت وهيه گوه ...

بس اعرف اشايف روحه هذه ويريد يمشينه على كيفه ...

سمر وهيه ملاحظه التغيير بقمر من رجعت وعصبيتها كل ما يتذكر سلطان او شي يخصه ...
شبيج چنج ثور شاف وصله حمره ...

قمر وهيه تروح وترجع ...سكتي لا اجي اترفس ابطنج وبطن ابن اخوج

سمر بنرفزه ...حدج عاد الا الغالي رحت فداا لخشمو انه

قمر بقهر ... اووف اللوگيه

فيان وهيه خربانه ضحك على مناگرهن ...
شنتظر منج بس لو اعرف

سمر وهيه تضحك وهيه تغمز لفيان ...هيچ حب سلطان مخليج 

واگفه گدام شباك غرفتها وفاتحته وفاتحه اول دگم قميصها...تاخذ نفس
تباوع للاشجار والنشرات العليها... والزينه صاير منظر مريح للنفس تباوعله من فوگ يوميه وتشوف شلون يباشر على كل شي...
ملتم هو والشباب وگاعد هو وبيده الارگيله...
ويضحك ويسولف شويه وتتغير ملامحه من ما يعجبه شي...

سرحت بحركاته...
غصبا عليها خلاها عايشه بخوف...
صح الصار چانت محاسبتله حساب لا لشوفه حسام ولا لهل عركه بس بقت ايدها على گلبها وعينها على الباب..
هسه يدخل ابوها هسه يدخل عامر لو ذياب متريد تشوف نظره الخذلان بعيونهم متريد تخسرهم وينتهي هل حلم...

صار اربع ايام من اجو لهسه والبيت گايم گاعد...

مخنوگه بشكل محد يتصوره... شعور الغربه صعب وقاسي
بس الاقسى منا من تحس بي وانته بين اهلك...

والاصعب شعور الضعف...لزمت تليفونها طلعت صفحه حسام دخلت للمراسله رادت تكتب متردده ... حيره چبيره

سدت التليفون ورجعت باوعتله عيونها من بد الكل تروحله...
وگف گلبها من شافته عينه على شباكها سدت البرده وطفرت للجربايه...

شويه ونزلت جوه تساعد البنات بلشغل...

نزلت بنص الليل...

ماكو احد... نزلت الدرج راحت للمطبخ سوتلها كوب گهوه ساده
واخذتلها وياه ككو گالاكسي...

وطلعت للحديقه... تدري بي بهل وقت مييجي ابيته ويا عامر وحتى ذياب وياهم هناك...

گعدت على المرجوحه وخليت الگهوه على الميز...

بقيت اگلب بلتليفون... طلعت گبالي اغنيه راشد الماجد احتاج لك
شغلتها وخليت التليفون على الميز...

الهواا البارد يضرب مسامات وجهي... كزبر جلدي من بروده الجو الحلوه... اخذت رشفه من الگهوه
غمضت عيوني على والهوا يلعب بشعري وعلى نغمات راشد...

فتحت عيوني وخليت ايدي على گلبي من اجت عيون سلطان التخزرني مر طيفهم ابالي ...

باوعت حواليه بسرعه ما لگيت احد...

اخذت نفس... فتحت الككو تهدي اعصابها وترفع هرمون السعاده تحاول تطلع من الكئابه الهيه بيها...

ورا شويه عااطت برعب من حست احد خله ايده على عيونها...

والايد اتحولت على حلگها...

ولج سكتي، سكتي انه عامر فضحتيني...

سكتت من سمعت صوت عامر... وخر اديه وندارلها

شاف الصدمه على ملامحها...

عامر ضحك وباس خدها... الله يصگعج فضحتيني

قمر خزرته وهيه تضرب ايده ... اكو واحد جاي مثل الحراميه لبيت اهله هيج

عامر... غير صاير عليه حظر تجوال ممنوع ادخل بقرارات الشيخه وضحه

قمر بضحكه بشماته... اي سمعت وانقهرت عليك خويي

عامر حضنها حيل... والله جنچ مكيفه بيه يا نذله

اختفت ابتسامتها من سمعت صوته الكتم على گلبها...
اندارت لمصدر الصوت باوعتله...

شنو هل صريخ شجره شصار...

عامر وهوو ياشر على القمر ... لك هاي الجبانه بعدني ما لازمها عاطت

سلطان ابتسم باستهزاء وقمر لاحظت هل نبره ... معذوره لزمه عن لزمه تختلف

قمر خزرته وهيه تباوع لعيونه بحده ...

عامر عباله يشاقه گله... اي لو مگعده وضحه چان سبتنه بهل ليل

سلطان يباوعلها ابرود ورجع باوع لعامر... دگوم شوف مريتك خلصني، الك عشر دقايق ما اجيت اعوفك واروح

عامر طفر من يم قمر من سمع عشر دقايق هو بس حتى يگعدها يحتاجله نص ساعه ... ابو شاهين مروتك

سلطان وهو يفر سبحته... دروح روح هسع وانه من اخابرك اطلع

عامر ... والله وكفو

اندار لقمر... قموره فيان وين نايمه

قمر وهيه گاعده على نار تريد تاذي مثل مياذيها بكلامها ... بغرفه سمر تلگاها بس هسه بسابع نومه هنه

دخل عامر جوا...

قمر رفعت راسها شافته واگف من ذاك اليوم ... رادت تگوم بعدين استوعبت انو هيه الي جانت گاعده وهو الي اتطفل عليها فلي يروح هو لازم...

رفعت حاجبها من شافته شال تليفونها بقه يگلب بي ... طفه اغنيتها وشغل
اغنيه حسام الا ابچيها ...

باوعتله رفعت حاجبها...

گامت تسحب تليفونها من ايده اتقربت منه غصبا عليها اخذت نفس عميق من ظربها عطره كل مره تتحسس من عطره بس هل مره مغير عطره جذبها كلها تحس بدوخه وكل جسمها ثگل...

رفعت نظرها اله...

جيبه ...

گللها بهدوء ...ليش طالعه مو گلت ممنوع البنوات يطلعن

قمر وعينها بعينه گلتله بتحدي  ...كلامك ميمشي عليه

شافته بقه ساكت يباوعلها... ما گدرت تسكت وحجت البگلبها وعيونها بعيونه

شعجب مگلت لعمك ادري بيك متصدگ تلزم عليه مستمسك ... فرصه واجتك للحظن تخلصك مني ...لو

شافت ابتسامه ونظره غريبه بعيونه بسرعه سحبت تليفونها منه رفعه بيده ورفع حاجبه وياه وگللها بصوته المبحوح البارد ...

يول تراها گامت تخرب بعگلي ...اندحج بفشگه افلشو لراسچ يمعثوره ...

شمره على الميز باوعتله بعصبيه وگالت وهيه ترفع اصبعها...

فكر بس فكر تمد ايدك عليه بعد والله اكسرها لايدك مو عبالك ملطشه الك اني...

يباوعلها من فوگ لجوه ابرود وهو يمرر اصبعه على طرف شفته ...
ورجعت گعدت...

وحرگت الراجدي تاكل بگلبها حتى اسف ما گلي ولو اني شتوقع من واحد همجي مثله...

اخذت تليفونها وطفت الاغنيه الخلاها بقت تگلب بي... وتاكل ككو

حست بي گعد گبالها... غصبا عليها عيونها تباوعله من جوه لجوا

شافته اخذ كوب گهوتها وگام يشرب بي وهو يتنفس ومبين عليه اعصاب...

يباوعلها بهدوء او واضح عليه التلذذ بالگهوه...

بقت تباوعله بقهر قالب ثلج گاعد گبالها مگدرت تسكت تحس الحچي گاعد على كلبها ولازم تحجي لان حتموت اذا ما حچت فجا باوعتله وكالت ...

انته شعندك وياي وليش مخلي گورتك بگورتي... او واگفلي على الوحده

سلطان رفع راسه وباوعلها ابرود وهو يگلها وعيونه مركزه عليها تنزل ويرجع يباوع لعيونها ... كلامج موجه اليه

قمر حست اكو بيها غلط من نظراته بس ما رادت تبين ارتباكها وقهرها من بروده گالت برفعه حاجب...

لا لخيالك...

سلطان... عجل عيدي سوالج ما منتبه الج

قمر وضغطها فول بدها تگوم تخنگه على بروده گلتله بنبره عصبيه ...

سلطااان لتغشم روحك سمعتني زين

سلطان نزل نظرته وبين الارتباك على وجهه قمر من نظراته الغريبه...

حسچ لتعلي گدامي...

انتي هسع صرتي هذه وهو يلزم شاربه...

قمر عگدت حواجبه بعدم فهم...
كمل بهدوء...

فكل شي بيچ يخصني...

قمر گامت اتخصرت وگلتله بعصبيه ... هللللو حلوه هااي

بابا ماا اخصك اني افتهمت ...

سلطان گللها وهو يتقرب منها ...عچل العرامه متبطليها

قمر گلبها يرجف ويه كل خطوه يخطيها الها ...رادت تعوفه وتروح انطته ضهرها ...

سحبته لزندها بايده وگفتها ...هدني سلطان

گللها بتحذير ...ول بويه اذا تصدين عني وانه احچي وياج يمفلوگه
اورج ور ...

قمر وعيونها بعيونه گلتله بتحدي وهيه گلبها يرجف من الخوف...لتحسب خايفه منك

وحق ذني وهيه تشيل خصل شعرها بيدها ...وتباوعله بتحدي ونظراتها تجدح

الا اندمك... سلطاان

سلطان عيونه تباوعلها بنظرات غريبه تحوم ملامحها تحس نظراته تسلب روحها من قوتهن ابتسم بطرف شفته قوه ضغطه على زندها عضت شفتها من حست باصابيعه نبتن بلحم ايدها نترها قربها اكثر منه اكثر وهيه تشوف عيونه بده يعصب ...
زمخ بيها ...

سمعيني لچ ...لعب المزعطه هذه مو اليه
البرنو افرغو  براسج  لو اتكرر الصار ...
احسبها اول واخر زله الج ...

يحجي وحست بي لزم جف ايدها نفسه الجان لازمه حسام عصره بقوه حسته راح يفلشه بيده ...

همس ابرود بس جواه ناار كبره...

المنظر الشفته دمرني لتخليني ادمرج وياي... فهمتي

عضت شفتها ...تريد تسحب ايدها تريد تبعد متگدر متحكم بيها بلزمته ...

عيونها دمعت من الوجع ...نزلت وجهها متريد تضعف وتنزل دموعها گدامه ويفوز عليها بكل مره ...
حست بايده عصرت فكها ورفعه ...صارت عيونها بعيونه

گللها ابرود نبرته رعبت اطرافها ...

گلت فهمتي ...

قمر رغم الوجع گالت بعناد وتحدي وهيه ميته خوف منه من اجو من بغداد وهيه تتعمد تتهرب منه وتتحاشا اول مره تشوفه ...

لا ما فهمت ولتتوقع بيوم اسمع كلامك ...ودموعها گامت تصب غصبا عنها

سلطان ابتسم باستفزاز وهو يأكلها بنظراته ...

اگهدي يولي اگهدي ... بلقران اكسرو لراسج لحد ما امشيچ على صلاه مستقيم ...

بعدني لهسع ما معاقبچ الراجدي چان بس حتى اطفي ناري... بس انتي لا حسابچ تگيل

منا وغاد اذا طلعتي من البيت بدون علمي اگصو لراسچ گص ...

تتحجبين وتضمين شعفتچ ما اريد اشوفها بعد

تلبسين عباه حالج حال البنوات هين ...

الظاهر رخيت الحبل چثير الج...

نترها من ايده... وهسع على غرفتج

باوعتله والدموع ماليه وجهها كل شي انهار بيها بس تريد تشرد من گدامه...

وها دحجيلي عدل سلطان يندم ما يندم... خليها ترجيه باذنج بويه
عافها وطلع...

عامر صارله اربع ايام مشايفها... خابرته تريد تحاجي قبل العرس ضروري...

احساس بداخله ما يعرف شنو هو گضه وياها وقت قصير بس اتعلق بيها اتعود يگعد يروح يگعدها وحركاتها لتخبله وهيه نايمه ويبقى يحاول لحد مينتهي الموضوع بيهم جوا الدوش اثنينهم...

لو مغرگ ملابسها بلمي...

يعرف بيها شگد فاهيه وتنسى ويوميه يوصي امه على دواها...

وتنتبه لاكلها...

حمد ربه سلطان گدر ياخذله اجازه...

وصل للغرفه فتح الباب... الغرفه ضلمه شغل فلاش تليفونه

همس... هسع شيگعدها هلتنبل

اتقرب منها والفلاش مخلي على وجهها

كنبص قريب على وجهها... اصابعه تتلمس خدها

قرب شفايفه منها و همس... فيان، فيان گومي

ولج تنبول گوم بسرعه...

گام يگرص خدها وخشمهاا...

فيان وهيه نايمه گامت تون بصوت عالي ... عااامرر وخررر والله اموتك

عااااامر حطيحه لحظك...

عامر اتفاجئ وخله ايده على شفايفها بسرعه وهمس.. ول بويه هاي تصير كلش دمخسز من تنام تتسربت

ما لگه حل الا يشيلها....
شالها اتعلكت برگبته ونامت على چتفه... باوعلها بقهر
ميته لو نايمه والله حتخبلني

فتح الباب برجله باوع يمنه يسره ماكو احد...

مشا بيها لغرفته... انرسمت ضحكت خبث بشفايفه وهو يباوع للحمام...

دخل بيها گبل للحمام وفتح عليهم الدوش...

فيان فزت وعاطت وجلبت برگبته حيل...

عامر... ول بويه انفضحت

حسج الله يصگعج...

فيان ضلت صافنه بوجهه برعب ونظراتها كلها خوف...

بعد ما استوعبت هيه بين ادين عامر وبلحمام مشا بيها عامر برا الحمام گعدها على التخم وگعد بصفها وهمه ملابسهم تنگط مي ...

خبل انته خبل

عامر عض شفته بتحذير... اللسانج اشتعل اصلج

فيان... هو اكو بشر طبيعي هيچ يگعدو

عامر رفع حاجبه وهو يبتسم... گلتيها بشر طبيعي ونتي مو هذا البشر راسج راس مجباس

فيان برطمت بزعل... انته مجباس راسك مربع

عامر ... افه لو تسمعچ سميه لتفشخج اطشرو لراسج بلقران

فيان... واني اگول لبيبي الشيخه

عامر گام يضحك... الله يصگعچ ضامنه الحكومه انتي

فيان بغرور... اخليها تورك ور

عامر كرص خدها... الله حيو وتحجي انباري الحگيلي سميه

فيان بخجل وهيه مشتاقتله چانت تريد حجه حتى تشوفه... صدك عامر نسيتني شريد اگلك

يولو فاهيه...

صدوك... اگلك احمد خابرني شهر ويخلص الكورس مالته

عامر اتغيرت ملامحه... يا احمد هذه وشنو خابرج

فيان بدت تفرك اصابيعها بارتباك... احمد خطيبي گال راح ييجي من يكمل نتزوج ونسافر

ااااه...
عاطت فيان من لزمت عامر لزندها...

شوفيني شاد گرون...

فيان بغباء باوعت وگالت... لا

عامر لزمها من اثنين اديها بقوه فقد اعصابه صاح بيها... بطلي ثول شنو خطيبج وشنو احمد احچيييي

فيان گامت ترجف مو من البرد من خوفها منه انرعبت من صياحه متعرف شتحجي... ع عامر هو

لزم شعرها وقربها منه...لانعل ابو لابو الخلفو لهل سربوت  مو گتلج تشيلين الموضوع كله من بالچ انته هسع مرتي مررتي افتهمتي

فيان ودموعها گامت تتجمع... بس انته مو هيچ متفق ويه خالو

عامر نترها على الكرويته... هذه الحجي قبل هسع انتي مرتي حجايه زايده ما اريد باچر يوصله الخبر وينسى كل شي غصبا عليه لاكو خطوبه ولا خطيبه 

فيان تباوعله ودموعها برعب همست بخوف حظنت نفسها متعوده الحنيه والدلال من عامر ... عموري  حباب فدواا لتحجي هيج والله دا تخوفني

عامر نزل لمستواها گللها بتهديد وتحذير ... من تسوين شي غلط متلگين غير هذه الگبالچ امشي رجعي يله

انطاها ظهره... وصله همسها وهيه تشاهق

رجعني لخالو لعد...

اندارلها وهو يعض شفته بقهر اتقدم الها گومها من زندها وانفجر بوجهها وعيونه بعيونها ...
سمعيني زين انه الچ وبس ما الچ احد غيري انه ابوج وامج وخالچ وحبيبچ وزوجج احفظيها... شبر ما اخليج تبعدين عني من هسع
 
لزم فكها ونزل عينها لشفايفها الترجف... أخذهم بين شفايفه بغصبيه
واديه لمتها اله بقوه... يريد يفرغ عصبيته بيها يريدها تحس بمشاعره القويه ولي يعانيه بسببها...

ابتعد عنها وهمس وهو يلهث...اخذ ايدها خلاها على ثدره مكان گلبه كلامج خله هذه يوج نار...
اذا فكرتي تبعدين عني ناري تحرگني وتحرگج...
عافها ودخل للحمام...

صاح الها... مو تطلعين هسع جايج
فيان ايدها على شفتها وجسمها يرجف خجلانه وخايفه هوايه احاسيس مجمعه بيها بهل لحظه...
ركضت طلعت ما تگدر تشوفه بعد الصار...
.....

الصبح گعدت قمر عيونها ورامه من البچي گوه نامت گعدت على هوسه بغرفتها ... صحصحت لگت سمر وفيان فاتحات كنتورها ويطلعن بلملابس...

قمر بنعاس وهيه تتثاوب... هاي شدا تسون

سمر وهيه تشمر فستان بيدها بلگاع... رجعي رجعي نامي نشوف بين خرگج شي البسه للحنه

قمر... لا بله

سمر باوعتلها ورجعت كملت... اي والله

فيان... شنو رايجن نروح اليوم سوا للسوگ اني طلبت بس مو كلش عاجبني

قمر... اني كل شي ما اندل هنا

سمر... والله عدجن امل هيه مو بس متندلن سهله، هو منو يخليجن تطلعن خصوصا اذا سلطان هنا...

قمر سمعت بيها سلطان وخرت الغطا وكالت بعناد... حظرن نفسچن ساعه ونروح

سمر... هووو هوو تحجين صدگ

قمر بثقه... كتلك حضري نفسك وبلا لغوه زايده ويله براا خلي احظر نفسي

فيان بضحكه... كلبه بس گدها

سمر وهيه تباوع لقمر الي گامت بنشاط... هااي تخوف ام البلاوي

قمر وهيه تدخل للحمام گلتلها بغرور ... ولج احترميني ترا ما اخليچ تروحين

سمر... شايفه اذا ما رحنه بلقران الاربعه واربعين ايبسه عليج

قمر وهيه لازمه الباب وتباوعلها بتحدي... حييل رجلج شكبرها بس مع ذلك ما اطلع قمر اذا ما رحنه او وحدنا

سمر وهيه فاكه عيونها على الاخر ...فيان ضربيها عجل من يمج يمكن بعدها نايمه وگامت تهلوس

قمر بثقه ...انجبي ترا ما اخذج ويانه

سمر بخوف ...ولج والله سلطان يموتنه اذا طلعنا بدون علمه وانوب وحدنا الله واكبر عليج ترديه يعلگ مشنقتنه

فيان بتراجع ... الولد ما اعرفه بس صراحه يخوف ما استبعد كلامج بعدين اني وصيت على بدله جاهزه ما اريد اروح

قمر وهيه تشجعهن وتريد يصير لبراسها ...لتصيرن جبانات خلي نطلع نتنفس نشوف الدنيا هو شعليه مانعنه من الطلعه وهو دايح اربعه وعشرين ساعه بعدين شيسويلنه اني ممسوله منه ولا اله سلطه عليه وانتي بنيه متزوجه ميگدر يحاجيج وانتي الثوله عمته

سمر وهيه تهز ايدها ...يا عمه هو اذا انتي بگد زري ومتحترميني تردين سلطان يحترمني

فيان وجنها اذكرت گالت بخوف من كلمه مزوجه وهيه تباوعلهن بصدمه... عزززه صدگ اني متزوجه

قمر صفنت بوجهها وهيه تخلي الخاولي على جتفها ...لا امي !! ولچ شهل فهاوه البيج...

سمر گامت تضحك... هو شموگع عمير غير فهاوتها باوعت لقمر وغمزتلها... خيه لو اگلج شصار البارحه

قمر وهيه تدري شتقصد تباوع لفيان الوجهها گلب الوان وتضحك ... عياره هاي راح يصيرلج شهر متزوجته ونايمين لوحدكم بغرفه وحده وهسه انصدمتي

سمر وهيه تلوي شفايفها تقلد العجايز... فضايح فضايح طلع عمير روميوو متخفي جوا شواربه...

ما احجيلج ولا تحجيلي الله يستر على بنواتنه رجعتلي البت غرگانه مي..

قمر وهيه ترفع حاجب وتضحك بخبث... لو تدري الشيخه

فيان وهيه خجلانه وممصدگه شلون عرفن بجيت عامر الها... احم
عادي شبيكم مصار شي بس اجه يگلي على شي

اي صح شغله كلش مهمه... 

فيان وهيه صدگ مصدومه ليگول هسه صحت ولتذكرت... بنات لا صدوگ احجي عابت

سمر تقلد عليها وتلزم بطنها... اوووي عاابت بنات صدوگ هسه اطلع حامل... اووي بنات راح اجيب واني ممصدگه متزوجه

فيان ضربتها بلمخده... عززه بعينج ياا اني حامل
سمر...
قمر وهيه شبعانه ضحك على سمر... شمرت الخاولي عليهن

حتى للحمام ما راح ادخل من وراجن وامري لله

سمر وهيه تلهث بعد ما وگفت شمر مخاد هيه وفيان... خو ما صدگتي هو انتي تتحسسين من المي اذا طخج

فيان طگتها ضحكه بصوت عالي هيه وقمر...

سمر  عاطت... عيني فيفي عبدو صوتج

منا عمال برا هسه ناخذ رزاله يله

قمر عوجت حلكها... شلون ما نضحك حرام من ورا المعقد ابن اخوج

سمر... راح تبدي رحمه الله سكتي البرنو البحلگج وفكري شلون نطلع

قمر طفرت من الجربايه  ... گومن وياي بسرعه قبل لا يطلع

فيان... منو هو

سمر بخبث... تقصدين سلطان موو

قمر شالت علبه الكلينس وبدون تفكير شمرتها على سمر وعاطت بيها...

هااي حتى لتجيبين اسمه گدامي

سمر گامت وهيه تفرگ ايدها ... الا اگله لعد واخلي يادبچ

قمر عضت شفتها... ليش تخليني اسبه من الصبح

قمر وجنها تذكرت رجعت گعدت... اگلج صدك شصار بيج انتي وفيصل

سمر سرحت شويه... اووف من فيصل وبلاويه خيه مراقبني من اطب واطلع الگاه ورايه وبلجامعه واگف بباب الجامعه ومنتجي على سيارته...
قمر... ما گلج شي

سمر... مو هو الكاتلني بس يباوع

قمر بضحكه... لازم تردين لمس بلموضوع

سمر  ... والله مو مال واحد يحجيلج الثوله اقصد فيصل جرئ اني اكثر وحده تعرفه سكوته يخوف

فيان بفضول وهيه مفاهمه شي... لحظه لحظه منو فيصل

قمر وهيه ترفع حواجبها... حبيب حبيب

سمر... مو اصيح ابن اخويه

فيان وهيه تسحبهن... اهوو دمشن اطفال انتن

......
نزلن وقمر وسمر مستمران يتناگرن وفيان تهدي بيهن

وگفتهن فيان يم الدرج... وهسه وين نتوجه

قمر واديها وحده على جتف فيان والثانيه سمر... تاشر لغرفه الشيخه...

نتوجه لرئاسه الوزراء...

سمر بخوف وهيه تريد ترجع... ولج ابويه موجود هسه اني اخاف

قمر لزمتها من بديها من ورا ورجعتها... تعال لج ماكو شرده نموت سوا لو نعيش سوا

سمر... الا هل موته الشيخ يتخبل اذا گاعد ويه امي واحد يزعجهم

فيان خافت وگالت بتراجع ... بنات عامر يمكن دگ عليه اشوفه واجي

قمر لزمتها الثانيه... تليفونج فوگ شنو رن على گلبج

سمر... هههههههه حلوه هاي الرنه

قمر... يله گدامي ام الاحساس قبل لا يبدون شغل والبيت يصير هوسه

فيان... هههههه وربي بيبي الشيخه تخوف

سمر... اوووي بيبي الشيخه هاي تقصدين امي وضحه والله لو تسمعج يمفلوكه

قمر بلا مبالاه... دمشن اني ادگها وافوت هسه شراح نقاطع قابل عجايز ويسولفون ترا منتهي الاكسباير من زمان ...

سمر شهگت وباوعت لفيان ... شايفه هل بنيه نص ساعه تربيه مماخذه...
فيان كلعاده طكتها بضحكه...

قمر... هسه انفضحنه صدگ

قمر  دكت الباب وسمر وفيان اذانهن على الباب وحده تدفع الثانيه...

اجاهن صوت نمر الخشن وهو يگول... ادخل

فيان وسمر دفعن قمر حتى تدخل قبلهن...

قمر همست الهن... الا اطيحه لحظجن بس اطلع

دخلت لگت الشيخ گاعد وبصفه الشيخه وگدامهم استكاين جاي وايده على جتفها وهو لابس وكاشخ وبشته بصف الشيخه ...

صباح الخير...

صبحج الله بلخير بنيتي اگربي هين... رد عليها الشيخ

الشيخه... هله يمه قميره حدري

الشيخ نمر باعتراض... اسمها الوضيحه ما ريد اسمع غير الوضيحي

قمر اتقدمت وگعدت گبالهم... وبگلبها تگول
شبيهن سونها جبهه...

الشيخه بغيره... هاا نمر هسع هيه صارت الوضيحي

نمر حظنها رغم كبر عمره بس بعد قوي... انتي الوضيحي البدلال 
وهل بت چنت متمنيها من الله كون تشبهج

يباوعلها ورجع باوع لوضحه... بلقران هل عيون تذكرني بوحده قبل نفس عيون الشاهينه الصوبتني تعرفيها

الشيخه غطت وجهها بفوطتها بخجل... نمر البت اسكت

الشيخ وهو يباوعلها لقمر ... شلونج بويه

الحمد لله جدو انته شلونك اخبارك امورك شغلك جدو عندي طلب يمك

قمر توترت من كلامهم وغزلهم  وهيه تكول بگلبها شبيه گمت اصرف حجي  شهل توتر واني اگول عجايز انه العجوز طلعت ...

نمر گام يضحك... على شكلها

وضحه گالت... قميره شمالچ لازمتج السكته

نمر... عوفي البت تحجي براحتها

قمر وهيه تعرف وضحه شكد تحب سبطان ومتنطي بي گامت يم نمر وشاورته...

احم جدو بذمتك تقبل عدنه عرس چبير وانته عازم شيوخ وناس معروفه واكيد راح يجون بناتهم لابسات احلى وارقى ملابس وحفيداتك مبهذلات محد يقبل ياخذنه للسوگ

نمر اندمج وياها وگلها بصوت ناصي... يخسون انتن بناات ال نمر شيخات البنات هسع اخلي سلطان ياخذجن واشترن اليعجبچن...

قمر... لااااا سلطان... احم اقصد الله يخليك النه جدو حبيبي بس گلنه اله ما قبل گال روحن لبسن اي شي عندي شغل...
كتله راح اگول للشيخ گال اذا كتيله امنعج من الطلعه وظل يحجي علينه...

نمر... الا اطيحو لحظو واخلي ياخذجن وهو الممنون

وضحه وهيه تباوعلها بنص عين... يمعثوره شتگولين لجدج

قمر وهيه مكيفه... هسه ارجعلج شيخه

رجعت تشلور جدها... لا جدو فدوه منريد منيته خلي ابو محمد يودينه

نمر... لاا بويه شلون ترحن وحدجن

قمر بتوسل باست خده ... حبيبي جدو حتى اذا تريد ناخذ امي ويانه

بهل لحظه انفتح الباب ودخلن منه فيان وسمر...

مرت لحظه صمت... وقمر حاصرتها الضحكه من منظرهن

قمر... جدو گلت بس اني اروح مو

سمر وفيان عاطن سوا... لا احنه احنه

نمر... روحن بويه بس مو تتاخرن واذا الولد ما عدهم شي خل ياخذوجن

قمر ابرائه... اي جدو تدلل

الشيخه... وين مولياات ولجن مطربگات

قمر وهيه تگوم وتلزم ايد البنات تريد تطلع قبل لا ينگلب عليهن الموضوع... جدو عود يگلج اودعناكم

اوگفن بويه گربن هيمن... وگفهن الشيخ وهو يمد ايده لجيبه
باگن هوا من سمعن اندارن... اخذن نفس من شافنه مادلهن فلوس

قمر باعتراض... لا جدو عدنا و

ولا حرف... اخذن

......
وصل حر اتلگاه سلطان والشيخ والولد...

الشيخ نمر... الله حيو ابو حرب حدر

نزل حر باوس الشيخ والولد...أتحيـاا ودوم شيخنا

سلطان بعد ما سلم... فوتي بويه جوا  للبنوات

فاتت نمارق للبيت...

بعد ما سولفو سلطان گال لحر يروح يرتاح...

حر قبل لا يطلع باوع لسلطان... ابو شاهين رايدك بموضوع

سلطان.. دروح ارتاح وجاي وراك انه

ودا عامر حر لبيت سلطان حتى يرتاح...

دخل ذياب على سلطان والشيخ... اگلك سلطان ابو محمد وين دازه لشغل

سلطان... لاا ما شايفه اليوم شرايد منه

ذياب... خابرني ابو الكراسي والميوزه جهز طلبنه واريده يجيبهن

قاطعهم الشيخ نمر... انه دازه ويه البنوات

سلطان باوع لجده... يا بنوات جدي

نمر... بنواتنا الوضحه وسمر ومرت عامر

سلطان اتخبل من سمع ... شلون تخليهن يطلعن وحدهن انه مو گايل محد تطلع بيهن

نمر وهو يرفع عوجيته بعصبيه... حسك لا يعلى علي يبن ناصر  عجل هيچ عندك نخوه ما خذتهن انته يلچبير حابسهن فصليات عندك وتهدد بيهن...

سلطان وهو ياكل بروحه كسرت كلمته يعرف هيه وراها وتگله هاي گدامك كسرت كلمتك بصريح العباره...

عافهم وطلع فاير... اتكاه عامر هستوه دخل
انطيتي لسويج...

عامر... شصاير سلطان

سلطان جر السويج  ... الخوانم ماخذات ابو محمد وطالعات ماكو زلم تلمهن

عامر ما افتهم... منو هنه

سلطان... وخر هسع جاي

خابر ابو محمد واخذ منه مكانهم...

وصلن للمول واشترن فساتين بقت بس قمر ممشتريه
وفيان خايفه لان طلعت بدون علم عامر وهو محذرها تدري بي ميقبل...
وسمر هم اطگطك لا سلطان يدري...

قمر وهيه ملت من زنهن... اذا هيج ترجفن منهم ليش خبصتني على الطلعه لعد

فيان... بس

قمر... لا بس ولا شي امشن وانجبن خل نتونس ونلحك نختار ملابس

سمر...صدگ هيه رزاله شراح يسوون قابل...

خابرت اريج تجينا لهنا حتى مو بس احنا كلها تلبس بلمشكله وتترزل

قمر... شكد جلبه

سمر بفخر... اعجبج

فيان... شوفن ذاك المحل امشي ندخل

شويه واجت اريج بقن يفترن...

اريج... قمر شوفي ذاك الفستان يطلع يخبل عليج

قمر... خلي ندخل نشوف
يحجن وقمر مو وياهن لاحظت شباب يلحگوهن من محل لمحل

قمر بدت تقلق شافتهم دخلو وراهن لنفس المحل ...بنات يله حاسبت بدون متقيس...
هستوهن طلعن اتقربو منهن كلش... بقو يذبون حجي لحد ما اتجرئو وكفو كبالهن...

ياابه تجوي هل قطعه...

قمر... تولي منا لا اخلي لبرجلي يطبع بوجهك

اويلي اسمع طلعت تخرمش

فيان بقت ترجف تخاف من هيج موقف...

قمر وهيه تسحبهن... امشن ذوله عارات

لك اسمع مو لسان عسل بلقران اووف
اريج... شكد ادبسزيه كاعدكم خوات

هيج حلوات ما عندي

قمر باعتله باشمئزاز... طيح الله حظك ياا زباله

رادت تمشي لزم علاكتها... وگفها

سمر عاطت... وخر منها حيوان

سلطان وصل خابرة عامر من عرف گاب ما خلاه سلطان ييجي يعرف بي ميلزم اعصابه...

بقه يدور عليهن... لحد ما شاف لمه لمح منها سمر تبجي

مشا الهن بسرعه... شاف الامن لازمين تلاث شباب

قمر بعصبيه ... اي نشتكي عليهم

قاطعها سلطان وهو يخزرها... شصاير

سمر وفيان... شهكن بخوف
واريج ختلت ورا البنات...
سلطان... احجن شصاير

قمر هيه خايفه بس حاولت تكون قويه وهيه متندمه لان شافها بهيج موقف گالت... ماكو شي  دا نتسوگ وذوله العارات ضايقونه واخذو نصيبهم...

سلطان اتجاهلها وباوع للامن الي عرفه اول مشافه... استاذ سلطان نعتذر ما جنه نعرف الجماعه تابعيلكم وهسع ناخذهم للقسم

سلطان گله بهدوء وهو يباوع للشباب... عوفهم

قمر باعتراض كالت... بس
رفع سلطان ايده... الها بمعنى سكتي
بعد ما راحو

سلطان باوع لقمر لزم ايدها... انه شگلت

قمر وهيه تتلفت... عوفني سلطان الناس منا

سلطان وهو يضغط على ايدها... خايفه من الناس بس ما خفتي مني حاسبه حساب للناس بس انه لا

سمر وهيه تمسح دموعها... سلطان والله مالها دخل احنه ردنه

سلطان... حسج ما اسمعو انتي اول تالي توكفين هل وگفه

قمر لزمت ايده اللازمتها تريد تبعده ... كتلك عوفتي جدي يدري ما الك حكم عليه انته

فيان... ما سوينه شي همه اجوي وقمر رزلتهم

سلطان وهو گوه لازم اعصابه... خويه سكتي لخاطر محمد حسابج ويه عامر

نتر ايده منها وهو يخزر قمر... امشن گدامي بلا نفس

طلعو اشر لابو محمد يقرب سيارته...
صعدن

رادت قمر تمشي... صاح بيها

گربي هين انتي...

قمر اندارتله ... شرايد

سلطان وهو يضغط على سنونه... صعدي بسيارتي

قمر شافته مو مال تجادله بهل وضع البنات رادن يعترضن غمزتلهن وابتسمت واشرتلهن روحن... صعدت بدون عناد

صعد وشغل سيارته...

مشاا بسرعه غمضت عينها بخوف بس متگدر تعترض...

تدري ينتظر منها حجايه حتى يفرغ بيها عصبيته... مستغربه من روحها شلون حفظته برغم هيه متطيقه وتكرهه بس هو اكثر شخص يشبهها...
شافته يضغط على الستيرن وفتح اول دگم من دشداشته وشمر شماغه علكشن الوره...

اخذت تفس وگالت بهدوء... احچي

سلطان ما چذب خبر عاط بيها... لچ وين تردين توصلين انتي احچي

قمر گالت بهدوء... ما اريد اوصل لشي لا متقربتلك ولا محاجيتك

سلطان... السم البعقلچ اعرفه واشكالج اعرفهن زين تردين تمشين البنوات بطريقچ

قمر باستهزاء ... مدام تعرفه لتدخل بيه لعد

سلطان بتهديد ... انسيها هاي لتخليني اخليج بعگلي

قمر باوعتله ورفعت حاجبها... هذه كله وبعدك ممخليني بعقلك اذا ممحجبه موجود ابويه يحاسبني ملابسي مو مثلكم هاي فيان مو مثلي ما سويت بيها مثلي... تگلي مرت عامر اني هم اخت عامر
مو اختك مو مرتك افتهمت هسه فشيلني من عقلك صعبه افتهمها صعبه...

وصلت ونزلت بهدوء باوعتله يباوع لگدام... عافته ودخلت

اول مدخلت اجنها البنات...

قمر تضحك... شبيجن ما بيه شي والله

دخلن اتعرفن على نمارق وضمنها للمجموعه... وبقن سهرانات الليل كله يشتغلن ويرتبن للحنه...
......

بدت حفله الحنه والبنات من الصبح يشتغلن قبل لا يجون المعازيم

التبديل صار بغرفه قمر لبست نمارق فستانها  وجانت وياها دعاء تساعدها... واجنهن بنات من الصالون يجهزوهن

دخلت سميه الهن... بنات اجوي الناس يله نزلن

قمر وهيه تكحل عيونها... كملنه ماما ثواني

سميه تباوعلهن... اللهم صل على محمد وآل محمد ولجن شطالعات
گالت بتحذير اقرن المعوذات قبل لا تنزلن

سمر... يولو انتي العروسه وينه ابو عامر عنج

سميه بخجل... سكتي ام لسان يله نزلن
بدت الحنه...
ونزلت العرايس على نغمه...

الليله حنته وباجر يزفونه...

شايف خير ومستاهلها... شايف خير ومستاهلها

ونشكر من عمها وابوها نشكر من گال اخذوها...

گعدن العرايس... وبدت الهوسات والصفگات
والبنات يوزعن على الخطار وسميه تشرف عليهن...

لحد ما شغلن ساجده وگامت وحده تسحب الثانيه للرگص...

لا يا هلي الظلام... ردو عليه
جيبولي ولفي عاد ماني خطيه...

وهنا گامت قمر ترگص... وعيونها مغمضه ويه كلمات الاغنيه

وكلها صافنه على رگصها حتى فيان وسمر الي گامت تصورها من گد ما  عجبها رگصها ..

والنسوان گامت تصفگ لرگصها وتهوس الها وكلها تسئل منين هل بت...

لحد مصار الليل وبدت حنه الشباب...
سمر اجت طايره...
ولجن بدو يلعبون چوبي... امشن عليجن الله خل نشوف

فيان وهيه حايره ببدلتها... قمر سمر ارد اشوف حبابات

صعدن وهنه يخلن طابوگات ويصعدن عليها لان الحايط عالي...
قمر اول مره تعيش هيج اجواء ومتعرف شلون يصير الچوبي مالتهم...

مروه... جعلني فداا هل رجوله

انتبهت قمر الها ولنظراتها وشافتها تباوع لسلطان الي لابس دشداشه سودا وشماغ ابيض منقط احمر  لافه لفه اول مره تشوفه مسويها عيونها مگدرت توخرهن منه  ...

لازم راس الچوبي وبيده سبحته وبصفه حر وبعدين عامر وذياب والباقين متعرفهم ...

ويلعبون چوبي على انغام...

لگعدلچ ع الدرب گعود حلوه يم عيون السود...

ويضحك ويفر بسبحته وهو يلاعب حر...

قمر شاورت سمر وهيه تباوع لمروه الي اليوم كله تخزرها... هاي شبيها سحلت نفسها
سمر بصوت ناصي... اووو ولچ هاي بت اخت جدي نمر وتصير  اخت اريج نصي صوتج شبه خطيبه سلطان تموت على سلطان انتبهيلها من تجي تلزك يم الشيخه عود شوفيني شلون شاطره...

چانت تتعارك ويه بنات المدرسه وتگلهن هذه حبيبي وخاطبني من جان ييجي ياخذني ويوصلها ويانه هو چان عادي وياها حتى اني عبالي راح يخطبها لان چانت تسولف ويا طول الطريق ...

وصدگ رادت تخطبها اله الشيخه وعجبتها لان صدك هيه شاطره من تحي تفر البيت فر وشكلها حلو بس اني من الله ما ابلعها ...

قمر تحجي وعينها على سلطان چان يضحك من واحد شاوره ... ليش ما خطبها لعد

سمر... جان ابغداد ومن رجع ما قبل اول مره يرفض شي للشيخه وبوكتها صارت مشكله بينهم وابويه طرد سلطان من البيت ورا شهور يله ابو عامر حلها بس من ما اعرف احس چان اكو شي چبير بينهم لان لول مره يسوون هيج بسلطان...

قمر باوعت لمروه من فوگ لجوه وشلون ما شالت عينها من سلطان وتتغزل بي عادي گدامهم ... يعني هو يحبها لو لا

سمر... ما اعرف سلطان غامض متعرفين منه شي بلحظه يفاجئج بشي ممتوقعته... بس هيه ما تزوجت لهسه واذا قرر سلطان يتزوج فماكو غيرها اتوقع لان الشيخه تحبها كلش

قمر باوعت لسلطان وهمست  ... الله يهني سعيد بسعيده

فيان دخلت بينهم... بشنو تتبسبسن

سمر... فيان عزن بعينج  نزلي راسج عامر كل ساع يرفع راسو يمكن شافج
صعدن للسطح...

اريج ... دحجي لبو الجوزي عود يعرف يلعب مال افشخو بحصوايه

مروه اتقربت بصف قمر حتى تشوف سلطان زين ودفعتها ...

قمر... عميه متشوفين

سمر فجا سكتت وهيه تباوع للي دخل... لزمت ايد قمر
عاطت اريج...
لچ عزاا سمر شوفي منو اجه ...

قمر... ولجن شكو

سمر بخفوت... هذه فيصل

اريج... بس لا يتكاون سلطان وياه

قمر وهيه تباوع لتغيير ملامح سلطان گالت... لتخافن مراح يصير شي

جوا سلطان اتخبل من شاف فيصل يتقدم الهم...
راد يروحله لزمه ابو حرب...
لزم شاربه... وگله بعشم وهو يشاوره

ابو شاهين لخاطري خلينا ننجمع علاقل بعرسي مثل قبل

سلطان وهو ميريد يخرب فرحه حر... لخاطرك ابو حرب بس ناحيتي مييجي

حر وهو يضحك... يدلل الشيخ

وصللهم فيصل وعيونه على سلطان الي دار وجهه اول مشافه  ...

السلام عليكم مبارك عليك ابو حرب 

حر شبكه وگله بصوت عالي ... يوم الالك وللعبلك جوبي للصبح

فيصل ابتسم وهو يباوع لسلطان ويعلي صوته بخبث... ان شاءالله گربت ابو حرب

........ ❤️

مساء الورد ...

مشتاقتلكم هوايه

بنوتاات تدرون الامتحانات اتاجلت فمنشرت يوم 16/5 وبعدها جان موعد المقابله واخذتلي كم يوم راحه وبلشت اليوم وياكم ... ونزلت على الانستا بلغتكم حتى لتگولون ♥️...

احبكم ❤️...