الربتج " حالك الاسوداد " الفصل الخمسون 50 - بقلم رهف علي

الربتج " حالك الاسوداد "

وعلى ضَفات الانهار وجَدتُ
أثارً لقلبي المُلتهب
ومازال يُلهب كُلما أشتدت الأعاصير
تاركً خَلفهُ كُتله مُلتهبة
مُطلق عليها " الحُطام المُدمر "
ولكن لما ؟!
لأن لكُل فعل رد فعل اقوه .

وما بين الحُب والحَرب
هُنالك الرَبتج

اذكُر تاريخ مُصادفتك البارت

سحبت نَفس بقوه احس واني عيوني ع المرايا اباوع ع نفسي و ع كُل السنين الي مرت بحياتي وشلون تعايش وعشت الحد هاي الثانية بالضبط واني اتنفس الهوى قبل ما تمر هاي السنين حرفيًا ما جنت
متوقعه نفسي راح اكدر اعيش الهذا اليوم من بعد
الالم والحرمان والتعب وكُل الي شفته وعانيته
بحياتي

عيوني الذبلانه من تعب التفكير والي ولا يوم مر واني نسيت اي حادثة عشتها رفعت ادية امشي
اصابعي بخصلات شعري الحد ما اوصل الاطرافة
واعيد الكرة مرتين وثلاث واني بالي شارد
الهذاك اليوم الي وصلني الهذا اليوم .

ثواني وحسيت أدين التفت حول خصري
وأتمركزت ع بطني ابتسمت بتوسع من عرفت هذن
أدين منو !

شُعاع :- توليبي
نارا :- حبيبي
شُعاع :- يلا نمشي مصطفى ينتظرنا جوة
نارا :- رديت بهدوء ، وين ؟
شُعاع :- نغير جو
نارا :- تمام انتظرني شوية، كملت ونزلنا سوة

نزلنا اني ويا وطلعنا لكينا مصطفى ينتظرنا
وعاقج حواجبه لان صارلنا فوك النص ساعه ينتظر ماكدر يحجي بس رفع ايده وسوه الي
بسيطة كتمت ضحكتي وصعدت ورى حرفيًا من اشوف هذا الإنسان ماعرف ليش يتغير مودي ويا الجو ويخليني اضحك ابسط حركة تخليني اضحك هوَ يسوق وشُعاع كعد بصفة

مد مصطفى ايدة وفتح المسجل وصار يقلب
إلى أن طلعت اغنية توقف خليت ايدي ع حلكي اضحك طلع اغنية ساجدة عبيد خاله وياخاله وشُعاع صارت عيونه بكصته عاط بي

شُعاع :- ماتستحي تشغل هيج اغاني لك

مصطفى :- انتَ كبرت وعجزت واحنا روحنا خضره شباب ومن حقنا
خاله ويا خاله خاله ويا خاله

راد مصطفى يزيد الصوت وشُعاع ضربه ع ايدة بقوه صار يقلب بمكانه إلى أن ثبت ع اغنية ثبت عليها وعلى الصوت بقينا اني ومصطفى صافنين
عليه بثول وهوَ يردد ويا كلماتها ومُنطلق وضاربنا بعُرض الحايط .

ولد حيدر ضوة العين
زلم عباس وحسين
يشكونك ترى اثنين
لون تنك بيها
صديقي الينصر الله
نظيفه نيتي ويا
يأمن بيه مكفاه
عكس خوه رفيجه
انا الكلي عدل دوم
انا الناصر المظلوم
ع الظالم الزقوم
انا السم ع ريجك

نارا :- مصطفى غمز الي من المرايا حتى اغلس
شويه صاح شُعاع

شُعاع :- اوكف هنا ولك شوية واجيكم مو تصيعون

نارا :- مصطفى كتم ضحكته ومسح ع راسه بهدوء

مصطفى :- يجرالك كبد

نارا :- باوع شُعاع ع مصطفى بنص عين ورجع باوع
عليه بتحذير ونزل سد الباب ورى اول ما مشى خطوتين انداريت ع طكه اصبع من مصطفى لكيت الضحكه شاكة حلكة ويطك اصبع ويهز ركبة

مصطفى:- لك هلا وهلا

نارا :- هههههههه يمه منك شناوي تسوي ضحكتك تخوف

مصطفى :- ناوي اكلبها ملهى الا ان يجي الحارمني من نومة عيني

نارا :- قبل لا يفتح اني فتحت جهازي جنت كاعده
ورى فتحت الكامره وصرت اصوره جان معزوفة
من صدك تسوي واهس الواحد يركص عليها
هو هم ما كال باطل شمر جهازة بحضنه و رفع الصوت عالي وصار يطك اصبع وياها ويصيح وياها ( اهااا اهاااا ) اني اصور وفحطانة من الضحك
ماحذنا الواهس وجان نلمح شُعاع اجة من بعيد
مصطفى من الخوف ع سريع طفى المسجل وكعد عاقل واني سديت التصوير وكعدت مثل البنت الحبابه .

انفتح الباب وصعد احنا ساكتين والسيارة هدوء
باوع علينا بنص عين شاك بينا

شُعاع :- اعترفوا شجنتوا تسوون

مصطفى رفع ادية اثنينهن مستسلم

مصطفى :- اي شي ما مسوين اصلاً جنت احجيلها
شلون بنوا الأهرامات وتعبوا عليهن

نارا :- اني بالكوه سادة حلكي حتى ما اضحك أنوب باوع عليه عود يريدني أأكد اله كلام مصطفى
سريع هزيت راسي ونطقت ، ودااعة هذيج الشجرة كلام مصطفى صحيح

صفك ايدة وهز راسة

شُعاع :- هاهي صدكتكم دام هذا يحجي ع الأهرامات وهاي تحلف بداعة الشجرة المسكينه

مصطفى :- الأهرامات ولا جلد مصطفى ينجلد اخي العزيز

شُعاع :- تأدب يول شكبرك لبكبرك متزوجين
وعندهم جهال

مصطفى :- شنسوي ياخويه غير احنا جيل التسعينات لا حظ لا زواج لا أطفال لا حب ماعرف المن عايشين لو الله يأخذنا احسن من هاي العيشه

شُعاع :- انجب لك ، تف ع هذا تفكيرك

مصطفى :- مشكور خوية هو انا شمحصل منك غير هاي التفلة الي تجي بنص الكصة محملة
اطنان من المسبة

شُعاع :- غصب عنك

نارا :- اني فحطانة من الضحك عليهم وهمَ بس يتناكرون احس حتى بطني صارت توجعني من الضحك من صدُك غيروا الي الجو للأحسن

من رجعنا للبيت واني احسن كان هم وانزاح عن. صدري رتبت الملابس وسبحت طلعت اني واسرح شعري لزمت الجهاز لكيت رسالة جايتتي من رهف
ماعرف شنو اوصفها هاي الانسانه صارت الي أكثر من اخت طول هاي الفترة واحنا ع تواصل
ابد ما انقطعنا من احجي وياها ما احس احجي ويا
شخص غريب عني لا احسها اخت الي
صدُك لو كالوا الاخوه مو بالدم اثبتت هذا الشي
فعلاً الأخوة مو بالدم اتمنى ما يفرقنا الزمن ولا
نبتعد عن بعض بسبب اي ظرف كان .

لكيتها دازتلي رسالة تسألني عن نفسي رديت
عليها وكلت الها راح ادزلج الفيديو مال مصطفى
الصورته، صدُك ودزيته الها هي فتحتها ضحكت كالت انشرة للبنات لو لا ؟ رديت عليها كلت
الها انشري صادف بوقتها بالليل نشرتة قريت التعليقات واني فحطانة من الضحك اضحك من كُل كلبي ع التعليقات
بعدني داضحك وجان يدخل عليه مصطفى كبسني
سألني

مصطفى : شدسوين ع منو تضحكين
نارا :- عليك ، كلتها وخليت ايدي ع حلكي اكتم الكلام بس شيفيد بعد حجيت الي ما ينحجي
هو تخوصر الي ويباوع عليه بتك عين ، هو يعرف بينا ناشرين عنه بس مايعرف ناشرين هذا الفيديو

حتى بوقتها اول ما نشرنا عنه جان صور نزلتهن رهف بحسابها التيك توك بيومها جان رمضان
وهو متابع حساب رهف وطلعن عنده كعد يقرأ
التعليقات وحده وحده ويهز بأيده يصيح

مصطفى :- نوووويره فاضحتني فضيحة بالتيك توك

واني اضحك وارجع ما اتوب اصور بيه وننشره
ماخذينا محتوى وهو متحملنا

رجعت اباوع عليه ديسألني ويريدني اجاوبة

مصطفى :- احجي شمصخمة احجي
نارا :- كل شي ما مصخمة
مصطفى :- ع شنو تضحكين وتكولين علية
نارا :- ع البنات يضحكن عليك يكولن يخاف من شُعاع
مصطفى :- ااااااي وشلون عرفن اخاف من اخوي الخوش رجال ؟؟؟؟؟
نارا :- ها مو مو
مصطفى :- احجي
نارا :- مو رهف نشرت الفيديو الي صورته لك اني

بعدني داحجي وهو سحب مني الجهاز ويباوع ع
الفيديو يباوع ويقرا التعليقات ويدردم عليه

مصطفى :- بوية رجال شكبرني شكدني اخاف من
اخوي !!! هوَ صدك اخاف منه ، اي غير احترمة
جا بالعباس هاي اذاني الي يحجن عليها يطيرها الي
اذا ما خفت منه الحك ينكَال بوية ينكَال خايف منجن انا واجذب .

نارا :- شمر الجهاز علية وطلع يهز بأيدة ويدردم
علية واني ميته ضحك هوَ صدُك البنات شكد
حششن ع اذانه لان كبار هنَ بالصوره طالعات كبار
وهوَ قاري التعليقات كل ما رهف تنشر فيديو
يطلع يمه ويقرا ومن غير جهة البنات هم من ينشرون بي من يطلع اكسبلور يصير يمة ويصيح
لج نويره هاج شوفي فاضحتني كدام الناس

♧♧♧♧♧

نارا :- شُعااااع شنو قصدك بالسوريات ماكو منهن ؟؟؟
سحب شفافه للداخل يحاول يكتم ضحكته بعدها رد عليه بصوت ضاحك

شُعاع :- شبيج جاي نقشمره حتى يتزوجها
نارا :- هااا كلت تقشمر عليه يعني ما قصدك غير شي ؟؟؟
شُعاع :- يابه هذا غركانه وغاط الراسه هو عاشكها ويكابر
كلت اقشمره بعدين شبيج انتِ هو اكو واحد يصح اله هيج عراقية مُزة ويدور غيرها

باوعت عليه بطرف عيني معاجبني كلامه وبوادر الغيره
واضحه عليه مصطفى واكف كدامنه ويضحك ع المناكره مالتنا

مصطفى :- هسه عوفج من الغيره ياامدام وكولي شوكت يشرف ولي العهد ؟؟

نارا :- ابتسمت واني اباوع ع بطني الي بدأت تكبر شويه رفعت راسي جاوبته ، بعد أشهر

مصطفى:- مايصير تقللين مو اريده يكبر بسرعه واطلعه وياي

بسُرعه شُعاع حجه من مكانه بغيض
شُعاع :- اذا انتَ زلمه مد ايدك عليه وطلعه وياك ماعليك بي انا اطلعه وشيل ايدك عنه شيطلع اذا صاع وياك
مصطفى :- افااا عليك خويه هاي انا هيج
شُعاع :- وأكثر يابه وأكثر

♧♧♧♧♧♧

نارا :- عنقاء، رهف ولج رجولتنا راح تروح من
ايدنا

عنقاء :- دخيلك ربي دخيلك ربي رجلي رجلي

رهف :- ارجولتجن اني شكو حاشراتني وياجن
انا فتاة سنكولة مرتاحة لا دخلني بحياه المتزوجات
ودوخة هل الراس

نارا :- شكد ادبسسزز انتِ هاي فوك ما تنضمين النا
كاعده تضحكين علينا

عنقاء :- وووولجن رجلي ررررجلي راح يأخذنا السورريات كالوا عليهن حلوات

نارا :- لج يطكن بالكاع يخبلن وهذا رجلي هسه
يروح وراحن ورجلج ع الواهس

جنه نحجي ع السوريات لان انضمت صديقة النا
سوريه وأخذت واحد من ولدنا وهمَ من نقذوها
وشافوها لو الزلم وانجلبت احنا صرنا بخبر كان واخواتها طابين طالعين يكركرون علينا ويضحكون ويعرفون كُلش زين نغار بس لا حياة لمن تنادي اخذوها علينا لزمة وشافونا نغار
وصاروا يضربون ع الوتر الحساس وهمَ
لا احساس ولا ضمير ورهف وياهم ع الواهس لا احساس ولا ضمير .

♧♧♧♧♧

جنت داكَلب بالجهاز وشفت الفيديو الي نشرنا
عابر المليون انصدمت عزه هسه شيخلصنا من مصطفى
رهف تضحك تكول يلا هسه صدُك انفضح وراح يوصل الفيديو الشُعاع وتضحك علينا سوه
جان مصطفى راجع هو وشُعاع سوه ماحجيت كلت
بعدين من يصير وحده افاتحة بموضوع فضيحتة

صدُك راح شُعاع يسبح ولزمت مصطفى سديت عليه
الطريق

مصطفى :- ها
نارا :- وعلي ماتوقعت الفيديو يطلع اكسبلور
مصطفى :- يافيديو شبيج
نارا :- الي نشرته رهف بحسابها التيك توك الي حجيت انتَ عليه الي مطلعينك تخاف من شعشعي
مصطفى :- اناااا اخوك ياشعيع صدك !!
نارا :- وداعة بولنت حتى عابر المليون

اباوع عليه صفك ايد بأيد وصاح

مصطفى :- فضحني المصكوعات فضيحه لا صايرة ولا دايرة خليتني علج فوك هذا يحجن عليه وينك يابه الحك ع ابنك راح يضيعنه هل بنيات الاثنين والاشهبات

نارا :- هوَ يندب حظه واني ميته ضحك ع كلامنا
واجانه عزرائيل دخل علينا مدرعم

شُعاع :- خير شبيكم صوتكم واصل وين وانتَ شبيك مثل الديج بس تعوعي

مصطفى :- خوية مرتك خلتني اعوعي

نارا :- جذاب شمسويه اني اله اصلاً وين يلكة مثلي
حبابه بس هو ماعرف شبي يمكن هرمونات

مصطفى :- ها خوية فصلتي عليه هسه أمري ال الله
هوَ هذا حظي وين نايم ماعرف الله المُعين .

عفتهم الوحدهم ونهزمت انفذ بريشاتي احسن ما
يرجعون عليه

جنت كاعده بالغرفة احجي ويا رهف سولفت الها وهي تصيح كله منج وجان يدخل شُعاع لكاني مبتسمة غلقته وشمرت الجهاز

جانت رهف دائما تكول الي ونصحتني نصيحة
ما انساها وتبقى بالي للموت بيومها كالت الي

" نارا اني اعتبرج وحده من اخواتي وماريد الج
المضره خليج بالج هاي النصيحة لا تحجين عني الشُعاع اي شي ولا اي تفصيل ولا تحجين عني بأستمرار ولا تحجين بأي بنت لزوجج وتحجين بأي تفصيل عنها ترى الشيطان شاطر وماتعرفين شنو يصير لا سامح الله ، والنقطة الثانية اذا جنت اني وياج بمكالمة وهو دخل غلقي الجهاز مني واهتمي بي
هوَ ترى الرجال ياخذها حجة عليج ويسوي مشاكل "

الهذا صح مرات ما أهتم بس مرات لا يجي كلامها
بالي يجبرني اسوي الي تكوله لان فعلا كلامها
صحيح .

تقرب مني

شُعاع :- شبي حبيبي مبتسم
نارا :- رفعت ايدي لمست وجهة وصرت بأبهامي
امسح ع خدة وعيوني بعيونه همست بصوت ناصي ،
تدري شنو شُعاع
شُعاع :- شنو حبيبي
نارا :- احس الله عوضني بيكم انتوا الي كم نفر موجودين بحياتي
عوضني بيك ومصطفى ورهف أكثر شي لان قريبين مني وعنقاء لُجين صح تواصلنا مو بقوه لان عندهن عوائل بس هم عوضني بيهن الي فقدته
مايرجع بس كأن الله جابكم الي حتى يكول الي
هذول عوض الج لسنين حياتج الجاية
وتعرف شنو الاكثر عوضني بي ؟؟
شُعاع :- شنو

نارا :- ابنا بولنت الي الله رسله النا هديه
ملاك صغير ينور حياتنا ينور حياتي اني بالذات

وتعرف بشنو عوضني ربي ؟

شُعاع :- شنو ؟

نارا :- بأخوات " اشهبات رهف " الي من صدُك اعتبرهن عائلة الية يسألن عني بدون مقابل
يحبني بدون مقابل يخافن علية بدون مقابل اذا غبت يفتقدني اذا اجيت يحبني واذا تعبت يواسني
كثر ما يحبني صرت احبهن أكثر من حبهن الي

جنت احجي واني ابجي ما حاسة ع نفسي
وهو مبتسم بوجهي رفع ادية ومسح الدموع من تحت عيوني سحب نفس كُلش قوي تقرب باسني من بين عيوني كُلش هوااااي باسني رجع باس عيوني وكل وحده اخذت حق الثانيه أكثر وأكثر
غرت حتى من عيوني لان باسهن هواي ويحبهن هواي
ابتعد ثواني ابتسم بتوسع ورجع بقرب باس وجناتي
بهدوء قاااتل كأن حتى ما يفزز روحي الهايمة
بحبه والسكانه بجوفي
شفايفة الناعمة تقربت ع شفافي بهدوء قبل لا يتلامسن ابتعد عني يباوع بعيوني

حجيت واني انفاسي ترجف بصوت ناصي
نارا :- احجي ، رد الي ببحة صوته الحلوة بالفصحى

شُعاع :
مَن أدابّ ﭑلاستمُاع ﭑلىٰ الأنثىٰ
أن تنصَت لعينَيۿا أولاً

شنو احجي شنو بوية تستحقين كل الي تحبي والي تريدي يكون بحياتج تستحقين ازيد وازيد ما اريد احجي واخرب هاي الفرحة الي انتِ بيها بس
ناري الكمر تستحق النجوم يدورن حولها

اسمعي هاي بوية شيصير بحالي من انتِ كدام عيني
رَجَف الفُؤاد أمام حِسنك مِثلما
رَجَفت بكف الثاملَين كُؤسُ .

نارا :- احس ماتحملت كل هذا الحب الي بصوته
وبعيونه همست بصوت راجف، شُعاع
شُعاع :- عيونه وروحة بوية
نارا :- عَوف الحِچي أحَضني .

سحبني من خصري وحضني بكُل قوته خليت راسي
ع كتفة واني هايمة كُلش هايمة بي
حسيت بأيدة نزلت ع خصري يمشي بأصبعة ع خصري قرب شفايفة من أذني همس بهدوء
- بوية آنة المستقيم ، بس يم خصرچ أميل أميل

كمية الحُب والاهتمام الي حسيته بهذا الوقت
فاق كُل احساسي بدون أدراك بدون ما احس
شفايفي الوحدهن نطق اله
- شُعاعي
أنَي ضَلوعي مُشتاقة لأديك كُلش
أبقى حَاضني هسه وبكُل وقت وأبد لَتعوفني .

حضني بكُل قوته يجاوبني بفعل لكلامي
هنا اثبتت النفسي ما راح الكه مثل هذا الإنسان
لا هسه ولا بعدين هذا العوض الي جنت
انتظرة من سنين طويلة اجاني وهو محمل اطنان من الحُب والمحبة الي لا يُمكن انها تنتهي الا بالموت.

شُعاع :- تمنيت الخير .. و جيتي انتِ .

♧♧♧♧♧♧♧♧♧♧♧

شلوونكم عزيزات كلبي كُلش مشتاقة الكم
وهذا بارت إضافي الكم هدية وكذلك بمُناسبة
صدور كتاب الربتج " حالك الاسوداد "

الجزء الثاني من القصة موجودة بالكتاب وانضموا الها شخصيات جديده والأحداث ناااااار وشررررارر
حرفيًا الجزء دمااار
حسابي الانستا هذا akyta_98
ودائما انزل عن الدار الي موجود بي الكتاب

اتمنى تكونون بخير وين ما كُنتم
و نلتقي مره اخرى ان شاء الله
" دمتوا بخير وسلامه ♡

.