الربتج " حالك الاسوداد " الفصل الثالث وثلاثون 33 - بقلم رهف علي

وَحُدِيَِ بِّضُلُمٌةِ لُيَلٍُ بّاكِيَاً الُمٌا
مٌنَ مٌا احْلّ بّقًلُبّيَ حُيَنَ فَرَْقًتُْها
كِأنَنَي فَيَ سِجْوَنِ الُظٌلُمِ مٌرَتُْهنٌ
وَالُدِمٌْعُ قًد غًادَرَتْ مِنَ حِجْرَ
مٌقًلُتُْها
تُْهيَجْ ذَكِرَى زُمٌانَيَ مٌنَ تْوَقًدُِها
فَيَ دِاٌخلُيَ فَتْذَيَبّ الُرَوَحُ شِْعلُتُْها
قًدِ فَارَقًتْنَيَ وَفَارَقًنَيَ الُسِلُى زُمٌنَا
حُتْى ُهدِتْنَيَ رَيَاضُ الُارَضُ مٌحُنَتُْها

هل بكيتُ يوماً من ألم قلبك ؟

°**************°

- نارا :- فتح عينه مصدوم من كلمتي
- شُعاع :-ليش نارا شنو الي صار ؟
- نارا :-خلاص شُعاع اني صار الي ٤ ايام افكر احنه لازم نترك بعض ' سكت صافن بوجهي
- شُعاع :- سويت الج ليش لان احبج !!!
- نارا :- ضغطت ع ايدي واحس كلبي يدك ، لا بس من اتزوجنا الحد هذا اليوم المشاكل بحياتك وماريد هذا يصير انتَ حتى ما اتهنيت بطلعتك من الموصل بعد كل هاي السنوات
- شُعاع :- نارا شنو تحجين انتِ الهنايه مالتي
- نارا :- الله يخليك لا تصعبها عليه أكثر ، احس بي يلوب واني أكثر الوب ويا نظراته نفسهن نظرات الي احس ويا بالأمان بس صرت اخاف رفع راسه سحب نفس ورجع يباوع
- شُعاع :- لج شبيج اني رايدج احبج تفهمين شنو احبج بس فهميني شنو الي صار حتى صرتي تكرهيني ليشششش

- نارا :- رفع ايده وشفت الساعه بأيده رجف كلبي وخفت
سحبت نفسي منه بمسافة شويه رديت عليه ، اريد اسولف وياك
- شُعاع :- شكد ما تريدين سولفي وشنو الي تريدي اني جاهز من عيني هاي قبل هاي
- نارا :- ماريد شي بس اكعد اني كعدت وهو واكف كدامي
سحب نفس بقوه وحط ايده ع فكه فركه بقوه ونزل ايده
حجه وياي بكلمات خلت كلبي يتعذب أكثر

- شُعاع :-
"وَلَيْتَ الّذي بَيْني وَبَيْنَكَ عَامِرٌ
وبيني وبينَ العالمينَ خرابُ
إذا صَحَّ منك الودّ فالكُلُّ هَيِّنٌ
وكُلُّ الذي فَوقَ التُّرابِ تُراب"

- نارا :- الغصه صارت بصدري الدموع ملت عيوني ويا كُل كلمه ينطقها ابتلعت ريقي بصعوبه الكلام الي اكوله اله صعب بس هذا الي لازم يصير النا احنه الاثنين ، شُعاع مايبقى سوه احنه .
- شُعاع :- اسألج بالله اليحب مو مايترك حبيبه بظروف صعبه مهما صار ويا لازم توكفين ويا وما تطلبين الطلاك
مو الشيخ كال بعقد الزواج في السراء والضراء وتوكفين بالضراء قبل السراء !؟؟
- نارا :- اي صح المفروض اوكف وياك مو عليك والمفروض اساعدك بس المشكله اني صرت العله شلون اساعدك
- شُعاع :- انتِ ما مسويه الي شي واني رايدج
-نارا :- بقيت صافنه عليه ، شُعاع
- شُعاع :- عيونه
- نارا :- الموصل شنو فلمك بيها !؟
- شُعاع :- كلت الج قبل صديق غدر بيه وانخطفت بقيت يمهم سنين وتعذبت هواي وابويه لان بالدوله يردون يسحبون منه فلوس ومكيفين بيه رادوا يدخلون البغداد عن طريق ابويه ومن ابويه ما وافق دزوا الج جثه شخص وابويه عباله اني و وقتها انجلط ومات واكو شخص ثاني مسؤول هم متعاون وياهم وكذلك ابو نوح ويا بوقت الي انسجن ابو نوح هو هذا المسؤول طلعه هربه لان يروح بيها اذا ابو نوح
انسجن ف حاول يهربه وحتى صاحب الشركه الي اني هسه صارت بأسمي هم جان مشترك وياهم
- نارا :- فتحت عيوني مصدومه ، ابو نوح وينه ؟؟؟
باوع عليه بنظرات غريبه هز راسه ورد بهدوء .

- شُعاع :- انعدم .

- نارا :- بقيت صافنه معقوله انعدم من بعد كُل الي سوه
الله أخذه وخلصنا منه سرت قشعريرة بجسمي اتذكرت كُل الي سوه بيه حسبي الله عليه وعليهم كُلهم

- شُعاع :- اما المسؤول انسجن
- نارا :- وابوك شعليه ؟ مارجعت انتَ الاهلك من زمان ؟
- شُعاع :- اني جنت متوقع ابويه متورط وياهم وبهذا الوقت ماجنت اعرف ابويه متوفي ماردت ارجع الا ما اطلع الحقيقه واكتشفها يلا ارجع
- نارا :- اكو شي سر بين زوجه ابوك وامك ؟
- شُعاع :- هنَ مايتوالمن شايفه شي يوم التوم وجيري صاروا صحبه !
- نارا :- لاا ، بس ليش احس بينهن شي أكبر
- شُعاع :- الوضع طبيعي
- نارا :- شُعاع انتَ وضعك ما عاجبني
- شُعاع :- شلون يعني ؟
- نارا :- يعني مو شُعاع القديم تصرفاتك تغيرت
- شُعاع :- يعني وفاه ابويه وصديقي ومنا اخويه وانتِ وكعاتج ماخلن عندي قوه واني بشر وفوك هذا هسه جايه تطلبين الطلاك !!!

- نارا :- شنو سر 75 !!!
- شُعاع :- ماكو شي ماكو سر
- نارا :- باوعت بعيونه ، احجي شبيك
- شُعاع :- شنو تريدين انتِ ؟؟؟
- نارا :- قويت نفسي ورديت عليه ، انطيني الساعه مالتك اشوفها ، هو سحب ايده وبعدها
- شُعاع :- لا
- نارا :- زين انطيني جهازك
- شُعاع :- لا
- نارا :- شفت !!! شلون تريدني اعيش وياك واثق بيك
شنو الي يضمن حياتي وياك وابوك بالدوله ما مسوي شي
- شُعاع :- نارا اني ابقى مدين عمري كله الج
- نارا :- عقد حاجبي مستغربه ، شلون ؟؟ اذا تقصد ع وكفاتي ويا مصطفى ترى عادي اعتبره اخويه
- شُعاع :- لا غير شي مو هاي
- نارا :- لعد شنو ؟؟؟؟
- شُعاع :- لا ماكو شي

- نارا :- ههههه صارن ٤
- شُعاع :- شنو هنَ
- نارا :- شغلات اتخلص منهن
- شُعاع :- هز راسه ، نارا انتِ بنت ملتزمه و الله وأهل البيت وكفوا وياج قويه وصامده والحد هذا الوقت انتِ هيج
ليش ابتعدتي عني بهاي السهوله وما وكفتي وياي
- نارا :- تحسرت بألم ، سامحني واقبل بعذري
- شُعاع :- صفن ثواني بعدها رفع راسه متحسر ، والله احبج لا تعبيني أكثر من ما اني هسه متعوب
- نارا :- سكتت اباوع عليه وهو يباوع عليه متأمل مني كلام يقوي ، بشرط !!!
- شُعاع :- عدل كعدته ، الي هوَ ؟

- نارا :- تنطيني ساعتك تبقى يمي
- شُعاع :- اي !
- نارا :- وتعوفني تقريبا اسبوعين
- شُعاع :- فتح عينه مصدوم ، نارا شتحجين انتِ تخبلتي
هاي صار الج كم يوم مو يمي تبهذلت بدونج حسي بيه
- نارا :- رجعت ظهري ع القنفه ، هذا شرطي بكيفك بعد
- شُعاع :- ماشي
- نارا :- شنو الماشي ؟؟؟ يباوع بعيوني بقله حيله
- شُعاع :- يعني ياخاتون الي تريدي يصير تأمرين
- نارا :- ابتسمت وخفيت ابتسامتي من شفته رفع ايده وفتح الساعه نزعها وحطها ع الميز كدامه رفع راسه الي
- شُعاع :- لا تلزميها إلى أن اطلع
- نارا :- هزيت راسي مستغربه ، ليش ؟
- شُعاع :- مثل ما كلت الج
- نارا :- تمام

وكف ع طوله كدامي واني كاعده بعدني تقرب مني واني
انثولت نزل راسه صار وجهة بوجهي بلعت ريقي وهو عيونه ماشالهن عني بدون ما يحجي شي تقرب حط راسه برقبتي سحب نفس بقوه وابتعد طلع هزيت راسي احس دخت من تصرفه عيني صارت ع الساعه ركضت عليها
مالزمتها اباوع عليها بس صوتها يبين تك تك ماعرف شلون يفهم عليها بيها حروف انكليزيه وأرقام حتى ماعرف شلون يعرف الوقت وكلها بلون الأسود واني مستمره اباوع عليها عليت صوتي .

- نارا :- وينج رقه
- رقه :- ها نارا
- نارا :- خلي نلبس ونروح لابو الساعات
- رقه :- صفنت ، وزوجج ماتكولين اله ؟
- نارا :- لا
- رقه :- تمام ، نلبس وننطي خبر الأمي
- نارا :- لبسنه وانطينا خبر االخااتي ام لُجين سحبت الساعه لفيتها وحطيتها بعلاكه وطلعنا العند احسن واحد
بالساعات هي تعرفه اول ما وصلنا دخلنا واني كلبي يدك
من بعد الكلام انطيته الساعه بأيده هو يباوع عليها هو سريع من لزمها حجه
- ايدي ثكَلت
- نارا :- اي ثقيله ، أريدك تفتحها وتشوفها ، حتى سعرها
ومن وين هاي الساعه وكُل شي اريد عنها
- تدللون اتفضلوا

كعدت اني ورقه ننتظر وهو يشوف بالساعه سحبت الكلنس مسح بي اديه عركت من التوتر واخاف لا شُعاع
ينتبه اني مو بالبيت ويجيني صاحب الساعات جان يخابر واخذ للساعه صوره رجع اتصل ع شخص ثاني ساعة تقريبا
اني ورقه كاعدات ننتظر إلى أن رفع راسه يحجي ويانه
كمنه من مكانه رحنه اله

- هاي الساعه ما موجوده هنا بس موجوده باالإمارات
تقريبا الشهر ١٢ تنزل بالعراق
- نارا :- اي شبيها ؟
- هي النوعيه غاليه ومبينه قديمه بيها فد ميل مو عدل يعني هاي الساعه بيها شي
- نارا :- درت وجهي ورجعت اباوع عليه ، يعني ؟
- ماعرف مجاي اكدر افتحها ، هي ماركه اصليه وغاليه
يطلع سعرها تقريبا ( .... )
- نارا :- صفنت عليه ماتوقعت سعرها يكون غالي بهاي الطريقه
- موجوده منها اصليه كم نسخه
- نارا :- صفنت افكر ، تشتريها !!
- طبعا لا
- نارا :- زين ماتكدر تفتحها
- لا ماكدر
- نارا :- تمام

طلعت من المحل من بعد ما اخذتها وردت ع رقه
ماعندج احد تعرفي ثقه ؟؟ شو هذا ما اثق بي
- رقه :- امشي نروح ع غيره
- نارا :- هزيت راسي ورحنه ع واحد ثاني وهم نفس الكلام
وماقبل يشتريها اخذتها وطلعت اني ورقه رجعنا للبيت
شمرت العباه وكعدت لزمت الجهاز واتصلت ع عمتي
من بعد السلام والكلام سألتها

- نارا :- عمه الساعه السوده الي يلبسها شُعاع من وين ؟
- ام شُعاع :- ماعرف ليش
- نارا :- زين ليش شُعاع يحبها
- ام شُعاع :- لان مال ابو ليش بنتي ؟
- نارا :- مارديت عليها رجعت سألتها ، ولو عمه اخاف تضوجين بس يعني ما تشكين بشخص مسوي شي يعني مثل سحر هيج شي
- ام شُعاع :- اي
- نارا :- اقاربكم ؟ ماردت ورفضت تكول شي مالحيت عليها تركتها ع راحتها وسديت الخط منها

- نارا :- صار العشه وسألت ام لُجين، خاله هم تعرفين
احد يعرف ياخذ خيره ؟
- ام لُجين :- اي اعرف ومضبوطه
- نارا :- زين تكدرين تاخذيني ؟
- ام لُجين :- اي عادي بس الباجر هسه ما اكدر
- نارا :- عادي ماكو مشكله .

تعشينا وغسلنا المواعين ورحت للغرفه كعدت بس افكر
التفكير اكل مخ راسي بقى بالي لازم افتح الجهاز مالته
واللابتوب لازم اعرف شنو وراهم حتى طلاكي تراجعت
عنه اريد الكه راس الخيط واشوف شنو يعني كل هذا الي
جاي يصير وليش كُل هذا الغموض الي ديصير ، الله وأهل البيت اكيد ما يعوفوني واكفين وياي حاولت انام حتى ارتاح وابطل تفكير فزيت من نومي

شفت كدامي ماما شهكت وصرت ابجي هي جانت نفس شكلها تباوع عليه وهي مهمومه احسها ما مطمئنه عني
سمعتها تكول الي " اهدئي بنتي " انفتح الباب وراها ودخلوا ٤ زلم سحبوها من اديها واخذوها وياهم اني وكفت
اركض وراها اصرخ وابجي احاول اخلصها من بين اديهم
بس ماكدرت ، فزيت من نومي لكيت البنات فوك راسي
اني عركانه واتنفس بقوه وهن يحاولن يخلني أهدأ ماتحملت نزلت راسي وصرت ابجي سمعت صوت الله اكبر صار بأذن انتبهت أذن كمت من عندهن بعدت عنهن
رحت توضيت واني دموعي تنزل و وكفت اصلي مهمومه
وكلبي يريد يطلع من الالم الي احس بي رفعت ايدي ادعي .

ياحيُّ يا قيُّومُ، برَحمتِكَ أستَغيثُ، أصلِح لي شأني كُلَّهُ، ولا تَكِلني إلى نَفسي طرفةَ عينٍ اللَّهمَّ لا سَهْلَ إلَّا ما جعَلْتَه سَهلًا وأنتَ تجعَلُ الحَزْنَ سَهلًا إذا شِئْتَ اللهمَّ مالكَ الملكِ تُؤتي الملكَ مَن تشاءُ، وتنزعُ الملكَ ممن تشاءُ، وتُعِزُّ مَن تشاءُ، وتذِلُّ مَن تشاءُ، بيدِك الخيرُ إنك على كلِّ شيءٍ قديرٌ. رحمنُ الدنيا والآخرةِ ورحيمُهما، تعطيهما من تشاءُ، وتمنعُ منهما من تشاءُ، ارحمْني رحمةً تُغنيني بها عن رحمةِ مَن سواك ، بعزتك ورحمتك وجلالتك .

سجدت اني وساجده بجيت بجي ما صاير بقيت هوااي
ساجده كان حسيت براحه حيل جبيره بهذا المكان والأمان
كمت كملت الصلاه سحبت القرآن وكعدت اقرا .
اني واقرا رجعت ذاكرتي السنه ٢٠١٠ بالضبط

دخلت الغرفه امي لكيتها تبجي استغربت منها
- شبيج ماما ؟
- مابيه شي حبيبتي شويه تعب
- زين هذا مو وقت الصلاه ليش تصلين وشبيج ؟
- استنجد بصاحب الزمان لعله يسمع النداء
- شنو يعني مافهمت ؟
- يعني هسه انتِ لو ردتي حاجه من شخص مو تروحين تطلبيها منه
- اي !
- ف نفس الشي اني اطلبها من صاحب الزمان يابنتي اخذيها نصيحه بحياتج لا تطلبين او تستنجدين بشخص
هاي الناس مو كلها تكدر تكون الج ظهر وسند دوم شدي
نفسج ب الله وأهل البيت سواء بصحه او المرض ، مشكله وغيرها
- زين الله يختبر الانسان بشي يحبه ؟
- اي اكيد بكُل شي يختبره ، اني اسألج من تدرسين شلون نعرفج درستي غير من النتيجه ، كذلك رب العالمين
مو تكولين احبه وانتِ ع طريقه وطريق النبي محمد هو يعرفج بس يريد يثبت هذا الشي
- ماما يعني حتى بالموت ؟
- اي حتى بالموت ، الموت اختبار للناس وذكر الله بكتابه مكتوب الكُل شخص " كُلُّ نَفْسٍ ذَائِقَةُ الْمَوْتِ " يعني كُل شخص يموت

- شنو صلاه الاستنجاد؟
- بفاطمه الزهراء عليها السلام بأم البنين بصاحب الزمان
-يعني شلون ؟
- يعني تصلين ركعتين مثل صلاه الفجر توكفين تحت السماء وتدعين
سَلامُ الله الكامِلُ التَّامُّ الشَّامِلُ العامُّ وَصَلَواتُهُ الدَّائِمَةُ وَبَرَكاتُهُ القائِمَةُ التَّامَّةُ عَلى حُجَّةِ الله وَوَليِّهِ في أرضِهِ وَبِلادِهِ وَخَليفَتِهِ عَلى خَلقِهِ وَعِبادِهِ وَسُلالَةِ النُّبوَّةِ وَبَقيَّةِ العِترَةِ وَالصَّفوَةِ، صاحِبِ الزَّمانِ وَمُظهِرِ الايمانِ وَمُلَقِّنِ أحكامِ القُرآنِ وَمُطَهِّرِ الأرضِ وَناشِرِ العَدلِ في الطّولِ وَالعَرضِ، وَالحُجَّةِ القائِم المَهديِّ الإمام المُنتَظَرِ المَرضيِّ وَابنِ الأئِمَّةِ الطَّاهِرينَ الوَصيِّ بنِ الأوصياءِ المَرضيّينَ الهادي المَعصومِ بنِ الأئِمَّةِ الهُداةِ المَعصومينَ ..... )
إلى النهاية وسأل ماتقضي من حاجه وان شاء الله مقضيه

- حتى لو الانسان عاصي ؟
- بنيتي الانسان ما معصوم عن الخطأ ، اهل البيت لو تقرين ادعيتهم كلها مناجاة إلى رب العالمين وهمَ اهل البيت ف ما بالج بالانسان الي مثلي ومثلج
- زين ماما شلون أقرب من رب العالمين
- تقربي منه بالصلاه والصوم والعباده تقربي منه واكثري من الدعاء بحب اهل البيت بطيبه قلب بصدق وأخلاص
كوني انتِ لاتكونين غيرج

فزيت من موجه الذكريات الي اجتاحتني ع صوت رقه
، رفعت راسي الها مبتسمه مجرد ما رجعت بالذكريات
السابقه حسيت بشعور حيل حلو لان مفتقده هيج أجواء
خاصه مفتقده امي وحنيتها وكلامها الي يريح النفس

- رقه :- شبيج صافنه حبيبتي
- نارا :- لا هيج جنت افكر
- رقه :- باعي الساعات الماركه عادي تكون اسعارهن هيج غاليه خاصه من الإمارات
- نارا :- عادي ما يهمني ، رقه معقوله تنقلب الأحداث واني وشُعاع نفترق وابتعد عنه ؟؟؟
- رقه :- اسم الله شبيج شُعاع يحبج ويريدج بس الي صار مو قليل وبعدكم ما متعودين وشفتي شلون المشاكل وراكم
واني الي اشوفه لازم توكفين ويا الباجر روحي ويا ماما
الام الخيره وشوفي الوضع
- نارا :- اريد اروح الموسى الكاظم ( عليه السلام )
- رقه :- حبيبتي مايصير تطلعين بدون مايعرف هسه طلعتي بدون مايعرف حرام وانتِ ع ذمه رجال ع الاقل بهاي الطلعه محتاجه آلها انتِ وضروريه
- نارا :- انطيني الجهاز ، هي انطتني الجهاز عبالي نايم لو يتأخر بالرد بس سريع رد ع رسالتي الي دزيتها

- شُعاع :- ها بابا ها ياروحي ها ياعمري
- نارا :- ابتسمت واتصلت عليه ، عادي اطلع
- شُعاع :- وين ؟
- نارا :- الموسى الكاظم و الصديقه رقه
- شُعاع :- صديقه رقه وين صايره
- نارا :- قريبه عليهم ، ها واليوم طلعت للكوزمتك ، هو اني كلت هيج صار عصبي
- شُعاع :- ليش ما كلتي الي ؟
- نارا :- صارت طلعه سريعه ونسيت انطيك خبر واني منا مخنوكه نسيت
- شُعاع :- تمام ناطيج الصلاحيه ويم ماتروحين روحي بس ذمه بركبتج اذا العباه ذبيتيها لو شي
- نارا :- هههههه اكيد لا مُستحيل قبل لا انتَ تحجي اني ما اسويها
- شُعاع :- فديتج ال....
- نارا :- راد يكمل سديت الجهاز بوجهة وهو دزلي رساله
- شُعاع :- عاد خليني أكملها ليش سديتي بوجهي
- نارا :- رجعت دزيتله ، لا هيج احسن يلا باي

بقى يدز رسائل واني سديت الجهاز مارديت عليه
- نارا :- اني راح انام
- رقه :- باعي قبل لا تنامين اكعدي اقري دعاء العهد
- نارا :- اي اعرفه
- رقه :- استمري عليه كل فجر اقري
- نارا :- ليش ؟
- رقه :- تصيرين قريبه من الامام الحجه ورى الصلاه الفجر اقري
- نارا :- تمام انطيني مفاتيح الجنان ، هي انطتني الكتاب واني كعدت اقرا دعاء العهد حسيت براحه حيل جبيره
بعدها نمت .

اني ونايمه تقريبا الساعه ٦ الصبح اندفر الباب
ودخلوا زلم فزيت اني والبنات نصرخ شفتهم تقربوا مني
اني رجعت ورى خايفه ومرعوبه من شكلهم صار بصفي بلمح البصر واحد منهم مد ايده وسحبني من شعري صرخت متألمه حسيتهم كأنهم نفس الأشخاص اي نفسهم داعش لزمت ايده الي لازمني بيها احاول أفلت نفسي منه بس ماكدرت صاح بصوت عالي
" اذبحهااااا هناااااا اذبحهااااااا " صرخت بصوت عالي

ماحسيت الا صوت رقه تكعد بيه كعدت اباوع ع نفسي
اني وين يعني جنت بالحلم دخيلك ربي ليش هيج أحلامي
- رقه :- بسس فهمنيي شبيج اليوم
- نارا :- شو وخري خلي اروح اغسل ، وكفت ع طولي ارجف رحت للمطبخ فتحت المي اغسل اباوع احس بيه دم رجعت اغسل واغسل مايوكع مني الدم رجعت اغسل بقوه
- رقه :- شبيج هيج تغسلين
- نارا :- دم دم هذا دم مايطلع مني
- رقه :- صفنت ، وينه ماكو دم ناارا
- نارا :- احس اديه بيهن تراب رجعت غسلتهن اني وصافنه شمرت مي ع وجهي شربت مي وكعدت بالمطبخ
اقرا المعوذات الشباك مفتوح والهوى يروح منا ومنا
رفعت راسي الرقه " روحي نامي " اني وكاعده ع الكرسي
صارت الأفكار تجيني بقيت اهز برجلي مشتاقه الاهلي كلش
رجعت اهز برجلي بقوه وكعت دمعه من عيني مسحتها بقوه لااا ما ابجي ما ابجي اهز برجلي واردد بيني وبين نفسي ادندن

بحضن دافي عشت
وتيهت جراحي بطلقه الموت
اخ يا بويه ولاجن روحــي مرتاحه
ولا جن هذا الگلب يرتاح
ولا جن انا لفاركت هذاك عـلـي الراح
ولا جن هذا الجسد يرتاح
اااااخ يا سوالف امي وشيلت عطرها
ويا طواريك من الخنكه تجيني
يا اعز طينه على گلبي
احسك روح گلبي وانتَ روحك غاددددد
ولاجني كبرت ولا جني بعمر ذاك
ولاجن روحــي كبرت ولا جني عشت
يابعد دمعاتك لوكعن ويابعد غمضت عيونك
ويا بعد شوغت الطلقات
ويا بعد سكراتك هذيج يابعد
روحتك لما منها رجعه
الدار اخلاف اهلها ما هو بيها
شلي بيه وابوي ماهو بيهة
شبه طفله لمضيعه ماهو ابوهاا
ماهو بيها تحسد كل طفل بحضان ابيه .

طلعت برى اباوع للسماء اتنفس بقوه واتذكر كعداتي اني وأهلي، اخواتي اخواني امي ابوي سحبت نفس بقيت شويه بعدين رجعت للمطبخ بقيت كاعده الحد ٩ سمعت صوت طكطكه غسلت وجهي ورجعت كعدت ودخلت ام لُجين

- ام لُجين :- ها ماما حبيبتي ليش كاعده من وقت
- نارا :- لا بس فزيت من النوم شبعانه ، هي تباوع ع وجهي احمر ماحجت ، راح اسوي ريوك
- ام لُجين :- بكيفج
- نارا :- سويت الريوك وكعدن البنات سوه نتريك
- ام لُجين :- شصاير وياج ما ارتاحيتي بحياتج
- نارا :- رفعت راسي اباوع عليها ،الحمدلله ع كل حال ، كملت ريوك ، ها خاله نروح ؟
- ام لُجين :- يلا نروح

كمت جهزت نفسي ودزيت رساله الشُعاع ابلغه بيها وطلعت وياها بقيت اردد بكلبي ادعيه واصلي ع الرسول كلبي خايف بس الي ارادتي اقوه إلى أن وصلنا للبيت
- نارا :- خايفه
- ام لُجين :- حبيبتي صفي نيتج وتوكلي ع الله
- نارا :- هزيت راسي وهي دكت الباب، انفتح طلعت مرأة لابسه شيله بيضه وبرقبتها سبحه زركه ولابسه محبس ازرك وثوبها أخضر وبي اسود
- هلا بيكم اتفضلوا
- نارا :- دخلنا للبيت هو صغير مبين مغسول جديد حتى ريحه الزاهي بعدها بي دخلنا جوه وكعدنا اباوع مكتبه بيها مجموعه قرآن وكُلش جبيره ، هي راحت جابت النا مي وجاي وكعدت كدامنا

- اتفضلي ام لُجين شنو الي عندج
- ام لُجين :- عيوني هاي تصير بنت اختي واجينا الج علمود زوجها شويه متغير عليها وماعرف شبي وياها
- خير ان شاء الله
- نارا :- كامت جابت قرآن ورجعت كعدت اخذت اسم شُعاع وأمه واسمي واسم امي وفتحت القرآن اباوع عليها ابتسمت رفعت راسها تباوع عليه مبتسمه ورجعت تقرأ
ردتت
- اللهم صل على محمد وآل محمد ، ايه النور بوجهج حبيبتي
- نارا :- هاا !! اني احس عركت اول مره اجي هنا واجرب
اخذت كلنس ومسحت بي وجهي
- اهدئي بنتي
- نارا :- اني صرت حمره
- اللهم صل على محمد وآل محمد
- نارا :- كملي خاله
- انتِ مبروكه بنتي والله وأهل البيت وكفوا وياج بس اهل زوجج شنو تعرفين عنهم ؟
- نارا :- يعني همَ ناس عادييّن
- بنتي اكو سحر وهذا السحر من رجال مسوي وهذا سحر
صبي ع قذاره
- نارا :- رجف كلبي ، شنو يعني ؟
- هذا سحر حيل قوي وقاتلين ناس أبرياء
- نارا :- فتحت عيني مصدومه ، شنووو منو القاتل !!!
- ماعرف بس هاي العائله قاتله ناس أبرياء
- نارا :- يعني يعني همَ من داعش !!؟
- لا بس اكو وحده كبيره بالعمر مبروكه الوحيده الي واكفه عليها العائله وماصاير آلها اي شي

- نارا :- بس مدافهم
- هذا سحر قديم من زلمه و واحد من العائله راح يتخبل او من المحتمل يموت او ميت
- نارا :- صفنت ، ابوهم ميت
- شنو يشتغل ؟
- بالدوله ، هي ضحكت
- اهدئي يمكن مو هوَ
- نارا :- زين شنو الي يثبت كلامج صحيح
- واحد بالعائلة جاي يتعب بسبب الي جاي يصير
- نارا :- زوجي !!!!
- باعي بنتي زوجج شوكت اخر مره تقرب الج
- نارا :- باوعت عليها شنو هذا السؤال
- جاوبيني لا تخجلين
- نارا :- من فتره طويله
- هو الي ما يتقرب ؟
- نارا :- اي أحيانآ هو ما يتقرب الي
- شنو السبب ؟
- نارا :- صار كلام بينه وبين الدكتوره بخصوص حالتي وهو يمشي عليه ، ماكلتي منو هذا الزلمه
- ماعرف بس هيج اكدر اكوله الج
- نارا :- سكتت وهي صارت تسولف ويا ام لُجين بعدين طلعنا .

- نارا :- خاله اني ما اثق بكلامها شنو سحر صبي شنو زلمه !!! شنو قاتلين ناس أبرياء !!!
- ام لُجين :- زين اخذج الوحده ثانيه ؟
- نارا :- اي اخذيني .
عاد هي اخذتني الوحده ثانيه دكينا الباب ودخلنا رادت تقدم النا جاي بس ما ردنا لان شربنا قبل شويه بس أصرت اتجيب النا كهوه هي جابت النا الكهوه اني شربت منها من كملت سحبت الفنجان وقلبته، صفنت مستغربه ، شنو مو بالقرآن تاخذين ؟؟؟؟
- لا حبيبتي بالفنجان .
شالت الفنجان وصارت تقرأ اليه ،
- حبيبتي انتِ طير ، مثل الملاك ديطلع يمي اكو شخص قريب مسوي سحر وهذا السحر قالب عليه لو علمود رجعه شي او شخص
- نارا :- شلون يعني ؟
- هذا السحر اذا مو علمود شغل مسوي ف مسوي علمود رجعه شخص وهذا السحر اسود قالب عليه وعنده اثنين نسوان وحده مبروكه و وحده لا
- نارا :- انصدمت من كلامها بي تطابق من الأولى وبي معلومات عنه ماحجيتهن الها ، سألتها ، هم قاتلين ؟
- لا بس اشوف وحده برقبتها واحد أو عائله برقبها
-نارا :- شلون يعني ؟
- ماعرف

اني بقيت انكز بداخلي شلون بيه عاد اخر شي سحبت خالتي وطلعت من عندها وهم احس دخلت بدوامه اكبر
رجعنا للبيت مختنكه صعدت ركض للغرفه شمرت الشال وبقيت كاعده صافنه شنو الي جاي يصير ياربي رجعت نزلت الخالتي وطلبت منها نروح للكاظم كالت ورى العشه بس اني اصريت بهذا الوقت حتى نوصل ويا العشه
وهي مل اعترضت ، رحت سبحت وغيرت لبسي ولبست العباه ، اتصلت ع شُعاع بلغته راح نطلع اصر هو يجي يوصلنا بس اني رفضت وهو ماحجه تركني ع راحتي
سديت من الجهاز وطلعنا وصلنا للكاظم نزلنا ع الجسر وبقينا نمشي احس اختنكت وصلنا للامام ودخلنا واني فد مره اختنكت اول ما لزمت الشباك بجيت بتعب عن كُل الي بداخلي فرغت كُل الي بداخلي ودعيت بعدين طلعنا كعدنا بالصحن شويه ورجعت دخلت بس طلبت يتركني الوحدي

رجعت دخلت يم الشباك لزمته ابجي واشهك واحجي بصوت شوي يبين واضح للبصفي يوكف احجي عن الي صار والي امر بي "لا تخليني اطلع واني ما محلوله سالفتي " رفعت راسي لكيت رقه يمي تبجي عليه
باوعت عليه كلبي احسه مكسور هي تقربت مني حضنتني تهدأ بيه واني ابجي بحضنها بعدها طلعنا بس دعيت من كل كلبي اريد ارتاح اريد اخلص من الي فوك اكتافي ، طلعنا بعد ما زرنا و دخلنا المطعم ماكدرت اكل بس جاملتهن مابيه حيل تعبانه من خلصنا رجعنا للبيت
رجعت تعبانه بس غسلت شمرت روحي ع الفراش نمت .

كعدت ألصبح بس تركت حجيت ويا خالتي
- نارا :- خاله راح اتصل ع شُعاع يجي ياخذني
- ام لُجين :- شنو ليش ؟
- نارا :- احسن هيج
- ام لُجين :- براحتج حبيبتي وهذا البيت بيتج
- نارا :- فدوه العمرج
سحبت الجهاز واتصلت ع شُعاع بلغته يجي ياخذني
رد عليه بلهفة " بس البس واجيج ما أطول "
وصدُك كاعده اني احجي ويا البنات و ما اسمع الا صوت السياره ويزمر هرج الدنيا برى هن يضحكن واني اضحك ع خباله عرفته هذا شُعاع لبست وعدلت نفسي اخذت الساعه وطلعت وأم لُجين وياي صار بوجهي مبتسم بوجهي فرحان هوااي والفرحه مرسومه ع وجهة
ع فرحته اني ابتسمت سلم ع خالتي بدون ما احجي هو الي حجه بفرحه عارمه .

- شُعاع :- حبيبي اشتريت بيت بصف بيت الشذام وعنقاء
- نارا :- احس الفرحه ترست روحي بس مابينتها، هزيت راسي مبتسمه ، شُعاع أخذني البيت زوجه ابوك الأولى
- شُعاع :- عقد حاجبه مستغرب ، شنو ؟
- نارا :- حباب اذا عندي خاطر يمك
- شُعاع :- خاطرج ع عيني وراسي بس شنو السبب
- نارا :- هيج اسلم عليها
- شُعاع :- تمام بس مو هسه
- نارا :- لا هسه ، بقى يباوع عليه زفر نفس وجاوبني
- شُعاع :- بعيوني حبيبي

- نارا :- شافني افرك بأديه وحده بالثانيه مد ايده سحب ايدي بين اديه وباسني
- شُعاع :- اني اسف ع كل شي سويته او حاولت أاذيج
واسف إذا فكرت أذيج ، اني حيل احبج وما عندي غيرج وشكرا لان وكفتي وياي وما تركتيني وراح ترجعين وياي
- نارا :- اللهفة الي بعيونه خلتني اتفاعل ويا واعبر عن الي بداخلي اله ، ابتسمت بوجهة رفعت ايده بستها ،
واني هم احبك وما اكدر اتخلى عنك ، ابتسم بفرحه
ومشينا .

وصلنا للبيت زوجه ابو الثانيه نزلت اباوع البيت جبير اكبر من بيت ام شُعاع وحيل حلووو فزيت ع صوت شُعاع

- شُعاع :- وين ساعتي ؟
- نارا :- بالسياره ، شو هذا خزرني ، شبيك ؟
- شُعاع :- لا ما بيه امشي ندخل
- نارا :- دك الجرس مال البيت وطلع النا اخو فتح الباب
مصدوم يصيح دخلوووا ، دخلنا جوه للصاله صارت بوجهنا اخته شافتني اجتي تركض سلمت علينا فرحانه بينه
كُلهم انجمعوا سوه البنات و الولد يرحبون بينه حجه شُعاع
- شُعاع :- نارا اشتاقت الكم وجبتها
- نارا :- احس بيهم مصدومين شُعاع تركني يمهم وكام
- شُعاع :- عندي شغل اني بالليل اجي
- نارا :- طلع من بعد ما سلم عليهم واني بقيت يم البنات
طلبت منهم احجي ويا خالتي الوحدي وهن ماحجن شي
طلعن بقيت اني وياها الوحدنا وهي مستغربه

- نارا :- خاله احسبيني وحده من بناتج شايفه من تنقذين
شخص !
- ام شيت :- خير يمه صاير شي !!
- نارا :- اسمعيني خاله شايفه من تدخلين خير بين شخص هو وزوجته وهمَ ع وشك انفصال شكد بيها الج اجر
- ام شيت :- اي يمه
- نارا :- ساعديني خاله اعتبريني بنتج وبنتج من تحجي الج الي راح اسولفه مو راح تساعديها
- ام شيت :- اكيد وبكُل رحابه صدر
- نارا :- زين اني راح اسألج وجاوبيني بصدق
- ام شيت :- يمه نارا خوفتيني شنو صاير
- نارا :- تقربت عليها ، ساعه ابو شُعاع من وين ؟
- ام شيت :- من الإمارات
- نارا :- وشبيها ؟
- ام شيت :- مابيها شي
- نارا :- مسوين سحر !!!! هي انصدمت بقت صافنه
- ام شيت :- شنوووو !!!!
- نارا :- اكو سحر ب بيت ام شُعاع والي مسوي رجال
- ام شيت :- شعرفج ؟؟؟
- نارا :- اباوع عليها صارت صفره ، صارحيني خاله وعد شرف مني اكون اني المساعده ما اخرب ، فدوه العينج
هسه هنا الزميني واذبحيني ، شنو تريدين سوي بيه بس سحرر لاااا اخاف منه ، شوفي شنو صار بيه بهل ايام ،
حجيت الها كُل الي صار وياي اني وشُعاع
- ام شيت :- اسم الله

- نارا :- اسألج الساعه ليش هيج اهتزت ؟
- ام شيت :- هي هيج من زمان بس ابو شُعاع ما جان يخليني الزمها
- نارا :- والسحر ؟؟؟؟ شو هيَ صارت تحلف بيه حلفان
يكسر الظهر حتى ما احجي يلا حجت الي .

- ام شيت :- :- اسمعي ، ام شُعاع تعرف شخص يسوي سحر ع قذاره وابو من كثر ما يحب ابنه وبقوا يهددوا بي ضعف التجأ للسحر ف ام شُعاع أخذته الهذا السحار علمود يسوي سحر اسود يرجع بي شُعاع وهذا السحار جان يعرف ابو شُعاع بالدوله ف اخذ منه فلوس هواي وهاي الساعه
بيها السحر كُلش قوي والسحر مدفون بحديقته فصارت
مشاكل اثناء السحر وأم شُعاع رادت تحرك كلبه كالت اله
راح ابطل السحر ورايحه الغير واحد ومسويه والسحر متضارب ومقلوب عليهم والاصدقاء الي يعرفهم قلبوا
عليه وكتبوا اشياء وهميه عنه وبأسمه وابو شُعاع تعب
وماكو احد بظهره إلى أن اجه خبر وفاه شُعاع وتوفى .

- نارا :- هي تحجي واني صافنه مصدومه ، زين وقتل الناس الأبرياء ؟ صفنت هزت راسها وردت عليه
- ام شيت :- شوفي يمه قبل جان عنده علاقه بإنسان فقير
وهذا الانسان عنده عائله
- نارا :- ااي ؟؟
- ام شيت :- بالموصل
- نارا :- بقيت صافنه عليها هي كملت
- ام شيت :- وهذا الزلمه اذا رجع البغداد يخرب الشغل وكُب شي يروح وابو شُعاع من جان يتصل عليه هذا الزلمه يرد عليه لا تجي البغداد ماكو شي ومحد يدخل للموصل وهذاك بقى بالموصل إلى أن دخلوا وقتلوا الزلمه هو وعائلته هذا اخر شي سمعته

- نارا :- اني ارمش بعيوني ما مستوعبه وكلبي احسه يدك ، ماتعرفين شنو اسمه ؟؟؟؟ عنوانهم ؟؟
- ام شيت :- لا يمه
- نارا :- عقلي صار يضرب اخماس بأسداس اعرف ابويه يشتغل بالسيارات ما عنده علاقه ويا أصحاب الدوله ، زين تصرفاتهم بالبيت كأن غريبه ؟ اقصد ام شُعاع
- ام شيت :- هي امهم مثقفه حيل وماعندهم حنيه كل واحد يمشي ع رأي يختلف عن الثاني
- نارا :- زين خاله اني شنو الي اسوي هسه ساعديني
- ام شيت :- لازم تفكين السحر ويحتاج الج فلوس هواي
ولازم تطلعين السحر من البيت وشُعاع مالازم يعرف
- نارا :- بس وحدي ما اكدر
- ام شيت :- اني وياج ، والله مو علمودها بس ام شُعاع هي الي دمرت ابو شُعاع وابنها ماخلت ساحر ما راحت اله وكلهم ياخذون فلوس
- نارا :- زين هم جنتي تحسين ابو شُعاع بي شي
- ام شيت :- يمه من خلووا المستندات والملفات برأس ابو شُعاع وهو من وقتها حيل تعب واذوا وهي جانت تكول اله امشي وخليك بالدوله حتى لو عكس ما يريد هي تحب الصيت العالي بين الناس رغم ابوها جان تاجر بالذهب

- نارا :- زين شنو سالفه اخوانها وأخواتها
- ام شيت :- شبيج يشوفون عندهم فلوس ويكولون من وين هاي الفلوس والبيوت الي عندهم غيره يعني ، وهمَ من زمان رادوا وحده من بناتهم الشُعاع وكذلك المصطفى ،
خلي بالج ترى ام شُعاع ماقابله بيج بس انغلب ع امرها
وصارت كدام الأمر الواقع
- نارا :- اني ملاحظه هذا الشي بس الله شاهد مدللتني
بس مرات موقف من يجن اخواتها ويشمرن حجي عني هي لو تكول إسكتن ومرات تسكت هي وهن يحجن عني
- ام شيت :- اي شفتي
- نارا :- زين صدُك أصدقاء شُعاع غدروا بي ؟
- ام شيت :- اي يمه هو جاي يخطط ع كمين معين هو وكم شخص يعرفهم وداهموا المكان واخذوا
- نارا :- زين بوقتها اعلنوا عنه بالتلفزيون ؟
- ام شيت :- لا ابو شُعاع ماقبل لان بوقتها راح يستغلون
ابو شُعاع ويغدرون بي
- نارا :- هاااا

اباوع عليها تحجي متحسره وهي تشكر ابو شُعاع
مسحت ع ايدي وكملت .

- ام شيت :- وخلي بالج هو جان تاجر مال السيارات معروف بالشرق الأوسط
- نارا :- شلون يعني !
- ام شيت :- عنده شركات
- نارا :- وين ؟
- ام شيت :- اخذوهن منه علمود شُعاع
- نارا :- يكدر يرجعهن لو لا ؟
- ام شيت :- يكدر بس المستندات راح تنقلب ضد شُعاع
- نارا :- اني ضحكت
- ام شُعاع :- شبيج
- نارا :- هههههه خاله ترى شُعاع اخذهن المستندات
- ام شيت :- انصدمت ، ششنو
- نارا :- اي والله هو شُعاع كعد وسولف الي كل شي
- ام شيت :- كُلهم وكفوا ضد الشعب والناس الأبرياء راحت بيها
- نارا :- سحبت نفس ، الله يرحمهم ، زين هسه شلون تساعديني ؟
- ام شيت :- اعرف وحده تعرف تفك السحر بس لازم تلتزمين بالاشياء الي تنطيهن الج بس لازم تخلين بشي حتى ماتنكشفين لان ام شُعاع تعرف بهاي السوالف حرمل ما حرمل وهاي الأشياء
- نارا :- خاله شُعاع اشترى النا بيت مو بيت اهله
- ام شيت :- باعي اذا ما ينفك هذا السحر تبقون هيج
وراح تتعبين انتِ ويا وخاصه هاي الساعه
- نارا :- يكولون غاليه
- ام شيت :- اي أخذها من الخارج وماجانت متوفر هنا الا بعدين

- نارا :- زين ليش ابو شُعاع تزوج عليج ؟ ولو تدخل مني
- ام شيت :- ههههه أخذها عن حب
- نارا :- انقهرت عليها ، زين ما ضجتي من تزوج عليج
- ام شيت :- ضجت ونقهرت وتعبت بس شسوي بعد واني هم انقهرت عليه ولو اعرف هذا الشي صاير ويا الا اوكف ويا
- نارا :- ليش ماتعرفين !!!
- ام شيت :- مرات اسمع منه ومرات ما يحجي الي
- نارا :- زين شلون نروح الهاي الي تفك السحر
- ام شيت :- شوفيلج يوم
- نارا :- اريد هسه ماريد باجر لان اخاف من شُعاع رغم شكد واجهت اشياء صعبه ومرعبه بس منه اختلق لان احس خزراته مثل الشي متلبس بي تكولين جني وهو منا اسمر وبس شوارب ومنا ليل ويخزر بيه
- ام شيت :- ههههههه حقج يمه ، بس كولي اله حتى نطلع مثلا للسوك
- نارا :- تمام .

اتصلت عليه هيَ وحجت ويا حتى تاخذني وياها جانت فاتحه السبيكر هو كال انطيني نارا سديت السبيكر اني ورديت عليه ، بقى يسأل وين وشنو اسوي الا ان اقتنع
بس بشروط عيني ما اشيلها من الكاع ، طلعت اني وخالتي ورحنه للحجت عنها تفك السحر بس هم ادعي طول الطريق وخايفه وصلنا للبيت دخلنا وكعدنا سوه

- ام شيت :- تذكرين السالفه الي حجيت الج عنها
- اي
- ام شيت :- هاي البنت تصير زوجه ابنها
- نارا :- اباوع عليها انصدمت سألت ام شيت
- غريبه عادي ؟
- ام شيت :- اي عادي والبنت زينه
- نارا :- التفتت عليه تحجي وياي
- شوفي بنتي السحر الأسود حيل قوي وما اكدر افتحه
الا بشي من عمج او عمتج
- نارا :- اي !
- ولازم هاي الساعه واحد يفتحها راح يلكه بيها أوراق صغار
- نارا :- عقدت حاجبي ، شعرفج انتِ ؟ هي ضحكت
- هههههه انتِ جايه تساعديهم لو تسألين
- نارا :- رفعت حاجبي ، من حقي اسأل
- ههههه تعجبيني مبينه قويه ، اسمعي لازم الشخص الي يفتحها ما يفتح الأوراق تاخذيهن وتجيبيهن الي وتجيبين هذن الي كلت الج عليهن وتروحين للحديقة الي مدفون بيها السحر تطلعين الأوراق وتجيبيهن الي اني راح ادليج مكانهن وين بالضبط وكل هذا احتمال ينفتح السحر
لان هذا قوي ويأذي بس راح اخفف عنكم
- نارا :- واني شلون اكدر اساعدكم
- اذا تريدي ينفتح ادزج الشخص يسوي سحر اسود
وهو يفتحه الج

- نارا :- جانت رجلي قريبه من رجل خالتي احسها ضربتني بطرف اصبعها ع رجلي حتى انتبه عليها من انتبهت عرفت معناها ماقابله ولازم أرفض ،رديت ع المرأة ، ان شاء الله اشوف شنو يصير وياي وارد الج خبر

خالتي كامت بسرعه واني كمت وياها
- ام شيت :- يلا بنتي خلينه نمشي هسه رجلج يجي
- نارا :- ماشي خالتي يلا نروح طلعنا برى سألتها شبيج؟
- ام شيت :- بنتي اذا بس عليها عادي بس اذا ادزج الواحد لااا لا ولد ولا ااي شخص ثاني ماكو ثقه بيهم
- نارا :- ليش
- ام شيت :- مو أمان خلي اساعدكم وروحي للقاسم( عليه السلام ) وشريفه بنت الحسن اخذي شُعاع وياج حتى إذا ما قبل اقنعي
- نارا :- تمام
- ام شيت :- ولازم تبعدين الساعه إلى أن تنفتح ولازم تاخذين شي من عمتج
- نارا :- اني عندي ثوب أخذته من وفاء بيوم الي اجيتو
بس اخاف تسأل عنه !
- ام شيت :- اخذي يوم واحد ورجعي هي ماتسوي بي شي بس تقرأ عليه لو تاخذ خيط منه
- نارا :- زين العمو من وين الكه ؟
- ام شيت :- اني عندي جفيه اله
- نارا :- لعد هاهيَ

رجعنا للبيت ورى دقيقتين من وصولنا للبيت اندك الباب
باوعت لكيته شُعاع وكف كلبي لو واصل قبل دقيقتين جان
شافني ولو هو عرف بيه طالعه بس تأخرت
- ام شيت :- خليج طبيعيه
- نارا :- تمام ، هدأت نفسي وطلعت ابتسمت بوجهة، ها ياروحي
- شُعاع :- فدوه الروحج ترجعين للبيت ؟
- نارا :- هاا ! اي ارجع مشتاقه الكم
- شُعاع :- يلا لعد اسلم ونطلع
- نارا :- تمام
- نارا :- دخل سلم عليهم وخالتي حجت وياي
- ام شيت :- باعي خاف يسوي شي يعني يخزرج وهيج شي مايسوي الج شي
- نارا :- سحبت نفس وهزيت راسي بأي
- ام شيت :- وطلعي الساعه من الغرفه
- نارا :- راد يذبحني مجرد ما لزمتها
- ام شيت :- حاولي اطلعيها
- نارا :- تمام

طلع شُعاع وصعدنا السياره بعد ما ودعناهم اول ما صعد شغل اغنيه كان ودي نلتقي يغني ويا المغني ويدندن منطرب اني ضحكت
- ههههه هاي المن
- شنو ؟
- الاغنيه شبيك
- ها هاي الاغنيه احبها
- سديت عيوني بشك ، المن تلتقي شعشوع !!؟
- هههههه الج حبيبي التقي وياج بس الظروف غريبه
وبعدتني عنج
- ابتسمت بوجهة نصيت الصوت وتقربت منه ، اني احبك صاح متنرفز
- ااااخ لج جاي اسسوق لاتنكلب بينا السياره
- صفنت بوجهة ونزلت نظراتي ع ملابسه الي لابسهن ، ششعشوووعي
- عيونه
- شعجب لابس دشداشه !
- احب البسهن
- بس والله حلوه عليك طالع صاك ابن الذين
- هههههههههه عيونك الحلوات كبد
- شُكراا استاذ شعشوع

- جوعانه اجيب الج شي ؟
- لا ، فتنه من واحد يبيع شعر بنات لزمت ايده صحت
شعررررر بناااات
- هههههههه عرفتج والله كلت هسه تصيح
- يلا لعد حُبي تنزل اشتري وتعال
- تدللين خاتونتي

راح نزل اشترى ورجع صعد رجع يمي اني اكل واحط بحلكه هو مايحبه بس علمودي ياكل من شافني اضحك
ماراد يكسر بخاطري واني هم ع الواهس اكل و اوكل بي
وصلنا للبيت نزلنا اول مادخلت شفت مصطفى كدامي
من شافنه ضحك فرحان بينه لان رجعنا سوه والبنات فرحانات بينه حتى امه دخلت اضحك صحت
- هلاااا يابه شكد مشتاقه الكم '
همَ ضحكوا باوستهن وسلمت عليهن ودرت وجهي المصطفى

- مصطفى :- ها ولج
- نارا :- ها
- مصطفى :- شو ماسلمتي عليه
- نارا :- عبالي ارجع اشوفك زين شو بعدك ؟
- مصطفى :- هو اني زين شلونج مشتاقين
- نارا :- الحمدلله واني أكثر مشتاقه الكم خويه
- مصطفى :- يابعد عيون اخوج
- نارا :- جاي نحجي جان صاح شُعاع
- شُعاع :- تكبيييييير
- نارا :- فزيت من صوته وأمه والبنات يضحكن ، اسم الله شبيك شُعاع
- شُعاع :- شبيني يابه شبيني
- نارا :- شو هذا صار يطك اصبعتين وكلها تضحك ويا اني من شفتهم وشفت شكلهم فحطت من الضحك صرت اكركر وياهم ع الواهس كامت وفاء جابت كيكه وحلويات
ورجعت تصيح خلي ناكل بهل فرحه
- شُعاع :- بويه اريد مرتي شبيكم وياااي
- نارا :- يااااا شُعاع وعلي الحلويات ما تتفوت
- شُعاع :- الحجي بينه مال هسه اخذهن واصعد فوك
- مصطفى :- اااااااي عيني مو فصليه احنه عندك
- نارا :- رجعنا نضحك عليهم

التفت شُعاع المصطفى يهز بأيده يصيح عليه

- شُعاع :- كوووم ولك شنوو طلقه هيج تسوي بيك نستله
انتَ ، طلقه تهزك وسفه
- مصطفى :- لا والله مو جنت اني اتشاقه وسويت العمليه واتفيك عليكم
- نارا :- ههههههه بهدااااي بهداااااي
- شُعاع :- ايبااااااااخ الج هاي الكلمه
- مصطفى :- من جيبها
- نارا :- هههههه اي من جيبي صحيح
- شُعاع :- يلا كافي هسه ممكن اخذ مرتي
- وفاء :- غمزت ، اي خويه ممكن ليش لا

- نارا :- صعدت اني ويا بس احس بالخوف من اتذكرت الي صار اول ما صعدنا حجيت ويا ، شُعاع طلع الساعه من الغرفه
- شُعاع :- شبيها !
- نارا :- مارديت عليه اخذت الساعه خليتها بعلاكه
وطلعتها من الغرفه ورجعت كعدت كدامه
- شُعاع :- مشتاق الج
- نارا :- ارتميت بحضنه وحضنته حسيت بحضنه الدافي سحبت نفس ، شُعاع اريد اسولف وياك عادي ؟
- شُعاع :- عوفج من السوالف اريدج اني
- نارا :- بس اسولف
- شُعاع :- هههههه دخيلك ربي
- نارا :- اي خلي اسولف
- شُعاع :- كولي
- نارا :- ابوك شلون توفى
- شُعاع :- ههههه شنو يُبا كل شويه نعيد ؟
- نارا :- هو عنده أشغال
- شُعاع :- اي شركات مال سيارات ٤ وحده بالخارج واني اريد ارجعهن بس باقي كم مستند اجيبه
- نارا :- زين وشركه الملابس ؟
- شُعاع :- العمال بيها ماعليها شي
- نارا :- صفكت ، والله انتَ زود وأخذت ثار اهلك
- شُعاع :- الما ياخذ ثار اهله لا خير بي

- نارا :- شعشوعي ، اتقرب منه رقبته شميته ، احبك اني
- شُعاع :- اموت عليج انتِ النرجسية مال عيني يُبا

ثاني يوم الصبح كعدت شفته بوجهي صافن عليه
- هاا ؟
- هاا !
- هاا ؟
- هاا !
- ها شلونج خويه
- شُعاع امشي اطلع من الغرفه
- ههههههه شنو صاحبج اني
- ههههه ياااا شبيك ، تقرب مني
- اااااخ شبيه يعني شبيه
- احبك اني
- اموت عليج ماشتي
- حضني وجعصني بحضنه قوي يشم بيه شفطني شفط

- باعي نارا بس اكمل البيت الجديد اخذج اله ونأثثه براحتنا
- زين شكد قريب ع بيت عنقاء والشذام
- بالشارع الي كدامهم
- هتفت بفرحه ، صدُك !!
- اي والله ، يلا يابه اني طالع
- شنو ما تتريك ؟ تقرب مني باسني قوي وابتعد يضحك
- ااااخ يابه هذا ريوكي
- ضحكت بصوت عالي وهو دخل سبح وطلع

اني هم رتبت نفسي وعدلت الغرفه ونزلت لكيتهم كُلهم
متجمعين ع الطاوله هستوهم حطوا الريوك يريدون يتريكون

- نارا :- شبيكم انتوا !!! همَ يباوعون مستغربين ، اني فرشت الارضيه و نزلت الاكل ع الارضيه وكعدت رفعت راسي هم صافنين عليه ضحكت، هناا الاكل بي خير وطعمه أطيب ، ضحكوا ومصطفى كعد
- مصطفى :- اي والله المه تصير احلى
- نارا :- رفعت راسي اباوع الشمس الضوه مالتها يدخل من الشباك ، راح يجي الشتاء
- مصطفى :- اني احبه رغم برودته بس احسه دافي
- نارا :- صحيح بس بي هواي تعب
- مصطفى :- الانسان ما يتعب اذا يتخطى الماضي
- نارا :- شلون ؟
- مصطفى :- يعني لازم نتقدم خطوه لان كل احنه راح نموت ما لازم نبقى بالماضي وهو راح
- ام شُعاع :- احجي يمه احجي فدوه الحلكك
- نارا :- ضحكنا ع كلامها ، بس الماضي مو سهل ينسي
- مصطفى :- صح ما ينسي بس اذا شفنا الوقت الحاضر
اكو ناس محتاجتنا ومعلقه أملها بينا لازم ع الاقل نترك الماضي والتعب الي بي علمود نفسنا وعلمود الي متعلقين بينا

- نارا :- بس فراق الي نحبهم أصعب من الموت
- مصطفى :- وياج اني عايش هذا الشعور
- نارا :- تقرب مني نصى صوته همس
- مصطفى :- بس كل احنه محتاجيج
- نارا :- امه فتحت عيونها ، قلبت الموضوع ، اي صحيح شُعاع يحبني ، اشرت اله حتى يفهم وكمت من مكاني
غسلت ورجعت ردت احجي ويا مصطفى شويه لكيته الوحده تقربت منه

- مصطفى هم تحجي سر الاهلك
- لا ما احجي سر ولا انطي سر
- زين اذا شخص يحتاج مساعده ومعتمد ع هذا الشر ؟
- اساعده
-سحبت نفس احاول ارتب الكلمات الي اكولهن اله بعدين رجعت حجيت ويا ، ابوك مسوي شي قبل ؟
- عقد حاجبه ، طبعا نارا انتِ اكو احد حاجي الج شي
وجايه تستفسرين منه بس ماتعرفين شلون وهيج راح تفضحين نفسج يم اهلي لا تحجين هيج حجي
- باوعت عليه بتعجب ، تفهمني !!
- من اول ما دخلتي الهذا البيت اني فاهمج وحتى نظراتج بيهن خوف حيل قوي
- ضغطت ع ايدي حايره احجي لو ما احجي اخر شي كلت خلي احجي احسن ، باوع مصطفى اني اخذت خيره
يم بيت ام لُجين
- انصدم ، لا تجذبين !
- والله ما اجذب ومن اخذت كالوا دم أبرياء برقبتكم
فتح عينه مصدوم وسكت ما حجه شي بقى ساكت .

رجعت حجيت ويا
- مصطفى تساعد اخوك وأهلك واني انطي عمري كُله الشُعاع ساعدني حباب ، بقى مدنك راسه ورجع رفعه يباوع عليه بنظرات الشخص مقهور
- ابويه غلطان
- اي شلون قتلهم ، رد عليه بنفس كلام زوجه ابو بخصوص هذا الشخص هو وعائلته
- ابوي جان يشتغل ويا واحد هم بالسيارات وهذا الشخص راح للموصل علمود ابويه
- اني بقيت استمع اله بس ما حطيت بالي عند شخص معين ، رجع كمل كلامه
- وهذا الزلمه راد يطلع من الموصل هو وعائلته وابويه ما طلعه
- اي كمل

- وهذا الشخص عنده بنات و ولد
- اني لزمت كلبي احس عصرني كلبي عصررر
وشفايفي صارت ترجف رجف مو طبيعي ، همست بخوف ،
شنو اسمه ؟؟؟
- منو ؟
- الرجال الي يشتغل ويا ابوك ، احجي واني ارجف
- اسمه علي
- حسيت كلبي راد يوكف دموعي سريع وكعن رجعت سألته اني وابجي ، علي شنوووووو !!!
- علي حسن
- شهكت بصوت عالي مصدومه لاااا يا الله لاااااااا

■■■■■■■■■■■■■■■■■■■

وتظن انكَ نجوت ثُمَ تهُزمك الحقيقه
المُره .
" يتبع "

شلون أحداث لوووز كشف الالغاز و وضوح الحقيقه
التوووووقعاااااات بسررررعه 🌝🤸‍♀️

.