الربتج " حالك الاسوداد " الفصل الثاني وثلاثون 32 - بقلم رهف علي

چا يَمتى يعوف الحِزن
دربي هَلي عصرة هِدم مَعصور گلبي "!

ماذا لو وقع الاختيار لك ايُهما سوف تختار
الأسود ام الأبيض ؟؟

◆♥︎♥︎♥︎♥︎♥︎♥︎◆

صرخت بصوت عالي ارجف واني اشوفه شلون ينفر الدم
منه وكع بالكاع كعدت يمه ونزلت راسي لان الرمي بعده
مستمر يرمون ع البيت حتى الجام اتكسر اباوع ع مصطفى الدم ينفر من كتفه ومغمض عيونه واني مدنكه راسي التفت اريد شي اخلي ع كتفه حتى يمنع النزف
لكيت وصله قريبه منه سحبتها وخليتها ع كتفه ضغطت عليه ، شكد حاولت اسحبه حتى انروح للغرفه الاخيره
بس ماكدرت اسحبه ولا كدرت اوكف لان الطلقه تصيبني
اتشاهدت واني انده بربي والإمام علي ورى ٥ دقايق من
كُل هذا الي صار اتوقف الرمي واني كلبي اتوقف ويا

سكت الرمي قليل وراها صار الرمي القوه واسمع صوت
الناس برى تصاارخ احس الرمي صار مثل الموجه واني من يمي اصرررخ بخوف لازمه راس مصطفى صاير ع رجلي
لازمته بقوه وضاغطه ع كتفه رجع وراها الرمي سكت
واني عيوني بس تتحرك بخوف خايفه لا ايدخلون للبيت
وقتها راح انتهي حتى شُعاع ما وصل الحد هاي اللحظه
ماحسيت الا الباب اندفر بقوه ودخل صرخت ياااااااعلي .

رفعت راسي شفته شُعاع كدامي صار و ويا ولد بس بقوا برى مادخلوا اسمع صوت عابد والشذام هم برى شُعاع شاف مصطفى واكع فتح عيونه ع وسعهن صاح
" اخووووووي " وتقرب منه يركض خايف اني اهز براسي وابجي اصيح
- " بعده ما ميت ما ميت الطلقه بكتفه الحكوااا "
شُعاع سحب مصطفى من رجي وحضنه الصدره يرجف ع اخو يحجي ويا
- شُعاع :- لاااا خويه لا تكسررر ظهري اروحلك فدوه
كوووووم بداعه الخووووه
- نارا :- حط ايده ورى ظهره وايد جوه رجله وشاله حضنه
الصدره وطلع بي يركض يصيح " اخووووي راح يروح من ايدي " حطوا بالسياره طاروا بي ما اسمع بس صوت السياره من شخطت بسرعه .

بقيت بالبيت ابجي وادعي مايصير بي شي كعدت بالكاع
اباوع ع حضني متروس دم والريحه الدم تكتل يبس حلكي واني انادي يا علي يا علي يا علي ، ع نفس كعدتي سجدت ابجي وادعي ما يموت مصطفى احسه مثل اخويه
حنين رغم مو هواي اعرفه بس كدر يكسبني ويخليني اعتبره اخ اليه من بعد الي عشته من الفقدان والخوف
بقيت ع نفس حطتي ماحسيت الا الباب انفتح كُل اعتقادي همَ رجعوا رفعت راسي شفتها العنقاء كدامي

هي حالتها حاله من شافت الكاع كُلها دم وشافت حالتي
صارت ادك ع وجها رجف كلبي
- نارا :- شششبي مصطفى بس لا بي شي
- عنقاء :- ولج خيه كووومي كومي خلي نطلع من البيت
- نارا :- شمرت عليه العباه وتريد مني اكوم اني احجي وياها وارجف ، ررررجليه رررجليه ما اكدر اكووووم عنقاااء
- عنقاء :- بس عينيني كومي حبيبتي فدوه الج
- نارا :- لزمتها وسندت نفسي عليها اريد اكوم ما اكدر
رجليه يرجفن والارضيه كُلها كزاز ، شافتني ماكدر امشي سمعت صوت واحد من برى يصيح
- يلااا بسرررعه " هي ردت عليه
- عنقاء :- اصصصصخام الصخمني ماتكدر تمشي البنت
- نارا :- رجع رد عليه
- بس لبسيهااا شي وخليها تطلع هاي السياره هناااا
- نارا :- مشيت وياها ارجف طلعت برى انتبهت هذا الشذام حتى ما ميزت صوته من الخوف اول ماصعدت بالسياره سألته

- نارا :- شذااام الله يخليك كول بي شششي
- الشذام :- والله ماعرف راح بسياره عابد اني هسه الحكهم
- نارا :- الله يخليك أخذني ويااااك
- الشذام :- مااا اكدر شلون اخذج ويااااي
- نارا :- بجيت ، ااااخذني اخخذذذني
- الشذام :- صوووتج ماكدر
- نارا :- بقيت الوب اريد اروح التفتت العنقاء احجي وياها ، عنقاااء هذا اخوووي تعرفين شنو يعيني اخوووي ؟؟؟
هي تبجي وتمسح بدموعها
- عنقاء :- بس فهميني شنو الي صار
- نارا :- ماااعرف فجأة صار الرمي مانعرفهم

وصلنا الشذام للبيت وراح واحنه بقينا انلوب طول الوقت
إلى أن اتصل بينا الشذام وكال بعده بالعمليات اني انوب من سمعت هيج خفت اكثر ليش هيج طول بقيت ابجي
وادعي إلى أن صار الليل اندك الباب وطلعت اركض حتى بدون شال وبدون عباه فتحته صار شُعاع كدامي فرفحت من شفت شكله شلون تعبان اشر الي حتى البس العباه

- شُعاع :- البسي حتى اخذج الاهلي
- نارا :- أخذني للمستشفى
- شُعاع :- نارا مابيه حيل البسي حتى اوصلج للبيت
- نارا :- وروح اهلي الا ارووووح وياك
- شُعاع :- وووووين اخذج الدنيا مكلوبه هناااك
- نارا :- سكتت ابجي لبست العباه وصعدت بالسياره وهو يسوق
- شُعاع :- اي مشكله ما اريد هناك لاتحجين ويا اي احد اذا صار شي تمام لان كلها هناك موجوده اكيد راح يحجن
- نارا :- سكتت ما حجيت إلى أن وصلنا للبيت نزلت اباوع كلها موجوده انتبهت ع عمتي اول ماشافتني اجتي عليه
تركض حضنتني اني بقيت مصدومه اتوقعت رده فعلها تختلف او تتهجم عليه رفعت راسي كلها موجوده خالاته وعماته ونسواان هوااااي اني بقيت ابجي بحضنها
همست الها اريد اروح للغرفه هي هزت راسها وسحبتني
وفاء انتبهت نظراتهم تريد تاكلني لو يكتلني عفتهن ودخلت للغرفه وقفلت الباب بقيت كاعده ابجي .

بقيت ابجي عيوني راحت من البجي رفعت راسي حسيت
ع خيال كدامي من كثر الخوف الي عشته حتى صرت
اتخيل كل شي كدامي مصطفى والي صار كدامي فزيت ع دكه الباب كمت فتحته واني امسح بدموعي
صارت وفاء كدامي

- وفاء :- شُعاع ع الخط يريدج
- نارا :- حتى ماعرف شكد مر من الوقت واني الوحدي بالغرفه سحبت الجهاز وخليته ع اذني رديت بصوت متشحرج من البجي ، الو !!! اجاني صوته
- شُعاع :- البسي وتجهزي مصطفى يريد يشوفج
- نارا :- اول ما نطق كلامه فزيت من مكاني سريع سديت الجهاز بدون ما انتبه
- وفاء :- عزززه سديتي الجهاز بوجهة
- نارا :- هااا ما اعرف ، رجع اتصل مره ثانيه اجاني صوته
- شُعاع :- استغفر الله ليش سديتي ولج كلت الج يريد يشوفج جهزي نفسج بس لا تحجين الاي احد واني شوي
واجي ااخذج
- نارا :- تمام ، سديت الخط و وفاء واكفه يمي بس ماسمعت
- وفاء :- ماكو خبر ؟
- نارا :- هاا لا

تركتها وسحبت العباه لبستها وطلعت هن صارن بوجهي
عماته وخالاته صارن يشمرن عليه الحجي والبسامير
- شوكت نخلص منج
- نارا :- التفتت عليها، ماتخلصون
- من لفيتي علينا ما شفنه كل الخير دولاجه مال الفكر طبعا ما نخلص
- نارا :- احترام العمتي راح اسكت ، اجتي عمتي
- ام شُعاع :- ها وين رايحه
- نارا :- شُعاع يريدني هسه يجي
- ام شُعاع :- والله ما تطلعين شنو تطلعين وين تروحين
- نارا :- مادري عمه هو يريدني
- ام شُعاع :- زين انتبهي النفسج بنتي
- نارا :- حضنتي واني حضنتها حيل وشميتها حسيتها مثل امي سلمت عليها وطلعت برى لكيت شُعاع ينتظرني

اباوع عليه حيل تعبان ومابي حتى يحجي لابس كاسكيته
سوده ومنزل راسه ساند ظهره ع السياره ينتظرني من انتبه عليه رفع راسه اباوع عليه حتى وجهة صاير اصفر اشر الي اصعد صعدت وهو صعد بدون مايحجي

- نارا :- شلونه ؟
- شُعاع :- زين بس يردد بأسمج عباله صار بيج شي
- نارا :- بجيت رديت عليه ياعيوني ، هو رفع راسه عليه
- شُعاع :- شنو ؟
- نارا :- شنو ! سكت ماحجه ورجع يسوق إلى أن وصلنا للمستشفى نزل واني نزلت ورى امشي سريع وراى
ع

ابد وشذام صاروا كدامي حتى ما سلمت عليهم دخلت
بسرعه احس اخويه الي جوه متصاوب جانوا ناقلي الغرفه
فتحوا الباب ودخلت شفته كدامي بجيت بسبب حالته
هو شافني ابتسم بخفه
- نارا :- مصطفى ، غمض عيونه متألم ورجع فتحهن
- مصطفى :- شبيج اهدئي مابيه شي
- نارا :- فدوه صير زين وشنو تريد يصير لك شوف شوف امك تريدك ومحترك كلبها عليك
- مصطفى :- شكد شايف كَلب جنين بس مثلج ماشفت
- نارا :- انتَ اخووي ، سحب نفس متألم
- مصطفى :- اخواتي مو هيج وياي
- نارا :- خلاص انتَ اخويه منا ورايح

سمعت صوت شُعاع
كال " ااحم " رفعت راسي اباوع عليه ومصطفى ضحك
- مصطفى :- اسكتي ترى يغار الرجال
- شُعاع :- لا شنو السالفه بس هي محنه زياده عندها
- نارا :- اني لك شُعاع ، تقربت احجي ويا مصطفى، شلون صرت ؟
- مصطفى :- والله دايخ
- شُعاع :- اي غير انطوا مسكن
- نارا :- تقربت من شُعاع عيوني انملت ، تدري من صار الرمي حسيت روحي طلعت واني اشوفه هيج حسيته واحد من اخواني
-شُعاع :- اهدئي مابي شي هذا كدامج هذا عضيدي وابن ابوي وامي
- نارا :- ابتسمت مسحد عيوني والتفتت اله ، مصطفى شنو تحب شوربه بالخضار ، عدس لو طحين ؟
- مصطفى :- شنو هاي بالطحين
- نارا :- مجربها
- مصطفى :- لا ، بس اجربها
- نارا :- تمام اني اسويها واخلي شُعاع يجيبها لك
- مصطفى :- ليكون مو طيبه
- نارا :- بالعكس حيل طيبه اني اسويها وهم اسويلك وياها غير شي اذا ما عجبتك
- مصطفى :- خوش
- نارا :- اسوي لك عصير طبيعي وهم ادزه انتَ بس صير زين ، هو احس عيونه دمعت
- مصطفى :- الله مايحرمني من هيج اخت

- شُعاع :- واني ما الي شوربه عصير شي منا منا
- نارا :- لا
- شُعاع :- خوش سوي كميه
- نارا :- ليش
- شُعاع :- ههههه حتى اكل ويا
- نارا :- نووو حبيبي بس الصوفي
- شُعاع :- هااا كلتي صوفي
- نارا :- اي
- شُعاع :- خوش اذا اشتهيتي شي خلي هو يجيب الج
- مصطفى :- يابه مو تدلل عليه اختي اجيب الها
- نارا :- ضحكت وشُعاع خزره درت وجهي عليه بدون ماينتبه مصطفى طلعت الساني عاند بي وهو عض شفته يريد يكوم يكتلني بعدين ضحك
- شُعاع :- ااخ من العناد ضحكتيني واني ميت تعب
- نارا :- مصطفى ضحك درت عليه جعل محد غيرك يضحك ، شُعاع رفع حاجبه
- شُعاع :- ترى احنه هم ضحكنا
- نارا :- ها اي صح دوم الضحكه
- شُعاع :- هلو ورده يدومج

- نارا :- بقينا نضحك غيرنا جو المصطفى بعدين
كلت الشُعاع ، رجعني للبيت
- شُعاع :- ممنوع
- نارا :- زين أخذني البيت عنقاء حتى اسوي المصطفى
- شُعاع :- ليش هناك
- نارا :- بس ارجع البيت اهلك اتعارك
- شُعاع :- دخيلك ربي جون سينا شكو
- نارا :- هههههه غير خالاتك
- شُعاع :- خير ان شاء الله يلا امشي
- نارا :- تقربت من مصطفى حيل فرحانه لان هو زين ،
الحمدلله ع سلامتك اخوي انتَ
- مصطفى :- احلى اختك حنينه
- نارا :- انتبه النفسك
- مصطفى :- تمام

مصطفى التمس الجانب المفقود من حياتي الله عوضني بهذا الانسان وحسيته واحد من اخواني صح غريب بس
كدر بهاي الفتره يحسسني هو ونعم الأخ صح ماراح يعوضني مكان اخواني الحقيقين لكن يكفي كُل موقف احس هو فعلا الله دزه الي عوض عن الي فقدتهم حسيت بي علي ومجتبى ومحمد الي فقدتهم غمضت عيوني شلون جنت اشم بعلي الصغيرون وشلون هو بحضني شكد
ردت يكون هذا الشي حقيقي ويرجع بس للاسف راحوا مني حسيت لهفتي ع مصطفى مثل لهفة امي الإخواني

مشيت ويا شُعاع طلعت برى بس اني بالي مو هنا بالي
عند الي صار كُله حتى نسيت زعلي من شُعاع والسالفه
الي صارت حسيت غمرتني الفرحه من شفتهم بخير
شُعاع ومصطفى عنقاء والشذام حتى لُجين وعابد حسيتهم
صاروا الي العائله الي احتاجها بحياتي همَ سبب السعاده
الي اني بيها هسه ، عنقاء اخت الي ، عائله شُعاع صارت عائلتي ، وكُل واحد اخذ جزء من حياتي وجزء مني يمثل مكانه وحبه بداخلي

فزيت ع صوت شُعاع طلعني من التفكير الي اني بي

- شبيج حبيبي ليش هيج هادئه ؟
- لا مابيه شي
- زين ذكرتيني شنو هاي الطحينية
- ههههه طحينيه !
- اي غير هيج اسمها
- حبيبي هاي شوربه كُلش طيبه
- ماشي سويها حتى نشوف طعمها
- تدلل

وصلنا البيت عنقاء نزلت اول مافتحت الي الباب ارتميت
بحضنها
- شلونه مصطفى؟
- الحمدلله زين ، اريد اسبح حبابه
- ادخلي عمري
- دخلت سبحت سريع وطلعت البيت فارغ بس هي والأطفال والشذام مو بالبيت بالمستشفى صارت كدامي ، عندج الأغراض الشوربه مال الطحين ؟
- اي كُل شي موجود
- زين لعد راح اسوي الشوربه المصطفى
- تمام براحتج عُمري اني وياج اساعدج
- طلبت منها اطلع الي ( كرفس ، بصل ، دجاج ، ماجي ، حليب ، طحين ، جزر ، فلفل حار ، معدنوس )
- شنو حتسوين هذن للشوربه
- هسه طلعيهن ماعندي وقت هسه يجي شُعاع
اسوي ( شوربه خضار ، شوربه طحين ، وعصاير )
- تمام
- عنقاء حبي سلكي الدجاج بالبصل ورق غار وشويه ملح
هي تسوي واني اشتغل إلى أن كملتهن خليتهن ع النار
وسويت العصاير وجهزت كُل شي واتصلت ع شُعاع حتى يجي ياخذهن .

بقينا اني وعنقاء بالمطبخ تعبانات لان ع فد وكفه نشتغل
ماكعدنا وهي خطيه ساعدتني اجه اخذهن وراح ورى تقريبا ساعه اتصلت ع شُعاع اسأله

- نارا :- هاا شلون صار مصطفى اكل لو لا حسيته اتقرب من الحاكيه وهمس
- شُعاع :- لو كلها الدنيا مثلج اني بخير
- نارا :- الي يمه سمعوا من هيج حجه كلها صارت
( هاااا شُعاع هاااا ) وشُعاع بقى يكح سمعت صوت الشذام يصح ( خويه اختنك الرجال ) وهم يضحكون وهو يصيح عليهم ( اشتعلتووووا ) واني وعنقاء نضحك من يمنه ع سوافهم ، مصطفى حب الشوربه ؟ سمعت صوت مصطفى يرد
- مصطفى :- اي عاشت ايدج كلش طيبه ماقصرتي
- نارا :- الف عافيه ، اجاني صوت شُعاع
- شُعاع :- احم هاي الطحينية كلش طيبه
- نارا :- شُعاع هاي شوربه مو طحينيه بابا ، سمعت صوت عابد يحجي
- عابد :- حمص بطحينه كلش طيبه
- الشذام :- هاي شلون حلاوه طيبه
- نارا :- بقيت صافنه ، شنو بعد ماعندكم اسم الها ثاني
هم يضحكون ويحششون، شُعاع انتبه ع مصطفى
- شُعاع :- شعندي غيره
- نارا :- وانتبه ع نفسك
- شُعاع :- بعيوني كمل بهمس ، حبيبي
- نارا :- ابتسمت وسديت الجهاز .

حسيت براحه مو طبيعيه كمت اني وعنقاء انظف بالمطبخ خلصنا وصعدنا فوك لكينا الغرفه مكلوبه
وهم نظفناها اني وعنقاء بس هلكنا من التعب إلى أن خلصنه راحت عنقاء تسبح من طلعت رجعت اني هم دخلت ازيل التعب من جسمي من طلعت لكيتها كاعده
تقربت كعدت يمها وخليت راسي بحضنها هي حطت ايدها ع شعري بقيت اسولف وياها وماحسيت ع نفسي
الا واني غفيت من التعب حسيت بيها من ابتعد عني وحطت المخده جوه راسي بس مافتحت عيوني لان تعبانه

فزيت ثاني يوم الصبح ماكو احد يمي طلعت ركض كلبي يدك صحت ، عنقاااء وينج ؟ اجاني صوتها من جوه
- عنقاء :- هااا اني هناا
- نارا :- لزمت كلبي يدك من الهبطه ونزلت جوه صارت كدامي ، محد اتصل عليج ؟ وشلون تعوفيني الوحدي
- عنقاء :- اي غير انتِ نايمه ، بس شُعاع اجه وراد يحجي وياج واني كلت اله نايمه كال من تكعد خلي تخابرني
- نارا :- ومصطفى ؟
- عنقاء :- زين بس مايطلع اليوم ، يطلع اما الباجر لو بعده
- نارا :- لازم ارجع لعيالي
- عنقاء :- هو اني الي فهمته من كلام شُعاع يريد يرجعج
- نارا :- شو اتصلي عليه ، رحت غسلت سريع ورجعت
هي اتصلت سحبت الجهاز وهو فتح الخط .

- نارا :- ها حبيبي شلونك
- شُعاع :- صباح النوم الحمدلله عمري وانتِ
- نارا :- زينه ، شوكت يطلع مصطفى
- شُعاع :- بعد باجر لان مو زين هسه يطلع يخافون عليه
- نارا :- اكل ؟ وانتَ اكلت ؟
- شُعاع :- اي اكل واني والولد اكلنا برى ، حبيبي لازم ترجعين للبيت لان عيبت كاعده بيت عنقاء
- نارا :- اي هو اني ردت ارجع من اجيت يم عنقاء حتى اسوي الشوربه لان هناك بيتكم ماكدر بسببهن يتعاركن
- شُعاع :- سحب نفس ، يصير خير جاي اني مسافه الطريق
- نارا :- تمام .

سريع سوت عنقاء الريوك اتريكت ولبست الشال والعباه
والباب اندك عرفته وصل ودعت عنقاء وطلعت صار كدامي
- شُعاع :- من صباحيه الله فدوه الوجهج
- نارا :- ابتسمت بفرحه ، والوجهك انتَ

صعدت بالسياره وطخت براسي سالفه الجهاز والعركه
الي سويتها كُل الي سويته بوقتها غلط واني غلطت
من انفعلت وسويت هاي المشكله المفروض احتوي
وافهم منه بس العصبيه الي صرت بيها والانفعال دمر كل شي بس كل هذا بسبب وحده ماعرف منو هي من حقي اعرف منو الي تريد ادمر حياتي من بعد ما صارت الي حياه

- شُعاع :- تريدين اجيب الج كهوه
- نارا :- اي حبيبي ، هو راح نزل واني شفت الجهاز مالته
الجديد لان هذاك فلشته سحبته وفتحته كلبي يدك نفس الشريحه الهذا شفت هواااااي رسائل من أرقام غريبه
وهواااي ارقم غريبه متصله عليه رفعت راسي شفته اجه
سريع سديت الجهاز ورجعته المكانه هو صعد ابتسمت بوحهة وهو باسني بالهوى شربت القهوه
- شُعاع :- اذا شفتي البنات هناك الخاطري معليج بيهن
- نارا :- لا شعليه بيهن اني
سحب ايدي رفعها لشفايفه باسها مبتسم بوجهي

وصلنا للبيت شفت عمتي سلمت عليها وبستها
شكلهم عرفوا بمصطفى زين دخلت جوه لكيت البنات بايتات يمهم بالبيت ماحجيت بس سلمت وصعدت فوك صحت وفاء اول ما اجتي حجيت وياها

- نارا :- حبيبتي اريد احجي وياج
- وفاء :- كولي عمري
- نارا :- من المحتمل هاي الفتره نكعد هنا يمكم ف اذا شفتيني ما ادخل بأحد لاتضوجين انتِ او عمتي او البنات
لان ما اريد مشاكل تصير بسببي وهذا الكلام وصلي العمتي لان استحي منها
- وفاء :- عادي حبيبتي لا تهتمين اني اكول الها
- نارا :- تمام ، بس اريد ملابس ، راحت جابت الي بقيت صافنه عليها اباوع ثوب قصير نص ردن
- وفاء :- بس هذا موجود يختلف عن لبسج بعدين البيت مابي احد بس احنه

- نارا :- هزيت راسي وسحبته لبست اباوع قصير ورجليه مبينه يلا ماكو ولد بالبيت ضفرت شعري صفح وخليت طوك رشيت عطر ونزلت جوه دخلت للمطبخ اريد اسوي مقلوبه اله لان يحبها هو ومصطفى وهم ياكلون اثنينهم
بس لازم اتصل بي خاف ماياكلها ، رحت العمتي
لكيتهن كلهن كاعدات يتريكن يباوعن عليه من فوك للجوه غلست عنهن وحجيت ويا عمتي ، عمه حبيبتي اريد جهازج اتصل ع شُعاع .
سمعت وحده تهمس للثانيه ع اساس ما اسمع بس اني سمعت تكول الها " كل هذا وشوفيها شنو طالعه بعد ما كتلت ابنا " هم غلست ماحجيت سحبت جهاز عمتي واتصلت ع شُعاع كدامهن احجي ويا .

اول ما فتح الخط حجيت كدامهن واني افر بجسمي
- نارا :- ها حبيبي ، اباوع نظراتهن يخزرن بيه تركتهن ورحت للمطبخ
- شُعاع :- ها بنيتي
- نارا :- شنو مشتهي انتَ ومصطفى
- شُعاع :- مشتهي عيونج ، كون احضنج
- نارا :- فدوووه رحت لك ، داحجي ويا جان تدخل وحده من البنات وكفت قريب مني وتضحك اني عناد بيها كملت ويا شُعاع ، اي ياروحي كول شنو تريد اسوي اسمعه يحجي ويا مصطفى
- شُعاع :- ولك المدلل كول شنو تريد نارا تسوي لك
- نارا :- سمعته يكول " كول الها مقلوبتج طيبه " اني ضحكت ترى ردت اسويها بس كلت اسألكم
- شُعاع :- سويها بس باللحم
- نارا :- بس هو يحتاج اله سوائل راح اسوي سوب لحم
- شُعاع :- خاب ياسوائل غير هسه يحطني وياكلني
- نارا :- هههههه الف عافيه
- شُعاع :- بسيطه اني الج
- نارا :- ضحكت وسديت الاتصال

رجعت الجهاز العمتي واني اضحك وهن يتهامسن عليه
اكيد يحجن بالموزين فريت نفسي ورجعت للمطبخ اضحك
هن اجني ورايه اني ما اهتميت بقيت اطلع بالمواد واسوي وهن عينك عينك يتهامسن عليه كدامي بس عيونهن عليه وماعرف شنو بالضبط يتهامسن سألتني وحده منهن

- شعجب تعرفين تطبخين ؟
- نارا :- اي اعرف
- من وين تعرفين لازم هناك علموج ع الطبخ ههههههه
- نارا :- عرفتها تقصد ع داع١١ رديت عليهن بهدوء ، اي علموني ، ورجعت اكمل
- اي سولفي النا شلون
- نارا :- اباوع ام شُعاع دخلت خجلت منها غسلت ايدي رديت الها، ما اتذكر شي لو اتذكر جان كلت الج
- شو انتِ ماتحترمين
- ام شُعاع :- اسكتي لا تحجين
- نارا :- مارديت عليها لان عمتي ردت وجهت كلامي الام شُعاع، عمه حبيبتي راح اسوي مقلوبه للولد تريدن اسوي الج وياهم
- شنو خاله غير داسألها بس هي ما محترمه
- ام شُعاع :- سُعاد اسسسكتي عوفي البنيه شبيج
- نارا :- ههههه الحمدلله اني متربيه احسن تربيه
- اي واضح شو ما مبين
- نارا :- الاناء ينضح بما فيه بس الظاهر ماتشوفين ،
درت وجهي عنها وطلعت من المطبخ اسمعهن يحجن عليه وأم شُعاع تحجي عليهن حتى مايحجن عليه صعدت فوك دخلت الغرفتي وسديت الباب .

بقيت افكر شنو اسوي الشُعاع طخت براسي خطيه
صحت ااااااااي لكيتهااااا ، كعدت اباوع ع رجلي مشخطات يمكن من تكسير الجام بقيت اباوع ع رجلي راحت عيوني ع اثر الطلقه الي برجلي بقيت صافنه
سريع نزلت دموعي واني اتذكر الي صار مسحت دموعي سريع لازم اكون قويه واحاول انسى الي صار اي نارا انتِ قويه وكفت كدام المرايا واني اشجع بنفسي اكون اقوه
،رجعت فتحت شعري صار مسكر شوي من الضفيرة
رفعته وابتسمت اني قويه وراح ابقى قويه سحبت نفس
ورجعت نزلت جوه اكمل بالمقلوبه

هنَ ماكو يمي كملتها وخليتها ع النار وطلعت من الثلاجه لبن لبن وشفت ليمون ضحكت عصرته ع البن وكعدت ع الكرسي يم الميز بالمطبخ اشرب ف ثوبي جان مرفوع ماحسيت الا وحده دخلت شهكت رفعت راسي اباوع عليها
- اييييييع هاي شنو رجلج شبيها ليش سوده شنو وحمه ؟
اني ما سويت شي شربت البطل مال البن وكمت وكفت كدامها سحبت ايدها حطيت بيها البطل وطلع من المطبخ

اخذت الجهاز من خالتي واتصلت ع شُعاع نعمت صوتي سويت نفسي مايعه فد مره وحجيت ويا
- نارا :- حبيبي كملت المقلوبه
- شُعاع :- اااااخ شنو هذا صوتج شبيج
- نارا :- ضحكت بنعوصه هو يحجي
- شُعاع :- نارا شبيييج
- نارا :- شكوو
- شُعاع :- اشتعلووا الولد يمي عيب
- نارا :- اي اني شنو مسويه اووووي ؟
هو سكت شويه وسمعته كال
- شُعاع :- جايج
- نارا :- عزززززه سد الجهاز واني طفرت هذا راح يجي

سريع رحت للمطبخ جهزت الاكل وبقيت كاعده يمه خاف هذن الخبيثات يخربنه هههههه بقيت انتظره ورى فتره سمعت صوته وهنَ يسلمن عليه ويسألنه ع مصطفى ورى شوي صاح عليه اروح ورى اني تقربت منه حجيت بهمس
- نارا :- اني خايفه لا يحطن شي للأكل ، هو فتح عينه ع وسعهن
- شُعاع :- شنو
- نارا :- ايي شبيك اخذهن للسياره واقفل عليهن
- شُعاع :- أمري ال الله جيبي
- نارا :- ضحكت لان هو مستسلم الي اخذهن للسياره

واني ركضت صعدت قبله للغرفه
هو حطهن سريع واجى ورايه اني جنت واكفه ورى الباب
انتظره هو فتح الباب دخل وسده سريع لزمني من ايدي سحبني اله
- شبيج هااا
- دفعني ويمشي واني أمشى ورى ردت اتعثر لزمني من ايدي ورجع دفعني ع السرير وتقرب مني عيونه عليه ما وكعت واني صابني الثول
- شبيج وياي
- ضحكت اتنعوص عليه ، شبيه غير زوجي ! فتح عينه
- متأكده انتِ نارا ؟
- خليت اصبعي ع رقبته ومشيتها ع كيف ، اي اني ناار
هو بس فاتح عينه مصدوم من تصرفاتي غريبه ويا
- حجن وياج ؟
- اااااممم ولو يحجن الخاطرك والخاطر امك اسكت هو
بقى صافن بوجهي ماحسيت الا وكف وصار يفتح بالقميص مالته اني عيني عليه وكفت تقربت منه وهو رجع صار ظهره ع الحايط رفعت ايدي بالكوه ضامه الضحكه
سديت الازرار الي فتحهن هو صافن همست اله ، ها ؟
- هاا شنو
- عيب حبيبي الاكل برى لا يبرد
- عوفج من الاكل اشتعلوااا كلهم ما اودي
- صحت بي بصوت ناعم ، شُعاااااااع ، هو رجع فتح القميص لازمني
- هااا ياروحه
- اني عناد بي تقربت اله رفعت رجليه هو نزل الطولي وهمست بأذنه ، كوم ودي الاكل لا هسه املخك
- انتِ تملخيني ؟
- اي
- تجربين ؟
- ههههه لا
- ليش خليج عند كلمتج وملخيني
- رجعت ضحكت بصوت عالي

- بييكووو خليج عندج كلمتج
- صفنت ، شنو بيكو ؟ هو ضحك
- ماكو شي
- كوووول الي شنو بيكووو ؟ هو تقرب الي وهمس بصوت
هادئ حيل
- اريدج
- لااااا كوم ودي الاكل جدر المقلوبه هسه يبرد عيني
- انتِ جدر كلبي
- ضحكت ، شنووو ؟؟
- اي شبيج جدر كلبي انتِ
- ابتسمت اله، باوع اشتاقيت الاخواتي اريد ملابسي اريد جهازي بس اخاف ادخل الهذاك البيت
- سهله بابا اني اجيبهن
- ايييي وجيب وياك الأحمر
- يا احمر ؟
- الثوب شبيك
- ها الاحمرر كلتي
- ههههه اي
- خدودك هم حمر ولك
- شُكرا
- اهلا ورده
كام عدل نفسه ورتب القميص مالته يباوع عليه بعتب واني اضحك اتقرب مني عضني بقوه من زندي خلاني ابجي
لان اضحك عليه وطلع

اني نزلت ورى شفته جان يحجي ويا امه تبجي وتحجي ويا
تكول اله تعبتوني وهو يبوس بأديه اندك الباب وهو أشر الي حتى اصعد البس غير شي انتبهت دخلن بنات وياهن اطفال استغربت منو هذول رحت ركض ع وفاء

- نارا :- وفاااء اريد شي البسسه ، انطتني شال ، لج شسوي بالشال ورجليه طالعه
- وفاء :- اوكفي اجيب الج ثوب من ماما
- نارا :- راحت جابت الي ويا شال لبسته وخليت عطر ونزلت سملت واني ما اعرف من كعدت انتبهت بس الخزرات تطاير من كل مكان
- ام شُعاع :- هاي زوجه شُعاع
- نارا :- ضحكن بوجهي ورجعن باسني رجعت ام شُعاع عرفتني عليها
- ام شُعاع :- تكون زوجه زوجي الاولى
- نارا :- ياااا يعني ضرتها سديت حلكي داكول شنو سبب الخزرات ابتسمت بوجها ، اهلا وسهلا خاله اباوع ع بناتها مو مثل بنات ام شُعاع يعني مو مثل لبسهن وهنَ لبسهن محتشم وماكو قصير واحسهن حبابات حيل
اكو ولد وياهم دخلوا اني ماشايفتهم رجعت عرفتني عليهم
- ام شُعاع :- هذول اخوان شُعاع ( شيت ، هود ، احمد ، وسليمان )
- نارا :- استغربت من اسم شيت بس ماحجيت سلمت عليهم ورجعت عرفتني ع البنات
- ام شُعاع :- وهذن اخواته ( ريحانه ، مسك ، خديجه ، زينب ، اما الصغيره ام البنين )
- نارا :- سملت عليهن حيل حبابات ويختلفن عن بنات ام شُعاع كعدت وياهن وسولفت وحبيتهن وهنَ هم حبني

رادن مني اروح وياهن واني كلت الهن اكول الشُعاع بالاول
حسيت بأم شُعاع نافرتهن وماعرف شبيها اكو شي بس ماعرف شنو هو بالضبط واحس اكو خوف بوجه ام شُعاع
اما زوجته الثانيه نظراتها مو طبيعيه احس لازمه عليها
شي استغربت وبقى بالي الموضوع شبيهن هذن أعداء

مر الوقت واجه شُعاع صعد فوك شافني تأخرت ما اجيت
ورى صاحني من فوك

- شُعاع :- لج توووليبي
- نارا :- صعدت اركض وهن يضحكن لان سمعنه ، عززه شُعاع فضحتنااا
- شُعاع :- تعالي عوفج منهم
- نارا :- هاا
- شُعاع :- تدرين من اول ماتزوجت الحد هسه مامرتاح لا انتِ ولا اني عشنه براحه
- نارا :- موو بله
- شُعاع :- اي والله
- نارا :- الحمدلله، اخوك ؟
- شُعاع :- اليوم يطلع
- نارا :- ياااا وهيج تحجيهااا
- شُعاع :- اي ليش ؟
- نارا :- اي غير نجهززز اله شي ، ضحك بفرح
خلي انزل ابشرهم
- شُعاع :- لج اني حجزت كل شي من برى حتى الاكل
- نارا :- لعد ليش ما كلت الي
- شُعاع :- لج تعااالي

سحبني من ايدي وكعت ع السرير صرت بصفه
حضني الصدره وجعصني جعص بحضنه

- شُعاع :- ايي وهسه كلت الج
- نارا :- زين جيب الي ملابس من بيتنا
- شُعاع :- لج ناارا حسي بيه مشتاق الج
- نارا :- اممم مشتاق الي ؟
- شُعاع :- وعيونج
- نارا :- تدري اول مره اشوفك حيل تعبان ع مصطفى
- شُعاع :- غير اخوي هذا روحي لو شما كبر اشوفه هذاك الصغير الي يريد مني ادرسه واكعد اضرب بي علابيات واكفخ بي
- نارا :- خطيه ليش هيج
- شُعاع :- يقاطعني واني اضوج من الي يقاطعني بس مرات يحفظ بسرعه واني اغار ع الذكاء مالته
- نارا :- ههههههه يعني انتَ مو ذكي ؟
- شُعاع :- شنو تشوفين انتِ ؟
- نارا :- ذكي بس صامت بنفس الوقت يعني ما تحجي هواي
- شُعاع :- احسن

صفنت بعدين اتذكرت من يغسل شلون يأذي نفسه
سحبت نفس

- نارا :- شُعاع جاي اشوفك من اتغسل تكرر هواي ؟
- شُعاع :- نارا القذارة الي مريت بيها هناك مو سهله ماجنت هيج الهاي الدرجه
- نارا :- يعني هسه ديطلع التعب
- شُعاع :- الانسان وين جان بقمه القذارة مايكدر يتخطى بيوم او يومين الي مر بي شنو من انسان هذا
- نارا :- اني هنا ابتسمت ، حتى زواجنا مر بسرعه كل شي ما فهمت ولا كدرت احجي وياك بوقت محدد ومناسب
- شُعاع :- ها نعيده ؟
- نارا :- هههههه لا ، يلا اكعد

باوع بوجهي مسح ع خدي وابتسم سحب خدي وباس
ايده وعيونه بعيوني خجلت من نظراته
- شُعاع :- نارا راح ابيع بيتنا واشتري يم بيت الشذام
- نارا :- فتحت عيوني فرحانه احس روحي طارت ، اااييي
- شُعاع :- اي حبيبي
- نارا :- تمام حبيبي

ورى تقريبا ساعتين الجهاز مالته دك هو كام كال راح اجيب مصطفى وبطريقي اجيب الاكل ، اني هم كمت طلع اله ملابس اخذهن وراح يسبح طلع يمشط بشعره ويخلي
عطر بحيث الغرفه انترست بالعطر مالته انتبهت عليه
سحب الساعه مالته السوده واني منتبهه عليه كل مره يلبسها رغم عنده هواي ساعات
- نارا :- ليش تلبس هاي الساعه وانتَ عندك هواي ؟
ابتسم بوجهي وغمز الي

- شُعاع :- لان حالك الاسوداد .
- نارا :- شنو يعني ؟؟
- شُعاع :- شديده السواد مثل ظلام الليل

- نارا :- وتحبها ؟
- شُعاع :- اي
- نارا :- احد منطيها لك ؟
- شُعاع :- ساعه الوالد مشتريها من الخارج
- نارا :- من وين مشتريها ؟
- شُعاع :- من الإمارات
- نارا :- زين شلون تفهم الوقت ؟
- شُعاع :- وقتها ع 75 ملم

- نارا :- هنا احس انضربت ع راسي رجع بيه الوقت
الهذاك اليوم وبالاخص حرف والرقم R 75 ، رفعت راسي سألته ، شُعاع الفرع الي بالموصل مالتنه
- شُعاع :- شبي
- نارا :- كتبوا عليه R
- شُعاع :- اي يعني روافض
- نارا :- فتحت عيوني ، وليش هيج ساعتك 75 !! هو اتقرب الي ابتسم بوجهي
- شُعاع :- لان مو ساعه عاديه .

- نارا :- كال هيج وطلع بقيت اني صافنه وعقلي يضرب اخماس بأسداس بقيت جامده وليش هذا الرقم الي اختاره ؟؟؟؟؟؟ احس عقلي راح ينفجر هناااااك واتذكررررت الغرفه الي بالموصل مال العمليات الي دخلت بيها 75 !!! بقيت صافنه شنوو هذا !!! اختل توازني
اتذكرت الابتوب مالته ركضت سحبته فتحت الابتوب لكيت الخلفيه مالته مكتوب رقم 75 !! يا الله شنو الي ديصيرررر كعدت ع الارضيه وجهي بهت احس الدنيا شالتني وركعتني مامفتهمه اي شي اباوع ملابسه كُلها بلون الأسود انتبهت ع الحذاء سحبته لكيت مكتوب بي رقم 75 زين معقوله هاي صدفه ؟

شمرت الي بأيدي ونزلت جوه بس اتصفن وهمَ يجهزون
الخروج مصطفى هسه اني عرفت شنو يعني حرف R بس الرقم شنو ! مشيت دخلت للصاله بس اتصفن بالحايط
انتبهت اكو شخط صغير اتقربت منه انتهبت شخط احمر ومكتوب بصفه 75 وعليه مثل العلامه اكس بلون الأحمر
احس صرت صفره ورجليه بادن من الخوف وفاء شافتني
اجتي تركض الي

- وفاء :- شبيج نارا ؟؟؟
- نارا :- شنو هاي ؟ اشرت ع الرقم
- وفاء :- والله ماعرف بس ابويه هو الي كتبه
- نارا :- صار الها شكد ؟
- وفاء :- هواي صارت ذكرى من ابويه
- نارا :- ابوج !!!
- وفاء :- اي
- نارا :- اني بس صافنه بوجها
- وفاء :- شفيج وايد ادققين
- نارا :- عقدت حاجبي ، شنو ؟
- وفاء :- عادي مرات نحجي خليجي
- نارا :- صدُك !
- وفاء :- اي والله ، يلا تعالي يمنه

طلعت يمهم برى وانتبهت عليهم بينهم صحيح كلمات
خليجيه يعني مايحجون بحت عراقي اني بس صافنه عليهم ورى فتره سمعت صوت السياره عرفتهم اجويه
وكفنا متجهزين وهم دخلوا صارت هوسه والكُل يتحمد اله بالسلامه اني ابتسمت بس بالي مو يمهم سلمت عليه
وهو يضحك بوجهي ورى شوي فرشوا السفره وكعدوا كلهم سوه اني هم كعدت اباوع عليهم كُلهم فرحانين وعائله كامله بنفس هاي اللحظه حسيت اني مو منهم
حسيت نفسي غريبه عنهم مُجرد شُعاع هو الوصل الي بيني وبينهم انتبهت ع شُعاع حجه وياهم

- شُعاع :- يُبا عطني ذا
- نارا :- انطى الي يريده ورد عليه " اتفضل يلأخو "
اني بقيت صافنه صارت هواي اسأله تتراود بعقلي كملوا اكل واجتي نُبل و وياها هم مساعده شالوا الاكل وجابوا جاي كعدوا يشربون واني تاركه الوضع ع الصامت بس سألت مصطفى عن صحته

- نارا :- شلون صرت ؟
- مصطفى :- الحمدلله احسن بس بوقتها بالي بقى وياج
- نارا :- الحمدلله عدت ع خير بعدين انسولف موزين عليك
- مصطفى :- ليش مخيطين حلكي وماعرف
- نارا :- يعني اخاف تتعب
- مصطفى :- لا ما اتعب عيني عيني
- نارا :- ابتسمت ، ماشي عيني

حسيت شُعاع انتبه علينا رفعت راسي وصحيح شفته
باوع علينه ورجع يسولف وياهم رجعت اتذكرت الرقم وسألت مصطفى

- نارا :- مصطفى شنو هذا الرقم إلى هنا مكتوب
- مصطفى :- خاص بأ ابويه ليش تسألين
- نارا :- هو داسأل لان شفتها قبل شويه... ردت اكمل وقاطعنه شُعاع
- شُعاع :- شدسولفون؟
- نارا :- هيج داسأله ع العمليه
- شُعاع :- هو انتوا اثنينكم نساتل تتعبون بسرعه
- مصطفى :- افااا يخوي انا نستله ؟
- شُعاع :- اي نستلتي
- مصطفى :- اذا اني نستلتك شبقيت النارا
- شُعاع :- لا هي تختلف عنك يبوي
- نارا :- ضحكت وهم ضحكوا ع كلامهم

وراها راحوا كُل واحد البيته ودخلنا مصطفى ينام
حتى يرتاح واني وشُعاع صعدنا فوك كلت الا اسأله
الفضول راح يموتني

- نارا :- ما كلت الي شنو سالفه رقم 75 مافهمته
- شُعاع :- وليش الا تفهمي ؟
- نارا :- عقد حاجبي من نظراته ، هيج مجرد فضول
و هذا الرقم صار تصادف ويا الرقم الي خلوا داعش ع بيتنا
- شُعاع :- اي تصير صدفه عادي
- نارا :- تعرف ابويه ؟
- شُعاع :- لا
- نارا :- حسيت نبره صوته اختلفت وبي لمحه كذب
صفنت بوجهة وهو حضني
- شُعاع :- احبج
- نارا :- واني احبك

بقى راسي يشتغل بس افكر وافكر شنو الي صار
ليش هيج فجأة تغير الوضع الهاي الناحيه بقى الرقم براسي سحبت نفسي من شُعاع ورحت للساعه شلتها
بقيت صافنه بيها صرت احرك بالساعه صار بيها صوت واهتزت سريع شمرتها باوعت ع شُعاع لكيته يباوع عليه بنظرات حسيت كلبي صار يدك بسرعه وحيل خفت منه
ضغطت ع ايدي ورحت يمه

- شبيك ؟
- ليش لزمتيها !
- ماعرف بس هيج شفتها ، هو خزرني حتى خفت منه هواي نظراته تغيرت اتجاهي رجف كلبي شبي هذا شو تغير ، شبيك شُعاع ؟
- نامي
- جانت نبره صوته تخوف بدون ما احجي اتمددت ع السرير وهو عيونه عليه ، شُعاع شيل عيونك مني شبيك !
هو مستمر يباوع عليه بنفس النظرات ، شُعاع شبيك تباوع هيج لاتخوفني !! مستمره احجي وهو ولا يمه الغرفه صح ظلمه بس بيها ضوه يعني الملامح تبين حتى الوجه ، اتقرب مني بنفس النظرات خفت وعيوني انملت بالدموع
ماتحملت وبجيت ، وخرررر شُعاع شبييييك ترى والله هسه اصيح والم عليك الناااس وخخررررر مني ، احجي ويا وهو مستمر يتقرب مني وفاتح عيونه طفرت من عنده وصخرت من خوفي ، وووووووخررررر شُعااااااااع

ماحسيت الا باب الغرفه انفتح دخلت عمتي وهو كدامي
اني ركضت وكفت ورى عمتي خايفه منه خزرني بقوه
- شُعاع :- تعالي نامي
- نارا :- عمه فدوووه ماااريد ، دارت وجها عليه مستغربه
- ام شُعاع :- شبيج ؟
- شُعاع :- عوفيها
- نارا :- مستمر يخزر حتى امه خافت منه
- ام شُعاع :- عوفها شبيك خليها يمي
- نارا :- هو صاح بصوت وفاتح عيونه
- شُعاع :- عوووفيهاااا ، تعاالي
- نارا :- اني اتبسمرت بالمكان احجي ويا وارجف ، والله هسه اكتل روووحي شُعاع عوفني انام يم عمتي ، هو خزرني دفنت راسي بحضن عمتي ، فدوه عمه خلي ننزل
- ام شُعاع :- تعالي
- نارا :- هو خزرني اقوه ، سحبتني نزلتني وياها بالغرفه مالتها

لزكت بيها لزك وهي غطتني هي هم ما مفتهمه
شنو الي صار وليش هو هيج
- ام شُعاع :- صلي ع محمد ، شبي ليش هيج وياج ؟
- نارا :- ماااعرف والله الوحده هيج صار
- ام شُعاع :- تمام اهدئي

ورى تقريبا ساعه عمتي نامت واني بقيت كاعده سمعت
صوت صار ع الدرج حسيت راح يصير بيه سكر من الخوف
رجعت اسمع صوت خطوات مشي بالبيت اني راحت روحي حضنت عمتي هي فزت سألتني شبيج رديت عليها مابيه شي وهي رجعت نامت رجعت حضنتها خايفه
ماحسيت الا الباب مال الغرفه انفتح شفته هو عيونه عليه
صرخت خايفه حسيته مو شُعاع حسيت واحد ثاني
عمتي كعدت وهو راح

- ام شُعاع :- اسم الله شبيج
- نارا :- امشي انروح يم مصطفى والبنات والله هسه اموت خلي نتجمع بغرفه وحده
- ام شُعاع :- اهدئي مثل ما تريدين
- نارا :- صحيح اخذتني يم مصطفى وجابت البنات وهمَ مستغربين ماسألوا لان شافوا حالتي هيج إلى أن صار الصبح واني عيوني ما شايفه النوم
انفتح الباب ودخل شُعاع اني بقيت مصدومه وهو مصدوم

- شُعاع :- وينج ليش هنا نايمه وشكو نايمين كلكم سوه !
- نارا :- بقيت مصدومه ، شنو ؟
- شُعاع :- لج ادور عليج مالكيتج يمي
- نارا :- اباوع ع عمتي مصدومه اجه تقرب مني صحت بي ، لااااا تتقرب مني ، كمز مصطفى
- مصطفى :- شكوو شبيكم
- نارا :- رحت العمتي ، عمه وخري مني فدوه
- ام شُعاع :- اطلع اطلع ماتشوف حالتها شلون صارت
- نارا :- اني بقيت ابجي خايفه اريد شخص يلمني بحضنه
- مصطفى :- غير افهم شكووووو
- نارا :- حجيت اله الي صار
- مصطفى :- اني سمعت الصوت بس ماكدرت اكوم
استغفر الله، يمه خاف مسوين شي اله !!
- ام شُعاع :- والله ما ادري
- مصطفى :- لازم انروح السيد شي مايبقى هيج حالته
- ام شُعاع :- دخيلك ربي ابني ششبي

- نارا :- ديحجون جان شُعاع يصيح
- شُعاع :- ها ادخل لو لا ؟
- نارا :- سريع صرت ورى عمتي وهو دخل
- شُعاع :- شكو بس اريد افهم شبيكم
- ام شُعاع :- مابينه شي
- نارا :- نزلت راسي اسمع يضحك
- شُعاع :- غير افهم شكو ، نارا اريدج تعالي
- نارا :- مااااا والله ما اجي وياك
- شُعاع :- ولج بابا شبيج
- نارا :- والعباس والحُسين مااا اجي
- شُعاع :- صدك تحجين !!
- ام شُعاع :- تعالي نارا نصعد اني وياج
- نارا :- زين خلي البنات هم يصعدن ومصطفى
- مصطفى :- خوب ابقوا هنا اني شلون اصعد
- نارا :- يحاول يلطف الجو وهم ضحكوا

صعد شُعاع واني لازمه بعمتي صعدت وياي دخل للغرفه واني بقيت هو يحجي وياي حتى ادخل دخلت للغرفه
ويا عمتي والبنات يباوعن

- شُعاع :- شلون اريد احاجيج
- ام شُعاع :- باعي ماما اني ورى الباب راح ابقى اذا
ردتي شي صحيني
- نارا :- طلعت هيَ والبنات برى اني شفته راد يسد الباب صحت ، لاااا تسده عوفه مفتوح ، هو تركه وتقرب مني
- شُعاع :- بس فهميني شنو الي صار
- نارا :- ووخرررر ، هو ضحك
- شُعاع :- مسوي الج شي واني ما اعرف ؟
- نارا :- شنو تريد مننني
- شُعاع :- غير انتِ مرتي واريدج
- نارا :- تقرب مني راد يبوسني واني خفت صحت ، وووووخررررررر دخلت عمتي ترك وهو صاح بصوت عالي
- شُعاع :- ششششششبيكم !!!!!
- ام شُعاع :- شنو شكووو
- شُعاع :- الله اكبر حتى البوسه ممنوعه شكوووو
- نارا :- ابتعدت عنه ورحت يم عمتي وهو طلع

بقيت كاعده بالغرفه الخوف اكلني رحت نزلت جوه
يم عمتي احجي وياها كلت انام يمها اليوم لان اتوقع يصير مثل البارحه مو بعيده عنه يموتني دخلت جانت يم مصطفى كاعده

- نارا :- عمه اريد انام اليوم يمج
- ام شُعاع :- ماما وزوجج مايصير هيج
- نارا :- غير اخاف منه هو يخوف
- ام شُعاع :- اهدئي مو هيج
- نارا :- بعدني احجي وياها وهو دخل نظراته تخوف
- شُعاع :- تعالي صعدي ورايه
- نارا :- هاا اي اي ، حسيت صوته تغير
- مصطفى :- أهدأ ياخويه شبيك
- شُعاع :- نااارااا شكلت
- نارا :- اي والله جاايه احس الرعب احتلني

اول ما ردت اصعد جان يجرني من شعري وسحبني ورى
يصعدني واني اصرخ اريده يعوفني ماعرف شبي تخبل مثل البارحه دخلني للغرفه يسحل بيه دفعني وطلع السجينه
بوجهي يحجي مثل المجنون
- شُعاع :- تريدين اذبحج !!!!
تقرب مني وحط السجينه ع رقبتي اني صرخت ياااااعلي
بعلوا صوتي ودفعته بقوه هو اندفع لان ما جان متوقع مني ادفعه ركضت فتحت الباب اركض وهو ورايه يركض نزلت راكض اهله شافوني انصدموا صارت غرفت مصطفى كدامي الي نايم بيها دخلت وسديت الباب مصطفى مايكدر يكوم اجيت يمه سحب الغطه وتلفلفت بي ارجف
احجي ويا مصطفى وارجف ، فدووه الحك الي
- مصطفى :- اهدئي بس اهدئي
- نارا :- اسمع برى شُعاع يصيح ومصطفى صاح بي ب
- مصطفى :- رااااااح اكوم لك وحق كافل زينب
- نارا :- شويه وسمعت صوت التكسير من فوك

- مصطفى :- كافي خويه ع كيفج اهدئي
- نارا :- راح اموت مصطفى خايفه منه اني ، شويه وفتحت الباب لان امه برى تحجي وياي ودخلت
- ام شُعاع :- لازم انسوي شي الباجر اله شوف حالته شصار بي اتخبل علينا
- نارا :- والله ما ابقى هنا راد يموتني ، اني اشهك وابجي وهم يهدون بيه مايعرفون الي بداخلي شنو
اسمعه يصيح من فوك بأسمي بصوت عالي مره يصيح بأسمي ومره يصيح ( نااارااا اذبحجججج )
ومصطفى يصيح عليه والله هسه اجيك وهذاك يصيح
صارت هوسه وخبصه
مصطفى :- شُعاع ااااني اكووووم اذبحك موووو انتَ تذبحها
- نارا :- فتحت عيوني ، ششنو تذبحه
- مصطفى :- هسه اني مسويها صدك شبيج
-نارا :- رجع يصيح
- شُعاع :- تعااااااالي اصعددددي نااااراااا
- نارا :- عمه طلعوووني من البيت طلعوووني
- ام شُعاع :- عززززه مانكدر والله يلحكج ويكتلج
- نارا :- مااااريده مااااريده
- مصطفى :- اهدئي نارا مو هييج
رجع يصيح درت وجهي عليهم ارجف
- نارا :- عممممه راح يجي يذبحني
- ام شُعاع :- اهدئي هذا الباب وقفلته

احس حيلي انهد اسمعه كل شويه يصعد وينزل
ع الدرج نوب اسمع تسكير الأغراض ويجي ينزل يفتح الباب
ويبقى يدك مثل المجنون ويرجع يصعد احس حيلي انهد
وكلبي تعب بزايد من حلاوه روحي ومن الخوف لزمت بأيد مصطفى

- مصطفى :- اسم الله شبيج
- نارا :- رديت عليه بهمس خايفه لا شُعاع يسمعني ، شوف مصطفى هسه يجيني دينزل الدرج ويصعد شنو نسوي
- مصطفى :- اهدئي خلي يطلع الصبح والله كريم
- نارا :- ابتعدت عنه ورجعت لزمت بعمتي خايفه
وعركانه إلى أن طلع الصبح واني ما نايمه

اسمع دك بالبيبان مال البيت وصوت شُعاع يصيح
" وينكم وين تختفون اريد افهم "
يصيح عصبي واني خاتله فتحوا الباب دخل شافني خاتله يم مصطفى شافني صاح بيه
- شُعاع :- كووووومي ناااارا
- نارا :- فزيت خايفه من صوته صبح ع امه ورفع حاجبه يباوع عليه
- شُعاع :- صباح الخير يمه ، شنو تسوين هنا ؟
- نارا :- هااا !
- ام شُعاع :- لا ماكو بس مصطفى جرحه صار يوجعه وهي يمنه
- شُعاع :- وهيج بهذا القرب ؟؟؟؟
- نارا :- تقرب مني لزمني من ايدي وسحبني اني دفعته ، وووخرررر
- شُعاع :- شبييييج تخبلتي علييييه
- نارا :- وديني البيت عنقاء
- شُعاع :- شنوو ؟
- نارا :- وددديني ترى والله اموت نفسي هسه
- شُعاع :- سحب نفس ، تمام اصعدي لبسي
- نارا :- وكفت يم مصطفى ، لا عمتي تجيب الي
- شُعاع :- ششششبيج نااااارا ، شو وخري منه
- نارا :- يقصد لان واكفه يم مصطفى ومحتميه بي
اجه سحبني منه واني رجعت وكفت يمه خايفه
- مصطفى :- عوفها خويه شبييك

- نارا :- صار احمر دم صاح بيه يلا اطلعي، لبست العباه واني منهاره صعدت ورى بالسياره وايدي ع الباب كلت بس يسوي شي افتح الباب واشمر نفسي وهو يسحب نفس بعصبيه يسوق وما يحجي اول ما وصلت البيت عنقاء نزلت ركض فتحوا الباب و دخلت حتى بدون سلام وهو راح
حتى ما حجيت ويا اي كلمه
كعدت بصف عنقاء مصدومه بيه

- عنقاء :- شبيج ولج ؟
- نارا :- اريد اروح ابقى يم بيت ام لُجين
- عنقاء :- عززززه شششكو
- نارا :- كعدت احجي الها السالفه ورجعت انهاريت ، اخذيني عنقاء حبابه ، هي اتصلت ع لُجين وفهمتها السالفه وبقت ادك ع راسها ورى شويه اجتي لُجين هي وعابد بدون ما احد يحس ومابلغت شُعاع ولا اي واحد
اخذوني ودوني البيت ام لُجين اول ما دخلت حضنني البنات مشتاقات الي اول كلمه نطقتها
- نارا :- اني بعد ما اروح ، هنَ انصدمن بي
- ليشش شكو ؟؟
- نارا :- ما اريده
- صاحن مصدومات ، ليشششش
- نارا :- احسسن

بقيت يمهن اني ٤ ايام بالضبط بس بهذن الايام
احس روحي راح تطلع من الخوف كُل ما الباب يندك
افز اكول هوَ اجه راح يذبحني مانمت الليل وبقيت الوب طول الوقت وبالي بس يمه شبي ليش هيج تغير عليه
بهاي السرعه مو جنه حلوين والكُل عينه علينا لان فرحانين بزواجنا
رابع يوم اجه شُعاع للبيت صاحني حتى نكعد ونتفاهم سوه
سحبت نفس ودخلت هو جان كاعد يهز برجله
ومدنك راسه وبأديه الجكاره
اول ما دخلت هو رفع راسه يباوع عليه اني عيوني انملت بالدموع شلون جنه وهسه وين وصلنا حتى هو شكله حيل
تعبان ومتغير وصاير اسمر بزياده وكف ع طوله وطفى الجكاره بالطفايه سحب نفس وتقرب مني اني لزكت روحي بالحايط هو صار كدامي بعيونه لمعه بس ماعرفت افسرها

رفع ايده سندها بص راسي ع الحايط وايده الثانيه حطها
ع خصري ضغط ع خصري اني نزلت راسي ارجف خايفه منه همس الي بهدوء
- ارفعي راسج
- رفعت راسي والدمعه بطرف عيني
- نـــــينا
- رجفت شفايفي اول ما نطق هذا الاسم ابتسم بوجهي
- نرجع !
- هزيت راسي وكعت الدمعه من عيني شُعاع طلكني .

◆◆◆◆◆◆◆◆◆◆◆◆♥︎◆◆◆◆◆◆◆◆◆◆◆◆

مو مَالت ودَاع
هستونة مِتلاگين
بعدها عيونةٌ
مَن المستحِة مَدنكَـة
بعدها تشوُفنا
عُيون الشمس ظِلين
ما لحَكَنة نكسر عَينها بشبكَـةٌ .
اااي واكولن
اعذرني راح انسحب
ما راح اضَـل اكثر
البينك وبيني بعد
حتى بمرور الوقت ما راح يتطور.
" يتبع "

التوووووقعااااااااات بسرررررعه🤸‍♀️☻️

هاي الساعه مال شُعاع الي حجوا عنها