الربتج " حالك الاسوداد " الفصل الثاني 2 - بقلم رهف علي

البـــــداية

عزيزي القارئ عندما تقوم في قراءة
هذا الروايه معنا من البدايه سوف تدخُل وتعيش احدثً
مُشوقهً ومُغامرات كثيره واخاطر مُرعبه
قد لا تُصدق حقاً انها قد حُدثت
لكن في الواقع انها قد حَدثت
روايه ليست بخياليه وأنما واقعيه
حدثت ع الاراضي العراقيه
بعدهَ جنسياتً مُختلفه
عبر أجزاء هذه الروايه الحافله بالاثاره والتشويق
ستمضي رحلتنا منذ البدايه إلى النهاية
شاقه بشتى صنوف القسوه
وتحذير تحتوي ع عده رموز تؤدي الى فك الغاز
عديده
تحذير هام هُنالك مشاهد قد لا تستطيع
تحملها لشده قوتها وقسوتها
اذاً هل انتَ مُستعد ؟

عزيزي
اكتب تاريخ مصادفتك لقراءة الروايه

لاتنسون التصويت والتعليقات الطيفه مَثلُكم ع الفقرات

ــــــــــــــــــــــــــــــ•●•ـــــــــــــــــــــــــــــــ

أصوات ، ضوضاء ، همسات ، ذبذبات كثيره
أحاديث واقاويل مخيفه ، نسمات هواء مُتعبه
مٌحمله في العديد من الأخبار السيئه
هادفه ساعيه إلى الدمار !!!!!

دخلت اتمشى واني شايله بأ ايدي الكتاب
اباوع الوضع مو مثل قبل أجواء الطلاب متوتره
كل ساعه اسمع خبر جديد يُرهب
احس عايشين بدوامه كُل شوي يجي مرسال واخبار جديده
حسيت اخر الاخبار اخذتني العالم ثاني
الخوف وعدم الأمان دائما احسهم ع اهب الاستعداد ومترقبين بعيون ما تنام

رفعت عيوني واني ادور ع صديقتي إسراء
احنه بالعادة يوميه نوكف بنفس المكان
حتى ماا وحده اتيه الثانيه واني وياها متعودين كُله سوه اول ما وصلت المكان ما لكيتها
بقيت انتظرها واني واكفه بمكاني رفعت راسي
صارت عيني بعين واحد ماعرف ليش ب للحظه وحده
ماعرف شنو حسيت !!

اول مره اشوفه بالكُليه واحنه ما مخلين شبر بالكُليه
ما داخلي يعني حتى حافظين أشكال الطلاب
بس هذا اول مره اشوفه استغربت شكله
حتى مو مثل بقيه الطلاب البس يختلف
والشكل هم يختلف
لابس اسود من فوك للجوه جان صاحب ذقن اسود
حسيته مرتبك او يتلفت يعني ما ماخذ راحته
كُل شوي عيونه تصير بمكان ويباوع ع الطُلاب
شكله جاب الريبه
وتصرفاته ما محزوره هو جان كاعد
بقيت صافنه عليه وعيوني ماوكعت منه
ردت اشوف شنو يسوي ومنو هذا
ليش كُل هذا التوتر والقلق الي واضح ع وجهة

صار عيونه بعيوني مره ثانيه وصفن بوجهي
اول ما شافني صافنه بوجهة سريع
وكف ع طوله الزي مالته حيل غريب
مشى بعيد عني اني مشيت ورى

بعدني دامشي وحسيت ب أيد صارت ع كتفي
فزيت خايفه ..

أسراء : نينااا وينج صارلي ساعه ادور عليج هاا

نارا : خليت ايدي ع كلبي وغمضت عيوني
اخذ نفس ، لج شبيج اكو وحده هيج تسوي
زين ما وكف كلبي بسببج

أسراء : يمعوده هسه اني شنو سويت بعدين وين رايحه ليش مو واكفه بنفس مكانه وليش هيج
وجهج اصفر شنو صاير نينا ؟؟؟؟

نارا : بس ع كيفج نزلتي عليه بفرد اسأله
هو اني جنت واكفه انتظرج بس انتِ تأخرتي

أسراء : ليش هيج وجهج اصفر ؟؟

نارا : اكول انتِ هم شايفه هذا الولد الي فات
قبل شويه لابس لبس غريب واسود

أسراء : ليش تسألين عنه ؟؟؟

نارا : أي دجاوبيني

أسراء : نارا شبيج شعرفني اني الف واحد يدخل للكُليه ويطلع ليش هذا التدقيق من شوكت
صايره هيج ادققين بالشخص
اووو صايره ما تنطاقين

نارا : شبيج اكلتي راسي هسه اني شنو سألت
بعدين انتِ وين جنتي

اباوع عليه قلبت عيوني بملل وردت

أسراء : يعني متعرفن وين جنت هاي عود انتِ صديقتي

نارا : ضحكت ، هزيت حواجبي احب اشلع
كلبها ، لا وين جنتي اعترفي ، العوبه سريع
سنحت سبلت عيونها ، خلت ايدها
ع كلبها وردت بهُيام

أسراء : يعني غير ويا الحُب شبيج ياعيني
اووف اووف من الحُب ولهفته الحلوه

نارا : عيني جوليت خفي علينا لما هو خلكَ كرار
ليكول عبالك روميو

أسراء : امداج روميو شنو اصلاً ما يوصل الاظفر كراري

نارا : اووو انوب صار كراري شيخلصنا بعد
امشي هسه الاستاذ يجي
دخلنا للمحاضرة بس بالي كله صار يم هذا الشخص
منو بقيت طول المحاضره اني صافنه
حسيت بشعور مو حلو بس ليش هيج
حسيت ما اعرف ..

رجعت للبيت بعد ما ودعت أسراء بس
اني بالي بقى مشغول كُل شوي يرجع
تفكيري بهذا الشخص وابعده عن بالي ويرجع
من جديد استغفرت الله ودخلت البيت
لكيت صوت عالي خليت ايدي ع كلبي
شكو !!

دخلت المطبخ لكيت ماما وبابا يتعاركون وصوتهم
عالي وسياق حديثهم جان حيل مرعب
ماما جان تصيح تريد نرجع وهو قافل ما يقبل
خفت من كلامهم ماكدرت اسمع اكثر
شفت اخواني الصغار وأخواتي يبجون
صحت بيهم حتى يصعدون فوك ولتفتت عليهم

نارا : انتوا كبار مايصير هيج أصواتكم عاليه
شنو يكولون علينا ماخفتوا أطفالكم الصغار يخافون
منكم ، بعدني داحجي وماما عاطت بعصبيه

ابتسام : شنوووو اسكت شننوووو
انتِ ماتعرررفين شنو صايرررر هنااا لج داكول لابوج نرجع وهو قاااافل الوضع صاير مو أمان واني خايفه
عليكم لا يصير شي بيكم وبي هو همم

علي : ابتساام شبيج !!

نارا : ماما اعصابج حبابه ، اباوع لطمت ع راسها
وعيونها كلها دموع

ابتسام : بس فهموني شلون اسكت ولكم
بيت ابو اسعد أصحاب الأسواق الي بصفنا
اخذوووا ابنهم جان طالع يفتح الأسواق وبعد ما رجعوا
وهسه جاي يدورون عليه مثل المجانين
تريدون يصير بينا مثل ما صار بيهم هااا
تريدون ندمر

علي : لا إله الا الله جزززعت من هذا الكلام
شلوووون بيه والله تخليني هسه اطلع واخليهم
ياااخذوني ويكتلوني وبعد ما أررررجع

ابتسام : علي لاتحجججججي هيييج تريد تموتني
شلون بيه اني وجهااالك شسشلون تريد تموتني
ناقصه عممر
والله اخذ جهالي واطلع منا واخليك انتَ تجي ورانه
ليش ما تحس بيه وبخوفي عليكم

اباوع بابا سحب نفس شلون المهموم
وشايل حمل كُلش جبير ع ظهره
رد متحسف

علي : بعد ما نكدر نطلع منا

ابتسام : صووووجك علي كل الي ديصير
بينا صووجك جبتنا من مكانه وخليتنااا هنا
علمود شغلك شووف بعينك شنو استفدنا هاا
حياتنا هسه بخطر ع لحظه يقتلونا

علي : شبيييج صلي ع محمد مو هيج الحجي

نارا : اعصابي تلفت واني اسمع كلامهم تعبت
صحت بيهم بصوت عالي
كاااااافي شبيكم انتوا صغاااار بعدين شنو
هذا التشائم ليش هيج تفكرون
اباوع اثنينهم سكتوا بس هم الاثنين مهمومين
حيل انقهرت عليهم بس شنو بيدنا نسوي
بعد مثل ما يكولون الفأس وكع بالرأس

عفتهم وصعدت فوك شمرت الجنطه والكتب الي
بأيدي غسلت وصلي كعدت ع السجاده ادعي
من كل كلبي ادعي ما يصير الي يفكرون بي
الخوف تلبس بيه بحيث شفتي صارت ترجف
والرجفه الي بجسمي ما توكف
ريقي جف مو هين الي دنعيشه
بلحظه وحده انقلبت حياتنا وصارت العكس
بعد فتره لميت سجادتي ونزلت

دخلت المطبخ ادور ع الغده بعز خوفي
بطني لوتني من الجوع
صرت ادور ع الاكل ماكو
صحت ماامااا دخلت للمطبخ

ابتسام : ها شبيج
نارا : شنو وين الغده شو ماكو ع الطباخ

ابتسام : ما سويت غده

نارا : تخصرت وعوجت حلكي ، يعني صارلج
ساعه تتعاركين وهسه غده ما مسويه النا
بس فهمينا شنو ناكل نعل !!!!
لزمت وضربتني ع راسي

ابتسام : احنه وين وانتِ وين تفكرين ب بطنج
ام بطن

نارا : لا ماما والله ع كيفج ويا بابا ترى هو
هم ما شفتي شلون مهموم يكفي
ضغط عليه ما يتحمل مايصير هيج
ع كيفج ويا

ابتسام : اووف يا نارا والله حقي هيج
احجي واصيح ماتعرفين شلون خايفه عليج انتِ واخواتج واخوانج حتى هو روحي صايره بروحه
كل ما يطلع اخلصها ادعيه اكول ع لحظه يلزموا
وبعد ما يرجعوا
لج ماما ماشفتي ام اسعد شصار بيها ابنها
ما رجعوا وعبالج يرجع ؟ لاا مايرجع راح
اكيد قتلوا وانتظري لو يرجعون جثته ال اهله لو ما يرجعوها شلون تريدين ابقى ساكته واني اشوف
كل هذا الي يصير وما اخاف عليكم ؟؟

نارا : كلامها زاد الخوف بداخلي أضعاف
الام تحس واكيد حيصير شي لا سامح الله
سحبت نفس ورديت عليها اطمنها ،
ميخالف ماما الله ما يعوفنه كولي يا الله

تقربت باستني من راسي وهي تبتسم

ابتسام : يا الله يلا كومي حبيبتي جهزي
الصينيه هسه ابوج جوعان

نارا : يعني صارلي ساعه اصيح جوعانه مافكرتي بيه بس هسه وصلت
السيد علي صحصحتي وكلتي جوعان
يمه الحُب يمه

ابتسام : ألسانج ولج بعدين شعندي غيره هذا حبيب الكَلب والروح

نارا : الله عليج ابتسام خانم واحنه شنو المصارين

ابتسام : ولا تجوزين ولج لزمي السانج وجهزي بدون صوت

نارا : تمام عيني مدام ابتسام ،
سوينه غده وكعدنا كل احنه نتغده حتى بابا
ماما مسويه نفسها زعلانه بس هو
يشيل ويحط كدامها لو يسوي لفات صغار ويخليهن
كدامها بدون ما يحجي وهي تاخذن تاكل بدون
ما تباوع عليه
الحب الي بينهم يخلق الف شعور بداخلي
يحسسني عايشه بعالم وردي مابي اي خطر
حبهم نقي اساساً تزوجوا عن حب
والهذا اليوم يزيد ما ينقص
ومايكدرون ينامون متخاصمين لازم يتراضون يلا ينامون
يعني زعلهم ابد ما يطول
وهذا الشي الي احبه بيهم..

خلصنه الاكل وغسلت المواعين
العصر ننجمع سوه ع عصروانيه ونتشاقه سوه
بوقتها ماما كالت اسويلكم عشه جاوبناها لا مو جوعانين وبابا رد عليها لا شبعان باوعت عليه بضحكه وردت لعد اسويلكم سياح وبيض ادري بيكم تحبوا
اني عفتهم وصعدت حتى اقرا

هستوني لزمت الكتاب واجه هذا الشاب ببالي
رجعت من جديد افكر بي منو هذا شكد
حاولت اطلعه من راسي بس ما طلع
لان اول مره اشوف هيج شخص ف من الطبيعي يبقى
براسي
نفضت الأفكار من راسي ردت اقرا ودك جهازي
باوعت لكيتها أسراء
اول ما فتحت الخط اجاني صوتها العالي تبجي
خفت عليها سألتها ..
شبيججج !!!!!

أسراء : الحكيني نينا

نارا : لج شكو وكعتي كلبي

أسراء : كرار ما يجاوبني مختفي

نارا : لج صدُك تحجين تاركه امتحانج وكاعده تبجين ومشغوله لان بس مايجاوب ؟

أسراء : غير خايفه عليه وهاي اول مره يسويها وياي
وما يجاوبني من حقي اخاف عليه
نينا راح اموت من الخوف عفيه شلون بيه

نارا : بس ع كيفج هسه اني اتصل عليه واشوف
بلكت يرد

أسراء : اي عفيه راح انتظرج مو تنسيني

نارا : تمام عمري ، فصلت الخط منها ورحت ادور
ع رقمه مسجلته كرارها بوقتها من ردت اسوي
روميو صيحت عليه الا ب اسمه
وعاد اخر شي ثبتت ع كرارها من كتبت هل اسم
اله صارت تضحك ونسمت فد مره لان نسبته الها
يعني صار ملك الها ، ضغطت اتصال
يدك يدك ومحد يشيله خلص الاتصال رجعت كررت
شكد حاولت بس ولا واحد رفع الخط
اني هم بالي انشغل وكلبي لعب
بس مستحيل اكول الها شي من هذا الاحساس
لان توهس هوااي
هستوني سديته منه ورجعت اتصلت عليها
ردت عليه بلهفة وبسرعه

أسراء : الله عليج كولي رد عليج

نارا : لا والله ما رد يمكن نايم سوسو شوفي اكيد أخذته نومه لو طالع وتارك جهازه انتِ عوفي هسه وكعدي
اقري عندنا امتحان صعب وبعدين رجعي
اتصلي بي
هي تنهدت ما مقتنعه وحاسه بي شي

أسراء : تمام

نارا : غلقت الخط منها ورفعت كتابي حتى اقرا
بس كل شوي يروح بالي للبعيد وافكر وارجع اقطع
سلسله افكاري واقرا وهيج كضيتها
إلى أن سديت الكتاب دخلت بفراشي ونمت ..

ثاني يوم كعدت من الصبح حتى نعسانه
وما شبعانه نوم غسلت ولبست ملابس الدوام ونزلت
لكيت ماما مجهزه الريوك الي والبابا بستها وما تريكت ما اريد اتأخر طلعت وهي تصيح ورايه اكلي بالدوام واني ارد عليها اي ماما ،
وصلت الكليه ودخلت بعدني دامشي جان اشوف أسراء اجتي تركض عليه
اباوع وجهة مو طبيعي خوفتني ومشيت الها بسرعه
صارت كدامي تبجي بجي وترجف لازمتني
اني لزمتها اريد افهم شبيها

نارا : لججج شبيييييج احجي

أسراء : نااارررا

نارا : عيونها فدوه بس احجيلي شبيج وكفتي كلبي

أسراء : كرار

نارا : اريد افهم ماكو لزمت وحضنتني وصارت تبجي
بقوه حضنتها بقوه ، اشش كولي يا الله ردت عليه
بصوت مخنوك

أسراء : راح اموت نارا والله لو صار بي شي
والله ما اتحمل كل شي ولا كرار هذا
روحي من الدنيا مختفي وما يرد وجماعته يكولون
يمه الوضع مو زين ومطوقين المنطقه مالتهم
وكل الي بيها محد يكدر يطلع
اكيد راح يصير شي موو زين مووو

نارا : اباوع عليها شلون صارت تصرخ وتنحب
كأن دخلت بحاله هستريه ماجان بيدي
الا اسوي الي طلع مني رفعت ايدي وضربتها
كف أريدها تصحى ع نفسها
اول ما ضربتها شهكت بقوه حضنتها اهدي بيها
اششش اهدي حبيبتي اهدي

صلي ع محمد ليش هذا التشائم
اكيد مابي شي بعدين تعرفين انتِ الخبر السيء
ينتشر بسرعه يعني لو صار شي لا سامح الله
اكيد يوصل الج الخبر صح لو لا

أسراء : يعني ما بي شي مو والله احس
كلبي يكول صار بي شي والله اموت افهميني

نارا : اشش اهدي ماكو شي صيري قويه
خلي ندخل المحاضرات ماقبلت
بالكوه دخلتها وياي وهي بس تبجي بسكوت
مابيدي اسوي شي غير أهديها واوكف وياها
خلصنا محاضرات وطلعنا وهي مابيها حيل
سألتها .. ها نرجع ؟

أسراء : لا حبابه احس مخنوكه وصدري عاصرني
اريد اتمشى بلكت اشم هوى شويه تتحسن
حالتي

نارا : اتمشى وياج ها ؟

أسراء : تعالي

نارا : يلا امشي لزمت ب ايدها ودخلت ايدي بيدها
وصرنا نمشي احاول اغير الها جو
وما اخليها تضوج هي كل شوي عينها ع الجهاز
خاف لا يتصل بس ما اتصل بيها ابد
واني متأكده صار بي شي هو ما يختفي هيج
ويعرف ب أسراء تموت لو اختفى
طلعنا برى الكليه وهي احسها تعبت فد مره
هاا سوسو !

أسراء : نينا احس راح يصير شي مو زين
ماعرف ليش كلبي ديأذيني هيج

نارا : بعدني ما مجاوبتها ما سمعنا الا صوت
الطلق صار عالي وقريب من يمنه كُلشش
اباوع الناس صارت تركض
تريد تحمي نفسها من الرمي
اني صرخت بصوت عالي وسحبت أسراء من ايدها
وركضت وياها وهي هم تصرخ
الموقف يخوف إلى درجه جبيره
اول مره يصير ويانه هذا الموقف وحسيت
راح نموت هاهيَ

لازمه ايد أسراء اجر بيها واركض وهي تركض
وياي والرمي يزيد ما ينقص
ما حسيت الا هيَ وكعت لتفتت الها رجف
جسمي اول ما شفتها بهذا المنظر
حسيت الدنيا توقفت بعيوني
ما جاي استوعب الي تشوفه عيوني
واكعه والدم ماليها وتنزف نزف مو طبيعي
صرخت بكل صوتي واني انزل الها اريد
اشوفها ميته لو عايشه

ماحسيت الا شخص بعدني عنها بسرعه
وسحبها عاط بيه امممشي سررريع
ماتشوفيين الرررمي !!!

باللحظه وحده رجع شريط حياتي من اول ما
اجينه ع هاي المحافظه تاركين كل شي حلو ورانا ...

.

.

في ذات صابح الباكر الجميل
صوت زقزقه العصافير ، صوت لذلك الدعاء
كلماته تشرح القلب وتنور الروح
نور الشمس المشرق ع حياه هادئه جميله
مليئه في الهدوء والسعاده ..

كاعدين بالكراج مال البيت ماما جانت غاسلته يلمع
لمع وراشه
الحايط مي وهو جان طابوك ف ريحه التراب
تشك الخياشيم مو بس الخشم
وصوت دعُاء الصباح يرن بالبيت متعودين لازم يوميه
نشغله
كلنا كاعدين ننتظر الريوك
طلعت ماما من باب المطبخ بيدها عود بخور
وكفت يم الحايط وحطته بين الطابوك ثبتته
هاي العادات الي تعودنا عليها يوميه الصبح كل
ما نصحى من النوم ، نحس بشعور حيل حلو
حتى العصر متعودين ترش الطابوك مي وتغسل الكراج وتخلي بين الطابوك عود بخور
وتروح تسوي عصروانيه كعك ابو السمسم لو كيك وهيج شي ..

نارا : يلااا ماما وين صرتي

صحت عليها تأخرت ورايه دراسه صح خلصت
وياها تنظيف البيت بس الريوك هي تسوي
متعودين ناكل من ايدها
طلعت شايله الصينيه بيدها تحجي عليه ..

ابتسام : اهووو نارا وصارت سادس شيخلصنا
منها ومن النق مالتها

ضحك بابا جنت كاعده بصفه شافني قوست
شفايفي ضايجه سحبني تحت جناحه ورد عليها

علي : لا ابتسام كل شي ولا نارا أبوها لاتزعلين
دكتورتي

احس نسمت ورفعت شراعي دائماً
بابا يرفع معنويات برغم اعرف ماما تشاقه وياي
رفعت كتفي بغرور واباوع عليها بطرف عيني هي
عاطت

ابتسام : هاااا شوفها شلون تسوي تصرفات
كدامي كُله بسببك علي

بابا التفت عليه شافني شلون اغور بيها
صاح بصوت وهو يضحك وضربني ع راسي بخفه

علي : لاتسوين هيج كل شي ولا ابتسام تزعل
يمعوده وين ننطي وجهنا

نارا : ها بابا انتَ خايف لا تزعل لو تخاف لا تقطع
علينا الاكل ، ضحك بصوت عالي

علي : وآلله يا بابا الاثنين سوه

ابتسام : ها علي هيج صارت الا اعوف البيت
واهج منكم بعد ما تندلون دربي وين

نارا : اوو ماما يوميه نسمع هاي الكليشه بس
لو اعرف وين هذا المكان حتى نهج وياج
ردت بتنعوص حتى تخلي بابا يوكف ضدي
واني ميته ضحك

ابتسام : علييييي
علي : لج نارا لا تزعلين حبيبه كلبي لا هسه اطيح حظج

نارا : بالكوه كتمت ضحكتي اخر شي صفوا
همَ الاثنين ضدي واني طلعت الغلطانه
كعدنا ناكل واخواني يفترون يمنه كل شوي
ماما تنطيهم لفه ياكلوها ويرحون يلعبون
وتعيط بيهم لان ماياكلون مثل البشر بس يطشرون

نفضت نفسي وكمت لازم استعد واتسلح
للسادس هاي السنه تحديد مصيري
ولازم أسد حلك كُل واحد وكف بوجهي
ومنعني الا اخليهم كُلهم يستحون
يباوعون بوجهي مو اني نارا الي ينحجي بيها
و بأسمها واكون مو كد حجايتي ..

اول يوم داومت بي السادس جان
شعوري حيل قوي وبنفس الوقت مليانه حماس
الهاي السنه تحديت نفسي اكون دكتوره
واطلع من الأوائل
صادف رجعتي للبيت حسيت بابا متوتر ومو
مثل العاده جان دائماً يتشاقه بس اليوم
مغيم ماعرفت شبي الا فتح وياي الموضوع ..

ابتسام : علي
علي : ابتسام لازم تعرف ..

استغربت منهم سألتهم ، شكو شنو صاير ؟؟

علي : بابا اليوم عمامج وخوالج اجوي وفتحوا
وياي الموضوع
نارا : يا موضوع؟
علي : يكولون بنتك كبرت و صارت تعرف تقرا
وتكتب ماكو داعي تكمل واحنه بناتنا حدهن السادس وبس
وانتَ لازم تكعدها بالبيت

نارا : اني سمعت هيج لو طكن عيوني ، شنووووو ؟؟

علي : بس اهدي خليني اكمل

نارا : حسيت اذاني صارن حارات وعيوني غوركن
بالدموع كُله ولا دراستي خط أحمر ، بابا درااستي !

علي : اششش بابا لاتبجين شنو قابل اني
امشي بكلامهم مستحيل اصلاً اعاندهم بيج
واكسر خشم كل واحد يزامط ع ابو بنتك ما تكمل
اشو الا اخليج تكملين وتوصلين الحلمج
واخليج دكتوره فوك رأسهم كلهم
قابل بكيفهم بابا انتِ دكتوره ومو اي دكتوره

انتِ نارا علي دكتورتي ..

نارا : ما تحملت كلامه بجيت وشمرت روحي
بحضنه ابجي واشهك مو بس كلام عمامي وخوالي
اثر بيه الأكثر كلام بابا شلون هيج واثق بيه
الهاي الدرجه ويحجي بزود اني دكتوره ،
بابا حبيبي الا دراستي فدوه لا تخليهم ياخذوها
مني

علي : مستحيل بابا لج انتِ بنيتي وحلمج فوك كلامهم

نارا : ماما كعدت بصفنا وخلت ايدها فوك راسي
تمسح بشعري ابتعدت من حضن بابا واباوع عليها
هي نظراتها كلها امان وسكينه احس بداخلها
تفائل قوي ..

ابتسام : ارفعي راسنه بيج يا ماما ولا تخلين
اي واحد يتشمت بينه ولا ياخذون غايتهم الي يريدوها بفشلج

نارا : كلامها صار يدك براسي وكلام بابا اكثر
حسيت اني كدام أصعب اختبار
ولازم اكون او لا اكون لازم اتحدى الكُل واكون اني مو همَ
تركتهم وصعدت الغرفتي وهذا الكلام بقى يدور
براسي
مرت الايام والكلام كُله براسي
"مستحيل " هاي الكلمه ما لازم اخليها براسي
اذا ردت شي أخذه بجهد وبتعب
بديت اقرا شكد ما جنت متحمسه للقراءه
بس احس عمامي وخوالي تعبوها النفسيتي
منو همَ حتى يتدخلون الهاي الدرجه بحياتي
ويهدموها

كثر ما تعبت نفسيتي كعدت ماما كدامي وكلت الها
" ماما اني هل فتره نفسيتي حيل
تعبانه يعني اذا بدر مني تصرف مو حلو او كلام
جارح الكم ياريت تعذروني وتسامحوني والله يا ماما
تبقى تحز بخاطري اذا أذيتكم بكلمه واخذتوها بجديه "

حسيت نظراتها شرحت الكلام الي بداخلها
بحيث حضنتني وباست راسي وردت عليه
ابتسام : بعيونه انتِ بس حققي الي تحلمين بي وارفعي راسنه بيج بنيتي ..

صرت اقرا اكثر ما انام بحيث صرت
مثل الباندا صرت اشوف الكتب والاقلام اكثر من
اهلي تعبت بشكل مو طبيعي
اضغط ع نفسي حتى ارتاح واحصل الي طمحت
اله
أفرغ نفسي ساعه وحده العصر اكعد وياهم
وهمَ يشتاقون وياي ويرفعون معنوياتي
حتى ما اتعب او احس بالملل من كل شي
ماما جانت اتجيب الي صينيه الاكل كل وجبه
الغرفتي ما تخليني اطلع تكول ادرسي معليج
بالباقي شنو يصير عليج بس ب دراستج
حتى اخواني واخواتي ما الي شغله بيهم
حيل تعبوا وياي اهلي مع ذلك كانوا حيل
فرحانين بيه

اجتي الامتحانات نصف السنه واحس انتهيت
فد مره اول امتحان دخلت اله شكد جنت خايفه
بس مر الحمد لله إلى أن خلصت كل الامتحانات
احر يوم شمرت نفسي شمر ع الفراش ونمت
فرحانه خلصت ع الاقل ارتاح شويه
هنا بقينا ننتظر النتيجه رجعنا داومنه واني حاطه ايدي
ع كلبي

اول ما انطونه النتائج وشفتها حسيت
تعب الدنيا كُله راح مني
جانت دراجاتي ما تقل من ٩٦ الفخر الي
شفته بعيون اهلي من رجعت ما انسى طول حياتي
ماما سوت الي الأكلات الي احبها كُلها

ابتسام : عفيه عليج نينا انريد ب أخر السنه هم هيج
ترفعين راسنه .
بابا جان جايبلي هديه ساعه ولعابه
شكد بقيت اضحك من الفرحه
بابا حضني بوقتها
علي : رفعه راسي ابوج ذيبه انتِ

بعدنا دنحجي جان الباب يندك طلع بابا
يشوف منوو طلعوا عمامي اباوع
عليهم من ورى الشباك واني كارهتهم ومو طايقه
جيتهم اعرف اجوي بس حتى يغثون بينه
دخلت ماما كالت جهزي الضيافه
صرت اجهز وياها بدون نفس وهي راحت تسلم عليهم

داطلع الصينيه من الكاونتر وحسيت
واحد صار ورايه فزيت عبالي ماما
طلع ابن عمي مهيمن بس حيل جان
قريب مني بهت وجهي شنو هاي
الجرأة الي عنده عقدت حاجبي وخزرته هو ابتعد
يضحك

مهيمن : شلونج

نارا : اتمنيت اشيل الصينيه واهفه بيها الحقير
رديت عليه من دون نفس ، جنت زينه

مهيمن : ااه وهسه ؟

نارا : نفسيتي تعكرت
مهيمن : ليش عيني منو عكرها
نارا : فد ناس غثيثين

التفتت اكمل الي بأيدي وما حسيت الا لزمني من
زندي وقرب راسه الاذني
نرفزني دفعته بس هو لازمني قوي
انوب اني من اشوفه يضحك اتهستر ودي
اكطع شعره الي فرحان بي
نارا : شبيك لك وووووخر لا اصيح

مهيمن : صيحي بعد احسن حتى يزوجونا سريع
نارا : ب أحلامك
مهيمن : اني ما أحلم انتِ الي وغصب عنج
نارا : دوووخر والله حتى بحلمك ما اكون لك
مهيمن : مو ع كيفج مرتي

نارا : دقني دق لعبت نفسي يحجي بزود
الصينيه الي ورايه بعدني ما حاطه بيها الستكاين مال الجاي شلتها وهي شلون حديد قويه
شلتها وبكُل قوتي ضربته ب ايده الثانيه بحيث
فز فزه طفر من يمي يكمز من الالم
يغلط ويفشر واني احس حيل ارتاحيت من
شفته هيج يتألم

نارا : تستاهل حتى مره ثانيه ما تتقرب مني
ولا تلزم طرف مني لا والله المره الثانيه
احطها براسك واخليك شهر بالانعاش ماتذكر
اهلك منو

مهيمن : لج حيووووانه تهدديني انتِ
لاتخليني انهي عليج

نارا : اذا انتَ رجال سويها والله اسوي الي محد مسوي

مهيمن : بسيطه نارا بسيطه

نارا : طلع من المطبخ صحت ورى درب السد ما يرد بس همزين ما سمعني جان رجعلي بس
ماعرف ليش ارتاحيت من ضربته
لو باقي شويه الا انبتها براسه واخلص منه ومن اهله

رجعت ماما تصيح وين الضيافه هو اني نسيتها
اصلاً وديت الضيافه بس سلمت وطلعت
جان وجهم مطعوج شكله بابا حاجي وياهم
ضحكت شلون هيج مطعوجين
مابقوا هواي وطلعوا ومهيمن يخزر بيه الحقير
رجع بابا بعد ما ودعهم يضحك سألتهم شكو ؟؟

علي : لج بابا شافوني شلون رافع راسي بيج
رادوا يشيلوني ويشمروني شلون ما مشيت
ورى كلامهم وكعدتج وأنوب اني كلت الهم
ناجحه بمعدل عالي ودرجاتها ترفع الراس رادوا
ينجلطون وكل شوي كالوا كعدها
بس اني وين وهم وين رافع راسي بيج كدامهم
وهم يفورون عفيه عليج بنيتي عفيه

نارا : اسمع كلام بابا واني مثل المي ثلج نزل ع كلبي
يستاهلون
هي المشكله مو بس عمامي انوب حتى خوالي
هيج واحد من ولد خالي حاط عينه عليه المطعوج
ماعرف من وين التفت الكه روحي محاربيني

رجعت الدراستي واني فرحانه دام هزمتهم
ب أول المشوار راح ارجع
اهزمهم من جديد واطلع الطبيه غصب عن
اليرضى والمايرضى ..
بس صارت زادت مضايقات مهيمن هو من جهة
و سالم ابن خالي من جهة ثانيه
اذا اجوي لازم يغثوني صح اني مطنشتهم
بس كلامهم هم يخوف منتظرين الي الزله
حتى يطبقون تخلفهم فوك راسي

صرت ادرس واحطهم هم كدامي بحيث
حتى إذا حسيت بملل بس اشوفهم او اتذكر
شي من كلامهم ارجع اقرا من جديد بحماس
انتقام منهم ، شعري صار يوكع بكثره
عيوني رجعت باندا خاصه بالعطله الي انطوها
النه حتى نقرأ لأخر السنه
نفسيتي صارت بالنازل
وأهلي رجعوا من جديد ماتركوني
بشرتي صارت كُلها حبوب ، صرت سمره
اكثر من حركان الدم ، حتى مرات انسى نفسي
بدون اكل ولا شي الا ماما تجيبلي
مع ذلك استمريت لان واثقه راح أنجح بتفوق
اهم شغله جانت عندي هي ثقتي بنفسي
لان لو ما هي ما جان وصلت ..

تعبانه والدنيا طالعه من عيني جان اسمع
جوه هوسه سديت الكتاب ونزلت خايفه
اباوع ماما واكفه يم باب الاستقبال وحاطه
ايدها ع كلبها رحت يمها خايفه ، شكوو ماما !؟

ابتسام : ولج هذول خوالج وعمامج اجوي
نارا : عقدت حاجبي ، اي شنو المشكله؟
ابتسام : ولج ماما اجوي وهمَ حادين اسنونهم علينا وخاصه عليج
نارا : وكع كلبي ، ليش شكو ، شلون ؟؟؟
ابتسام : اشش صوتج ، اسمعي شديحجون
نارا : سكتت خايفه رجعت اسمع كلامهم واني ايدي
ع كلبي ..

ابو مهيمن : اسمعني خويه اني كلت لك
قبل كعد بنتك وانتَ موو راضي تكعدها

علي : اني كلت بنتي تكمل دراسه وما اكعدها

ابو مهيمن : مو بكيفك احنه بناتنه مو للعرض
ياهوو يجي يشوفهن
ابو سالم : اني ويا كلام ابو مهيمن

مهيمن : عمي البنت ما الها غير بيت رجلها
هي اول وتالي تتزوج وانا هاي كدامك وكدام
الكل اطلبها منك

جانوا كاعدين يحجون جان يدخل سالم جان برى
ع كلام مهيمن دخل متعصب .

سالم : لا يابه شنو هذا الكلام بنت خالي اني
من البدايه رايدها حتى كلت الابويه وكال نروح نطلبها
من خالك

مهيمن : اني ابن عمها وأوله بيها انتَ شكو سالم ؟

سالم : هذا الكلام مايوكل يمي خبز بنت خالي ألي
اني وهاي اني طالبها من خالي هسه ..

صارت هوسه بالكلام وصوت عالي
الا ان عاط بيهم علي وسكتهم

علي : بسسسس اشو انتوا ما تحترمون احد
ولا كأن تحجون ع بنتي كدامي بهاي الطريقه
ويلا ما انطيها لا لك ولا لك انتَ الثاني
كلت بنتي ما ازوجها واخليها تكمل دراستها
وذاك الوقت يلا افكر بزواجها انتوا هنا شكووو

ابو مهيمن : اي غير ابني رايدها شبيك علي !!!
هذا زواج

علي : ولأن هذا زواج اني ما انطيها

ابو مهيمن : علي بطلها ترى إذا ما بطلتها
ينهون عليها وهاي اني جاي اكولها لك كدامك
وابن عمها موجود ..

نارا : احس وكع شي جبير فوك راسي بحيث
صرت ماعرف شنو احجي ولا افكر
الكلام الي سمعته ما يسر
وحسيت راح تنغلق الأبواب بوجهي
خاصه من حطوا بابا بهذا الموقف
يعني يا يبطلني ويتزوجتي واحد منهم
لو ما يسمح الي الاختيار ابد وينهي عليه مهيمن ويتزوجني وهم يبطلني
دموعي صارت تنزل احس سودت الدنيا بعيني
شلون هيج يسوون ب أي حق
دمروا حياتي بهذا تخلفهم والجهل الي همَ بي
سمعت صوت بابا صاح بيهم بصوت عالي
بحيث اني من يمي فزيت ..

علي : وآلله العظيم إذا شفت واحد بيهم
ينهي ع بنتي الا احد طلقه براسها وما يرفلي
جفن ..

ــــــــــــــــــــــــــــــ•●•ـــــــــــــــــــــــــــــــ

يتبع ..

حُبحُب لاتنسسسسون التصويت
وطمنوني شلون شفتوا البربر ☻️❤️‍🔥!!

اخخخ هاي بس البدااايه والقادم اقووه اقوووه..