الربتج " حالك الاسوداد " الفصل الثالث 3 - بقلم رهف علي

أكتُب يا الله ..

لاتنسون التصويت والتعليقات الطيفه مَثلُكم ع الفقرات

▪︎ الساعه 3:00 بعد منتصف اليل ..

كاعده ع السرير وحاطه ايدي ع خدي والكتاب ب حضني طار كل شي من راسي قريته
الي صار اليوم وكلام بابا ماعرف شنو
سوه بيه الأفكار صارت تلاطم براسي
ليش هيج يحاربوني ويخلوني انجبر اختار
بين الاثنين وهنَ الاثنين نفس النتيجه والحلم مختفي
واخر شي خلوني تحدت تهديد اما ، أو ...

علي : والله اقسم بالله اذا نهيتوا عليها
الا احط طلقه براسها واكتلها لا ألكم ولا الهدفها

مهيمن : عمي شنو تحجي انتَ

ابو مهيمن : سمي بالله ياخويه مو هيج
بعدين كل بنت اخرها بيت زوجها ماكو داعي
الهذا كلامك

علي : اني كلت الي عندي بنتي ما ابطلها
واخليها تكمل واذا حاول ابنك او سالم او كائن من يكون يتقرب منها ويجبرها ع شي مو راضيه عليه
وقتها يصير عندي غير كلام وفعل
صدكوني ما اتردد للحظه وحده ع الي اريد اسوي .

ابو سالم : شبيهم الولد حتى هيج تحجي
شنو نسيت هي تبقى بنيتنا

علي : هذا الموجود البنت بنتي اني .

ابو مهيمن : خوش عندنا حل وهذا الحل هوَ
الي راح ينصف كل الأطراف ويرضيهم

الكُل : شنو هوَ ؟!

ابو مهيمن : اسمعوني البنت تمتحن سادس
وتطلع النتائج اذا هيَ مو ناجحه لو معدلها قليل ف معناها تبطل غصب عنها وتزوج واحد من الولد
اما ابن عمها او ابن خالها مال تطلع للغريب هاي
شيلوها من راسكم بنياتنا الولدنا ، اما اذا طلعت
ناجحه ومعدل مثل ما مخططين اله هنا
نكول تكمل دراستها ومن تتخرج هم واحد من
الولد يعقد عليها ، ها شكلتوا ؟!

ابو سالم : ولو ما مقتنع بهذا الكلام بس
مثل ما يكول المثل الحك العيار الباب الدار

علي : باقي ومصر اني ع كلامي بنتي براضتها كل شي يصير اما غصب تعذروني ما أجبر بنتي
ع اي شي

نارا : واكفه ورى الباب واسمع كلامهم
شلون كاعدين يحددون مصيري
وكأن هاي حياتهم مو حياتي يعني بالحالتين
اخذ الشخص الي ما احبه وانجبر اعيش
ويا طول حياتي
بعد ما حددوا مصيري طلعوا رجع بابا عصبي
يحجي عليهم ع اهله و ع اهل ماما
اخر شي رفع راسه وباوع عليه زفر انفاسه
بقوه وابتسم ابتسامه الي يحبها كلبي
رفع ايده وصاحني ..

علي : تعاي بابا تعاي كعدي يمي .
نارا : رحت كعدت يمه حطني تحت جناحه
وباس راسي اني الله شمر عليه البجي
منا توتر السادس ومنا كلامهم ما تحملت الضغط
الي عليه هو حضني ويمسح ع راسي

علي : لج من كل عقلج تبجين وربج يحلمون
يطولون اظفر من اظافرج اسمعيني زين
وانتبهي لكُل كلمه اكولها الج ،
اني صح شفتيني جاريتهم بس مانعرف شنو الي
كاتبه الله النا يمكن يصير العكس
كل هذا الي عايشي
اول شغله اني اعرف بيج يا بابا سباعيه
وشاطره راح اطلعين من الأوائل وتصيرين
دكتوره ثاني شي لاتنسين كل هذا يصير بعد ما تتخرجين من الكليه يعني مانعرف شنو
يصير بعد كل هاي السنين يمكن يتبدل الحال
من حال إلى أحسن حال ..

نارا : ابتسمت اله وهزيت راسي ب ايجابيه
يكفي الي ديسوي الي ما اريد اتبعه اكثر بهمي ..

فزيت من صفنتي الساعه صايره 3:30 صارلي
نص ساعه ضبط اني استرجع الي
صار اليوم
تعبت من التفكير سديت الكتاب شمرته ونمت
ما الي خلك حتى اقرا واذا قريت ما استوعب
اي شي ..

مرت الايام هدوء وبعد 5 ايام ع الفاينل
يعني بعد 5 ايام راح يتحدد مصيري
الدراسي والحياه الي راح اعيشها
بس اني نفسيتي
حيل تعبت وبقى هذا الكلام براسي مالتهم
كعدت ابجي الضغط الي عليه صار اكبر
يعني ليش هيج يسون
ويحكمون حياتي اذا ما جبت معدل عالي شلون بيه
دابجي ودخلت ماما شافتني ابجي انصدمت
تقربت مني تريد تهديني وتفهم ليش هيج
ابجي بهذا الشكل
رديت عليها من بين دموعي ،
ماما خايفه ما اطلع المعدل العالي ويصير
الي يريدوا والله ما اتحمل اموت

ابتسام : يعني من عقلج تبجين وين راحت نارنا القويه
الي ما يهزمها هيج كلام انتِ كدها واحنه الكل
متأكدين من هذا الشي
حتى ابوج واثق منج كل الثقه مثل ما طلعتي
بنصف السنه ٩٦ ف بأخر السنه راح تجيبين
الطبيه ومتأكدين منها

بعدها تحجي وبابا دخل شكله سامع كل الكلام
هز راسه الي مبتسم يعني مأيد كلام ماما ،
بابا اريد اطلع اشتم شويه هوى برى
حباب وبعدين ارجع اقرا ..

علي : اي مو تدلل بنياتي ، كومي ابتسام
جهزي جهالج وخلونه نطلع بهذا اليل الحلو
بالحديقه ونغير جو

كامت ماما لبست اخواني واخواتي همَ
بعدهم صغار اني الكبيره مالتهم
غيرنا ملابسنا وطلعنا للحديقة
غمضت عيوني واني استنشق الهوى حسيته
دخل للقفص الصدري
كعدنا الا اخواني واخواتي يطاردون يركضون منا
ويرجعون منا

اباوع اخويه الصغير بحضن ماما
اسمه علي ، ماما اصرت تسمي علي لان شافت
بي رؤيه من الامام علي فسمته ع اسم الامام
فصار اسمه علي علي حيل
حلوو صغير بعده بالكماط يجنن عيونه صفر
وشعره اشكر ناعم بس من طلعنا لبسته ماما
ملابس بدون الكماط حاطته
بحضنها ويناغي ابتسمت تقربت منه وبسته
بركبته حيل ، الله ريحته تجنن ..

علي : شنو تريدون اجيب الكم حتى تتعشون ؟

كُلنا صحنه اي وماما كالت ، اي جيبه
هنا حتى ناكل بالحديقه ع الهوى
راح بابا يجيب الاكل اباوع ع ماما عضت اصبعها وعاطت ب اخواني

ابتسام : لك ماما مجتبى ولك محمد تعاااالو هنا
مو شلعتوا الكلبي وين تررررحون ، ماما نارا انتبهي عليهم وهذن اخواتج الصغار انتبهي عليهن
ماكدر اكوم وعلي بحضني

نارا : تمام ماما لاتعصبين ، رحت المهم عبالك
دعابل واطشروا اني عندي اربع أخوات و ٣ اخوان
وكلهم صغار يعني اني الاكبر بيهم
اما الباقين كُلش صغار
( مينا ، شهد ، فاطمه ، زهراء ، واخواني محمد ، مجتبى ، واخر العنقود علي )
تعبت واني الزم واحد يطفر الثاني كعدت
متعصبه يعني اني طلعت حتى اغير جو
انوب عصبوني
الا اجه بابا عاط بيهم يلا كعدوا بس هم ما تابوا
رجعوا يلعبون يرحون بعيد وصوتهم عالي

كعدنا ناكل الفلافل جانت حاااره وطيبه
كلهم اجوي يركضون لان اجه الاكل
اباوع شلون كاعدين كل احنه وفرحانين كُلش
ماما تناغي العلي وبابا كل شوي يسألها

علي : بسوم تريدن صاص لو عمبه
ابتسام : عيوني تعرف الي احبه شنو
علي : اي يابه شلون ما اعرف وهاي أطيب
لفه فلافل لاحلى بسوم ..

ضحكت شلون هيج علاقتهم احبها
واتمنى من الله يكون زوجي مثل ابويه
هيج يعاملني ويحبني وشخصيته حلوه مرحه
مثله

ابتسام : علي خاف اكل عمبه وتصير بيه ريحه
علي : هو انتَ ريحتك طيبه بكل الاحوال لاتخلين شي بنفسج
ابتسام : يااا علي مو كدام الاطفال
علي : خلي يطيرون
ابتسام : شووو علي الزم ابنك ترى تعبني
علي : بسمسم دشوفيني اكل وين اخلي ابنج
هسه
ابتسام : يااا علي هاي شنو هو بس ابني
ترى هو ابنك هم لو اذكرك خاف ناسي ،
ضحك بصوت عالي ورد عليها .
علي : انسى روحي وما انسى ام نارا

ماما خجلت وجهة صار طماطه وهو
يضحك عليها شلون خجلت منه
بابا أخذها عن حب هي تصير بنت خاله
يحبها يموت عليها وهي حلوه حييل
وعرف بابا شلون يجيبها للدرب وخلاها تعشقه
تموت بي
فجأه ماما صاحت خلته يصفن

ابتسام : علوشششتي

صفن بوجها بعدها رد عليها
علي : ها ياروحه

ابتسام : شيل ابنك شبيك
علي : شبيج انتِ اخخخ يابه اخخخ
ابتسام : علي اريد اكل

ضحك وهو يهز براسه
علي : جيبي ابني جيبي شكبرج تصيرين
تبقين طفله

ضاجت بزعل عافت الاكل و ردت عليه
ابتسام : هاي عليه !
علي : اهوو شلون بيه ويا هل الطفله بس تزعل
ع كلبي صبرني يا صبر ايوب
ابتسام : باوع شايف بناتك و ولدك الا اخليهم
ع كلبك واعوفكم وارجع ل اهلي هناك
علي : افااااا وتكدرين بدوني بسوم ؟؟؟

صفنت وعيونها قرت الي ما كاله السانها ..
ابتسام : ها علي هي الفلافل طيبه
خليني اكل احسن من جبتها حيل طيبه
علي : روحج طيبه ف تشوفيهن هيج طيبات ،
ابتسمت بخجل وردت عليه
ابتسام : علي جيب ابنك وانتَ اكل ..
علي : لا بابا انتِ كملي اكلج واني ارجعه الج

كل هذا الي صار كدامي بحيث هذا
الحدث الي صار بقى مطبوع بذاكرتي
ما نسيته ولا يوم بحياتي
كميه الحب والحنيه الي بينهم ما تنوصف
بقى علي بحضن بابا ويناغي اله
وماما تاكل وتباوع عليهم وتضحك
حيل فرحانه وحقها تفرح اذا عندها رجال يسوه الدنيا كلها ..
كملنا اكل وكعدنا شويه
بابا كال يلا نرجع نشرب جاي بالبيت
هسه الجهال تعبوا
هي ردت عليه يلا لعد نرجع .

ف دنلم بالاغراض الي باالكاع ف ماما
دتلم
ماحسيت الا بابا سحب ايدها من الكاع
وباسها من ايدها الي جان تلم بيها الأغراض
علي : هاي الايد ما أريدها تلوح الكاع

ماما حيل خجلت نزلت وعيونها بنفس
الوقت فرحانه حتى ادارك خجلت
صاحت علينا نلم باقي الأغراض
لميناهن ورجعنا للبيت شربوا جاي وكل واحد
راح المكانه ينام
اخواني واخواتي ناموا وماما وبابا
بقيت اني

وهسه بدأ وقت الجد لازم اكسر عينهم وعين
كل واحد كال ما راح اطلع الطبيه ..
لزمت كتابي وضليت اقرا مابقى بس 5 ايام
ونمتحن
مرن هل 5 ايام ب أصعب ما يكون التوتر
والخوف
اهلي من صدُك اكول ما تركوني ولا للحظه
كل شوي واحد صاعد الي حاروا
شنو يجيبون الي ، من
الحلويات والاكلات
ورفع المعنويات والكلام الطيب الي يرد الروح
جاهدت كل هذا مو بس علمود نفسي
لا خليت اهلي وتعبهم كدام عيوني
واكون علمودهم اكثر من ما اكون النفسي

اول يوم الامتحان ماما كال قبل لا ادخل
لازم اردد
يا حي يا قيوم،
يا حياً لا يموت،
يا حي لا إله إلا أنت،
كاشف الهم،
مجيب دعوة المضطرين،
أسألك بأن لك الحمد،
لا إله إلا أنت المنان،
بديع السماوات والأرض،
ذو الجلال والإكرام،
رحمن الدنيا والآخرة ورحيمهما،
رب ارحمني رحمة
تغنيني بها عن رحمة من سواك،
يا أرحم الراحمين

اردد بيها قبل لا ادخل الامتحان قريتها ودخلت
الامتحان وزعوا الأسأله دنكت راسي اربع دقايق يلا رفعت عيني ع الورقه
اول ما وكعت عيني ع الورقه
حسيت الفرحه
ترست روحي حسيت ودي الحك حتى اجاوب
ع كُلهن السهوله الي حسيت بيها ماعرف شلون
اوصفها بحيث خلصت سريع
رجعت للبيت حيل فرحانه لان مجاوبه
والفرحه غمرت اهلي
وهيج استمرت الايام
اقرا قبل لا ادخل هذا الدعاء
يلا ادخل إلى أن خلصت الامتحانات
بحيث اخر يوم من رجعت دخلت الحمام
بقيت واكفه جوه الدوش
والمي ينزل فوك راسي
بقيت صافنه
ماعرف وين راح بالي بس شكد ما فرحانه
اني خلصت بس بنفس الوقت خايفه
ما اطلع المعدل الي اريده
بقيت هواي صافنه حتى ما اعرف شكد مر من الوقت
هيج كاعده جوه المي وساكته
الا ان اندك الباب مال الحمام
سمعت صوت بابا
علي : ها نارتي ليش هيج تأخرتي جوه
بيج شي بابا ؟؟
نارا : لا بابا هسه اطلع ، راح واني سديت المي
شكلهم انتبهوا عليه تأخرت واني هم
ما حسيت بالوقت ..
توضيت ورحت اصلي واني اصلي احس
دموعي تنزل والله الخوف
مو هين يعني
يخلي الواحد يوهس بالاسوء مو بالاحسن
دعيت ياربي نجحني ساعدني الخاطر اهلي بقيت ادعي
إلى أن ماحسيت ع نفسي و نمت ع سجاده الصلاه ..

وهيج مرت الايام واني حالتي النفسيه
تعبت واني انتظر النتائج
تنزل حتى اعرف وين
يصفى بيه الدهر والمشكله مو بس اني
انتظر لا كل العشيره خاصه عمامي وخوالي
منتظرين اللحظه حتى
يجون علينا ويحكمون عليه
شلون اني وصلت الهاي المرحله لازم يخربون عليه
حياتي ويعكروها واصير بركبتهم ذنب ما يغتفر اله ..
الايام الي تمر
كضيتها بس تنظيف وصلاه ودعاء
اكمل اروح ادعي واصلي وابجي
هيج مرت الايام اتعسس الايام بحياتي .

شكد ما مرت ايام تعيسه لكن بقيت متمسكه
بربي اقرا كل يوم زياره عاشوراء وبابا هم جان دارس حوزه ف دائما اخذ منه اشياء واقراهن
واتعلمهن منه هوَ
حتى الزياره هو الي علمني عليها اقراها
كل يوم

إلى أن اجه يوم اعلان النتائج
ماجان عنده جهاز الهذا لازم نروح انجيب
النتيجه ف ماما كالت يلا البسي
حتى نروح نشوف
النتيجه مالتج
بس شنو طول هذا الوقت كلنا خايفين وندعي
اني جسمي يرجف رجف مو
طبيعي
ع للحظه يغمى عليه
ردنا نطلع اني وماما بس بابا كال اروح وياكم
طلعنا طول الطريق الدموع بعيني
ابجي وادعي يارب ساعدني حياتي ب ايدك
ومصيري كله
وصلنا ماكدرت انزل اشوفها وياهم
كتله بابا انتَ روح اني
ما اكدر انزل رجليه
جانت ترجف واديه مو بس ترجف لا ترعش
من الخوف
راح بابا وماما بصفي بقت تمسح بوجهي
وتقرا شافت وجهي صار اصفر
ورى شويه اجه بابا من بعيد
اشوف الدموع بعيونه
كلت هاهي اكيد اني
ما طلعت الطبيه
بجيت بجي
وصل بابا يمي وصاح ..

علي : ياااا رفعت رررراااااسي دكتووورتي
بابا ناااري ناااجحه
انتِ شوفي درجااتج نااااار ،
بقيت صافنه كلته شنو !
علي : لج بابا شوووفي
نارا : شوفني واباوع ع الدرجات كلها مكتوب
بصف كل ماده 100
هو اني شفتهن وبعد ما حسيت بنفسي
كعدت ورى فتره ماعرف شكد لكيت راسي
بحضن ماما تبجي وتمسح بوجهي
واني روحي رايحه
يرشون ع وجهي
المي مامصدكه واخيرا يعني طلعت الي احلم بي
بحياتي!!! ما مصدكه
ابويه وامي يبجون
من الفرح حضنوني فرحانين بيه
حسيت كل الطاقه رجعت الي نزلت سجدت
سجده شكر ورجعنا للبيت
فرحااااانييين كُلشش ..

رجعنا للبيت وماما نزلت تهلهل واطش جكليت فوك راسي احنه بيوتنا
ناصيه ف جوارينا
سمعوا راحوا ركضوا همَ هم جابوا
جكليت ويطشون فوك راسي
والكل فرحان
عمامي وخوالي من اجوي وسمعوا
الخبر ما حجوا
حسيت النتيجه مالتي لصمتهم ع حلكهم وماخلتهم يفتحون حلكهم بحرف واحد
سوينا سفره لوجه الله وال ام البنين وعزمنا الكل
بيومها الفرحه ما فاركتني ابد واضحك
حتى للهوى

واكفه بالمطبخ والكُل يمي فرحان الي
بس اكيد البعض لا لان ما وصلوا الهاي المرحله
وبطلوا
فجأة اجاني صوت من ورايه .

مهيمن : مبروك
نارا : شُكراً
مهيمن : ممكن تجين شوي نحجي
نارا : استحيت كدامهم طلب نحجي الهذا
رحت برى بالكراج وكفت والحايط ورايه وهو كدامي
هو بس يباوع عليه ، شنو تريد ؟؟؟

مهيمن : خلينا نتزوج وادرسي عندي

نارا : ضحكت ضحكه من كل كلبي بحيث هو بقى صافن
عليه مستغرب
عفواً شنو تكول ؟؟
مهيمن : شبيج نتزوج قابل كلت انهبج شبيج
نارا : تحلم
مهيمن : بس اريد اعرف ليش شبيييه اني
نارا : انتَ كُلك ما تعجبني لا تصرفات لا تفكير
اي شي بيك مو قانوني
هو عصب وخزرني

مهيمن : ملاحظه نفسج جاي تجاوزين عليه
نارا : الي يدك الباب يسمع الجواب
مهيمن : ليش تخليني اخذج غصب
نارا : مو رجال الي يسويها
مهيمن : عبالج توكفيني بهذا كلامج
نارا : ابن امه ابو الي يتجرأ يسويها
مهيمن : انتِ الكل شي مجهزه جواب
نارا : لُكل فعل رد فعل
مهيمن : لج شبيييج خبلتيني شبيه حتى ما أعجب
نارا : ابسط مثال هذا تصرفك كدامي ماتعجبني
مهيمن : ترى الوي ايدج اخليج انتِ بنفسج تجين
تكولين تعال مهيمن تزوجني
نارا : جرب وشوف شنو اسوي
مهيمن : شنو تسوين ؟
نارا : تقربت عليه وعيوني بعيونه ، صدكني ما اخاف ولا انتظر دقيقه وحده وبعدها تلكه نفسج بتراب
النجف ويرشون عليك مي ورد
مو اني بنت علي الي تنلوي ذراعي اني الوي ذراعك
مو انتَ

داحجي ويا جان يجيني صوت بابا يصيح ..
" وين دكتورتي "
ضحكت وحسيت اجتي
هاي الكلمه بالوقت
المناسب، باوعت عليه ،
شفت !! وهسه
خليني اروح الابويه تعرف بعد كم يوم ادخل الكُليه
وادرس ردت امشي ورجعت اله ، صدُك
اذا شي يوم حسيت ب ألم
تعال الي تندل بيتنا
عود بوقتها اني انطيك العلاج
يا أبن عمي العزيز ..

رحت دخلت جوه وهو حسيته نااار
بحيث لو صحته فرصه وحدنا الا كتلني
بس بسيطه عباله اني هينه ويريد يطبق
هو وأهله شروطهم عليهم
هاهي هسه آمنت دام طلعت معدل عالي
بعد ما الهم اي شي يمهم عود الا
اذا كملت يلا يتحركون وبعدين محد
يعرف شنو
مكتوب اله
يمكن يتغير الوضع إلى شي ثاني محد يعرفه !!

مرت الايام وحياتنا هادئه ف جنه كاعدين
قبل لا تبدي التقديمات مال الكُليه
ف بابا فتح الموضوع ويانه بحيث صدمنه
بقينا فاتحين حلكنه

علي : اسمعوني قبل فتره مو حيل طويله
اجاني شغل بس هذا الشغل مو هنا بغداد
لا الشغل الي وصلني من الموصل

ابتسام : الموصل !!!

علي : اي خليني اكمل ، المهم ، هذا الشغل
هواي محتاجي وامنت ع شغل هناك والجماعه
هم ساعدوني

ابتسام : علي ، وين رحت للموصل ليش
مو هنا بعدين انتَ مو دتشتغل
علي : ابتسام شغل المعرض مايكفي
يعني اني اشتغل بمعرض سيارات يادوب ساد
احتياجاتنا اما هسه آمنوا الي ع شغل بالموصل
حتى البيت هم جاهز
ابتسام : شنو شنووو تقصد نروح نعيش هناك !!
علي : اي شنو بيها وشوكت ما تحبين نجي هنا
زياره
ابتسام : علي مستحيل شيل هاي الفكره من راسك
وين ماخذنه اني وجهالك المكان ماعندنا
بي أحد نعرفه وتبعدنا عن أهلنا ونانسنا الي هنا
نعرفهم
علي : ماكو فرق هم هناك نعيش ابتسام فدوه العينج لاتعرضين
والله الشغل زين وراتب حلو يكفينه
ابتسام : فدوه علي وأهلي وبيتنا هذا
علي : اهلج واهلي نكدر نجي الهم بكل وقت تشتاقون الهم اما البيت
ف نخلي اخوي عامر ماعنده اطفال بس هو
وزوجته يكعدون هنا واحنه بكل وقت مناسب
نجي هنا
ابتسام : لا عفية والله ما اكدر افهمني بعدين
واطفالك ودراستهم وبنتك هسه دخلت كُليه
وحتبدي الدراسه مالتهم

نارا : اباوع ماما حيل مقهوره وتحاول اطلع
حجج حتى ما نروح حاولت احجي وياها
بس هي ما تقبل ، ماما قابل بابا يروح
الوحده غير احنه عائلته ويا شلون يروح هناك يسكن
من دونه

علي : شوفي حتى بنتج فهمت شلون اروح الوحدي
واعوفكم هنا وهذا شغل لا يوم ولا يومين يعني
سكن هناك
واذا ع الاطفال ف اكو مدارس هناك هواي
واذا ع نارا ف نقدم الها ع كُليه بالموضل
واكو كُليه طب يعني قابل شنو خلصن الجامعات
بعدين بس باقي ورقه وانتقل هناك يعني
كل شي جاهز حتى البيت والشغل

ابتسام : يعني كل هذا مسوي من ورى ظهري
واني ما اعرف بي هاا
علي : ياعيني اعرف بيج ما تقبلين
ف اجهز كل شي حتى ما يصير اي عراقيل
واني كلت اكمل كل شي حتى جاهز الجواب
كُل سؤال تسألي ..
سحبت نفس متضايقه وردت
ابتسام : خليني افكر
علي : فدوه العينج فكري براحتج بس منا اليومين لان
لازم هذا الأسبوع احنه منتقلين
للموصل

سكتت ماما بس حيل مقهوره عافته ودخلت للغرفه
رحت وراها اقنع بيها اني هم حالي
من حالها ما اريد اروح بس من جهة اخلص
من مهيمن وسالم ومن جهة ثانيه
هنا الناس الي نعرفهم كل اقاربنا وجيرانه
من سنين بس شنسوي نعوف بابا الوحده مستحيل

نارا : كولي يا الله
ابتسام : ولج وأهلي وأهل ابوج مو كل ما
نتضايق نروح الهم ونزورهم هسه
شلون راح تصير بينه مسافه ومانروح
الا بالأعياد والمناسبات راح ننسي
نارا : مو وعدج بابا
ابتسام : اي
نارا : اذاً هاهي ماما لعد تعوفي الوحده هناك
بلكت تزوج عليج ها ، هوو اني كلت هيج
وشمرت عليه مدري شنو اجه بكصتي، يااااا ماما اني شكلت
ابتسام : تستاهلين السانج صاير طويل
نارا : ضحكت وعفتها وطلعت خليها تفكر احسن

اخذتلها يومين حتى ما تحجي ويا
بابا وزعلانه منه وتبجي لان سوه كل هذا
وهي ماتعرف وراح تعوف بغداد
يومين الجو شاحن بالبيت باليوم
الثالث يلا اقتنعت بس بقت ضايجه
بابا اول ما سمع قبولها كال النا
علي : تجهزوا راح تجي سياره تاخذ الأغراض
ابتسام : شنو يعني حتى ما نروح نشوف البيت ؟؟؟
علي : ابتسام ماعندي وقت ماعندي هناك نروح
وتشوفي

عافتنا وراحت تلم بالاغراض وتبجي
اني هنا من صارت صدُك خفت حسيت
ب احساس مو حلو ماعرف ليش
نلم بالاغراض ونبجي
مو هين
هنا ذكرياتنا وايامنا الحلوه
سوالفنا وضحكنا
كل شي حلوو بهذا البيت وبهاي المحافظه
اول ما وعينا ع الدنيا هنا شلون
راح نفارق كل هذا الشي
وكل هاي الناس
لمينا الأغراض كُلها مابقينا شي لان ماكو
امل نرجع نعيش هنا من جديد
اباوع ع كُل ركن بالبيت ودموعي تنزل
ليش هيج يعني بسبب الشغل مضطرين
نترك كل هاي الذكريات
ليش هيج ليش .
اجوي أخذوا الأغراض وطلعوا بقينا احنه
هم لازم نطلع وراهم حتى هم نلحك نوصل
مو نتأخر

الجوارين اول ما سمعوا اجوي خاصه
النسوان القريبات من ماما بحيث
صارن يبجن وماما هم لحكت من الي يبجيها
وصارت تبجي وياهن
خالاتي ال 3 ع اخر شي اجني مصدومات لان محد
يعرف راح ننتقل
بابا يريد نستقر حتى محد يعارضنا
وخاصه هو تعب يلا كدر يحل هذا الشغل
مايريد احد يعارضه
مو زين شخص يعارض بشي .
انقلب البيت بس بجي
ابويه اختنك من شاف حال امي وطلع
من البيت ينتظر برى واني افتريت
بكُل ركن من البيت اشمه وابجي
ورى فتره بعد المعاتب والبجي والحزن
طلعنا بعد الوداع

وبقيت اني بالباب واكفه اباوع
ب انكسار وكأنُ حيروح شي من يمي اباوع ع حيطان شلون مرشوشه رجعت
اشمشم بالحايط اباوع ع البيت واني دموعي
تنزل
وجان يجي بالي
هل كُنت روحنا ؟ أم بيتنا ؟ تحملتنا في اوجاعنا تحملتنا في تعبنا ودموعنا
هل كُسرت قلب حيطانك عندما
أردت الذهاب الى الموصل ؟ هل انتَ بيت أم روح عاشت في
اجسامنا تتجسد
حيطانك الجميله برائحتها
الطيبه ذكرياتنا الجميله
وذكريات طفولتنا ذكرياتي
عندما كنت العب واستند - ؏ـليك عندما كنت اغمض عيني واثق فيك هل ظلمت تراب حيطانك عندما تركتك ؟ كنت بيت جميل و وطن جميل !!
شميت لبيت واخذت نفس كُلش كُلش كُلش عميق بنص لحوش وطلعت
وكلهم يبجون واخر شي اباوع عليه وكأنُ انسان مو بيت ونسد لباب سدوا
واني اباوعله وعندي امل ارجع ونرجع من جديد

مشت السياره واني صافنه
ع الطريق شايله هم الدنيا احسها فوك راسي
ماعرف ليش احساسي مو حلو هاي المره
رفعت عيوني وقريت " بغداد تودعكم "
بلحظتها نزلت دموعي مو هينه والله مو هينه
بقت الساره تمشي ساعات إلى أن
رجعت قريت المكتوب بس هل مره
تختلف " الموصل تُرحب بكم "
دعيت من ربي تكون هاي المحافظه خير علينا

وصلنا البيت حيل جبير وكفنا السياره وطلعوا
منه ناس استغربت
طلع رجال جبير مبتسم ويرحب بينا
هلا ابو نار نورت الموصل ، وبابا يرد عليه
دخلنا بيتهم صارت الحديقه بوجهنا
حيل جبيره والبيت حيل حلو
لكينا 6 بنات رحبوا بينه بس لفتت نظري بنت
يا الله الجمال الي شايلته
شكره لون عيونها اسود لابسه بجابه وفانيله
شعرها نازل ع متنها واصل النص ظهرها
اني بنت وصفنت عليها
وأنوب ابتسامتها شكد حلوه
وبصفها اختها نفس جمالها هوَ هلكد الموصليات حلوات ياربي جمالهن نادر ..
تقربن يسلمن علينه كعدنا جان سلامهم حلو
مثلهم
صبوا النا الغده تغدينا وسوالفهم حلوه

إلى أن كال الرجال الجبير
يلا ناخذكم تشوفون بيتكم
زوجته كالت " البيت نظفنا الكم حتى ما اتعبون
وانتوا جايين من طريق طويل
وهسه هم راح اخلي البنات يروحن وياكم
حتى ترتبون اغراضكم "
ماما ردت عليها اشكرج خيتي ام ساره
ماقصرتي "
اني من سمعت هيج ردت اروح ابوسها
لان من صدُك مابيه حيل انظف
واني تعبانه
عاد طلعنا بعد ما ودعناهم ورحنا للبيت
بالأول عبالي هذا البيت النا بس بعدين
عرفته الهذا الرجال
المهم مشيت بينا السياره مو هواي إلى أن وكفنا
بصف بيت ونزلنا
هم جان جبير وحلو مثل الاول
أغراضنا كُلهن موجودات والبيت يلمع لمع
من النظافه
عاد بدينا احنه والبنات نرتب بالاغراض
من ساعه 3 العصر الحد الساعه 7
يلا خلصنا ترتيب الأغراض بس بقن
النواعم تركناهن
عاد جابوا النا عشه تعشينا وراها راحن
البنات واحنه نمنا من التعب

مرن اول ايام العيشه مو مثل قبل
ولا واحد من عندنا متعود حتى
علي اخويه الصغير هم ما ينام يبقى بس
يبجي للصبح
مرت الايام الجوارين مامقصرين
يدزون النا وحيل حبابين
شوي شوي صرنا ناخذ ع الوضع بس باقين
حذرين منهم لان ما نعرفهم مو مثل
ناسنه قبل الي ماكلين وشاربين وياهم

بلشت التقديمات ع الجامعات وقدمت
وطلع الي طب عام هنا
حسيت الوضع تغير وصارت الحياه احلى
خاصه بعد ما حققت الحلم الي اريده اني وأهلي
بدينا بالدوام واني جنت حيل
حذره يعني خاصه همَ حتى اللهجة مالتهم
تختلف من اللهجه الي احجي بيها اني
واكو مرات ما افهم شنو يحجون ابقى صافنه
بوجهم الا همَ يفهموني
رجعت النا الضحكه وتعودنا ع الأجواء
بس السنه الأولى خلصت سريع
وهم بتفوق عالي يعني طلعت من الأوائل
صح الدراسه حيل صعبه
بس ما صعبت عليه

سنه كامله احنه بالموصل ماما طلبت من
بابا نروح البغداد زياره لبيتنا لان حيل
اشتاقينه اله وهم صارينا هواي ما رايحين
ما اعترض خاصه
امورنا صارت تمشي تمام
وكل شي زين وماكو شي يعرقل
حياتنا رحنه البغداد وصلنا البيتنا
اول ما نزلنا
دخلنا البيت كأن مهاجر ورد الدياره
بحيث موقفنا كُلنا جان يقهر وبنفس الوقت مفرح
لو البيت انسان جان حضنته وما تركته
ركضت اشمشم بالحيطان واحجي ويا
" يرحن لك فدوه كُل البيوت " وهمَ
يضحكون عليه
بيت عمي استقبلونا فرحانين
بيقنا اسبوع وحيل ارتاحينا

ثاني يوم الصبح فزيت ع ريحه الريوك
مال ماما رجعتنا الايام قبل بحيث
طلعت ركض حسيت عادت أيامنا وهم
مشغله دعاء الصباح ويا زوجه عمي ويسولفن
وبابا وعمو كاعدين يحجون بالشغل والموصل
اوول ما خلصنا فرينا اقاربنا كُلهم اهل ماما وبابا

اخر شي رحنه البيت عمو ابو مهيمن
عقجت وجهي ماردت اروح خاصه
بعد ما سووا مشكله لان تركنا بغداد ورحنه
للموصل
اول ما دخلنا عادي استقبلونا بس ما شفت
مهيمن ارتاحيت
كاعدين جان تصيحني بنت عمي كالت تعالي وياي
اريد تساعديني اني ما استغربت
لان عادي هل شي
رحت وياها صعدنا فوك
هي تمشي ورايه بخطوه فتحت باب الغرفه
دخلت اني جان تدفعني وتطلع تسد الباب وتقفله
اني فزيت من تصرفها حاولت اسبقها
حتى ما تقفل الباب بس ما لحكت من
السرعه مالتها صحت بيها ..

نررررجسسس شنو هذا التصرف افتحي الباب

نرجس : اسفه حبابه سامحيني .

رجعت عطت بيها بس ماكو صوت الها
حاولت افتح الباب ماينفتح
تعبت واني احاول اجاني صوت من ورايه
فززني

مهيمن : لا أتعبين نفسج هذا الباب ما ينفتح

نارا : التفت لكيته واكف مكتف اديه وساند ظهره
ع الحايط ويضحك بشر صرت اتلفت
اريد شي الزمه حتى اضربه بي
بس ما لكيت هو صار قريب مني
عطت بوجهة ، انتَ شترررررريد مني شتررريد

مهيمن : عبالج من رحتي الغير محافظه ما الكفج
وارجعج يمي ؟؟

نارا : شبيييك انتَ ماتوب وهاي تصرفاتك مال الاطفال عيب عليك شكبرك تصير بعد

مهيمن : انتِ ليش هيج متسبعه عبالج ما اكسرج
هسه واطيح حظ حظج واخليج تونين من البجي

نارا : والله اخليك تبجي دم لا تحاول وياي
اني نارا مو ياهيَ الجان وهاي اختك الثانيه هم حقيره

مهيمن : الثانيه ؟؟ تقصدين اني الحقير الأول مو ؟

نارا : أي شنو اخاف منك وما اكولها انتَ اكبر
حقير وهذا تصرفك يدل ع حقارتك

مهيمن : خلي اشوفج هسه الحقير ع اصوله
حتى اتوبين وماتحجين هيج مره ثانيه ..

نارا : اباوع عليه شلون تقرب بسرعه
بلمح البصر سد حلكي ودفعني ع السرير
صرت جوه مثل العصفور بقيت ارفس
جوه وهو يصيح الا اكسرج حتى تصيرين الي
حسيت الخوف دب بجسمي خاصه من
شفته شلون صار يتلمس بيه شكد ما اني قويه
بس الا الشرف شرفي من يوصل احد يمه
انتهي
وهو يعرف شلون يخليني ذليله اله
وابقى اني الي اتوسل بيه
قرب وجهة مني حاول يبوسني واني ابعد راسي منا ومنا اختنكت حاط ايده ع حلكي ونصها ع خشمي
حتى نفس ما اكدر اتنفس
ايده الثانيه نزلها ع ملابسي ويحاول يرفعهن
قوتي راحت من الخوف والتعب
الي حسيت بي
حاولت اطلع صوت بس هو كاتم صوتي
عضني قوي من رقبتي روحي فرفحت
اني هم قويه واضرب بي وابعده
تعب من مقاومتي وراد اصير جوه ايده
صار يعض بيه حتى يخليني اتألم

خارت قوتي من رفع ملابسي وبان جسمي
هنا حسيت بالخوف كلت هاهي راح
اروح بيها بجيت بقله حيله وصحت بداخلي
ياااااااارب سااااعدني
درت وجهي لكيت بصف السرير كومدي عليه
كلاص كزاز ب ايدي حاول اوصل اله اصبعي
يطخ بالكلاص إلى أن سحبته لزمته
وبكل قوتي ضربته براسه قووووووي
بحيث تفلش الكلاص براسه
صرخ صرخه والدمه ترس ملابسه يخلي ايده كدام عيونه مليانه دم ويرجعها ع راسه دااخ
ورجع يرجع عليه وكفت ع حيلي ارجف وبيدي قطعه
كزازه صحت بي .

ووووووالله بس تتقرب اذبحك بيها وما يرفلي
جفن ياااخسييييسس يااااااكلب .

انفتح الباب ودخلت اخته شافته ينزف
شهكت مصدومه اني رحت يمها دفعتها
ع اخوها صحت بيهم ..
تفففف عليج وعليه واحد انكس من الثاني
حيوانات تساااعدين اخووووج حتى يغتص***حوبتي ماتتعداك لا انتَ ولا اختك عساك بالموت
ياحقيررر .

عفتهم ونزلت ابجي قبل لا ادخل مسحت
دموعي ورتبت نفسي ودخلت الاستقبال
حجيت ويا بابا وقنعته نطلع كلت
التوبه اذا رجعت هنا مره ثانيه
طلعنا من بغداد بكاملها ورجعنا للموصل
ايام مرت واني ما اتخطيت الموضوع
الا ان حاولت انسى حتى ارجع
الطبيعتي بالكوه يلا مرت هاي السالفه بس بقت
ادك براسي وبكلبي من اتذكرها اكعد ابجي
شلون بلحظه وحده راح يعدم حياتي
الحقير .

رجعت اداوم بالكليه تعرفت ع صديقتي
اكثر وحده مقربه مني هي أسراء
هي أصلها من بغداد بس ساكنه بالموصل
حتى كلامها موصلي
حيل حلوه عيونها عسليه مكحله ورموشها كبار
وخشمها صغير وجها بي شامات مميزه
ودائما تتميز بيهن
بحاجبها الايمن والايسر الاثنين نهايتهن شامه
وخده واحد بي وجوه شفتها
كُلش حلوه اني دائما اكول الها
" لو اني ولد جان اتزوجتج " كد ما جمالها
يجنن وهادئ بنفس الوقت

مكياج ما جنه نخلي الا شي خفيف
يعني الحمره السحريه
والباورد هذا القرص الأحمر هي جانت تخلي
شي قليل واني كذلك
يادوب شي يبين
علاقتنا يوم بعد يوم تتطور وصرنا صديقات
حيل مقربات
لا اني حبيت ولا هي حبت بدايه الدوام
جان مجرد ما نشوف شخص حلو او بنت حلوه
نكول هذا حلو وبس اما ك حب ما دخلنا بهيج شي
ابد اني ملتهية بدراستي
حيل جنت متفوقه ومن الأوائل وهي ع واهسي
تدرس واني اسحل بيها ع طول ..

ردنا نطلع وهي وكفتني
أسراء : نينا
نارا : ها شكو ؟
أسراء : عرس اختي الباجر الله عليج ما تجين
نارا : ماشي اكول الاهلي واشوف
شنو يكولون
أسراء : قنعيهم تمام
نارا : تمام ، رجعت للبيت وحجيت وياهم
بالكوه يلا اقتنعوا
ثاني يوم جهزت نفسي ولبست محتشم
واخذ ملابسي وياي هناك اغيرهم لان بس
بنات
اول ما وصلت للبيت دكيت الباب
جان ينفتح ويطلع واحد ولد واكف كدامي
بقيت صافنه ما اتوقعت اكو ولد لان
هي كالت البيت بس بنات موجودات

نارا : ااه عفواً أسراء وين ؟ رد عليه ب أسلوب
حلو وهادىء
_ اتفضلي ادخلي اختي جوه
نارا : دخلت وصارت بوجهي أسراء
سحبتني لغرفتها واني اضرب بيها
شلون تخلين ولد يفتح الباب مو كلتي ماكو احد
أسراء : لج هذا اخويه شبيج بعدين هو راح يطلع
يعني قبل شويه طردنا وهو طلع مطرود
نارا : يا خطيه
أسراء : يلا حبي اني نازله وانتِ غيري ملابسج ورتبي نفسج نزلي كلنا جوه
نارا : تمام ..

هي سدت الباب و نزلت واني آمنت ماكو
احد الهذا ما قفلت الباب وراها
نزعت ملابسي وبقيت بالداخليات
ردت البس الفستان هو بيدي
جان ينفتح الباب رفعت راسي وشهكت بصوت
عالي اول ما شفت اخوها ال أسراء واكف
وجامد بمكانه هو مصدوم واني مصدومه
الفشله الي حسيت بيها ودي اشمر
روحي من أعلى بنايه
واذا ما متت هم ارجع اشمر روحي مره ثانيه
إلى أن اموت
حطيت الفستان ع جسمي وصحت بي
ااااااطلع ااااااطلع
هو اخترع مايعرف وين يودي نفسه
نزل راسه يعتذر ونوب رجع رفع راسه يباوع
صرخت بي وهو طلع وسد الباب

اني لبست الفستان بس شنو
جسمي كله يرجف ودي ابجي هذا شلون
شافني هيج ياربي الموقف حيل يفشل
بقيت فوك متعلكه حابسه نفسي الا ان أجتي أسراء
شبعتها طن كتل
وهي ما مفتهمه السالفه الا ان سولفت
الها وهي خلصتها عليه بس ضحك

أسراء : الله يساعدك يا خويه هسه الكا مايعه
روحه وهو يشوف هذا الكيمر

نارا : اششش ولا حرف ترى والله اعوف
العرس واطلع

أسراء : ههههههه سكتت يلا ننزل يا زوجه اخويه

نارا : هلوووو هلووو هاي شنو انوب

أسراء : والله بعد الي سمعته ف الله يساعد اخويه
هسه يعرس وشلون ما اشوف راح يجني يسألني
عليج

نارا : تخصرت الها ، اي ليش عيني يجيج
ويسألج عليه ضحكت بوجهي وغمزت الي

أسراء : لان دااااخ بالأحمر

نارا : عطت بيها طلعت تضحك وتصيح
عليه تعالي نزلي
نزلت وراها بس متفشله احسهم
كلهم يعرفون شنو صار برغم ماكو احد يعرف
شنو صار .

خلصت الحفله وطلعت حتى ارجع للبيت
خاصه بابا اجه ينتظرني برى
اول ماطلعت صار بوجهي
اخوها صفن بوجهي عبالك كدامه جني
ردت الزكه بكف ع وجهة
تعديته وطلعت رجعت ويا بابا طول الطريق
نسولف إلى أن وصلنا للبيت

مرن كم يوم بالدوام جان تجيني أسراء

أسراء : ياقيمغ

نارا : ها كولي

أسراء : اخويه طلع غجيل زلز

نارا : شنو ما فهمت ليش تحجين بمفردات ماا افهمها ، ضحكت ورجعت فهمتني

أسراء : لج يعني رجال وكح

نارا : ليش ، اشو هاي غصت بالضحك
ع كيفج راح تموتين يمي

أسراء : من بعد ما اقشعج بالاحمغ ساحح

نارا : شنوو شبيج احجي عدل

أسراء : يبووووو لج اخويه داخ بيج داااخ
ثوله الأحمر من شافج الهذا اليوم اكل راسي
بيج ويريد يتقدم الج سألني اذا
تحبين لو مخطوبه كتله ولا وحده كال هاهي
لعد نتوكل كتله اسألها بالأول وبعدين
نروح الها
لج اخويه وكع بيج يااافررررحتي بيكم

نارا : بقيت صافنه يااا حب من اول
فشله وياريت فشله حلوه انوب الفشله بدون ملابس

أسراء: ههههههههه اي والله حب بدون ملابس

نارا : بس تعرفين بيه اني ماريد اتزوج
وهمي بس دراستي

أسراء: نينا حبابه

نارا : والله شبيج اكمل دراسه بعدها يلا افكر بالزواج

أسراء: اوووف هسه ينقهر هو غير
طاير بيج من الفرح واني أكثر
زين نأجلها واكول اله بعد الدراسه

نارا : باعي اني ما اتزوج هسه لو شنو يصير
انتِ شفتي شصار بيه وشنو عشت
وحاربت علمود دراستي ف هسه
ما اكدر تعذريني افكر من اتخرج

أسراء : تمام اني أفهمه
نارا : أي عفيه واذا شاف بنت الحلال
خلي يشوف طريقه لا يبقى ينتظرني طول
هاي السنين خلي يعيش حياته
أسراء: تمام
نارا : واضح ضاجت لان هي جانت هم فرحانه
بس شوي مو بيدي ماريد

وراها بفتره أسراء صارت ع علاقه حُب
بكرار علاقتهم كُلش حلوه
وحبهم واضح بحيث الكُل يعرف كرار ال الإسراء
و أسراء الكرار

مرت الايام إلى أن صارت الأوضاع
يوم بعد يوم تصير اسوء الضوضاء بكُل مكان
سنتين تقريبا احنه بالموصل جانت الا ضاع هادئه وحلوه اما هسه انعكس كُل شي
صارت تصير حركات غريبه
كلام غريب وأجواء تحسها كأنها من الخيال
فجأه يطلعونا من الدوام بحجه انتهى
وفجأه يصير رمي بعيد مو قريب
ارجع للبيت الكه البيت بس صوت عالي
وماما تتوسل نرجع البغداد
بس هو يجاوبها بهدوء ومرات تصير مشاكل
بينهم واني ابد ما ادخل
لان بنفسي ما فاهمه الوضع
بس الي اعرفه هاي هوستهم كُلها مرتبطه
بالوضع الي ديصيرر برى
يوم بعد يوم والوضع يسوء شلون وصلنا
هنا وين جنه و وين وصلناااا !!!!....

فزيت من صفنتي ع جره ايده وهو يصيح
عليه حتى اتحرك لان الرمي صار بكُل مكان
باوعت ع أسراء الطلقه جايه بيها
واني كل هاي الذاكره رجعتلي بثانيه وحده شلون هيج
مر شريط حياتي بهاي السرعه
معقوله الانسان من يهدد الموت حياته يعيد شريط أيامه الي عاشها بثانيه وحده !!!

صرخ بيه مره ثانيه ..
_ لج بااااااباااا امشي تحركي وهاي صديقتج
الزميها وياي ندخلها الهذا الأسواق
قبل لا نصاوب احنه

نارا : لزمتها شلناها اني ويا ودخلناها
للأسواق بس شنو
البجي الي ابجي بالكوه اتنفس بسببه
احس كلبي راح يوكف من البجي
واني اشوف أسراء تنازع وحياتها بخطر
اباوع الرجال يطلع عمره بالاربعين
شكله هو هم جان يركض لان بالكوه يتنفس
اباوع عليها ما تتحرك ولا تتحرك
صرخت بصوت عالي ، ولج اسررررررااااء
لاتروحين لاتموووووتين حبااابه فدوه
الج لا تموووووتين ،
ماردت عليه بقيت ادك ع راسي وابجي
اصيح للرجال ، شووووفهااا ليش ما تكعد
وكف النزيف الي بيها الله يخليك وكفه
دتنزززززف البنت راح تموت صديقتي

رفعت راسي اطلب المساعده منه
لكيته هو حاط ايده ع حلكه ويبجي
الموقف يهز اكبر واحد
بنت صغيره تنازع بين الحياه والموت
مانكدر نسعفها ولا نساعدها بسبب
الرمي القوي برى واذا طلعنا توكع
بواحد بينا وينتهي
رجعت توسلت بي واني حاطه أسراء
بحضني والدم مالي ملابسي ، الله يخليك
عمو خليي ناخذها للمستشفى

_ امشي عمو ناخذها امشي احسن
ما تموت هنا بدون مساعده
نارا : مسحت دموعي واني ايدي مليانه دم سألته اكو سياره مو
_ اي اي برى سيارتي يلا نشيلها بس
انتبهي لاترفعين راسج لاتجيج
طلقه بلكت الله وتنتهي هاي المواجهة
نارا : أي اي ، هزيت راسي وشلناها
طلعنا برى وبعده الرمي
عبالك حرب
ركضنا للسياره صعدناها ورى وخليتها بحضني
وهو ساق السياره سريع يحاول ياخذ
طرق سريعه ومختصره وبعيده عن الرمي
أسراء احس الدم مالتها بوري ومفتوح
تنزف نزف مو طبيعي

الهسه صيحتها براسي من صار الرمي و وكعت
وصاحت بصوت عالي
ناااااراااا ومن التفتت عليها واكعه متصاوبه
ماتروح صرختها من راسي ابد
خليت ايدي ع راسها واقرا قرآن
صحت ياعلي ياعلي ياعلي
جان الرجال رفع راسه سألني بشك

_ عمو انتِ شيعيه ؟؟؟

نارا : حسيت راح يغمى عليه من الخوف
خاصه نظراته جان توحي للشك
جاوبته بتلعثم ، اي

_ ديربالج تكولين هيج شي راح نوصل للمستشفى
ماتجيبين طاري هل موضوع ولا اي شي يخصه
ديربالج ترى تروحين بيها

نارا : هزيت راسي بس حيل خايفه
بقيت ارددها بداخلي ، يا الله
ياعلي ياقالع باب خيبر

وصلنا للمستشفى واخذوها من ايدي
دخلت وراهم اركض
حتى الرجال ماعرف وين راح اذا ورايه اجه او لا
بالي يمها

كعدت يم الباب اقرا اياات قرانيه وادعي الها
حسيت الدنيا صغرت بعيني
من بعد هذا الموقف الي عشته
خليت ايدي ع راسي وابجي بصوت عالي
اي شخص يمر مني ينقهر ع حالي
ملابسي كلها دم وحالتي حاله
حسيت الدكتور طلع وكفت ع حيلي وركضت
اله متلهفة ينطيني خبر حلو عنها
شفته وكفت من شافني صرت كدامه
سألته ها دكتور الله عليك طمني شلونها
وياريت ما جاوبني ..

الدكتور : للأسف نزفت هواي وانطتج عمرها
البقيه بحياتج ..

ــــــــــــــــــــــــــــــ•●•ـــــــــــــــــــــــــــــــ

يتبع ..

انها فقط البدايه كونوا ع ترقب لاحداث
تخطف الانفاس ...