رواية الـرياش نَهج مُغاير الفصل الحادي والعشرون 21 - بقلم اسـاور حسين 🦢✨

اريد اطلع وصلت للباب وصاحتني شهد
وصوتها من البجي مبحوح عيونها صايرة حمرة دم
_ دُر وين رايحة وعايفة علي الآكبر .
_ اني وياه ما اتركه وطلعت لان هو طلب مني اطلع .

طلعت وانور صار مقابيلها تقرب يريد ياخذ
الجنطه سحبتها منه وكملت طريقي ما قبلت يساعدني
وشهد بمجرد شافت وجهه طبگت الباب بكل قوتها
صفن على باب لثواني هز ايده ورجع صعد بالمقدمة
درت وجهي على شباك لا اني احجي ولا واحد بيهم يحجي
وصلني على بيت نزلت وريان ويايه آخذ الجنطه بس انور
طلع دخلت من جهة المطبخ شفت مساعدة جايبينها جديدة
وحرة بصفها عصبية : ولچ ميمي موووو احجي وياج حاجيني .

ريان : شكو ؟
حرة : خبلتني احجي وياها ولا عبالك شنو جايبها ماتسمع ؟
ريان : تسمع .
حرة : هاك شوووف ، ميمي احجي وياج اريد تشغلين الغسالة
لچ ميمي يااااااا هاي شبيها .

دُر : ها شبيچ بس تتعاركين .
حرة : تعالي شوفي هاي هم عرفت حظي .
دُر : شبي حظچ ؟
حرة : واحد اخرس بهل بيت راح ورجع جايب مساعدة طرشه .
ريان : حتى المساعدة طلعت روحها منچ .

حرة : شنووووو يعني شنو قصدك .
ريان : طلعت روحي من مشاكلچ وصوتج غثني غث .

حرة : سمعتي حتى من ارد جواب بوجهه واخلي
صدك تطلع روحن ما تحجين شفتي المعاملة السيئة
بعينچ سمعتيها بإذنچ لوووو هم تغشمين نفسچ .
دُر : لا حقچ ردّي براحتج اني اروح ارتاح بالغرفة.

حرة : كلها تريد ترتاح سباتكم ما يخلص بزعت روحي منكم .
عفتها وفتت واسمعها تتعارك هي وريان
ريان : عوفيها تشتغل لا تشرد من وراج .
حرة : أحجي وياها خليها تحترمني .
ريان : حاجيها عدل .
حرة : ميمي احجي وياج حبيبتي جاوبيني .
ريان : بكيفها ماتريد تجاوب.
حرة : لازم تجاوبني .
ريان : هلو ميمي .
ميمي : هاي بابا .
حرة : لا يا ام الزلم .
ريان : هههههههههههههههه .

شفتها طلعت من المطبخ وهي تسب وتغلط على ميمي
وتتوعد قفلت باب الاستقبال عليهه وبعدها تحجي رجعت
اخذ جنطتي شفت ريان يضحك من شافني خفه ضحكته
ورجع للجدية: اني داخل للغرفة ممنوع تدخلون عليه
وما اريد اسمع صوت احد اشتغلوا بهدوء .

رجع بغرفته مثل قبل اعتكف على نفسه اخذت ملابسي
وصعدت فوك فتحت باب غرفة شفت الفراش مخربط
وملابس انور على سرير عرفته هنا ينام ، بقت بس غرفة
اخيره صغيرة دخلت عليهه بيها بس سرير نفر وكنتور صغير
خليت أغراضي وضميت نفسي بفراشي تعبت صدك تعبت
التفكير زرف راسي والله يريدني لو كرهني
صدگهم لو يعرفني ما اسويها ، شلونه هسة وين هوه
لا اراديا صرت افكر بي واحتل تفكيري وكلبي يوجعني
بي اتذكر شصار بي ، ليش ما نرتاح ياربي ليش .

بقيت بالغرفة نهار كامل بليل اسمع صوت طقطقه جوة
نزلت شميت ريحة اكل طيب دخلت على مطبخ شفت حرة
لمت كل شعرها وتطبخ تفتر منا وتروح هناك من شافتني ابتسمت
_ ها دُر نزلتي .
_ شصاير هنا .
_ آسوي عشه جوعانه انتِ اكيد ؟
بقيت ساكتة وكعدت يمها ميمي تغسل بالكراج
وحرة تحجي عليهه
_ ولا ساعدتني هاي الحقيرة.
_ عوفيها هي تتأقلم .
رجعت تكمل اكل وتثرم بالسلطة
حرة : روحي صيحي اخوانچ .

دُر : هههههههه صدك تحجين لو تشاقين ؟
حرة : احجي بكامل قواتي العقلية .

دُر : اخواني ما ياكلون سوية ولا ينلمون
وهذا اهم اسباب حالتي عانيت من الوحدة نهشتني نهش
ريان معتزل دائماً عايش بعالم خاص بي لا ياكل ولا يشرب
ولا يطلع ولا يحجي هواي كله وحده مايحب احد يقترب منه
وانور كل ما أحاول انسى الصرب والاهانة منه واقترب يأذيني اكثر
وصلت وياه مرحلة اذا يدخل البيت اقفل غرفتي من الخوف
اووووف شنو احجي بعد گلبي مورم منهم عوفيهم لا توصلين يمهم
تعالي ناكل اني وياج احسن .

حرة : اني اختلف عنج بشي اخواني وابوية يجبروني اطبخ
وانظف رغم عدهم خدم وحشم بس يحبون يذلوني
مرات يجبرني اغسل ملابس الخدامة تدرين ليش
حتى مايصير عندي وقت ادرس بس جانّ مصطفى
يحفزني اكمل شغلي واصبر وما اجادل احد واتحمل
ويسهر بليل يفتح مكالمة ويدرسني ويضبط منبه
هو يكعدني والصبح ينتظرني باب المدرسة ينطيني
اكلي ويصبرني بكلامه هو جان عوض بس حتى العوض
راح مات بسببهم خطبني اجه من الباب وخطبني
مرة ومرتين وأربعة وعشرة وصاروا يراقبوني اني وياه
و اخخخخخ دُر لو ادري ما رحت لو ادري ما طلعت .

حضنتها وهيه تبجي وجهه انصبغ احمر دم تناشغ
وتحضني بكُل قوتها متمسكة بيه مسحت على شعرها وهي نحجي
_ اتمنى بس اروح اشوف اهل مصطفى كرهوني لو يعرفون
اني مو ذنبي والله مو ذنبي دُر موتوا اهلي السبب
اريد اعترف عليهم ادري بيهم خايفين ويدورون عليَّ
يدرون بس تجيني فرصة اعترف عليهم كلهممم .

دُر : عزا يعني مستحيل ينسون امرج .
حرة : ذاك اليوم ريان يخابر وسمعته يگول يدورون عليَّ
واخواني حالفين بس يعرفون مكاني واوگع بيدهم يموتوني
وادري بيهم مثل ابوهم گول وفعل .

دُر : انتبهي فدوة انتبهي على نفسچ بعدج صغيرة .
حرة : حياتي مو مهمة وروح مصطفى تدرين المهم
عندي اعترف عليهم واذكر المكان وما اخلي دم مصطفى
يروح هدر اريد اعترف عليهم بس تصير عندي فرصة
ادمرهم وعادي بعدين اموت واروح عنده مصطفى ينتظرني .

عافتني وهيَّ تمسح دموعها وتحاول تبين نفسها طبيعية
تتظاهر بالقوة بس الكسرة مبينه بعيونها وهالاتها الواضحة
من السهر والكوابيس وتعب التفكير وفوضت عقلها
حرة : هذولي عوفيهم اني ادبرهم .

_ العناد عندج كارثي لازم تفشلين نفسج وياهم .
جهزت الاكل وراحت على غرفة ريان ضحكت واني اصيح بيها
_ هههههههه راحت على عقدة .

اشرت بيها انتظري ودكت على باب كذا مرة ماكو جواب فتحته
شفت ريان كاعد على لابتوب يشتغل رفع راسه اشر الها شكو
_ تجي تاكل بالمطبخ لو اجيب لأكل هنا بغرفتك ؟
_ شنو ؟
_ اختار تجي لو انت لو نجيك احنا .

_ مو حذرتكم ممنوع الباب هذا ينفتح كاعد اشتغل .
_ ناكل وارجع .
_ منو گال جوعان ؟
_ انت اكلت شي من الصبح الخد هسة رحت على اساس
معزوم رجعت مسحول دمشي اكل لا تتخربط .

_ اني اتخربط ؟
_ اي .
_ شكبرني شگدي اتخرررربططططط .
_ سبحان اللي ما يتخربط ربك وحد تتخربط طبيعي مو انسان .
_ دروحي مني روووووحي .
_ اوكي .

طلعت عافت الباب مفتوح نقلت الاكل بصينية ومشت على غرفته
وهو مصدوم منها ومن تصرفاتها
_ يلة دُر تعالي ناكل عيني جوعانين.
فاتت على غرفة وهي تضحك
_ شلون سويت اكل طيب انطيني رأيك من تخلص .
ريان : عجيب .
تريد تنزلها اخذها من ايدها وهو يصيح
_ انتظري امشي اطلعي اجي اني اجي بس اطلعي .

طلعت وهو يمشي مقابيلها رجل الصينية على ميز
يريد يكعد وتذكر راح وكف بصف الدرج وصاح
_ انوووووور .
كررها اكثر من اربع مرات سمعنا صوت الباب وصوت انور
_ ها .
_ تعال .
_ شكو ؟
_ علي الآكبر يريدك يگول اجيت احود انور حود واسبي سبي .

_ اي مو مگرم ماعندي ايد ورجل .
_ انزل لعد تعارك وياه .
_ اهووووووووو .
رجع للغرفة شوية ونزل يدور على علي الآكبر
_ وينه ؟

ريان : تعال أكلّ ويانا .
_ شنو ؟
_ تعال يمعود خلصني اريد ارجع اشتغل .
_ ما اريد .
_ غير يجي .
_ ما اريد .
_ اسمع اذا ما تاكل هاي تنگ فوك راسي .
_ منوو .
_ بنت عمك .
_ بنت عمي شكو .
_ تحجي هواي خبلتني .
_ اضربها توبها .
_ مو اني حيوان مثلك .
_ دولي انت وياهن .

راد يروح حرة خلت الصمون وهمست قريب منه
حرة : صيح خلي يجي ياكل مابيه احجي هواي ونعسانة اريد انام .
ريان : تعاااااااااااااااااال يا نعال تعال .
حرة : عفية عليك هيج اريدك .

التفت عليَّ ياشر على حرة لازم نفسه
ريان : دُر احجي وياهااااااا ترا بزعت لا تحجي هيج .
دُر : انت تسمع كلامها قابل البنية شمسويه .
ريان : تحجي هوووووووووواي .
حرة : نسمع لا تصيح شبيك .
ريان : عوفيني بحالي .
حرة اكعد اكل وصيح اخوك حقق حلم اختك
ريان : حلم اختي ؟
حرة : اجتمعوا على ميز طعام واحد شصار عليكم .

كعد على ميز وراسل انور شوية ونزل بدون ما يحجي
هو هم صار مقابيل ريان ياكل بدون صوت
حرة : طيّب الاكل؟
دُر : يموت نفسچ طيبة بالأكل عاشت ايدچ .
خلت ايدها على خدها ومالت راسها على جهة ريان
_ شنو رأيك .
ريان : ما ترتاح اذا ما تحجي .
_ شنو رأيك ؟
ريان : اكل عادي شنو علم الذرة .
_ شنو رأيك؟
ريان : مابي شي .
_ شنو رايك .
ريان : يخبل الواحد يمووووت اكلج طيب كلش طيب .
_ الحمدلله عجبك .

دارت وجهه على انور باوعت وضحكت
_ شنو رأيك؟
رفع حاجبة وهو يخزرها
انور : اششششششش .
حرة : ريان سمعت يگول اشششش .
ريان : عوفي .

حرة : شسويت سألت على اكل طيب لو لا .
ما جاوبها رجعت تحجي
حرة : ريان احجي شي .
انور : كافي .
حرة : ريان انور يگول كافي .
ريان . انور لا تجاوبها اسكت دخيل الله اسكت .
حرة : ليش مايجاوب؟
انور : راح اضربها راشدي اصحيها على زمانها .

حط ريان ايده على راسه ما متحمل هو اكثر شي يكره الكلام
حرة : اني بيت ريان مايقبل احد يضربني مو ريان .
ريان : اي .
حرة : هاي حركة يوسف ابوك .
ريان : مو طبيعية والله .
حرة : انور شنو رأيك .
انور : طيب .

حرة : هاي ام مصطفى علمتي اطبخها .
انور : مصطفى منو ؟
ريان : حبيبها .
انور : شنوووو ؟
حرة : مثل ما سمعت .
انور : شو ماتستحين ديوث اني وتحجين هيج مقابيلي .

رفع ايده يريد بضربها سحب ريان الكرسي مالتها وگف صار مقابيلها
ريان : لا تضربها يمعود .
انور : ماتسمعها .
ريان : راد يخطبها عمك وإخوانها موتوا .

عاف انور الاكل وهو يسب بيها ويغلط صعد فوك
وريان التفت عليهه : ممنوع بعد تذكرين اسمه .
_ ليش ؟
_ عيب .
_ ليش عيب ؟
_ مو خطيبچ .
_ راح اشتكي عليكم .

حجتها وراحت للغرفة رجع عيونه على ماعونها
ريان : بعدها ما اكلت شي .
دُر : وجانت جوعانه .
ريان : اخذي اكلها تاكل بغرفتها وتسكت حجي زايد ما اريد .
اخذت ماعونها وفتت للغرفة
_ ولچ شكد تحجين .

حرة : علمودج اريد افتح مواضيع وياهم حتى يحجون وتشوفيهم .
_ يعني انت ماتحبين تحجين هواي .
حرة : تدرين اتمنى اروح مكان بعيد مابي احد واعيش وحدي
بس اريد اترك ذكريات حلوة بيني وبينج لان انتِ تستاهلين
ما انسى شلون عرضتي نفسج للخطر وساعدتيني احسن من امي .

حضنتها واني اضحك جاوبتها
_ الحمدلله تعرفت عليج ، ياربي المشاعر اكلي واسكتي عوفي
هل سوالف تنزل دموعي واني عيوني تعبت من البجي.
ماقبلت تاكل بس بقت تسولف على مصطفى الحد ما نامت
غطيتها وطلعت بيدي اكلها مثل ما هوه شفت ريان بعده ياكل
وبيده التلفون نزلت الماعون رفع عيونه عرفها ما اكلت
عاف المكان ورجع للغرفة ، اجت ميمي اخذت المواعين غسلتهم
واني صعدت فوك فتحت تلفوني بعده علي الآكبر ما شايف الرسالة
هربت من كلشي بالنوم نمت الثاني يوم كعدت جسمي من المشاكل
والصدمات مكسر تكسر ، اخذت تلفوني شفته ماكو علي الآكبر خبلني
ما ترددت اكتب اله رسالة من الصبح
" بعد ما تريدني عادي اذا ما تريد دُر احجي لا تخليني انتظرك "

نزلت جوة شفت ريان لابس رسمي ويريد يطلع عطره
كفخني نزلت شافني ونزل راسه يعدل بالساعة
دُر : صباح الخير .
ريان : هلو .
_ خابرت علي الآكبر .
_ ما يجاوب .
_ اخاف صار شي بالطفل .
_ رجعوا الطفل للبيت الحمدلله مابي شي .
_ لعد ليش ما يجاوبني ؟
_ متعارك هوه واهله .
_ جرب تخابر من شفت البارحة عمي شلون تعارك وياه
لليوم والله جرعت المر مايستاهل علي الاكبر .

اتصل مايجاوب بدون مايحجي بعد سد الخط وطلع
من البيت رجعت للغرفة وسديت الباب ورجعت بفراشي
نمت حاربت حتى انام كعدت الظهر راسي يوجعني
نرزلت اكلت شوية وصعدت اسمع صوت انور يتعارك بالتلفون
انور : مو شغلي راقبهااااا زين من ترجع للروضة تبلغني .

عرفت المقصودة شهد دخلت علية عيوني غيمت من قهري
_ بعدددددك تفتررررر وراهااااااا دمرررتها شنووو تريد من البنية
لك هاي مدللة اهلها ما يرفضون الها طلب لا تلووووثها بيك .
انور : اريد احجي وياها وبس ماعندي نية سوء .
_ حتى لو نيتك صافية لا تقترب منها جيت حذرتك
مرة الثانية وحق الله ما ارحمك وانطي علم العلي الآكبر
وتعرف علي الآكبر يطم عارك طم ويحودك حووووود .

انور : تطلعين لو تريدين نعيد الماااااااااضي .
دُر : طالعة بس يا انور اذا اقتـ .
اريد احجي صرخت من اقترب مني لزمني من طرف ملابسي
وطلعني دفع شمرني على بال غرفتي ورجع وهو يسب ويغلط
_ تحجي مثل كلامه صايرة تقلّد الهمجي .

بقيت يوم كامل بغرفتيّ محبوسة اكل بروحي
باليوم الثالث ميمي صعدت رتبت الفوك واني
دخلت للحمام من طلعت اخذت عصير اريد اشرب
معدتي تگلب ذبيت البطل وبقيت افتر بالبيت حتى حرةً
اعتزلت ما تحجي لو تفتر مثل قبل البيت عبالك ميت
رجعت للوحدة وللروتين حتى اكلي من احس راح اتخربط
اضطر اكل شوية وارجع انام من دوخة التفكير
باليوم الرابع اخذت تلفوني ابحث على اشياء عامة
والعصير يمي اشرب واكل كيك واقرا لليل طلبت اكل
تعشيت شي قليل وسحبت مخدتي حضنتها ونمت .

الساعة بـ3 الفجر حسيت حركة غريبة يمي وايد باردة
تنمد على خصري ، وايد ثانية تتلمس خدي وشعري
فزيت مرعوبة حضني بكل قوته سيطر على حركتي
وهو يهمس : هذا انا بوية دُر .
بعدت روحي منه وكعدت رفعت شعري اعدل بنفسي
_ لا تلزمني .
_ بوية انا شوفتچ تكفيني .

_ جذاب .

_ اقبلها بس منج .
_ ليش اجيت هااا ليش .
_ التعب بيه ماينوصف بس من اشوفچ يرد حيلي يا كل حيلي .

سحبني من خصري عيونه على رگبتي بلع ريگ
عاشق ولهان ويريد يرتوي منعته وهمست
_ عفتني .
_ دام اكدر اوصل الج واعرف انتي وين مرتاح انا .
_ واني شلون اوصل الك .
_ وحگ رجفتي وضعفي بكل مره تصيرين بين ايدي
يمج انا بكل وكت لو ادري بيچ تحتاجيني اهدم اللي
ماينهدم واوصل الج وافديچ بروحي .

_ شلون صعدت هنا ؟
_ من الدرج .
_ علي الآكبر .
_ روحه لعلي الآكبر .

سحبني بكل قوته من خصري وهو يبتسم
يحاول يخليني ما ارتبك
_ انا تعبان دُر .
_ وين جنت ؟
_ تحبيني ؟
_ شبيك ؟
_ الله لا يگولها واعيش فراگج الموت ارحم .
_ ليش مارديت على رسالتي .
_ اتجرع السم بفراگچ انا اتعب هواي اتعب .

وكفت مرتبكه وهو يحاول ما يجبرني على اي تصرف يبدر منه
تنفسه سريع عيونه اكلتني ايده ترجف بس يريدني اقترب
_ كشفت الحقيقية .
_ ياهو حبچ بگدي .
_ ماكو احد غيرك .
_ اتحداهم يوصلون الربع من حبي الج انا عاشگچ .
_ بس علاقتنا عقدة كل ما نقترب تتشابك اكثر .

نهض صار قريب مني لمعت عيونه وتغيرت نبرة صوته
_ راضي انا راضي اتجرع السم واحصل حتى لو دقيقة وياج .
_ كلها رافضة علاقتنا .
_ بوية انا والله ما اشوف غيرج وصلت مرحلة ما يهمني غيرج .

_ راح تمل بيوم مني وتعوفني ؟
_ انتِ بنيتي ما املج بس الموت ياخذني منج .

رنّ تلفونه فتح خط يمشي ولازم راسه
_ ها جود .
_ وينك تحوم بهل ليل جنك بنت ليل .
_ رحت الدُر .
_ بيك مرض .
_ اسمة دُر .

طلعت للحمام غسلت وجهي وطلعت شفت انور صعد
اريد ارجع للغرفة صاحني : علي الآكبر هنا ؟
_ اي .
_ شكوووووو بهل ليل .
_ ترا زوجي .

طلع علي الآكبر استند على حايد ورفع اصبعه سحبه
على خشمه يقلد اهل المخدرات : ها شمه تصيح على دُر .
_ شعندك هناااا ماتشوف الساعة .
_ انجب انت شعليك .

انور : تقبل هيج وكت اروح لأخت*****
لزمني علي الآكبر من ايدي وفوتني بالغرفة حتى مايتعارك
مقابيلي نمت بالگاع اباوع عليهم
رجع هجم ضرب انور بوكس قبل لا يكمل
وانور رجع الضربة واثنينهم واحد يضرب بالثاني
ما اشوف غير علي الاكبر دفر انور ونام فوكاه
ورفع ايده غمه بنص وجهه وصاح : ولك جنك تريد تنغمممممم
يااااااا اغممم وعلي اغمك غم يا اغممممم احوووودك حود
ولك انا اسبيك سبي لااااااااا دخل روحك لا تصيح بوجهههههه .