رواية الـرياش نَهج مُغاير الفصل الثاني والعشرون 22 - بقلم اسـاور حسين 🦢✨

_____________________ الــريـاش
﷽

𓆩 اســاور حــسين 𓆪
بقلمي رواية : الــرياش

عفيتَك مَرة
المَرة الثانية أچويك
أذا يطلَع الماضي تعيش ندمان
غراب و گلت نَورس ردت احلّيك
أول مَرة اجامِل ، زَلة لسان .

لطفا لا تنسون التصويت والتفاعل بين الفقرات

⊰ دُر⊱

بسّ وكف يريد يشوف ابو اجه واحد يركض شايل خشبه
ضرب علي الآكبر على راسه لزمه وگع على وجهه فاقد .

لزمت قفل الباب اريد اندل دربي ما اشوف صرت بعيوني
طلعت بس ردت اشوفه احجي وياه اهل ميثاق كلهم شردوا
وجود وريان رفعوا علي الآكبر وعمي من شاف علي الآكبر
بالگاع فقد وهو يصيح : بووووويه علي الآكبر بوية حاجيني .

ريان : انوررررر ساعدنا إفتح السيارة لك اركض  .
صعد جود وسحب علي الآكبر حط راسه على رجله
ويضرب على كرسي السايق : ريان استعجل لك ريان علي الآكبر فقد .

انور ماقبل يروح وياهم اخذهم ريان بس عمي راح بسيارته
درت وجهي على حرة وصرخت بكل علو صوتي
_ ضربوا شفتيّ آخذوا مني حتى ما شفته .
حرة : لا تخافين فدوة مابي شي ادعيله يطلع مابي شي .
دُر : من عرفني لليوم المشاكل عنده ماتخلص بهذلته اني بهذلت علي  .

دخل انور يباوع عليه متعجب من ردت فعلي
_ انتِ كل عقلج تحبي لو لان يساعدچ ؟
دُر : متعجب موووو بعمرك ماشفت احد يحب .
انور:  حتى لو تحبي لازم تعرفين مو كلشي نريده نحصل عليه
واكو اشخاص نبتعد عنهم اهون من قربنا
ولازم تفكرين شكد ما تحاولون انتِ وياه بس ما تنجحون
والحب مو كلشي بالحياة اكو اشياء اهم .

دُر : ليش ما ننجح ؟
انور : اي علاقة بيها اطراف تخلق مشاكل نهايتها الخراب
لان كثر الدگ على الحديد يلين راح يجي يوم وتذكريني
راح تملّون بالآخير وتنفصلون .

دُر : علي الآكبر مستحيل يعوفني .
انور : صار فترة حتى تركتكم مو مثل قبل اريد تنفصلون
تدرين ليش لان عندي نظرة غير نظرتكم للمواضيع
متأكد يجي يوم وبعد ماكو شي اسمه دُر وعلي الآكبر .

عافني بصدمتي بكسرتي بخوفي بقلقي ودخل للبيت
دُر : حرة هذا شبي .
_ مخبل تعالي فوتي جوة .
دُر : تلفوني وين تلفوني .
دخلت للبيت اركض شفت تلفوني اخذته
اتصل عليهم ولا واحد يجاوب
رجعت طلعت برا احس البيت ياكل بيه
دُر : ليش ما يحاوب ولا واحد بيهم يجاوبني ويطمئن گلبي .

اروح وارجع طحنت روحي طحن من التفكير والمشي
ما اكدر اثبت بمكان اخذت البيت فر صعدت على انور
ماعندي حل غيره وحرة تحذر منه ما اسمع احد المهم
عندي اسمع خبر دخلت للغرفة شفت الشاش والمعقم
مقابيله مقدم ايده ويعالج بيها من شافني ما كمل تعقيم
بسرعة يلف بيها ومبين الوجع من ملامحه ، صبرت
روحي وتقدمت اخذت المعقم ولزمت ايده سحبها
_ شكوووو .
_ أعقمها مو زين تلتهب .
_ اعرف اداوي روحي وحدي .

_ بس هذا الجرح انطيني ايدك .
اخذتها وهو يسحبها اصريت عليه استسلم
نزعت الشاش ورجعت اعقم بيها بكل هدوء
مابدر منه اي رد فعل رفعت نظراتي باقي ثابت
_ يوجعك ؟
نزل عيونه شافني ورجع النفس البرود لدقايق
واني الفلف بالشاش صدمني من قرّر يسألني
_ تكرهني ؟
_ منو ؟
_ اخته .

فهمت مقصد كلامه بس تصرفت بغباء
_ وضح اكثر ؟
_ ماكو شي .
سكتت ورجعت اكمل ايده وهو متوتر
انور : عرفتيها والله .
دُر : شهد ؟
انور : تكرهني .
دُر : اتذكر اول ماشافتك شكد عجبتها .

ركز بكلامي بكل اهتمام فاجئني بعمره
ما انتبه او لفت انتباه انور موضوع
دُر : بس انت كسرت گلبها خليتها توصل مرحلة تگول
بعمري ما كرهت شخص بحجم كرهي لأنور .

انور : رجعتها اني بعمري ما اتراجع
عن قرار اخذه وتراجعت وياها .
دُر : شعجب ؟
انور : كلامها يختلف عنكم كلكم .

دُر : مثل اخوها .
انور : لا .
دُر : والله نفس الحنية عدّهم .
انور : هههههههههه ماكو شي اسمه حنية كلمات
سطحية مصطنعة كلهم مصالح بمصالح الحب وهمي  .

دُر : جربت تحب .
انور : امشي اطلعي .
دُر : الله يخليك وديني اشوف علي الآكبر.
انور : اطلعي دُر اطلعي .
دُر : خايفة  .
انور : اطلعييييييييييي لچ اطلعيييييييييييي .
دفرني برجله بكل قوته وسحلني من شعري شمرني برا
صعدت حرة على صراخي ضربته على وجهه وهو تخبل
شالها وشمرها على حايط انضربت وهيّ ناعمة وگعت
ركضت شلت الباروكة من راسها من شفتها تنزف
_ لك انووووور الله لا يوووووفقك .

عافني ورجع للغرفة صرخت الحد ما صوتي راح
ركضت للتلفون جوة اتصلت عليهم ماكوووو واحد بيهم
يتنازل ويجاوبني ، رجعت اسمعها تون من الوجع وتناشغ
دُر : حرة تسمعيني آسفة ساعديني حتى تنزلين جوة
لا يرجع يطلع ويضربني اني وياج يلة فدوة .

لزمتني من ايدي وملابسي اخذت الباروكة ونزلتها بطيئ
من سمعت صوت الباب اخذت الباروكة لبستها وعدلت
شعرها ، دخل ريان من شافنا رفع أيده اشر على حالنا
_ شصاير ؟
دُر : انور ضربني وضربها .
ريان : ليش صعدتي فهميني ليش ؟
دُر : توسلت بي ياخذني لعلي الآكبر ولا
واحد بيكم يجاوبني شبيكم ليش ماتردون ؟

مالت حرّة راسها على صدري دايخة
اشرت على راسها واني ابجي
_ شالها وضربها براسها بالحايط .
_ من السانها .
حرة : ضرب دُر خفت لا تموت بيده .
ريان : دُر وصليها للغرفة وتعالي اريدچ .
هو راح للغرفة وهيّ من صدمتها صاحت
حرة : ردت اگول هاي لو آختك ادافع وتتعارك علمودها
بس تذكرت اختك هم انضربت وانت ولا مهتم حالك حال الحايط
لا احساس ولا مشاعر تشبه عمامك وابووووك حالك حالهم .

التفت طال النظر وهو يباع بكُل ثبات ايده داخل
بنطلونه رافع حاجبه بشموخ ولا عبالك
لزمت ايدي رجعتها للغرفة خليتها بفراشها
دُر : اروح اشوف ريان كلبي نار على علي الآكبر .
حرة : ايدج تجري دم .
عوجتها شفتها مجروحه : من دفرني تعورت بالأرضية .

طلعت مستعجله دخلت غرفة ريان ماكو ركضت على
درج من سمعت صوت ريان طالع وباب انور مفتوح
دخلت للغرفة لكيت ريان لزم انور من راسه وبكل
قوته ضربه بخشب تاج السرير دفعه انور وصاح
_ ريان لا تجبرني اطلعععععع روحك من خشمك والله .
ريان : اطلع من بيتي هسة تطلععععع يلة .
انور : تطردني ؟
ريان : اي اطردك لان بقيتهن يمك امانة مو جيس ملاكمة
انت تكبر عضلات جسمك ونسيت تربي عقلك يا متخلف .

دُر : انت شوكت تعقل عود الجبير المفروض نحتمي بيك
الى متى كلبك يظل ميت عيب عليك والله .
ريان : لااااااااااا تحجين وياه هل متخلف .
انور : ما اريد اضربهن ولا اتجاوز اني اعصابي تلفت
وانت تعرف بشنو امرر المفروض تحذرهن مني .
ريان : اطلع انور اطلع .

دفعه انور وطلع وهو يسب بي ويهدد مسح ريان وجهه
ونزل دخل للغرفة نزلت للغرفة وياه شفته فتح الكنتور
وطلع فلوس يحسب بيهن ومبين مستعجل
دُر : حباب ريان اثبت وفهمني علي الآكبر شصار بي .
ريان : بعده لازم تمر 12 ساعة على اقل حتى نعرف شبي .

دُر : ليش هل وقت ؟
ريان : الضربة قوية اجت بين راسه وبين رگبته .
دُر : اخذني اشوفه .
ريان : اني بعمري ماسويت وياج موقف حلو يرفّع راسج
ولا بعمري صرت اخ مثالي ، بكلشي مقصر وبعدني ما متغير
الف شغله برآسه وروحي أكرهه اكره نفسي اني بس اريد
تعرفين انتِ عزيزه ما اكرهج بالعكس انتِ احن بنيه بيت الرياش
شفت خوفج علينة اني وانور بكل عركة ماتفكرين بنفسج
وتحمينا واحنا ما نستاهل لأنّ ماصاير اخوان الج ابد .

دُر : اني عاذرتك انت گلبك مكسور .
ريان : اني انهدم گلبي دُر خلوني مخبل أدور اثرها .
دُر : والله من اسمع الأذان يأذن ادعيلك والله .
ريان : وادعي لأنور.
حجاها ونزل راسها من لمحت دموعه ترست عيونه .

تقربت منه وهمست بخجل
_ عادي أحضنك .
نزل نفسه وحضني وصار يبجي على كتافي
_ الله يكسرهم مثل كسرتك .
ريان : اخاف تنكسرين مثلي خايف يجي هل يوم
ما اريد واحد بيكم ينهدم مثلي اخاف احبكم انتِ وانور
وصلوني مرحلة اكره كل البشر حتى لا امر بنفس ذاك الشعور
ما اريد اتعلق بيكم دُر اريد أكرهكم اكثر واكثر حتى ما اتهدد بيكم .

دُر : أسندك وتسندني واني وياك نسند انور
ونصير مثل علي الآكبر وأخوانه .
ريان : واذا هددوني بيكم ؟
دُر : علي الآكبر يگول ماكو واحد يموت قبل يومه
والموت حق علينه كلنا ، نحارب الباطل سوية
آني وياكم للموت أفديكم بروحي والله
اذا تريدون روحي ترخص الكم .

رفعت راسه مسحت دموعه واني اصبر بي
دُر : لا تعوفني إني احتاجك .
ريان : واني احتاجكم تعبت احارب وحدي .

_ اختك وامك وصديقتك كلشي اصير الك بس لا تصدني .
_ ونساعد انور .
_ انور صعب كلش صعب .
_ لا اني وياه براسه اني والله براسه وبديت اقنع
بي يترك المخدرات وصار كم يوم تركها .
_ ولأن تركها هيج اعصاب .
_ هو من يوم يومه أعصاب وهسة زاد .
_ ميخالف نتحمله ونطلع اني وياكم من ظلم بيت الرياش .
_ ما اعوفهم اذا ما اصيدهم واحد واحد ادمرهم اهدمهم هدم .

ابتعد وهو يمسح بوجهه ورجع للكنتور
_ راح ارجع للمستشفى .
_ اخذني .
_ اهل علي الآكبر يريدون علي يطلك .
_ مو كشفوا ميثاق؟
_ دُر اهل علي الآكبر طاردين زوجة سراج الدين
لان تسوي مشاكل بعدهم ما كاشفين موضوع الطفل منو سببه .

_ بس اريد اشوفه.
_ من يصير زين هوه يجي ما اقبل تروحين وتسمعين
كلمة تغثچ ، واني الخاطر علي الآكبر احترمهم وما اريد اتعارك .
_ شوكت يجي شلون اصبر .
_ ادعي مايصير بي شي .

طلع وعافني صافنه ايدي مربطه دقايق وسمعت صوت حرة
ادردم رحت اشوف شبيها وكفت بمكاني من سمعت صوت ريان
حرّة: روح شعليك براسي .
ريان : شيلي الباروكة اشوف الجرح .
حرة : معليك مو تگول من الساني .
ريان : جذبت ؟
حرة : اي جذاب اكبر جذاب وبارد هذا برودك توب منه توووب .
ريان : شكد تحجي .
مديت راسي شفت سحب الباروكة ودار وجهه شاف الجرح
ظل ساكت وهي اخذت الشعر من أيده ورجعت لبسته بسرعة
حرة : يلة روح .
ريان : يحتاج تعقيم .
حرة : معليك ابني .
ريان : ابني ؟
بقت ساكتة لازمة راسها
ريان : متأذية .
حرة : طبعاً شالني حيل وضربني بالحايط .
ريان : طردته بعد مايرجع .

حرة : يوجعني والله .
ريان: امشي اخذج مستشفى .
حرة : الله لا يعوزني عليكم شوكت اخلص منكم .
ريان : بطلي هذا الحجي بطلي .
حرة : امشي روح مني .
ريان : ابقي ابجي وحدج .

حرة : هسة تجي دُر .
ريان : وتولولين فوك راسها .
حرة : مدخل روحك بسوالف النسوان .

عافها وطلع من شافني اشر على غرفة 
_ هاي مو بعقلها الضرب مأثر على راسها .
راح واني دخلت عليهه شالت الباروكة شمرتها
وكعدت تبجي من الوجع واني افتر عليهه خايفة
ربع ساعة ورجع البآب أنفتح ودخل ريان
_ هذا تعقيم وگطن وشاش عقمي راسها
وبطريقچ بالشاش اكبسي السانها .
حرة : تعقم عقلك انت واخوك المطي احسن .
ريان : لچ حرررررررررررة .
_ هااااااااااا .
ريان : راح آجي حظچ أطيحه .
حرة : ما اخاف .

ريان : بسيطة اذا ما ارجعچ الهم حتى يقلعون هل لسان .
طلعت السانها ودارت وجهه جتفت ايدها ونامت
هو طلع ولزمت ايدي حيل سحبتني
حرة : ولج راح اموت من الوجع تعالي شوفي حل .

كعدت اعقم بجرحها وبالي وتفكيري بعلي الآكبر
خلّصت وخليتها تنام طفيت كل الأضاءة ورحت
شفت ميمي تنظم بالبيت صعدت للغرفة ورجعت
طلعت للكراج البيت بكبره يخنگ بيه صار اليل
ولا واحد بيهم رجع حتى انور مختفي بين حيرة
وتعب تفكير نمت على فراشي من الدوخة نمت
فزيت من الصبح اخذت تلفوني خابرتهم واحد واحد
الموبايلات كلها مغلق ، ساعة بعد ساعة تمر واني
انتظر وماكو اصعب من الانتظار بليل رجع ريان
باقي بالقميص والسترة بيده وجهه مخطوف لونه
دُر : وين جنّت والله موتوني الف فكرة وفكرة صارت براسي .
ريان : طلع علي الآكبر للبيت بس يحتاج مراقبة وراحة .
دُر : شوكت اشوفه .
ريان : مو هسة المستشفى صايرة هوسة وهسة بيتهم
عمامهم ولد عمهم والجوارين كلهم يمهم خلي يفرغ .
دُر : حباب اخذني شكو بيها اذا اروح .

عافني وراح للغرفة قفلها وبعد ماطلع
خلصت يومي وحدي حرة تاكل وتنام
وانور مارجع صعدت بليل قبل لا انام
تأملت اسمه (الرياش نهج مُغاير ) وكتبت بعد تفكير
" ياريت أكدر اوصل يمك ، عفتك وحدك واخر وحده
تگلك الحمدلله على سلامتك يا سلامي واماني "

سديت تلفوني ومسحت دمعتي من نزلت
كلشي بحياتي بالعكس لا استقريت بيت اهلي
ولا من تزوجت وين ما اروح حظي اسود
نمت من تعبت من البجي وهلكت روحي هلاك
نمت بحيرتي وقهري وضعفي ، نمت واني كارهه كلشي بحياتي .

فزيت الفجر على صوت باب غرفتي ينفتح
حاوطني سكون غريب واني اشوف علي الآكبر يدخل
مغطي راسه ولابس لثامه گعد قريب مني تلمس خدي
هايم بعيوني اخذني بحضنه بكل قوته يسحب بيه
رفعت روحي وايدي نزلت لثامه تلمست عيونه لذبلت
ولحيته ابتسم بتعب بست خده ولزمت ايده عيوني بعيونه
دُر : الحمدلله على سلامتك .
علي الآكبر: سلامتي عندچ .
_ خفت عليك .
_ وانا النار اكلت صدري منج .
_ مني ؟
_ تتعاركين بنص الزلم دُر .

سحبني من ايدي قربني اكثر منه وهو يضغط على كل كلمة
_ خليتي النار تشب بظلوعي شلون تطلعين بنص الزلم شلوون ؟
_ لا تلومني خفت على اخواني والله .
_ خليني بين عيونچ لچ بوية دُر تعبتيني .
_ تعبت مني ؟
_ ويروح تعبي ببوسة منج .
تقرب بكل هدوء باسني براسي ونزل على خدي
وختمها بوسة سريعة من شفايفي
_ شلون اجيت وانت هذا حالك .
_ بنيتي تريد تشوفني .
_ ليش لابس لثام .
_ متعود .

ملت نفسي على صدره وهمست
_ تحبني ؟
_ دايخ بيچ لدرجة يميني تحارب يساريّ مقابيلج
حتى ماتكسر قرارچ ، انا كلامچ عندي سيف دُرر روحه لعلي الآكبر .

شلت اكلاو التيشيرت من راسه شفت راسه ملفوف
_ يوجعك مو .

_ سكنت ، تعالي بحضني اريد انام .
_ راح تنام هنا .
_ اي ماتريدين؟
ضحكت وفتحت مكان اجه مدد نفسه تقربت
خليت راسي على صدره وايدي تتلمس لحيته
غمض عيونه بس بست خده ابتسمت على تاثير قربي منه
_ بعقلي جان ضجيج ماينوصف من اجيت كلشي راح .
اخذني على صدره اكثر وهو يلاعب خصلات شعري
_ ليش تهملين محادثتنا انا انتظر كل حرف منج .
_ انت ماكو ليش اكتب .
_ اكتبي كلشي وانا احلها فرغي ضجيج عقلچ بمحادثتنا .
_ ماتمل .
_ أملّ منج ؟
_ اممممممم .
_ انجبي .
_ ههههههههه .
_ والله مايفيد وياج التفاهم كلشي بعد تكتبين
لا تخليني اخلي ضيمي بـ يوسف وأخوانه .
_ اعصابك .
_ تكتبين ؟
_ اي والله .
_ كلشي .
_ بالتفصيل .
_ احلفي .
_ والله .
_ شوكت تگولين وداعتك ؟
_ بعد .
_ انتظرها .
_ استاهل لو ما استاهل ؟
_ كل ايامي تستاهلين كل ايامي بوية دُر .

غمضت عيوني وعفت كلشي بيده نمت براحة البال
اللي ما احس بيها بس من يخليني انام بين ايده
بعد حين تلمست المكان بصفي فارغ فزيت
اريد اوگف رجعت على سرير من شفته كاعد
بصفي لزم أيدي المجروحه ويتلمس بجرحها
باوعت على ايده ورجعت نظراتي أتفحص ملامحه
_ عبالي رحت .
_ تتأذين منها ؟
_ لا ابد .
_ هاي ضربة ؟
بقيت ساكتة ما اكدر انطق بحرف
ابتسم بحقد وهو ضاغط لا أسنانه
حتى لو يبين نفسه بارد بس هوّ انسان
كلشي بي يفضحه ملامحه تصرفاته واضحة
علي الآكبر : منو ؟
_ والله مو مهمه نسيتها وطابت .
_ انور ؟
لزمت ايده ادري بي راح يهجم ومن المستحيل اسيطر
_لا تروح الله عليك .
سحب ايده مني بالقوة وباس راسي وطلع مستعجل .

نزلت اركض اريد اوصل قبل لا يروح بس سمعت
صوته بالكراج يصيح : جود أحتاجك ، إسألني بشنو
شبيك تهوس للمشاكل يحظي ، اي ما اكدر اضرب تعال انت بمكاني .
راح واني رجعت على ريان استأذنت منه ماكو جواب دخلت
بقيت جامدة بمكاني من شفت حالته الغرفة مخربطة
صور بكل مكان صور اخذت صورة قريبة مني بيها بنية
تضحك شكلها بريئ وضحكتها ترد الروح وريان قريب
منها رافع راسه وجهه من الضحك احمر مخلي بينه وبينها مكان
حلوين شكد صفنت بالصورة ما ارتويت رجعتها ورحت
بصفه بيده صورة ثانية نفس البنية كاعدة لابسه عباية راس
ومعاصم ملتزمة بالزي جانت بهل صورة ملامحها واضحة
اريد ارجعها وخفت من شفته صافن على ايدي ارتبكت
بس حاولت أبين الموضوع طبيعي ما اريد يصير عصبي
دُر : حلوة تستاهل تنتظر وتصبر ودورها .
ريان : همّ تحسين مثلي يجي يوم وارجع
اشوفهآ آضحك على ضحكتها ؟
دُر : مو بعيدة على رب العالمين هو جبار الخواطر .

نهض وهو يمسح بعيونه ويبعثر بشعره
يشوف حال الغرفة ومصدوم بيها هز راسه
_ شكو ؟
اشرت على باب وهمست بخوف
_ علي الاكبر .
_ شبي .
_ شاف ايدي .
_ شبيها ايدج .
درت ايدي وجاوبته
_ انور من دفرني تعورت .
فتح عيونه وگف على حيله
_ ايييييييي وعلي الآكبر عررف ؟
_ اي وخابر جود وراحوا .
_ راح بيها انور .
_ راح يحوده حود .
_ ويسبيني سبي ياكل راسي اكل .

فتح الكنتور يركض بدل سريع واخذ ايدي شافها
وصاح : غير تحجين خرب غيرتچ .
_ نسيتها .