رواية الـرياش نَهج مُغاير الفصل السادس 6 - بقلم اسـاور حسين 🦢✨

_______________________ الــريـاش
﷽

𓆩 اســاور حــسين 𓆪
بقلمي رواية : الــرياش

مَحتاج نَگعد سَوه وأحچيّلَك شگَد خَفت
مِن راحَت عيّونَك و مِن گتلِّي خَل نَلتقِي
صَدگنِي مَرنّي القَلق أبديّلَك بيا بَچي
مِن تسأل شلونَك؟

لطفا لا تنسون التصويت والتفاعل بين الفقرات

⊰ دُر⊱

وكف دايخ قفل الباب صار يتقدم انحصرت بزاوية
لا اكدر اصرخ لان يزيد وتوصل للقتل هو واصل
مرحلة المخدرات ، ولا اكدر ادافع عن نفسي لان
قوته تضاعف قوتي بمليار المرات .

لزمني من بداية ملابسي فرها وشمرني على سرير
_ تعاااااانديني بكلشي احجي تعانديني .

ضغط على ركبتي من كل عقلي اتمنيت يستمر بالضغط
حتى اموت واخلص من عذابي ، فاقد يمرد بركبتي
ويصيح : امج السبب بخسارة الانسانة الوحيدة بهل حياة تحبني
امي ماتت من وره امج خسررررتهااااااااا اني خسرت امي بسببكم .

ماجنت استوعب كلامة من الوجع نزل راسه حضني
يسحب بجسمي ويحضن بكل قوته : مو جنتي تحبيني امج ماتحب
شي اسمع مشاعر لازم تمووووتهاااا هي سوت كلشي حتى تكرهيني  .

صار يشهگ جسمي يهتز بين ايده هتزاز مو طبيعي من الرعب
وبعده حاضني ردت اذب من راسي اخاف اصدر صوت
ويفز ويرجع يضرب سديت شفايفي بيدي وكتمت حتى النفس
وبمجرد ما حسيت شفايفه لامست ركبتي دفرته بلا وعي
بكل قوتي وزحفت على سرير واني اصرخ بعالي صوتي
اريد اوگع جرني من رجلي درت وجهي وماشفت
غير مزهريه نزلت على راسي دخت فقدت السيطرة على كل جسمي
اباوع بعيوني بس روحي هلكانه من الحركة گعد بالگاع وسحبني
وگعني من فوك السرير ونزل رجله نومني عليها وصار
يتلمس وجهي ويرجع شعري وهو يبچي دموعه ما وكفت ثانية
سديت عيوني مستسلمة فاقدة على أخرّ .

كعدت من نور النهار دخل علينة تلمست راسي وجع ماينوصف
اريد استوعب شكو وين اني كلشي نسيت اول دقايق وكأني فقدت
الذاكرة ، من شفت وجهه شريط ورجع ينعرض نايم وهو كاعد
ساند راسه على تخم وجسمه كاعد رجله مادها واني نايمة عليها
باوعت على ملابسي بعدهن نفسهن تنفست بتعب وابتعدت سندت
روحي على كنتور واشهك بجيت بقهر وضعف فز من النوم
عاصر راسه من شافني باوع على نفسه وزحف يركض
بتجاهي : بيچ شي سويت شي بيچ اقتربت منچ لا تگولين أقتربت؟

دفعت ايده ولطمت على وجهي وبلا شعور ضربته براشدي
_ لك امداكككككك امداككككك يا عار اطلع منا اطلععععع .

لزم راسه شاف المخدرات بعدها موجودة اجه يريد يلزمني
_ ما ادري بنفسي وروح امي ما ادري شارب هذا السممممممم .

دُر : وانتَ تشرب السمممم واني ابتلي بيكككك
هذا انور من يضربني همّ متعاطي مووووو ؟

نزل راسه متفشل لملمت نفسي ويامن اني احجي
منو يفهمني وليش اتعب نفسي اكثر من تعبها
_ اطلع بس اطلع لا تشوفني وجهك وروح .

يَسار : اني ادري تأذيتي هواي بسببي بس مو بيدي
وين ما اروح وجهج يصير گبالي تفهميني دخيلج .

دُر : ولك أتفهمك ولان إني فاهمة ما اورط نفسي وياكم
انتَ مثلهممممم نفس دمهم ما اريد دمّ عائلتي ما اريدكم .

رحت للباب افتح بي بعده مقفول وهو ناسي وين راح المفتاح
دور ودور ماكو اختفى على حظي ، گعد تعبان راسه يوجعه
يضرب بي : عندج مي ؟

عندي ثلاجة صغيرة فتحتها وعفتها مفتوحة
حتى ياخذ ناقص اني انطي يسمم ، رحت اكمل ادور
جوة السرير لمحت طرف المفتاح يريد يفوت جوة الكنتور
بطرف أظافري سحبته فتحته وعطت مخنوگة : اطلع يلة اطلع .

طلعت امي من غرفتها شافته طلعت اجت وترفع باصبعها
_ شكووو شعندك هناا مو تصيحين ما اريده لجّ تضحكين علينة
مخلصتها بالحرام تلعبين من جوة ليجوة .

عافها ونزل ابتسمت بقرف وتقربت منها
خليت عيني بعينها وسألتها : ام يَسار منو السبب وره موتها برأيچ ؟

فتحت عيونها ورجعت ليوره
_ يا سبب هي انتحرت من الغيرة .

دُر : يا غيرة اذا بالفلوس هي أغنى من عدنا والدليل
ابوية يشتغل جوة ايد ابو يَسار ، اذا بالجمال انتِ مو اجمل منها
واذا مشاعر الأمومة فـ انتِ تحتاجين عمر حتى تتعلمين
توصلين لنص حنانها وحبها لعائلتها .

دفعتني ونزلت متخربط وضعها وطلعت تلفونها تتصل
فتت للغرفة ماتنشاف من الهوسة والكزاز گعدت
إمسح بدموعي باوعت على روحي بالمرايا بجيت بكل صوتي
انهاريت وبعد انهياري فتحت تلفوني طلعت محادثة الرياش
وكتبت وأني لازمه راسي
( تدري مرات احتاج انتهي ، بس ارجع واگول شوكت ترحمني الظروف )
قراها بنفس الدقيقة مكتوب نشط رجعت كتبت
(  شيصير لو تكمل ويايه مو والله وصلت المرحلة اتعثر بالنفس )

طلع من المحادثة بنفس الدقيقة بعد ما كمل وقراها وصار صح اثنين
سديت تلفوني وذبيته قفلت غرفتي ونمت صحيت على ضرب قوي
گمت خايفة فتحته دخلت امي دفعتني وسدت الباب
وفاء : يَسار هو سولف على امه ؟

دُر : اي .

وفاء : شگال ؟

دُر : مثل ما تشوفين مضروبة براسي ما اتذكر زين .
حجيت هيج حتى أعاقبها وتبقى بقلق مثل ما اني عايشة بقلق

وفاء : جهزي نفسج اريد تسافرين لريان .

وافقتها بدون اعتراض بقيت الملم بملابسي شلون ماكان
دزت صفية ماعندي طاقة احجي وياها فتت سبحت وطلعت
انتظرتها حددت موعد سفرتي على باجر اكلت وبقيت اسلي
نفسي بكتاب الثاني يوم اخذت كل أغراضي وطلعت حتى ما نزلت
ودعتني ولا واحد بيهم شفت وصلني السايق الجديد مالتها
للمطار ضايعة اخذت صورة للطيارة ودزيتها اله
( قررت آبعد)

شافها وطلع سديت الخط وكملت الأجراءات وصعدت الطيارة
بعد فترة وصلت باوعت تمنيت يجي ريان يستقبلني بس ماكو
اجرت تكسي اعرف موقع بيتنا بتركيا ، وصلت بليل الإضاءة
مشتغلة يعني موجود بدون ما ادگ الباب فتحته
شفت الصور بكل مكان بالأرض مشمورة وجگاير ريحتها
عبت البيت وبقاياها ترست الگاع ، مشيت عبالك حرامية داخلين
فتحت باب الهول كاعد منهار أنصدم بوجودي عثرت لإن ماركزت
حضنته وهو انفحر يبچي : نجح مشروعي وراح يتنفذ .

دُر : حبيبي المفروض تفرح ليش
هذا حالك ريان ليش هيج تسوي بروحك .

ابتعد مني يدگ على صدره تعبان وصوته متشخط من الصياح
_ هو اني درست الخاطرها وصرت مهندس حتى اخطط بيت احلامها
لچ درست وتعبت الخاطرها اريد افرحها واشوف ضحكتها
ما لحگت اخذوهاااااا لچ بليلة ويوم راحت من ايدي شلون افرح ؟

زحفت على ركباتي تقربت منه لزمت ايده
حتى يوكف من الضرب مسحت دموعه
رفع راسه وعاط بعالي صوته : لچ دُر اااااااااااااخ كلبي ااااااااخ
لا عمّر يحلى بعيوني ولا دنيا بعدهاااا  كلشي ماااات اريدها
اكلهممم ولكممممم اريدها مايرررررحمووووني ولج محد يفتهمني  .

دُر : وينهاا عايشة هي لو ماتت ؟

باوع بعيوني وابتسم بوجع وهو يجاوبني
_ لو ميته اهون اموت وياها ونخلص منهم ومن شرهم .
مسحت وجهه صاير احمر دم وشعره نازل على وجهه
_ وينها بس فهمني شنو يمنعكم تنجمعون اخذها اشرد وياها .

دار وجهه تعبان ذب ايده بعد ماعنده حيل خلص حيل اخوية
_ زوجوها غيري صارت لغيري بشهر واحد بس دخلت سجن
طلعت لكيتها ماكو دورتها بكل مكان دورتها اريدها اني اريدهااا
حتى إسمها حاربوني بي وتغير خفوهااا مني خفوهااا .

_ منو همّ الله لا يوفقهم .

_ اهلج همّ اهلج السبب ، وليش حالتهم فقيرة اهلها مو مثل ابوج
يريد اخذ وحدة بنت رياااااااش مرتاح مثله وابوها سمعت
ابوها مات من القهر والتهديدات شمرها وما اعرف وين شمروها
خلوني حتى بالملاهي ادووووورهاااا اخاف أبوج ذبها هناك وماكو .

حضنتها ولأول مرة أشوفها ريان بهل ضعف
همس بتعب قريب من اذني : خلّيني انام بحضنچ اني ضايع دُر .
گعدت وهو نام على رجلي مسحت وجهه بطرف ملابسي
قريت القران على راسه بكل شهگة يشهگها ريان وهو
نايم يزيد حقدي وكرهي الهم كلهممم وازيد باحتقاري
للفلوس دمرتنا هل اوراق والطمع اكرهاا وكل ما الشخص
يصعد يزيد بالأنانية والجشع ومستعدين يستمرون ويصعدون
حتى لو على حساب اولادهم واهلهم .

نام عفته الى ان تعبت رجلي خليته ينام على مخده
وكمت خابرت على بنية نعرفها تجي تساعدني بالبيت
لان صاير خرابة . سديت باب الغرفة النايم بيها
حتى ماتشوف حالته اجت صارت ترتب واني احاول اساعدها
بس اخرب اكثر من ما ارتب ابد ما اعرف شي
طلبت اكل بين ما خلصت سمعت صوت الحمام عرفت ريان گعد
سلمتها ظرف شكرتها ودعتها ، طلع وجهه تعبان ابتسمت بوجهه
ريان : الحمدلله على سلامتج .
دُر : الله يسلمك تعال الأكل حار .

هز راسه وكعد ياكل بكل هدوء مايرفع عيونه ابد
من خلص راح للغرفة وقفل الباب عفته ماردت أضغط عليه
اني هم تعبت دخلت غرفتي ونمت الثاني يوم فزيت
على صوت ريان يخابر وطلع .

للعصر طلعت اكلت برا وبقيت افتر بشوارع تركيا
بس خايفة ومليت لان وحدي رجعت حتى ما اضيع الطريق
بقيت افتر بالبيت ما اعرف شسوي اخاف جنت هناك وحدي
هنا وحدي وغربة ، رحت لغرفتي اخذت حب اكتئاب
هذّني انقذني من الوحدة والحالة النفسية .

ريان قليل يرجع واول ما يجي يدخل غرفته
صرت الصبح اخلي سماعات اسمع وامشي قريب من البيت
واكل وارجع والعصر نفس الحال الى ان ختمت اسبوع
حجزت للعراق وريان قرر يرجع ويايه جهزنا أغراضنا
ورجعنا وصلنا بليل صوت ابوية وابو يسار واصل النهاية
الشارع ، ريان بدون مايسلم صعد ولا واحد بيهم باوع
صعدت لكيت أمي حاضنة ريان وهو يحجي وياها
من شافوني سكتوا هو راح للغرفة وهي اجت
_ شلون صرتي .
دُر : تمام .

دخلت لغرفتي مرتبة شوية واجت صفية بوستني
فرحانة برجعتي خطية يمكن حتى هي راح يصير
بيها توحد من ورانا طلعت هديتها ملابس واغراض تحتاجهم
اخذتهن وطلعت مر يومي بغرفتي .

بديت اجهز للجامعة طلبت من ابوية يشوف شخص يوصلني
لان اعرف اني الصبح اطلع للجامعة نايمة مو مسؤولة
وكالعادة حتى ما اهتم يعرف ينطي فلوس واني لازم ادور
ظل عندي ريان طلبت منه روحه بخشمه ما يتحمل نفسه
مليت منهم صرت احاول اعتمد على نفسي انور ايدي مغسوله منه .

قبل الدوام بيوم نزلت بليل اخذت اكل جوعانة
فتت من بلكونة الصالة الفوك لمحت شخص يمشي بطيء ملثم
لابس كله اسود ، نزلت للحارس فتح الباب ماكو احد .

ومن بعد ايام تجرأت واخذت تلفوني كتبت
(هذا انتَ الملثم )
اول ما دزيت إرسال شافها نرج التلفون بيدي
تخربط وضعي جاوبته جر حسرة طويلة
_ تريدين ارجع ؟

_ ارجع .

ظل على خط بس اسمع خطواته وجرت النفس
وحسراته وكل شوية يتحمحم
_ قريب منج انا يمج .

فتحت الشباك وابتسمت بحيرة ما اعرف الي يصير صح لو غلط
_ عندك صديق هنا .
_ لا .
_ مضيع شي .
_ لا .
_ لعد شتسوي هنا ؟
_ احلم .

وكف مقابيلي مباشرةً نزع لثامه
_ المحادثة ليش تهمليها ؟
_ ما متعودة .

دُر : وانتَ ليش ملثم .
_ متعود .

استندت على طرف الشباك وملت راسي على حايط
عدل شعره يبعثر بي عيونه من بعيد مبينات نظراته حادة
وحاجبه مرفوع ومطبور من الوسط من ضربة قديمة
علي الآكبر: عندي سؤال دوخني انتِ دارسة وصيدلانية وفاهمة
اكيد عندج جواب ، شنو السبب تفكيري المستمر
بشخص بحيث ما اكدر اطلعه من راسي لحظة ؟
_ قريت بكتاب على ما اعتقد الشخص هذا هم يفكر بيك .
_ تفكرين بيه ؟
_ شنو ؟
_ دُر تفكرين بـ علي الآكبر ؟

_ باجر عندي دوام تدري ؟
_ اممممم .
_ بسرعة خلصت العطلة .
_ منو ياخذج ؟
_ دورت على ألالاف الي تسولف بيهم انت ولا واحد مضبوط
احسهم مو راحة يمكن استسلم واروح وحدي .

طلع تلفون صغير من جيب بنطلونه
وهو ويايه على خط اتصل تحمحم وصاح : ها لك جود .
_ ها علاوي وينك .
_ مقابيل الفردوس ، اكلك باجر الصبح بـ سبعة ونص
توصل اخت انور للجامعة .

_ اخت انور ؟

_ اي اختكم .
_ ليش مو اختك ؟
_ هي تقبل تصير اختي ؟
ضحكت وهو ضحك رجّع لثامه ورفع أيده يسلم وتحرك
راح يمشي وأيده بجيبه ما يلتفت ابد بقيت بمكاني الى ان اختفى .

رجعت الغرفتي شوية وتطلع جناحات واطير
يعني ماكو هيج قابلية انسان بثواني يحل المشكلة
الي مدوختني ايام ، ويكدر بدقايق يغير كل مزاجي
واكيد قبل الدوام بيوم اتذكر اسوي عناية لوجهي
مابقيت شي ماسويته ما ادري صح غلط المهم اسمها عناية
ملابسي علكتها على كنتور مقابيلي ونمت .

الثاني يوم كشخت رشيت عطري واخذت ملازمي وركضت
طلعت الساعة بسبعة ونص شفت جود مطبك ايده مخليها على
ستيرن السيارة ونايم ضربت على شباك فز فرك وجهه وفتح
الباب : صح النوم صباح الخير .
_ صباح النور .
_ صار شكد هنا .
_ من السبعة واكف ابو راس اليابس
طلعني بسته ونص من البيت .

ابتسمت نزعت النظارات وسويت نفسي ارتب بالأغراض
وهو يسوق بكُل هدوء بدون مايرفع طرف عيونه
وصلني وراح دخلت للجامعة روحي ترفرف على نرجس
صارت جوري مقابيلي تمشي هي وكروب ولد وبنات
تلاخصني بحقد ، اني هم مقصرت وجهت الها نظرات استحقار
ودخلت للقاعة، نص ساعة وفاتت نرجس هي وعباتها خلتني
احب هل ستايل من اشوفها تفرح عيوني بيها
حضنتني بكل قوتها كعدنا وحدة تلزم ايد الثانية
ونسولف على صار ويانا بهل فترة وكفنا من دخل الدكتور
ومن اول يوم محاضرات واجبات عبالك متحملين علينة .

بالمحاضرة الثانية تواجد يَسار گعد بصف جوري
يحجون ويركزون على نرجس خفت عليها ، خلصنا وهو حتى ما اقترب
بس خلصت افتريت الموقف السيارات لگيت جود واكف
هو واحد ثاني ابو خط يسولفون من شافني ركض فتح الباب
_ هلا خوية .
_ هلا بيك .
مشت السيارة والنص الطريق بهدوء طلبت
يوكف السيارة ما فهم الى ان نزلت ورحت للمطعم
نزل مخنزر عصبي شو هذا هم تحمحم ويأشر على سيارة
_ ارتاحي بالسيارة اني اجيب الطلب .

_ مايحتاج ، شبيك صرت عصبي .

دنك راسه واقترب بهمس يحجي
_ صاعد وياج زلمة لو حرمه ، غلط انا اظل بالسيارة
وانتِ تنزلين مايصير تتعديني .

دُر : اني متعودة كل دوام اخذ منهم وعمو ابو حسن يجيبني
وبالبداية مثلك زعل بعدين تأقلم .

_ ماعدنا يتأقلم بس احتراماً الج وافق
انا موجود خوية اي شي تريدين طلبي مني
بقيت ساكته ماعرفت شلون اجاوبه احتاريت بين أفشله
وافهمه ما احب يتحكم واني حرة التصرف وبين أقدر موقفه
ويمكن همه متعودين على هل نمط ، رحعت للسيارة وهو دقايق
فتح الباب سلمني اكلي ، انطي بالفلوس يكلي عيب شنو هل تصرف
واصل الحساب واصل ، ومايقبل حتى يتناقش العناد مفول عنده
نزلت بسرعة من السيارة وصعدت فوك بدلت واني اكل كتبت
مقتطفات عن الصار بيومي وسديت تلفوني ورحت غسلت ونمت .

تكرر روتين حياتي بين غرفتي ودراستي التغير الوحيد بيها
هو وجود الــرياش الملثم كل ليلة يزور منطقتنا حفظت الوقت
تعودت اختم يومي بكتابة مقتطفات يومي اشياء عشوائية تصير
وهو يكتفي بالقراءة والمراقبة البعيدة .

ابوية ملتهي بالمشروع ، ريان داخل بحرب وياهم
انور ويَسار سكوتهم واختفائهم مخوفني
امي جانت عايشة بعالمها الخاص وكأنها ما متزوجة ولا عدها اولاد .

بيوم وليلة كل هذا الانعزال والهروب منهم انتهى
جنّت عايشة بعالمي الخاص اليه حاربت حتى اتعلم علية
سمعت هوسة جوة نزلت اركض على صراخ امي
اربعة زلم واكفين والاول مرة بحياتي اشوفها
بهل خال ملابس متشككة والدم يسيل من خشمها
ركضت واني اصرررخ بعالي صوتي : منوووو انتوا امي عوفوا امي .

رفع واحد منهم المسدس بوجهي
_ اقتربي بعد خطوة وشوفي شلون اطشر راسج .

درت وجهي على ابوية كاعد على تخم ايده على راسه
اندفع الباب ودخل انور يركض لزم امي دفرات تخبلت
ملخت روحي بس اريد يوكف لا تمووووت امي راح تموووت
ما اهتميت للمسدسات ركضت الزم بي سحبتني ايد قوية
التفتت شفت يَسار سد شفايفي حتى ما اصرخ وهمس بـ اذني
_ اشششش لا تموتين وياها هذولي مخابيل .

_ منو هذولي منووو ؟

_ عمامج .

اجسامهم ضخمة ، شكل مخيف ، هيئتهم تمثل الموت
ملامحهم قاسية باردة متجردة من الإحساس
وكانهم مجرمين تجردوا من الرحمة
كبدت صوتي ودموعي تجري توسلت بـ يَسار : خلصها ساعدها .

يَسار : هذولي مايسمعون لأكبر بشر كفره
اذا يلزمون زلة على شخص ينهونه نهي .

دفرها واحد بطنها وسحلها سحل من شعرها للحمام
فتحوا عليها مي بارد سد الباب وبس صوت الصراخ ينسمع
ودوي ضربات الصوندة على جسمها انور كعد بالأرض
ضم راسه بين رجله ويهز بروحه ويكرر : موتوهااا خليهم يموتوها .

رفع ابوية عيونه عليه مشيت اتجاهه بست ايده
وهمست : الله يخليك وكفهم ليش هيج يسون بيها حرام تعذبوها .

_ خانتني ، يهددوني بصورها ، امج نزلت راسي .

لطمت على وجهي وبس طلع من الحمام من الرعب
ركضت على باب الحمام شفتها وياريتني ما شفتها
اجرم بحالها ، جثة امي جثة ، اشرت لأنور : ماتت شوفها تعال شوفها .

اندفر الباب الخارجي دخل ريان بيده التلفون صاح
وهو بركان : هااااااي شنووووووو الصوووور وينهاااااااا .

من شاف عمامنا تاه وهو يباوع بوجوهم
والدم خط ماشي من الصالة للحمام ركض من اشرت
واني اصرخ هو شافهاا ودار عليهم ورجع يتضارب
وياهم كتفوا وهو يضرب ما مهتم مايقبل يثبت تقدم
واحد منهم ضربه على راسه زاد ما نقص : لكم شلوووون
تتصررررفون بكيفكم شلوووون
يمكن صور مفبركة ولكمممممممم يمكن مفبركة .

_ انجب ماكو شي اسمة مفبرك .

ريان : عوفوني بس عوووووفوني يوووووووسف
صيحهممممم يعووووفوني راح اسوي مجزرة هنااا
امووووتكم والله  اموتكم وامووووت روحي .

صار يتحرك بهيجان ويصرخ تهستر الى ان عافوا
ركض للحمام شالها وهي الدم يقطر منها مانعرف منين
شالها وگع عاط بعالي صوتها وهو يبجي : انوووووور لك امنا انوووور .

باوعت على انور واني اتوسل : ابوس ايدك ساعده .

طلع رافض يساعده وجهه يقطر حقارة
فات يَسار شالها وياه ركضوا للسيارة
عقلي طار مني صعدت اركض ما اعرف
افكر بعد ربي والله ما اعرف شسوي بروحي
اصواتهم مرعبة جوة ، خفت يشوفوني
على اطراف اصابيعي نزلت اول ما وصلت
ركضت للباب فتحته وطلعت اركض اركض واركض
وكفت بنص الشارع ولا سيارة موجودة بس إنارة البيوت
تضوي على طريق صرت امشي بدون احساس
اريد آوصل للمستشفى حتى لو مشي
واني امشي منظرها ما فارگني ثانية .

اتصل على ريان ويسار ماكو واحد بيهم يجاوبني
كعدت على الرصيف اريد اجر النفس ونعمت
عيوني من الضوء العالي نزل انور عيونه براسه
بنص الشارع ملخني تملخ وهو يدفع يصيح : شلون تطلعين
بهذا اليل لجججججج سا***** تريدين تصيررررين مثل امج
مو واكفين تعبرين عمامج وتطلعين .

_ نعال عليك وعلى عمامك ولك موتوهااا
حتى على امك ماعندك حنية من شنو مخلوق
فهمني شنو من گلب شايل .

سحلني سحل من شعري شمرني بالسيارة
وطول الطريق يضرب بوكسات دفرته
وصرت اضرب وهو يضرب ملخته بـ اظافري
بعد ما أتحمله من اسكت يتخبل بالزايد ويشرف روحه
من اضربه يرجعها بس يتوب ويوكف
نزلني ساحبني من شعري اول ما دخلت
اجه واحد بيهم ضربني على وجهي وجرني
من ملابسي وگعني بالگاع داس على رجلي
وعاط بـ انور : اسحب منها التلفون وفلوسهاااااا كلهااا .

دُر : شنوووو من حيووووانات انتوا ماكو بكلبكم رحمه
ولكم مجرمين والقران اشتكي عليكم اخيسكم بالسجن .

اخذوا كلشي عندي من فلوس وجهاز وصعد انور
واحد للغرف الفوك فرغها من كل الأجهزة والفلوس
وكل الذهب صعدني انور بغرفتي وقفلها وابوية
كل هذا الصار وهو نفس وضعه ايده على راسه وكاعد ما يتحرك ابد .

حاولت وياهم يفتحون الباب متجاهليني
بس صوتي راح وحتى ريان ما رجع
ولا گال شلون اعوف اختي وياهم
خلص ليلي واني كاعدة نفس كعدتي
قريب من الباب ضهري على سرير
اهز بروحي منظرها اكل روحي اكل
شلون ينطيهم كلبهم هيج يضربون
معقولة هذولي بشررر مثلنا طبيعيين .

ذبلت روحي وخلص حيلي نمت على برد
على كاشي ، عبالي اكعد على خبر بس
خابت امالي صحصحت افتريت ردت الوقت
يخلص وخلص يومي بلا اكل ولا شرب
محبوسة ماعندي خبر بالي تعب راسي من التفكير
ويوم وبعده يوم واني بالغرفة ميته عدله ماكو احد مهتم .

ماعندي غير اطلع سرنا برا لازم انقذ نفسي
لان على هذا سكوتهم مبين راح يخلّصون علينه كلنا
بعد غيابي على جامعة وكفت اراسل بليل متأكده
علي الأكبر شك بالموضوع ويعرف اكو خلل صاير ويايه
بقيت اراقب الساعة الى ان صارت بـ8 ونص وقت
علي الآكبر فتحت شباك غرفتي وطلعت ضوء الشحن
بقيت احرك بي اسوي حركة حتى ينتبه على شباك
ماجنت اعرف موجود لو لا بس عندي امل
خلص الوقت وهو ماكو كعدت ادك على راسي
اريد بس اسمعععع شي مو راح اتخبل
خايفة والله خايفة .

ثاني يوم حاولت بس صار اليل بديت احاول بالضوء
احرك بي كل فترة الى ان مليت اريد ارجع ولمحت
علي الاكبر ملثم ويمشي بحيرة بقيت اكمز وقويت الضوء
اريد يرفع راسه على شباك هو يباوع على شباك الصالة
ركضت على علبة طلعتها اضرب بيها حتى يصير صوت
ونجحت ، رفع راسه شافني نزّل لثامه وحط ايده على راسه
جنت ابجي من كل كلبي بجيت اشرت اله بيدي تلفون ماعندي
ما تحمل يوكف طلع تلفونه ما اعرف على منو يتصل
تعبت ودخت من الجوع كعدت بس انتظر الدوخة تروح وارجع
اشوفه ، بس رجعت اباوع لمحته يحجي هو واحد ثاني ملثم صارت
عندي دوخة اقوى من الي قبلها رجعت كعدت الدنيا كلها تفتر بيه
دقايق وسمعت ضربات خفيفة على شباك ارتعبت ايدي على كلبي
واني ارفع روحي اشوف منو ، رجع دك فتحت عيوني بتعب
صار على الآكبر مقابيلي ماعندي حيل بس ضحكت منين صعد عجبني
_ دُر لج دُر منو وياج حاجيني شصايرررررر بيج .

رفعت اصبعي بصعوبة همست : اششش لا يسمعون اني محبوسة
هنا صار ايام خايفة اني وجوعانة وامي ما ادري امي ماتت
يمكن ماتت وريان ما اجه وشاف حالي وانور حبسني هو وياهم
تعبانة اني علي الآكبر والله تعبانة كلبي محروك .

ضغط على اسنانه وبدون ما يحچي ويايه حرف واحد نزل
لزم بالحايط اقل غلطة يوگع من ثلاث طوابق عالية عبر
السياج وكمز على شارع سديت الشباك ورجّعت بالأرض
ما اعرف شنو راح يصير بس واثقة يطلعني منا .

ضربات عالية ، نار قوية، جلجلة اصوات صياح
رفعت نفسي وآني أصرخ من الخوف اسمع صوت
انور يصيح : ضربونا بالمولوتوف .
اريد استوعب شنو المولوتوف تذكرت يصير بطل گزاز
وسوائل يستخدمون بانزين على نفط وقماش يتبلل بيهن
يسبب حرائق يستخدم بالمظاهرات بكثرة .

يوسف : منووووو ؟

انور : هذولي ملثمين يشمرون .

سمعت وشفت سيارات نجدة تمشي سريع
وكفت قريب من بيتنا النار يطفون بيها
ويصيحون : الكراج محروك .

انور : تعالوا شوفوا شنو مكتوب .

( الله يكفيكم شري ، راح ازلزل بيوتكم تحملوا ناري )

كعدت بس أستمع للأصوات الضباط تقدموا على ابوية
وبدون مقدمات يحجون: عدنا بلاغ عدكم بنية محجوزة صار ايام هنا .

بعد حين صرت استمع لخطوات اقدام عالية على درج
انفتح القفل دخل ضابط وانور وابوية تقدم انور عليه
_ دُر كلبي واصل الهم بلاغ يكولون محجوزة
صح هذا الكلام عيوني وين اكو بنية تنحجز بيت اهلها .

الضابط : رجاءً ميصير تحجي نسمع منها .

دست على خوفي وعلى نظراتهم وعلى كلبي
وحاربت روحي وحجيت : اي صار اربع ايام هنا
واصلت للموت اني تعبانة خلصوني منهم الله يخليك خلصني راح اموت .

الضابط بس سمع صاح على جماعته حاولوا يرشون
ويغرونه بالفلوس ما فاد وياه صعدوا ودفعوا ابوية
وانور ونزلوني الدنيا بكبرها تفتر بيه صعدوني بسيارة
نقلوني على مستشفى لان حالتي واصله المرحلة الخطر
دخلوني طوارئ الممرضات والدكتور يفحصون ويشحلون مغذيات
عندي جفاف وانخفاض بنسبة السكر والسوائل .

صاروا يضربون ابر لزمت راسي وهمست بتعب : راسي راح ينفجر .
حجيتها وغفيت وقت طويل حسيت اكو صوت قريب مني
فتحت عيوني على صوت شهد بنت ابو حسن تحجي بصوت
ناصي بالتلفون : صخام الصخم راسجن اذا يسمعون يلعبون بحالجن
لعب وين علي الآكبر كاتل نفسه عليها هو غير عمل انساني
اخواني وكفاتهم حلوة لأي شخص ينخاهم .

وكفت تستمع وتضرب على رجلها بعدها ما تدري كعدت
_ كافي عيب هل حجي ادري بيجن راح تروحن تترسن راس امي .
قاطع كلامها دخلت ابو حسن شافني كاعدة تقدم بس مو مثل كل مرة
يبتسم هل مرة سحب كرسي وكعد قريب مني : ما تشوفين شر بوية .
دخل حسن وجود وعلى الآكبر اخر واحد منزلين راسهم
رديت بتعب : الله يسلمك عمو .

ابو حسن : عذرينا على صار بيتكم بوية هذا ابو راس اليابس
يتصرف من كيفه لا فكر بعيب ولا بحرام صادمني فعلته صدمتني .

بقيت ساكته لدقايق باوعت على علي الآكبر واكف بثقه
ضايج من كلام ابو مرجع ايده ليوره : عمو هو نقذني
لو ما هو هسة اني ميته صار اربع ايام محبوسة هناك .

ابو حسن : المفروض يبلغني اني اتصرف مو يهجم
يشمر على بيت العالم مولوتوف وين كاعدين حرب هيه حررررب .

استغفر الله ويفر براسه وكل شوية خازرهم
ويرجع يفهمني : راح ادخل روحي الخاطرج هذولي يطلعون منها
انور ويَسار مو راحة اذا يعرفون مدخلين باختهم يدخلون عرضنا .

علي الآكبر: ياهمَّ انور ويَسار غير اذا تتفل عليهم يغرگون .

ابو حسن : تسكت انت لا اكوووووم هسة ارجع اربيك .

رفع ايده يأشر حتى يكمل ورجع سكت
حسن : هو على اتفاقنا بوية يطلعون وانا وياك نحلها
على اساس احنا خابرنا على عنف الأسري .

ابو حسن : على الآكبر جود كافي تعبتوني بوية كافي مشاكل  .

جود : بسم الله بوية هذي استفتاحية .

ابو حسن : استفتاحية تحركون بيتهم .

علي الاكبر : چا غير حركوا كلبها .

ابو حسن : بوية الله يكفيهممممم شررررك
الله يساعدهم عليك شني من راس يابس عندك
ولك عوفها انا احلها والله بس يومين ونحلها .

علي الآكبر: اليوم بليل .

ابو حسن : عوفني اهدي النفوس ولا تدخل وتولعها
وانا والله وداعتك احقق مطلبك بعدددد بس اسكت عوفهم .

من باوع على جود ابو حسن صاح بحسن
_ وحگ الله هذا ماناوي على خير ما دام باوع على هذا ابو لعلوم جود .

حسن : لا تصير عصبي مو زين على صحكتك انا احجي وياه .

ابو حسن : بنيتي دُر تعرفين غلاتج عندي انا
ما اسكت على الصار وداعتج ويعز علية
ترجعين وياهم بس هذولي اهلج ما بيدنا حل
لا المجتمع يرحم ولا العادات والتقاليد صعبة اخذج عندي كلش صعبة .

حسن : صح صعبة بس كلنا وياج .

ابو حسن : والحل عندي اليوم بليل نحلها .

طلعوا بعد كلام طويل دار بيني وبينهم واخذوا شهد
بعد ساعة من روحتهم انفتح الباب ودخل علي الاكبر
مغطي وجهه : ادخل ؟

هزيت راسي ورفعت جسمي دخل ونزع لثامه
حتى محد يشوفه الظاهر صايرة اشياء ما اعرفها
حاول يبين ماكو شي اقترب ببتسامة خفيفة يحجي
_ هذا عصير برتقال طبيعي اشربي ترد روحج .
طلع ماعون دولمة وكعد مقابيلي : صار اربع ايام ما ينطوج اكل مو ؟

_ اي .
_ صعبة ايامهم الجاية وحگ اخو زينب اسبيهم سبي .

رجع يبتسم يريدني اطمئن
_ بس انتِ لا تفكرين ولا تشيلين هم عوفيهم انا أعالجهم .
_ امي وريان ما ادري وينهم اختفوا .
_ اطلع واشوفهم وين وبليل انطيچ اخبارهم
وبعد شني تريدين شنو براسچ احجي اطلبي  .

_ اني خايفة يضربوني بعد مابيه حيل .
_ سهلة ادوخهم واحيرهم بروحهم انسيهم امرج .

_ تلفوني اخذوا مني .
_ يرجع ولا تهملين محادثتنا .

رفع الخاشوگة بيها سلك اكلت وهو يسألني
_ سجلتي رقمي ؟ وشنو اسمي ؟
_ تسجل ، الــرياش نهج مُغاير .
ابتسم بهدوء عرف قصديّ رياش مو مثل منطوقهم
بالفلوس والتبزير والراحة والملابس ، رياش بقوته وشخصيته
برجولته وكفاته ويايه نهج مُغاير عنهم كلهممممم .

شربت العصير ورجعت اكل كدرت افكر استوعب
افك من تخيلات الموت رجعت روحي حتى كلامي
صار احسن دك تلفونه جاوب بسرعة : ها جود ، صاروا جوة
هاي هيه نازل انطي خبر لأبوية .
سد الخط وكلينس بيده همس : اخذي امسحي شـفايفج
وصيري قوية اني يمج التلفون يرجع وانا بنفس وقتنا
موجود بالباب تحملي هل ايام بس هل ايام
راح اخذ حقج وارجع حالتج هاي اضعاف الهم حتى لو اخسر روحي .

كمل وطلع بدون ما يدخلون بدقايق
فات انور وابوية وضباط اثنين
كل جسمي يهتز بخوف منهم انور
يريد ياكلني اكل بسنونه صار الضابط يفهمني
هل مشاكل تصير والصار لان اهلي خايفين عليه
ماجنت أكدر اعترض لان الضباط كل كلامهم واكفين
وياهم ، بس طلع الضابط شمر انور الملابس بوجهي
وصاح بصوت مخيف تحذيري : لبسي ملابسج اني اليوم اكشف
سرج ، اريد اعرف شلون كدرتي توصلين للعصابة اللي تأجرينهم .

يوسف : روحي طالعة هسة هنا اخليكم
وكل واحد اطشر رأسه بطلقة فضحتوني انتوا وأمكم نزلتوا راسي .

لبست ملابسي وطلعت وياهم لا علي ولا اهله موجودي
تعجبت وينهم !! كملت طريقي اتلفت صعدوني بالسيارة
يسوق انور بكل سرعته ويسب ويغلط ويتوعد الى ان وصلنا
نريد ننزل باب البيت مفتوح وكل الزرعات مرميات على گاع
والطين صاير بكُل مكان بالكراج طلع ابوية المسدس
وفاتوا هو وانور يصيحون بـ اسم الحارس نزلت وياهم
شفت الحارس مربط بغرفته ، دخلوا للبيت واني وراهم
صوت صفية بالمخزن ركضت عليّها فتحته مقفول حضنتني بس ابوية
وانور ورايه تريد تحجي بس ما تكدر ، صعدنا فوك غرفة انور
صايرة تفليش وكل الأوراق عنده مشككة بس باقي البيت مابي شي
عبالك محد داخل ، ركض ابوية فتح غرفته ويصيح على انور
_ بس لا هذولي جماعة آمك اخذوها .

رحت للغرفة مالتي على حالها مابيها شي
صار صوت قوي بالكراج نزلوا يتراكضون
وانور تخبل طلع بالشارع يصيح : يااا ****** ابن ******
يشمرررررر مولوتوف هذولي منووو يابه جماعة بنتك او جماعة
مرتكككككككك اموووووتهن اثنينهن واخلص منهن والله .

اجت صفية لزمتني من ايدي وهي تضحك
تهمس بخوف : الــرياش يبعث سلام ماما تلفونك
بين الكنتور والميز بظرف صغير يقول لا تهمل محادثة .

بقّيت فاتحة حلگي وعيوني ما مستوعبة
_ يعني مو حرامية مخليج بالمخزن .
غمزت بعينها وهي تضحك : اتفاق ابو حسن طلب مني.
_ حلووو وست صفية ما ترفض طلب لأبو حسن .

ضحكت ونزلت تركض مشيت للحمام غسلت
وكعدت بالممر حتى ما يكول خافت ودخلت غرفتها
خابر ابوية على عمامي يمكن هل مواقف مو مهمة عدهم
ظل بس ابوية وانور حايرين طول اليوم  مسوين مناوبة
واستأجر حرس داير ما داير البيت .

دخلت بغرفتي سبحت وقفلت الباب طلعت التلفون
وكتبت : صدمتني .
اتصل جاوبته ضحك الاول مرة اسمع ضحكته
_ شبيج .
_ شبسرعة شلون گدرت ؟
_ وحگ ابو راس الحار انا اسلس حب وفريت البيت فر
اخذت تلفونج وجود استلم الحارس وعبالج هاي هيه انتهت ؟

_ لا تعرض حياتك وحياة اخوانك للخطر كافي لهنا
والله دايخين حايرين شلون يحرسون البيت .
_ بعد وراهم الصاعقة الكبرى بليل راح اخليهم
يعرفون منو وراج اخلي (انور شمه) يحسب حساب لتصرفاته وياج .

دُر : علي الآكبر؟
لدقايق ماسمعت جوابه تحمحم اكثر من مرة
ورد بصوت هيمان : امممم .
_ شكراً انت تستحق اسم علي الآكبر.

استأذنت وسديت الخط نمت بليل
اجت صفية هزتني هز كعدت بتململ صحت بيها : موووو نايمة شبيج .
صفية: ابو حسن واولاده تحت كُلهم .
_ عزززززا شيسوووون هنااا اليوم انور يلعب لعب يمممه
دخيلك ربي راح تصير من الروح ولج صفية لحگيني ضميني
ساعديني اوكف سوي شي يمممممه .

وكفتني مشيت على اطراف أصابعي نزلت وهي نزلت
اسمع اصوات زلم هواي خشنه ياخذون وينطون بالكلام
واية قرانية بصوت ابوحسن حتى يمهد الطريق
كعدت على درج رجلي بعد ما شالتني من سمعت صوته
بكُل وضوح وثقة عيونه بعيونهم طلب : احنا اليوم هنا
انا والشيوخ الخيرة نطلب ايد بنتكم المحروسة
دُر لأبنه علي الآكبر على سنة الله ورسولة .

يتبع ..

ثقل ميزانك بذكر اللّٰـه:
- سُبحان اللّٰـه
- الحمد للّٰـه
- لا إله إلا اللّٰـه
- اللّٰـه أكبر
- سُبحان اللّٰـه و بحمدهِ
- استغفر اللّٰـه
- اللهُم صلِ على محمد وال محمد