رواية الـرياش نَهج مُغاير الفصل الثالث 3 - بقلم اسـاور حسين 🦢✨

_______________________ الــريـاش
﷽

𓆩 اســاور حــسين 𓆪
بقلمي رواية : الــرياش

تـلاگـينه وشلون ملگه تلاگينه
عيون تحچي وگلب يحچي
كلشي يحچي ، وماحچينه

لطفا لا تنسون التصويت والتفاعل بين الفقرات

⊰ دُر⊱

فاتح عيونه والدم يطشر منه على جسمي والسرير
دفعته مني وعفت المبرد ببطنه لازمه هو ويرعش
وگف يريد يلزمي رفعت ايدي كلها دم وضحكت
بخبال صرت مخبلة وگع يم رجلي گعدت اضرب بي وهو فاقد
واني فاقدة نفسي وحالي وعقلي ..

الوكت صار وياي مثل الميل بس يميل
بچيت على روحي بچي يهد الحيل
لطمت صرخت وين اروح بروحي
كلها تمشي ويايه اعوج ، اذا يعرف
ابوية وانور يموتوني خلاص .

دفعته مني اريد استر روحي
جريت ملابس من كنتور امي
وفتحت الباب طلعت اروح منا واجي
مناك شتصرف ياربي دليني ساعدني
شسوي ياربي والله دافعت على نفسي
مو قصدي ، ركضت على درج طلعت
لكيت بس الحارس خفت رجعت للبيت
عيوني على بايات الدرج رجعت صعدت
اخذت تلفوني اتصلت على اهلي واحد واحد محد يجاوبني .

ملخت نفسي تملخ ولكمممممم جاوبوني وين ارووووح
ضيعتوني وضيعت نفسي ابوس ايدكم ساعدوني جاوبوني
اتصلت على ابو حسن ماعندي حل ثاني والله ماعندي
جاوبني بسرعة صرخت بجنون : عموووو قتلت ماااات هذا مات .

_ منو بنيتي منو انور ؟

شهكت واسمع يصيح بـ اسماء ما عرفتهم
سد الخط واني اترعبت رجعت اتصلت بي
اتوسل : لا تسد الخط الله يخليك حباب أبقى
اني خايفة كلبي راح يوكف شسوي بروحي .

اسمع صوت قريب منه يهمس
_ بوية احجي وياها لا تنتحر بدون وعي .

وعبالك حجاها بأذني من ضعفي اعتبرتها رسالة
اخلص بيها من حياتي سديت الخط ونزلت بكل
سرعتي أخذت سجين وجانت اسوء خطوة أخطيها
بحياتي مفكرت ماكو شي يسوى اخسر ثقة ربي
مافكرت روحي امانة من الباري اذا اسبب بيها خدش
اخسر حياتي واخرتي على ناس وظروف تمر بقوة ربي تخلص .

عقلي قافل لا يفكر ولا يصبر
من خوفي بس اريد اخلص جرحت ايدي
من منظر الدم ورهبة گلبي بفعلتي البشعة
فقدت الوعي وگعت غشيانه .

بيّن الصاحية والفاقدة اسمع صوت ابو حسن يصيح
_ لك بوبة شيلهااااا للمستشفى .

_ بوية حرام صدك جذب .

_ چا تموت .

_ مو اخوانها بالطريق والعباس مايصير بوية .

_ اكلك شيلها لا ادوس بمصارينك البت راح تموووت
لككك جود بوية تعال انتَ شيل البنت بدل هذا ابو راس اليابس .

حسيت نفسي رفعني من الارضية الباردة
_ اي هيج من البداية واخذ البنت دمها نشف .

بكل خطوة الوجع يزيد فقدت وما وعيت غير واني بالمستشفى
ماكو احد يمي زاد خوفي يعني هم كتلت يَسار وزاد الوضع
انتحرت وحجيت للعالم على صار اليوم كتلي عمل شعبي .

غمضت عيوني وايدي الثانية على كلبي
بمجرد مانفتح الباب دخل انور هجم علية
والدكتور يلزم بي وابو حسن وهو مثل الثور
يريد يلزمني ويصيح بحرگة گلب : ادجج وصلت وياهاا ادجج
موتت الولد موووتيني ولچ شنو من بشررررر انتِ .

سديت عيوني من رجع هجم فتحتها من سمعت
نبرة صوت تعلو نبرة صوت انور
_ لا تفرد عضلاتك على اختك بنص الغرب واطلع برا .

أنور: نعم بشنو تفضلت حضرتك .

ابو حسن : ابني اطلع .

بنفس علو النبرة رد على كلام ابو
_ هذا النكرة يطلع .

فتحت عيوني ماشفت شكله منطيني ضهره
انور احترك حرك منه دفعه وجلجل الغرفة
بصوته : ولككككككك انتِ منووووو وتتأمر علية
تعرررررف اني منووووو .

_ منو انتِ كهوجي بديوان الشيوخ ما يقبلونك
دطلع ابني اطلع لا تزيد بالكلام .

ابو حسن : انتَ ليش ماتسمع مني اطلعععع انتَ .

انور : اسمع كلام بابا واطلع .

_ تطلع برضاتك لو اتصرف ؟

عبره انور يريد يفوت وهذا سحبه سحل من القميص
واخذه دفع برا الغرفة والصياح والهوسة والدكاترة
والحرس نخبص الممر خبص .

لملمت روحي وگمت بتعب هي موته لو موتين
هذا انور بعد مايسكت شهرنا بالمستشفى
والعالم تورطت بسببي ، نزلت ملابسي
وشلعت المغذي مني وحاولت امشي
طلعت الكل توجهت نظراتهم اتجاهي
بس ابن ابو حسن ماكو من شافني
انور تعداهم ولزمني من خياط ايدي
من الجرح عطت بوجع وهو ولا مهتم
يمشي والدكتور يرزل بي وهو يهدد
ويتوعد طلعت امشي وياه وأتعثر.

لمحت من بعيد ابن ابو حسن يأشر لأبو
وأبو لازمه يصيح ملامحه مو واضحة
نشمرت بالسيارة هو صعد والبوكسات
ما ادري منين تجي على جسمي وجهي
راسي تملخ تملخ حرك السيارة من صار
ضرب على شباك سيارته من برا .

_ افتح الباب جبان اعلمك الضرب شلون يصير .

الطريق كله يصرخ ويضرب ، وصلني جثة يشيل ويشمر بيه
على هل ضرب شلون ما اموت ما ادري ايدي انفتحت
خياطها والدم ما ادري منين ينزل هو دخلني واشوف
البيت عبارة عن دم شمرني على درج وهو مسعور
_ هذا دمممممممم يسار لج صلفة انتِ تضربي
بهاي ايدج ضربتي مووووووو اكسرررها اليوم افلش ايدج .

تعبت امي ما اعرف شلون بينت نفسها
نزلت دفعته مني وهو فاقد يحير وين يضرب
اخذته وطلعته زحفت على درج اصعد وأتعثر وأوگع
ومصرة اصعد وصلت للغرفة روحي تريد تطلع
قفلت الباب جسمي من الوجع يرجف رجف
الألم يفوق تحملي ، بس اعرف ربي مايحمل
مؤمن اكثر من طاقته اكيد ربي بيوم ينهي هل كابوس وياخذ امانته.

أنور: افتحي لا يتفلش عليچ فتحي حاجيني ليش هيج تسوين
محد بعينچ ماتخافين من احد خرب افتحي افتحي .

_ انور حرام عليك اني اختك ولك تعبت .

انور : افتحي اخلصچ من عذابچ ماكو داعي تنتحرين
اني اخليچ بركبتي افتحيييييي .

دُر : دولي ردت احترمك بس ماتستاهل انجب ولي منااااااا .

ضرب ضرب فلش الباب تفلش
_ منوووو يولي بنت الكلب خرب اهلچ .

دُر: ديلة خلصت دي منا دوختي يالجعويط .

أنور: سافلة منو جعوووويط منووووو جعويط .

دُر : تروحلهم فدوة انتَ لا محسوب على جعويط ولا على زلم
ولا على نسوان ، تركيبتك غنية عن التعريف اسمها ديوث .

الضرب زاد والغلط والسب والطعن والكفران صار ماعرف
منين وصوت ابوية يوكف بي وهو يصيح بالحارس
حتى يكسر الباب وياه ، مشيت بصعوبة للحمام همّ قفلته
وگعدت لدقايق وراح صوته مبين نزل .

دورت على تلفوني بالغرفة ماكو ما ظل فكر عندي
شسوي بحالي وين انطي وجهي منو يحميني منهم  .

تمددت على سرير الوجع بجسمي ما ادري منين
كل عظم يصل اخذت مسكنات شكو مسكن عندي شربته
مغصتني معدتي وزاد وجعي لفيت ايدي بقيت اتگلب بمكاني
ومادري شلون غفت عيوني .

الثاني يوم گعدت أتسمع من ورا الباب اريد اسمع صوت
ماكو هدوء مريب ، طلعت بطني توجعني من الجوع
نزلت على درج أترنح مشيتي ما متوازنة ، شفت صفية
تنظف من شافتني سحبتني من ايدي وركضت بيه للمخزن
_ ماما لا تنزل تموت تريد انت بابا انور يذبحك .

دُر : خيولي هل ديوث يخاف من خياله بس يبيع بطولات براسي .

باوعت على بيت ماكو احد رجعت تستفسر مني
_ اصعد ماما اصعد .

_ جوعانة والله .

راحت للثلاجة ترست علاگة اجبان وخبز وعصاير ودفعتني
تريد اصعد وكفت بصعوبة : مبايلي صفية وين ؟

ضربت گصتها وراحت تركض جابت التلفون من الجرارة
اخذته وراحت شافت ماكو احد مشيت ونفسي تلعي
اريد اذب راسي قفلت الغرفة وگعدت على سرير
اكلت الى ان شبعت وشربت مسكنات
فتحت تلفوني 10 مكالمات من ابو حسن
و57 مكالمة من رقم غريب اترعبت من الرقم
اتصلت على ابو حسن بسرعة جاوبني : ها بنيتي شلونچ شخبارچ
تسمعيني بوية والله كلوبنا نار عليچ .

جاوبته بصوت منهك ما ظل بيه حيل
_ عايشه بعدني عايشه .

ابو حسن : ضربچ مو؟

_ ماقصر ، بس المهم هسة انتَ عمو خايفة عليكم
انور بعد الصار بالمستشفى ماراح يسكت .

صوت قريب منه يحچي بغضب
_ هيج والگلب يوگع بيدي .

ابو حسن : لا تخافين بوية حچيت لأبوچ كلشي
ماتشوفين اجه وراكم ، اكيد طيّح حظ هل ادب سز .

دُر : منو ؟

ابو حسن : ابوج طيح حظ انور .

بقيت صافنة شحچيب بالله بلعت كل غصاتي
وجاوبته : اي اي صح اخذه وطلع ، عمو يَسار مات ؟

ابو حسن : لا بنيتي عايش بس سمعت الكليه اليمين متضرره
وهو تحت المراقبة هل كم يوم يطلع ، اگلج دُر تدرين ابوچ
وعمچ ابو يَسار وانور اتفقوا تتزوجين يَسار من يطلع .

دُر : نعمممممم .

ابو حسن : انا سمعتهم يتفقون وحتى من گعد يَسار
اتفقوا وياه برضاتچ او غصب تتزوجين .

استأذنت منه وسديت الخط انود مثل الجريح
ولكم اهلي هدموني اهلي يا فشلتي منكم يا فضيحتي
عضيت أصابعي من الحرگه اريد اموت روحي
ياربي شلوووون شلوووون .

سمعت حركة صارت بالبيت ظميت تلفوني
والأكل وبدلت ملابسي بصعوبة كلها دم
أندك الباب فز كلبي بقيت افتر وين اروح
شلعت شعري عود اريد الملم الواگع منه
_ بابا دُر افتحي الباب .

من سمعت صوت ابوية تذكرت هو بعمره
مارفع ايده وضربني امان يمكن اجه يفتهم
مني الصار ، فتحت الباب ايدي على گلبي
رهبة ورعب لامسني بمجرد ما شفت
أنور بيده اسلاح دفعني ابوية الداخل الغرفة
وگعت بالأرض صرخت بوجع من نلوت ايدي
تقرب انور بلا رحمة دفرني وحط المسدس براسي
تشنج كل جزء من جسمي تصلب وريگي يبس
رفعت ايدي اثنينها وعكفت روحي : بابا ابوس ايدك خلصني منه .

گعد ابوية على تخم وانور مثبت المسدس براسي
يوسف : بليل يطلع يَسار من المستشفى وحتى يسكت
وراسنا مايصير بالطين قنعته يتزوجج .

لساني ثگل صار شريط محاولات يَسار وهو يريد يغتصبني
گدام عيوني لطمت على وجهي وملخت شعري فقدت
صوابي واني اسمعه : هوووو حاول يعتدي عليَّ
واني دافعت على نفسي منه المفروض تبوسون راسي
وايدي حاربت حتى احافظ على شرررررفي .

انور : يا شرف هذا انتِ ضربتي يَسار لان شافچ مدخله
رجال للبيت ردتي تخلصين علية حتى تسترين على نفسچ .

رفعت راسي فتحت عيوني مصدومة
هزيت راسي وابتعدت : لاااا والله جذاب والقران جذاب
اني جنت نايمة يَسار هو ...

ضربني على عيوني حسيتها طفت
صرت ارافس من الوجع زحفت على ابوية
رفعت راسي واني جوة رجله : لا تظلمني اني والله ما استحق منكم
هيچ معاملة يَسار راد يعتدي عليَّ وهاي مو اول مرة انتوا مو تعرفون .

رفّع أصبعه على شفايفه ونزّل لمستواي : اششششش لا دوخيني
ابن عمچ يريدچ وحتى ننهي الخلافات والمشاكل ولا يعتدي عليج
ولا تضربي تتزوجون .

وگفت بوجهه ماعندي قوة بس على جثتي اتسجل
بأسم هل حيوان :  هذا زير نسااااااااء .

يوسف : وهو لان زير نساء ماراح يعوفج بابا
انتِ رفضتي وزير النساء اذا ينرفض يتخبل اذا مايحصل مرادة .

دُر : مستوعب كلامك .

يوسف : بكامل استيعابي يَسار راح ياخذچ ونخلص من مشاكلكم
ورانا شغل واعمال مو بين يوم ويوم هاا دُر ويسار تقاتلوا.

دُر : هذا المسدس بيد ابنك موتني وما اصير لهذا القذر .

يوسف : قرارنا يمشي عليچ شئتي ام أبيتي .

دُر : اموت نفسي وحق الله .

يوسف : انووووور شوف شغلك .

عافني بيد انور وسد الباب وطلع
من شفت انور ركضت صرت بزاوية الغرفة
رفعت ايدي صرخت برعب : لاااا تضربني موافقة بس لا تضرب .

انور : منو ديوث ؟

دُر : اني والله اني .

انور : اريد اشرب من دمچ بس يَسار واكف بعيوني .

دُر : واكف بعينك تدرّي غايته شنووو بس يكسر كلبي
لان رفضته هووووو مايحب بس يريد كم يوم يتمـ***** بـ اختك .

ضربني على حلگي شاغت روحي طلع وقفل الباب
عليه رجفت رجف يتيم وطاردي من اخر بيت يحتمي بي .

بقيت مثل السجين المظلوم ينتظر خبر
إعدامه لو يصدر العفو عنه لو ينعدم ظلم
خلص اليوم واليوم الثاني مر مثل القبلة وماكو خبر ولا صوت منهم
دعيت ربي مات وخلصت منه بس عذابي ناوي يستمر مايخلص
لهنا ، دخل انور باليوم الثالث اول ماشافني همس: صوتچ مايطلع
الشيخ جوة حسچ عينچ تحاولين تخربين فرحت يَسار .

لزمني من ايدي يسحل بيه واني أدفر بكل حيلي
واصيح ماريد ولك ماريده شبيك افتهمني حرام تجبروني
وهو يجرني ويضرب وصلني للصالة شفت يَسار بس
مو هو نفسه عيونه حمره دم مخيفه بيها غضب الكون كله
اهتز كلبي بخوف بقيت اباوع بوجهه ما نزلت عيوني
يَسار : ماكو الحمدلله على سلامة .

دُر : ما اريدك يَسار مو حلفت قبل ما تجبرني عليك .

يَسار : سقط الوعد بيوم تجرأتي وضربتيني
جنتي تريدين تموتيني .

دُر : انتَ السبب .

يَسار : جنت مو بوعيي مو قصدي .

دُر : اقنعهم اني ما اريدك الله يخليك .

يَسار : مايفيد نظلّ أبعاد لازم نقترب أنطيني فرصة اثبت حبي .

دُر : على جثتي .

ركضت الباب فتحته وركضت بالكراج اريد اوصل واطلع منا
دفعت الحارس وركضت بكل سرعتي واتلفت اخاف يلحگوني
بقيت اركض واركض واركض ودموعي تتسابق على خدي
للحظات حسيت خلصت منهم وانتهى الرعب الى ان حسيت
بصوت سيارة عالي وشخط اطاراتها تحتك التفتت لمحتها
سيارة انور اريد ابتعد سرع المشي وضربني بيها وگعت
غشيانه والدم يصب من راسي .

وعيت على صوت ريان يضرب بوجهي
_ مو وكت تفقدين لچ دُر صحصحي ويايه اسمعيني .

فتحت عيوني بصعوبة اجر بالنفس بس احس النفس
مايدخل ، وقبغ راسي يضغط على عيوني شهگت
لزم آيدي وإصبعه على شفايفه : اششش مو وقتها تبچين
اشتكيت على انور ويَسار اثنينهم بالسجن لا تتنازلين
اثنينهم وصلوچ للموت .

جاوبته والدنيا تلف بيه اغمض وهو يرجع يضربني
حتى اصحصح : اذا ما اتنازل ابوية يموتني .

ريان : اسمعيني خليهم يوقعون على تعهد بعد مايتعرضون
الچ ويلغون موضوع زواجج منه صارت وحدة بوحدة وتنازلي .

دُر : وين رايح تعال لا تعوفني وحدي .

ريان : رايح اجهز جوازات السفر نسافر كم يوم حتى يهدأ الوضع .

عافني وراح رجعت غبت عن الوعي بس اون اني نايمة
اسمع الدكتور يگول للممرضة تنطيني مهدئات حتى يخف الوجع
من سمعت صوت ابوية جبرت نفسي انام بقيت عيوني مسدودة
مگعدني بعد مرور وقت ماتحمل اجه يمي من خابره ابو يَسار
اسمعه يصيح : بنتك دخلت ابني للسجن المفروض هي تدخل
لك سـ**** ضحكت على يَسار حتى يتنازل وبنتك تلفق مصيبة جديدة .

يوسف : اصبر ماصار شي هسة تتنازل والله .

سد الخط اجه بتجاهي يصيح بأسمي
گعدت بس مترددة: تگدرين توگفين ؟

هزيت راسي لا ، لزمني وگعدني بكل حيله
_ لازم تگعدين ونروح نتنازل بالمركز اخوج وابن عمچ بالسجن
هذا العار ريان مشتكي عليهم .

جبرني البس حذاء جايبها وياه بقيت صافنة بي
اباع بوجهه بقهر : مخفت على بنتك ؟

_ مابيچ شي الصار قضاء وقدر .

_ لا انور متقصد يموتني .

_ بس يَسار ما راضي يحبچ وهو وريان نقلوچ للمستشفى .

_ امي وين ؟

_ بالطريق .

_ يا طريق ؟

_ امشي هسة مستعجلين عوفي امچ ؟

_ اني بنتكم لو اكو سر عليك الله احجي صرت اشك اني مو بنتكم .

_ معاملتنا وياچ حالها حال اخوانچ لا تحچين هيچ عيب .

_ انتَ حتى ما حضنتني ولا گلت الحمدلله على سلامتچ .

_ لا دوخينيييييييي دُر هل تصرفات اقرف منهاااااا .

سحب كرسي متحرك وصاح الحارس طلعني
يمشي سريع صعدني بالسيارة ورجعها وهو صعد يمي
والسائق بالإمام يسوق صاح على حارس
_ استعجل وصلني على مركز الشرطة .

_ ما اتنازل .

التفت فاتح عيونه مصدوم ضغط على اسنانه ولزمني من ايدي
_ نعمممم .

_ ما اتنازل على موتي ما اتنازل .

_ لا تجربين شخصيتي الثانية والله يا بابا مو تگولين
احنا روبوتات انتِ تتحولين روبوت عاطل اذا استخدم اسلوبي وياچ .

سحبت ايدي وحاولت اثبت نفسي واقوي روحي
وابين ما مهتمه ولا خايفة: عندي شرط .

_ اهووووووو دُرررر احترمي نفسچ .

_ اذا يتنفذ شرطي اتنازل ، ما يتنفذ اقبل
اموت وهل اثنين يخيسون بالسجن انتَ فكر وقرر وجاوبني .

رفع أيده وبأخر ثانية غير رأيه ونزلها
سحب نفس ورجع ضهره شغل جگارة
وعدل سترته : احچي بالله احچي .

دُر : تعهد يتعهدون ما يتعرضون اليه بالضرب ولا انجبر
اتزوج ابن اخوك زير النساء يَسار .

_ هههههههه فقدتي عقلچ بس يطلع يَسار ضروري تتزوجون .

_ ليش ضروري اذا ما أتزوجه شيصير تخسر فلوسك
عمي يسحب البساط الأحمر من جواك ؟

وصلنا للمركز سيارة ريان موجودة ابوية يريد ينزل
وطلع شاف سيارتنا اجه بتجاهه دار ابوية وجهه
يهمس : اهووو هم هذا الغثيث .

دگ على شباك يضحك بستهزاء
_ ها اخوك لعب عليك جاي تلهث لهث .

راد يضربه ابتعد ريان وهو يضحك بصوت مخيف
وعبالك عنده مصيبة: لااااا تختبر صبري وياك لك ريان .

دار لناحيتي ونزلني من السيارة نزل أبوية بسرعة
يريد ياخذني منه : وين تاخذها سـ** .

ريان : توقع تعهد خيراً على خير ماكو توقيع انسى التنازل
وهل جلاب يخلصوها بالسجون وخطية تدري بيهم بزر دلال
مايتحملون عذاب السجون .

يوسف : اي مو مثلك مجرب السجون وتعرف شبيها .

ريان : بفضلك ما ناسيها ارجعها الك بس بالوقت المناسب .

يوسف : دولي لك عار ، تعالي بابا ننهي المهزلة .

ظل واحد يرادد بالثاني وماكو نتيجة اخذني ريان صعدني
بسيارته وساقها سريع بس حذر يباوع بالمرايا كل شوية
_ شكوو ؟

ريان : ما استبعدها يدز ناس يموتوني .

دُر : ريان ليش انتَ وابوية علاقتكم محتقره وبينكم كره .

ريان : ابوچ موت كلبي ابوچ هذا ظالم هوّ وأخوانه .

دُر : انتَ شايف عمامي .

جاوبني بقهر تصلب جسمه وكأنه يستذكر
_ إني اللي شايفهم واعرفهم ومجربهم .

دُر : ابد ما شايفتهم ولا اعرفهم .

ريان : هههه تشوفيهم بس من اطلعين عن نمطهم
وگلبچ يدگ ويختار طريقة ، بيدهم يموتون احلامچ حلم بعد حلم .

مسح وجهه بقوة وصار يضرب على ستيرن السيارة بكل قوته
غطيت راسي اخاف تجيني ضربة، اخذذذذذذوهاااااا مني اخذوهاااااا
والله ما انسى انتقم منهم واحد وأحد بسسسسس منتظر الوقت المناسب .

سكت بعد ما نهار وجهه صار احمر يضغط على راسه ويحاول
يسيطر على الطريق الواضح عمامي ذكراهم صعب وافعالهم
عصيبة، عدلت گعدتي من نزل من السيارة صار يفتر يروح ويرجع
يشرب بالجگاير ويرجع يخابر مر وقت طويل صعد بقمة الهدوء
حتى مايحچي ساكت جامد الملامح .

فر السيارة لگيت نفسي مقابيل المركز وابوية ينتظر
وعمي ابو يَسار هجم على سيارته نزل ريان دفعه
وصاح بـ ابوية : اخذ اخوك لا افلش معاني وجهه .

وابوية اجه يقنع بعمي يسكت دخلوني
بحضور المحامي طلع انور ويَسار من شافوني
عيونهم نطت ، ريان ضرب بأصبعه على ورقة
ويضحك يغيض بيهم : وقعوا حيوانات .

انور يريد يضربه أبوية لزمه
وهو يباوع على ريان وبلغت التهديد يحچي : أتجاهله ابني يمكن
هاي اخر كلمات تصدر من ريان اخوك عود تذكرها بعدين .

ابو يَسار : هو يعرف شنو نگدر نسوي ومُصر يلعّب ويانا
اخوك من عشاق المغامرات الخطرة .

كمل من ريان ودار وجهه بتجاهي
_ وانتِ لا ترفعين خشمچ بي لان ينكسر بسهولة
ليش تخليني اخليچ براسي .

ريان : وقعوووووووووووا دوختووووني .

وقع يَسار وعيونه ما رفعها مني
وانور يوقع ويسب بيه وبريان
تقدم يَسار لزم ايدي يتفحص بوجهي : شلون صرتي انتِ زينة
هذا العار يسوق سريع وضربچ بالي يمچ .

سحبت ايدي منه وابتعدت : انت معليكك .

يباوع بعيونه مليانه دموع سحبني اكثر من ايدي كلهم
موجودين بس ما مهتم لاحد بيهم ، باس راسي ويمسح
بوجهي : اني احبچ ومن كل گلبي دُر .

دفعته اريد اشرد صار مقابيلي لازم جرح بطنه
_ لا لا تروحين اني اروح لا تنضربين ويصير بيج شي .

دُر : لا تمثل تمثيلك مايفيد يمي إني كاشفه أقنعتك كلهااااا .

فتحت الباب اريد اطلع وره ريان بس ماكو بقيت اباوع عبالي
ينتظرني اختفى، مشيت وره ابوية وانور يدفع بي يَسار
حتى ما يضربني .

دگ تلفون ابو يَسار وهذا تخبل ظل يتلفت
سد الخط ولزم ابوية من ايده يهز بي
ابو يسار : هذا العار وين راح .

دفعه وهو يمشي يجاوبه
_ ريان مو غبي يدري يودع بعد فعلته
ويعرف ما نسكت ونردها .

_ انتَ هددته وضحت مسوين اله فخ .

_ صح ، قابل اخليك تموت ابني لان سجن ابنك .

_ حلو يعني تعترف ؟

اخذني من ايدي صعدنا للسيارة وابو يسار اخذه
وراحوا وصلت للبيت استقبلتني صفيّة اخذتني
منهم وفوتتني للغرفة ، دخل ابوية للغرفة اسمع
صوت امي تتغنج : تمرضت والحق عليك وعلى اولادك
طلعوا روحي كُل كم يوم مشكلة مو عيشة .

يوسف : ولا واحد عنده تربية اخ عدو اخ
وانتِ ماعرفتي تحتويهم .

_ تشوفني مشغولة وقت ماعندي شوكت اگدر احتويهم .

انسدت غرفتهم نمت على فراشي تغطيت افكر بكلامهم
مجبورين تخلفون اطفال وانتوا ماعدكم وقت ؟
مجبورين تتزوجون ، شنو شاغلكم ؟؟
بعدين من رب العالمين يحاسبهم على أطفالهم
الضحايا صرنا ضحية لهل عائلة شنو راح يكون جوابهم ؟

نمت گعدت الفجر لعبت بتلفوني شوية وبعد كل
كسرة وخذلان امر بيها وكُل ساعة وثانية اظل بيها
وحدي احس بالوحدة اقوي نفسي اكثر واكثر
وابلش من جديد واخلي تركيزي على دراستي
درست دراسه مكثفة وبقيت على اتصال بنرجس
تنقل المحاضرات وندرس سوية احياناً.

مر اسبوع كل ليلة تكثر المشاكل واصوات عالية
تقبض الگلب اسمع ، گدرت اوكف على حيلي وارجع للدوام
من بعد غياب رتبت نفسي واخذت السيارة ورحت من يوم
المشكلة بعد ما شفت ابو حسن واليوم هم ماكو
وصلت للجامعة شفت نرجس تحجي هي وبنية رحت بوستها
ودخلنا للمحاضرات تسولفلي واسولف الها عن نفسي
بس مو مشاكلي بقيت محتفظه بـ اسرار اهلي وسوء معاملتهم .

يَسار من بعيد يتابعني ما يقترب ، بنص المحاضرة الثالثة
تلفون يَسار ما سكت مكالمة وره الثانية أضطرّ يستأذن
ويطلع بقيت منزله ما اريد المح وجهه , كلها ثواني من
طلعته دخل يركض سحبني من ايدي وصاح بفزع
_ امشي ابوچ مسوووي حادث اركضي .

دفعته مني كذبته منو يگول مو لعبة من لعباته الحقيرة
بقيت اباوع ما انكر خوفي ورهبتي : يَسار عوفني .

يَسار : لچ ابوووچ مسوي حادث وانور خابرني رايح للمستشفى .

دُر : يا مستشفى .

يَسار : امشي ويايه مستعجل يلة .

دُر : ليش تجذب عليك ؟

عافني وهو يصيح بعالي صوته گدام القاعة كلها
بدون ذرة خجل : اهووووووو دروحي لا تصدگين طلعتي روحي .

راح يركض الكل يراقب تصرفاتي واني عيوني على دكتور
انتظر اشوف شنو يگول اروح لو لا اگعد امشي شسوي
رجلي جمدت ، سحبتني نرجس من ملابسي وهي تتفحصني
_ لچ امشي روحي وياه غير ابوچ بالمستشفى طلعي .

بضياع گعدت مسحت وجهي بيدي الترجف
يبس ريگي مسحت دمعتي وعفت ملازمي يمها
اخذت بس الجنطة ترخصت وطلعت بالسيارة
اسوق وامسح بدموعي خابرت على ريان
جاوبني وهو يسحب نفس من جگارته
بارد حتى من سمع صوت نحيبي ما بدر منه
رد فعل الموضوع عنده طبيعي
_ ريان وينك ريان يَسار يگول ابوية بالمستشفى .

_ تبچين على ابوچ ؟

_ خايفة .

_ غباء موهبة مو فطرة ، موجود بالمستشفى الـ**** روحي .

سد الخط بوجهي بقيت اباوع بي لدقائق حتى استوعب
برودة أعصابه ياترى شصار بين اهلي وريان بحيث
الصار غاسل قلب ريان من اهلي وحاقد عليهم حقد الاعداء واكثر .

سقت السيارة بصعوبة متوترة من الطريق
وصلت للكراج ركنتها بإهمال وركضت
صعدت على درج وسالت الاستعلامات
_ يوسف عيسى حادث وصل اليوم ؟

بحث بالمعلومات رفع رأسه من شاف اسمه موجود
يأشر على مصعد : بالطابق الثاني بغرفة العمليات .

فتحت عيوني بهتت لزمت الميز دفعت نفسي
امشي وخطواتي تثگل ليش تحبيهم كلبي يصيح
ليش تحبيهم سبب دمارچ اهلچ مقهورة ومحتارة
على انسان ما شفتي منه بيوم قطرة اهتمام .

صعدت بالمصعد نرجس تتصل جاوبتها بصوت
يرجف : ها نرجس وصلت .

نرجس:طمنيني من تشوفي حبيبتي اسفة ما اجيت وياچ
تعرفين وضعي اهلي مايقبلون اطلع باب الجامعة.

دُر : اتصالچ يعنيلي هواي نرجس شكراً .

سديت الخط وطلعت من المصعد لمحت انور
واكف هو ويَسار ومبين صاير بينهم مشادة
كلامية ، تقربت منهم انور عبالك اعمى ماشافني
ويَسار من شافني عيونه صارت بگصته تجاهلت نظراته
ورحت الـ انور : ابوية ما يسوقها للسيارة شلون صار الحادث .

انور : هو والسايق ابو حسن صار عليهم هجوم إطلاق نار .

ضربت على خدي لزمني من ايدي ودفعني على حايط
_ وجع همج تعلمتي من هاي الهمج نرجس
مو عيب تضربين على وجهج بنص المستشفى .

دُر : عيب ليش عيب ؟
عوفك من العيب وفهمني الرجال بي شي خطية جبير بالعمر .

قبل لا يجاوبني صار صوت خطوات عالي على درج
درت وجهي تعجبت على عدد الدخل بالممر عرفتها اولاد ابو حسن
تعدونا وراحوا على ممرضة بكل احترام
واحد منهم كبير بالعمر سألها : بلا زحمة والدي صفوان كامل
موجود بغرفة العمليات ؟

_ اي نعم اخي موجود نحتاج دم ضروري .

بمجرد ما كملت ركضوا اربعة شباب نزلوا
والباقي يستفسرون ويتفاهمون بيناتهم
حسبتهم خمسة .

يَسار : هذا اللي تضارب وياك القذر موجود ؟

انور : لا الـ**** ماكو بس اشوفه ادوس راسه بالقندرة .

ردت ارزلهم والله مو وقت مشاكل احنا بحال عركات
بس خفت انضرب وخجلت بقيت ساكته انتظر باب
العمليات ينفتح ، رجعوا الشباب وياهم آلدم لابوهم
وكلها ثواني وتعالت الاصوات من اجه اخوهم السادس
_ حسن وين ابوية شصاير لك شصاير ؟

حسن : ماكو شي گول يا الله بالعمليات يطلعون ونعرف .

رجع شعره وبقلق يفتر رجع على اخو صاح
_ شلون صار هيج وياه منو السبب اشرب من دمهم
وحگ ابو راس الحار .

حسن : نفتهم ونتصرف لا تنفعل قبل مانعرف كلشي من ابوي يا خوية .

_ شگد حجبت وياه بوية بطل من هل زبايل بوية شني
هل نعوله وتشتغل عدهم ماياخذ كلام وهاي النتيجة .

نفش انور ريشاته سحبته من ايده دفعني
صحت بـ يَسار يصيح بي وهذا يدفعه عليهم
انور : منووووووو الزبالة لك منو نعوله ؟

دار وجهه يباوع بتركيز على انور من فوك ليجوه
بـ استصغار وكأنه نكره : ياهو داس على راسك يا كبش .

حسن: خوية روح احسبها علية مو وكت مشاكل
ابوك بالعمليات وابونا بالعمليات ادعولهم روح هناك روح .

يدفع بـ انور وهذا شايف روحه عليهم عود همَّ اقل منه
انور : تحب تشوف الكبش شيسوي بيك اذا غضب .

_ ينطح ؟

يَسار : انتَ هيو شلون تجرأت وتجاوزت على اسيادكم .

ضربة ابن ابو حسن على حلگه بطرف اصابعه وهو لابس محبس
من صوت الضربة تأذيت ، تقدم انور يريد يرجع
الضربة واخوانه كلهم هجمو وياه يدفعون بيهم
وهو ظل واگف يفور عليهم گمز انور من بيناتهم
واثنينهم يتضاربون ويدافعون واحد يسب بالثاني
اجت امي من شافتهم ذبت جنطتها وظلت تصيح
على حماية وياها اجه يفاكك بيهم من شافتني
سحبتني من ايدي وهي تصيح : تعالي خليهم يشوفونا
نسوان بيناتهم حتى يعوفون اخوج .

دفعتني بوسطهم اول ما تقربت انضربت براسها
لزمت انور سحبته وشاغت روحي من انضرب
اظفري ونشلع كله والدم يجري صرخت بصوت
عالي ايدي كلها توجعني كلهم وكفوا اله انور
يصيح ويهدد ويسب وكل شوية واحد بيهم
يضربه ولا يتوب يرجع يضرب وعادي
ينكتل وهذا يَسار وياه .

من بينّ الهوسة حسيت انسحبت من جنطتي
رفعت راسي عيوني غورگت بالدموع واجت
بعيونه فتح المصعد وصعدني دفعته وابتعدت 
منه طلع كلينكس من جيب البنطلون وبدون
استأذان لزم ايدي ولف إصبعي بالكلينكس
وضغط برخاوة حتى يوگف الدم بدون ما يباوع بوجهي .

دُر : عوف ايدي .

_ من يوگف الدم .

دُر : ليش تضرب بلا وعي .

_ يستاهل هل كبش .

دُر : رجعني شتريد مني ؟

_ اداوي جرحچ .

يتبع ..

ثقل ميزانك بذكر اللّٰـه:
- سُبحان اللّٰـه
- الحمد للّٰـه
- لا إله إلا اللّٰـه
- اللّٰـه أكبر
- سُبحان اللّٰـه و بحمدهِ
- استغفر اللّٰـه
- اللهُم صلِ على محمد وال محمد