رواية الريم بين احضان الاسد الفصل الثامن والعشرون 28 - بقلم شيـخـة ✍️🖤

و تاخذني بِـ دفو اعيونك
و أختل جوهَ جفنك طيف
اليطب لـ أحلامك إتونسه؛
.
.
.
.
.
.

بغداد ....
مرت الايام وخلص الا سبوع وكمل حسين شغله اليوم جمعه وهو بطريقه لاهله وطبعا ما يدري بالي جاي يصير ....

بيت ابو شهم ...
البنات كاعدات من الصبح نضفن البيت والي منهن سون حلويات وطبعا اصيل ما خلوها تشتغل لان اليوم يجون الناس يشوفوها ....
قررت تلبس فستان بنصل طويل لونه جويتي وشيله بيجي ولبست مداليه وسوار ب ايدها وحجلها طلعت كلش حلوة وية اضافه شوية من الكحل ومورد الخدود وشوية حمرة لونها وردي طلعت مرتبة وكعدت منتضرة الناس بتوتر زايد ......

الشيخه :ولجن وين صرتن تأخرنه راح يجون الناس
نيران: اي جدة نزلنه
طبعا البنات لبسوا ملابس بيت عادية وتوجهوا لبيت الشيخ ابو شهم دخلن وهن يهلهن ويضحكن
صعدن لغرفه اصيل والشيخه وام اسد دخلن بالصاله يم ام شهم وام حسين الي وصلت قبلهم وكعدن يسولفن .....
اما البنات

ريم:لج اصيل طالعه جمال ونبي
ضي الگمر: هسه الناس يتعجبون بيها
شمس: بس علئ الاقل يطلع ابنهم حلو مو مصلبخ تصلبخ هههه
البنات ضحكن كلهن
ملاك:اي والله نوب يطلع يلعب النفس وتروح اصيل تكتل نفسها ههههه
البنات:ههههههههههه
طبعا مر اليوم عادي بين التحضيرات والتجهيزات لاستقبال اهل السيد اكرم وطبعا الاهل كلهم متجمعين والشيوخ والولد بالديوان.....

بغداد الساعه ب 6 صباحاً
حسين كعدت من ال 5 الفجر صليت وكملت نوب دخلت سبحت وبدلت ملابسي وحضرت جنطتي صارت بال 6 كعد ايان و وراح كعد حور طلعت سوتلي ريوك شكد حبابه وفطيرة هاي البنيه كلش حبيتها مبينه مؤدبة حيل شلون ملتزمه بحجابها و ملا بسها عريضات المهم تريكت وكملت سلمت عليهم وطلعت توجهت لمحافظتي طول الطريق افكر ب اصيل خلص اني بس ارجع احاجي شيخ اسد علمود اخطبها مااعاد اصبر اكثر المهم وصلت دخلت للبيت مالكيت احد استغربت وبعدين كلت يجوز بيت عمي الشيخ طه المهم سبحت وبدلت وتمددت نمتلي ساعه فزيت اباوع الساعه ب 3العصر كمت اتوضيت وصليت ولبست دشداشه نيلي وشماغ بيجي لفيته لفه خليجيه ونوب لبست ساعه ومحبسي ورشيت من عطري وطلعت لبيت عمي هم حايط وي حايط بيتنه المهم دخلت للديوان لكيت الكل متجمع سلمت عليهم واتحمدولي بالسلامه وكعدنه نسولف وكذا اشوف الولد يحضرون بالغراض سألت الشيخ اسد
حسين: اكول خويي
الشيخ اسد: كول يبعد اخوك
حسين: شصاير اشو متجمعين وترتبون شنو عدنه مشكله فصل
الشيخ اسد: لا بس غير اليوم الناس يجون علمود اصيل بت عمي
حسين استغرب: شكو ليش يجون وهم منو
الشيخ اسد: شبيك حسين غير يخطبوها وصار اسبوع مااخذين موعد منه
حسين ضليت مصدوم لا اخذ ولا انطي حسيت بملبي انعصر عصر
الشيخ اسد: واليوم الناس بس يشوفوها وبعدين نردلهم جواب
حسين: ابد مااحجيت غير هل كلمتين كتله (اصيل اني ناهي عليها)
الشيخ اسد اتفاجأ: شنو هل حجي حسين شنو ناهي عليها
حسين :مثل ماكتلك
الشيخ اسد: اشو كوم وياي نتفاهم
حسين: ماكو شي اتفاهم عليه ناهي عليها وخلص
الشيخ اسد: دكوم بوية كوم
طلعوا الشيخ اسد و حسين من الديوان وكعدوا بالحديقه
الشيخ اسد:ايي حسين احجي
حسين: شحجي
الشيخ اسد: ليش نهيت عليها بله
حسين: شوف اسد اني احب اصيل صارلي 5 سنوات ومااحجيت كلت مو وكتها خليها براحتها وبعدها واني عود اليوم جاي اريد احجي وياك بهذا الموضوع علمود اخطبها تالي اغيبلي اسبوع الكاها تنخطب غير اكتل نفسي هنا
الشيخ اسد: صدك تحجي حسين
حسين: ايي صدك احجي جا جاي اجذب عليك
الشيخ اسد: استغفرالله واتوب اليه منك
حسين: وهسه فهمني شسوي
الشيخ اسد: اسمعني حسين
حسين :اي احجي اسمعك
الشيخ اسد: الناس راح يجون علمود بس يشوفوها و ناخذ اسمهم ونسأل ومن شغلات الزواج المعروفه و بعدين ناخذ منهم وكت علمود نرجعلهم جواب وعود هذاك الوكت انت احجي وي عمي والشيخ وكللهم اريدها علمود هم يرفضون الناس
حسين: مستحيل .....خاف الشيخ ينطيهم كلمه وتروح من ايدي
الشيخ اسد: لا ما ينطيهم اني هسه راح انطي خبر
حسين: ماشي والي حجي وياكم من اخلص من هذول الناس شلون ماتكلولي
الشيخ اسد: مو وكت هذا الكلام ...يلا تعال نرجع للديوان
حسين: يلا
دخلوا حسين والشيخ اسد بالديوان وحسين وجهه مكلوب من العصبيه
والشيخ اسد راح كعد يم الشيخ طه
الشيخ اسد: شيخنه
الشيخ طه: ها يبوي
الشيخ اسد: راح احجيلك شغله بيني وبينك
الشيخ طه: اي وليدي احجي
الشيخ اسد: حسين يريد اصيل
الشيخ طه: شنوووو
الشيخ اسد: اي والله يبوي ...وهم الغلط منع ان ما كلناله
الشيخ طه: وهسه شلون
الشيخ اسد: شيخ انت حاول لا تنطيهم الموافقه اليوم ابد
الشيخ طه: هاي هيه ان شاء الله
الشيخ اسد: خير يارب

مر الوكت وصارت ب 4 العصر
وصلوا اهل سيد اكرم الزلم دخلوا بالديوان
والنسوان بيت ابو شهم
كعدوا الزلم بالديوان وبدو يحجون ويتبادلون اطراف الاحاديث ل ان حجه ابو اكرم
ابو اكرم: الله بالخير
الكل: الله بالخير والعافيه
ابو اكرم: شيخ ابو اسد مثل ماتعرف احنه اليوم جايين وجايبين ويانه الوجوة الطيبه علمود نطلب ايد بنتكم لابنه سيد اكرم وان شاء الله ماتردونه
الشيخ طه: ابو اكرم جيتكم ع روسنه ونورتونه وان شاء الله ما عليكم زود بس تدري الرئي الاول والاخير للبنيه وطبعا قبل كلشي لازم نسئل ونستفسر عنكم وهاي من الاصول
ابو اكرم :اي والله شيخ حقكم وان شاء الله ماتسمعون عنه بس الاخبار الزينه
طبعا حسين جان يباوع لاكرم بحقد و وودة يكوم يذبحه هنا شلون استرجه يخطبها ......

بيت ابو شهم
نيران: لج اصيل انزلي النسوان تريد تشوفج
اصيل: لا لا بطلت ماانزل استحي والله
شمس: صدك تحجين ولج
اصيل: اي والله
ريم: انزلي يمعودة صدك تحجين النسوان منتضرتج
وبعد معاناه طويلة اصيل نزلت وقدمت للنسوان العصير وكعدت يمهن
ام اكرم: ما شاء الله شنو هل الجمال بنيتي
اصيل: شكرا خاله
هدئ (اخت اكرم) :حبيبتي اصيل حقه اخوية ميت عليج شنو من جمال شايله
اصيل: شكرا يكلبي
ام اكرم: شوفي حجيه احنه اليوم اجينه نشوف اصيل ونطلب ايدها لابنا وطبعا مانحمد بي بس سيد اكرم كلش خلوق ومؤدب ومااعندة من الشغلات المكسرة وشاغول ويدرس
الشيخه: الله يحفظه الكم يمه ان شاء الله نشوف ابوها واخوتها ونردلكم خبر....

شمس:جنت بالمطبخ اجه كيان
كيان: شمس
شمس: ضليت مرتبكه ومستحيه منه كلتله هاا
كيان: كولي للجماعه يكولون يلا ورانه طريق
شمس: ميخالف
دخلت للاستقبال
كتلهم خاله يكولون الجماعه يلا ورانه طريق
ام اكرم: اي خاله ....يلا حجيه احنه نترخص وان شاء الله نسمع خبر منكم حلو
الشيخه: ان شاء الله يمه توصلون بسلامه
ام اكرم: الله يسلمج حجيه ...يلا مع السلامه
الشيخه: بحفظ القران يمه
طلعت ام اكرم وخالت وهدئ اخته
وصعدوا بالسيارة

اما بباب الديوان
ابو اكرم: نترخص منكم
الشيخ طه:توصلوت بسلامه
ابو اكرم:الله يسلمك شيخ ...ان شاء الله تردولنه الخبر بخير
الشيخ طه: ان شاء الله خوية
ابو اكرم: في امان الله
الشيخ طه: في امان الله ....
توجهه ابو اكرم واكرم واخو بالسيارة وتوجههم لبغداد .....

دخلوا الشيوخ لديوان والشباب وياهم يتناقشون

همام :تدرون الولد مبين هادئ كلش
كيان: عفيه حسيته خجول
شهم: انتو جاي تصنفون علئ الولد لو تمدحون بي
همام: لا والله نمدح بي
شهم: ادخلوا يلا
دخلوا الولد وكعدوا
الشيخ طه: ابو شهم
الشيخ حسن:ها ابو اسد كول
الشيخ طه: ترا اصيل ابن عمها يريدها
الشيخ حسن استغرب لان الولد كالوا تروح بفالها ومحد عارض: شنو منو منهم لان كلهم كالوا خلي تتزوج
الشيخ طه:حسين ناهي عليها وكايل ل اسد
الشيخ رضا:حسين ابني اشو ماكالي وبعدين شنو هو وينهي علئ البنيه بله ماتريدة
الشيخ طه:لا ان شاء الله ماترفض البنيه
الشيخ حسن: هاي هيه اذا اصيل وافقت هي ل حسين
لان حسين خوش زلمه وحوك وعليه الاعتماد وانه احبنه
الشيخ رضا: والناس شنو نكللهم
الشيخ طه: ما بيها شي ماالهم نصيب يمنه وابن عمها يريدها
الشيخ رضا: بس اله بعد موافقت اصيل اني اصيل احبها ومثل بناتي مااريدكم تغصبوها
الشيخ حسن: لا شنو نغصبها لا ماكو هيج بس انه راح احجي وياها وان شاء الله خير
الشيخ طه والشيخ رضا: ان شاءالله خير
الشيخ طه: اسمعو بوية اصيل ماراح تروح للغريب
شهم: ليش عمي الولد بي شي
الشيخ حسن: لا مابي شي بس مالهم نصيب عدنه
كيان: ليش صار شي لان قبل شوية حسيتكم قابلين شتغير
الشيخ طه :حسين ابن عمكم يريدها
شهم وكيان استغربوا بس ماحجوا شي لان ابن عمهم ويحبونه الشيخ اسد: ها ابو علي رضيت
حسين: الف الحمدلله مشكور ابو نمر
الشيخ اسد: هههههه يلا شد حيلك
حسين: ههه ان شاء الله .......

وهنا خلص هذا البارت اتمنئ يعجبكم 💗✌️
واعتذر عن الاخطاء الاملائية😁✌️

عدد كلمات البارت 1313 كلمه

#الكاتبة زينب الساعدي

في امان الله وحفظة