رواية #الشوق الجارف_والكبرياء الفصل الثاني 2 - بقلم همس ليل

بطريق الرجعة بيومها جان اكو ولد ملاحكنة بس مسافة عنة ....اني حسيت بيه من طلعنا من المدرسة هو ورانا
حنان...لج زنوبة ترى هذا الولد ملاحكنا
زينب...عوفي مالج علاقة بيه
عفته بس خفت كلت خاف من جماعة الولد ويسويلنا شي...دنيا مو أمان
ثاني يوم هم نفس الشي من رجعنا ...وكفت ردته يمشي حتى اتأكد هو هم وكف ...اني عاد خليت لحد ما دخلنا فرعنا والتفت عليه
...انت ليش ملاحكنا
هو...منو ملاحكج..
حنان...انت من طلعنا صار يومين ...موعيب عليك شكبرك شكدك شبيقيت للمراهقين
هو...لج بابا من وياج انتي ...ليش طولين لسانج
حنان ...اطوله ونص مادام ماتحترم نفسك وتعوفنا بحالنا ...طبعا زينب اجر بيا وتكولي اسكتي واني ادفع بيها ومانطيها مجال تحجي
هو...امشي روحي لاهلج لا ترة ردي يصير غير شكل...طبعا صار عصبي حيل
حنان...لا والله رده غير شكل ...دصير  رجال اول وبطل تلاحك بنات بكد بناتك وبعدين قبل ماكمل ماحسبت الا اجاني راشدي معدل....
هو...رجال غصبنا عليج وعلى اهلج...لسانج اطول منج ..محد مربيج
همزين الشارع جان فارغ من ضربني اني تخبلت ذبيت الجنطة اريد اهجم عليه بس زينب جلبت بية حيل
زينب ...لج بابا عوفي هذا اخوية الجبير
حنان...واذا اخوج...مال حق يضربني...واني مترباية احسن منك
هو...هسة نشوف من نجي لابوج
من كال هيج خرسيت...وشلت جنطي واني كلبي نار ماخذت بحقي...وباوعت لزينب
حنان...ماريد اعرفج بعد كل المصايب تجي من وراج...والتفت عليه...مافوته لك بسيطة
ومشيت لبيتنا بس مشتعلة اول مرة واحد يمد ايده علي وهالنوب رزلني...رجعت غسلت واذكرت الي صار يارب شلون اروح اكول لاهلي ...خاف يجي ويذبون الصوج براسي ...لان ابوية نبهني ماتجاوز خاصة اذا ولد...وذكرت هو مو ولد رجال النوب السالفة اطكع
امي...لج حنو وينج تعاي تغدي
حنان....ماريد مااشتهي
مهيمن...خلي نسجله بالتاريخ ...حنو ماتشتهي تاكل
وظلو يصنفون علي يوميا ماضوج بس اليوم طكت روحي ...اني ابد ماشايفة اخو زينب صار سنتين جوارين ..الصبح اروح سوة ونرجع للظهر بعد مااطلع....يعني ماكو فد مناسبة حتى التقي بيه ...شايفه اخوتها اثنين لان يجون على الولد بس هذا لا....شمدريني اخوها
يارب ظل فكري يجيب ويودي ...سمعت جرس الباب...وعرفت اجو خطار مانزلت.....بس بقيت الوب ...بس لا اجى يشكي لابوي...لا معقولة شيكوله ضربت بنتك....
مرت نص ساعة بس حسيتها يوم كامل...اني غرفتي جوة واخوتي فوك ...دخلت امي....لج شمصخمة شمعزية...
حنان...شكو يمة شبيج
ام علي...انتي احجيلي شرادة على فيصل
حنان...والله ذبحتيني ...على شنو تحجين...يافيصل غير افتهم....دخل ابوي...فيصل جيرانه الي ماتستحين واكفة تغلطين عليه بنص الشارع...اني هيج ربيتج على قلة الاحترام..حتى لو رابية وية ولد هم يحترمون همة ...مو مثل فالت لسانهم وماعندج احترام لاحد
حنان ...لا يابة اني مو ماعندي احترام...بس شمدريني هو اخو زينب
ابو علي...وانتي شعليج تتحارشين بالرايح والجاي
حنان...عبالي ملاحكنا..وخفت
ابو علي...حتى لو ملاحكج ...تجين وتحجين الي ولاخوتج هم يصرفون
تعاي اعتذري من الولد
حنان...مااعتذر...ليش يضرب ماله حقه...اجاني راشدي من ابوي ..
ابو علي...هذا حتى تتأدبين وماطولين لسانج ...وتمشين تعتذرين
نقهرت كلش اول مرة ابوي يضربني وكرهت فيصل كلش وتحلفت له اني اعلمه
رحت وياه واثر الراشدي بخدي...ومن شفته بودي املخه مو اعتذر
ابو علي...فيصل هاي بنفسها تعتذر منك ...اعتذرت وطلعت ركض حتى ماباوعت عليه...
لليل افكر شلون انتقم منه ...اجى علي اخوي

علي....حنو حبي انتي كبرتي تصرفات الولد هاي بطليها ...هسة لازم تهتمين نفسج وتغيرين من اسلوبج ...مابقى كم سنة ودخلين كلية ....براج زواج ..بعد ماكمل دخل حسن ومهيمن
مهيمن...يامعود يازواج من يقبل يزوجها ...
حسن...اي يزوج اخوه مو بنية
كمل العدد من اجى حسام وبسام ذولة توم اصغر مني بسنتين يعني عمرهم ١٣
حسام...هو اصلا من ملاحكها ...اكيد ملاحكين زينب ذيج صدك بنية
بسام...اي والله مو اختنا نايف ضابط
حنان...وانت شمعرفك نايف ضابط..
وصار الضرب بينا بفلس وعلي وحسن يحاولون يفكونه ومهيمن يضحك علينا
طبعا علي بعد سنة يتخرج من كلية العسكرية..وحسن صف اول صيدلة...ومهيمن خامس اعدادي
علي صديقي مو اخوي احجيله كلشي وهو هم يجي يحجيلي عن اصدقائه
..شكد حاول يغيرني ..واني ابد لا حياة لمن تنادي
ثاني يوم من اريد اطلع ابوية صاحني طبعا بدون ماتغديت ولا تعشيت شكد حاولت امي مقبلت اكل حتى اخوتي...بس اني عنودية وابقى ماكبرة
ابو علي ...اكعدي تريكي ...كعدت لان ماريد احجي وياه ...اخذت شوي صمون وشربت جاي
ام علي ....اخذي هاي اللفة وياج انتي بدون اكل
حنان...ماريد...صاح ابوي اخذيها...ومنا وهيج فيصل راح يوديكم ومهيمن من يطلع من مدرسته يرجعكم ...طبعا لهنا وكافي
حنان..ماربد احد يوصلني.
ابو علي...كافي انطيتج هواي مجال لو فيصل يوصلكم لو اكعدي ماكو دوام...سمعنا صوت هورن ...روحي اجوي عليج
طلعت واني بكلبي اتوعد لفيصل من صعدت ماصبحت
فيصل...صباح الخير...ناس تسلم من تصعد
حنان...محد كالك وصلنا
فيصل...التف علي...لج انتي شنو هالسان عليج
عيبتله بوجهي ودرتها على الجامة ...هز ايده ومشى وصلنا...
زينب...حنو ليش ماتحجين وياي
حنان...ماريد بعد اعرفج
زينب...والله موقصدي ماكولج عبالي شايفة فيصل..وبعدين ردت اكولج انتي مانطيتيني مجال
حنان...هو شكو مالحكنا جان
زينب...خاف من الولد لا يسون شي كال اراقبكم مدة حتى اطمن..
.حبابة والله ضوجة من دونج
حنان...خلص بعد لا تسويها
رجعت وهم بقيت بدون اكل يصيحني ابوي ...اكعد وياهم بس مااكل شكد جعت بس ...من الكوة مااكلت شلون يضربني ...النوب ابوي جان يوميا من يجي من الشغل يصيحني جايب علاكة حلويات اليوم لا ضجت اكثر...ثاني اليوم جان وكت الخطوة الاولى للانتقام....وللحكاية تكملة