رواية الشيهانة الفصل العاشر 10 - بقلم Shaqraa

السلام عليكم

الشيهانة
الجزء التاسع

طاح الفون من ايدي ورجفت..وهي دخلت
بسرعة وضربتني راشدي احس
خدي افتر..
دفعتني ع الجرباية وهي تعيط..ياادبسيييز
يا بلا تربية....
خليت ايديه ع راسي خايفه..
هي اخذت من الفون من الكاع ورجعت ضربته
وداست فوكه..

رجعت خزرتني وانا رافعة ايديه وارجف..
شجاي تتفقين؟؟؟وويامن هاااا..
احجي لا املخج تمليخ احجييي..
ماما عفية بس افهمج ماما..
شتفهميني؟؟ولج مو كلتي ماعندي علاقة بي؟؟
ماعندي ماعندي بس مرت ابو خابرتني
واول مرة ولله..

شرادت منج؟؟؟
كالت هو يحبج ومايدري خطبوج لخاله
وو وراح يعدي فترة ويخطبج..جنت احجي بس
مخنوكة ببجيتي وحجايتي مكطعة..
وانت ماصدكتي كالت هيج..جنتي منتظرة
واحد يطمن قلبج موووو..
احجي فهميني عدج علاقة ويا لو لا؟اخر مرة
اسأل ..هسه تحلفيلي..

لا ولله ماعندي بي علاقة صدكيني ماما..
ماعندج علاقة ويا بس تحبي!
بقيت ابجي حيل وغطيت وجهي بايديه..
حسيتها تقربت مني نزيت..دغت ع راسي
باصبعها..
خليها حجاية هنااا حجت وتأشر ع راسي..
خليها ببالج ماانطيج اله لو ينشفلج البحر..

من اليوم فون ماكو ..اذا سأل ابوج كليله
طاح وانكسر فاهمة؟؟؟
حجيت وكوة طلعت حجايتي ..ايي..
عافتني وطلعت وهي تستغفر..
وانا بقيت ابجي وكاتمة بجيتي بالمخدة..

بقيت بالغرفة لورا المغرب..
اجت ماما فتحت الباب..
كومي اجت حنين لاهلها..غسلي وجهج
وامشي وحرف من الي صار مايطلع..
اذا حجيتي حجاية زايدة الي غير تصرف..
هزيت راسي وانا صافنة..لاا مااحجي..

كمت غسلت وبدلت ملابسي..
حطيت مكياج حتى اخفي اثار البجي..
بس اصلا امبينة كلش..
مصدومة من الموقف كله..معقولة امي
تتصنت عليه لان جانت شاكة بيه..
زين انا لخاطر حيادر خسرت ثقة ماما..
هو شيعنيلي!منو انت بالنسبة الي ياحيادر ..ااه اه..

طلعت لكيتها تنتظرني بالمطبخ..طلعنا انا وياها
لبيت عمو..
رجعت حذرتني مااحجي شي..
دخلنا وجانو كاعدين بالحديقة ..زين بهادر رايح
بشغل وتالي يرجع عليها..

حضنتها وبوستها مشتاقتلها حيل..ومحتاجة
احجيلها بس ماكدر احجي شي..
بقت تباوع لعيوني وكلساع تسالني شبيه..
كتلها من صعدت الطيارة يمكن ارتفع ضغطي..
بس هي حافظتني حفظ تعرفني قبل لا احجي..

بوكت العشا جانت مرت عمي محضرة
اكل ع مود حنين كايلة الها مشتهية معكرونة
بالبشاميل وبعد اشياء ثانية..
كامت حنين واخذتني وياها..بحجة نحضر العشا..
اول مادخلنا للمطبخ سدت الباب وحجت
بصوت ناصي..

فهميني شبيج قلبي نار عليج ولج..
نزلت دموعي بسرعة..مسحتها بيدها
وجرتني كعدتني ع الكرسي..
دكعدي وفهميني شصاير ولج موتيني..
حنين..حجيت بغصة ودموعي تصب..
انا احب حيادر ..حبوبة ساعديني..

لطمت ع صدرها وحجت بقهر..
احنا ما نخلص من تبن وسوالفه..
شبيج كتلتي نفسج عليه ولج قححححط؟؟
لا تحجين عليه ..
احجي عليه مدام اشوفج تريد تضيعين نفسج..
شيلي من راسج وهو ملتهي يلعب وي الف
وحدة..

راح تخبليني..انت شايفة شي بعينج؟؟
لا بس بهادر شايف كلشي ويعرف كلشي..
يجوز عاف هالسوالف يعني حرام واحد يتووب..
شاها حتى لو تاب..اهله ماينحملون وامه مشوفتني
نجوم الظهر..
عبالج تقبل بيج؟
واصلا انت حجو بيج لخاله ..يعني يعتبر
عار اذا رجع خطبج..

شيلي من راسج انت وين وهم وين ..انت بت
ناس فري...لا ت.. قبل لا تكمل حجايتها..
طكت الكهرباء وانطفت..باوعنا من الشباك
صار طبك والوايرات كلها تجدح..
طلعنا ركض واحنا مرعوبات..
ومحد بالبيت بس نسوان ..

خابرت ماما ع حسن جان توة جاي
من الشغل..ومحمد طالع ..بابا وعمو راحو
بواجب..
اجه حسن كال مضروبة المحولة مالت
المنطقة ولازم يخابرون اهل الكهرباء
حتى يصلحوها..
بقى يمنا تالي ماما كلتله روح اسبح ارتاح
هسه جاي من شغلك..احنا نبقى برا ماعلينا
شي..

بقينا بالحديقة وصبينا العشا كعدنا
نتعشى..وماما تخزرني كلساع..
عينها مرة الي مرة لحنين..
واحنا ناكل اندك الباب..
كامت مرت عمي تريد صاحت منو..سمعنا صوت بهادر..
كمت لبست عباتي ولفيت الشال وكعدت..
وحنين كامت وكفت وتعدل بنفسها..

فتحت مرت عمي الباب ودخل بهادر..
احنا فاتحين اللايت وضوا قليل..تقرب يمنا
سلم ..السلام عليكم..جاوبته ماما وعليكم السلام..
يلا حنين استعجلي ورانا طريق..
هي طفرت بسرعة تلم اغراضها والهدايا
ملاتها جانن ع الميز..

تذكرت ماجبت هديتها..باوعت لماما..
ماما نسيت اجيب هدية حنين اروح اجيبها
هسه عادي؟
روحي تردين اجي وياج؟
لا انا بسرعة اجيبها ..بس اريد ..سكتت وتالي كتلها
اريد لايت..
هي تذكرت ماعندي فون
وانطتني فونها..

وبهادر عيونه ناطه ويخوزر جنه سميغل..
انا اخذت اللايت وميشيت بسرعة..
طلعت وصارت بوجهي سيارة
حيادر بالباب..
هو بس سديت الباب صارت عينه عليه..
فتح باب السيارة ونزل بسرعة..

انا جمدت بمكاني ..بقيت اباوعله..
دشداشته بيضه ولابس جفية لافها ع راسه
وي نظراتي عليه ..نبضاتي تسارعت..مثل
اليصعقو ونبضاته تصعد بالتدريج..

هو بقى واكف يم الباب مالت السيارة وينلفت
خاف اكو احد بالشارع..
بس جان الشارع فارغ وشبه اظلم..
لان حتى مولد مايكدر يفتح ..صارت فيز وفيز..

انا مشيت بسرعة لبيتنا..دخلت ركض..
بس قلبي يريد يوكف..
امشي ومبتسمة ناسية حتى الدنيا ظلام
وانا اخاف من الظلمة..
دخلت لغرفتي جبت العلاكة واجيت..
وببالي من اطلع هم راح اشوفه..
استعجلت بطلعتي وركضت بسرعة ..

اول ماطلعت جان واكف قريب ع باب بيت عمو..
باوع وتلفت للشارع..رجع باوعلي..
من تقربت يم الباب ..جر ايدي حط بيها
ورقة وهمس..احبج يمدللة كلبي..

انا جريت ايدي وبسرعة فتحت الباب..
بس ساندة نفسي بالكوة..ايدي لامست ايده
بس روحي ذابت ..قلبي احسه طاح ..
مدري شلون مشيت ووصلت يمهم وهم واكفين..

انطيت العلاكة لحنين ..اخذتها وودعتني وشكرتني..
بس مانتبهت شحجت شكالت..
طلعت هي وبهادر ومرت عمي وهند وراهم..
امي جرتني من ايدي يمها..بس شديت
ع الورقة البيدي خفت تشوفها..

شبيج بس تصفنين خليتي الكل ينتبه شاها..
تعبانة ماما اريد ارجع انام..
تريد تحجي ومرت عمي سدت الباب وكالت
لا ترجعون الا تجي الكهربا..وحشة نبقى وحدنا..
اقتنعت ماما وكعدنا..

بس بالي مو وياهم..مشى وي حيادر
وراح..
نبهني صوت هند..شاها شكلج طافي كومي
نامي بالمرجوحة..
لا هسه شوية ونروح اريد انام كلش دايخة
ونعسانة.

بقينا لحد مااجه بابا وعمو وكالو جاي
يصلحون الكهرباء برا..
ورا ساعتين يلا كملوها واجت ..
رجعنا للبيت..وماما تسال حجيتي لحنين شي..
جاوبتها لا..
بس ردت ابقى وحدي..

اول مادخلت لغرفتي..عيرت ملابسي
ودخلت بالفراش وتغطيت..
والورقة ماقتحتها اختف الا اتأكد ماما ماكو..
بقيت جوا الاطا شوية..هدأت انفاسي..
فتحتها جانت ورقة مال دفتر ملاحظات
صغيرة..

مكتوب بقلم حبر اسود..لا تصدكين
باي شي ينكال عني واخذي الحجي
بس من امينة..
احبج شيهانتي.. هذا رقمي من تستعدين
حاجيني..

ضحكت بخفة..شيهانتي شنو ههه..مجرد كم كلمة
كلبت مزاجي وكمت ابتسم مثل الثولة..
بس ليش يحذرني اكيد يعرف جاي
يفهمون حنين هو راح يخطب وهي تكلي..
اوووف شجابني لهذا العذاب انا ..اباوع لرقمه
واغمض بامل..

افكر لو جان فوني عندي اخابره!
لا مااخابر صح قلبي يدك اله..
بس مااحاجي ولا اريد علاقة
انا وعدت امي مااسوي هالشي..

طبكت الورقة وكمت ضميتها بجيب السترة المعلكة
بالكنتور..
رجعت غمضت عيوني بس بارتياح..
شوفته بلحظات قليلة نستني الصار كله
ورزالة امي والراشدي..
دقايق ونمت نومة عميقة..

كعدت الصبح ساعة ب١١ ..طلعت من الغرفة
غسلت ورحت للمطبخ..
امي واكفة تطبخ الغدا..
صباح الخير..
صباح الخير..حجتها بتنهيدة..وباوعتلي..
شلونج اليوم؟
هزيت راسي ..الحمدلله ..

حطت القوري ع النار واشرتلي ع الميز..
حضرتلج اكلج كعدي ع مايحمى الجاي..
كعدت ع الكرسي وصفنت..
شوية صبتلي جاي وجايته ..كعدت كدامي
وتباوعلي بقهر..
قسيت عليج هواي بس مصلحتج اهم..
انا باوعتلها وطاحت دموعي..
كامت حطتني راسي ع صدرها وهي واكقة
وتبقت تبوس بايدي..الله يكسر
ايدي ولا امدها عليج..

للحكاية بقية
بقلم شقراء(قمر كانون)

ياناس الوقت قليل وماجاي الحك اكتب😭😭صرت مثل
الحكومة كل يوم قرار..
اليكم القرار الجديد ..يومين اكو بارت ويوم ماكو..

تستاهلون 😈😈

امبين صوت الوالدة يخوف ههه

🤣🤣استغفر الله امج خوش تحشش

لا ترى بسيطة بس لان تقرون واعصابكم مشدودة تصعب عليكم
اقروها بتمعن وتشوفوها محلولة