رواية الشيهانة الفصل الحادي والخمسون 51 - بقلم Shaqraa

مساء الورد

الشيهانة
الجزء السابع والاربعون

دخلت للحمام فرغت معدتي كلها بالمغسلة يلا ارتاحيت..
بحيث من خلصت بلا وعي كعدت بالكاع..
وامينة يمي غسلتلي وجهي وتسمي بسم الله
وتصلي على محمد وال محمد ..
شوية جريت نفس وحاجيتها..اريد ملابس فدوة
بس اشطف جسمي وابدل ذن انتلفن..
اي يمه بعيوني هسه اجيبلج بس لا تقفلين
الباب لا يصير بيج شي
ومانكدر نفتحه..
لا لا راح ابقي مفتوح..حجيت بتعب..

وهي راحت بسرعة جابتلي ملابس
واجت ركض..
انا كمت وسندت نفسي ..رادت تبقى يمي
كتلها لا تحسنت ..
بس شطفت جسمي ولبست ملابس وطلعت..
بس فتحت الباب لكيت امينة مدنكة بالارض
تمسح..
شافتني واجتلي بسرعة..ها بيج تمشين..
اي اي بيه لا تخافين علي..
ماكدرت اطب واعوفج سويت روحي امسح بالكاع..
حجت وهي تدخل وياي للغرفة..

فدوة لعمرج ماتقصرين بس مابيه شي مساع
لان انعصرت معدتي انهد حيلي..
صايرة تحجين مثلنا ..
ههههه ياجمال حجيكم ..وام عادل وسارة سالوني
شبيج كتلهم لعبت نفسي..
بقو يباوعون بابتسامة..وحجو بصوت ناصي..
بيها الخير انشالله بشارة خير..لا تبينين كدام احد..
عرفت حيادر حتى لامينة ماحاجي ..سكتت..

وماخلوني اسوي شي بس يسالون هذا وين نخلي
وهذا تردي لو نعزلة وهيج امور لحد ما عزلو
الغرفة كلها..
مابقى بس السرير مفروش ..باوعتلي امينة وضحكت..
نشيل فراشكم والليلة نزلو نامي يمي..
هههه لا هو بقى بس الفراش نشيلة الصبح..
الله يسعدكم يمه..يلا احنا ننزل خيصعد حيادر
يرتاح باجر وراكم تعب..
شكرتهم هواي وهم بوسوني ونزلو..

رحت تمددت بالفراش لكيت ماما مراسلتني
تتطمن ..جاوبتها وطمنتها..
خابرت حيادر ماجاوب..يمكن كاعد بالديوان..
خليته براحته واخذتلي غفوة لان نعست كلش..
احلام مزعجة ومتداخلة كل شوي افز..
اخر شي فزيت بعيطة وي ماحيادر فتح الباب..
اجاني بسرعة مستغرب..

اسم الله اسم الله شبييج؟؟
ها مادري حلم ..جاوبته بس بعدني شبه واعية..
انت منين وين..
هو باوعلي متعجب..ضربني بخدي حيل..فزيت..
اسم الله شيهانة شبيج..احد غثج؟؟
ها حبيبي لا لا بس كوبست..حجيت وانا افرك بوجهي..
اي لان تفكرين احلامج تخربطت..
ايي حجيت وانا اتثاوب..وين رحت تاخرت ساعة ب١١ ..

رحت لبيتنا انا وولد عمي..
اي اكول خابرتك ماكو..
اي ماجان يمي التلفون ودكيت عليج مارديتي..
خابرت امينة كالت نزلنا من يمها خلصنا شغل خاف
نامت..
اي نعست كلش..انت متنام باجر نكعد من وكت..
انام؟مشتاكلج شيهانة شلون انام..حجه وهو يتقرب عليه..
حبيبي بليز نعسانة..

هو مد راسه وراي باوع..تالي اندار وباوع منا ومنا..
سالته ببلاهة ..شتدور!
ادور امج يجوز يمنا بالغرفة وماادري..
اووو عاد شعليها مسكينة..
ابدا ابدا معليها..حجه وهو يجرني لحضنه وينام..
وبقينا نسولف لحد ماغفينا بسرعة..

كعدني يوم ثاني بالستة..كام قبلي سبح ورجع بسرعة..
يلا لبسي وتحضري وروحي جوا يم امينة ..راح
يجون الولد ياخذون الجنط..
اي بس اشيل الفراش مالت السرير..
يلا شيلي عندج مكان؟
اي بجنطته ارجعه ..بس الغرفة شلون هسه هم
يفتحوها؟
اي لا يظل بالج بس استعجلي..

واخذ جنطة نزلها ..انا الصبح عندي الغثيان قوي
كلش..
رحت للحمام بس فتت استفرغت شوي ارتاحيت
وطلعت..
بعدها  لبست ونزلت..
عمو وخالة كاعدين بالهول..صباح الخير..
هلا..حجو ثنينهم..
لاكاني حيادر كتله رح اسويلك ريوك ماقبل
كال امشي هناك نوصل وسويلي..
وصاح لولد عمه ثنين سلموصعدو وياه فوك..

انا اريد اروح يم امينة وصاحتلي خالتي..
وين مولية جا تطلعين بلا ماتنظفين...
خالة بعد شنو انظف انا رايحة لبيتي ووراي
هواي شغل..
عوجت حلكها وحجت تقلد علي..بيتي وراي
هواااي شغل..كرفة تكرفج ..صار عد ام طيرة
بيت وكامت تضرك ورا..
شكراً خالة..

وخلخالة تخلخل عظامج مسوية روحج فقيرة
جا ياهو ركعني بالعجين..
خالة جنت منهارة ونفسيتي تعبانة وماخليتو بيه
شي..
والا جنت عايشة وساكتة ومحترمة الكل بس
انتو اذيتوني بكلشي..
خايبة انجبي ام حلك الفالت ام براطم عاب
هالويه..خوش خالة تفرن بيعبجن جدام الزلم
وتخلنهم مهوهين..
صارت حجايتها بنزلة حيادر وولد عمه..

انا استحيت كلش فلت وجهي وخصوصا جان
صوتها عالي..
مشيت بسرعة اريد اروح وحيادر والولد
نزلو ..هي عاطت حيل..
وين مولية مو جاي انعثل لو كلش لا احترام
لا تقدير عدج..
رجعت درت عليها..الولد طلعو بسرعة
وحيادر رجع..

شكو شصاير من الصبح؟؟
انهد بي عمي الي جان ساكت من مساع لهسه..
وتسال شصاير؟؟شوف مرتك تريد تطلع بلا ماتنظف
البيت..
ههه يبا جا گلة بنات هنا شني..
البنية رايحة لبيتها ووراها شغل هناك..هذا بدل
ماتدعولنا يتسهل امرنا ..عرضتونا من الغبشة..

المن نندعي بعد..هي بسحورتها لطمتك لطم
شلك بالدعاء..
وكملت خالتي..خلي خلي راكض وراها..
مايكول طكت امي ومشعتها وطيحت شيلتها..
هالحجي انا صافنة عليها تحجي وتلفق احترك
دمي بس ماكدر ارد بوجود حيادر واتجاوزه..
جاوبها هو..شحدها تسوي هيج..اكسر ايدها
اذا تمدها عليج..
ولو ادري بيها معدلة واصيلة وماتسويها..
بس يمه تتبلين عليها هم حرام..انا ادري بالصار
كله..

اي طبعا بس تجي تتلكاك وهيج كالت امك هيج
كالت مرت اخوك..
يمه من خذيتها لليوم ..تتلكاني بمبسم ووجه ضاحك
والله يساعدك..
لا اشتكت عليج ولا على غيرج..
عشتووووو حطت وجهها بوجهي وعاطت..
خايبة فلك الفلكج عدمن ساحرتله كليلي عدمن..
هو لزمني من ايدي..روحي كدامي تانيني
جاي وراج..

اريد اطلع ودخل جابر حاجه حيادر..
تعال شوية يريدك فهد..
باوعلي كال شوية وارجع ..وراح طلع وي جابر..
انا رحت للمطبخ انتظره ماريد ابقى يمها..
لكيت نهاية جاي تغسل مواعين..ومناك خالتي
عاطت وكبت بالصياح..
عساج لا تهنيتي بالبيت عساج لا فلحتي..كون
يشب بيج وينطفي ..كون صاجعة تطيح عليج
وتحركج:.
خوووش الجهال والزعطة حطتلها بيوت..
امدااا.... ما لحك ربعه..

وهي تصيح وتغلط ونهاية تضحك..
شوية ودخلت حنين..
الظاهر هي ونهاية متعاركات..اجت تباوع
بحقد وفتحت الثلاجة..
عووووع شنو هذا التشريب منو كالبه هنا..
نهاية اندارت وتضحكلي بخفة..

اكلج خية ..ماتكليلي عدمن سويتي اريد اسوي
واهج منا..
شنو سويت!!؟
السحر حبيبة ..جا تردين تقنعيني طلعتي بيت
بحدج هيج بلا سحر بلا عمل..
عزيزتي اذا هذا طريقج ومتعودة عليه..شي
يخصج..الحمدلله ربي وياج ومااحتاج اي سحر..
هاااا جا خاف ظافيرج جابن نتيجة ههههه
مدري هذا الخيط مدري هذا مال سعاد حسني
صدك طلعن ذن السوالف تنفع..من باجر
اوصي اختي تجيبلي بلكي الحكج..

استغفرالله..ترى النظافة اهم شي نهاية..
الرجال لا تلزمة خلفة ولا شي..نظفي قلبج
بلاول ولسانج..
وبعدها جسمج وهندامج وشوفي شلون مايحترمج..
عفتها قبل لا تجاوب وطبعا حنين جانت تصب جاي
وتباوعلنا..
طلعت بالحديقة وخابرت حيادر..
بسرعة اجه..

رجع جاب جنطة الفرشة جانت بالحديقة..
حطها بالسيارة وصعد..
اول ماصعد حاجاني..خو ماصار شي؟؟
لا مو شي مهم عادي..
زعلتي؟؟؟
منين!
مساع من حجيت وي امي وكتلها اكسر ايدها
اذا تمدها عليج..
بس انت كتلها اعرفها معدلة وماتسويها..
بعد عمري الله يكملج عقل..

خو مالعبت رومج؟
لا من كعدت فرغت معدتي ارتاحيت..
سودة عليه ..بس نرتاح من هوسة البيت ونفضها
نراجع الدكتورة بلكي تطيح حبوب شي..
الله يسهل ..
مشت السيارة وابتعدت عن البيت..الي تمنيت
بعد ماادخله نهائياً..بقيت اباوع ع الطريق..
جانت مسافة مو بعيدة كلش..وصلنا لبيتنا
بسرعة..

شفت يم الباب سيارة بابا ..فز قلبي وسالته..
حيادر مو بابا سيارته!!
ههه كامت ماتجمع ..اي جاب امج وهاجر حتى
يساعدنج..
صدددك....
وكف السيارة ونزع نظارته..اي نزلي وتاكدي
شبيج جنج ماشايفتهم سنين..وانا مسيجين البارحة
نمت جوعان..

نزلت ويا ومبتسمة..حياتي انا مااكتفي بالشي
البسرعة..اصبرلي بعدين وشوف..
فتح الباب ويحجي بهمس..بعدين افرجج
ع البيت كله وغمز..
دخلنا نضحك..فتح باب الصالة ودخل ..كام بابا
ويسر بحضنه سلم على حيادر وبوسني ..كال
امج وهاجر جوا يرتبن اغراضج..
بقى حيادر يمه وانا فتحت الباب ودخلت..

صباح الخيير .كامتلي ماما حضنتني وتبوس بيه
وتتطمن..وسلمت ع هاجر..
باوعت للغرفة مستغربة..اخشاب جديدة وتجنن..
ها حلوة؟
منكم؟
اي من ابوج..
بعد عمري الله يحفظكم بس تجنن نازكة..
يلا تعاي دلينا وين نخلي اشياءج..

شوكت لحكتو ع الجنط هههه قبل شوية اخذوها
الولد..
اي هم خوال هاجر جابوهن قبلكم..وكعدنا نريد
نرتبهن..
كعدت وياهم وماخلوني اتحرك هواي لو اروح
وارجع ..
فرغورالجنط كلش وفرشت انا السرير والتحف والاشياء
الناعمة رتبتها..
وكملنا كلشي ..

طلعنا والبيت اباوعله يلمع..حيادر وبابا يمكن
بالاستقبال لان ماكو بالصالة..
رحنا للمطبخ وسالت لماما وحجيت..
يعني مو بس غرفتي منظفتها حتى البيت؟
هو بيتج نظيف ماما ماتعبنا قليل ..وانا وهاجر
تعاوننا وكملنا..

حياتي ماماتي يعني ماخليتوني اتعب انت وهاجر..
امج واختج وحقج علينا نساعدج..يلا شوفي ابوج
حتى نرجع..
لا لا ابد ماكو ماترجعون..تغدو يمي..
عود تعلمي ونجي نتغدا يمج..هسه شتغدينا
بيض سلك..
ههههه لا انت تساعديني..
بعد ماكو مساعدة بالطبخ شدي حيلج كابلي اليوتيوب..
بلة شوفي ابوج وين ..

رحت للاستقبال لكيت بابا وحيادر كاعدين يسولفون
ويسر يلعب يمهم..
طبعا اولد دخلتي للاستقبال ابتسمت وهو ابتسم..
قرا افكاري..
كلت لبابا ماما تنتظرك..والظاهر حيادر عنده
علم بروحتهم لان مالح ع بابا يبقى..
طلعو وياي للصالة..
ماما كامت وحيادر سلم عليها ..بس حسيت ثنينهم
سلامهم بارد..
واصلا هم ماالتقو من يوم صار الحجي من رجعت
من الدكتورة..

بعدها اخذهم بابا وطلعو..حيادر طلع وراهم برا..
وانا رجعت جوا..بطني مغصتني كلش ..
ماكدرت احجي كدمام ماما لا تقلق..بس احس
بطني فارغة وتاذيني..
فتحت الثلاجة بيها بس كاسات ماي وعصير..
اخذتلي بطل وفات حيادر..
ها كليلي بعدج بلا لكمة مو؟؟
اي حبيبي نسيت اكل وانت؟
انا كليت لفة جبن ..شربي عصير يكض معدتج
على مايجي فهد يجيب المسواك..
فهد دزيته يتسوك!
اي شمالج متعجبة غير ولد عمي اخوتي..

باوعتله وانا اتجول بنظراتي..حبيبي سؤال..
نظراتج خطرة سألي..
هو فهد الي لزم ابن خالتي صح؟
اي وشذكرج بي؟؟
من حجيت بفهد تذكرت الشغلة..وهم انت مافهمتني
عدل..
هو صدك لكو عليه دليل؟
اعترافاته اكبر دليل..
وقبل الاعتراف..؟؟

صفن بوجهي وتنهد..شوفي يابت الحلال..
بيوم الانطيتيني عنوانه..خذيت فهد
ورحتله..
اول شي بس انا حاجيته..امبين من شوفته خنيثة
ومدلع وبسرعة يجر بوش..
لن من عرفته عني كام يمسلت ويجيب ويرگع
بالحجي..
بسرعة عرفته هو الداس بيتكم..

انطيت خبر لفهد وجاب امر القاء قبض وخذو..
بحجايتين هناك كت كلشي..
هو الطلع عليج الحجي بالجامعة وهو الطفر
على بيتكم ورا ماوده امه لفاتحة خالج..
وبت عمج مسهلتله الامر ومتفقة ويا وكايلة لاختها
تطفي الكاميرات..
وشكد محاول وياج وانت معاملته بكل ادب..
هو صح خنيثة وبسرعة كتهن..بس من ناحيتج
ماجذب ..
واعترافاته تسجلت وانرفعت قضيته وانحكم..

ساعتها كلت اجي لاهلج لا بت عمج واخوي يدبرولج
سالفة وتنفر عليج..
اجيت وحجيت لابوج وتطمنت عليج يلا رحت..
والباقي يمج تدرين بعد..
اووف عساها لا تنعاد ذيك الايام ..
ولت وصارت ماضي..واهم شي شيهانتي وكرت
يمي..

حجه وهو يقربني اله..مساع ليش ضحكتي من
طبيتي للاستقبال؟
غمضت بابتسامة..تذكرت..
انا هم تذكرت واريد اعيدها..اخذني بحضنه
ويمشي ويشمشم..
فتنا للغرفة واحنا مندمجين بالعناق والشفاف اخذت
حصتها من بعض..
خلاني ع السرير ودك الفون مالته..

كام بسرعة لان فهد اجه جاب المسواك..
راح دخل المسواك هو ويا وانا انتظرت فهد راح..
وحيادر طلع وراه..
طلعت بسرعة..اريدلي شي اكله تاذيت..
لكيت علاكات هواي وصينية ملفوفة ع جهة..
فتحتها تمن وعليه لحم وحشو..
حطيتها ع الميز وكعدت اريد اكل..

دخل حيادر شافني كاعدة..اي زين اجيتي عود رايح
اصيحلج..
لا جابتني بطني ..منين هذا؟؟
من بيت عمي يدرون مافارغين نطبخ..حجه وكعد مبتسم..
هههه عاشت ايدهم انا ماتحمل رح اكل هسه هو
ريوك وغدا...
اي اكل راح ياذن بعد دنيا ظهر..
وكابلني وكعدنا اكلنا ..
ورا ماخلصنا كال اريد جاي كتله علمني شلون
اسوي مضبوط..
ماقبل طلع القوري وهو سوا..

طلع برا يدخن وانا وزعت المسواك كله ورتبته..
رجع هو صبله جاي وراح يصلي ..
وانا كملت ورحت صليت وخلصت..
هو متمدد يباوع T.V..
ورا ماخلصت تمددت يمه..
شكله نعسان وامبين تعبان..حاجيته همس..
شعجب ماكتلي اهلي اشترو غرفة..
خليتها مفاجئة الج ..
وغرفتنا وين توديها؟
انطيها للفلاح البشرني بالرزق..يعني بشرني
بيج..
اي بالعافية عليه..

واحنا نحجي غفينا..كعدنا ع صوت الجرس والباب
يندك..
بسرعة كام حيادر وانا كمت ..سمعت صوت
خالتي وهوسة..
غسلت ولبست وطلعت..
جايين الكل اخوانه وخواته وعوائلهم..
ساعة ب٣ جانت..خالتي كالت فلشنا الباب تفلش
جا شنهي موتة..
لا خالة تعبنا ونمنا..
اي اي حككم ..حجت وهي تعوج حلكها..

وبقو تقريبا ساعتين بين حجي امه واخواته
الي يحجو بالوجه شنو حطلج بيت وبعدج
بنت اليوم ولفلفتي وطلعتي..وماسكتت ع اي كلمة
تنكال اجاوب بالمثل..
لحد ماراحو واجه حيادر لان جان بالاستقبال يم
الزلم..
سالني خو ماصار شي كتله لا..
زين ماحجت كدامج نهاية شي؟
مثل شنو؟

ع مود سارة يردونها لهذا ابنهم ..جابر كال
دام غرفتكم فرغت نزوجهم بيها..
واهي مادري شحجي بس مايصلحلها..
فقيرة وطيبة وهذا نذل بس ادري بي يريدها..
زين هي ماتريده انتو ليش تجبروها؟
ماخليهم يجبرونها..

اي عفية خطية اصلا طفلة شنو هيج تنجبر كلها
١٥ سنة عمرها اشافت من حياتها وتتورط ببيت
واطفال..
لا نشوف الموضوع بعد..كتلهم باجر امرلكم انا..
اي اهم شي تصير بصفها تدري شكد الك اجر لو
نصفتها..
باوعلي وضحك..شبيج تتراجفين مو انت راح تنجبرين
ترى..
ههه لا خطية فقيرة سارة احبها..

ويل حالي جا انا محد يحبني..
ماكو محبة هسه رح يأذن..شنو اسويلك عشا؟
انا هسه شبعان ..تدرين ليش؟
لاول مرة اكعد يمج مأمن ..لا تهد علينا امج ولا
تجرفت علينا تبارك..
هههههههه قافل الباب؟؟
لا شني جايتنا نهابة واقفله..بس طابكة..
لعد قفلة لا يجي..بعدني مامكملة واندك
الجرس..

راح يفتحه وهو يسب ويضحك..انا بسرعة
فتت للغرفة اريد اخابر ام عادل اتطمن ع سارة..
جاي ادك عليها وفات حيادر..
حضريلنا صينية اجو ولد خالي..
كمت رحت للمطبخ وانا اخابر..جاوبتني ام عادل..
سلمت عليها وبقيت اماطل بالحجي لحد ما
حيادر يجي ع الصينية..
كملتها واجه اخذها..

رجعت للغرفة وسولفت وياها بموضوع سارة..
كالت اي حجو وكتلهم بعدها مابلغت شلون تتزوج..
ورادو ناخذها لدكتورة..وبيبيتها كالت انا اروح
وياها ..عاد كلت ناخذها لدكتورتج بس فهميها
حالتها دامها من معارفكم..
اي بسيطة بس شوكت تاخذوها؟
باجر ناخذها انا وعمتي..
يعني شنو وافقتو!؟
لا بعد بس كالو لازم نشوفها شني علتها كبرت
وماجتها..
اي بسيطة انا اخابر الدكتورة وافهمها..

شكرتني وبقت تدعيلي هواي وسديت الخط
منها..
وحمدت ربي هواي ع عقلية حيادر المتفتحة
ويتفهم الامور مو مثلهم..
واحس متطمنة هو راح ينصف سارة..بالذات من حجه
عن ابن جابر عنده سوالف تعبانة..
حسب كلام حيادر صح يحب سارة بس شوي ماشي
بطريق تعبان..وهي طيبة وماتناسبه..

ورا ماراحو ولد خاله انا جنت اصلي..
دخل شافني اصلي طلع صلى بالصالة وتمدد
ع القنفة..
طلعت حضرت جبن وخضروات اشياء خفيفة
وتعشينا وكملنا..
اجو يمه ولد عمه وراح يمهم ..طبعا الاستقبال مالتنا
صاير بيسار البيت يعني زاوية..
شبه معزول وحتى من اطلع بالطرمة ماانشاف..
لان حيادر خطاره مايخلص وبالذات اولاد عمه..

ورا ماراح يم اولاد عمه ..رجعت لغرفتي وانا
مفرفشة واحس بحرية وارتياح ما وراي احد يحاسب
اي تصرف مني..
شطفت جسمي ع السريع وخليت ميك اب ناعم ..
اختاريت ثوب ابيض شفاف والتعاليك مالته كرستال..
ثوب جريء فوق الوصف..
كعدت ع السرير اباوع فلم وطفيت الاضوية..

ورا وقت هواي يلا دخل حيادر للغرفة..
شافني متمددة ع النص..صفر صفير متواصل وبلحن..
تقرب مني وهو يعض بشفته متحلف..
بحركة خاطفة شفته يمي..وشفافه حضنت شفافي
بلهفة ..
ايديه الي بقت تعبث وجسمي يشجعها تستمر..
انفاسه الحارة تزيد رغبتي بي..

تعالت ضحكاتنا وهمساتنا وصرخاتنا سوا..
مثل الي ملتقين بعد سنين طويلة ومامصدكين..
يمكن نفسيتنا الي ارتاحت خلت قوتنا الحقيقة
تطلع ورغبتنا الحقيقية تتطبق بالواقع..
حسينا كلشي مباح النا والمحروم اذا شاف شي
مباح ماينطي قلبه يستراح..

من بعد رحلات طويلة وتعالي الاصوات..
هدأت انفاسنا وبقى بس الهمس..
شي اشبه بالثمالة..بس ثمالة مشروعة ومابيها
منكر او ممنوع..
لكيت نفسي نايمة ع صدره واحجي بسكر..وهو ايده
بشعري ويمدح ويتغزل ويشاقي بهدوووووء..
ونمنا بارتياح ..

للحكاية بقية
بقلم شقراء(قمر كانون)

ربي يشافي ويعافي هو وكل مريض بحق محمد وال محمد عليهم السلام..بنات والدها بي كورونا ادعوله بالشفاء ولكل المرضى

دعموها عزيزاتي علقي حتى يلكون حسابج

دعموها حبيباتي ..علقي حتى يلكون حسابج

طشي عيني طشي تستاهلين