رواية الشيهانة الفصل الثاني والخمسون 52 - بقلم Shaqraa

مساء الخير الجزء الثامن والأربعون الشيهانة فزيت الصبح، حيادر ما موجود بالفراش. باوعت الساعة سبعة إلا ربع. أحس معدتي فايرة مختنقة، بسرعة قمت للحمام. ارتاحت معدتي واستقرت، بعدها سبحت وطلعت. لبست ثوب قصير وبلا ردن. طلعت حيادر مو بالصالة، رفعت البردة شفته جاي يرش بالحديقة. هو بيتنا من جان قديم قبل لا نشتري، بي نخلة وورد يسموه جهنمي وكم زرعة صغار. ما أقدر أطلع لأن ملابسي مكشوفة، دقيت الشباك. وهو ذب الجكارة وراح طفى الماي

ودخل. صباحو حبيبي. صباحج ورد، وجهج يضوي اليوم. مرتاحة حيل، شنو تتريك؟ عساج يبعد أهلي، أنا سويت الجاي وسلقت بيض، أنتِ كيفج شتردين سوي. أوكي أكل وياك بيض، علمني أسوي جاي بليز. سكتي لا تذكريني بجايج. هههه السويته الكم بخطوبة اللي ما تتسمى. أي ههه، أباوع الوادم لسانها ثقل خفت يجطلون يمكم ونبتلي. مو جاي تكول جنة كريز. ههههههه ترى مزقتني، هو شوي ثخين جان. ولج يا ثخين غير إذا زفّتت بي جسر الكزيزة يضل عمر.

أي بعد بعد سويني كلشي ما أعرف، حجيت ويرطمت. باوع لشفافي وضحك، تعاي شو يمي عندي سالفة وياج. لا عيني مشكور، امشي نتريك، صدك تروح للشغل مو؟ أي أروح وأنتِ رجعي نامي ارتاحي ما عندج شي. دخلت للمطبخ وأنا أحجي ويا وأصب، شنو عاجبك تتغدا؟ خبز وماي. لا صعبة حبيبي شوف غيرها. ها جا تدبرين غير أكلة. باوعت له ما قابلة، نزل كوب الجاي من حلكه وضحك. أتشاقى وياج شيهانتي شبيج، عادي سوي أي شي ثلاجتج عامرة وشتردين يمج.

أوك اليوم أكابل اليوتيوب وأضبط لك أكلة. أي وأنا أجيب روب بدربي، عاد صار ما صار أكل تبن وروب. يبووو أبقى حشش أبقى. وبقى كل شوي يذب لي حجاية ناصب عليّ. خلص ويدل وقبل لا يطلع للشغل وصاني. راح أطلع بابج قفلي وأي شي تحتاجي لو يصير شي خابريني وإذا ما جاوبت خابري وليد. ويمج عبر بيتين أهل جنة بيت عمي وهم قرابتنا. أنا موصيهم عليج. لا تخاف حياتي أمان ما عليه شي، باسني بكصتي وطلع. قفلت ورا الأبواب وفتت جوا ما نعسانة، نظفت

البيت تنظيفة خفيفة لأن ما بي شي. احتاريت شطبخ وأنا ما مجربة، قلت أبدي بالبسيط. سلقت فاصوليا ولحم، من وقفت ويا ماما بالمطبخ جنت أحفظ بس ما أطبق. ع اللي أتذكره واليوتيوب مشيت شغلي. وهم ماما خابرتني وسألتها وشرحت لي. لحد الظهر انسلكت وطبختها بس طعمها حلو حسبته. أجه حيادر الظهر وتغدا وقام يحارشني يكلي مو أنتِ طبختي وأحلف له ويضحك هيج يريد يغثني. بس كمل أكله قال رايح أشوف سالفة سارة.

راح وحدة ونص تقريبًا، أنا فتت تمددت وخابرت الدكتورة ع مود سارة وأخذت منها الأوكي وخابرت أم عادل قلت لها بس روحوا هي تعرف سارة أصلًا من راحت وياي. لأن أنا ما خابرتها تذكرتها قالت البنية أم البرقع. أخذت لي غفوة تقريبًا ساعة، فزيت ع صوت الجرس. قمت لبست عباية وحجاب ورحت أفتح. من ورا الباب صحت منو؟ صوت نسوان قالن احنا أهل أم منذر، عرفتهم من طرف خوال حيادر. فتحت الباب ودخلوا، مرت خاله اللي خطبني وياها

مرة ثانية أكبر منها وجهال وياهن خمسة، سلموا عليّ ومن وراهم جان خال حيادر موجود. وهو مدنك سلم عليّ وبارك ع البيت وراح. سديت الباب وأباوع لمرته نظراتها تريد تفترسني. تفضلوا فوتوا، فتحت الاستقبال ودخلوا. وفتت للمطبخ أخذ صينية ماي ورجعت يمهم. بس قعدت حاجتني مرت خالهم الثانية، شني تخمج أبيض خية وين يكايش ويا الوسخ. لا مو كلش أبيض هو أوف وايت ما يتوسخ بسرعة وهم احنا قليل محد يوسخ.

من يمها حجت مرت الصغير، عونج خلصتي من العقربة الرقطة وطلعتي. بعد الاستقرار حلو والحمد لله الله سهل، جاوبتها بابتسامة. جاوبت الثانية، خنشوفه بيتج بلا خو ما عندج أحد. لا تفضلوا محد موجود، قمت قدامهم وأجوا وراي والجهال ركضوا قدامي، وحدة من البنات الصغار التفتت عليّ، خالة صدك عندج قراصيات ذهب؟ إيي عندي وأنتِ من تكبرين يشتروا لج لأن هسه أنتِ بنوته عنونة وأخاف يضيعن منج لو اشتروا لج.

دفعتها أمها وطاحت ع وجهها وذيح كملت مشيتها. دباع الزفرة تريد قراصيص، دمشّي خية خنشوف. قامت الطفلة ركضت قدامنا واحنا دخلنا للصالة. بقوا يباوعون للصبغ حجت مرت الصغير، خية حيطانج ملح خو أسوي أزبري شظري أشخبطه أزخرفه. لا هاىء أحسن مريح للعين. أخذوا راحتهم تفرجوا هسه أجي. رحت للمطبخ جاي أحضر لهم عصير وفاتوا أخذوا العصير والكيك أكلوا وكفة وبقوا واقفين بالمطبخ ساعة يمدحون ساعة يذمون.

لحد ما قالوا ورانا روحة لبيت أم جليل يقصدون جيراني أهل جنتهم، سلموا وطلعوا. للساعة بثلاثة رجع حيادر، سألته عن سارة. قال راحت وي أمي وأمها للدكتورة، وشنو اتفقتوا؟ اتفقنا ما ننطيها إله، ونخطب له بت خالته. أي هيج من الأول بعد شنو. هو غير كوة اقتنعوا كل ما لزقها من باب يفتكها بهادر من الثاني. هذا مسيلح يريد يزوجوهن ومنا مرته تحش براسه تريد تخلص منهن. أي أعرف حتى بوقتها هاجر خطية، زين شلون اقتنعوا؟

حاجيت أبوها بحدنا، قلت له كلكم تدرون بي دربه أعوج ويدور نسوان، ليش تورط بنتك وياه؟ وحتى لو ظلمها ياهو ينصفها؟ عمها ومرته واحد أخبث من الثاني، ليش تكسر ظهرها وتظل طول عمرها تدعي عليك. عاد قلب أنت أحجي أنا محد يسمع لي. قلت لهم خاف بلوغها يتأخر لو تطلع مريضة، شوف بنت خالتك أنسب إلك، وأنت بكل الأحوال ما تفيدها. وحجاية منا حجاية منا، قلت له لا تلح زيادة، خاف عبالك تأخذونها كوة، أنا عمها وشك حلك اللي يجبرها.

سدوا موضوعها وامشي بفالك، لا تشيع عليها نهوة وتنسد قسمتها، عاد أبوي من سمع هيج هم وافقني. وانحلت. من سمعت هيج فرحت لها كلش، الحمد لله حيادر تدخل وحل الموضوع. قلت إذا طلع أخابرها، وهم ما طول هو بس بدل ملابسه وطلع للشغل. للمغرب خابرتني أم عادل فرحانة وتشكرت مني. قالت الدكتورة حاجت خالتي قالت لها ما عندها أي مشكلة. بس احتمال بلوغها يطول، وبعد هي شعرفها بالطب قامت الدكتورة تشرح وخالتي بس تكتلها هسه شنهي خو ما بيها

شي بس الدكتورة طمنتها كلشي ما بيها. وراها هاجر خابرتني وكلش فرحانة. بقوا يدعوا لي ويدعون لحيادر، وأنا فرحت لفرحهم لأن أحبهم وأنقهر عليهم أحسهم مظلومات. وي الصلاة أجه حيادر، جايب ويا جبن عرب. الله يساعدك، انطاني العلاكة وضحك، جبت العشا. ليش ما أسوي لك طبق مثلًا معكرونة بالبشاميل فد كباب بالصينية. هااا زين يلحقون يسووا لي غسيل معدة لو قبل للطب العدلي؟ يااا مو صوجك أصلًا إذا أخلصها عليك أجبان.

هههه لا لا أتشاقى، الفاصوليا كلش حلوة مالتج. بس التمن يقرط. أي مو كميته اختلفت، جنت أطبخ كلش هواي وهسه نفرين. بس يصير يتحسن ترى. باوع لي كأنه ما مصدق وضحك ودخل. بي كملنا عشا وبعده توه متمدد بالصالة اندق الجرس. راح ورا شوية أجه قال صبي جاي أجوا ولد عمي. حضرت له صينية وأخذها. لحد ما راحوا بالليل أجه دايخ وتعبان بسرعة نام. ورا يومين، الساعة ١١ الظهر تقريبًا، جنت جاي أطبخ. اندق الجرس، لبست وطلعت صحت منو.

أجاني صوت خالتي، أنا عمتج افتحي. لفيت نفسي عدل وفتحت الباب، دخلت هي وسلمت. أريد أسد الباب، جان تكلي هوبج هوبج، أبد أخوي وياي. عدلت حجابي وصرت ع جهة، هي صاحته. موسى تعال طب! استغربت عبالي يسلم ويروح. أشو دخل سلم وبكل ثقة عبالك يعرفني. ردت أفوتهم للاستقبال بس ما قبلت. قالت جا أن خطار ما أريد هنا دخليني للبيت. صدك دفعت باب المطبخ ودخلت. هيهي ريحة طبخ شطابخة؟ هو وراها فات، ودخلوا للصالة.

أنا خليتهم وبسرعة حضرت صينية وجبتها. خليتها وقعدت. شنهي شعجب قاعدة جا وتطبخين غدا. أي خالة بعد دنيا ظهر. شطبختي؟ دجاج شوي. أي هذا سهل يصير بحده، شنهي الصبح أجيت ودقيت شكد وما فتحتي. ما سمعت أبد. أي بعد نايمة مبينة، يلا موسى قوم يمه. طبعًا هو قاعد ونظراته تلعب ما ارتاحيت له. قام وياها، قلت لهم ابقوا تغدوا، قالت لا جا عايفة بيتي أتغدى ع الغرب. أخذتها ع مايها وما حجيت. طلعت وهي تباوع للزرع، نخلتج بريم خوش

دزيلنا منها من تنقل. الله كريم. يلا أودعناج، وطلعت للشارع ومدت راسها. فختي هسه؟ أمدااا بختي. صدك لزمتني الضحكة مدري الفشلة خاف الولد سمع. مشت بسرعة يمكن خافت أجاوبها. سديت الباب ودخلت. كملت الغدا وحضرت، بس الدجاج ملفوف بالسليفون ما فتحته، لأن كاتبين تفوت ساعة ويستوي. بوقت اللي أجه حيادر وصبّيت الغدا. طلعته وصبّيته شكله مرتب ومكسب. بس قعدنا ناكل نريد نقص الدجاجة ما تنقص. اللحم كأنه علج، هو دنك مبتسم.

وأنا أباوع للدجاجة قوية صدك. حجيت بقهر، عزاا ترى هم نشروا طريقة وسويت مثلها وحتى ماما هيجي تطبخه. حجه وكاتم ضحكته، مو لازم وقت هواي خاف طلعتي بسرعة. ما أدرييي هسه أنت جوعان؟ لا كليت شوية وحشو هم حلو، عادي ليش ضايجة؟ بعدك جوعان. قام وهو يضحك، أي جوعانج تعاي وراي. ضربني ع ظهري خفيف ويضحك، عاشت ايدج. بس ضجت لأن خفت ما أتعلم بسرعة وكابلت اليوتيوب وماما أجت لي وشرحت لي وعلمتني.

بس ما أعرف لو يطلع مالح لو أطلع أصلًا ناسيه الملح. التشريب الوحيد ضبطته. بس أبد حيادر ما حسسني ضاج لو كسر بواهسي كل ما أتعلم براسه طبخة جديدة. وطبعًا خالتي كم مرة تجي فجأة والصبح. شوي وتروح. ورا أسبوعين تقريبًا، الصبح قعدت بالعشرة لأن قعدت وي حيادر ورجعت نمت. جاي أنظف واندق الجرس، جنت لعبانة نفسي كلش. ورغم خابرت الدكتورة وإنطتني حبوب بس ما حسيتها فادت. طلعت وأنا دايخة، منو؟؟ حجيت من ورا الباب. أنا موسى.

استغربت هذا شجابه ويدري أصلًا حيادر مو بالبيت!! أي نعم تفضل؟ ها خوية خو ما محتاجة شي مريت لقرابتي وقلت أشوف شمحتاجة. شكرًا كلشي ما محتاجة، ومن أحتاج أخابر زوجي وحمويني وأولادهم، لا تعب نفسك بعد، أنا جديدة بالمنطقة وسمعتي تهمني. لا جا شرايد أنا بس ردت أخدمج، سكتت ما جاوبته حسسته رحت. سكت تالي قال، يلا أودعناج. بس راح دخلت وذبيت معدتي كلها، تمددت بالصالة تعبانة، شربت عصير وأكلت فاكهة شوي ارتاحيت.

من أجه الظهر حيادر حجيت له، تغيرت ألوانه وضاج كلش، بس قلي هم هيج طبعهم يعني خدومين وبس يريدون أحد ينخاهم. أنا هم تفهت الموضوع ما ردته يزيد ضوجة. غيرت مزاجه وحاولت، بس حسيت تصرفه ومسايرته إلي مجاملة. فات هالموقف، ورا يومين أجت خالتي. وهم موسى اللي جابها، بس دخل سلم وحجه بمنطق خبيث. ها خوية جا ذاك اليوم ردت أشوفج شمحتاجة. خو ما ضجتي مني، أنا من شفتج ما رديتي قلت خاف ضاجت وطبت. أريد أحجي وخالتي حجت، جا سواية تسوينها

جا أنت ما عندج أصول؟ شلون تطردينه؟ من رخصتج خالة، أنا ما طردته، وقلت له ما محتاجة شي ومن أحتاج ما أطلب منه. يعني رجال غريب وببابي، أنا ما صار شهر من قعدت بالمنطقة، ويعرفوني مرت حيادر اللي الكل تحسب له حساب. لو شافوا رايح راجع ما تحجي الناس؟؟؟ وأنا اللي مني وبيه حجه عليّ. لسانج لسانج عسا قص، كافي مسوية روحج الشريفة العفيفة. لااا لهنا وبس، شريفة وما أنتظر شهادتكم. الحمد لله نفسها عشيرتج تحلف بيه، وحجايتج

خالة عيب بحقي وبحق ابنك وبحقج أنتِ. لو حجيتي هيج معناها تذمين ابنك. هي خنست وهو حجه، شريفة والنعم منج. بس احنا هم أهل وما بيها شي أنا أخوي ابن عمي من نمر نشوف طلباتج بدربنا. أنت وإخوانك وولد عمك سعيكم مشكور، ومحد موصيكم بيّ. وأنا الحمد لله ما ناقصني شي حتى أطلب من أحد. الشي اللي أحتاجه أجيبه بيدي وحيادر سامح لي. وترى حيادر ما يدري بيك أنت جاي لبيته بغيابه اليوم، أنا اليوم أقول له، حتى منها يشكرك

ومنها يعلمك البيت اللي بلا رجال ما يندخل. قامت عمتي لبست عبايتها وتدردم، تطرديني من بيت ابني، كرفة تكرفج وتكرف رجلج. ولا تحجين قدامه شي لا يهد ع الفرخ، امشي موسى امشي. عساج لا فلحتي، وطلعت تدردم، وهو وراها. بس طلعوا قفلت الباب وخابرت حيادر انطيته خبر. قلت كلشي يصير ويحورون الموضوع. صدك من أجه الظهر قال خابرتني أمي تصيح تقول طردتيها وقلتِ لها لا تجين بعد. وموسى رايح لبيتهم حيادر ورا ما خابرته بس ما لاقي.

العصر راح ومطيح حظه مخلي يتعذر بس هو قايل له عمتي وصتني أمر لها، حيادر قايل له إذا سمعت وصلت يم بيتي أنت واللي وراك أدفنكم بعتبتي. وفعلًا من وراها أبد لا هو أجه ولا غيره. بس خالتي ترجع باستمرار تجي وتدخل، أنا أقول هي ساعة ورايحة ما أنطيها اهتمام. ومن صادف حيادر موجود وتعدت عليه بالحجي. حجه وياها وقام يعاتب، أنا قمت وعفتهم وحدهم. بس من وراها قامت ما تغثني، يعني صح تذب حجي بس قليل مو مثل أول.

من صار عليّ ثالث وتطمنت وضعي زين. حيادر ذاع خبر حملي، اللي يحبني أجه وجايب الحلويات ويبارك، بس اللي يضدني مثل حنين وخالتي. ردة فعلهم غير. يوم ثاني ورا ما قال لهم حيادر، أجت خالتي وحنين العصر. حيادر طالع للشغل. استقبلتهم وأنا لابسة فستان للركبة ومن البطن مخروط. وشعري قلبته صفح وخليت قراصة. أول ما شافتني حنين باوعت بعيون بيها غيظ. بس سكتت. دخلوا جوا وضيفتهم. أول ما قعدت خالتي قالت، جا شني يمتى حللتي شو ما ندري؟

أمس رحت للدكتورة وبعد حيادر قال لكم من رجعنا. أي قال، يلا عاد كون يركد ببطنج. الله يسهل. حنين ساكتة وتشرب عصير، خلصت وخلته ع الطبلة. شنو سويتي قطع قالوا؟ ما أثق بهالأمور أنا، الحمد لله رزق من الله وأجه لا قطع ولا غيره. هاا عود أنا رحت ردت أقطع، بس قالوا لي وحدة لازم تجيبين من هدومها. ههه شسالفة غسيل أموال شنو. إييييه اضحكي، ما ضايقة اللوعة من أنتِ كلشي ما بيج وما تحملين، هسه لو أحمل ويطيح تهون.

ليش كلشي ما بيج مو عندج تكيس وخلل هرمونات صبري ع العلاج. خالتي اندارت عليها، شني جا مو قلتي طبتي؟ أي خالة طبت، هي شمدريها بعد عزلت روحها وشالت خشمها على أبو حطت لها بيت وهسه بعد حبلت. ما كأنه لازقين بتفلة يومين وطاح. أعوذ بالله منج ومن عينج، جان استحيتي مو أنتِ قاعدة ببيتي. قامت خالتي وهي تضحك، خايبة امشينا، لا توّز رجلها ويجي يطرد أمه. ما يطردج خالة هذا بيت ابنك يعني بيتك. أي جذبي جذبي، مدوهنته بهدوم الكاوليات

ذني مدلعة ومزنده وراكض خطية وما يدري. أريد أحجي وحنين حطت ايدها ورا ظهر خالتي. امشي نروح لا تطردنا، وتطرح وتكول كله منهن. مشت طلعت للحديقة وتحجي. عاد هالمرة من تطرح أبقى أركص للصبح. باوعت لها وصدك احتار شنو أحجي وي هيج وقاحة. ربك سبحانه قادر، يمكن يرزقك وياخذه منك. ساعتها تحسين بحجم حجايتج. وما تدرين رب اللي منعه عنج يثبته ببطني. فتحت الباب بعصبية، لا تهنيتي بي عساج. شهقت وحجت، نذر لو مات أجي أطش جكليت ببابج.

هههه ليش هيج ثولة واستقبلج بعد. أوصلي مرة ثانية وشوفي، رجلج أكسرها وأنا بنت فيحاء، ويكفي أذكرج شيوت بيج. أي صدك، تسوونها، تحجي وتهد وخالتي جرتها وراحن. بس حمدت ربي هواي طلعت منهم، لو يمهم وهالتذكير يومية والدعاء عليّ شيصير بنفسيتي؟ الحمد لله هسه وضعي مستقر ونفسيتي تمام. ومرت الأيام، ووضعي زين، ما أوسوس أو أخاف. مجرد آخذة حذري. من دخلت بشهر الخامس وبدت بوادر القلق والحالة النفسية

اللي صارت قزازة، هواي أذيت حيادر وتعبته. وبين كل حجاية أتعارك وياه، حسيت رجعت حالتي مثل آخر طفل من طاح وتأزمت. صدقًا ما أقدر أسيطر ع أعصابي. شهر الخامس صار عندي كابوس. وقررت وي نفسي إذا مات هالطفل أترك حيادر. أخلي يتزوج غيري ويخلف منها. صدك تفكيري جان مو طبيعي وأحس نفسي صرت وحدة ثانية. طلعني هو مرتين أخذني اشترى لي ملابس ما ناقشني بلبس لو فرض عليّ. رجعت ألبس تنورة ومرة لبست فستان، واشترى لي هواي فساتين.

ويذكرني برشاقتي قبل ويقلي تخيلي يبقى كرشك للأبد ما يروح ويضحكني. بس أنا أضحك كوة ومن أقل كلمة منه أعيط وأقول له هذا الطفل آخر أمل. ورا أسبوع بشهر الخامس لازم أروح أراجع وأشوف وضع طفلي. خابرتني ماما قالت أجي آخذج لأن هي دخلت وياي إنذار من دخلت بالخامس وتحتار شتسوي لي. قلت لحيادر قال أنا أوديج. قلت له اثنينكم، ما قبل قال أنا آخذج ونمر لهم من نخلص. أعرف هو متوتر أكثر مني ويخاف لا الطفل بي شي وماما تلومه.

تلاغينا والعصر أخذني للدكتورة. قاعدة بعيادة الدكتورة، وأباوع للمراجعات أغلبهن حوامل، وكم وحدة لا. تلمست بطني وأنا خايفة، خايفة لا أفقده هالمرة وتصير المرة الرابعة. صاحوا باسمي، قمت ع كيف وأنا لازمة ظهري. راد يجي وياي قلت له ما حاجة، أنا أروح. قافلة عليه كلش، وأحس هذا الطفل آخر أمل. دخلت لغرفة الدكتورة، سلمت عليها وهي قامت طلعت من ورا المكتب. وأنا قعدت ع الكرسي، هي حضرت السونار وتسولف. إن شاء الله وضعج أحسن شاها؟

غير عن كل مرة دكتورة. إن شاء الله نقول خير. اصعدي خل نشوف. صعدت وساعدتني بالصعدة، رفعت الفستان وطلعت بطني. صبت لي الجل وتقلصت. ضحكت وعيونها تتجول ع الجهاز. بنتج جاي تكمز ببطنج. ياي بنووتة. أي ما شاء الله. بنوته دنفوشة مبينة. صدك. أي حجمها كلش تمام، بس يمكن جان فستانج حاصرها. أشو هسه قامت تلعب. ههه تدلل بعد ما ألبسه. أي خطية لا تحصريها مبينة وكيحة مثل أهلها. ههه، يعني وضعها كله زين. حجت وهي تمسح بطني بالكلينكس.

إن شاء الله زين. المهم ديربالج ع نفسج، ووضعج يبقى نفسه. لا حركة لا تعب، فيتامينات كلها بوقتها. ونقول خير. هسه أنتِ بداية الخامس. وهذا الوقت اللي نخاف منه بالأطفال السابقين. المفروض نشدد حرص هالأيام كلش. إن شاء الله أكيد، أتبع كل التعليمات وما أتعب أبد. عفية عليج، ولا تنسين الكلور أبدًا لا تقربي له. أي أي تاركته صار لي هواي معتمدة ع الديتول. أي عفية. ما تحتاجين دوا بس الفيتامين والمثبت أخذي نفسه. أوكي شكرًا.

طلعت وأنا لازمة صورة السونار بيدي. وقلبي يرجف، أريد هالمرة تتم ع خير. ثلاث مرات أطلع بهالفرحة ويموت ببطني. ما أتحمل بعد. لقيته واقف ينتظرني. انطيته الصورة مالت السونار، باوعها وابتسم. شنو الوضع طمنيني؟ تقول كلشي تمام، بس هالأيام اللي ينخاف منها. لازم أحرض كلش. لحد ما تتعدى مرحلة الخطر. لا تشيلين هم، بس نامي ولا تفكرين بشي. أنا أجيب لك أم خالد تساعدك. لا عليمن هو البيت ما يتعب والطبخ وأنا قاعدة. الطبخ ما تدني له.

لا تشلعين قلبي، خليها تعدي ويانا ع خير. الله كريم. يلا نزعي خل أجيب لك ملابس. أي خليهم هنا وأنا ألبس. باوع لي بطرف عينه، فتح الكنتور انطاني ثوب قصير. هيج هذا أريح لك واسع. أي خلي. أساعدك؟ لا أقدر عادي. زين، رايح أنا أتوضى. راح للحمام دخل، قمت أنا ولازمة بطني ع كيف. بدلت ملابسي. علقتها وقعدت انتظره. طلع من الحمام، دق الفون مالته، انطيته إله ودخلت. توضيت وطلعت، سمعته يحاجي أمه. جانت تتطمن وتسأل، لأن تدري رحنا للدكتور.

شوية وسده وقال يسلمون. قلت له الله يسلمك. وقف صلى، وصليت وراه، بس ع كيفي كلش. شوية شوية أقوم، نفسيتي تعبانة وخوفي ينعاد اللي صار. كملت صلاة وهو قعد يقرا. تمددت بالفراش. هو خلص وقام. جوعانة أجيب لك العشا؟ لا بعد شوية، أريد أخابر ماما. أخذي راحتج، ع ما تخلصين، أروح أحمّي لك التشريب. أوكي. طلع من الغرفة، وأنا قمت أشوف الفون مدري وين خليته. جاي أدور ع الميز ماكو. أريد أرجع وانطبقت الزولية جواي.

عثرت وطحت ع ظهري، بس هي طيحة وهي صرخة. صرخة مو من وجع. لا صرخة فقدت بيها الأمل. حسيت أنا ما مقسوم لي طفل. لأن كل مرة بلا طيحة وبلا أي تعب، يموت بهذا الشهر. هالمرة طحت يعني يئست. دخل يركض ومرعوب، شنووو صار؟ شكوومج؟ دموعي تصب وأهز براسي، ما أريدها تمووت. أستغفر الله أستغفر الله قولي يا رب. سندني وجابني للجرباية. تمددت ورفع لي رجليه ع المخدات. أخذ الفون وخابر الدكتورة. قال لها عثرت وطاحت، سألته اكو نزف شي؟ قال لها ماكو.

قالت إذا لا ألم ولا نزف يعني ماكو ضرر بس هدوا روحكم ولا تفاولون. بقى مكابلني وساكت. وأنا أبجي بسكتة. شوية وقام جاب صينية العشا. ما قبلت أكل. أخذت لي لكمة وحدة وعفته. هو هم ما أكل بس يباوع لي بغيظ ومتعصب. آخر شي عاط. ويمتى تأكلين خاتون هااا؟ ما أريد. لا تريدين وغصبًا عليج، ولو أخاف ع الطفلة إلا أكسرج تكسير لأن كلش مهملة. نفسي مسدودة ونعسانة، خليني أنام أحسن. لا ما نعسانة بس تعاندين، هيج تضرين نفسج ترى.

ونفسيتج هي اللي تأثر ع الطفل وتأذي. يعني أنا السبب؟ أنت جاي تكول أنتِ تكتلين الطفل أنتِ تموتي! أستغفر الله، كم مرة أقول لك إذا عاش الطفل وإذا مات، قدر ربك هذا. واللي كاتبه يصير، والمهم أنتِ عندي كلش كافي. بس أنا أريده، هذا آخر أمل إلي. إذا صار ببنتي شي ما أبقى وياك. هه ههه ههههه، أي هيج قولي من الأول. هذا اللي تريدينه. أي أعرف أعرف.. تزوجتيني غصب عني. وكل طفل يموت تكرهيني أكثر.. تحمليني الذنب أنا.

لا مو ذنبك، حجيتها بتعب وأنا يائسة. وحقك تضوج. بس أنا تعبت.. شفت أشكال وألوان الضيم. وعشت عمري كله محرومة من أخت. حتى اللي اعتبرتها أختي لدغتني وأقصى أشكال الأذية أذتني. ردت طفل يكون قريب مني.. أعيش وياه طفولتي ويعيش وياي شبابه. وأنت هم حقك تصير أب وتفتخر بأطفالك. الكل تزوج وخلف وأنت ما عندك. أخوانك وأخواتك وأقاربك.. تحز بنفسك بس تسكت حتى لا تجرحني. هذا الشيء يعذبني أكثر.

وأنت ما مجبور عليه بعد.. إذا عاشت بتي نبقى سوا. إذا مثل أخوانها البقية.. نص الخامس وتموت. كلمن يروح بسبيله. وثنينا نرتاح.. لا أنت مجبور تتحملني ولا أنا اللي أكدر أنطيك مبتغاك. ما باوع بوجهي أبد.. أخذ باكيت الجكاير والجداحة وطلع. وأنا بقيت بفراشي أبجي بصمت. من غدر حنين لطعن حيدر بشرفي لفراقي لحيادر والحمد لله الله غير الحال وكشفلي حنين وانجمعت بحيادر. صافنة وأسترجع ذكريات المضت.

واللي علمتني هواي أمور.. وأثرت بنفسيتي هواي. انتبهت لحيادر فات للغرفة يحاجيني. خو ما نزل عليج شي؟ هزيت راسي لا. ارتاحي ان شاء الله ماكو شي.. باچر أخذج ونتاكد. برطمت وبجيت.. أريدها ما أريد تروح مني. ما تروح وعيونج الحلوة.. أنا حاس راح تصير وطلع ملسونة مثلج.. تذب حجايتها مثل الطلقة وما تحسب. بقى مخلي راسي بحضنه ويمسح عليه بهدوء. غفيت بحضنه.. ورا شوي حسيت حط راسي ع الفراش وتمدد يمي.

نمت بس شبه نوم.. كلساع أفتح وأرجع أغمض. إلى أن صار الصبح.. اجتني ماما. بقت تسولف وياي وتقنعني ماكو شي وماكو خطر. سوت الغدا واجه حيادر الظهر.. طبعًا هو وياها واحد ثكيل ع الثاني. بس جانوا ثنينهم يسولفون وياي وواحد يساعد الثاني بالتشجيع والتطمين. وما خلتني أكوم.. صبتلنا وتغدينا سوا.. وسوت الجاي. صبت لحيادر وراحت للمطبخ. كعد يمي يشرب وباوعلي وابتسم. حلو جاي أمج. ابتسمت بحزن. لا تضحك جايكم بالذات ما أضبطه.

أي حقج احنا نحبه سنكين ومو أي واحد يجيده. حسيته ماخذني ع كد عقلي لأن صدك فيوزاتي ضاربة. لحد الساعة بـ 3 أخذوني هو وماما للدكتورة. الطريق كله ختمته بدموع ودعاء وتوسل. مو لخاطري لخاطر حيادر.. لأن هو سعدني وأريد أسعده.. وأعرف الكل مشتمت بي بموضوع الأطفال وخصوصًا بعد حجاية أمه. بقيت أدعي من طلعنا من البيت لحد ما وصلنا للدكتورة. يحاجوني ما أحجي بس أدعي وأقرا. وكفت ع ما حاجتها السكرتيرة وأنا أدعي وأكتم عبرتي.

طلعت السكرتيرة وهي تعرف بحالتي. باوعتلي بقهر وشفقة. وكالت تفضلي شاها الله يجبر بخاطرج.