رواية الشيهانة الفصل الحادي والثلاثون 31 - بقلم Shaqraa

مساء الخير

الشيهانة
الجزء الثلاثون

انصدمت وحجيت بخوف..حياادر شنوو هاي!!
صبريلي ..حجه بعصبية وفتح كنتوره..
قراصاتج وين؟؟؟
ذني فوك بالعلبة..
جرها وفتحها شافهم موجودات ..ذب العلبة
وراح يريد يطلع لزمته..

اوكف اوكف شنو منو سوا هيج ويين رايح..
احجي وحيلي كله يرجف وخايفة..
معليج انت وظلي هنا اليوم الا اشب البيت بيهم..
صخااام ..حجيت ودموعي تصب..
لا تنزل عفية لا تتعارك..بس خل نفهم منو
داخل للغرفة..
وخرري كلت..عاط بيه ووجه احمر دم صار
من العصبية..

اذا هسه سكتت راح يدوسون عليج مثل
مادايسين علي وسااااكت..
دفع ايدي وفتح الباب وطلع..وانا ورا اريد
الحكه بس سوا الدرج خطوتين..واشوفهم
الكل اجه يركض شكو وشصار..

هم جانو جاي يصبون عشا..هو حجه بصيحة
خلتني اكعد بالكاع من الخوف..لان بقيت
واكفة بالدرج بس من صيحته ماكدرت اسند طولي..
ولكم نواقيص..كو..... ياهو الداخل غرفتي
ولاعب بغراض مرتي هاااا؟؟
اباوعلهم الكل ساكت محد حجه..حتى ابوهم مافتح
حلكه ونطق..

هو واكف وهم خنسو كلهم حتى الاطفال
كعدت وصافنة بخوف..
ليش ساكتين ها؟؟؟هسه كدامي الداخل غرفتي
يحجي..
لو اليوم هذا البيت اصب كاز واحركه..
حاجته امه...منين يطبون حجرتك مو قافلها
بعد شنهي..

لا ماقافلها..اريد اشوف وين توصل وياكم..
ولكم هدوم البنية الداخلية معفوسة انتم شني
من بشر ..حتى الحيوان احسن منكم ..يحجي ويهادد..
واخوانه ساكتين محد نطق..
حجه وي جابر بس مو بصياح..
جابر مرتك وبناتك داخلات غرفتي؟؟!
مادري ياخوية هسه شتسوى..

لااااا كلششش تسوى ..لن حاسبيني طرن..
يطبون غرفتي وينبشون هدوم مرتي ولازم
اسكت..
يعني انا طرن ودثو مووو...
باوع بوجوهم وعاط..تحجن لو احلفجن بالسرة...

بقن يحلفن ويكولن مادخلنا ولا وصلنا ابد
عبالنا غرفتكم مقفولة..
وبهاد كله اصلا ماندري بيها مفتوحة لن احتاجيت
ريحة مساع جان خذيت منك..
هو بقى يستغفر ويتحسب عليهم..
اندار يريد يصعد ورجع..

شوفو هالمرة صارت ونشبتو هدوم مرتي..
بس المرة التجي..شما يصير انتم تتحملون
اليجرالكم ..
كافي طيبة وياكم وكاسر ظهري وانتم سجاجينكم
نابته بخاصرتي..
عافهم وصعد..باوعلي بخزرة وانا ركضت
كدامه للغرفة..
خفت احجي شي وانا اشوفه صاير جمر ومايتحاجى..

ذب ملابسة وتمدد بالفراش بلا مايحجي..
شلتهم علكتهم وطلعتلي ملابس..بدلت
وطلعت للحمام اغسل..جهال تلعب بالممر..
قبل لا اوصل للحمام انركعت ببرتقالة..لزمت ظهري
لان احتلي بنص ظهري..
واشوف تبارك تركض عليه..اخذتها من الارض
وراحت..

بلة هسه اكو طفل يلعب بالبرتقال استغفرالله..
وو هي تبارك لا تنحسب ع الاطفال ولا ع الكبار..
دخلت للحمام غسلت وفرشت اسناني ورجعت للغرفة..
مو مظلمها كلش ..نايم وناطي ظهر..
اجيت تمددت يمه..صافنة بهالوضع العجيب..
وين عايشين حتى الملابس تنبشوها والحاجات
النسائية تطشروها..

نزلت دموعي بقهر..ماعرف نفسي ليش
هادئة وراضية..يمكن حب حيادر واهتمامه بيه
يخليني اكول لخاطره..
بس حمدت ربي ع قناعتي وصبري..
لو بشخصيتي مالت قبل الكلشي ميعجبها
وبكلش تنقنق..جان يمكن رجعت بنفسه يوم
العرس حتى ماطولت هنا للصبح..

بقيت احاجي نفسي لحد مانمت..
فزيت نص الليل..هو حاضني من ظهري ونايم..
احتاجيت حمام ..ردت اجر نفسي من حضنه
بلا مااكعده..
بس هو باول حركة مني كعد..
ها شبيج؟؟
اريد اروح للحمام..
شال ايديه من علي وكمت..لبست الروب وطلعت..

رحت للحمام اريد افتحه..الباب مسدود
واسمع اصوات..نطيت عيوني وبلعت ريك..
صوت جابر ونهاية !!
رجعت بسرعة يم الغرفة وكفت :.خجلت واستغربت
وكل احاسيسي تراكبت..

بس حاجتي للحمام ماكدر اصبر..نزلت للجوا..
دخلت وطلعت بسرعة..
جاي اصعد الدرج ..سمعت صوت نهاية تحجي
الظاهر طلعو من الحمام..
انتظرت شوية راح صوتهم يلا وصعدت ..استحي
احرجهم وانحرج..

رجعت للغفرفة..حيادر سالنبني بيش الساعة..
جاوبته وسكت..
اجيت تمددت..صار وراي وجرني لحضنه..
انا مانطيت رد فعل خلصني نفسي
هادئة رغم بعيدة عن الهدوء بهذا الوضع..
بس بقيت هيج الى ان نمت..

يوم ثاني الصبح..حضرتله ريوكه..تريك
بصمت..حتى ماغضبان مثل امس..بس ساكت
ماحجه شي..
كمل ريوكه وكمت غسلت المواعين..
تالي صعدت نظفت الفوك..بس وحدة من الغرف الفارغة
لكيت رمانة بالكاع مكسورة ومطشر الحب مالتها
والنمل اسرااب عليها..

نظفتها ومسحتها وكملت..تالي نزلت يمهم ..
بس هم محد حجه او سالني ع سالفة امس..
كلها ساكتة..
رحت تطمنت ع امينة وبقت تلوم بروحها تكول
كله مني التهيتو بيه ًنسيتي تقفلين غرفتج..
سالتها منو مكةن يسوي هيج كالت كلشي
توقعي منهن ..ومحد تحجي ذن سرهم غميج..
وفعلا محد حجت شكد عيط حيادر بس الكل تبرى..

طلعت من يمها اريد ارجع للغرفة لان
المطبخ مليان مو بحاجتي البنات كلهن بي..
جاي اصعد وصاحت خالتي..شني وين فارة
طولج..
اروح اسبح خالة رح يصير وكت صلاة..
ياااع جا انت ماغاسلة ونااازلة؟
لا سابحة الحمدلله..بس نظفت وانا متعودة
ورا الشغل اسبح..
هاااا

اكلج جا شني ماخدين من غراضج شي امس..
لا بس ملعوب بيهن..
ها خاف الجهال داخلين واحنا ماندري..
مايلوحون الخانة الجهال..حجيت وكتلها
ع اذنج..
حجيتها وصعدت لغرفتي سبحت وصليت..
وغسلت ملابسي اخذتها شريتها..

لحد مااجه حيادر وتغدينا..بس هو قافل
والكل حتى ع الاكل محد حجه..
خلصنا وساعدتني سارة بالمواعين..
حاجتني كالت ترى عيني بقت على غرفتكم
ماشفت لا نهاية ولا بناتها صعدن..
محد صعد فوك بس بهادر وحنين وجدي..
كتلها احتمال جبير حنين مدام نهاية ماصاعدة..

صعدنا ورا الغدة للغرفة..هو تمدد بالفراش
وانا غيرت ملابسي واجيت تمددت..
تقرب يمي ..ورفع كذلتي عن عيوني..ماباوعتله
ولا انطيت اي رد فعل..
شيهانة..
نعم..
تورطتي بيه ها!

رفعت نظري بسرعة اله..شنو هالحجاية..
يعني مامتورطة وندمانة..
مدام حبنا موجود وانت نفسك ما تتغير مااندم..
ندمي يكون من انت تصير غير شخص..من تتغير ..
اعرف قصدج..تقصدين تغيرت وذبيت اللوم
عليج امس..
بس غلطانة مالومج ولا زعلان منج لن عفتي المفتاح..

حكج مامتعودة على هيج عيشة..بس انقهرت
وفشلت منج..
اهلي وسوالفهم التفشل..تخليني مادري شسوي
واحتار شلون ابررلج افعالهم..
حبيبي انت مسؤول عن تصرفاتهم..كل شخص
يتصرف حسب طبعه..قابل اطفال وانت مربيهم
وتستحي من افعالهم...

انا حتى عياطك امس عليهم قهرني
وضوجني..
لا انت ماتعرفينهم عدل..ماتدرين اذا ماسويت
هيج راح يعيدون الكرة الف مرة..
اذا ماانكرصت ذانهم مايفكون ياخة من عدنا..

لا عبالج انا قاسي وياهم ومتجاوز عليهم..
بس شيهانة انا اكثر واحد تعبان الهم وبار بيهم
واكثر واحد مكروه..
من صغري ذبيت روحي بالشغل..وادرس منا واشتغل
منا وراكضلهم بكل حاجات البيت..
منذر جانهو اليتسوك وكاض المصرف..بس
التهى بجهاله وعيشته وكعداته وي ابوي بالفصول..

ذبو علي مسؤولية البيت كلها من جنت بالاعدادية..
كتابي بيدي حتى من اروح للسوك..
وانت تشوفين بيتنا بي عشيرة من غير خطارنا
المايبطل وديواننا المايفرغ..
شلت همهم وتكفلت بكلشي يحتاجونه..حتى المصرف
ابوي خلاني انا لازمة..لن جابر ياخذ ويحط بجيبه
ومنذر ملتهي..

وبهادر مو كفو..مايعرف يدبرله شغلتين سوا..
وحار بالدراسة وشلون ابن عمي كمل ماجستير
هو دخلنا بانذار..ودرس ع حسابه وسوا المستحيل
حتى يحصل شهادته..
انا صح كملت كلية الادارة بس مو كلش التزمت
بدوامي ..يعني بس ردت اخذ شهادتي لا حطيت
بالي بدرجات ولا معدل..
لان براسي الف سالفة واروكض من شغلة لشغلة..

هذا كله مايجي بعينهم..وبهادر يوز من جهة وجابر
من جهة..
ويشيشون امي وابوي..تدرين مرات اصفن اكول
شو انا شايلهم شيل ومايردوني وبهادر وجابر
شالعين كلبهم وميتين عليهم..معقولة انا غلط
ومادري بروحي..
لا حبيبي حشاك..بس يأمنون من ناحيتك يعرفون
ماتأذيهم..بس ذكول لان يعرفون طبعهم
يتقون شرهم..
هم صدك..

قهرني وشكد حسيت بي خجلان من الصار بس
ماحسسته..
بس من هاليوم صرت اراقب تصرفهم واقل شي
اكون حذرة..
بابي اتاكد بنفسي قافلته واباوع يلا انزل..
اسوي شغلي وزايد..بس خالتي جاي تلح
تريدني اطبخ ..
وانا اخاف اجازف لان مامجربة ولان عددهم
هواي وخاف الطبخة تخرب..
واحاول اماشي الامور ومااغث حيادر بشي..

مر شهر وموعد شهريتي فات وهي مااجت..
لعبان نفس لازمني من اقل اكلة..توقعت حامل..

راسلت ماما وسالتها..كالت خل يجبيبلج
اختبار وشوفي..
بعد ماانطتني محاضرة..لازم انتظر شوية
بمسألة الحمل..

تالي كالت هم عدهم الحمل بسرعة شي يتباهون
بي يلا انشالله حامل..
ماما احسها بين شعورين..شعور فرحانة بية
كبرت وتزوجت..وشعور ضايجة من عيشتي ووضعي..
رغم مااحجيلها الحقيقة والمواقف التصير..
بس هي تحس..

وصيت حيادر ع اختبار..بس من كتله
ابتسم وعيونه شعت فرح ووراح بسرعة جابلي
المغرب..
خليته كتله الصبح يكون التحليل اضبط
لان الهرمون الصبح يكون مرتفع..
كال الصبح من وكت سوي قبل لا اروح اريد
اسوف النتيجة..

كعدت الصبح بعد ماسبحت وسويته..
طلعت النتيجة ايجابية..غمضت عيوني بفرحة
وقلق وخوف..
شعور اكون ام صعب وحلو وماعرف شنو اوصفه..
رجعت للغرفة هو جان يلف غترته..باوعتله
مبتسمة..
عافها وتقربلي يضحك..ها نكول انشالله!؟
هزيت راسي وضحكت..انشالله حبيبي..

شبكني حيل ويبوس بيه وفرحان ذكرني
بعرسنا هيج جان فرحان..
تريك وطلع..وهو يوصي..لا تصعدين وتنزلين
هواي وريحي جسمج ودربالج ومحتار من فرحته
شنو يسوي..
وانا كملت ريوكي..بس اكلي
كلش قل..ولعبان النفس الصبح مدمرني..

صعدت نظفت الفوك ورتبت المخزن لان مرجعبن
بي الهيترات وباقيات مشمرات..
رتبته وخليت الفراش ع جهة ومسحت الارضية وطلعت..
رحت لغرفتي خابرت ماما وكتلها.،
فرحانة وبقت توصي بيه بعد اضرب من حيادر..
احسه هو ماما يتشابهون كلش رغم واحد ضايج
من الثاني بس نفس الطبع..

نزلت وانا رايحة لامينة اكلها ..لان خالتي
ماتشتهي تشوفني مو مال اروح اكلها
خلي حيادر هو يحجي..
دكيت الباب وصاحت امينة ادخل..
فتت لكيتها كاعدة ع سريرها تمشط..
ها شلونج اليوم..
الف نعمة الحمدلله..يستر عليج انت وامج
والدكتورة..نعمة اليوم اشوة..
الحمدلله ..جايبتلج خبر..
بشرري حجت بضحكة..راح تصيرين بيبي..
ياصلوات على محمد وال محمد ..حجتها
وبجت..

بردتي كلبي وفرحتيني..انشالله يجي بسلامة
هذا الغالي ابن الغوالي..شلون دريتي..
سويت اختبار بالبيت..
نعمة نعمة..يرادلج مراجعة حتى تشوفين وضعج
ونتطمن..
اي انشالله اروح..

للظهر اجه حيادر من الشغل..اول مادخل جنت
بالمطبخ يم البنات..فتح الباب وليد كدامه ودخل
جايب كراتين حلويات..وحيادر ورا ..سلم وخلاهن ع الكاونتر..
الله يساعدك حبيبي..حجيت بابتسامة..
يساعد بختج مدللتي ..شلونج خو ماتعبانة..
رفعن عيونهن حنين ونهاية..
جاوبته بهدوء..لا الحمدلله..

هو اخذ كارتون وفتحه ..بي مشكل بقلاوة
وحلويات..
يابة مدو ايدكم اخذو..اخذت نهاية وام عادل اخذت وهي تضحك..
الله يحلي ايامك ابو علي احس وراها بشارة..
اي اذا ربج سهل جاي علي بالطريق..
هلهلت ام عادل وصلت على محمد وال محمد..
والجهال اجو يركضون ع صوتها..وهو
وزعلهم حلويات..

كملت حجيهاام عادل..بالخييييير يجي ويجيب كل الخير ويا..
ونهاية باركتلنا وحنين كالت..ع الخيير..
و تشكر منهم واخذ كارتون وكال اروح
اوديلهم..
بس دخل حنين راحت..ونهاية كالت..صدك
حبها ولبط هههههاا..هي من تضحك ترفع صوتها
وتنهيها وبنغمة هههااا..
ابتسمتلها صفح..عبالها اضوج لو اراددها..

اخذت المواعين احضر بس استحي ادخل
للصالة..لان اخوانه موجودين وابو وهو يبشرهم
بحملي احس خجلت..
باوعت لام عادل..تجيبين الجدورة حتى نصب؟
اي اي بعد شعدنا..يلا بنات ..
انتظرتها لحد ماطلعت كدامي وانا وراها شايلة
الصحون..

بس شافوني باركولي الولد..عد بهادر!!ولا نطق
ولاحجه..
عمي كال بالخير والمبارك..انا كلت انت وحَيدَر
وراكم خلفة عمنكم شادين راس..
الله الرزاق حجي وانشالله يوم لبهادر..
شهكت امه..اييييه يوم لبهادر وافرح بي..
عاد يستاهلون هو ومرته ..
هز راسه حيادر وسكت..

تغدينا وخلصنا وانا قليل اكلت وحيادر يمي
يعبرلي اكل واكله ماريد..صدك شهيتي صارت
نصف شهيتي السابقة..
ورا ماخلصنا خطية سارة تلم وياي والمطبخ
ماخلتني اوكف اغسل ولا قبلت..هي تغسل وانا
ارجع المواعين بمكانهن ونظفت الكاونتر وكملنا
سوا..

صعدنا ورا الغدة للغرفة..كالعادة اول ماندخل
حيادر لازم يشبكني..
بس هالمرة شبكني بقهر..حط راسي ع صدره
وباسني من شعري..
شبيك حبيبي..
ههه فرحان ومامصدك..حجه وهو ياخدني للسرير..
وبقينا نسولف لحد ماغفينا..

العصر راح للشغل وانا بالغرفة لابسة ثوب
قصير للركبة وفاتحة شعري ومخليه القراصة
من كدام..
جنت مخلية الكرسي وكاعدة ارتب الخانة مالتي..
انفتح الباب..فزيت وانا اباوع حنين دخلت..
حتى بلا ماتدكه..
هي من سمعت بحملي تخربطت احوالها وحقها
تنقهر..رغم السوته وياي بس انقهر عليها
لان هذا الشي مابي شماتة..

دخلت وبس تباوع ..انا سديت باب الكنتور
وحاجيتها..ها فوتي تعاي..
اجت وكفت كدامي..اكرههج اكرههج اموووت منج..
ولج اريييد اكطععععج..

للحكاية بقية
بقلم شقراء(قمر كانون)

طبعا اعتذر اذا البارت قصير بس نفسيتي كلش قافلة
بسبب الخلافات الصارت والي اني انتهم بيها احجي
على اهل العمارة او الناصرية..اكثر شي غثني
وخلاني انقهر..كلكم تعرفوني ومتابعيني اكو فد يوم
قللت من محافظة!هذا استفتاء الي تشوفني من مقللة من احد
تحجي لان جد هذا الموضوع اثر بيه..واخر شي اتوقع
انتهم هيج اتهام..
بالنسبة للتعليقات الفاتت راح احذفها بسبب كم الخلافات الصار بالتعليقات
للعلم اني خافية الاسم بس اصحابها لكيتهم مراسليني
وتجاوز بكل انواعه وناطيني بلوك ولان مسجات لود كلش ماتنفتح اليوم
يلا شفتهم ..
باختصار الموضوع اخذ اكبر من حجمه..واي شخص يعلق هيج
نوع من التعليقات وبي اتهام سواء الي او لاي متابعة معلقة..
راح يكون جزاءه البلوك ..لان كلللللش مو بحال هيج تفاهات ولا
الي خلك..