رواية الشيهانة الفصل الرابع والخمسون 54 - بقلم Shaqraa

السلام عليكم

الشيهانة
الجزء الخمسون

ربطو رجليه وانا بقيت ارفع نفسي من الوجع..
بس ثبتتني الممرضة وحجت وياي بهدوء..
لا ترفعين نفسج ترى طفلج يختنك..واكيد منتظرته
بلهفة وماتردين تضيعين تعب ذيج الاشهر..
وي كلامها هدأت حيل..لان تذكرت اطفالي الماتو
وحرماني وطول انتظاري..
بقيت ابجي بخنكة والالم يتضاعف..الى ان
حانت ساعة الخلاص..وولدت بنتي وبنت روحي..

ورا ماسوولي اللازم ونقلوني لغرفة ثانية..
وارتاحيت شوية وطلعت..بس طول هالوكت
اريد دموعي تنشف ماكو..ماما كل شوي تمسح
عيوني وترجع تبجي وياي..انا ابجي من الفرح
وهي تبجي مقهورة عليه وفرحانة نفس الوقت..
اخر شي طلعنا وامينة وحيادر يتعاركون على الطفلة..
طول الطريق هو كل عقله يحاجيها ويسولف
وياها وامينة تضحك عليه..

وصلنا للبيت وفوتوني لغرفتي..ماما كالت اجهزلج
جنطة واخذج وياي..
حيادر واكف..حاجاها بهدوء..لا خليها هنا ترتاح
اكثر..
لا هناك ببيتنا احسن..
وهذا هم بيتكم ماكو فرق..ابقي يمها احسن
وهم انا اجيب سارة وامينة
يبقن هنا لحد مايرد حيلها وتكوم ..يلا انا اروح
اجيب عشا مااطول ..

ماانطى مجال لماما تحجي ابد..بس طلع
هي باوعتلي وسكتت..
بقيت يمي خابر بابا حاجاني كال راح اجيج
ومحمد كال راح
ارجع للبيت يم هاجر لان حسن مو هنا
وبابا يجي يشوفج..
للاسف ماكدرت اساله شصار مساع استحي من ماما..
بس وجهه يبشر بخير ملامحه تكول اكو خبر حلو..

ورا ماراح بشوية ..امينة جابتلي حسو خطية من
اول مارجعنا دخلت للمطبخ تسوي..
اكلت منه قليل بس ماما عجبها وسوتلي واهس اكمل
الماعون..
تالي كامت تصلي وانا حاولت اغمض عيوني بجت بنتي..
ردت اكوم بسرعة بس توجعت..
صحت ع امينة اجت تركض جابتها الي وساعدتني
وشربتها الحليب..
بقت لحد ماخلصت ماما صلاة وتبادلو الادوار..
كتلهم انا مسطورة كلش ..رح انام اذا بجت
كعدوني..

حاولت اغفى شوية..بس قبل لا اغفى
اجه بابا..بس شاف بنتي بقى صافن بيها هوااي
تالي طاحت دموعه..مامصدك شاها صارت
ام ..يحجي ويمسح بعيونه..
خلاني بحضنه ويسولف وياي ..شوية وغفيت..

بس سمعت صوت حيادر..
صرت شبه واعية..
جا غير تتعشى وتنام شلون نامت جوعانة..
جاوبته ماما اكلت شوية خليها ترتاح جسمها كله
مفكك لازم يستراح ..
الله يقويها..تعشو انا جبت عشا
وهي من تكعد اكل وياها..
يلا انا احضر صينية ونتعشى سوا..سمعت
ماما وامينة وبابا طلعو..

هو اجه يمي كعد ..مسح ع راسي..شيهانة ..مدللة
كلبي..ماتاكليلج لكمة..
حجيت بنص وعي..اممم حبيبي نعسانة..
نامي بعد طوايفي لا يضل بالج..بقى يمسح ع شعري
لحد ماغفيت..
فزيت نص الليل مرعوبة..كعدت لحيلي..الضوا مفتوح
ماما نايمة يمي وامينة بالارض..

سندت نفسي اريد اكوم ..فزت ماما..اسم الله ماما وين
رايحة..
ليش ماكعدتوني نمت هواي وعفتها..ههه ولج وين
عايفتها غير يمنا..
ميخالف اريد اكوم اشوفها..
كامت سندتني واخذتني لسريرها باوعتلها..بس
اباوعلها ادمع..ابتسمت واباوعلها شلون مغمضة..
بشرتها ترفة ووردية..عيونها جرة عيون حيادر
بالضبط..بس شفافها تشبه شفافي..

رجعتني ماما كعدت..ارتاحي ماما هي توها نامت..
بس نمتي كعدت..
صددك..لعد نامي هسه بعد انا كعدت..
مابقى شي للصلاة اصلي وانام..رجلج خطية ماتعشى
انتظرج تاكلون شوا..
ياا لعد خليني اطلع اشوفه..بس افوت للحمام..
يلا تعاي اسندج روحي غسلي وكملي وطلعي
احضرلج اكل..

اخذتني للحمام غسلت وكملت وطلعت ..لكيته
نايم بالصالة..
خلتني ماما وراحت للمطبخ تحضر الاكل..
انا تقربت يمه بسته من خده..فز بسرعة..باوعلي
عقد حاجبه مبتسم..
ها شلونج هسه ؟
الحمدلله حياتي كوم اكل وياي..
رفع عينه للساعة وحاجاني..يلا فد مرة حتى اصلي
واطلع اجيب ذبيحة..

المن!
الجن غير..انت وبنيتي..
زين شسمها!
هههه فدوة لخبالج..يعني وين صايرة بنية عمرها
نص يوم ماعدها اسم..
اي بعد اجت بسلامة نكدر نختار..احسن مانختار
قبل وبعدين ننصدم..
اسم الله ..يحرسها الباري هي وامها..انت شناوية؟
انت شتكول..
نسميها غرام؟
اوكي فديت ابو غرام..

فداج هو وطوايفه..مشتاكلج ولج شيخلص الاربعين..
عزاا اسكت ماما بالمطبخ هههه..
انا غلام ابوي..تعاي انطيني بوسة تعاي..
لاا كوم اكل كوم..
كام وهو يضحك..الجايات هواي..ابقي اغسل
واجي اخذج لا تكومين وتدوخين..

راح غسل وماما طلعت من المطبخ..اكلكم
جاهز روحو اكلو وانا رايحة يمها..
اي بس اخلص اجي حتى تنامين..
يلا اكلي زين ماما..حجت وفاتت للغرفة..
وانا انتظرت حيادر اجه وكعدنا اكلنا سوا..
خلص وصلى وطلع..
انا رجعت للغرفة لكيت امينة كاعدة تصلي هي وماما..
هم رجعو نامو وانا جبت بنتي يمي لان ماكدر
اكوم بسرعة..
بقيت منيمتها يمي واباوعلها بابستامة لا ارادية..
شربتها حليب وبقت كاعدة..

للساعة ٨ هي كاعدة..انا نعست ودخت..
همزين امينة كعدت..استلمتها كالت نامي..
بس سوتلي اكل اكلت قليل ونمت..
كعدت الظهر ع صوت خالتي تسولف..
فتحت عيوني وعاقدة حواجبي..صارت خالتي
بوجهي..
ها حبيبة گرت عينج..حمدلله على سلامتج..
الله يسلمج خالة..حجيت وتثاوبت..

عدلت كعدتي بصعوبة احس موجوعة اليوم
اكثر من امس..
باوعت بس ماما كاعدة ع جهة وخالتي بحضنها
غرام..
اصوات هواي برا..سالتهم كالو جاي يطبخون الغدا
بالحديقة..
حيادر ذابح ثنين..وحدة موزعها لحم وموزع وياه
جيس تمن ابو الكيلو ومستلزمات الطبخ شعرية
وغيرها ..حتى يطبخوها شوكت مايردون..

والثانية جاب طباخ ووياه اولاد عمه ..يطبخوها ويوزعها
للاقارب..
وجايب مرت عمه هي وامينة يشرفن ع التوزيع
وام عادل وبناتها بس..
كذلك اهلي بابا والولد وهاجر..
ماما كالت ينتظروج تكعدين لان بس شافوج
نايمة طلعو كالو خليها مرتاحة..
كامت صاحتلهم من باب الغرفة
ماطلعت ..

هم اجو كعدو يمي وشوي سولفو وكامو ..
بس خالتي بقت كاعدة..دخل حيادر صاحلها
وطلعت..
ورا شوية رجعت كعدت..خية انا ماعرف بالتوزيع
يريدني حيدر اوزع اللحم..
جاوبتها ماما..شعجب انتو اهل العزايم ..طبعا ماما
من يوم المشكلة هي تحجي وياها برسمية كلش..بس خالتي
لا كلش اسلوب وتبين الطيب كله..
جاوبت ماما..خية كلها يم الزلم..حتى اكل النسوان
هم يدزونه النا..
بمطبخ المضيف الطبخ يصير..وهناك كلشي
يترتب..
اي افضل..حجت ماما وسكتت..

وشوية اجو البنات كالو لخالتي تعالي تغدي
وانا جابولي وي ماما اكلنا بالغرفة..
للعصر خلص كلشي ورجعو كلهم..خالتي راحت
كالت امرلج الصبح..
وي المغرب اجت حنين جابها بهادر واجه..
دخلت علينا امينة..اجت حنينة وبهادر كعدو بالديوانية..
ماما كاعدة ع السجادة تقرا..سدت الدعاء وخلته ع جهة..
كامت بسرعة رتبني ورشتلي عطر..
واجت كعدت بصفي ع السرير وبنتي بحضنها..
امينة ضحكت
ها اجيبها؟اشرتلها ماما اي..

شوي ودخلت امينة وياها حنين..رافعة بوشيها
ومكياجها مكياج عروس..
وصاير وزنها يمكن مية..هي بسبب العلاج سمنت
كلش..
بس هسه صايرة اكثر وبالذات بطنها..
دخلت بابستامة وتمشي ع كيف..رادت توصل يمي..
ماما كلتلها عطرج كلش قوي مو زين ع الطفلة..
ايي هذا العطر بهادر يموت عليه يكلي غركي
نفسج بي..حجت وهي تكعد ع القنفة الي بالغرفة..

الله يثخن لبنكم انت ويا..
مشكورة عمة..بالخير على غرام ..يكولون تشبه حيادر..
ماكو فرق انا ويا واحد..جاوبتها بابستامة..
ايي عود ضموها لابني..بعد مركتنا على زياكنا..حجت
وحطت ايدها ع بطنها..
باركيلي حامل..
امم ع الخير تكومين بسلامة..توقعتها تكذب..
بس فعلا بطنها ملفتة للنظر..

كلت مااحجي لحد مايثبت..تدرين الناس
تحسد بعد..
وهسه علي ثالث.
اي بعد كلمن حر بنفسه شوكت يحجي ..هذا شي
خاص بيج..
هالحجي ماما يمي وكل خزرة تطكهااني من يمي
اخاف..
اخر شي كامت ماطولت..يلا نجيج غير وكت..
حجت وراحت بسرعة..انا اضحك عليها لان ماما
كعدتلها مثل مراقب الخط..ترصد اي حركة
منها..

ورا ماطلعت وي امينة مباشرة ماما طلعت
وراها..
لحد ماراحت..جابت ملح فرته بالبيت كله وحرمل
سوت وشغلت ايات بالتلفلزيون..
انا شوية كدرت اكوم وحدي..صح وجع بس
مو دوخة مثل امس..
ورا الاذان اخذت بنتي وطلعت للصالة كعدت..
وماما بالمطبخ هي وامينة..
حيادر كعد يمي سالني عن حنين ..حجيتله
عنها وهو مثلي يكول بهادر كلي حامل
صارلها ثلث اشهر ..
كتله الله يرزقهم الطفل هالموضوع مابي شماتة..

هو كال اجيت اطردها بس انت توج جايبة
وخاف تصير مشكلة وتتاثرين..
تمنيت امج تطردها..حجايته صارت وي جية
ماما..
كعدت وحجت بهدوء..لا تطردها ..المثل هيج
انسان خلي بقلق منك لا تخلي يأمن شرك..
انا بامكاني اطردها من بيتي الي ورا صخام وجهها
اجت وداسته بدل المرة مرات..بس مااطردها
خليها كدام عيني حتى اسبقها بخطوة..

ورغم الصاركله والمفروض احجي لاهلها واسويهسالفة جبيرة..
بس ماحجيت..
لان اول المتضررين انت..وبنتي تتضرر وياك..
ترى هي اهلها يدرون بكل سمها..
بس محد ينطي بيها منهم لان اهلها..يدرون بغلطها
بس ماينطون بيها..
وصدكني لو رايحة وحاجية وياهم..جان صرت الفتيل
اليشعل نار الفتنة..
اول شي تسوي ..تطلع نفسها مظلومة..

وتطلع اهلك اسوأ معشر وتجيش اهلها
يرحون لخوالك يشتكون..
وعدها شهودها لان المنافقات هواي واولها جنتكم
وتصير بت خوالك ويصدكوها..
يعني فوك الحجي الاشكال والي متعودة حنين عليه وع الطعن..
تنسحب الشيخةمنكم وتتضاعف المشاكل
والناس تريدلها علج تعلج بي ماتصدك..

المستفاد الوحيد من هذا كله ..هي..
الخسران الوحيد ..شاها..كونها سبب مشكلة..
اهلك رح يكرهوها اضعاف..
وانت تتاذى باليصير وهي تتاذى لاذيتك..
وهيج احنا سببنا كارثة من مشكلة..

لا عبالك انا ساكتتلها لو اعبر السوته..انا طبعي
جبهة بجبهة..واليضدني احطه
كدام عيني..وخصوصا اذا شي يخص شاها..
حرصي مرات يزيد عن حده..بس انت هسه راح
تعرف شعوري..
اجتك بنية بعد تعب وانتظار..راح تشوف شلون
تعزها اكثر من النفس..
وانا سبق وفقدت بنية ..يعني حبي لشاها وخوفي
ضربه في اثنين..

الله يرحمها ويحفظلنا شيهانة..والنعم منج وماعليج
زود..
والشيهانة ماتخلف غير شواهين..
الله يحفظكم..كومو تعشو وارتاحو اليوم تعبتو..
كامت قبلنا للمطبخ..خليت غرام بفراشها
ورحنا اكلنا بسرعة كلساع الاوع خاف تفز..
بس خلصت اخذتها ورحت للغرفة..
هو قبل لا يخلص عشاه خابرو عليه..
جاييله خطار ..

ورا شوية احت ماما سلمتها غرام ونمت..
يوم ثاني احت يمنا سارة..وبقت يومين..
لان امينة اجه عليها عمي اخذها..
خالتي كل يوم تجي..ا
بعد ١٢ يوم وضعي تحسن ..بعد مارحت للدكتوة
وصحتي زينة..
ماما رجعت للبيت..
انا تعودت شوية ع بنتي واعرفلها مو مثل اول
ايام..

راحت ماما بالليل..اجه محمد اخذها..
ورا ماطلعو ..دخلنا وحيادر راح قفل الابواب ..
انا بالمطبخ احضر ممات غرام..
اجه وكف بالباب يباوع ومبتسم..
مشتاكلج يشيهانة...
عضيت شفتي بخجل..وميلت راسي..
فتحلي ايديه ونظراته تدووخ..
اجيت امشي بهدوء..وصلت ذبيت نفسي
بحضنه..

اخذني بشوك المحروم والمشتاق..مثل نثر
الورد ينثر قبلاته..شالني وتعلكت برگبته
وغادرت الوعي ..دخلت مرحلة اللاوعي..
صارت القنفة تكفينا وتزيد لان واحد ضام
الثاني بقوة..
همساته باذني وقعها مثل وقع المطر..شي يداعب
الذهن مو بس الاحساس..
احبه من يسيطر على عقلي..

بعد مااختمت موجة الشوق ..كام للحمام وكمت ورا..
خليني اكمل قبلك وانت روح يم غرام..
اي غسلي بسرعة وروحي لا تكعد..
لا اريد اسبح احسن..
باوعلي وغمز..
ههه شبيك احتياط..يلا بسرعة..
امبين بعدج دايخة..خو روحي لحمم الغرفة سبحي..
يااا شبيه انا..
باوعلي بضحكة..جا ورا الاربعين شلون!
يجوز اكلج غرام تبجي تكليلي ياغرام..

شردت منه وانا اضحك ع نفسي..بسرعة دخلت
للحمام كملت وطلعت..
جاي امشط وكعدت..
وكعدت وياها فد جرة للفجر..نمت انا وكعد هو
صلى وبقى كاعد ..لحد ماصار الصبح تريك
راح للشغل..
تريكت ويا وغرام ماصارلها هواي من نامت..
قفلت الباب ورجعت نمت..

فزيت ع صوت الباب يندك حيل..
كعدت مفزوعة..لان دكته كلش قوية..
كمت ركض لبست عبايتي والشال اركض
والف بي..الف حسبة اجت ببالي..
طلعت صحت منو..

للحكاية بقية قليلة
بقلم شقراء(قمر كانون)

اسم الله عليج خية😂😂😂 حسستيني كبل وضاربته بوري

اكثر مشهد تعليقاته ضحكتني ولله..قصدي ربطو رجليه
بس نمت باخر المشهد وكتابتي صايرة مزج ولله لان
ضغط هالايام كلللش عذروني

ربي يعوضج خير بحق محمد وال