رواية الشيهانة الفصل الثالث والخمسون 53 - بقلم Shaqraa

السلام عليكم

الشيهانة
الجزء التاسع والاربعون

دخلت وووياي ماما ..حيادر عصر ايدي مثل
اليصبرني..كال انتظرج هنا..
بس دخلت الدكتورة لكيت واكفة ..ابتسمتلي وهي
محضرة السونار..
احنا شلون ببت فيحاء وحفيدتها..جنا شاها ومدللة
وخاتونة ..هسه بنتها وهي ببطنها خبلتنا..
تسولف وياي وشكلت الحهاز وبدت تاخذ..

غمضت عيوني ..
لحظات..سمعت دقات قلبها بالجهاز..فتحت
عيوني وردت اكوم..هي ضحكت..
وماما بقت تصلي على محمد وال محمد بصوت عال..
حجت الدكتورة بضحكة..كاعدة ببطنج ومخلية
رجل ع رجل..دشوفيها يمكن بيدها مصاصة..
بقيت اضحك ودموعي تصب..
وماما تمسح خدودي..

بعدها كمت وساعدتني ماما ..والدكتورة طمتنا
الوضع كله تمام ومابيه شي
وكالت لازم فترة طويلة يلا اخذ سونار لان اخذت
متقارب ومو زين تأثيره سلبي..
شكرتها هواي وبستها وطلعنا..اول ماانفتح الباب..
اباوع حيادر وايديه ورا ظهره..
بس شافنا مبتسمين ضحك..اجه يمي بسرعة..
بشري..
الحمدلله وضعها كلش زين..

حجه واحنا نطلع..الله يجيبها بالسلامة
اروحلها فدوة..
الحمدلله الله يقر عينكم بسوفتها..حجت ماما
واحنا نصعد السيارة..
فرحتي وشعوري ماكدر اوصفه..بس مرتاحة..
فرحاااانة..
حمدت ربي وشكرته الف مرة..هم يسولفون وياي
وانا اكول الحمدلله الحمدلله..

وصنا ماما للبيت وسلمت ع اهلي وراد بابا ابقى
يمهم كله حيادر لا تعبانين خليها غير يوم..
رجعنا طول الطريق يسولف وياي وفرحان كلش..
خابر امينة بشرها..كلها راح اجي اخذج تعاي يمنا
الليلة..
هي عمي مانعها تطلع..مرة وحدة اجت ومايقبل
عمي تجي..شكد كلت لحيادر خليها تجي تعيش يمنا
بس عمي رفض ..

مرينا عليها بالباب مانزلت انا..بس هو نزل شوي
واجو هو وياها..
اجيت انزل حتى تكعد كدام بس ماخلتني بوستني
وسدت الباب عليه وراحت صعدت ورا..
المن نازلة ارتاحي بعد عمري..من البارحة كلبي
فاير عليج...
بس نعمة ربج ماتنكطع ورحمته مالها حد..
الحمدلله بركة دعاكم..

اجت ويانا للبيت وكلها حيادر مشتهي دولمتج
باجر للغدا..
لفت الجدر من الليل وانا ساعدتها بس قليل
رغم لا عندي الم ولا شي بي ماخلتني اتحرك
كوة اتوسل بيها..
بقينا سهرانين لحد ماغفينا بالصالة..
فزيت ع ندهة حيادر كال دخلي نامي جوا
ماقبلت لان هم نص الليل وهم هو كال انا ابقى يمها..
بقيت ع نومتي ع القنفة بس تغطينا..

كعدت الصبح مالكيت احد بالصالة ..صحصحت سمعت
صوتهم بالمطبخ..
كمت غسلت ورحت للمطبخ ..كاعدين يتريكون
ويسولفون..
ورا ماطلع حيادر ركبت امينة الدولمة وبقت
يمي نسولف..
تحجي عن خالتي وحنين ونهاية صايرة ملاحم..
حنين شادة وي نهاية فد مرة..لان تعيرها بالخلفة..
وخالتي مرة تصير وي نهاية لان بنت اخوها..
ومرة وي حنين لان تخاف منها..
ومرات توز عمي يعيط بيهن ثنينهن..

واحنا نسولف اندك الباب..راحت امينة فتحت..
اجت خالتي وياها تبارك..
دخلت من الباب وهي تحجي..شنهي ردت اجيج
امس كال رجلج مو بييتج..
جا هم طلعتي ببيت بحدج هم رايحة تتبيتين..
لا خالة مابتت رجعت بالليل..
لان رادت تجي ثاني يوم من طحت بس جنت
نفسيتي زفت وحيادر كلها اني ببيت اهلي..

كعدت وهي تخوزر بامينة..انا جبتلها ضيافة
واجيت..
تبارك شالت الكوب بسرعة وشربت..يبي متنا
من العطش ..يدتي جابتنا كرف كرف..
كتلها تاني نشوفلنا واحد يجيبنا بس ماقبلت
حابتنا مشي..
كفختها خالتي..ام عشر لسونة مو لزكتي ردتي
تلفين..

ورجعت حاجتني..جا شني بيج بت كال حيادر..
انا بس رجعتو خابرته كلت اشوف بلكت وليد..
كال بنية طلعت..كتله دامها بت تعيش..
الف الحمدلله والف الشكر اله..هاي عطية الله خالة..
ومانتشرط على رب العباد ..شنو ينطي نحمده
حتى يزيدنا..
بواعتلي وهي ماقابلة وسوت همم..

تالي اندارت لتبارك..كومي جيبي بعد ماي
عطشت..
كتلها هذا بطل بس ماقبلت كالت لا هذا حار..
رادت تبارك تكوم كتلها ابقي انا اجيب..
كمت جبت بطل الماي وامينة دخلت وراي..
روحي يمهن بسرعة لا تعوفينهن بحدهن..
انا رجعت لكيت تبارك وخالتي يبسبسن..
انطيتها الماي واريد اكعد..

تبارك حجت..عمة ماعدج صبغ زايد..
اريد من هذا اليلمع بي خرز..واريد اشتري ظافير
لمهر اخوي..
اي هسه اجيبلج عندي..بس ماكمت كلت لحد ماترجع امينة..
خالتي كالت شنهي تجين للمهر لا..
الله كريم هو شوكت؟
ماظل شي جم يوم ويصير..راح يعرس بحجرتكم
بعد..
اجت امينة كعدت..انا اشرتلها بعيوني..كمت كلت
لتبارك رح اجيبلج صبغ واجي..

فتحت باب الغرفة ودخلت اريد اسده لكيتها
وراي..
دخلت تباوع وتتفرج..هيهي حجرتج تخبل
جنها بالتلفزيون..
انشالله تكبرين ويصير عندج مثلها..حجيت وانا
اطلع الصبغ من الجرار..
هاج هذا اخذي حلو ..اخذته تفر بي منا ومنا
باوعتله بفرحة..
يجننن يجنن..تالي رفعت نظرها الي وحجت بتردد..

باعي انا حنينة ملعونة وماذيتيني..كلت
اكلج لنج تطيني صبغ وماتوزين بعمي حيادر يطك
امي وخواتي..
حنينة تريد يدتي تاخذ هدم منج حتى تحبل..
هن يسولفن وانا كاعدة العب يمهن بس اسمع..
تريد تسوي سحر حتى تحبل وتريد من هدومج..
ومحتارة شلون تاخذ..يدتي كالت انا اشوف ادبرلج
بلكي الكى على الحبل لو اغافلها وابوكلج شي..

انا سمعتها انخبطت بطني..ولا متوقعة تبارك توشي
بيهم ..بس هي طفلة والحمدلله نطقت حتى بلا
مااحقق وياها لو اوصيها..
انا سويت نفسي مامهتمة ..شكرا تبارك لان حذرتيني
بس و تنقلين كلامي هسه وياج لامج:.
جا ماكدر ماحجي..

اي مايصير تحجين كلشي..مثلا هسه انت حذرتيني
هذا مايسمو فتن بالعكس مساعدة..
بس شتسمعين تنقلين مو حلو هيج كلها تبقى
تكرهج..
ياااع حبوبة اذا ماانقل اشبع دك من امي..اكلج
ماعدج قراريص شي احطه براسي..

هههه انا اوصي حيادر يجيبلج بس يطلع للسوك..
وشنو تردين ويعجبج وصي حيادر..
مادام انت حبابة هو يحبج ويجيبلج..يلا امشي يمهم
نطلع..
ركضت كدامي وتكمز..
الله يطول عمرج الله يطول عمرج..

طلعنا يمهم خالتي لكيتها واكفة..يلا امشي
خايبة الملحة..
يلا اودعناج..عود عوجي رجلج مري علينا
مو حابسة روحج هنا..
ع الخطوبة بعد خالة..
اي كولي مااجي..طلعت وهي تدردم..

سديت الباب وراها ورجعت..امينة بالمطبخ..
حجيتلها ع الكالته تبارك..كالت خوش
خل اتصنت عليهن منا وهيج وهم اذا وحدة
رادت تجيج اخابرج..
خاف شارة هدمج ع الحبل ناسية شي تشيليننه..
هي تسولف وياي وانا مصدومة بخبث
حنين العجيب..
معقولة هالبشر جنت معاشرته احسها انساني
ثاني بكل صفاته بكل طبعه..
بس الحمدلله كل ماتريد تكيد تنكشف..

بيومها بقت امينة للعصر يمنا وخابرها عمي رزلها
وكلها تعاي..
اخذها حيادر المغرب من رجع من شغله..
ومن رجع منهم بالليل كال خطوبة ابن جابر
الجمعة..
انا افضل ماتروحين..
ليش حبيبي؟
ماريدج تدوسبن ذاك البيت وانت حامل..
اريد هالشهر يعبر ونفسيتج تستقر..

بعد انت اعرف حبيبي واصلا اروح لخاطرك انا..
ادري بيج معدلة ورافعة راسي دومج..
مبيضة وجهي كل عمرج..
خصوصا الكيك السويتي لولد عمي عاشت
ايدج ذاك اليوم ..
اي والجاي ههههه..
لا هم عبالهم انت..كلو الكيك وشربو الجاي
كالو عاشت ايدها ام علي نفسها طيبة وجايها
يكعد الراس..

مايدرون ابن عمهم هو خدره..لو يشربون جاي
ام علي عبالهم ماي عرنوص..
اي ابقى حشش علي...
اريد اضحكج..ماصدكت شفت ضحكتج وخفت
سوادينج..شايفة روحج امس..مو نفسج هسه..
اي صح تأزمت نفسيتي..بس الحمدلله عدت ع خير..
اييه ربج كريم..

ومرت ايام الشهر الخامس..كل يوم اكعد اجبر
نفسي تتفائل..
حيادر منعني اتحرك كلش واصلا ماعندي شي ثكيل
لو شغل زايد..
بس حتى الطبخ ينحشني نحش اكعد..
صارت خطوبة ابن نهاية بس مارحت..بس حيادر
قبل الخطوبة بيوم وصيته ياخذ لتبارك طوج وقراصات
وصبغ وكم اكسسوار..لان عنده روحه للسوك
جانت..

هو من طلعنا ع اساس عمي كله لا تتسوك ومعليك
وخلي جابر يتسوك..بس جابر هم نزل الفلوس
بجيبه وهم ماخذ مبلغ دافعه زبون الهم مقدم
بحدود الخمس ملايين وكايللهم مطلوب وسددت بي
ديني وصارت مشكلة وعمي رجع تمسك بحيادر
اكثر ومخلي الشغل كله يمه وبمسؤوليته..

خلصت الخطوبة ورجع ساعة تسعة تقريبا..
كلساع يخابرني يتطمن لان تاخر علي..
تالي من اجه ويا جماعة كعدو بالاستقبال كملو
حجيهم لان ماكدر يطول بالديوان ويعوفني وحدي..
بقيت انتظره الى ان غفيت بمكاني..
وتعودت ع الاجتماعات والعنده مشكلة وعنده قضية
كلشي يصير عدنا لان حيادر جان هو اليكعد
وي عمه بالديوان..
هسه كامو يجون لبيتنا..
هذا من غير اولاد عمه يتعللون يمه ومحمد اخوي
الي صار صديقهم ويجي باستمرار يسهر يمهم..

خلصت من شهر الخامس ونفسيتي حسيتها ارتاحت..
خصوصا من احس بحركت بنتي ونبقى انا
وحيادر ننتظر شوكت الحركة الثانية حتى نسمعها..
صحتي استقرت وماعندي اي تعب ولا خوف..
حسيت كابوسي اختفى ..

الى ان وصلت لشهر التاسع..من اول يوم دخلت
بي بدت عندي اوجاع..
ماما كامت كل يوم تجيني..محمد كالعادة
يبقى يمنا يروح بالليل ..
باول اسبوع تقريبا من التاسع..ماما جانت يمي
واجه بابا العصر اخذها..
محمد بقى يمنا..خليتهم يسولفون هو وحيادر
وكتله نعسانة داخلة انام..
هم متمددين بالصالة يسولفون وماخذين راحتهم..

تمددت حاولت اغفى ماكو..فوني مو يمي كمت
اريد اخذه..
طلعت بس الظاهر ماانتبهو لصوت الباب..
سمعت محمد يحجي وي حيادر..انفال تخابر
وتتوسل بي وهو مايجاوب..حيادر كله كافي ترى
ذليتها..وهي مرة وعيب عليك انت زلمة وهي تحبك
لازم تقدرها...لو تكطع املها لو ترجعلها..
شرجع وشرطها انت كل عقلك اسوي التريده!
انت ليش قافل..البنية صارلها سنة تخابر وتريد
توصلك ماكو..وانت حتى اختها كطعت علاقتك
بيها..
ادري شوفها شتريد يجوز تريد تعتذر عن شرطها..

خليها تشبع ضيم شلون شبعتني..صارلها شكد
تخابر وتذل نفسها بس مارتاحيت..ماشفيت غليلي..
انجب ولك طاح حظ شاربك مخنننث..عاط حيادر
انا وصلت يمهم وبقيت اباوع بالوحوه..بس حيادر
انطلق بالحجي..
شوف لو تخابرها وتتفاهم وياها ع كلشي لو انا
اخلي شيهانة تخابرها..

شنوو شصاير؟
محمد اشرله يسكت..هو انطلق..لا مااسكت..
اخوج من خطبها شرطت عليه اذا سنة ماخلفو يطلكها
ويتزوج غيرها..
عزا !
اي وهو كلها روحي ماريدج من هسه شلي بيج سنة
واطلكج..
عافها وخرب خطوبته وكعد جنه غراب
ليل نهار ينوح عليها..

صدك تحجون!قابل انتو تعرفون قدركم..عادي
يمكن تصير حامل من اول شهر..
واذا ماصارت ورادت اطلكها واتزوج غيرها؟
لا تطلك!
هه انتو ماتعرفون انفال..راس يابس الحجار
يمه ترف..

جاوبه حيادر..اي وانت شسويت هسه؟كسرت راسها..
وهسه كل اعتقادها انت تركتها لان تريد طفل..
باع خوية ترى لا بيدي ولا بيدك البزر نعمة الله..
ورزق يرزقه لمن يشاء..
اختك مخبلة اكثر منك..ذيج الاشهر جانت يومية
تهددني..اذا مات الطفل مابقى وياك..روح شوفلك
غيري..بس خذيتها ع كد عقلها وكلت حكها لنها
مرة ونفسيتها تعبانة بسبب وضعها..

هسه البت تخابر وتدك وتريد تحجي وياك..
دشوفها بالاول مو مسيجينة كلبها انفت..
تكلك فوك ضيمي عافني الرجال الوحيد الرادني
بكل عيوبي ومرضي..تلكاها هسه نفسيتها
سودة مصخمة..

انا اباوعله وهو يحجي...احب احترامه للمرة..
كل حجيه احاديث واقوال الائمة من يمدح المرة..
احس عنده تعاليم الاسلام الصحيحة.. الي ماموجودة
لا ببيتهم ولا باغلب مجتمعنا..
موجودة بس قليلة ..
وهو يحجي تالي انتبهلي صافنه بي ابتسم..
رجع حاجه محمد..اخذ تلفونك وكوم..حاجيها
وافتهم منها وتعال نريد تفاصيل..

كام محمد بيده فونة ويباوع بطرف عينه لحيادر..
بس طلع باوعلي وابتسم..ليش تتحرشين؟
احبك..
يابوية نسيت حتى شرايد احجي..
اممم باوع لعيوني وتتذكر..
سكتي عني لا اكوملج ومنا اخوج زحمة..
هههه من شوكت تستحي من اخوي..
انا ماستحي تدرين بيه..بس انت تستحين ادري
بيج..
كمت وسويتله بوسة بالهوا..اخذت فوني
ودخلت رايحة انام جااو..

رجعت للغرفة اريد اتمدد..حسيت حالبي تشنج..
كعدت عدل كمت وكفت..
ماكو حسيت وجع كلش..ارتخيت ورجعت تمددت..
صارت عندي اوجاع ..تجي قوية وتسكت فجأة..
خابرت ماما اريد اسالها..زادت الامي..والخوف تماما
مسيطر عليه..
بس سمعتني ماما كالت انا جايتلج عندج ولادة امبينة..

كمت فتحت الباب وصحت حيادر واجه الوجع..
اجولي هو ومحمد يركضون..
هو توتر من سافني هيجاحتار شيسوي..
كال لمحمد شغل السيارة البسها عبايتها ونجي..
وانا اريد امشي واجه الوجع وعطت بصوت ناصي..
هو يروح منا ويجي يمنا..هسه بس لبسي بس لبسي..
نمر ع امينة ناخذها ويانا واخابرلجامج..
لاا خابرتها..

جا يلا استعجلي..لبسني كلشي وانا الالم
فاض عندي..صعدنا السيارة ومحمد يسوق
وانا كاعدة يم حيادر واون..
لحد مااخذنا امينة بطريقنا وبالطريق
ماما خابرت هي واصلة قبلنا ..انا انتظركم بالمستشفى.
ماكدرت احاجيها لان الالم قوي..

وصلنا واول ماشفت ماما..زدت بجي ..
هي وامينة دخلوني جوا..دكتورتي نفسها خابرناها..
بس فحصت كالت فد ساعة وتولدين كلش واصلة..
وانا موجوعة وسمعت تطول ساعة زاد الالم كلش..
كام يصير متتابع لحد اخر شي ماتحملت..
صرخت حيل وكمت ابجي..وكتها ريطو رحاي
لا يختنك الطفل..

للحكاية بقية
بقلم شقراء(قمر كانون)

شكرا جزيلا للجميع..ام زوجي شوي تحسنت ويعني
نكدر نكول زوينة احسن من امس..
وبالنسبة للقصة بعد بارتين ونختم..حيكون بارت الخاتمة
جدا طويل