رواية الشيهانة الفصل التاسع والعشرون 29 - بقلم Shaqraa

السلام عليكم

الشيهانة
الجزء الثامن والعشرين

قبل لا اجاوبها ردتها مرت عمهم..
شنهي حاطلتج سونار وتفحصين حبوبة..
بعد عرسان كلشي يصير بينهم..
اي يمه حبيبة غريفتج شحلاتها مرتبة ..شكد
داخلة لغرف عرسان كبل ..بس هاي اول
مرة ينشرح صدري..

ياخالة فدوة لعمرج تسلمين..انا احجي
ومرت جابر سكتت بعد ماحجت..
وكملت مرت عمهم الثانية الكلام..يمه
اخذيلج مني حجاية وانا مثل امج..
والنعم خالة..
غرفتج دايما مسحيها بملح خشن..
عدجن ملح خشن ام منذر مهو..
اي خية عدنا البنات دايما يمسحن بي
البيت..
اي انطوها تمسح بي يجيب البركة..

بيت عمامهم خلال لقائي بيهم كلش يختلفون
عنهم..
نسوانهم الكبار وقورات وحبابات من نسوان
قبل..
وبناتهم كلش هادئات وماعدهن لطلطة..
ع العكس من جهة خوالهم..احسهم يردولي
زلة ويحاولون ينتقصون مني..

والادهى ..بت عمي
والي يوم من الايام حاسبتها اختي ومفضلتها
ع نفسي..هي وياهم ضدي..
بس حلمهم يكدرولي او يمسوني بشي
وانا بت فيحاء ووحيد..

شوية وكامو راحو..انا غيرت ملابسي
وكعدت قريت ودعيت قبل الصلاة..
ع مااذن وصليت..
خلصت وحيادر ماكو..
خابرته كال اذا خلصتي نزلي يمهم..
ولد عمي يمي بس يتعشون
ويطلعون اجيج..

انا تعدلت وقفلت غرفتي ونزلت..
بالدرج الجهال يلعبون..شفت تبارك
تركض وي ولد اكبر منها ..اجتلي ركض
صرت ع جهة زين مادخلت ببطني..
والولد الوياها يكلها زين ماطكيتي العروسة
ام كذلة المهلوسة..
انا باوعتله وفاتحة حلكي بفهاوة..تالي بقيت
اكركر من الضحك..

شنو من اطفال ذول
عجيب..وين الاحترام وين الضيم ماكو هيبة
لجبير شنو..
صدك شر البلية مايضحك..ولو اطفال ماعليهم
عتب العتب ع الرباهم..
نزلت وهم كالعادة معشعشين بالصالة..
باوعت امينة متمددة..سلمت عليهم
ورحت كعدت يمها..

ها سلامات شبيج؟؟
هلا حبيبة..يمه النزف ماخذني ومدري
شسوي احتاريت..
غير تروحين للدكتورة شلون تسكتين!
رحت وهالعلاجات ماجاي تفيد..انطيج
اسم دكتورة ماما كلش مضبوطة
وروحيلها يمكن تفيدج..
علواه حصلي الي حتى باجر اروح..
اي بعدين اخابرها واكلج..

شفتي هدومج خو ماناقصهن شي؟
لا ..مابيهم نقص..بس استغربت يعني طفلة
شلون تلعب بالملابس قابل مشايفة هيجي
عد امها..
يمه هي امها شتعرف هايشة انطيها علف وخلفة..
دربالج منهن ترى ذن حياية..وانت درة
بيضا ماعدج دغش..

الله كريم..انا مااكرهم ولا عندي شي
وياهم بس هم هيج حاقدات ..
يغارن يمه..زلمهن سايكين عليهن مثل
ماينساك المطي حشاج..
اي ليش مو خطية!طبعا يضوجن..
من ايدهن..رجلج ع ماتعلمينه وابنج ع ماتربينه..
مالج غرض بيهن عدج حيادر يسوى
عشاير..
الحمدلله ربي يحفظه..

بقت تسولف وياي شوية عن اهلي وهاجر..
بس طول مااحنا نسولف خالتي عينها علينا..
ومن صبو العشا امينة كالت سنديني اكعد لان
ماشتهي اكل بحدي..
سندتها ووصلتها للسفرة وكعدنا..
جاي اكل ودك فوني..جاوبته حيادر..

هلو حبيبي..
ها شيهانة شسمه شامبو مالتج..والغسول وشنو
رايدة بعد..
انطيته اسم الشامبو والغسول وصابونة ..
بعد عاجبج شي..
اي انت ..حجيتها وانتبهت لليمي تفشلت
وهن كلهن يباوعن..
وهو ضحك بصوت عالي..جايج بعد طوايفي جايج..
سديت الخط منه وانا اضحك بخجل نسيت
نفسي يمهم ..

سديت الخط وبيبيتهم كالت..خايبات شعدجن
مبگگات عيونجن البت خابرت ريلها ..شني
ماتخابرن زلمجن..
بقن يضحكن ومتعجبة عليهن يترزلن لو
ينمدحن هن يضحكن..يمكن متعودات ع حجيها..

خلصت العشا وكعدت يمهم..
جاي يشربون جاي ومرت خالهم كاعدة بصف امهم..
باوعت لايدي وحجت..اكلج هذن ظافيرج
لزك لو صدك؟
لا اظافري ذني مو لزك..
جا شلون تسبحين تتوضين نكسات هيج؟
جاوبتها خالتي..اي جم يوم يتكسرن وتكصهن..
بت عمها من دخلت هم ظفرها ظفر حوم
بس اشتغلت تكسرن وكصتهن..

لا البس كفوف مااقصرهم..ونظيفات مابيهم
شي لان انظفهم بفرشة ومعجون ..
جاوبتنا مرت جابر..خايبة سني اتعاجز
افرجة هنوب ظافيري ..شني من خلك
عدج..
واليمها كالعادة نزلت السفاهة عليهم..

جاوبتها وانا ابتسم..النظافة والعناية ماتحتاج
خلك..يعني ابقى مبهذلة لان مالي خلك!
بالعكس اذا ضايجة من اتنظف واكشخ يتغير
مزاجي وحتى لو مالي خلك يصير..
بعدج هسه تحجين عود جم شهر واذكرج..
اي انشالله نذكر بعض ليش لا..

من شافوني هيج دارو الموضوع وبقو
يسولفون غير موضوع..
حنين اجت جايبة مواعين الفاكهة..ووياها
سارة اخت هاجر وتقى بت جابر وبعد
بنات خوالهم ماعرفهن..يلا وزن بنات..
شاها اخذيلج لغرفتج موزة شي خاف تجوعين..

لا مااشتهي اكل بالليل بعد تعشيت..
مو تفقدين طاقة..حجت وركصت حاجبها..
اذا فقدت عود اعوض من حيادر..حجيت
بابستامة..
وهن بقن يضحكن كلهن..

سمعت صوت حيادر من بعيد..ياالله..
شيهانة وينج..
صاحت امه..تعال محد هنا ادخل..
دخل هو وبيده علاكتين..الله بالخير..
هلا بيك ..جاوبو كلهم..
شنهي بعلاكتك راوينا ..
شامبو لشيهانة لن عايفته بالحمام ولكتهم
شاربينه..اذا شفتو واحد وغف يعني
هو الشارب الشامبو..

هن سكتن كلهن..لان حجاها باستهزاء..
وكلب يلا شاها..
صعدت وهو وراي..طلعت المفتاح وفتحت
الباب
ودخلته من جوا وقفلت..
هو حط العلاكات وشبكني..مشتاقلج ولج
خو مازعلتي من مساع؟
لا عادي بس عيب تعوف بيت عمة وحدهم..
زين ومن سالفة تبارك..ترى جاهلة وامها
مسكطتها..
ع كولتك طفلة مانكدر نحكم..يلا مو شي جبير
انسى..

بعد عمري العاقلة..شيهانة معدلة انت..
انا جبت بقلاوة وكنافة جيبي خل ناكل..
اي هسه ..اروح اجيب ماعون بس شلون
انزل استحي توني صاعدة..
لا المن ماعون..جيبيها هيج احسن..
فتحنا العلاكة واكلت انا ويا وبقينا نسولف..
لحد ماتمددنا ع السرير ..اجت ببالي حجاية
بنات خالة الصبح..
اريد اعرف معناها..

اكول حبيبي شنو يعني يبغز..؟
ههه ليش منين سمعتيها؟
يعني شبيها عيب؟
مو دائما..بس حسب الجملة التجي بيها والمقصد..
اها يعني شنو معناها..
يعني يبز لو يزرف هيج شي ..
عزااااا !!!

نززتيني الله يلعن بليس شنو!
ذولا بنات خوالك الصبح من شافوني
كالو اكلي تشريب لا تتريكين تحتاجي
يقويج لان حيادر يبغز بيج..
هو ملامحه انكلبت من حجيت ورفع حاجب..
وانت شجاوبتي..
كتلهم ماشتهي لان مافهمت شيقصدون بس ضجت.:

يرحلج فدوة ذني فاصلات عذريهن..ياهي
الحجت اكيد تحرير لو انتصار..
شسالفة الحرب العالمية هههه ماعرف اسمهم..
ههه ام لسان ..حفظي اسماء حتى التاذيج
كليلي عليها..
لا تخاف عليه مااسكت انا ترى..
ادري بيج كفو..

مر ع زواجنا عشر ايام..والوضع نفسه
جان ..يوميه يجون خطار وهواي ناس وهوسة..
لحد ما زين خفو كلش..بس نسوان
خوالهم يمرون ..لان اصلا متعودين من قبل هيج..
نفس المنطقة وبيوت واحد يم الثاني..
بس بيت عمامهم بظهر البيت صايرة بيوتهم..

رجع حيادر لشغله..يطلع بثمانية ونص ويرجع
الظهر وي الاذان ..يتغدى ويرتاح وقريب
العصر يطلع..
ورا طلعة حيادر يوم ثاني من رجعته للشغل..
اندك الباب وانا جاي امشط..كلت اكمل غرفتي
وانزل اشارك بالشغل لان مايصير بعد كاعدة
وهم يشتغلون ..

بعد ماكايلة منو انفتح الباب..دخلت حنين..
صباح الخيير..
صباح الخير..
اذا خلصتي عمتي تكول ختنزل تساعدنا ..
اي اخلص غرفتي وانزل ماعندي شي..
خوش انا رايحة هم انظف غرفتي ..اذا سالتج
عني كليلها تنظف غرفتها..
اوكي..طبعا احجي وياها برسمية ومعتبرتها
حالها حالهم..

خلصت غرفتي واخذت جفوفي وقفلت الباب ونزلت..
خالتي كاعدة ويمها عمو جاي يسولفون..
والجهال يلعبون يمهم..
صبحت عليهم وجاوبو..صاحتلي خالتي..
تعاي ليجاي خن افهمج..
رحت يمها وحجيت ..اي تفضلي..
باعي حبوبة بعد مدام زلتج طلع لشغله..
انت تنزلين تعاونينا بكلشي نسوي..
شو كعدي وسمعي..

كعدت وانتظرها تحجي..
باعي احنا الريوك كل وحدة تسوي لزلمتها
وجهالها..
بس الغدا لا..ام عادل هي التطبخه..وتساعدها
بي نهاية مرت يابر وحنينة تزهب الخضرا
الزلاطة هيج سوالف يعني..

والعجين تعجنه نغم وتخبز نهاية وسارة وتساعدهن
تقى..
والعشا حنينة والبنات الصغار وياها اذا جان
ماعدنا خطار..
بس دامج جيتي ..بعد اماعين الغدا عليج لن جانت
ع البنيات الزغار..والعشا تتعاونن بينجن بماعينه..
والتنظيف عليج الفوك وعلى البنات الجوا..

يعني هسه اروح انظف الفوك ؟
اي اخذي غريضاتج وصعدي نظفي..بس
كون شغل معدل ..
هي تحجي وعمو يفر بسبحته ويسمع..
من كمت اريد اروح انظف حجه..بوية
حمامجن الفوك حط بي صايونة طوز واحد
يغسل..امس صعدت احتاريت بيش اغسل..
اي بس وين الكى الصابون؟
روحي لام عادل يمها الچيل كله وتندل..
اي انشالله..

رحت من يمهم وانا البس بجفوفي..
دخلت للمطبخ ام عادل الي هي ام هاجر شافتن
وابتسمتلي..هلا عروستنا تريكتي؟
اي تريكت وي حيادر ..
بالعافية حبيبة..
الله يعافيج ..اريد صابونة للحمام الفوك..
بلة دخلي للدهليز شوفي تلكين بي..ماظنتي عدنا
لن حيادر ذيج الايام ماراح للسوك وعايزنا
واجد مسواك..
هم يسمون الستور او المخزن التابع للمطبخ دهليز..

اخابره واكله يتسوك تردين؟
علوا خية بلياه بالضيم احنا..
زين كتبيلي قائمة شنو تردون وادزها اله..
هسه اروح انظف الفوك..
يولي انا انظفه عنج بعدج عروس..
لا عادي..

صعدت للفوك..اباوع منين ابلش..تالي
بلشت بالحمام اول شي..خليت بي صابونة
وسويتلي خلطة منظفات وغسلته وكملت..
وبعدين طلعت لغرف الخطار هم نظفتهم وهواي
هوسة لان الجهال يدخلولهم..
الحمدلله انا سريعة بالتنظيف واحبه..ماورطوني
بطبخ..
كملت تنظيف وطلعت مبخرتي فتحتها
بالممر..

دخلت غسلت وبدلت ملابسي ونزلت جوا..
خالتي ورجلها كاعدين بعدهم...ويمهم الجهال
رحت للمطبخ ام عادل ونهاية جاي يطبخن
لان هم وي الاذان لازم الاكل جاهز..
سالتهم اساعدكم بشي..جاوبت نهاية..بت عمج
اليوم ملتهية مانزلت..تعاي طلعي الخضرا
وغسلي الخس..

رحت طلعت الخضرا وكعدت اقلمها مثل
ماشايفة ماما تشلع عروكها تخلي بس الناعم..
انتبهتلي نهاية ..
يا فلكككك شسويتي بالخضرا!
ليش شبيها؟
كطعتيها تكطع جا هو هيج حتى خضرا ماتعرفين
تلكطين..
بالعكس هيج انظف..

حجت ام عادل..نهاية خليها تذب عروكها يوكفن
بالبلاعيم..ونشوف اذا قبلو عليها اليوم انوب
نصل نذب عروكها..
ياخية شكد يرادلها كعدة تشلع الكلب..
لا شوفي شاها بسرعة خلصتها ماطولت..
هي ماعجبها بس سكتت..

كملت الخضرا واخذت الخس غسلته وحضرت
مواد الزلاطة..
كعدت اثرم ودخلت علينا بت خالهم..نفسها الحجت
علي بالمطبخ ام البغز ..هي شابة
هيجي ثلاثينات عمرها..بس سوالفها مالت
عكايز او تكبر روحها كوة..

كواجن الله حبايب..
ياااع ليش تثرمين الخس بجفوف شنهي نكس..
استغفرالله حشى النعمة ..لا بس انظف وهى ايدي
تبقى ناعمة..
وهاي انت تضلين هيج لابسة جفوفج بكل سالفة
حتى تضلين ناعمة..
اي عادي بس وقت الشغل..

جا خوش..وينها حنينة ماكو يمجن..
جاوبت نهاية..اليوم عدها روحة للدكتورة ..
اتاني بهاد يحل وياخذها..
هسه شلزكت بهاي دكتورتها جنها ماتفتهم شي..
اذا هي بيضها كبار جا ليش ماتحبل..
بعد كلتلها خل يفحص بهادر..وع اساس
يفصحون اليوم ..
اي بيها الخير..

وانت حبيبة شني ماعدج لعبان نفس شي
شياتين..
كللش عندي لعبان نفس..حجيتها وقصدي منها
المنافقة..
اي بيها الخير..لا انت امبينة من وجهج بيج
فرخ..هو رجلج نفس عمي حيد..وهم ماناطيج
فكة ..
كلشي بيد رب العالمين هو يرزق..حجيتها وخصمت
الكلام وياها..
كالت بحسرة..اي صدك ..

كملت الزلاطة بطاسة جبيرة كلش..وسالت ام
عادل شنو تريد بعد..كالت روحي حبيبة
صلي ماعدنا شي..
طلعت ورحت لغرفتي..شميت ملابسي ريحتها طبخ..
بعد لازم انظف وادخل مطبخ يلا ابدل ملابسي..
اخذتلي دشداشة ورحت للحمام سبحت واغراضي
حيادر جابلي سلة الها..طلعتها وياي للغرفة..
كملت وصليت وتمددت ..

شوية ودخل حيادر..كمتلي بابتسامة..
الله يساعدك حبيبي..
ويساعدج بعد عمري..
نزعته سترته واخذتها اعلكها..
هو ذب البنطرون ويحجي..شلونج اليوم ..
تمام ..ساعدتهم بالبيت..

تمدد بالفراش وكال تعاي يمي..
اجيت تمددت بحضنه ..باس شعري..خو ماتعبتي؟
لا تنظيف وخضرا ..يعني اشياء بسيطة..
اي انت نادرة ماينخاف عليج..
ههه نادرة بس مو بالاكل..
تتعلمين محد طلع من بطن امه يعرف..
اي يعني جنت اوكف يم ماما اتعلم بس ماجربت..
جوعان انت..؟

اي جوعان ونعسان..كامل غدانا..
اي كامل صلي وامشي ننزل..
لا روحي كليلهن يصبن ع ماخلص..
انا لبست ونزلت جوا..جانو البنات يفرشون
السفرة..
رحت للمطبخ ساعدتهم بنقل المواعين..
وكعدو يصبون ..
شوية ونزل حيادر..

تجمعنا ع السفرة كلنا..منذر ابو عادل وعائلته..وجابر
وعائلته ..بس حنين مانزلت وبهاد بعده بالدوام..
عمو وخالتي وامينة والكل كاعد..
حجه عمو..حَيدَر البيت مابي مسواك بوية..
اي بوية كتلهم يكتبولي اليحتاجونه والعصر
اجيبه..
اي وجيب وياك من هذا التغسلون بي هدومكم
ريحته حلوة..
شنوه هذا؟

مادري بس هدومكم بيها ريحة حلوة وامينة
كالت هذا شامبو يغسلون بي الهدوم..
انا همستله..اي معطر ملابس ينحط ورا التايت..
ها بسيطة انشالله اجيبه واذا محتاجين شي
تذكرو..
ياالله الحمدلله..حجاها وكام..شيهانة جيبي
الجاي وتعاي وراي..
اي هسه..

هو صعد وخالتي كالت..كملي الماعين وصعدي..
انا رحت للمطبخ انظفه ع مايخلصون..
غسلت الموجودات ونظف الطباخ والكاونتر
ووكفت انتظر ..
شوية ورحت دخلت..بعدهم كاعدين ويسولفون..
اشرتلي امينة..شيلي يمه مخلصين ترى..
وراحت لغرفتها..
كعدت الم والبنات محد كلهم كايمين..
بس الرياجيل
كاعدين يسولفون..

نظفت الصحونة بالسفرة كلها وانترست صينتين
كبار مواعين..
ماكدر اشيلهن شلون..
بقيت انقل شوية شوية..
اخر شي اخذت الصواني ورحت للمطبخ..
وبديت اغسل بس هواي مواعين وانا مامتعودة
هيج شغل..احس ظهري تشنج..
اباوع للجاي محد اجت صبت..

كلت مشكلتهم لان تعبت بعد..اخذت جاي لحيادر
وصعدت..
فتحت الباب باوعلي وصفن..شني السالفة
راح يصير العصر..
اي حبيبي غير كملت مواعين..
شجابج عليهن بعد..هذا شغل الزغار..
لا خالة كالت انا اغسلهم بعد..
بيها الخير..تعاي يمي مشتاكلج..

بس ابدل..
شلج بالهدوم تعاي شيهانتي..
اجيت يمه وهو كاعد ع الجرباية ورجليه
منزلها بالارض..عوفي الجاي ماريد..
اريد حليب..يحجي وياشر بنظرات وكحة..
وانا واكفة جرني كعدني بحضنه ..

حط خشمه ورا اذني ويتنفس..شيهانتي المدللة..
انا بحرارة انفاسه رجفت..
جرني لحضنه عدل واخذ شفافي..وانا ايدي لازمته
من ركبته واجره الي اكثر..
واحاجي كلمات شوق وغزل..وهو يزيد جنون..

اخر شي نمت ع الفراش وهو تمدد يمي..
جرني لحضنه ويحجي بهدوء..تدرين بالشغل ودكيتي
براسي..
حاجيته بثمالة..لعد ليش مااجيت..
ههه صبرت روحي بخيالي..
هههه ..ضحكت وانا احضنه اكثر..
ثنينا نعسانين بسرعة نمنا..

العصر هو راح للشغل وانا بقيت بالغرفة..
اندك الباب وانفتح..دخلت تبارك..بيبي تكول نزلي
يمنا كعدي..
اي هسه انزل ..
كمت لبست ونزلت يمهم..كاعدين كلهم
يسولفون وياكلون جاي وكعك..
بس نسوان طبعا..

شوية ودخلو بهادر وحنين..بس استغربت حنين
لابسة بركع ..هي جانت ما مبركعة بس عباية
وتحنيكة. مرات..
دخلو وخالتي صاحت ..اي عفية بحنينة زين
تسوين تبركعتي احسنلج..كليلي شكالت
الدكتورة..
هي اجت كعدت وبهادر راح للمطبخ..

عمة تكول بيوضج نشيطة ورجلج هم
بس خاف ملزومة لو مجبوسة..
اي جا مو كطعنالج شنهي بعد..
خاف مايعرفون لو نروح لغيرهم احسن..
اي نروح جا ليش..بس خوش تبركعتي
ماشفناج من طلعتي..
اي بعد احسنلي خو ماطلع جمالي للغريب..
وشاها احسنلج انت هم لبسي..

لا مالبس..حاجيتها بثكل..حيادر مايعجبه
هيج لبس..
يااع جا عاجبه مطلعة زرورج للغرب..حجت خالتي..
ونهاية كملت..حبوبة بعد حصلتي زلمة بلبسج
كافي ..

هالحجي بدخلة بهادر من المطبخ..
انا جاوبتهم..لبسي مستور ومحد اله حجاية عليه..
انا وزوجي متفاهمين ع لبسي ..ومالابسته حتىً
اجر بي زلم..الرجال اليجره اللبس هذا مايتسمى
رجال ..
حجه بهادر وهو واكف قريب من عندي..
ماهو بكيفج..اليوم يجي رجلج ونحاجي..شني
نسوانا مبركعة وانت مخلعة..

للحكاية بقية
بقلم شقراء(قمر كانون)

اريد احجي وياكم بموضوع كلش اثر بيه اليوم
ومن بداية كتابتي لهسه..اول مرة احس باحباط وانقهر
هيج بحيث كوة كملت البارت..
احد المتابعات طرحت استفسار..هي من متابعاتي الاوائل
من نشرت قصة نقيب قلبي موجودة..وعمرها اكبر
مني وفهمت من تعليقاتها السابقة هي مستقرة بالخارج
بس تزور البصرة كل ما سمحت الها الفرصة..باختصار
استفسرت عن لهجة اهل حيادر..وانا نزلت تعليقها حتى اجاوب
كل الي سالو نفس سوالها يعني شي طبيعي مابي شي..
هذا استفسارها وهذا جوابي

مجرد سالت منين ومسامعة هيج لهجة وماجرحت ولا تجاوزت ع غير محافظة..
بس كمية الردود والجهل البيها صدك ازعجني..يعني احنا يقرون ويانا من الوطن العربي كله وتحياتي الهم طبعا..بس اذا شافو القتالات بالتعليقات والقذف والانتقاص بينا..
شنو نظرتهم الراح ياخذوها!!راح يكولون اذا الفئة القارئة هيج
اخلاقها لعد الفئة المنغلقة شنوو..يعني انتو شوهتو صورة بلد كامل!!!

اوجه كلامي للتجاوزو ويدخلون يسبون ويعاركون..ترى هذي
مو شطارة ولا حب لمحافظة..لا هذي قلة وعي وقلة ذوق..
لان مليت من هذا الشي وبكل قصة الكى هيج نماذج..
بقصة فراشات نفس الشي صار بس باهل بغداد..
اول البنات الي صادقتهم بالواتباد وكلش احبها ومعتبرتها
اخت صغيرة..تهمتني اقلل من اهل بغداد وبناتهم وانفعات بتعليقها
وبعدين مسحته..رغم تعرفني شنو والكل يعرف ماانتقصت منهم
مجرد نقلت حياة عائلة وبس..رغم هذا بقية البنات اخذو الموضوع من منظور عادي وشافو هالعائلة تمثل نفسها وبس ..

هسه نجي لعائلة حيادر..ناس من شمال البصرة وماكدر اكول
المنظقة لان مايقبلون ..عائلة ملتزمة بتقاليد نصها اذا مو كلها بالية
ومالها اي اساس...مجموعة عوائل ببيت واحد..
اكيد تصير نفستيهم تعبانة قبل لا ننتقدهم بس ترى هذا احد الاسباب..
المهم مو تبرير الهم..بس الحق يقال..

طبعهم هذا وعاداتهم تمثلهم هم..اني اعرف هواي ناس يمهم
بنفس منطقتهم بس يختلفون بكلشي..بطبع وبتقاليد وحتى الحجي..
لان هم معتزين بلهجة اهلهىم واختلاطهم جدا قليل بالنسبة للنساء لهذا
مفرداتهم البعض يشوفها منسية بس هي موجودة..

اني طرحت القصة مو انتقاص من لهجة..ولا انتقاص من منطقة
ومن اول بارت ذكرت..القصة تلكون بيها امور اجتماعية
وشي مختلف وواجب طرحه..احنا من نطرح هيج امور بقصة
مو حتى تجي كم وحدة تعيط وتمد لسانها وتكول تروحين فدوة
لكذا لهجة لكذا محافظة..

احنا نطرح هذا الشي للتوعية..للثقافة
حتى من تقرين تتسلحين بمعلومة جديدة..تفيدج وتثقفج
وتعلمج شي يمكن جنتي تجهلي..وكووومة يحجولي بالخاص
تدرين شكد استفادينا بامور طرحتيها..وهذا شي يسعدني
وارتاح من اسمع هيج..

راح انزل تعليقين وانتو حكمو اني مسحت اسمهم حتى ماسببلهم
احراج..بس اكلهم من تشوفين هيج تعليق كدامج شنو نظرتج
التاخذيها عن صاحب التعليق يدل ع ثقافته!!
ورجااااااءً اذا فعلا تحترموني محد يجاوب هالتعليقات بتجاوز
لان جاي اطرح نموذج وانطيكم دليل ماجاي اكلكم كاثرو او اتبعو هالاسلوب

احب اكلهم ..لا تنه عن فعل وتأتي بمثله ...عار عليك اذا فعلت عظيم..

وبالاخير اني ماافرق بين متابعة واخرى بس بشغلة الاحترام..الي يحترمني
اخلي بعيني بس الي يتجاوز اسفة..ماكدر اجامل هيج انسان..
وتحياتي لكل محافظات العراق وكلهم اهلنا وناسنا..

مافرقت بين
محافظة ابد..جياد جان بغدادي شجاع عمارة ومرتضى دليمي وصقر
وسيوان  بصرة
وقيس روسي شتردون بعد ..موحدة كل المحافظات والدول هم .:
مودتي الكم واتمنى من تعلقون لا تنفعلون زايد ..لان تسببون مشاكل بلا فائدة..