رواية الشيهانة الفصل الثامن 8 - بقلم Shaqraa

مساء الخير

الشيهانة
الجزء السابع

ماما ولله مارايحة ويا ولا بينا علاقة..
بس خل افهمج فدوة..
فركت وجهها وحجت باعصاب..احجي كلشي
لا اكطع النعال عليج هسه..
لا عفية ماما لاا تضربيني الله يخليج..حجيتها
وانا ارجف..انهاريت لان اول مرة امي تتصرف
هيجي وياي..اعرفها عصبية وقوية وبوقت
تتعصب نبقى نرجف منها..بس اول مرة
انحط بهيج موقف..

هسه تحجين لو احط الحجاية بحلك ابوج واخوانج؟؟
حجيت برجفة وانا اريد انطق ماكدر..
جريت نفس ومسحت دموعي..ماما هو مرتين او ثلاثة
حاجاني..
بس مو شي شخصي ابد وغلاتج ..حجيتها وبجيت..
عوفي البجي وكملي ..
اي هو ساعدني ع مود الدرجة لان بهادر حاطلي
مو استحقاقي..

وليش ماحاطلج درجة زينة؟؟
ماما مو تعرفي يكرهني ..
اعرف عايت ذيج الكصة وانت غير تكليلنا
جان ابوج راح حطه عد حده..
بعد هي صارت صدفة وعرف حيادر وساعدني
وامس ..اجه..
اي واجه شراد؟
خطبني وكال انا ..
يحبج؟؟
هزيت راسي وانا مدنكة..

اي ادري بي حاط عينه عليج وامه تلوب عليج
ونسوانهم يكولن هاي التريد تخطبها ام منذر..
حاولت ابعدج عنهم لان مايناسبوج..
ماما انت مدللة وعشتج تختلف..يعجبج تصيرين
مثل حنين؟؟تسولف امها تكعد الصبح وتخبز
وياهن وطول اليوم كراب ومخطار طاب طالع..
تتحملين هيج عيشة انت؟؟

هزيت راسي ..لا ورفضته اصلا وكتله طلبك
مرفوض..
وشلون اخذتي السبحة؟
نساها وراح كلت خطية تبقى ..بس كلت من
اشوف حنين انطيها الها..

لا خليها يمي وانا اتصرف..وحجيج راح
اخذه راس مال واصدك مابينكم شي..
بس اذا عرفت مجذبة عليه يا شاها الكلية تنسيها
وازوجج لاول واحد يخطبج..
بس ماانطيج لهذا المتخلف فاهمة؟؟

هزيت راسي وسكتت..هي طلعت وخلت الباب
مفتوح وراها..
انقهرت لان انهزت ثقتها بية..
قررت اسد هالموضوع نهائياً وماافكر بي..
ماريد ماما تبقى تشك بيه واصلا انا فعلاً
مااتوافق وياه ولا اكدر اعيش
عيشته...

رجعت غطيت راسي بالللحاف وبقيت
ابجي..
مر وقت شوية وصاحت عليه ..شاهااا..كومي
تأخرنا صارت ظهر..
كمت غسلت وجهي ورحت لكيتها بغرفتها..
باوعتلي وهي تلف بحجابها..
شمنتظرة مامبدلة؟
مابيه حيل ماما ماريد اروح..

روحي بدلي وتعاي بسرعة..
ماكدرت اجادلها..رحت بدلت واجيت..
طلعنا وهي ساكتة..
لحد ماوصلنا للسوك وحاجتني..
لا تبقين مغيمة..حجيي وياج لمصلحتج..
ولو جان غير واحد مااتصرف هيج..
بس هالعائلة تنسيها وتنسين شي اسمه
حيادر..

ابد ماافكر بي بعد بس انت لا تزعلين مني
ولا تفكرين..
لا مخلية ثقتي بيج بس اخاف من هيج اشكال..
ابن العرب اذا رادله واحدة يسوي الممكن
والمستحيل حتى ياخذها..
بس مدام انت رافضته ممكن نخلص منه ..
تطمني ماما وافضته وبعد اخر مرة نحجي
بهذا الموضوع..
عفية عليج هيج اريدج..

كملنا مسواك ورجعنا اخذنا بطريقنا
غدا..
لكينا بابا ومحد جايين..
كعدنا تغدينا بس بابا مرتين سالني شبيج
واكله نمت هواي تالي كال امبينة مشتاقة
لحنونة تردين ناخذج..
ماما بسرعة جاوبت..لا هالايام يعزموها
اهلها وتشوفها ..
شكد فرحت من سمعت هالايام يعزموها
بس هي ماكالت يمكن بعدها ما تدري..

ورا ماخلصنا اكل رحت لغرفتي..
لزمت الفون راسلت حنين شوية وجاوبتني..
حجيتلها الصار وعن خطوبة حيادر وماما
شافت السبحة..
بقت الوم بيه وتحجي عليه وانا غلطانة وتصرفي
غلط..وانا اعرف تصرفي غلط بس جنت
اريد ابرر لنفسي..

سالتها ع العزيمة كالت عكب باجر..
فرحت كلش وحتى الضوجة راحت..
كمت وكفت كدام المرايا..كصيت كذلة
قصيرة وشسورتها ..
سويت شعري كرون صغار لان اصلا كلش قصير..
لبست بجامتي واخذت الفون وتمددت..

غفيت شوية وحسيت حركة بالغرفة..
فتحت عيوني لكيت ماما جايبتلي كاستر
عبالها كاعدة..
ها نايمة ..ابقي كملي نومتج عبالي كاعدة..حجت وهي
تخلي ع الميز..
لا شوي غفيت ..عاشت ايدج مشتهيته ويا جلي..حجيت
وانا اكوم..
اي صبيت فوكه جلي..
تقربت منها وحضنتها واعتذرت..
واخذت ماعوني وطلعت اكلت وياهم..

مرن يومين وصارت عزيمة حنين..
رجنا من الصبح لبيت عمو..حضرنا
الاكل والحلويات وجهزنا كلشي..
جانو عازمين حنين وبهادر وامهم وابوهم..
ماما مثل المحتارة بوجودي هناك..
لا تكدر تمنعني اروح ولا ترتاح لوجودي
وياهم..

اول مااجو هم كعدو بالاستقبال وحنين اجت
يمنا بالمطبخ..
امي وامها جوا يمهم وبس هند بمنا..
هي تقربت يمي وتسولف..
شاها تدرين حيادر رح يخطب..
فتحت عيوني ع وسعهم واحس نغزة بقلبي صارت..
يخطب منو!؟

بت خالته من قبل رايدها وكالو يمشون عليها الخميس
الجاي..
يعني هو كال؟يعني طلب منهم يمطبوله..
اي كال لعمتي روحو خطبوها كافي هواي انتظرتها
وهي تتعزز..
عاد عمتي خابرتهم كالو قابلة..

اختنكت من حجي حنين وانقهرت..ليش مسوي
نفسه يحبني ومستقتل عليه؟؟
ليش طلع حاجز بت خالته وانا يمكن رايدني
بس لعب ودخل بدرب الخطوبة حتى
يطيحني بشباكه..
لزمتني البجية وماعرف اكتم بجيتي انا ابد..
امسح دمعتي وتنزل..

اخذتني للحمام غسلنا وبقت تحقق وياي
ليش ضجت وشنو احبه كتلها لا بس انقهرت لان
نصب عليه..
حاولت تغيرلي الجو وكالت امشي سلمي عليهم..
لبست كاب فوك البنطرون مالتي والبدي
الاسود النص ردن ..ولفيت شالي ودخلت..

دخلت سلما وابوهم جاوبني هلا بوية..
امهم بوستني وتهلي بيه..
البنية الوياهم نفسها امينة الدهنت بلاعيمي ..
مرت ابوهم الثانية..هم بوستني واسلوبها
كلش لطيف وهادئة..
اما بهادر اصلا مارد السلام..

كعدت شوية وماما يبستني بالخزر مالتها..
بسرعة كمت رحت للمطبخ حضرنا الميز
بالصالة..
ورتبنا كلشي حتى بس ياذن نصب..
وي الاذان بس صلو ..
احنا حمينا الاكل ونريد نصب..

دخلو نسوانهم للمطبخ..كالو نساعدكم بس ماما
ما قبلت واخذتهم للصالة..
واحنا ننقل الاكل..
لحد ماخلصنا واباوع لماما وجهها احتقن ..
كعدنا كلنا سوا ع الاكل وبابا جان موجود هم..
وشكله هم ضايج..

اكلت لكمتين وكمت بسرعة..لشوية حنين لحكتني
وهند قبلها..
بس حنين بقت نفسها تلعب وتلوب..
راحت للحمام ركض وسدته..
سمعتها تتقيأ وماتقبل ادخل ..تدري بيه اذا شفت
احد تقيأ كدامي اتقيأ ويا ..

بقيت ادك بالباب شوية وطلعت..تنشف وجهها
بالخاولي وفحطانة..
لج شبيج حتى مااكلتي شي بس لا تسممتي؟؟
حجت وهي تمشي للمطبخ..
لا بس شاكة حامل بعدني ما متأكدة..
ضحكت بسرعة وشبكتها..وهي تكلي بعدني
مامتتكدة..

كعدتها ماخليتها تشتغل..وانا وهند نغسل مواعين
وهي تسولف يمنا..
بس نص حديثها غفلت عنه بصفنتي بحيادر..
حذرتني منه وكالت ابو نسوان بس ماصدكت..
بس ابد ماامبين عليه..
زين ليش مقهورة انا!
مااعرف بس احس قلبي واحد واكف ويدوس
عليه برجله ..

حاولت ماابين بس مااكدر..وانا تفكيري ازدحم
بقفلة امي وابوي لو خطبة حيادر لو شنو بضبط
ماعرف افكر بعد..

شوية واجو جابو المواعين واخذو الجاي..
ومرت ابوه بقت يمنا ماقبلت الا تساعدنا
بالمواعين..
انا جاي امسح الكاونتر وصاحو ع حنين
زوجها يريدها..
بس دخلت مرت ابوهم باوعت لهند وحجت..
اكلج حبيبة فدوة لعينج بس شوفي اذا خلصو
جاي نصبلهم بعد ..لان الشيخ يحب يشرب
ورا السمج فد استكانين..

ركضت هند..اي تدللين صار..
بس طلعت باوعتلي وحجت..شاها ليش رفضتي حيادر؟؟
استغربت..امم هو يحب بنت خالته وخطبها
انا شنو؟؟
انت اوله وتاليه..حيادر يريدج الج..ويحبج
من اول ماشافج بصف الاول..
يعني ماخطب؟
لا مايخطب اص.. قبل لا تكمل اجت هند جابت
الاستكاين ..

هي حولت بسرعة..عادي كل مايطكن انا ادهنهن
الج تدللين بس تعاي..
وهند شاركتنا الحديث وبقت تحجي عن بلاعيمي
شون اخذلي ايام صوتي يختفي..
لحد ماخلصنا ودخلو جوا..بقينا بس انا وهند
بالمطبخ..
اجت امي بسرعة..

شاها لبسي وروحي للبيت بسرعة..
ها ماما شنو صار..؟
ماصار شي..ودعي حنين وروحي للبيت
فاهمة؟؟
اي اوكي بس صيحي حنين..
راحت صاحت حنين واجت..توسلت ابقى
كتلها اتلفت ماي من المواعين صرت زفرة
رايحة اسبح..وهي تدري بيه
نحسه من اقل ريحة الزم الحمام ..

ودعتها ورجعت لبيتنا وانا التفكير ذابحني..
اكيد حيادر حجه كدام حنين يريد يخطب
حتى يغيضني..
ومرت ابوه باعتبارها تعرف اسرارهم وكشفت
جذبته..

بس انا ليش فرحانة! بس صدك مرت ابوه
شلون تعرف بي يريدني!
زين بعني علاقته قوية بيها..
اشو حنين تكول ميحبوها ودوم عرايك!
لا صدك دخت وماعرف راسي من رجليه..

سبحت وطلعت للمطبخ سويتلي جاي وكعك
لان مااكلت بالغدا..
توني كاعدة اكل ودخلو ماما وبابا..
بابا دخل للبيت وماما جرت الكرسي وكعدت يمي..
بقت صافنة عليه..انا دنكت بسرعة..
تنهدت وكامت..
انا شلت ماعوني ودخلت..
لكيتهم كاعدين بالصالة..

كعدت يمهم ..بابا باوعلي وحجه..
ذول صدك ماعدهم منطق ولا ذرة عقل..
باوعتله ماما جنها ماتريده يحجي..
هو باوعلي وحجه..
تدرين خطبوج من عدنا؟
انا هنا خرطت رجليه وبدت ..

هه ضحك باستهزاء..رجال متزوج وعنده ست اطفال
يخطبون اله بنيه بالعشرين ؟شنو
هالعقل التنك هذا..

للحكايةبقية
بقلم شقراء(قمر كانون)

هو غير العطر يخليج تدمنين شخص ترى

خوفتيني 😯😯😯