رواية الشيهانة الفصل السابع 7 - بقلم Shaqraa

مساء العافية

الشيهانة
الجزء السادس

خابر عليه السايق وكمت ..مشيت وانا
اتلمس شعري الطالع من مقدمة
شالي..
دفعته ليجوا وجريت الشال..ماتغطى عدل..
طلعت الفون وباوعت لروحي بالكاميرا..
عدلته ودخلته جوا..
استغربت شكلي..
اول مرة بحياتي اشوف كصتي طالعة ههه..

بس فعلا احسن ..اذا هذا الشي يخليني
اتحمل ذنب احد ..يولي بلاه..
وصلت للسيارة ودخلت..رشا كاعدة باوعتلي
من جوا حواجبها..

يبو كذيلة وشعر سارح وين كذيلتك ههه..
خية ضميتها حجيت وحطت ايدي ع حلكي..
رفعت حاجبها..والسبب؟؟
ماريد ذنوب..
عاشت ايدج احسن خطوة..ولو احس وراها ان..
لا ماطيع بشر انا بامور الدين..الا بكامل قناعتي..
اعرفج وردة انت شاها..
تسسلميلي..

وصلت للبيت واول مادخلت ماما بالمطبخ جانت
تنظف الخضرا..
الله يساعدج ماما..
التفتت عليه..ويساعدج ..شلو...كطعت حجايتها
من شافت شعري مضموم..
اللهم صل على محمد وال محمد..شنو هالحسن
هذا..

ها حلوة ماما..تقربت يمها وحجيت..
احلى بهواي..بس شعجب؟
سمعت كل واحد يباعلها ساخذ ذنب ..كلت
عليمن اتحمل ذنب غيري..
الله يهديج ويزيدج هدى ...الحمدلله ماما..
مسوتلج دولمة اليوم روحي بدلي وتعاي اكلي
حتى تنامين وترتاحين..
ايي رايحة..

رحت سبحت ولكيت ماما محضرتلي الغدا
كعدت اتغدا واراسل حنين..
بس راسلتها خابرت..
هلا برويحتي شلونج..
رويحتي يا يا تعلمتي كلمات جديدة ههه..
ايي هواي حجايات ههه ..

مدام هيج خل اسألج عن معاني كم حجاية..
بس بالاول شلونج شوضعج ..
احسن حال ماتتخيلين شكد مرتاااحة..ولو عمتي
شوية تغثني..
يمه ليش شبيها..
ههه عادي شبيج انت خوافة ..
ماتخيل اتزوج وتصير عندي عمة وتعاركني ..
بسرعة اخابر بابا واخلي ياخذني..
لا انا كدها واشرّد مااشرد..

صايرة خطيرة عيني..صدك اكلج شنو معنى
يلاجي الليل؟
منو هذا يلاجي الليل؟
شعري ههه..
منو كلج ولج..
حيادر ههه..اليوم اجه ولاكاني
بالكافتيريا..ودفعلي فلوس الحلويات ههه..

يااا وشلون تقبلين انت؟
لان بابا من قبل يكول اذا رجال دفعلج مايصير
ترفضي يعتبر عيب..
يعني عيب عليه اعتبر مقلله من احترامه..
وشنو كعدتو سوا ؟
ايي وسولف قليل بس كلي صارلي
ثلث سنوات ببالي حجاية..
واريد اكلج ياها..

يا يعني من اول ماداومنا ؟
اي اكيد لان احنا اول ماداومنا جنا نشوفه وي
بهادر يجي فترات..
صحيح بس شنو هالحجاية بلة؟
كلي شعرج يلمع ويلاجي الليل وهواي شباب
تتحمل ذنب بسببج..بس كلي انت حرة
والرأي الج..زين شنو يلاجي الليل؟
يعني كد مااسود يشبه الليل او يتسابق وياه..
يا ههه شكد حلووو ..

اي عيني حلوو طبعا اشوفج كلش تفكرين بي..
لا بس هو حباب واسلوبه راقي يعني مو مثل
رجلج جاف بالحجي..
اي رجلي مايدور نسوان هذا يجر البنات
بأسلوبه..

ليش بس اليدور نسوان عنده اسلوب قابل؟
شاها لا يغرج اسلوبه انا اعرفه هسه مو
معاشرته ..شكاك وبكلشي يحط
روحه حتى بالمسواك..
مادري اوي هسه شعليه انا ..اروح انام تعبانة
ميتة..
ههه روحي بااي..

كمت غسلت ورحت لغرفتي ..ببالي كلام
حنين عن حيادر ..معقولة هيجي
طبعه سيء بس يتلون !بس ماامبين هالشي
بنبرته من يحجي..احسه صادق..
طلعت سبحته من الجنطة ..مساع ماباوعتلها
خفت احد ينتبهلي..

سبحة حلوة ومميزة ..حجرها احمر ملفت
للنظر..
بقيت اباوعلها وجذبتني الريحة..عطر
بخور او عطر خليجي..احسه طيب
حيل..
بقيت حاطتها بيدي وصافنة شلون ارجعها اله؟
ومادري بي اذا يدري بيها موجودة
عندي او لا..

يمكن عباله ضاعت ومايتدكر نساها يمي..
قررت اخليها بجنطتي ومن اشوفه
انطيها اله..
بس شلون ومابقى بس امتحانين وتخلص
السنة!
يلا انطيها لحنين عود تنطيها
اله..

يوم ثاني عطلة عندي وراها امتحان..
داومت ولافة الشال عدل وضامة شعري..
الاحظ نظرات الناس عليه مختلفة..
حسيت نفسي جنت غلطانة..المفروض من اول
هيجي اضمه..
ارتاحيت لهاي الخطوة واحس نفسي
ممنونة لحيادر..
وانتظرته حتى انطي السبحة بس ما
لكيته..

اخر يوم الامتحانات خلصت من وكت
لان جانت مادة بسيطة..
طلعت من وكت كلش..خابرت السايق
كتله تعال عليه لان رشا تتاخر..اخر يوم
الطلاب كلها تتاخر..
بس انا ضجت وحدي ..وين جانت حنين
وياي نفتر ونتونس ومانخلي كلية
مانروحلها..

كعدت بالحديقة انتظر السايق..
دقايق وشفت حيادر اجه..
كمت وكفت..هو باوعلي وابتسم..
نزع نظارته ووكف..
صباح الخير..يحجي ويباوع لمقدمة شالي
وشافني ضامة شعري..
صباح الخير..حجيها وابتسمت بخجل..
عاشت ايدج كلش ارتب صرتي ..وشكلج
صار مهيوب..
امم شكرا ..

عندي موضوع وياج نكعد لو مرتاحة
بالوكفة؟
ها ..ماعرف كيفك..
جا خلينا واكفين ..
امم..
شاها انت تعرفين اهلي وبت عمج واختج
ماخذة اخوي..
وشفتيها مرتاحة الحمدلله..صح؟

اي يعني لان هم اختارو بعض
اكيد تكون مرتاحة..
اكيد الاختيار هو الاساس..
وانا اختاريتج من اول شوفة الج..
واظنج حاسة بهالشي..
ثلث سنين وانا صابر وانتظر..
تقبلين بيه اذا خطبتج؟

شنو؟حجيتها وغمضت عيوني..
رايدج حالي وحلالي..
ااا..انت سالتني قبل بهيج موضوع..
وعرفت رايي يعني كتلك ممفكرة بزواج..
سألتج اذا تقدملج احد شنو رأيج..

ماسألتج اذا خطبتج انا..انت حاسبتني حالي
حال اي احد؟
صح انت انسان مثقف بس مااريد ارتبط
يعني مو هسه..
واصلا اهلي ابدا مايقبلون..
بس انت واعية وشخصتج قوية يعني ماله
داعي تتخوفين من الزواج هيج..
بصراحة..ماافكر ارتبط باحد من طرف بهادر..حجيتها
وعضيت شفتي وباوعتله ..

عقد حاجبه وتنهد..شايفتني مثل بهادر؟
ابدا مو مثله..بس يعني ماكدر اتأقلم هناك
واصلا بهادر يضوج مني..حتى من يعرف بيك تريد
تخطبني مايوافقك الرأي..
انا ماانتظر رأي احد..شاها ..حجه واستغفر الله..
باوع بوجهي ركز نظراته بعيوني..
شاها..انا احبج ..

فترت عيوني وخليت ايدي
ع حلكي..ماعرفت شنو اجاوبه
انصدمت رغم جنت ادري بس
اخادع نفسي..
ماعرف شسوي هسه وشنو احجي..
ليش ساكتة؟انت مارافضتني..انا احس
بهالشي..

انت خام ماتعرفين تضمين..رجفة شفافج..
عيونج الذبلت ونظراتها تتهرب..
ذني كلهن دليل انت تبادليني احساسي..
لا ..ماابادلك شي..ماكدر ..اعذرني التريده
مرفوض ..وارتباطي بيك مو مناسب..
عن اذنك..

درت وجهي اريد امشي..
وكفني صوته..شاها رافضتني لو رافضة وضعي؟؟
درت عليه وحجيت وانا مدنكة..
رافضة الموضوع كله..
رفعي راسج وحاجيني..ببالج احد غيري؟؟
هزيت راسي ..لا..

ماترديني لشخصي؟؟
ماعرف..حجيتها ونظراتي ضايعة..
هذا هو براحتج مااضغط عليج..
مع السلامة..عافني ومشى..بقيت واكفة
اباوعله متحيرة..
انا شبيه..وليش ضايجة هسه؟
مو انا اصلا مااطيقهم كلهم هالعائلة!
بس لا هو يختلف..

ماعرف ليش بقست ابجي..دموعي تنزل
وماعرف سببها..
خابر السايق..مسحت دموعي ولبست
النظارة حتى لا يبين باجية..
رحت لكيته ينتظرني..صعدت وسلمت عليه..
نصى المسجل ..جان مخلي اغنية محمد
بوية محمد..

انا مااسمع هيج اغاني..بس هالاغنية كلش
احبها..
ابتسمت وكتله عليها..علاها وشغل التبريد
وجاي يمشي ..صارت سيارة حيادر
بوجه سيارتنا ..مسافة قليلة
عن الدعمة..
بس السايق عبره بسرعة وبقى يلوم
بنفسه لان ملتهي جان بالمسجل..

ضجت من شفته وخفت..اول مرة اخاف
من واحد غريب صايرعصبي..
بالعادة بس من اهلي اذا تعصبو اخاف..
بس حيادر وعقدة حاجبه وعيونه الي دوم
ضاحكات احس هسه بيهن شرار..

لهيت نفسي بالاغنية..بس لحكت ع اخر كلمات..
كتله عيدها اريد اسمع ..عادها من جديد
وانا مركزة وياها واردد وي روحي..
يمحمد خاف من الله ..يمحمد مو هذا الله..
واردد وياها ومبتسمة..

تالي صفنت لروحي كلت شبيه تخبلت..
خلصت وطلع وراها اغاني ثانية
هم ريفية بس مانتبهت..
وصلت للبيت وبسرعة بس سبحت واكلت
رحت نمت..
كعدت ب١ بلليل..شبعانة نوم كلش..
رحت سبحت وصبيتلي اكل..

فتحت الT.Vوخليتلي فلم..
وجبت الفون مالتي فتحته..رسائل كومة من
كروبات الاقارب والصديقات..
اني عندي صديقات هواي بس رسميات
الوحيدة حنين هي اختي وروحي..

لكيتها مراسلتني وكاتبة بذات ناسيتني..
باوعت للساعة ماترهم اراسلها ..
ضجت وتذكرت قبل اني وياها نخابر
الفجر لو بنص الليل عادي..
لو تجي تبات يمنا او ابات يمها..
للحظة اجه ببالي طلب حيادر..
وربط عقلي انا رح اكون وي حنين
بنفس البيت..
بس طردت هالفكرة من راسي..ماريد
افكر بهالموضوع..

بقيت كاعدة اباوع فلم وسويتلي لبن حتى ارجع
نعس..كلش ملل وحدي..
اخواني بغرفهم وامي وابوي ينامون من وكت..
مليت اخر شي ورجعت للغرفة..
تمددت وغمضت عبوني..
وتذكرت ماانطيته سبحته يااا..

اخذتها من الجنطة وخليتها بيدي وتمددت..
ماعرف شنو مخليني الزمها وليش العطر
من اشمه اشوف حيادر كدامي ..
بقيت العب بيها الى ان غفيت..

كعدت الصبح ع صوت امي..
فتحت عيوني لكيتها واكفة يم فراشي..
كعدي مو تريد تروحين للسوك اليوم؟بس نبرتها
غاضبة..
كعدت لحيلي وتذكرت السبحة عزااا..
باوعت بصف الجرباية ماكو..هي باوعتلي
ورافعة حاجبها..

ليش هاي السبحة عندج؟؟
ها ماما مو ..
مو شنو؟؟
سبحة حيادر ؟؟؟ونايمة وهي يمج ع جربايتج؟؟؟
شمرتها بوجهي فزيت ورجعت ليورا برعب..

نزلت دموعي وحجيت..بس افهمج ماما..
ماقصدي اخذها بس نساها يمي..
وشعده يمج اصلا هااا؟
ولج واثقة بيج واكول تربية ايدي..وحاولت
قدر الامكان ايعدج عن هالعائلة..
ادخل لغرفتج الكى سبحته بحضنج وانت نايمة؟؟

عفتي الناس كلها رحتي لهذا العربي؟؟عائلة
مشكلبة وماتنحمل..
وحسيت بي وكتلج اكلج بعيونه اكل طول الطريق..
وتكليلي ماكو شي؟؟تحجي وتصيح ووجها
صار احمر وعيونها تخزر..
وانا ارجف وماعرف شجاوبها..

جمعت الحجي بالكوة وحجيت..
مابينا شي ماما بس فهميني ..هو خطبني وانا
كتله لا..
وفوكها رافضة الخطوبة؟؟عاجبج تديحين وياا
ولج تريد تموتيني؟؟؟

للحكاية بقية
بقلم شقراء(قمر كانون)

هذا بارت وجاي اكتب بالثاني..
وتعويضا لغيابي عنكم لاسباب خاصة راح اخلي
النشر يومي بس يكون البارت قصير
ويوم الجمعة ماكو

عفت لرزالتج لحنين وعجبتني لهجتج هههه

هسه جاي تمدحي تسبي يهجم يدافع

خطية🤣