رواية الشيهانة الفصل الثامن والأربعون 48 - بقلم Shaqraa

السلام عليكم

الشيهانة
الجزء الرابع والاربعون

بس لا الابالي صدك..ياويلج شاااهاا..
شنو ماما؟
تعرفين قصدي..بس لا صار حمل..
نزلت نظراتي وانا احجي بخجل..ماما مصارلي اسبوعين..
اي وانت جنتي توج مخلصة يعني بسرعة
تشكلين..وبلا تفكير بلا وعي رحتي وخربطتي
ومافكرتي شيصير ورا هاللحظات..

ماما مامر وقت هواي حتى اكول صدك حامل..
واصلا ماعندي اي اعراض ولا غيرها..
لا ماعندج بس الفراولة اكلتيها بدون ماتحسين
حتى بلا غسل..
اي احبها عادي يعني ..مو نفس ماانت مفكرة..
استغفرالله..ماما فكري عدل وحسبي حساب
الخطوة التخطيها..ترى وراج هواي ناس
تشمت وناس تحسب..
الله كريم ماما..

رجعت لغرفتي ومقهورة..بس لا صدك اطلع
حامل وانا وضعي كله مخربط ..
بس مامر وقت هواي وماعتقد يصير بيوم واحد..
بقيت متضايقة كلش..
حتى حيادر من خابرني بالليل حس بيه وسالني..
كتله مشتاقتلك وضايجة لان انت مو يمي..
وهو اصلا جان متضايق من المشكلة ومايكدر
يحجي..
ماطولنا بالكلام بسرعة سدينا الخط..

يوم ثاني الصبح تقريبا ساعة ثمانية..
كعدت ع الم قوي ببطني ونفسي كلش تلعب..
كمت للحمام كوة شفت طريقي من الالم..
وراها تقيأت ودخت ..صحت ع ماما كوة
طلع صوتي..
همزين هاجر جانت تنظف وسمعتني واجتلي..

سندتني طلعت من الحمام اريد اتمدد بالصالة..
وماما ع صوتنا طلعت بسرعة..
ها شبيج شبييج؟؟؟تباوعلي بخرعة..
بطني ماما ونفسي تلعب حيل..اريد حمام
حجيت واريد اكوم..
وهي وهاجر سندوني ورحت للحمام..
حسيت معدتي فرغت كلش..
غسلت وجهي وطلعت وهي سندتني وهاجر
جابتلي ماي شربت..

سالتني بقلق..نزل شي ؟؟
حجيت بتعب،،لا ماما بطني مغص اذاني..
ونفسي كلش تلعب..
كامت وهي لازمة فونها تريد تخابر..خاف
تسممتي..
هسه اخذج للمستشفى..بس اخابر الولد بلكي موجود..
لاا ماريد فدوة..هسه اتحسن..

هاجر كالت راح اسويلج لبن شربي وتمددي
هسه ادهن جسمج كله وترتاحين..
ماخليت ماما تخابر ع صديق محمد وياخذنا
للمستشفى ..كرهت المشافي ودخلتها كلش..
بقت هي يمي تمسح ع كصتي وراسي بهدوء..
اجت هاجر جابت كلاص لبن شربته كوة بس اريد
اطيب..

كعدت يمي وخلتلي زيت زيتون ع كف ايدي من يم
الابهام وبقت تضغط حيل..
وجع كلش قوي ضربتها بلا مااحس..
وماما تكلها فدوة ع كيفج عورتيها وتالي من ضربتها
رجعت علي ماما ..شاها شبيج ماما شخطتي..
يأذييي ماينحمل الوجع وهي تضغط حيل..
هي ضحكت كالت هذا احنا نسمي هرش ..يصير
هوا بجسم الانسان واحنا نطلعه بالتدهين لان من يبقى
يحس الواحد مثل المسمم ..بطنه تكصصه ونفسه
تلعب ..

صدك بدت بيه تدهين من فوك لجوا ..بس حسيت
صدك ارتاحيت..
هي تدهن وماما تسولف وياها وتسالها ..
لحد ماخلصت وجابتلي كوب حليب..شربته
وتمددت بارتياح..
حسيت وجع مساع كله راح..
كتلها شدعيلج وشسويلج مااعرف ..مااعرف شلون
اشكرج..
ابتسمت وحجت بصوت ناصي..دللي عمي هذا
اهم شي..

واخذت الدهن وكامت وانا ابتسمتلها من جوا لجوا..
كعدت يمي ماما ..ها احسن هسه؟
اي الم قبل شوية كله راح بقى خفيف..
اي طبعا سمعتي بحيادر هسه حتى الالم تنسي..
دنكت بابتسامة وماحجيت شي..

ورا شوية كدرت اكوم ووضعي احسن
صار..
صبتلي ماما ريوك وكعدت تحضر للغدا..
كالت اكيد سممتج الفراولة لان اكلتيها بلا غسل..
كتلها اي اكيد ماكو غيرها..
ماجابت سيرة الحمل بعد..جنها تاكدت ماكو حمل..

من خابرني حيادر وحجيتله..ضحك كال مدام
اكلتي الفراولة بنهم يعني جبتي العيد ويضحك..
لا يعني شرط اليشتهي شي حامل هسه انت ماتشتهي؟؟
ههههههههه لا اصلا دوم ..
عزاا حطيتني بالمصيدة ..

احب اصيدج طعم صيدج مو مثل الصيد
العادي..
بي عنفوان شيهانة ماتتروض بس بحضني..
كل مرة اروضج احس افتخر..لان مو اي واحد
يكدر يروض الشيهانة..
اصلا روضتني بسهولة..
فدوة لعينج ياسهولة ..
من يوم تنورتج الكصيرة انا اروض واروض ولازلت
مستمر بالترويض...

يعني شنو !مأذيتك؟
ههه لا لا..بس متعبة كلبي من وكت حبيتج وشليتي
حالي..
جنت ساكن الكلية لخاطرج وحتى ان ماعندي شغل
اجي..
ولو شفت الطلاب تباوعلج وانت بلبسج العذب كليبي..
احترك واطفى ..
ششوف وشفكر..اذا تنورة شبرين وقميص يفاهج
ويستغيث..

ايي شنو يفاهج بلة مافهمتها بوكتها..
يعني مخنوك ويسحب انفاسه كوة ..هي جان قميصج
يجر النفس كد ماخانكته..
منين اصلا جنت رفيعة حيل هههه..
منيلج رفيعة..جنتي بيبي وهسه صرتي اااخ ياحال حالي..

حجيت بهدوء..حبيبي مشتاقتلك تعال اخذني..
وكت غروب هسه وين نلحك..
تحضري باجر اجيج السااعة بتلاثة بس تطلع
العمال..
اوك رح انتظرك..
صدك لا انسى..اريد اروح اكص شعري
واسوي ترتيبات وي ماما ..
اي روحي بس لا تطولين لليل..
يدلل حبيبي..

سديته منه وطلعت لماما كتلها..وهاجر هم اجت
ويانا وخلت يسر يم بابا..
رحنا كملنا شغلنا ورجعنا ورا المغرب ..
لان ماما عدها المفتاح تشيله وياها من تطلع ..
دخلنا بلا ماندك الباب..
اول مافتنا المطبخ سمعنا صوت..عمي ومرته
وهند وحنين..

دخلو ماما وهاجر كدامي..انا شربت ماي
ودخلت وراهم..
جانو واكفين يسلمون وانا دخلت بوست عمو
والبقية..
من وصلت لحنين طبعا لا اشبكها ولا ابوسها
بس اقربلها كذب..
هي بوستني وحجت ..هنيالج خذيتي راحتج
طبة طلعة بالليل..
احنا عايشين بمكبرة هناك..
ماطالعة افرفر ترى رحت كصيت شعري واجيت

ياا كصيتي بلة خنشوووف..
فتحته والبقية شافو وكالو بالعافية..
هي بقت تلوب..اخر شي كالت انا هم بهادر عجبه
اكص شعري..بس اريد يطول ضجت من الكصير
مو حلو..
لا شعرج عالجي كلش محترك بالاوكسجين ترى
واصلا لحد اذنج وين تكصي بعد..
لااا طال..بعد انت طالعة صارلج دهر ماتدرين
شصار وراج ماصار..

مالي علاقة بعد ع كولتج طلعت..اليهمني
زوجي وبس..
ماانطيتها مجال تحجي زايد لان مامتحملتها..
شكد ماجنت احبها ومقربتها لروحي..
صرت اضوج منها ومااطيق الحجي وياها..

بقو يمنا تعشو وبقو شوية تالي راحو..الي
عرفته من امها جاية للدكتورة تعيد فصح
لان قبل فترة ماخذة كورس علاج وهسه جاية تشوف
النتيجة..
ورا ماطلعو بدقايق قليلة..
دك الفون مالتي حيادر يتصل..
اخذته ورحت للغرفة..قفلت الباب وطفيت الضوا
وخليت بس ضوا المنام..
جاوبته وانا افتح الكنتور اطلعلي ملابس..
هلاو حبيبي..

اجاني الرد ثكيل..هلا بيج ...توج راجعة؟
لا لا رجعت ورا المغرب بشوية..
متاكدة؟
اي طبعا قابل اكذب عليك..
جا ليش ماخابرتيني من مساع..
لان رجعنا ولكيت بيت عمي يمنا ..وبعد
ماكدرت اخابر..
خو ماحاجتج شي؟؟
منو حنين؟لا شما تحجي اردها وتسكت ..

هسه شنو ماعاجبك تشوف شعري..
اي يلا فتحتي فيديو..
هيج بلا نفس تحجيها؟؟
لا تخلين ببالج بس شوية راسي..
سلامتك ..اذا تريد نام وارتاح..
لا فتحي كاميرا يلا انتظرج..
يلا بس اضبط الفون..
بدلت ملابسي بسرعة وتمددت وخليت الفون
حتى اسيطر احجي..
لكيت الخط مكطوع..

رجعت دكيت ماجاوب..شبي حيادر معقولة
شو تصرفاته ماعرف شبيها!
عفته براحته كلت من يرتاح هو يتصل..
الظاهر مشكلته وي امه بعدها ..
يوم ثاني الصبح كعدت دزيتله صباح الخير وكمت
سبحت وتريكت ورجعت للغرفة..
لكيته داز مسج..تحضري ل١٢ اجي
اخذج..

كتبتله اوك انتظرك..وطلعت حاجيت ماما..
كالت اي روحي بس احس ودها تكلي لا تروحين..
بدلت وكعدت انتظره..قبل لا اطلع حاجتني..
لا تنسين نفسج..موضوع الحمل اجلو شوية..
هزيت راسي وطلعت..
لكيته واكف يم السيارة وملامحه ضايجة..
سلمت عليه رد بهدوء..
صعدت يمه ومشينا وهو ماحجه شي..

وكف بالطريق اخذ غدا وكم شغلة واجه..
صعد وساق بكل هدوء ..
قبل لا نوصل بشوية حجه..جنج مرتاحة من ماحاجيج؟
بالعكس..حجيت وانا اباوعله..
ماامبين..لن من البارحة حتى ماكلفتي روحج تدكين
وتكولين ليش رحت..
مو خابرت وانت ماجاوبت..وجنت اصلا مزعوج..
كلت براحته من يرتاح يحجي مااضغط عليه..
قصدج ارتاحيتي..

حبيبي انت شجاي تكول شنو قابل ماتعرفني!
نزلي نزلي نحجي جوا..
نزلت وهو وراي ..فتح الباب ودخلنا..
اجت بخشمي ريحة الصبغ ..
تعاي للديوانية مابيها ريحة صبغ هنا تختنكين..
لا اصلا حلووة ريحته ..
باوعلي ورافع حاجب..تعاي تعاي لا تكبسلين بالصبغ..
ابتسمت ورحت ورا للاستقبال..

كعدت وجان مخلي فراش بالارض شكله نظيف..
شنو هذا الفراش جديد شعجب مو ياكلون عليه
العمال..
لا ياكلون برا ..هذا فراشي انا اكعد ارتاح هنا..
اها..زين ماكتلي ليش ضايج حياتي..
جنت متلاغي وي بهادر وخابرتج انت مااهتميتي
كلش ضجت..
ماتوقعتك تاخذها بهالقصد..بس شفتك دايخ
وراسك ياذيك..كلت اتركه براحته يرتاح
ويحجي..

بس ليش متلاغي وي بهادر شصاير؟
اجالي ومغتاض ومسوي روحه ابو كلب الرهيف..
يابة شكو عايف مرتك هناك وهي تطلع براحتها وترجع
بالليل..
لا يا ..مااكدر احجي ..عيب منك..شنو جاوبته بلة!
كتله مدام وي اهلها وتطلع بأذني وانا قابل ..بعد مو شغلك
تتدخل..
واذا حطيت روحك مرة ثانية تخرب على روحك..
لو كلش صرت سكان مرتك تفرك وين ماتريد..
انت كاعد هنا شدراك مرتي يمتى طلعت يمتى
دخلت..

لا تهتهم انت اصلا تعرفه اخوك من البداية هيج
طبعه وبالذات انا يكرهني..
وهو شمدري بس حنين هي انغاضت من شافتني
جاية من الصالون..تعرفها انت تغار..
الظاهر ماتابت هي يرادلها كرصة ذان جنها
نست..بس حسافة تمنيتها رجال..اخليها سالوفة
تنحجي وما تنسي..

هههه ماكتلي شسويتلها المرة الفاتت..
انتجى وطلع جكارة وكعد يدخن..باوعلي وابتسم..
شوفي بيوم الانكسرت ايدج وخذيتج لاهلج ..
رجعت الدنيا طالعة من عيني..حاقد على اهلي
واحد واحد ..
دخلت وجانن متربعات ويسولفن وشامتات..
ذبيت السويج بنصهن وطفرن..

هي راحت ركضت صحت عليها..
تعاي تعاي وين رايحة؟
دارت واجت يمي ومسوية روحها محترمة
ومستحية..
باعي ولج..متحسف بس لان انت مو رجال واربيج
واكسر ظهرج..
انا لهسه محترمج لانج مرة ومرت اخوي بعد..
انا ادري الصار كله من جوا راسج..البنية
صحتها مدمرة ونفسيتها مكسورة..
راحو منها تلث جهال يسوونج ويسوون
راسج ..وماعفتيها بحالها وكمتي تحومين
عليها مثل الشيطان ..

اذا ماعدج زلمة يردج ويفرك خشمج بالكاع..
اخذج اشمرج على ابوج واكله ربيها من جديد..
ان سكتت وماقللت ادب وياج بس لن مرة وعيب
بحقي ..مو عيب بحقج لنج انت مامحترمة نفسج
ولا عندج صفات المرة اصلاً..

ولو ام شيهانة كفو منها مامقصرة وياج ..
بس هم مايجي من استحقاقج..تادبي واحترمي
انوثتج حتى لو الوكت تاخر ..المهم تحسين ع نفسج..
ولو المثلج لا حس ولا احساس..التغدر اختها وبت
عمها ربت وياها عمر ..
ماينوخذ منها حك ولا تنحسب ع الاوادم ..
شوفي الفرق بينج وبينها وحاولي تصيرين مثلها..
دامج تعارين منها يعني عاجبج تصيرين مثلها..
ولو ماتوصلين لظفرها لنج نفاوة والنفاوة مايلوكلها
بس القذارة..

هي من بعد حجيي ماحجت كلمة..انا هم عفتها
ورحت لغرفة امينة..
تمددت يمها وشكيتلها ضيمي وهي تصبر بيه..
لليل يلا صعدت لغرفتي..
طلعت ذهبج وكلت اودي لامج خفت بلعبن بيه
لو ياخذن منه..
ويوم ثاني من انطيته الها شافت قراصاتج وكلتلي..
كلت اكيد مخربتهن حنين ورا مارزلتها مطلعة
حركتها بيهن..

وسالت تبارك كالت اي شفتها لبستهن تالي حكتها
بالكاع ونامت بفراشكم وطفرت عليه..
كلشي اتوقع منها ومااستبعد لو صحتلها فرصة
تموتني..
بس شكد بردت قلبي برزالتها اااه مرتاحة..

اشتعلللو ..جاي انا وحد ماارتاح..
ذبلت عيوني وسالته..سلامتك حياتي..شنو يوجعك..
كليبي يوجعني حجه وهو يجرني لحضنه..
بقت شفافي وشفافه تشرح لهفتها واشواقها..
وايديه تعبر عن هيامه..
وباخر لحظات نبهته ع سالفة الحمل بس مانطاني
اهتمام..
وماكدرت الح سكتت..

وراها بقيت متمددة ع صدره..سألني وهو يلعب بشعري..
انت ليش خايفة من الحمل هسه؟
مو خايفة..بس يعني صعبة بعيدة عنك واحمل..
بعيدة عني بغير دولة؟؟
لا بس اخاف تالي اهلك يطلعون عليه حجي..
من حجيت هيج كعد لحيله..تعصب وحجه بصوت
عالي..

تحجين كل عقلج انت؟؟؟؟تخبلتي شنو؟؟
انت عرضي يعني مرتييييي وانا يومية جايج
لهلج ومطلعج وياي وماخذج وموديح..
بعد شنو الحجي اليطلع..يكولون ابني نغل؟هذا
المخوفج يعني..
جا شكد مستهزأة بية وعبالج مالي وجود ولا
الي هيبة..
حبيبي مو هيج قابل ماعرفك ..
لا جنج ماتعرفيني..اذا مفكرة هيج تفكير..
معناها انا بنظرج كلشي ماكو..

انت ليش فهمتني غلط..ليش مادري
شكد يهابوك وحتى وانت ماموجود مايحجون
عليك..
بس ماما تخاف منهم ياذوني اكثر و.. بعدني
ماكملت حجايتي اندك الجرس..
هذا جرسنا ..سالت باستغراب !
لا جرس الخلفني..ياهو اجه هسه خرررب..
كام لبس ملابسه ع السريع والباب والجرس
يندكن..
انا لبست وهو كال لا تستعجلين قفلي الباب
وراي واخذي راحتج..

كمت قفلت الباب وانا واكفة وراه اريد اشوف
منو اجه ..
اسمع صوت محمد اخوي يبووو يبست بمكاني
اريد رجليه تشيلني وامشي اكمل لبسي ماكو..
مشيت كوة وكملت لبس وكعدت بمكاني ميتة خجل..

للحكاية بقية
بقلم شقراء(قمر كانون)

شكرا😍😍خجلتيني

زين محد كبسج مثل كبسة محمد هسه😹😹

ياربي يشافيها ويعافيها بحق محمد وال محمد الطيبي