رواية الشيهانة الفصل الثامن والثلاثون 38 - بقلم Shaqraa

مساء الخير

الشيهانة
الجزء الرابع والثلاثون

حسيت نفسي فقدت قوتي كلها وجنت متحملة بس
من وصلت للبيت هنا انهاريت بالكامل..
بعد مافقدت وعيي بين ايد بابا وحيادر..كعدت لكيت
نفسي بالصالة ..ماما تنزعني حجابي..باوعتلها
ورجعت ابجي..
مسحت دموعي وسكتتني..كافي ماما كافي..
ربج وقدر هالشي..تعترضين تكليله ماريد؟؟؟احجي
تعترضين؟؟
هزيت راسي..استغفر الله..

خلاص..كومي غسلي وذبي ملابسج وارتاحي:.
كومتني وكامت..حيادر كاعد وويعصر بالسبحة
بيده وعيونه تحجي هواي حزن..
اخذتني للحمام وهاجر كالت انا رايحة
اجيبلج ملابس..

سبحت وطلعت هي مشطتلي شعري ..لان انا قفلت
بقيت بس ساكتة ً
ومالي خلك احجي..
هم محضرين الغدا جانو يريد يتغدون خطية بس التهو بيه..
بقو يتغدون وانا تمددت بغرفة ماما كالت نامي شوية
حتى ترحين العصر..
طفت الضوا وطلعت..وانا تغطيت وكملت بجيتي..

غفيت شوية وكعدت..باوعت ساعة ثلاثة وربع..
سمعت صوت امينة برا ..طلعت لكيتها هي وماما كاعدين
بالصالة وسارة يمهم..
كامتلي امينة وشبكتني ..بقت تطبطب ع ظهري..
العوض بالله عيوني انا كلبي يكلي راح تعوضينه
تكر عينج..
وكعدتني وكعدت ..

باوعتلها عيونها مدمعة..انقهرت وتذكرت وضعها
اكيد هسه انعادت عليها ايام الي فقدت بيها
كم طفل الها ..
حمدت ربي وشكرته ..سالت سارة خطية خاف احتاجت
حمام حتى نسيت اوصي امي..
بس هي كالت جايبة وياي بالجنطة لا يظل بالج..

قبل المغرب رحت للمستشفى وماما وبابا وحيادر
وياي..
صح جنت مقهورة بس قهر حيادر خلاني اكتم..
حيادر الي دوم عيونه ضاحكة هالمرة عيونه حمرة
والدمعة احسها تحاول تتخفى شكد ماتكدر ..
لان اعرف هو مو بس يريد طفل كأي اب..لا يريد
طفل يصاحبه ويكبر ويلزم ظهره..لان دوم يكول
انا ماحاسب عندي اهل ..ادري بيهم يبيعوني بفلسين..

هم بقو برا ورحنا انا وماما جوا..
وودعت جزء عزيز علي وجان ممكن يكبر ويصير
انسان وافرح بي ب مامقسوم..
بقيت ليلة بالمستشفى ويوم ثاني طلعت..
رجعت لبيت اهلي لغرفتي..الكل طلع وبقى حيادر يمي..

تقرب يم سريري مبتسم بملامح مرهقة..
العوض بالله شيهانتي..جر ايدي وباسها..
الحمدلله ع كل حال حجيت بقهر..
مامقسوملنا وانشالله نعوضه..واذا تردين استراحي فترة
وجسمج يستراح وبعدين نفكر ..
لا ماريد استراح..
ها هسه؟هههههه..
هههه لا تجيك فيحاء..

عادي اخذج واطلع حلالي بعد..
لا عفية خليني كم يوم..
يعني شكد تردين اخليج..
اسبوع ..
لااا شيحمله اسبوع بلاج..يومين بس وعكب باجر اخذج..
البيت مكبرة اذا انت مو بي شيصبرني ماتكليلي..

انا اكثر منك مااصبر على غيابك بس حبيبي
وضعي مالت ارجع هناك؟؟
لا جسمي ولا نفسيتي تسمح..
ابقي بغرفتج وانا اخلي البنات تصعدلج الاكل..
لا هنا اتحسن واجي ولا اروح هناك وابقى مكبوتة..
وانت مرلي شوكت ماتكدر..

صفن بوجهي فترة..تالي كال ميخالف لخاطرج..
انا يومية امرلج ..يعز عليه فراكج بس صحتج اهم..
مااطول عليك حبيبي هي كم يوم ..وانت دربالك
ع نفسك ولا تدخل بنقاش وياهم حتى لو يحجون..
لا تدوخين روحج..

بقى بيومها يمي للعصر ..
اجو عمتي ونهاية وام عادل وحنين..
نظرات الشماتة بعيونهم تحجي..عدا ام عادل جانت
كلش مقهورة وحاسة بية..
ماما طول الوقت تتجول بنظراتها وحسيتها جاي
تستنتج علاقتي بيهم..
وفعلا بعد ماراحو واصلا هم ماطول شي ثلث ساعة
وطلعو..
وحيادر كذلك راح..

كعدت يمي ماما وبدت الموضوع..ذني مأذياتج
بالبيت؟؟
سويت نفسي مافهمت..منو ماما..؟
الاجن مساع عدا ام عادل وامينة..
مااسمحلهن ولا حيادر يخليهن..تدرين بيهن
مسمومات بس موكفتهن عد حدهن..
صفنت علي شوية وحجت..يعني مالهن دخل بالصار؟

لا ماما اصلا فجأة الصار وياي..
زين..بس اي شي يصير لو اذنج وشدن احجي..
ناجرلج بيت يمنا وكعدي..
الله كريم ماما انت وياي وتدعيلي ماراح يصيرلي
شي..
الله يسهل امرج ماما..
حجتها بعدم اقتناع..وبقت كل شوي تباوعلي
تلاحظ ملامحي تغيرت..اعرفها بسرعة تفهم بس ماكدر
اوصللها شي..

مر اسبوع وتحسنت..اجه حيادر اخذني للبيت..
وماما وصته اكثر من مرة وهو بس يهز براسه
اعرفه يضوج واحد يوصي عليه ..يكول شلون يوصوني
عليج احسها عب بحقي..
بس ماحجه شي خصوصا وي ماما يحترمها..

وصلنا للبيت ورا المغرب..دخلنا جاب يصبون عشا..
سلمت عليهم كلهم موجودين عدا حنين..خالتي
كالت ذبي هدومج وساعدي البنات يحطن عشا..
جاوبها حيادر ..احنا متعشين انتو تعشو بالعافية..
يلا شاها امشي نصعد..

باوعلنا عمي بنص عين..
الي حتى ماكال الحمدلله ع سلامتج..
بس حيادر غلس وصعدنا..للغرفة..
فتح الباب ودخلنا..شميت ريحة يخور طيبة والجو
بارد منعش رغم برا نار حارة..
سد الباب ورا وانا مشيت كدامه وكفت..انتجى ع الباب
وهز راسه مبتسم..تدرين هسه بديت اتنفس..

ضحكت وانا انزع حجابي..ليش لان هنا باردة وبرا حارة..
لا لان الدنيا بعيني كلها باردة وانت الحارة حجه
وهو يتقربلي..
جرني لحضنه ..شبكته لصدره حيل..مشتاقتله
فوق الوصف..نمنا حتى بلا مانبدل ملابسنا..
بس واحد شابك الثاني ويسولفلي ع كل يوم
من رحت ..وانا كذلك..

غفينا ع وضعنا..كعدنا الصبح خمسة ونص الساعة..
باوعلي صفن وضحك..وانا باوعتله وضحكت حيل..
انا نايمة بالبنطرون والتشيرت ااجوا العباية
وهو بالدشداشة ..
كام نزعها وهو يضحك..شبكتج ونسيت روحي..
لو نايم بالبوت ماادري..

هههه ولا يهمك..روح للحمام وانا اجيبلك ملابس
اسبح وارتاح..
اي رايح ..
حضرتله ملابسه واخذتها اله..وحضرت دشدادشته
وكلشي خليته ع السرير..
بس طلع دخلت ورا للحمام..بس منظر الحمام شي
ماينحجي..
الارضية مطكعة والحايط بي نقاط سودا وشعر
ناشف ع الحايط بي صابون..
ماكدر اوصف اكثر ..بس الي فهمته ..الحمام متروك
من رحت انا ..لدرجة ريحته مو طيبة..

نزلت جبت منظفات البيت هدوء ماكو صوت..
صعدت للحمام جلفته جلف لحد ماطلع لونه..
سبحت واخذت ملابسي واغراضي وطلعت..
اول مافتحت الباب شفت بهادر كاعد يم بابهم..
باوع بلا مايحجي شي..واجه دخل حتى قبل
لا اوخر من يم الحمام..

سد الباب وانا مشيت ..وكفني صوته..
عدج شامبو مالنا مخلص..
شلت الشامبو من السلة ودرت اريد انطي واكف بلا فانيلة
بسرعة انطيته ظهر..
خليت الشامبو بالارض ورجعت لغرفتي..
كلش فض وماعنده حكمة بتصرفاته عابت..

دخلت للغرفة حيادر ماكو..كملت ونزلت جوا..
لكيته مخدر الجاي وكاعد بالحديقة يدخن..
دكيتله الشباك اجه..
ها شيهانة عفية سويلي البيض وراي شغل
واليوم احتمال اتاخر مااجي ع الغدا..
لاا ..
اي الايام الفاتت كلش اجلت واجد شغل هسه
يلا تعدلت النفسية ..حجاها وابتسم..

فدييت ..حجيتها بابستامة وحضرتله الاكل واسولف
ويا..
كملت وتريكنا وطلع..
صعدت نظفت وامبين جان المكان يتنظف بلا عناية
واعرف مدام شغلي محد تسوي يخبثن..
اشتغلت ع كيفي خفت اتعب لان بعده جسمي مو كلش
متعافي..

خلصت ونزلت جوا..عمي وخالة كاعدين..
عمي كال جا وينها بت عمج مانزلت ..
مادري عمو الشيخ جنت انسف انا..
اي بطونجن فارغة شبيجن ماتشتغلن بعد..
ذيج كل اجتها العادة ونصبت مناحة ومانزلت ..
وانت ذبيتي فرخ شكبره وتوج نازلة..

من حجه هيج فور دمي وانا كوة اصبر نفسي وارضى بالصارلي
ويجي هذا حجيه يسمم..
حجيت بقهر..كتلك نظفت ونزلت مو هسه نازلة..
وطفلي ربي ماقسمه اعترض على ربي؟؟؟
وگلگاله تگلگل رحيج ..عدلي سلوبج من تحاجيني..
مشكور..شيخ..حجيتها ورحت للمطبخ..

نهاية وام عادل والبنات يحضرن غدا..
صحت ع سارة..سارة انت منظفة غرفتي مو..
حجت بقلق..اي اي انا..
ابتسمتلها..عاشت ايدج عمري..هذا البخور
المخليته منين..حجيت وغمزتلها..
ها ..هذا عدنا بحجرة امي تردين انطيج..
اي عفية..
اي تدللين تعاي..

طلعت ورحت وراها وعمو وخالة يخوزرون..
دخلنا لغرفة امها..سالتها شنو اخبارها..
كالت امي ساعدتني ومحد عرف حد ماخلصت
وهي كالت مااخلي احد يدري انا منا وهيج اسوي
خطة.:
اي احسن ..واي شي تحتاجي كولي..
ريتج سالمة ويجبر بخاطرج مثل ماجابرة بخاطر الكل..

بعدها طلعت صعدت لغرفتي..بدلت وصليت
ونزلت..
حيادر خابر كال مايتغدا بالبيت..
تغديت وياهم..نزلت حنين لابسة الشال
و شادة راسها بشال ثاني..
تباوعلي بخزر..صفنت بيها ولا هي حنين مالت قبل..
جنت اشوفها ملاك..صدك جنت احبها..
هسه عبالك شيطان بعيني..

كعدت اكلت وكل ثنين يدردمون بصوت ناصي..
اخر شي خلصت غدا..كامت كلها عمي..ظلي
يمنا شعدج صاعدة..
وهي عاطت بي..شنووو..بعد ناقص تكلي شلابسة..
احنا صفنا من صوتها العالي ومنطقها..حتى عمي بهت..

وهي استرسلت..عوفوني بحالي لا اكتل روحي وابليكم..
اجتني الشهرية وكلكم دريتو وفضحتوني كدام العشيرة..
قابل بكيييفي..عبااالي حامل..قابل اجذذذب
وحامل لو اجذب هم مالكم غررض..تعوفوني لا افضحكم
بالديرة والعشيرة..تدرون بيه لساني متبري مني..

تريد تكمل حجايتها وجرها بهادر من دشداشتها وانشكت..
واخذها سحل للدرج..
وصيح ويغلط..
وهي دفعته حيل طاح على خالتي..
تمد ايدك علييه..وكدام ذني ال....
انااا حنييين ..بت المناوي هيج انطك..اذا ماكعدكم عشاير
اذا مابيعكم بيوتتتت..
حجت وصعدت تركض..

احنا كلنا مطبقين مقولة (اوعى تغمض عينيك)
بصراحة شكد نهاية صلفة بس تخاف هيج ترادد وبقت
تبلعم..
عمي بسرعة كل لبهادر..اصعدلها اركض لا تخابر
اهلها ..
هي كالت بس تاذوني اخابر اهلي يجون لخوالكم
يشتكون..

واشوف بهادر طفر ركض الها..
وعمي راح لغرفته هو وخالتي..
والولد كلمن لغرفته ..احنا لمينا السفرة وانا وسارة
نغسل..وهي سولفتلي..
حنين من رحت انا كايلة الهم هي حامل..
لان عدها تكيس والشهرية تتاخر عدها..حتى رجلها
مصدك..
بس جايتها وهي جوا ومتلفة وعارفين بيها..ومتعاركين
وياها يكلولها جذبتي علينا..

ونهاية كايلة الها كليلهم سقطت
بس خايفات خالتي تطلب تشوف الطفل السقط وماكايلة
مسقطة يعني معترفة هي شهرية وجانت متوهمة..

بعد ماكملت شغلي وصعدت للغرفة..تمددت بفراشي
حاجيت ماما شوية..
كالت محمد صارت..وحددو الخطوبة بعد عشر ايام..
فرحتله واخيرا رح يرتاح..حاجيته من ماما وباركتله..
بس جان صوته مو كلش..سالته اكو شي..كال لا
بالعكس..واعرف محمد كتوم وابد مايحجي لهذا
يكتت..

للعصر كلش..اجه حيادر تعبان بس سبح نام..
لحد المغرب كعد..صلى وراح وي عمه عدهم كعدة..
نزلت انا جوا..خالتي كاعدة ويمها مرت خالهم وبته
ذول شبه مقيمين يمنا..
سلمت ومشيت للمطبخ بسرعة..مالي خلك احد يذكرني..
حنين لابسة كلابية خصرا مخصرة ومكياج ثقيل
وتعلج وكاعدة تثرم دجاج..
والبنات يمها يساعدوها حفيدة خالهم هم يمهن..

طلعت وانا مستغربة ..مساع شادة راسها وعاركت
هسه نزلت جنها عروس جديدة..
طلعت كعدت يم امينة سالتها تضحك..كالت تالي
اكلج..
لان كاعدات وتدري يتصنتن..سويت روحي مشغولة
وياها..

وخالتي والوياها حاطات هاون جبير ويدكن عشبة..
مادري مالت شنو بس ريحتها قويةولاذعة..
وملتهيات كل وحدة تكول حطي هيج..حسيتهم يسون
تركيبة كيميائية لو يخترعن عقار..

حيادر مااجه ع العشا وكلش ضجت عايفني وحدي اليوم..
خلصنا عشا وصعدت وهو تاخر..
تالي فتحت فوني شفته مراسلني..يتاخر لان الناس الرايحين
الهم باقصى البصرة يعني بينا وبينهم مسافة شاسعة
عذرته لان ادري بالمكان بعيد يسطر..

اجه بعدين متاخر وتعبان..بس سبح اجه تمدد بلا
تمشيط..
حبيبي امشطلك..
هههه اي لان ايدي مابيه ارفعها..
تدلل تريد اخليلك قراصات..
نط عيونه وكفخني..
عضيته بيده..توك مابيك ترفعها شو هسه انكفخت..
جرني لحضنه وضحك..نامي ام لسان نامي..

شوية وغفى كام يشخر من التعب..تبعدت عنه واخذت فوني
التهي بي منعسانة بعد وكت..
دزيت لامينة مسج لان عندي فضول شصار ..
شوية ورجعتلي رسالة صوتية..
بهادر صاعد ومراضيها ومعتذرلها..بس المهم
ماتوصل السالفة لخوالهم..لان عمي كلش
يخاف ع سمعته من خوالهم يردون الزلة عليه
صح بالمظهر حبايب بس بينهم صايرة حرب البسوس..

ورايح جايب الها كلادة هدية اعتذار والكلابية
اللابستها هم جايبها اليوم..
وكايللها محد يحجي وياج بهالموضوع..
انا اسمع الحجي واضحك..صدك ذول القوم الي تحترمهم
يحتقروك وتحتقرهم يحترموك..تنطبق عليهم
حرفياً..وهم يستاهلون يمكن حوبتي وحوبة غيري..

ومرت الايام وحنين متسيدة..محد يكلها ثلث الثلاثة
كم..
يومية كعدات وعزايم وي خوالهم..واللبس والمكياج..
وكل ماححت وكالت ا لا شماتة..وادري بيها
تقصدني..بس اسوي نفسي ابد مو يمها..

صار تقريبا شهرين..وانا ماكو شهرية..عرفت
نفسي حامل لان نفس الاعراض..بس ماحجيت
لاي شخص..حيادر بس وامي عرفو..
وحذروني احجي كلش..

فرحتهم ثنينهم ماتنوصف..وحيادر شفته طاير فرح..
حذرني كال لاتبينين شي لحد ماتكبر بطنج..
وفعلا ماحجيت شي ومحد بالبيت يدري..شغل اسوي
ع كيفي وكامو يكلولي شبيج فاهية شبيج بطيئة..
اكلهم دمي نازل وادوخ..

اخذني لاهلي ومناك رحت للدكتورة ووضعي زين..
ووضع الطفل كلش تمام..
فرحانين ثنينا بس بصمت..
وعمي شد كلش ..كل حجاية وكال ماتخلفن ماتحبلن..
سوان العرب طول ماهي عايشة تخلف..
بس كدام حنين يخاف يحجي طبعا..

مرت شهرين..باقيلي اسبوع وادخل بالثالث..
خابرت ماما اعصر..جاوبتني بسرعة ومخبوصة..
هاجر عدها ولادة وهم بالطريق للمستشفى..
كتلها روحي وطمنيني انتظر منج خبر..ماكلت لامها
خطية تبقى تلوب هنا..
للمغرب خابرت ماما..كالت جابت وشوية ونطلعها
وضعها وهي والطفل تمام الحمدلله..

نزلت بسرعة لام عادل لكيتها بغرفتها جاي تفرش
السجادة..
ها بيبي قرت عينج..اجه يسوري بسلامة..
كامت ركض ..اللهم صل على محمد وال محمد..
بداعة امج جابت هويجر..
اييي مبروك عمري..
شبكتني وبجت..يوم الالج واطش جكليت..

وطلعت وهي تهلهل..
والتمو بسرعة استقطبهم صوت الهلاهل
ويشالون شكوو..
كالت هاجر جابت وباركلها كلهم..عدا حنين
جانت بنص الدرج واكفة..

حيادر جان توة داخل..باوعلي باستغراب..
عباله جاي يباركولي ..
عقد حاجبه وسألني..ها كتيلهم.؟
فتحت حلكي بغباء..قبل لا اجاوبه..
كلهم..دربالكم عليها هالمرة..واذا فاتت سالفة
الكلور والاول راحلها فدوة..
هالمرة اي واحد ياذيها اذبحه الها فدوة..

للحكاية بقية
بقلم شقراء(قمر كانون)