رواية الشيهانة الفصل التاسع والثلاثون 39 - بقلم Shaqraa

مساء الخير

الشيهانة
الجزء الخامس والثلاثون

قبل لا احجي ..خالتي شهكت..ياااع جا انتي حبلى؟
حركت عيوني لحيادر زين افتهمني..
كلها اي مساع حللت..وكتلها لا تحجين انا احجي..
جا شني گحط فروخ ماتحجون..
هاي بدل ما تكولين ع الخير؟؟حجه حيادر بقهر..
اي بالمبارك..
مشكورة حجية ادعيلنا يجي بسلامة..

انا عبالي كلتلكم شيهانة ..
جاوبته انا..لا حبيبي بعد ماكسر كلمتك مو انت كتلي
انا احجي..
بس هاجر ولدت ونزلت بشرتهم..
الله يحفظج..حجاها بابستامة..الحمدلله كامت هجورة بالسلامة..
شلونها هي ووليدها..
كالت ماما زينين الحمدلله ..
نعمة نعمة..حجاها وعبر صعد..بس حنين صعدت بنص
الحجي حتى ماباركت..
بس البقية باركولي..

صعدت وراه بسرعة حتى افتحله الباب ..لكيته رايح
للحمام..
دخلت للغرفة حضرتله ملابس واخذتله المنشف للحمام..
مد راسه من الباب..روحي للغرفة لا تنزلين..
اي رايحة..تريد شي؟
تعاي دخلي هههه..
ههه ماتسويها تضوج انت..
ههه يلا روحي هسه طالع..

درت اريد ارجع للغرفة صار بوجهي بهادر..
جا شني ياهو بالحمام..
باوعتله باستغراب وحجيت..يعني حمام ومسدود وانا اجيت
من يمه منو بي؟
ماجاوب حس بفشلته وراح نزل..
رجعت للغرفة وانا اعيب عليه..يعني كل ماريد
الزم لساني هو يكلي كصيني..لابس گلابية صفراا
اكو رجال يلبس كلابية صفرة ومامكوية بيها اثر
كعدة وكسرات.

دخلت للغرفة وانا ايدي ع بطني..ماما مو تطلع
ماعندك ذوق..من صغرك اخليك تتابع برامج فاشن ..
خليت ايدي وغمضت..اتمنى اجيبه بسلامة وافرح بي..
والبسه وانسقله واذا بنية البس انا وياها مثل انا وماما قبل..
ياااي مااصدك..

انفتح الباب ودخل حيادر ..فتحت عيوني وهو ينشف
بشعره ويضحك..
ها جنتو تسولفون..
ايييي..متشوقة اجيبه كلش..
يجي وتگر عينج بي حبيبتي..بس شلون جفصت
انا ههه..
بعد مصيرهم يعرفون..احسن عرفو صدفة..بس انت خوش
ضبطتها ..
اي بعد فهمت انت ماكايلة من اشرتيلي..
جوعان عشاكم جاهز؟
اي هسه نازلة..
يلا دربالج لا تركضين..
صار حياتي..انطيته بوسة بالهوا وطلعت..

شفت حنين مشت بسرعة..معقولة جانت تتصنت؟؟
منظرها مو مال واحد يريد ينزل..
لان مثل التركض وفترت..
اذا صدك ولكفتها تتصنت الا اكول لحيادر هالمرة..
لو اعرف شسوي بيها ..
نزلت وانا نزلت وراها..
لكيت البنات جاي يصبن عشا والكل كاعد..

باركولي الولد وعمي كال جعلي بالج هالمرة زين..
الله كريم عمو الشيخ ادعيلنا..
خير ان شاء الله..
ساعدت البنات بالتوزيع ونزل حيادر وهم باركوله..
بس ابوه تحمحم وحجه..بوية جعلو بالكم ع الفرخ
لا تمصخونها ..
ها بوية شني شاكيلك شني..حجاها بضحكة وانزعاج..
لاا بس بعد ..تبيين ..حجاها بارتباك..

حيادر دخن من العصبية وكوة بقى كاعد..
اكل قليل وكام..كال رايح يم بيت عمي ..لحكه وليد كله
جاي وياك..
هم من جان كاعد كلها ساكتة..بس من كام يلا بقو يسولفون..
واذا سولفو يلزكون بحيث مخلصين ومانكدر نشيل المواعين..
بس نقذتنا ام عادل..جابت ابلام ركي وبطيخ..
كالت شيلن الصحونة سون مجال للركي..
وانا وسارة ماصدكنا شلناهن بسرعة ..
وكملت شغلي وصعدت..

راسلته ماجاوبني..اعرفه من يروح يستحي يراسل
لان يكعد يم الزلم الكبار..
تحضرت حتى اغير مزاجه شوية..
بدلت الفرشة ورشيتها معطر ..طلعتلي ثوب جديد
جابته ماما الي..كل ماروح الكاها مشتريتلي مجموعة..
اخذته لونه وردي على بيج ..كلش احب هاللون ..
طويل للساق وويا الروب مالته..
لبسته وتعطرت .. وتمددت على برودة الغرفة منتعشة..

حسيت بالم وعصرة صارت ببطني..وحالبي تشنج
بحيث كمت وكفت من الالم مثل المحترك بشي وركض
هيج اريد اخلص من التشنج الصار..
خف التشنج بس صار الم ..بقى الالم مثل اليدور ببطني
يفتررر..
جريت فوني خابرت ام عادل..فدوة لحكي عندي الم قوي..

بسرعة صعدتلي وياها امينة ونغم ..
هاا اسم الله ياستار شبيج يمه شبيج..ركضتلي امينة
وانا واكفة ولازمة بطني..
وبقو يحجون وياي بس الالم كام مايتفاهم..
حسيت بطني تتشلع ..ركضت نغم كالت اكلهم يصيحون
عمي
ياخذج للمستشفى احسن..
وام عادل جابتلي عباية لبستها بس بالكوة ماكدر احط
رجليه بالكاع..

لزموني ونزلوني كوة..خالتي باوعتلي وعاوجة حلكها..
ها شنهي طرحتي..
فال الله ولا فاالج حجيتها بصرخة..
وهن جرني يريد يهدني ..دخل حيادر يركض..
اجاني بوجه باهت..ها شاها ها..
حجيت ودموعي تصب..متت وجع حيادر بطنيي..
حط ايده ورا ظهري ومشاني..امينة كالت تانوني
جاية وياكم..

اخذوني للمستشفى بس الطريق صار علي سنة مو دقايق
من الوجع الماينحمل..
نايمة بحضن امينة واعض بالعباية مالتها واكتم بالالم..
على ماوصلنا كوة بقى بيه حيل..
بس فقدت الحيل كله من بعد الفحص كلولي ميت..
بقيت ابجي وخانكة روحي بيديه..ماريد صوتي
يطلع..اريد اخنك نفسي وامووووتت..
هاي المرة الثانية اخسره ..لييييييش..

من هاليوم دخلت بكآبة..بعد مانزلو ورجعني حيادر
للبيت ماقبلت اروح لاهلي..لان فرحانين بهاجر ماردت
اكسر خاطرهم بيه..
ماما اجتلي ورادت تاخذني كتلها ماروح لان وضعي
زين ..مو مثل الاول جبير وتأذيت ..هذا زين بس اول
مااجيت من المستشفى الم..بس هسه لا ..
جنت احجي هالشي حتى اقنعها ..بس من داخلي
وضعي ماينحجي..الم جسمي راح والم نفسي تضاعف..
بعد ماعجزت ماما مني راحت وهي توصي ..

بقيت شهر تقريبا وانا معتكفة وبس ابجي..
غرفتي ابد مااطلع منها ابددد..مرتين خالتي تصعدلي
وترزل نزلي اشتغلي ومدري شنو..
اكلها هسه اخابر امي تاخدني هي بس تسمع هيج
تنزل..
ابد مااتحمل شماتة حنين لو نهاية ..لو بهادر وحقارته
وهو يبسمر بحيادر ..

بيومها جانت دنيا مغرب وحيادر توة جاي..
جنت متمددة بالسرير ومصفنة..دخل سلم واجه يمي..
كعد وجر ايدي خلاها بين ايديه..
شعلومج..
هزيت راسي ..
ماتردين ترحين لاهلج؟
باوعتله وانا افتح عيوني..ليش؟
ابوج مشتاقلج ويستحي يجي لبستنا..اليوم خابرني
كال خابرتها وماردت..

اي جنت نايمة مادري..
ومن كعدتي ماخابرتي؟
لا ماما خابرت وكتلها سلمي عليه..
هه..شيهانة غمضي عيونج وتخيلي..ابوج الجان متانيج
تجين للدنيا وفرحته بيج ماتنوصف..هيج تعاملينه؟
تخيلي ابنج الهسه تبجين عليه يكبر ويسوي هيج..
شتحسين؟؟
ليش تحسسني انا مأذيته لبابا؟
لااا ادري بيج تحبينه وماتردين تقهرينه وهو گلبه تعبان..

بس الجاي تسوينه يقهرنه كلنا..
امج صاير الدمع غداها وعشاها..
لن بت عمج تكلهم بتكم يمكن تسودنت بس ساكنة
الغرفة..
مخليتهم يطحنون بروحهم وهم يشوفون صدك ماتحاجينهم
ولا ترحيلهم خايفين عليج..
هاجر تكلي عمي خل تجيلها يومين لخاطر اهلها..
عمي وعمتي حالهم بالضيم..تخابرها عمتي تحجيلها
حجايتين وتسده وبخابرها عمي مرة ترد مرة لا..

حيادر مقهورة..حجيت وانا ابجي..
تقربلي وجرني لحضنه..
وانا مرتاح بنظرج؟؟حجاها بحسرة قوية..
كلبي موجر وداعتج..واريدج سند..خذيتج قوية
حتى تلزمين ظهري..
كليلي ناوية تظلين هيج شكد بس كليلي؟؟؟حجاها ورفع راسه..
جر حسرة طويييلة بصوت عالي..

من بعد الفترة الفاتت انتبهت لنفسي..
شكد مأذية ماما وبابا..ومخليتهم بنار عليه..
شكد مأذيته..وهو متحملني..
حاله مثل حالي..والاكثر مايكدر لا يبجي ولا يعبر..
شجعت نفسي وكلت لازم ارجع من جديد..وهذا
امر الله ومكتوب..

يوم ثاني الصبح اخذني لبيتنا..اهلي جانو مايدرون
وبس ماما وهاجر بالبيت..
فتحتلي الباب ماما عيونها مدمعة ووجها يضحك..
جرتني حتى ماسلمت ع حيادر..بس دخلتني جوا
واخذتني بحضنها وتشم بيه وتبوس..يابعد امج
ياروحي وياراحتي ولج كلبي طك عليج ولج..
صدك انقهرت عليها ..

ماتركتني الا من حيادر صاح من برا..يلا انا
رايح في امان الله..
عافتني وطلعتله..تفضل اعذرني بس تدري بحالي..
معذورة وحكج ..بس عندي شغل تدري شيهانة...
اي كمل شغلك وتغدى يمنا..
تعذريني ..راح اروح ولليل يلا ارد هم تشبعون منها
وهم اكمل شغلي..
ها براحتك بعد بيتك هذا..
وكفوو..يلا في امان الله..
الله وياك..

راح هو وماما اخذتني بحضنهاودخلت..
اليوم تباتين فنج تروحين..
هههه انت ويا تمالخو وشوفو منو يفوز..
دخلنا للمطبخ لكيتها مخلية الجدورة ع النار..
هاي شنو طابخة مشتااقة لطبخج..
كولي شنو مشتهية واليوم كله اسوي..
جاي نحجي ودخلت هاجر..بيدها ابنها الي ماشفته
من صار..

انطته لماما واحتلي..شبكتني حيل وبوستني..
عاتبتني لان مااجيت ..كتلها جنت مخبلة
وهسه عقلت بقت تضحك..
ماما انطتني الطفل وهي مبتسمة..هلوو عمتو..
اخذته وانا اضحك بفرحة..يهلااا بيك عمتو ..
بسته من خده الترف وهو ساكت وفاتح
عيونه يجنن..
حضنته لصدري وبست راسه..رجعته لامه واباوعله
بأمل..

اخذته تنيمه وانا بقيت يم ماما بالمطبخ..
بقينا نسولف وهي كم مرة تعيد عليه سؤالها اذا
اكو سبب لو مات بلا سبب وتريد تتاكد..
اخر شي كتلها كم مرة سالتيني تدورين ثغرة اعرفج..
بقت تضحك..

الظهر اجه بابا وانا رحت فتحتله الباب..
ماصدك من شافني وبقى شابكني هواي ..حسيته
يتمالك نفسه يلا يحجي..
لحد مامحمد شبكني وانا بحضن بابا..كله مشتاقلها
بابا ما خلصت وضحك..
وانا بينهم وفرحانة بشوفتهم الجنت حارمة نفسي منها
ودخلنا جوا..

بقيت يمهم لليل واجه حيادر ..ماما حجت ويا
ابقى بس ماقبل..
كلها حانت مخبلة البوم عقلت وتردون تعوفني
هم مايصير..
عاد هي فهمت وسكتت كلت تالي تذبلها حجاية
ماتسكت..

رجعنا للبييت ونسولف بالسيارة..سألته ع محمد
ماقبل يحجيلي..علاقته بمحمد صارت كلش قوية..
وبس هو وحسن يعرفون الصار بالفترة الاخيرة وي محمد..
بالفترة المات بيها ابني ..الاول....
محمد جانت نيته يخطب ودز ماما واتفقو وتحدد
حتى يوم الخطوبة بس ماكملت..
كال مشكلة بيني وبينها وانا الماريد خطوبة بعد..

ماما كلتله بعد مااخطبها خلاص تعبتك..
من باجر تشوفلك غيرها واخطب وتزوج كافي كبرت..
بس هو كلها مو هي الرفضت انا..والسبب بيني
وبينها..
بس هو حسن وحيادر يعرفون..ومحد يقبل يحجي..
وشكد حاولت وي حيادر بالطريق يحجيلي ماكو..

رجعنا للبيت محد موجود كلها بغرفها لان ساعة متأخرة..
صعدنا ركض واحنا نضحك بصوت ناصي..
ركضي لحد يشوفنا بسرعة..
اركض لا يطلع عموو هههه..
دخلنا للغرفة نضحك ..باوعلي ورجع يضحك..
حلو منظرنا ها هههه..
اي حلو عبالك راجعين من بار وهيج خايفين..
هههههه خايفة انت شنو؟؟
لااا اتشاقى انا اخوف مااخاف..

حجيت هيج طفى الضوا واجه يمي..انا احب
الماتخاف..حجه همس وهو يجر الشال مالتي..
غمضت عيوني وميلت راسي بشوق..
مشتاكلج طيرتي..
غمضت وحجيت بهمس..انا مشتاقة للمساتك ..
جرني لحضنه وهو تنهد بشوق ووجع وحرمان..
واشتياقي اله شجعه مايعتقني ولا يحررني من اغلال
حنانه..
بنهاية المطاف ..نايمين ع السريرجرني لصدره حيل..
خبيت راسي بصدره وغمضت..نمت بارتياح..

ومضت ايام والايام صارت شهر ونص ..وحملت
للمرة الثالثة..
اعرف نفسي بسرعة من اعراضي..
بس ماحللت رغم فات هواي..
حجيت لحيادر كال اخذج الدكتورة ونضبط الوضع
من هسه..
بيوم صادف جمعة كنالهم شاكة حامل..واخذني ورحنا..
بعد الفحص والسونار وبين الحمل وجبير لان
صارله هواي..
طلعت وانا ابتسمله..غمض عيونه بارتياح وكال..
لك الحمد يارب..

اخذ ويا غدا ورحنا لبيت اهلي..لان هو كايل لبابا
غداكم عليه..
رحنا الهم وتغدينا وماما وصتني كالت اقل الم تحسين خابريني
اجي اخذج وتبقين يمي لحد ماتولدين..
والحجي صار كدام حيادر..
كلها لاتخافين عليها انا وياها ومااقصر ..
سكتت بس ماعاجبها ..

طلعنا منهم العصر وحيادر ضايج..كال
ليش تحسسني مو كد الامانة..
فهمته وكتله تخاف عليه من حنين..لان تعرف كل
اذية سببها هي ..
شوي اقتنع وسكت..
اخذ ويا حلويات ومن وصلنا وزعها للكل ..
بعد ما كنالهم ع حملي..

خالتي كالت يلا بعد بطنج تعودت يثبت هالمرة
وتخلفين غيرة..
مدري شعجب هالمرة هيج حجت..او يمكن قطعتين
القماش والشيلة امس الجايها حيادر بعده مفعولها..
لان حيادر وصى صديقة عدهم محلات قماش فاخرة..
ع قطعتين الها وكله شوفلي من واحد مضبوط
شيلة بريسم..

المهم هي شوي بينت فرحة..بس نهاية تضحك
بخبث..كالت يعني تجيبين وراي..لان هي
هسه حامل..
كتلها اذا مقسوم يجي..بسرعة نطت..لا ابني مقسوم
اكيد..
حيادر كال كومي نصعد ماهتملها..وحنين جانت ماموجودة..

لورا المغرب نزلت وحيادر طلع..حنين بالمطبخ
ويمها البنات..
دخلت يمهم اشرب ماي..بس ريحة الاكل كلش تأذيني
بسرعة اسد خشمي..
مخلية كلينكس ع خشمي ودخلت..
هي باوعتلي ورفعت حاجب..مبرووك
كالو حامل..
شكرا يوم الالج..
مو جنج لحيتي على روحج فوكه فوكه خو انطي
روحج مجال تعالجي شي..خاف بيج جرثومة
تموت الطفل..

لا اكثر من مرة سويت تحليل ومضبطة اموري..
بس نكدر نكول رزق..والرزق من ينفس
يطيير..
يلا بلكي تحصيلنه ومايطير ..
اممم ادعيلنا..حجيتها وانطيتها ظهر ..شربت
ماي وطلعت..

خليت حركتي كلش قليلة بس وقت شغلي اكوم
واذا ماعندي شي اروح اتمدد بغرفة امينة..
كالت لا تصعدين وتنزلين تعاي يمي..
لهذا كمت اكثر شي المغرب انزل على مايكمل
العشى اتمدد يمها لان حيادر هالايام ملتهي صايرة
مشكلة وبعد هم اختصاصهم حل مشاكل..

بيومها الدنيا ليل..حيادر كال اتأخر..حتى
مااجه تعشى..
انا تعشيت ورحت لغرفة امينة تمددت..
هي كالت رح اسبح واجي..
انا خليت هيدفون بأذني وغمضت..هي طفت
الصوا كالت اخذيلج غفوة ومن يجي رجلج
يكعدج..

انا عجبني الجو ..تغطيت ودفيت والجو بارد جانت
الغرفة ظلمة بس ضوا الهيتر بيها..
انفتح الباب..سمعت صوت وشوشة مو واضح وخرت السماعة
وانا مغطية راسي..
اسمع عمي يكلها مدامها راحت لبيت اخوها يلا..
امينة زودتيها كافي..وهي تكله اطللللع مرت ابنك
نايمة هنا..
شنهووو..ياهي ويين..
نصي صوتك وروح لا تكعد تشوفك فشلة..شاها
ذيج بجربايتي..

للحكاية بقية
بقلم شقراء(قمر كانون)

تخيلته لابس دشداشة بيضا واصابعه مصبغة🤣🤣🤣لا وسوسو جاي فت لان اسمه رسن

ليش تظلمي ترى كله تبيعي طاقته تبيعية😂😂
اليوم التعليقات برعايته باجر شلوووون