الطاووس الوقح (صرخات انثى) الفصل المئة 137 - بقلم آية محمد رفعت

صباح الخير يا بنات، عساكم جميعًا بخير وبصحة وسعادة، أنا الحمد لله رجعت بيتي من امبارح الصبح، وكنت حابة أكلمكم عن كذه نقطة.

طول عمري صادقة معاكم وعمري ما خبيت عنكم حاجة، حاولت كتير أوي أفصل ما بين حياتي الشخصية وبينكم بس فشلت، لاني بحب أشاركم في كل حاجة تخصني سواء فرح أو حزن، حتى لو هلمح من بعيد أن في ظرف مزعلني وبمر بيه.

أنا كنت منزلة بوست بمعاد الفصل ورجعت نزلت بوست تاني ومعرفتش أنزل، وده غلط كبير مني مش هكابر عليه وأبرره، أنا غلطت وعارفة وزعلانه عشان ده، ويمكن عشان كده أصريت اصرار مش طبيعي ارجع المنصورة يوم الاحد الساعة ٤ الفجر ومستناش للمعاد اللي كنت هسافر بيه، وده دفعت تمنه ورجعت اخده دور برد وتعب صعب أنا وأولادي، لاننا كنا قبلها على البحر وبنلف اسكندرية مخدناش فترة راحة، واصراري ده لاني شوفت كومنتات أول لما قدرت أقوي باقة الموبيل، الفون من وقت وصولي اسكندرية وشبكته كانت سيئة جداا، وانتوا بنفسكم لاحظتوا ان مكنش ليا ظهور الا من موبيل صديقتي.

هرجع وأقولكم أنكم ليكم كل الحق لاني غلطت، بس مينفعش بعض التعليقات تنصب حكمها اني عايشة ولا على بالي وكلام كتير ظلم، وتريقة على رواية اشباح المخابرات من قبل ما تنزل، أنا كانت نفسيتي سيئة بالفترة الاخيرة عشان كده كان مقرر نسافر كلنا كام يوم للتغيير، بس ده كمان حصل فيه ظروف واعتذرت عن السفر، بس قبلها بيوم خالتو قدرت تقنع عيلتي انها تروح معايا لاني حرفيًا كنت في حالة صعبة، سواء من المشاكل اللي حواليا او من الخساير اللي اتعرض ليها زوجي في عمله تلات مرات في شهرين ورا بعض، وانتوا عارفين كويس الدنيا الحالية والغلاء الرهيب ده أي خساير مادية فيه بتكون عاملة ازاي، احنا تلاقينا الاخبار في شهرين وفي فترات متقاربة، فاحساس انك عاجز ده بشع بس الرضا بما قسمه الله مهون كتير جدًا.

عايزة اقولكم لما قولت هكتب بالطريق، معرفتش نهائي والله، العربية كانت بتتهز والموبيل كل دقيقتين يقع من ايديا، وفوق كل ده معايا طفلين سنهم مقارب لبعض طلعوا عنيا من اول الرحلة لحد رجوعنا، ومش هنكر بردو إن منظر اسكندرية سحرني، أنا بحب البلد دي جدًا ووقعت في غرامها ٣٦٠درجة بعد ما شوفتها، وشوفت جمال أهلها وطيبتهم وعلى رأسهم سوونه روح قلبي اللي ليها بوست لوحدها بس أفك الكالونا واخلص الفصل الاول وبعد كده هتكلم عن كل اللحظات الجميلة اللي قضتها معاها.

انا برد بس على اللي اتقال لاني مش حابة اسيبكم بكمية الاحكام اللي تكسر القلب دي، شوفت بردو كذا تعليق بيقولوا دي طالعه لايف وبتهزر وبتضحك ولا همها! بصراحه مش عارفة ارد بأيه، ده أنا من كتر حبي ليكم ولاني بحس انكم عيلتي التانية طالعه جوه الجروب معاكم ويمكن لاول مرة أدخل اكتب بوست على الواتباد الاول قبل الفيس لاني واخده على خاطري منكم وطيعًا مش الكل عشان حرام اكون ظالمة وأظلم الناس اللي بتقدرني وبتحترمني، قولتهالكم في لايف قبل كده الله أعلم بظروف الشخص اللي انت متعرفش عنه حاجة وعن حياته، واللي يوجع لما تلاقي كل اللي حواليك بيغرقوا في مركب مشابه ليك ومحدش قادر يكون جنبك لانه مُبتلي هو كمان، فانت موجوع لنفسك ولاقرب الناس ليك.

اول لايف ظهرتلكم فيه قولتلكم اني هرجع اكمل الفصل وانزله ليكم، والله العظيم رجعت وقعدت فعلا بس معرفش نمت ازاي من تعبي، لاننا كنا واصلين في نفس اليوم ونزلنا ساعة ونص بالطريق تاني عشان نروح كوبري ستانلي واللي من اجمل ما شوفته باسكندرية اللي سكنت روحي وانعشتها دي، وتاني يوم بردو حاولت أكتب بس طبعًا انت موجود في مكان اخده كام يوم، أكيد طبعًا فضولك هيجيبك تنزل وتأخد لفة فيه، واللي زايد كمان اللي قولته فوق النت والشبكة مكنوش ببشتغلوا غير نادرًا، وبأخر يوم بوادر البرد ظهرلي ومشتدتش غير بوصولي المنصورة، كأني خرجت من مكان طقسه معتدل لقمة الحر 😂، مع إن كلنا جوه مصر سبحان الله..

أنا كنت محروجة من إني أعملكم البوست ده، بس اقتنعت إن في نسبة بينكم كبيرة بتحبني وبتقدرني فانا من واجبي أحترمهم وأحترم نظرتهم فيا، فقولت هكتبلكم وهكون ريحت قلبي شوية، من وقت وصولي وأنا تعبانه انا والاولاد، واحنا التلاته نايمين والله جنب بعض بنفس الاعراض والتعب، أنا مش قادرة اقوم وجع عضمي ولا الصداع فبتوجع وانا شايفهم بنفس الاعراض دي...

الخلاصة في كلمة اعتذار مني ليكم كلكم، عارفة انكم صبرتوا عليا كتير بالفترة الاخيرة، وكنتوا جزء من اللي اتحملوا صعوبة اللي مريت بيه، ويمكن فيكم اللي لمس حزني وبوستاتي الغريبة، فصدقوني كنت محتاجة السفرية دي جدًا تهون عليا اللي فات، وبما اني رجعت دعواتكم لاولادي بالشفاء العاجل، والمرادي مش هتنقل من البيت الفترة دي الا بعد ختام الرواية، واللي خلاص هانت وبتفنش فعلا، واللي شايل هم اشباح المخابرات من دلوقتي، فأحب اطمنه مش هنشر الا وأنا كاتبة منها جزء أقدر بيه أنزل مواعيد ثابتة للنزول، واللي حابب يقرأ العمل كامل ليه كل الاحترام، و اللي اعتكف عن القراية بسبب تاخر الفصول بردو ليه نفس الاحترام ❤

عارفة ان بعد قراءة بوست طويل عريض زي ده هتقوليلي أيوه والفصل معاده امته بردو، هرد وأقول إني لو واثقة حتى من نزوله بكره مش هعلن، أنا كرهت أي اعلان أنزله والله العظيم، لاني حرفيا بتعب بعده ومش بقدر أكمله وأغلب تعبي بيكون برد لاني مناعتي زيرو على الشمال والكارثة لما بأخد ادوية للبرد بتخليني شبه السكرانة بالظبط وده كان من ضمن مواقفي الكوميدية مع ادمن احسان 😂، واللي بردو ليها بوست بس بعد الفصل 😂، من الاخر كده عزيزي القارئ تحديد موعد للفصول بيجبلي برد والعلاج منه بيخليني أفشي أسرار دولة بحالها من حباية برد، بتعلي الجي على طووول، واللي حاضر ده الاشخاص القربين مني 😂.

اعتذار أخير منكم، وإن شاء الله يكون الاخير فعلا، ومن ضمن الرغي ده نسيت أقولكم إني والله بحبكم في الله ♥🌗..... 💙💙... ♥♥♥♥♥