بسم الله الرحمن الرحيم
اللهم صل على محمد وآل محمد
____________________________
شُجان- هسه راح نعرف منو هاذ المعجب السري
فتحت الثام وجانت اكبر صدمه بحياتي ما توقعتها
شُجان- انت شجابك اهنا!
علي - احبج ورايدج ماريد غيرج شُجاني ابوي يريد يزوجني لميسره وجدي هم واني ما اريد ميسره اريدج انتِ انتِ اول حب بحياتي
وخرت منه وفتحت الباب
شُجان- اطلع برا لك اني هم صوجي ليش ما اصيح هم ثوله اني
ضليت اصيح باعلى صوت عندي وهو بقى بمكانه ولا حاول يقاوم او حتى يشرد كانما مستسلم ، طبو عليَ سلطان وحمزه وجدو علوان ووراهم عمه علياء عمو عباس وعمه رقيه وبيبي سعاد وجمره
سلطان- علي شجابك اهنا!!!!!
صاح بي سلطان وهو بقى يباوع عليهم راح على جدو علوان وباس ايده
علي- جدي بروح موتاك ماريد ميسره اني ما اريد اتزوجها افهمني اني احبب شُجان ليش ما تزوجنيي شُجان هايي هايي عزيزه گلبي الي يريدها گلبي الي يحبهاا گلبي هيه شُجان مو ميسره
نتر جدي ايد علي منه ورفع ايده بتحذير
علوان- وحق الي خلق السماوات والارض ما اخليك عايش اذا بعد تطب على البت وهيه مالابسه الحجاب.
اندار عليَ بسرعه لبست حجابي وحجه بهدوء عكس العاصفه الي صارت قبل شويه
علوان- بنيتي شُجان انتِ تردين علي؟ تحبينه كليلي علمود ازوجكم؟
شُجان- ايعع مع احتراماتي الكم بس والله لو ما انتو اهنا جان جريته زيج شنو هل حيوان هاذ اروح اتزوج واحد عرفته بس بالطفوله؟ خير شاربه اني علمود اتزوج علي؟ لو يبقى اخر واحد ما اتزوجه وعلي بطل هل حركات لان بعد كرهتك وجدو اعذرني اذا صار العرس مراح اجي
طلعت من الغرفه فتحت باب الشارع لگيت صهيد گاعد ببابهم رحت يمه وخرعته جان صافن
شُجان- الصفنه مو الك للمطي
صهيد- رحمه الله والديج سويتيني مطي
شُجان- يلا كلنا نفس الشي
صهيد- شجابج الساعه راح تصير بالاربعه الفجر؟
شُجان- اندري شفت روحي ضايجه وطلعت شويه
صهيد- لتجذبين سمعت صوتج وانتِ تصرخين شصار؟
شُجان- يمعود ماكو شي
بهل اثناء طلع علي من البيت وصهيد انصدم هاذ شجابه اهنا وطلع ورا عمي عباس ينعل ويسب بي باوع عليَ وقلص عيونه
صهيد- تحجيلي من البدايه لحد ما اجيتي اهنا
شُجان- اخخ ضهريي يمكن نعست رايحه انام باي
طفرت منه ورجعت للبيت رحت لغرفتي لكيتهم موجودين
جمره- تعالي حبيبتي سولفيلنا شسوالج؟
حمزه- خويه تعالي احجي ليش علي جان بغرفتج؟
صهيد- جان بغرفتها؟!!!!
اجه صهيد من ورا حمزه شراينه طاگات باوع عليَ وخزرني خزره خلاني النلصم
علوان- اهدء يمعود شُجان صرخت لان علي طب لغرفتها ووو..
صهيد- وووشنووو؟
شُجان- علي يحبني ويريد يتزوجني
صهيد- وانتِ وافقتي؟
شُجان- ايعع شبيكم وياي لا طبعا شنو شاربه علمود اوافق بهاذ ؟
سلطان- ما وافقت علي ولمن طلعت ضل يتوسل بجدي علمود يخلي شُجان توافق بي
ضلو يحجون واني نعست لاحضت عليَ جمره اني نعسانه وصاحت
جمره- يمعودين البنيه نعسانه خطيه عوفوها خلي تنام باجر عود ناقشو الموضوع
صهيد- جمره خويه نامي اليوم وياها
رقيه- كنان يمه نامي يم اخيتاج
كنان- ها اي هسه تدللين
راحن البنات جابن فراش وفرشن بالگاع وطلعو الولد كلهم علاقتي ويه كنان وجمره مو قويه عكس شمس وورده
كنان- بنات جوعانه
جمره- روحي اكلي
شُجان- اكلج كنان
كنان- ها
شُجان- اني هم جوعانه
جمره- ولجننن الساعه راح تصيرر بالخمسهه انطمرننن
ضلينه اني وكنان وحده تباوع للثانيه وضلينه نضحك بهستيريه وضحكت ويانا جمره
شُجان- نعسانات؟ اني طار مني النعاس
جمره- لا والله ما انام هسه
كنان- ولا اني منعسانه اصلا
گمت من فراشي وفرشته يم فراشهن وصرنه ثلاثتنه بالگاع سوينه دويره وگعدنا وضلينه نحجي على علي
جمره- علي دومه شايف روحه الي انيي احلا واحد بالعشيره وانيي وانييي خابب دگوم جنك فصمه
كنان- لا خلقه لا اخلاق لادين لا ديانه كلشي ماكو علي
شُجان- وعلي لو ما جدو علوان جان جريته زيج معدل شنهي يحبني؟ خايب يمكن عنده عمى صفره
ضربتني كنان على وجهي
كنان- انجبي حلوه تخبلين والله
شُجان- يابه اني ما اعرف شحجي لمن احد يتغزل
ضلينه نضحك ونسولف لحد ما صارت الساعه بالسته بنجرنه ونمنه گعدنا على صوت عمه رقيه تصيح بينا
رقيه- ولجنن الساعهه بالـ2 شوكتتت ناوياتت تگعدننن بالله؟
كنان- يمههه عليج الله بس شويههه
رقيه- هاي اذا نضل بس شويه وبس شويه لليل ما تگعدن كومن لا ادفر. الباب والله
شُجان- شنو عمه راح تنحولين طرزانن
شمرت كنان عليَ المخده وهيه تضحك
كنان- عزاا العزاج بس لا سمعتج
رقيه- كومنننن ولجننن جدجنن بس يدري بيجنن بعدجن نايمات يگطعجنن والله
گمنا واحنه بعيونا النعاس رحت غسلت وصحصحت شويه والبنات هم رحنه سوينا غده وكلساع تجي عمه رقيه تتأكد من عدنا وتروح لحد ما صارت الساعه بالـ 4 ونص اندك الباب وعمي عباس فتح الباب طلعت بوجه ميسره عيونها حمر وضعفانه كلش
طبت تبجي واول ما شافتني ضلت تصيح
ميسره- كلهه منن وراجج انتِ انتتتِ اليي خربتييي علاقتييي بصهيدددد المفروضض يحبنيي انييي يتزوجنيي انيي اني اصيرر مرتههه وهوو زوجيي منن وراجج راح اتزوجج علييي واني ماا اريدددههه شُجان وحقق الخلقجج اليوم ما تعيشينن اليومم اهنااا ادفنجج
اقتربت مني رادت تهجم عليَ شالها عمي عباس علمود ما تهجم قيد ايديها علمود ما تتحرك وهيه تصيح علمود يهدها بقيت بمكاني مصدومه شجاي تحجي هاي؟ والله بيها اهانه
شُجان- والله صرتي مضحكه لامه محمد لان اول شيي اني ما عايشهه ويهه صهيدد علمود اخرب علاقتج الحميمه وياه وثانيي شيي اني ما كلتت لعلي يروح يخطبج شعليهه اني بيكمم نارر جهنمم تحركمم واخلصص اريدد اعرف اني بشنوو اذييتج؟ ليشش هل حقدد هاذ؟
ميسره- لانن اخذتي مني صهيدد صارر يشاقهه ويضحك وياج وصارر كل تفكيرهه بيجج انتِ
شُجان- لا العباس عليج ؟ هو اني وياه مناگر اربعه وعشرين ساعه عبالك ضراير خايبه والله فايخه انتِ ما تولين مني؟
عفت كلشي بيدي ورحت للغرفه سديتها وقفلت الباب اجتي عليَ كسرت الباب تكسر بالدگ
ميسره- الجبانههه لو بيجج خيرر تعالي واوكفيي كداميي مو ترحينن تتختلينن مدري ويامنن اليوم تنامينن
تنرفزت منها حيل وفتحت الباب وضربتها راجدي
شُجان- ما اسمحلجج تمسينن شرفي فهمتي؟ !!!
رجعت ضربتني لويت ايدها وضربتها على بطنها خليتها بالگاع تتوجع
شُجان- لتمسينن شرفيي فهمتيي ؟ انيي اشرف منجج يل حقيرر حثالهه والله مثل علي تعرفينن شنو تشبهون؟ ايه بالقران * والخبيثون للخبيثات* انتِ وياه نفس المقام ونفس القذاره البيها وماكو احقر منكم منعرف البشر اله نعاشره وعاشرتكمم شهرين طلعتي انتِ احقرر بشرر تشوفه عيوني
ميسره- لاااا انتتت غلطانههه اني مو هيجج اني مو هيجج تصرفاتيي انتِ اخذتيي منيي صهيدد انتِ اخذتي
دفعتها مني ونزلت جوه طلعت من البيت بكبره رحت للبساتين ضليت امشي وافكر ماعرف بيمن افكر، وصلت لبستان بي شجره تفاح فرحت رحت عليها وضليت اهز بالشجره لحد ما طاحت تفاحه رحت على الساگيه وغسلتها. واكلتها، كملتها وذبيتها تيهت منين ارجع للبيت وراح تصير الغروب
شُجان- لا يا الله شنهاي منين اني اجيت؟ منا؟ لا يمكن منا؟ يببووو يممممههههه
ضليت اتمنشى ماعرف وين مكان البيت تيهت ضليت ادعي بگلبي ارجع للبيت واحاول اتذكر الطريق الاجيت منه
وهبان- شُجان شجاي تسوين اهنا؟
شفت وهبان ورگضت علي
شُجان- ولكك وهباننن انقذتنيي الله يوفقككك دنيا واخره
وهبان- شبيج يمعوده
شُجان- ولك جنت ضايعه ماعرف وين ضليت امشي
وهبان- اهناك بستان عمي عصام شوداج اله. ؟
شُجان- ماجنت ادري بس عدهم شجره تفاح
وهبان- اي عمي عصام عدنه شجره تفاح وشجره تمر
شُجان- شعلينه بي المهم منين ارجع للبيت
وهبان- اني راجع للبيت امشي وياي
تمشينه لحد ما وصلنا للبيت فرحت واطمن گلبي طبيت جوه ما لكيت احد لا البنات ولا الزلم محد موجود
شُجان- يا اهل الداررر شنهي وينكم؟
طلعتلي جمره من غرفتها وهيه تمشط شعرها
جمره- ها وين جنتي ولجج !!! كلبنا الدنياا عليجج حتى صهيد راح للبساتين ما لگاجج وين جنتي؟
شُجان- هو جنت بالبستان بس بستان عمو عصام
جمره- عزااا العزاجج فلكك الفلكجج اي والله سكتيي بس يدري جدي والله يشوي على اذاناتج بصل
شُجان- شني السالفه اخذت تفاحه وهاي هيه
جمره- العببب اخذت انوب تفاحه كوننن سممم تاكلينن ولج ميصيرر تاخذينن حلال غيرنا
شُجان- جا هو منكم وبيكم
جمره- علمود يصير صلح بين جدي وعمي عصام يزوجون ميسره من علي بس اثنينهم ما يحبون بعض
شُجان- الي اعرفه علي يكره ميسره
جمره- همه من جانو صغار واحد يكره الثاني بس صهيد جان يدافع على ميسره ومن هذاك اليوم لهاذ اليوم ميسره تحب صهيد
شُجان- وصهيد؟
جمره- يعتبرنا كلنا اخواته وما فكر بينا غير فكرا واحنه اهنا كلنا نفس الاخوان واذا واحد حب الثاني لازم يتزوجون بسرعه لان اذا عرف جدي ما يزوجهم بعض
شُجان- اهاا حلوو زين اكلج
جمره- لا اكلج ولا تكليلي
شُجان-جاا
جمره- كلهم راحو لبيت صهيد ماعرف شعدهم وكالو اذا رجعت شُجان تعالي انتِ وياها
شُجان- دخيلك يا علي شيردون؟
جمره- اشم ايدي شمدريني اني امشي يلا بس اجيب شيلتي وعباتي
راحت جابت الشيله والعبايه گعدت تلبس بيهن واني انتظرها ورحنه لبيت صهيد ، فتحت النا الباب كنان
كنان- طبن جوه بسرعه
طبينا جوه ولكينا العائله كلها ملتمه
علوان- تعالن بويه تعالن اگعدن يمي
رحنه گعدنا يمه
علوان- شگد تحبني؟
شُجان- نحبك نموت عليك جدو
جمره- جدي شهل سؤال اكيد نحبك
علوان- يايابه واني هم احبجن
كنان- شنهايي جدوو جاا وانيي؟ زعلتت منك
ضل يضحك واشرلها تجي يمه حضنها وباسها من خدها
علوان- والله كلجن احبجن بنفس المعزه هاي شُجان ما صارلها هواي عدنا بس اعتبرها منا وبينا
كرار- حجينه شنهي بنات البطه السوده احنه الفحوله الگاعده يمك؟
ضربه جدي علوان على خفه ايده وهو يضحك
علوان- ما تصيرلك جاره وعلي، والله كلكم احبكم بنفس الحب ونفس المعزه بس اريد اوصيكم وصيه
سلطان- بروح موتاك جدي لتبدي بالوصيه حافظينها
علوان- لا صار بيها تغير
كرار- شنهي سويتلها تحديث؟
كتمنا الضحكه بالگوه ضليت اباوع لوجه جمره وكنان صارن حمر يريدن يكتمن الضحكه ما يگدرن
علوان- انجب لك المهم اسمعوني عرس ميسره الخميس الجاي واريد الكلل يحضر بالعرس الكلام موجه الج شُجان اريدج تجين حتى لو ما تحبينهم لازم تجين العرس راح يصير بقاعه لان ميسره شرطت هاذ الشرط
صهيد- جدي الله بالخير اني ماريد اجي
شُجان- ولا اني جدو الي سوا بيه والي سوته ميسره مينسكت عنه وعلي هم ما قصرر
علوان- تاكلون تبن وترحون للعرس
صهيد- كلمتك على راسي بس اني بعد ما اعتبر ميسوه اختي
شُجان- جدي ...
علوان- كلامي ما يتكرر ترحون وغصبا عليكم
سكتنه شنسوي جا ضلينه كاعدين وكلهم يسولفون ماعداي اني وصهيد منسولف وگالبين خلقتنا
كرار- خايبين شمالكم گالبين خلقتكم جنه واحد ميتكم
صهيد- - والله اذا ما تسكت اگوم امعطگ معط
شُجان- كرار كافي تفاهه
كرار- تفاهه لو برتقاله ههههه
بقينه كلنا ساكتين وهو يضحك من گل گلبه انتبه محد يضحك وسكت عرف نفسه تفشل ايي دسكتت هسه اله تحشش
سعاد - رقيه يمه باجر اخذي البنات ورحن للسوگ اشترلجن ملابس تلبسنها بالعرس وصهيد يمه بعد روحي اخذهن انت بسيارتك عمك عباس والولد راح يطلعون
صهيد- ميخالف
رقيه- اي صار من عيوني يدللن البنات
كمل اليوم على نص خير ورجعنا للبيت صارت عندي غقده نفسيه ابقه وحدي بالغرفه سميت باسم الله وطبيت تأكدت محد موجود بالغرفه ورحت قفلت الباب مرتين والشباك تأكدت منه مسدود شفت صهيد گاعد ببابهم استغربت شبي هاذ؟ بقيت اباوع علي لحد ما طلع من جيبه باكيت جگاير وگعد يشرب خلص باكيت كامل صهيد من اخر سفره اله متغير لحيته كبرانه شعره طولان ماعرف شبي، سديت البرده ورحت تغطيت ماجاني نوم فتحت تلفوني الي بالاسبوع مرا وحده افتحه ضليت اسمع قصيده باسم الكربلائي " لفت زينب" ضليت استمع الها واني افكر بالماضي والحاضر والمستقبل بدون وعي نزلت دموعي مسحتهن بسرعه وطفيت القصيده ونمت، گعدت الصبح مالي خلگ اسوي اي شي تعبانه. دگت عليَ الباب عمه رقيه
رقيه- كومي شُجان يلا راح نتأخرر
شُجان- ايي عمه گايمه
گمت بسرعه وطبيت غسلت ولبست حجابي وعباتي وطلعت لگيتهم منتظريني برا
شُجان- صباح الخير
انتبه عليَ صهيد ورجع نزل عيونه على التلفون
جمره- صباح النور يلا امشينه
كنان- يلاا شُجانو
صعدنا بالسياره الي ورا اني وكنان وجمره والي گدام صهيد وعمه رقيه بقينه طول الطريق ساكتين وصلنا للسوگ ورااح صهيد ضلينا نفتر وطبينا لمحل فساتين
كنان- باعن من هسه اككلجن اني ميسره مو ما احبها بس يعني غثيثه فه راح اجيب فستان اسود
رقيه- شنهي رايحه لفاتحه اشتريلج شي بي خير
جمره- والله يا عمه حتى اني مقرره اشتري فستان اسود وانتِ شُجان؟
شُجان- الصراحه؟ اني هم اريد اشتري فستان لون اسود
رقيه- شنهي شتصيرن سيت استگاين؟
جمره- فديتت السيتت وعلي
ضلينه نختار الفساتين واختارينه فساتين شويه فاضحه هل مرا اشتريت فستان طويل وبي فتحه واصله للفخذ وجمره فستان طويل بس ما بي فتحه من جوه وكنان جابت فستان نفس مالتي وثلاثتنه نفس اللون اسود وعمه رقيه اشترت فستان طويل ومستور طلعنا ورحنه اشترينه گعب عالي لون اسود وبي لون ذهبي شويه، كملنا وخابرت عمه رقيه على صهيد علمود يجي. اجه وصعدنا بالسياره وضلينا نسولف
شُجان- والله اله اندم ميسره لان ضربتني انيي تضربني علمود ولد؟
كنان- اله نعلگ الجو بالقاعه نخليها تحترگ
جمره- هيه اصلا تريدنا ما نجي بس مو بكيفها
شُجان- يابه ختولي شنهي عايزين عليها؟ اهم شي نغثها هل حيه
جمره- وعلي صدك حيه هل صفره هاي
كنان- والله من هسه افكر شلون تطلع بتها؟
شُجان- حيه صفره على امها قابل تطلع ملاك؟ لا طبعا تطلع هلاك
رقيه- اسكتن كافي تاخذت غيبه
سكتنا وضلينا نضحك، وصلنا للبيت ورحنه نجرب الفساتين طبينه بغرفتي وراحت جمره جربت الفستان طلعت تخبلل بالفستان وطبت كنان وراها وكنان طلعت احلا وحده لان ملامحها بريءه وهيه حلوه طبيت اجرب الفستان واستحيت اطلع لان صدري مبين والفتحه هم بس تشجعت وطلعت
كنان- عينن الباردههه عليجج فدوهه لمحمدد شگدد حلوهه
جمره- خرب يومج اشگد طلعتي تشگين شگ
كنان- والله لو ولد جان اتزوجتج
شُجان- واني موافقه بيج.
غطيت عيوني بايدي وضلينه نضحك رحنه على المرايه وشفت شكلي طلعت حلوه جبت التلفون وضلينا نصور. مر الاسبوع بين نروح للسوگ ونجهز نفسنا لان متحلفات على ميسره واجه اليوم المنتظر بدلت وخليت عطر ترست روحي ترس وخليت مكياج احمر خدود ( بلاش) وخليت مسكاره وحمره حمرهه نارر ، سمعت صوت الباب يندگ
شُجان- منوو؟
صهيد- اني يمعوده جبتلج شغله
رحت لبست العبايه علمود تستر جسمي والشال وفتحت الباب
صهيد- الله الله شنو هايي عبسي دائما تفاجئني لمن تتمكيج
شُجان- اعجبكك انيي بالمكياج تروحليي فدوهه
صهيد- تخليني اطب لو شلون؟
وخرت منه وطب ضل صافن شويه واباوع عليَ
صهيد- تارسه روحج عطر
شُجان- اي صح ليش بيها شي؟
صهيد- لا ما بيها شي بس يمكن راح المعهن
شُجان- شتلمع؟
صهيد- سيارتي المعها احسن
شُجان- شجاي تحجي؟
صهيد- ماعرف المهم
طلع من الستره علبه لونها ازرگ مثل مال مجوهرات وفتحها جان بيها گلاده ذهب ابيض
شُجان- الله شنوو هايي؟ هديه ميسره؟
صهيد- لا هديتج هاي الج
شالها بيده وخلاها بيدي
صهيد- روحي لبسها اني رايح انتظرج جوه
طلع وسد الباب فرحت بيها رحت نزعت الحجاب والعبايه ولبستها طلعت حلوه ويه الفستان وكلش رهمت وياه سرحت شعري وحضرت الجنطه الي جبتها خليت بيها تلفوني وعطر صغير وخليت بيها حمره وكلينكس مبلل ومرايه صغيره ، كملت ولبست الكعب وطلعت واني اطگ بگعبي لگيت البنات متجهزات قبلي وكلهم متجهزين طلعنا ورحنه اني وعمه رقيه وكنان وجمره بسياره سلطان والباقين بسياره صهيد والباقين نص راحو ويه صهيد ونص راحو ويه عمو عباس وصلنا للقاعه جانت حلوهه كلش والجو بيها دافي لا بارد ولا حار طبينا وجانت متروسه ناس ما اعرفهم القاعه جانت منفصله نص للولد ونص الثاني للبنات اول ما طبينا شفنه ميسره لابسه البدله البيضه وتبتسم بتصنع اول ما شافتها عكرت وجها
جمره- ها بنات؟
كنان- نعلگها هسهه لو بعدين؟
شُجان- اصبرلي حبايب بس اخلي نسلم على العروس؟
فتحت عباتي وبقيتها بس على جتفي ووخرت شالي صار مبين شعري وفستاني ورحت اتمشى على ميسره واني اطگ بالگعب وصلت يمها وحجيت بصوت عالي
شُجان- الفف الففف مبروكك يحياتيي شايفهه كل الخيرر ان شاء الله اشوف زعاطيطجج يبعدد كلبيي شطالعهه حيهه. اقصدد حلوههه تخبليينن
بوستها وهيه منصدمه وحجت بين سنونها
ميسره - ههه شكرااا حبيبتي ما تقصرينن
راحن كنان وجمره سلمن عليها واحنه متقصدين نسمعها كلمه الحيه ونسوي نفسنها اوبس بالغلط شغلو الدي جي واني والبنات نزعنه العبايات وطلعت فساتينه احنه الوحيدات بالقاعه لابسات اسود وهيج ملابس فاضحه اخذنا شالاتنا وشدينهاهن علينا وبدينا نركص طلعنا اغنيه مصريه
- ناس تخوني وناس تبعني
آه ولعبتها زهر
وتبدلت الاحوال
وركبت اول موجه
في سكه الاموال
لروح لاول واحد
احتاجيتله بسؤال
آه كسر بخاطري ساعدتها
وذوقتني ضيقه الحال
وبدينا نهز اني وكنان گدام ميسره وهيه محترگ دمها كملت الاغنيه وگعدنا على ميز وحدنا وكل العيون علينا وتبسبسون.، اجتي علينا عمه رقيه
رقيه- هايي شسويتننن؟
كنان- مو تردونا نجي للعرس؟ هاي احنه اجينه للعرس ورگصنا
رقيه- فلكك صابجنن ولجنن شنهايي الهزز كله
شُجان- نهز لميسره ليش مو غصبتونا نجي؟
رقيه- الطمم هسههه اني الطمم
جمره- عمه شبيج اهدئي ماصار شي
راحت عمه رقيه تلطم وگعدت يم عمه صابرين وجانت من ضمن الموجودين شمس انتبهت عليها ورحت ركض سلمت عليها واجني البنات هم سلمن گعدت ويانا وضلينا نسولف على ميسره
شمس- ولجنن عزاا عزاا شوفنن المكياج بربجنن منو تخلي حمره بنفسجيه؟
كنان- بعمري كله ما شفتت لج شمسس تتذكرين المديره مال المدرسه المتوسطه؟
جمره- ايي ولجننن هم تخلي حمره بنفسجيهه
شمس- عوذه من هيج بناتت
شُجان- بربجن منو بهل وكت تلبس گعب لونه وردي الي اعرفه المفروض ابيض ويه الفستان
شمس - هيه هاي عدها ذوق؟
كنان- اندري كلش ماعدها ذوق
جمره- بربج شُجان لمن تتزوجين هم تلبين گعب وردي؟
شُجان- شني السالفه يابه شاربه بطل علمود هيج البس
ضلينه نضحك وهيه انتبهت علينا انزعجت من گعدتنا. ، ورا شويه صاحو العريس وجماعته يردون يطبون، رحت جبت شالاتنا وعباياتنا اني والبنات ولبسناهن طبو علي وباقي الولد واكو ولد ما اعرفهم من ضمن الحاضرين شفت وهج وروح بس ما سلمت عليهن مع انُ عرفني بس ما سلمت عليهن ضلو جماعه علي يرگصون ويهوسون اجه كرار وسلطان وصهيد گعدو يمنا
كرار- باع شلابس قاط احمر طالع جنه الشمر
سلطان - ههههههه دباعع التسريحه جنه ديج
صهيد- انوب هاي البصفه شنهي لابسه كعب وردي؟
شُجان- اي كعب وردي
كرار- شنهي نوت تصير فله؟
ضلينا نضحك على العرسان لان شكلهم يضحك ويفشل كرار لزمهم تحشيش
كرار- اكلكم جنها ميسره صايره مديره مدرسه
كنان- ايي كرار تتذكر المديره مال المتوسطه؟
جمره- هيه نفسها ميسره بس صغرت 25سنه
شُجان- عن نفسي تشبه البعبع
صفنو شويه وباعت عليهم
شُجان- جفصت؟
صهيد- خلي تسمعج
شُجان- اجرها من عطوبها وعلي اذا تدنالي
شغلو اغنيه ساجده عبيد
صهيد - گومي شُجان خلي نرگص على عناد علي وميسره
عجبتني الفكره وگمنا
شُجان- احلاااا رگصههه للعرساننن
تگابلنا اني وصهيد وضلينا نرگص فتحت الشال وضليت افر بشعري گدام صهيد وصهيد مسوي حرگه بايده عود يكيتلي فلوس. عجبني الوضع وشديت شالي وضلينا نهز اني وصهيد گدام علي وميسره
شفت ميسره وعلي محترگينن يباوعون علينا ومحروگ گلبهم واني وصهيد نضحك صارت الزفه واحنه ما گمنه سلمنه على العرسان لان باختصار محد طايقهم زفو ميسره وكملت ورجعنا لبيتنا
علوان- سمعت بيجن انتن الثلاثه رگصتن وذبيتن لحم بالقاعه؟
انخلسنا كلنا ووحده تباوع للثانيه
علوان- ها ما تحجن
شُجان- جدو غير عرسس ميسره ولازم نفرح بي مو صح بنات؟
كنان- ها اي اي جدو صح
جمره- جدو ترا محد شافنه والقاعه جانت بس بنات
علوان- شحده الي يشوفجن غير افگس عيونه وبعدين تعلمني غير ادري
شُجان- صح جدو ليش ما شفناك بالعرس؟
عباس- لا شلون جنا موجودين كلنا انتن جنت گاعدات گبال ميسره
كرار- نزل علينا الوحي وگعدنا گبالها
شُجان- عزائيل كال اكعدو كبالها خطيه
علوان- ولا تگعدن راحه وعلي امشن بدلن يلا
شُجان- وفيها ايه يا جدو دا احنه بنحبك وانت بتعيط علينا؟ اخسى عليك يا جدووو
علوان- امشيي ولجج شنهي انوب تحجيلي مصري
ضلينا نضحك وطفرنا كل وحده لغرفتها بدلت ورحت نمت ، گعدت الصبح متفأله سمعت البيت هوسه غسلت ولبست حجابي رتبت نفسي وطلعت لگيت ورده موجوده ما حضرت العرس
ورده- ولججج شُجانووو شلونججج
شُجان- الحمدد الله زينهه وانتِ ولجج مشتاقتلجج
ورده- انيي اكثررر وعليي
شُجان- لجج ما تصدكينن شصاارر البارحهه
ورده- ولا انتِ راح تصدگينن شصارر وياي
شُجان- شصار؟
ورده- طلعت حامل بتؤممم
شُجان- يگلبيييي
ورده- والله بنيه وولد ، يلا احجيلي انتِ شصارر
شُجان- اسمعيي ...
بديت احجيلها وهيه مصدومه وتضحك
ورده - عزاا العزاججنن ولجنن يمعزاياتت
شمس- ختوليي حرگتت گلبناا لو تشوينها ايع
رقيه - شُجان يمهه تعالي ساعديني
شُجان- ايي جايه عمهه
گمت اساعد عمه رقيه سوينا الغده وطب علينا سلام
سلام- يابه سلام عليكم
رقيه- هلا بيك يمه شلونك؟
سلام- الحمد الله ، شُجان خويه شلونج؟
شُجان- الحمد الله زينه
سلام- اكلجن ما شفتن صهيد؟
شُجان- لا اليوم ما شفناه
رقيه- لا اني شفته كال راح اروح لالكسندر يمشي شويه لان صارله اسبوع ما رايح بس هسه تلگاه بببيته بعده ما رايح كال يتريگ ويروح
سلام - خوش
رقيه- روحله اذا تريد
سلام - اي هو راح اروح للبستان اسگي شويه وبعدين. اروح لصهيد
سلم علينا وراح كملنا الغده اني وعمه رقيه ورحت فرشت السفره گامن البنات وياي علمود يساعدني
شُجان- يمعودات شنو السالفه ابقن اني راح اجيب الاكل
ورده- خايبه انجبي
جمره- والله صدك انجبي احنه نساعدج
گامن ورتبنا السفره وگعدنا عليها كلنا
جمره- راح اصيح جدو وابوي وامي وين؟
شمس- يمكن عمي عباس وجود برا وعمه علياء تلكينها بالغرفه
راحت جمره صاحتلهم والتمينه كلنا گعدنا ناكل واني بطني رجعت توجعني ذبيت الخاشوگه وگمت
علوان- وين شكلتي؟
شُجان- بطني توجعني والله ماريد راح اروح انام
رحت غسلت ورحت لغرفتي ضليت اتلوع سمعت صوت صهيد يصيح باسمي ومبين عصبي نزلت واني مخليه ايدي على بطني
صهيد- مااا توقعتتهاااا منجج شُجان لجج هاذذ حيواننن حيواننن لجج انيي صوجيي جبتجج اهنااا
شُجان- شنو شصاير؟
صهيد- تسويننن نفسجج ما تدرينننن؟ لج شلوننن گدرتييي تسوينن هيجج؟
شُجان- ايي غيرر اعرف اني شسويتت؟
صهيد- لا والله؟ وبعدجج تنكريننن انتِ حرگتيي بيتت الاكسندر !!!
انصدمت الكسندر اني حرگته؟
شُجان- بطنيي توجعنييي وبقيتت بالغرفههه وما طلعت منهاا صارلي فوكك الاربعع ساعاتتت اني بالغرفه وبطنيي توجعنيي حتى اسئلل البناتت ورده احجيي اني طلعتت من الغرفه!
ورده- لا ما طلعت من الغرفه
صهيد- ورده رجلج راح يجي ياخذج ولا تدخلين وانتِ شُجان انسي بعد احجي وياج
بقيت مصدومه ضليت ابجي هاذ شبيي
شُجان- والله موو انيي والله مو انييي
صهيد- لعدد منووو؟ !!!! انييي حرگتههه الجنييي اجهه وحرككك الحصاانن؟
شُجان- ماعرف منو حرگه بسس وروحح امييي مو وانيي وحقق العباس موو انيي
دار وجه مني وطلع البيت صار سكوت بس صوت شهگاتي ينسمع بقيت بمكاني محد حجه وياي گمت منهم واني ابجي رحت للغرفه قفلت الباب عليَ وضليت ابجي بحرگه رحت على الشباك شفت صهيد يدخن بالعاده لمن اباوع علي ينتبه عليَ ويبتسم هل مرا دار وجه مني وطب جوه للبيت بقيت بغرفتي ماعرف شسوي منو الي حرگ بيت الحصان؟ .....
_______________________________
فراشاتيييي. شكرااا كلشش اهواييي للدعممم والتفاعلاتتت وهممم تعالوو لحسابي على التلي اهناكك شُجان تحجيي وياككم البارتت هاذذ ويوم الاحد او باجر انزل البارتت الرابعع رأيكمم يهمني بالبارتاتت احبكمم +++ لا تنسون تشتركون بقناتي على التلي. ( fjaoio) 💗💗🎀
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!