بسم الله الرحمن الرحيم اللهم صل على محمد وآل محمد.
نبدي بدايه جميله ويه ابطالنا الحلوين
____________________________________
جنت العب بالحديقه مال بيتنا وسمعت صوت مرت ابوي تصيحلي خفت منها كلش رحت ركضت عليها
شُجان- ها عمه هاي اني
سناء - شنو عمه؟ عمه العماچ اسمعي لج اليوم الشيخ علي يريد يتزوجج واني وابوچ موافقين علي واليوم الخطبه
اني تصنمت بمكاني ماعرف شحجي انلصمت حتى حجي ما عرفت احجي بس نزلت دموعي
سناء- اهوو نعتتت نعتتت امشي جهزي نفسج لا والله العظيمم اطلع ضيم الله كله بيچ مو زينن متحملتچ
شُجان- بـ... بس اني بعدني صغيره مـ...مو مال زواج
سناء- لا جبيره عمرج 15سنه بعد شگد وتردين تتزوجين؟ ناويه تبقين على گلبي ما يمشيلي هل كلام
شُجان- طفلهه ارحمينييي شنوو من بشررر انتِ
سناء- والله وطلعلج حس بت تاره ااهخخ من امج جانت شالعه گلبي الله خلصني منها اجيتيني انتِ
شُجان- لتحجينن على اميي
ضليت اصيح وهيه ضربتني راجدي ضليت ابجي وركضت لغرفتي وسديت الباب ضليت ابجي لحد ما نمت ما گعد اله على صوت ابوي
نعمه- شُجان بويه وينچ فتحي الباب
شُجان- باابااا مرتكك تريدد تزوجيي لشيخخ عليي
نعمه- اي بويه بسس تعالي اريد احجي وياج
فتحت الباب وسحبني ابوي وياه نزلنا جوه واشوف سناء مرت ابوي تبتسم ابتسامه شر وبصفها الشيخ علي وبصفه شيخ ماعرفه انصدمت وعرفت ابوي ضحك عليَ علمود انزل للخطبه گعدني بصف علي واني مصدومه خزرني ابوي علمود ما احجي او ابجي نطق الشيخ الگاعد
- يا الله بسم الله الرحمن الرحيم بنتي شُجان انتِ مغصوبه على هاذ الزواج؟
شٌجان- ءءاا لـ..لا
- هاي هيه لعد خلي ابدي
بده يقره ايات قرانيه واني دموعي تنزل كرصني الشيخ علي
الشيخ علي - والله اذا بجيتي وما وافقتي اذبحج
انصدمت ولمن الشيخ سئل علي على موافقته
الشيخ علي - موافق
- على بركه الله بنتي شُجان انتِ موافقه بشيخ علي عباس زوج لكي؟
شُجان - لا
كلهم انصدمو من جوابي وبالاخص مرت ابوي گامت وضلت تصيح
سناء- شيخ اكيدد هيه موافقه بس تستحي شويه مو صحح شٌجانن؟
شُجان - ها ... لا اني ما استحي وبالفعلل اني ما اريد اتزوج انتو غصبتوني
نعمه- تتزوجين وغصبا عليج فهمتي لو لا؟
رد عليهم الشيخ الي يعقدلنا
- اذا البت مارايده الزواج عليش تجبروونها؟
نعمه- شيخ معليك انت بنتي واني اعرف مصلحتها
الشيخ علي - هاي هيه هيه موافقه سواء رضت او ما رضت بعد هاي هيه
انصدمت منهم بقيت بمكاني ماعرف شسوي جرتني مرت ابوي فوگ للغرفه
سناء- طبي بدلي
شُجان- ما ابدل
سناء- شنوو هيه بكيفججج غصباا عليجج فهمتي؟
شُجان- لااا مو بكيفجج عوفينييي بوحديي شتردينن انتِ منيي طفلهه انيي طفلههه
سناء- اهووو بدينااا تعاليي
سحبتني وبدلت ملابسي خلتلي مكياج حمره حمره وكحل اسود وخلتلي احمر خدود ( ايشدو) ما انكر طلعت حلوه بس كل هل شي غلط واني مغصوبه على كل هاذ الشي نزلتني جوه وجان ابوي وعلي منتظريني جوه شافني ابوي وگام
نعمه- يمه بنيتي كبرتت وصارت عروس
شٌجان - لتكول بنيتي اني مو بنتك اتبره من هيج اب يبيع بنته على چم فلس احمر
شيخ علي - اربيج مرا ثانيه علمود بعد متحجين هيج ويه ابوج
شٌجان- عشره مثلك ما يگدرون يربوني اني ربتني امي احسن من شاربك انت وهاذ البصفك المفروض ابوي ويحميني
سناء- ولچ انتِ عليمنن هيجج صلفهه طبعاااا امجج ربتج امجج ما تعرفف تربيجج
صرت عصبيه وما تحملت الي صار ضربت مرت ابوي وهيه نطت من العصبيه سحبتني من شيلتي وضلت تضرب بيه گدام ابوي وعلي
سناء - ولجج تضربينييي ولججج انييي تضربينييي؟ ايي حيوانه شمتوقعه منجج قابللل انيي لوو باقيهه ببغدااددد احسلييي اخرر وكتتت جاهله تضربنييي نعمهه انتت قابلل بهل شيي؟
نعمه- طبعا ما اقبل شُجاانننن!!!! اعتذريي لج لا اموتج والله
دفعتها وصعدت فوك وسديت الباب لبست شيلتي وعباتي خليتها على جتفي ورحت على الكنتور وطلعت كل الشيل العندي وشديتهن وحده ويه الثانيه وشمرتها من الشباگ سمعت صوت مرت ابوي تتوعد الي واله تكتلني وابوي وعلي يحاولون يفتحون الباب بسرعه طفرت من الشباك وعلى طفرتي فتحو الباب شفتهم يباوعون عليَ وبسرعه ضليت اركض بين البساتين ماعرف وين اروح خايفه من مصيري ادور على اي مكان احتمي بي اصوات الطيور والغربان تعالت على سمعي صرت ما اشوف اي شي من التعب شفت من بعيد شخص مبين مو كلش جبير رحت علي ركض لزمته من ايديه واني اتوسل بي
شُجان-عمو الله يخليك احميني
- منو انتِ وشجابج صوب البستان وانتِ بهيج عمر؟
شُجان- عمو بس احميني وانوب اوخر وداعتك
- من منو تخافين؟
شٌجان-من مرت ابوي وابوي والشيخ
- طبي جوه ولطلعين لحد ما اكلج اطلعي
طبيت جوه الهث تعبت من الركض نص ساعه اركض منهم سمعت صوت ابوي والشيخ علي ومرت ابوي خفت يلگوني اهنا المكان عباره عن مخزن بي ادوات الزراعه الحرث سمعت صوت الولد يصيح عليهم
سناء- باوع لك اذا عرفت البنيه عندك متلوم اله نفسك
- واني شمدريني؟ محد گرب صوبي اهنا مثل ما تشوف ماكو احد بس اني والاسكندر الحصان بتكم حصان؟
نعمه- بويه متأكد البت ماموجوده يمك؟
- عمي وداعت شيبات هاذ الشيخ ماكو
الشيخ علي - والله اذا البت يمك ادفنك وانت حي
- توكل خالي ماكو احد اهنا هيه گوه؟
نعمه- اريد افتش بنفسي يمكن طبت للمخزن؟
- المخزن هستوني جنت بي وقفلته قبل لا اطلع ماكو احد عمي توكل
نعمه- بس..
- اها؟ عمي كتلك توكل لا تضل تبسبس
اختفى الصوت الدقائق وسمعت خطوات گلبي راد يوگف من الخوف انفتح الباب وطلع نفسه الولد الي ساعدني
- طلعو تگدرين ترحين
شُجان- وين اولي؟
- چا تبقين اهنا؟
شُجان- لا مو قصدي
- چا شقصدج تعالي اطلعي اهنا راح تموتين من الحر
طلعت برا طلع بوجهي حصان اسود بقيت صافنه على الحصان من جماله وشعره الناعم اجاني من ورا الولد الي ساعدني
- عچبچ؟
شُجان- ها؟
- الاسكندر عچبچ؟
شُجان- منو هاذ الاسكندر؟
- الحصانن ياولل ثولل
شُجان- لا تغللطط
- ما اغلط بس احجيلي شبيچ وليش ترگضين وليشش شارده من بيت اهلچ بهل وقت؟
شُجان- ءءءءااا
- فضيهاا
شُجان- ابوي غصبني اتزوج الشيخ علي وو..
قاطعني صوت ابوي والشيخ علي
نعمه- چا مو تگول مو يمي البت؟
- البت يمي وشتريد تسوي؟
الشيخ علي - البت تصير خطيبتي اريدنها
- حجي شگد انطاك مهرها؟
نعمه- وانت ياهو علمود اكلك؟
- حجي احجي شگد انطاك وفضها ما وراي اله غيرك؟
نعمه- 3مليون
- انطيك 6 ملايين وتنطيني البت؟
انصدمت شبي هاذ؟ مخبل؟
شُجان- شجاي تحجي عمو؟
- اسكتي اي شگلت حجي؟
نعمه- قصدك ابيعلك بنتي؟
- نگول اي؟
نعمه- سويهن 10 ملايين والبت حلالك
- هاي هيه متفقين
انصدمت اكثرر شجاي يصير وياي؟ ليش كل هاذ جاي يصير وياي
شُجان- شنوو انيي سلعههه علمود تبيعونيي بكيفككمم؟
- اشش سكتي معليج مو تردين انقذج منهم؟ اسكتي علمود انقذج منهم
دار على ابوي وكمل كلامه
- اني صهيد حفيد علوان اذا تعرفه؟
انصدم ابوي واني ما فهمت منو هاذ علوان؟
نعمه- والنعم منك صهيد اني اعتذر منك ما جنت اعرف انت من بيت علوان
صهيد- وهسه عرفت توكل لبيتك واني اجيبلك الفلوس
الشيخ علي - هيه شني هيته وتبيعها!
صهيد- عندك اعتراض؟
الشيخ علي - ها لا والنعم منك ومن جدك
صهيد- حلو يلا ما تمشون شني چلبتو؟
وبالفعل راحو الشيخ علي وابوي واني مصدومه اندار عليَ وابتسم الي وگال
صهيد - هلا بيچ بعالم صهيد
شُجان- خايب انجب شو شني اني ما افتهمت ياهو انت ومنو هاذ علوان وليش ابوي وافق بسرعه يبيعني؟
انصدم مني لان غلطت علي
صهيد- فوگ ما اساعدچ ياول غسل لهل وجه شسمچ ولج؟
شُجان- لتگلي ولجج
صهيد- استغفر الله شسمج يا انسهه
شُجان- شُجان
صهيد- امم حلو اني صهيد شُجان بابا شگد عمرج؟
شُجان- طبيت 15
صهيد- بعدج صغيره ويردون يزوجونج امشي وياي للبيت
شُجان- يا بيت!
صهيد- وسم بيتي يعني وين؟
شُجان- ببطن ابوي وعلي
صهيد- اسكتي ولچ ميصير تدعين على ابوچ
شُجان- خوش
صهيد- امشي صعدي على الاسكندر نمشي تگدرين لو اصعدج؟
شُجان- اعرف اصعد جان عندي حصان بس مات
صهيد- اهاا اوگفي اوگفي شنهاذ على وجهج؟
استوعبت وضليت امسح بالحمره طلع جفيه من جيبه وانطاها الي اخذتها منه ضليت امسح بيها لحد ما انمسحت ردت امسح الگحل بس منعني صوته
صهيد- لاااا!!!!
شُجان- وهرش شمالك تصيح؟
صهيد- الي يهرشج لتمسحينها بقيها اذا مسحتيها تتخمين
استوعبت راح اتصخم وعفته صعدت على الحصان وهو بقه لازمه من الحزام الموجود علي وضل يتمشى بيه بدت شويه شويه تبين البيوت وگف واستغربت منه
شُجان- ليش وگفت؟
صهيد - باعي اذا سئلوج انتِ مني كليلهم اني بت خال صهيد واجيت اعيش اهنا خوش ؟
شُجان- خوش بس عليش اجذب خوب اكلهم الصدك؟
صهيد- حتى يذبحونه على القبله تصير المذبحه حلال
شُجان- يمهه شبيكك
صهيد- غير اكلج الصدك؟ المهم عرفتي شتكليلهم؟
شُجان- اني بت خال صهيد واجيت اعيش اهنا
ابتسم ابتسامه بارده وكمل مشي شافونا ولد ثلاثه واجو يرگضون علينا بسرعه
شُجان- شنهي شمالهم هذول
صهيد- سكتي ولج
سلطان- صهيدد وينن جنتتت؟
كرار- صهيد خويه وين جنت؟ دورنا عليك البساتين كلها وين جننتت؟
صهيد- اهدو يمعودين جنت اجيب بت خالي راح تعيش ويانا
سلام- حاته مو بت
صهيد- الزم حدوك لك
كرار- حدودك لو ايديك ههههه
صهيد- ما يضحك
سلام- انجب معليك بي كرار حلوه خيولي هاذ
سلطان - بس شوگت رحت جنه خايفين عليك
صهيد- يابه شني طفل اني خوما طفل عليش تخافون؟
سلام- سليمه تطمك ياهو عايز لجهرتك
كرار- اي ما عرفتنا شسمها؟
صهيد- اسمها شُجان
كرار - شُجان لو جبانن
صهيد- هههههههههههه لا هلل مراا تضحكك
شُجان- انجبوو لتضحكونن على اسميي
سلام- اها اشو تغلطين؟
شُجان- يا اوكف احم اسفه
سلطان - شمالها هاي البت
صهيد- لاااا فشلتوهااا
ضلو يضحكون واني نزلت من الحصان صرت ورا صهيد ضربته من ورا وضليت ارگض هو انصدم وكلهم انصدمو وصارو كلهم يركضون وراي
صهيد- بتتت يوسففف الصدييققق اذا ما الزمجج امعطجج معطط اصبريليي صيري مراااه واهناا اوكفي كباليي
وگفت عيبت عليهم ورجعت اركض واني جاي اركض طاحت مني الشيله وطلع شعري صاح واحد منهم
سلطان - غطييي شعرججج يمرااههه
شُجان- طاهررر طاهررر وعلييي
ضليت اضحك ورفعت الشيله على راسي لحد ما وگعت وانجرحت ايدي اجه صهيد يركض بسرعه صار اسرع واحد بيهم اجه عليَ لزم ايدي بس ملامحه جانت بارده
صهيد- ليش تركضين؟ احسلج هيج؟
شُجان- مالك غرض
صهيد- ياول غسللل لهل وجه صرتي جنج طماطه امشي نروح لبيت علوان خلي اعرفج عليهم على حظج اليوم عدنا عزيمه
گمت وعدلت نفسي ونكتت نفسي من التراب وعدلت شيلتي وعباتي ومشينه ومشو الولد ورانا
سلطان- صهيد الي يمك جنها فصمه ما تنلزم
شُجان- كول ماشاء الله اسرع منك
وصلنا لبيت كلش جبير طبو جوه الولد. جرني صهيد قبل لا اطب
صهيد- وين طابه؟
شُجان- جوه؟
صهيد- اي بس منا كلهم ولد عيب تطبين بنص الولد
شُجان- هم صح منين راح نفوت؟
صهيد- من ط** علوان
انصدمت من الحجاه
شُجان- عيييبب شنو هيج تحجي
صهيد- چا غير عدنا باب ثاني نطب منه امشي بت يوسف الصديق
مشينه من الجها الثانيه اكو باب صغير دگ الباب وطلعت بنيه مبين اكبر مني بكم سنه اول ما شافت صهيد سوت نفسها خجلانه
ميسره- ها صهيد شلونك؟
صهيد- طبي جوه كليلهم صهيد يريد يطب
ميسره- صار
طبت جوه واسمعها صاحت سوو مجال صهيدد اجه ورجعت علينا
ميسره- طب خويه
طب وهو منزل عيونه منها وهيه شافتني واستغربت مني وليش اني ويه صهيد
طبينا جوه وطبت البنيه وتحمحم الكل انتبه وياه
صهيد- سلام عليكم
الكل- وعليكم السلام
صهيد- باعن ورگز وياي زين هاي شُجان بت خالي وخالي الله يرحمه مات ووصاني عليها احميها من بعده واليوم اجت وجبتها هنا من تكمل العزيمه اريد احجي ويه جدي
صابرين- صهيد انت متأكد هاي بت خالك جنها مو منك وبيك؟
صهيد- اي اكو مانع عمه؟
صابرين- لا بس اكول شمالك اكلتني
رقيه- كل الهلا بيها تعالي يمه شُجان
رحت يمها وباوعت بعيوني وگالت
رقيه- يمه صلاوات على النبي عيونج عسلي فاتح
استحيت منها ماعرف شجاوبها بس بداخلي اكول والله يا خالهه تعالي ابوس صماخجج
شُجان- شكرا خاله كدامج
رحاب- تعالي خاله عرفينه عليج من وين انتِ عمرج؟
شُجان- اني منا من البصره بس بعيده شويه وعمري 15 سنه
رحاب- هاا حلوو بس مو جنج مكبره روحج؟
شُجان- ما فهنت؟
رحاب- يعني مبين عمرج 13 سنه مو 15 سنه من ناحيه الشكل بس الجسم مبينه مال 17 سنه
شُجان- مممم هاي بنيه جسمي وشكلي خلقه الله
انغثيت كلش من عمتهم هاي بس الثانيه حبابه كلش
صهيد- احم شُجان تعالي اعرفج عليهن
گمت يمه وهمس
صهيد- لتزعلين من عمتي رحاب هو هاذ طبعها
شُجان- لا ما ازعلت عادي
صهيد- خوش .. احم هاي عمتي رقيه الي ربتني واعتبرها امي وهاي عمتي رحاب بس تبزينها تگوم عليج وهاي عمتي صابرين تحطينها على الجرح يطيب من گد ما تخليج تضحكين اذا تضوجين بيوم روحيلها تخليج تموتين من الضحك احم اي وهاي بت عمتي صابرين اسمها ميسره وهاي بت عمتي رحاب شمس وهاي ورده عمريي حبيبه اخوها اختي ورده وهذيج الگاعده بالاخير شمعه البيت كله الحجيه سعاد مرت الحجي والباقين ما موجودين مدري وينهم بعدين اعرفج عليهم
شُجان- كفيلك العباس ما افتهمت شي
صهيد- غمه التغمج
غمني وطلع واجتني ورده وهيه تبتسم الي
ورده- تعايي هستوني ادري عندي بت خال هيج حلوهه يمهه كلش حلوهه ماشاء الله ماشاء الله
ميسره- شكلها عادي ورده شنو هل مبالغه؟
ردت عليها شمس
شمس- عليش مغتاضه جا؟ عوفي ورده تتغزل بيها براحتها وما مجذبه البنيه حلوه ومرتبه.
ميسره- محد حجه وياج فهمتي؟
گلبت عيونها وطلعت من المطبخ اجتني خاله رقيه سحبتني منهن ورحنا گعدنا يم الحجيه
سعاد- يمه ياهي انتِ؟
شُجان- حجيه اني شُجان بت خال صهيد
حضنتني وضلت تبوس بيه
سعاد- كل الهلا بيج يمه شحلاتج
شُجان- شكرا حجيه جاي تخجلونيي
ضلت تضحك وضلينه نسولف بعيد عن الكل وخاله رقيه سوالفها تخبل وهيه اصلا. تجنن ملامحها حلوه وسوالفها بعد احلا صارت دنيا ليل ودخلو الولد كلهن لبسن حجاب ودخلن وياهم بنات ماعرفهن شفت صهيد بينهم يضحك ويشاقه ويه واحد من الولد انتبه عليَ واجه عليَ
صهيد- خايفه؟
شُجان- مو بس خايفه راح اموت من الخوف شصار على ابوي ؟
صهيد- انطيته الفلوس وسديت السالفه وهاي هيه صرتي لـ صهيد
شُجان- خايب انجب شني هيته واصير الك؟
صهيد- لا اقصد انجبي لتغلطين المهم يعني انتِ هسه حره بكيفج تبقين ويانا تدوريلج ديره تلفيج بكيفج واني مراح ادخل بيج لحد ما يصير عمرج 20 سنه واشوفج شنو الي تقررينه يعني الج 5 سنوات تقررين بيهن
شُجان- وين مالي ديره تلفيني ابقه اهنا احسن
صهيد- اختصرتي خمس سنوات من عمري عفيه عليج
شُجان- بس وين راح انام؟
صهيد- بحضني
شُجان- شنهووو؟
صهيد- غسلل لوجهجج غير تنامين يم البنات وين تنامين يعني؟
شُجان- اي اعرف خوش يلا ولي ارجع لهذاك
صهيد- لا ما ارجع امشي نروح اني وياج نطب اعرفج عليهم وعلى باقي البنات كلهم اجتمعو بالديوان
رحنه للديوان وجان مليانن ناس ناس تضحك وناس تسولف وناس گالبه خلقتها مثل ميسره الي من اجيت والي هسه هيه ما شايله عيونها مني. انتبهو علينا وجان اكو حجي جبير بالعمر بصفه زلم كاعدين
صهيد- الله بالخير حجينه
علوان- الله بالخير والعافيه
صهيد- هاي بت خالي شُجان كتلك عليها شُجان هاذ جدي علوان الكل بالكل ما تلگين مثل طيبته وحنيته وهاذ عمي باقر زوج رحاب
شُجان- اوكف اوكف ليش رحاب مو عمتك؟
صهيد- مرت عمي بس اصيحلها عمه رقيه عمتي الوحيده
شُجان- اهاا كمل
صهيد- اي وهاذ عمي مصطفى زوج صابرين وهاذ عمي عباس وهاي الي بصفه مرته علياء عرفتي هسه؟
شُجان- عرفت بس هسه هذول كلهم ابن منو واحفاد منو؟
صهيد- كلهم احفاد حجي علوان واني من ضمنهم هاذ سلطان تعرفينه الي جان ويانا اخو هاذ اسمه حمزه وهاي جمره هذول اخوان ولد عمي عباس وهاذ مسلم وسلام وشمس ولد عمي باقر وهذول علي وحكيم وميسره ولد عمي مصطفى وهاي اسمها كنان بت عمتي رقيه الوحيده وهذول الشياطين الاثلاثه كرار وورده ووهبان اخواني عرفتي هسه؟
شُجان- عائلتكم جبيره ماشاء الله بس ان شاء الله احفظها
علوان - تعالي بنيتي اگعدي يمي بالله
رحت يمه باوع عليَ بتمعن
علوان- مكحله عيونج؟
خجلت كلش منه
شُجان- ها اي مخليته
علوان- جا ابوج مو ميت عليش تكحليهن؟
ماعرف شجاوبه بقيت ساكته جاوبه بمكاني صهيد
صهيد- الكحله من العين تحميها ما تشوفها شگد حلوه؟
باوعت علي باستغراب
علوان- هم حجيك صدك المهم هلا بيج بعائله علوان
رحت گعدت يم البنات وگعدت اتعرف عليهن كلهن اكبر مني بس سجى اكبر مني بسنه
ورده- صدك بنات نسيت اكلچن اليوم واني جاي احوش بالزرع لگيت غزاله صغيره شجابها اهنا؟
شمس- عليجج الله؟
ميسره- صدك والله؟
ورده - والله شبيجن بس شنو جانت صغيره كلش لمن اقتربت منها راحتت حرامات
جمره- امداج اي والله جان گلتي لاي واحد من اخوانج
ورده- شكلهم يا جمره ما تطيرين مني
مسيره- اهوو خلي نغير السالفه اي يا شنو اسمج؟
شُجان- وياي؟
مسيره- لا ويه الحايط طبعا وياج
شُجان- اسمي شُجان
ميسره- اي شُجان ماعندج سالفه؟
شُجان- شعندي ما عندي سوالف
ورده-لتستحينن شجونهه
شُجان- يااععع شني شجونه هيه هاي شكول وحده تكليلها شجونه؟
ميسره- والله وياج شنو شجونه المفروض تصيحليها ابو عليو
شُجان- خايبات والعباس سوالفجن ممله اني گايمه
گمت منهن وطلعت للطرمه ما لكيت احد ارتاحيت شويه وضليت افتر لكيت كرسي ورحت گعدت علي ضليت اتأمل النجوم وجنت ادندن باغنيه معينه
شُجان- نگطعت من غصنه!
ضيعت كل حسنه
ورده ورده
ورده سگيتها من دمع. العيون
صارت بل حسن فتنه للعيون
ورده سگيتها من دمع العيون
صارت بل حسن فتنه للعيون
نگطعت من غصنه
ضيعت كل حسنه
ورده ورده
صهيد- شنهاي؟
جفلت منه وگمت
شُجان- شنو؟
صهيد- جاي تغنين ورده سگيتها؟
شُجان- اي واذا ؟
صهيد- لا هيج تعالي طبي راح يطلعون الولد
خليت شيلتي على وجهي صار مثل الثام مريت منه جان يباوعلي صارت عيوني بعيونه ، طبيت جوه جان البيت هدوء شبسرعه وين راحو هذول؟ سمعت صوت سلطان وراي
سلطان- شُجان ليش ما طبيتي ويه البنات؟
درت وجهي عليَ اشوفه لازم جگاره بيديه
شُجان- ماعرف وين راحن البنات
سلطان- صعدي الدرجه تلگين طبي على غرفه غرفه وتلگيهن
صعدت فوك الطابق الثاني بي درج بنهايه الممر وبي اربع غرف فتحت اول غرفه جانت بارده وهادءه ما بيها هواي شغلات بيها عطر رجالي سمعت صوت وراي
صهيد- شجاي تسوين اهنا؟
شُجان- ادور على البنات
صهيد- راحن لبيتي يباتن اليوم اهناك امشي اوديج
رحت ورا ونزلنا جوه شفت شخص مؤلوف عليَ انتبه الي وصاح
علي - شُجان شجايي تسوينن اهناا!
دقتت بملامحه اي والله هاذ علي ابن جيرانه القديمين
شُجان- عليييي انتت شجاي تسوي اهناا؟
علي - اهنا اعيش يمعوده
شُجان- صهيد ابن منو حمزه؟
صهيد- وانتِ شلون تعرفينه؟ ولا وتسلمين عينك عينك گدامي؟
حمزه- شنو شُجان انخطبتي لصهيد؟
صاح صهيد
صهيد- عوذهه اني اخطب هل فصمه؟
شُجان- على الاساس اني ميته عليك امشي وديني للبنات
سلمت على علي وطلعنا رجع سئلني
صهيد- منين تعرفين علي ؟
شُجان- جان ابن جيرانه وهو صديق الطفوله فه اعرفه
صهيد- اهاا حلو بس لتحجين وياه
شُجان- عليش؟
صهيد- عدنا عداوه ويا ابو
شُجان- عمو عصام؟ لاا والله حباب
صهيد- ما تعرفينه زين هاذ واحد نذل وكلب عصام واحد ما تعرفين شنو ممكن يسوي فه ديري بالج
شُجان- صهيد
صهيد- ها
شُجان- وجعه امي المهم بيش الساعه
صهيد- اندري يمكن بالـ8
شُجان- فاتت الصلاه صليتت انت؟
صهيد- لا
شُجان- متصلي ؟
صهيد- اصلي بس جان عندي شغل هسه اروح اصلي
شُجان- اكو اهنا جامع؟
صهيد- عدنا صغير مال العائله كلنا نصلي بي محد موجود هسه تردين نروح نصلي وبعدين اوديج للبنات؟
شُجان- اي حباب لان ادري بروحي راح التهي وياهن
صهيد- چا امشينا
غيرنا الطريق ومشينه الطريق جان اضلم ما بي اي ضوه غير ضوه القمر الساترر علينا سمعت صوت من ورا الاشجار باوعت شفت عيون لون اسود كبار والصوت بدا يقترب اكثر ركضت باسرع ماعندي واحس اكو شي يركض وراي ركضت واول ما شفت صهيد
شُجان- صهييدددد
صهيد- شرايننن گلبههه
طفرت علي جلبت برگبته حاضنته هو منصدم شبيه فجا حضنته لمن شاف الشي الوراي ضل يضحك
صهيد- ههههه عبالي مدري شبيج
شُجان- لتضحكك اكوو شي يركضض ورايييي
صهيد- اذني وعلي اريدها ماكو شي يركض وراج ولج هاذ چلب سلطان مينو روح لسلطان روحح
ضل يشحت بي لحد ما راح ونزلت منه
صهيد- كسرتي رگبتي بت يوسف الصديق
شُجان- ليش تسميني بت يوسف الصديق؟
صهيد- بعدين تعرفين امشي يلا
طبينه للجامع ( المسجد) واكو مغسله توضينا وطبينا نصلي صلاه المغرب كملت صلاتي اباوع على صهيد لگيته بيده ورقه
شُجان- شنو هاي؟
صهيد- دعاء
شُجان- اعرف دعاء بس مال شنو؟
صهيد- زياره عاشوراء
شُجان- اهاا عادي اقراه ?
انطاني الورقه وبديت اقره كملت ورجعتله الورقه
صهيد- اني نعست امشي اوديج للبيت راح انام اهناك
شُجان- شعندك تنام ويانا؟
صهيد- وياكم اني وكرار ووهبان وورده انام بالبيت تحبين تباتين اليوم عدنا؟ يمكن هسه البنات رجعن للبيت امشي
گمنه ورحنه للبيت اول ما طبيت شافنا وهبان
وهبان- وين جنتت تعالل بسرعهه وردهه مدري شبيها بس تبجي
انصدمنا وصهيد راح يركض وركضت ورا طبينا للغرفه شفناها تبجي ومملخه نفسها ركضنه عليها راح عليها
صهيد- شبيجج؟
ورده- صهييدد جعفرر
وهبان - شبي جعفررر؟
ورده- جعفر يريد ينفصل عنيي
اني استغربت منو هاذ جعفر؟
صهيد- طبه مرض عليمن تبجين جا؟ امسحي دموعج يروحه لاخوج
شُجان- وهبان منو جعفر؟
وهبان- خطيب ورده
شُجان- ليش ورده مخطوبه؟
وهبان- المفروض يعني العرس الاسبوع الجاي بس ماعرف شصار
صهيد - اثنينكم تطلعون برا اريد احجي ويه ورده
طلنا اثنينه ووهبان يريد يروح وگفته
شُجان- وهبان
وهبان- ها
شُجان- وين انام؟
وهبان- بحضن صهيد شمدريني نامي وين ما جان
شُجان- نفس الكلامم سبحان الله
وهبان- شنهي؟
شُجان- لا هيج
وهبان- اكو غرفه اهناك روحي نامي بيها
شُجان- تمام
رحت فتحت الغرفه جانت عباره عن جربايه وكنتور وميز تسريحه وحمام الغرفه مو كلش جبيره، ذبيت عباتي وشيلتي ورحت على المرايه ضليت اضفر شعري وكملت رحت نمت ..
گعدت الصبح على صوت دگ باب
ورده- ولج كوميي شگد تنااميينن
استغربت هاي شبيها مو امس جانت تبجي اشو هسه عادي؟
شُجان- هااااا جاييههه
گمت واخذت شيلتي ولبستها باوعت على نفسي بالمرايه عدلت نفسي وطلعت
ورده- كل هاذ نومم؟
شُجان- ليش ابيش الساعه هسه؟
ورده- بالـ11
شُجان- ياااا
ورده- والله شبيج
شُجان- فلكك الفلكنيي
ورده- شمالج؟ المهم تعالي صهيد كال يريدج لمن تگعدين تلگينه بغرفته
شُجان- شيريد منيي هاذ انوب
ورده- اندري
شُجان- وين غرفته؟
ورده- امداج هاي البصفج غرفته
باوعت على اليمين لكيت غرفه صهيد
ورده- روحيي يمعودهه لا يملصج اذا ما تروحيله
شُجان- يااا عود اني خايفه منه والله يا الله تهي بهي ما اخافف انيي
صهيد- خوش ما تخافين بس تعالي
جفلت من صوته وانداريت ضليت اضحك بطريقه غريبيه
شُجان- ههه ههه ههه اني؟ اشاقه وياك والله
صهيد- خوش بس امشي
درت وجهي على ورده وكتلها
شُجان- متت؟
ورده- لا ان شاء الله ما تموتين ولو هاذ محتملل بس يلا
بلعت ريگي وطبيت ورا للغرفه
صهيد- راح اسوي نفسي ما سمعت شي المهم ءءااا تردين ترحين ويه البنات للسوگ تشتريلج ملابس؟
شُجان- ها؟ بس..
صهيد- لتبسبسين فضيها
شُجان- بكيفك
صهيد- خوش ترحين واي شي يعجبج اشتري ولا تهتمين للسعر
شُجان- انجب
صهيد- شنهاي بدال ما تگولين شكرا؟
شُجان- ها اي صح متعود لساني يكول انجب المهم شكرا
صهيد- ولو انتِ مثل اختي الصغيره
ابتسمت وردلي الابتسامه وكال
صهيد- بس اختي جنها يوسف الصديق
شُجان- اوي تغااررر منيي لان احلا منكك
راقصت حاجبي وهو ضل يضحك
صهيد- لا هواي واثقه من نفسج
شُجان-طبعاا صدك صهيد شگد عمرك؟
صهيد-ليش؟
شُجان- لتكولل ليشش احجي شگدد عمرك
صهيد-26
شُجان- يعني انت اكبر منييي بـ11 سنهه!!!!
صهيد- اي
شُجان- هممم حلوو
صهيد- خايبه امشي من يمي لا افلش معاني وجهج وعلي امشي روحي لروده قبل لا تروح
ركضت لبست عباتي ورحت لورده
شُجان- وردهه وردهه تعاليي صهيد يكولل..
ورده- اعرف اعرف امشي قبل لا نتأخر
استغربت ومشينه لبيت جدهم علوان طبينا وسلمت على البنات واني هم سلمت عليهم واخذنا عمه رقيه ورحنه للسوك ضلينه نفتر وكلساع من محل لمحل
شُجان- ورده صدك ليش اجينه للسوگ؟
ورده- ما دريتي ?
شُجان- مو وكت غيبه
ورده- انجبي مو غيبه بس تدرين اني مخطوبه وخطيبيي سوه بيه مقلب على الاساس يريد ينفصل عني ولمن خابره صهيد كله يمعود اشاقه وياها وهيه عبالها صدك واجينه اهنا علمود نجهز لعرسي ... امشس نروح لهذاك المحل بي فساتين
طبينه للمحل جان بي فساتين وضلت تختار الفساتين لفت انتباهي فستان احمر بي فتحه من الرجل شافتني ورده وسحبت الفستان وانطته الي
شُجان- ها يمعوده
ورده- اشش روحي جربي وتعالي
شُجان- يمعوده مو حلو عليَ
ورده- هسه انتِ مجربته؟ روحي جربي
شُجان- امري لا الله
طبيت للتبديل وبدلت لبست الفستان طلع حلو كلش بس جان مبين بي صدري شويه والفتحه هم واصله لفخذي استحيت البس هيج ورجعت بدلته وطلعت
ورده - هااا بشري؟
شُجان- مو حلو
ورده- والله حلو بس انتِ مدري شبيج
شُجان- مو يطلع منه مفاتني راح اختار غير واحد
رجعته لمكانه واختاريت غيره لگيت فستان لون اسود وبي لمعه ومن فوك لون ابيض طبيت اجربه جربته جان حلو بس مشكلته قصير ما حبيته ورجعت بدلته
رقيه- تعالي يمه شُجان شوفي هاذ الفستان حلو ومناسب لعمرج ولجسمج
اخذته منها ورحت اجربه جان كلش حلو لون ابيض على وردي ساده وتصميمم الفستان كلش حلو وعجبني اخذته واشترينا وورده اشترت فستان يشبه مالتي بس لونه ابيض رحنه على محل الملابس الداخليه وملابس النوم راحت ورده تختار ملابس النوم انصدمت منها تاخذ ملابس قصيره كلش اني اذا وحدي استحي البسها
شُجان- ورده انتِ متأكده تردين هيج ملابس؟
ورده- شنو يمعوده شبيهن عادي هنه هيج التجهيزات
شُجان- بس مو جنهن كلش قصيرات؟
ورده- اي هنه المفروض هيج
شُجان- فلك صابني
ورده- شُجان انتِ ماعندج ملابس لمن اجيتي فه اشتري ملابس الج
اشتريت كم لبس شفت لبس نوم لونه اسود حرير اخذته انطيته لورده
ورده- شنو هاذ الج؟
شُجان- يااا ولج هاذ الج حلو عليج والله
ورده- لا ماريده مو حلو
شُجان- والله حلو عليج لان انتِ حنطيه يلوگلج هيج لون
بدت تقتنع واخذته وكملنا اشترينا هواي شغلات ورجعنه للبيت تعبانين راحت ورده وعمه رقيه لبيت جدو علوان واني اخذت غراضي وغراض ورده للبيت طبيت شفت صهيد شافني وضل يضحك عليَ
صهيد- رحتيي شيي ورجعتي شي ثاني يايمه باعي شكلج جنج حراميه
شُجان- خايبب ما تنجبب وتجي تساعدنيي
صهيد- شمالج انتِ ويه كلمه انجب ؟
شُجان- اسكت عليك الله وساعدني اشترينا السوگ كله خرب يومج ورده تعبتني
اخذ مني نص العلاليگ ورحنه لغرفه ورده وبديت اقسم العلاليگ من مالاتي ومالاتها اخذت خمس علاليگ والباقيات خليتهن بغرفه ورده
صهيد- شنو هذني؟
شُجان- هذني ملابسي
صهيد- اقصد هذيج العلاگه السوده شبيها شو الوحيده المنفوخه؟
باوعت لكيتها علاگه لملابس الداخليه ضحكت
شُجان- انجب سوالف بنات
صهيد- كبر اي والله كولي هيج من البدايه صالي ساعه عيني عليها عبالي بيها شي ينوكل
شُجان- همك على بطنك ابو بطن
صهيد- كافي شُجان ودي الملابس وسفطيهن وباجر اني اخذج انتِ وورده للسوگ اشتري ملابس اكثر قابل تبقين بس بهذني؟ ها صح اشتريتي شالات؟
شُجان- اي اشتريت اربعه
صهيد- فستان للعرس اشتريتي؟
شُجان- اي اشتريت بس كافي اسئله خلي اروح
رحت لغرفتي وبديت اسفط الملابس رتبتهن وكملت رحت على صهيد
شُجان صهيددد
صهيد- وجععع شتردينن
شُجان- اريد ماسحه ووصله واريد مي ومعطر ارضي
صهيد- كلهن تلگيهن بالمطبخ تلگين زاويه بيها باب افتحي هاذ الباب تلگين المخزن هنه اهناك
شُجان- شرح مفصل شكرا
رحت للمطبخ وفتحت باب المخزن اخذت منها الماسحه والوصله اخذت وياي مكناسه واخذت المعطر ورحت للغرفه بديت اكنسها بالبدايه وبعدين انضفها كنستها ونضفتها وديت الزباله الموجوده وذبيتهن ووديت المكناسه للمخزن واخذت سطل خليت بي مي ومعطر ورشيته على الغرفه صارت عباره عن ماي وبديت امسح بالغرفه واني جاي امسح المي يمعت صوت صهيد وجفلت
شُجان- وسممم
صهيد- ببطنجج
شُجان- شتريد؟
صهيد- شجاي تسوين صارلج ساعه؟
بده يطب للغرفه وصحت بي
شُجان- لططببببب
طب وتزحلگ ووگع ضحكت علي
شُجان- هههههههههههه ااهخخخ يمههه بااععع شلونن وگعع كتلكك لطببب
اشوفه گام واجه عليَ
شُجان- والله اشاقهه وياكك ههههه
مشيت شويه وهم ترحلگت ووگعت وصهيد شافني بالگاع. ضل يضحك عليَ
صهيد- ربككك بالمنصاادد تضحكينن عليَ ربيي يبليجج مثل ما بلانيي
شُجان- كبررر لفكك
صهيد- ولفج وياي
شُجان- شعندي وياك اني بعدني بنيه اريد اعيش حياتي
صهيد- جا اني شايب؟ شو شابب وشحلاتني اريد اتزوج واعيش حياتي
شُجان- ماعدها ذوق هاي الي تتزوجك
صهيد- فديتت زوجتيي الماعدها ذوق تسوا راسج
شُجان- هيه منيه؟
صهيد- مرتي
شُجان- اعرف بس منيه؟
صهيد- اندري
غميته وفريت ايدي وگمت دفعته
شُجان- اطلع برا اريد اكمل تنظيف
صهيد- خايبه شني هسه طالع لا تدفعين ولج
طلعته برا وكملت تنظيف عطرت الفراش والغرفه كلها ورحت على الحمام جان نظيف خليت بس معطر كملت تنضيف وطبيت سبحت حسيت بارتياح كملت سبح وطلعت لبست ملابسيي الجديده جان عباره عن دشداشه تشبه الفستان جان شكلها مرتب مشطت شعري وخليت من العطر الجبته وخليت شويه حمره بس مو طوخ خليت نقطه ومسحتها على شفتي كلها كملت ولبست حجابي وطلعت شفت صهيد رحت علي
صهيد- طالعه حلوه بس تأخرتي وين جنتي؟
شُجان- نضفت الغرفه وسبحت
صهيد- نعيما
شُجان- الله ينعم عليك
صهيد- تردين شي؟
شُجان- جوعانه مماكله
صهيد- اي هسه نروح لبيت جدي اهناك راح يطبخون اذا تستحين تردين اجيبلج الاكل اهنا؟
شُجان- لا خالي شنهي ماكو مستحه من الاكل امشينه
صهيد- كفيلج العباس جني جاي احجي ويه صاحبي من يگلي امشينه للاكل
شُجان- هههه يلاا صهدهدد جوعانهه
صهيد- راح تضلين تنگين امشي
رحنه لبيت جدو علوان وسلمت على جدو علوان
علوان- شلونج بنيتي؟ مرتاحه ان شاء الله؟
شُجان- اي جدو الحمد الله ... عادي اصيحلك جدو مو ؟
علوان- افاا اني ارفض هل عيون الحلوات تدللين شتسميني سميني
تحمست بالحجي وياه
شُجان- چا اصيلحك علوان الاگرع
استوعبت اني جفصت اباوع على صهيد ضام وجه بين ايديه وجتافه تهتز وعمه رقيه مغطيه وجها بالشيله وهم تهتز وبيبي سعاد نفس حال عمه رقيه وكلهم منصدمين وماخذين وضع الاهتزاز
علوان- شتصيحيلي؟
شُجان- احم جدو
علوان- لااا كلتي اسم شتصيحيلي؟
شُجان- علوان .. الاگرع
حجيتها بصوت ناصي عبالي راح يرزلني اشوفه هاذ لازم بطنه ويضحك استغربت منه واشوف كلهم گامو يضحكون يااا شبيهم هذول
شُجان- شبيكم ماخذين وضع الاهتزاز
زادو بالضحك فريت ايدي ورفعت ايدي وصحت
شُجان- الحمد الله والشكرر بي اللهم لكك الحمدد
صهيد- حجي علوان طارت الهيبه من ورا شُجان
علوان- اندري يا جدي شو هاي تصيحلي علوان الاگرع عمي طارت هيبتي وعلي دهر فرج شُجان
شُجان- اسفهه والله ما جنت راح تزعل اني تحمست بالحجي
ضربني بخفه على ضهري
علوان- يابه عليش تعتذرين ما سويتي شي عادي يمكن حبيتي تضحكين شويه عادي يبعد جدج
ضلينه نضحك ونسولف واجتي ورده وشاركتنا بالسوالف اليوم جان حلو من بدايته للنهاية حبيت العيشه وياهم مع انو هاذ اول يوم الي بس ما حسسوني اني غريبه عنهم حبابين وينحطون على الجرح يطيب حبيت جدو علوان وبيبي سعاد حبابه وعمه رقيه وعمه صابرين ورحاب والبنات كلهم حبابين مستعده ابدي بدايه جديده ويه حياتي الجديده وياهم
_____________________________ ________
ولهنا ويخلص البارت الاول البارت الثاني بي مفاجأت وان شاء الله بس انزل البارت الثاني انزل اشباه الابطل. سيو ورداتي 🤍🤍💗
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!