رواية اماً لهن الفصل الرابع 4 - بقلم مريم السعدي

بارت ٣

#أماً_لهُن

#مريم_السعدي

الهام.....

تطمنت ماعرف ليش من حجاها بثقه مدري غركان وجلب بقشة امل

كاعدين وايدنا على خدنا لل٣ بليل ودك تلفوني ميثم رديت

- الو
- الو الهام عدها صديقه اسمها  سميه؟

صفنت
- ااي عدها صح
- رقمها يمج
- لا والله
- زين غير الارقام بالتلفون الوردي عدج احد
- لا
- خوش  نصير تندلين بيتهم تعرفي
- لا والله
- ماشي روحي هذا هو

سده مني
انسطرت اكثر
ساعه وكام يكبر الجامع

غمضت عيني دخيلك ربي نذر عليه اضبط صلاتي بس تردها صاغ سليم ربي
ساعه ب٥ الا ربع
وطب خالها كال بنتره

- جيبيلي خواتها اخذهم وياي
- شكو لكيتها عليك الله
- اي لكيناها اخو صديقتها نصير عده شقه وماخذها

بيها ضربت على وجهي غمض وعض شفته
- لحكنه لتخافين بس مابقيهم بعد
- مستحيل انطيهم الك
- صيحي خواتهااا
- ماانطيهم الك داكولللكم

صيحت وطب ميثم و كأنه واحد من البيت نتر بي

ميثم : اخي البنيه طلعت من بيتك مو منا معناها التقصير منك

الخال جاوب واعصابه ترجف ماكو طلعه بعد دوام وخلصوا

نترت بي
الهام : مااقبل بنات اخويه يبقون هنا شمدريني شراح تسوي بيهااا مراهقه وغلطت

الخال : حجي يفييددج  اذا ممشيتها عالصراط المستقيم بسيطه

ديحجي وطبكت سياره شرطه ونزلت رسل خايفه دفعها الشرطي وتعاينلي وتعاين لخالها

توه اجه يضربها وركضت  لحضني

تتوسل
- عمه عمه فدوه والله ماسويها بعد عمه لتخلي ياخذني والله يموتني

- شون هيج تسوين شووون... واباوع بوجهاا وركبتها وعيونها اخاف الكه اثر اعتداء

والولد بالسياره مكلبج

ميثم نطق كال
- الولد ابن اوادم ومراهق  شقة عمه وكلتله خالها ضاربها وانهزمت من البيت ومقهور عليها  وخايف كلها تعاي لشقه عمي لتبقين بالشارع

صفنت عليها تتوسل وتحلف
رسل : والله عمه موتني ضرب
ورجع حنفش الخال يريد يضربها ودفعه ميثم نتر
- بسس يكفي الصبح تفاهموا غلط اخي

سكت كوه وطلع ببيتها بقت يمنا 
وراح ميثم تشكرت منه هواي كال

- كتلج قبل الوذان بفراشها

- ووفيت وعدك الف شكر

- نظرة عيونج كافيه للومه

انصدمت حتى الدلع يعرفه
راح وطبيت جوه
بقت تتوسل بيه وتحلف ايدها اثر ضرب خالها بالحزام تخبلت

تخليني مرته انظف البيت كله حتى ابدل حفاضات الجهال

تشكي همس  وتبجي خاف تسمع البيبي ولا عبالك  هاي رسل الوكحه
واني اصبر عليها

رسل : والله للومه ماسويها بعد لتخلي ياخذني
الهام : اوك
رسل : لا اريد تلفون ولا اريد مصرف بس ابقه هنا
اوك؟
الهام : ماشي

رغم السوته قهرتني مراهقه وغلطت واخذتها ورجعت للدوام ومن يومها ميثم متركني كل يومين يمر للشغل ومو بيدي من استقبله بممنونيه

نظراته التحسسني بثكل حملي وانج كدها تريحني كل كلماته تقويني وتخليلي دافع ادير بالي عالبنات اكثر ونفس الوقت متنسيني عمري وانوثتي

جنت بعمر٢٧ سنه
مااعرف غباء
مااعرف حلم وطموح واعجاب صابني ناحيته
وشلت من راسي كونه مرتبط او لا

عمره موصغير
ولاجبير متوسط ليش ميكون مرتبط اصلا شنو الناقصه

ولاول مره اتصل بليل  واني افكر بكل نظره منه واتخيل يرتبط بيه ويشيل عني حمل البنات يساعدني بيهم
ورديت  عليه

الهام : الو
ميثم : هلو الهام كاعده
الهام : امم كاعده
ميثم : شونج
الهام : زينه الحمد لله شعجب متصل هالوكت
ميثم : والله مكدرت انام وخفر كلت اتصل دكه وحده او دكتين مرديتي اتركم ماازعج نومتج
الهام : همم لاعادي اني احب السهر
ميثم : تتفرجين تلفزيون
الهام : اي نوبات
ميثم : حلو  ... الهام
الهام : نعم
يحجي بصوت خافت ماعرف ليش تذكرت رافد من جان ينعس من احجي وياه
سكت شوي ورجع كمل كلام

- الهام اني اريد ارتبط بيج

خنست معرفت شرد علي خفت لان كان كلشي سريع ومبهم

- مرديتي عليه
- ها
- سمعتيني  مو
- اي
- شنو رأيج
- ليش اني
- ههههههه ليش اكو وحده مثلج وهبت حياتها لبنات اخوها  ونست شبابها .. لانج حنينه ومعطائه
الهام واني محتاج لهيج حنان وعطاء شخص ميفكر بماديه او مصلحته فوق الكل
- زين انت مرتبط
- اني مرتبط ومنفصل

سكتت.. وهو سكت شويه وكال
- اخذي وكتج بينما انزل وامرلج لعملج ونكعد شتكولين
- ان شاء الله
- اخليج ترتاحين باجر دوامج
- اوك
- تصبحين على خير
- وانت من اهل الخير سديته منه وافكر
فكرت هواي تعبت ونمت

فتره اسبوع ونزل جنت محضره جوابي اكيد موافقه لان حسيت القطار حيفوتني

وافقت وهو كان واثق من موافقتي  كال امر على عمج اطلبج

يومين ومر لعمي البنات عرفو ازل وعسل كيفو بس رسل فرت مخي و كالت

رسل : احنا بنات كبار وحده ١٦ سنه والثانيه ١٣ شون تدخلين علينا رجال غريب

الهام : حيكون مثل ابوكم
رسل : ماكو مثل ابويه للومه

صفنت عليها عصبت بس كتمت غضبها تخاف لاادزها لبيت ببيتها هالفتره كلها على اعصابها تلزم نفسها مصرفها رجعته

فتره مرت واني بالشغل مثبوره دااجمع اوراق محتاجه توقيع معاون مدير عام
صارت كبالي بنيه ب٣٠ من عمرها دزها الجايجي اشرلها هاي ست الهام

تقربت
ووكفت رجعت كملت مشيتها كبالي وكفت
صفنت عليها كانت حلوه سمره بعذوبيه وعيونها تنتقل على طولي ووجهي استغربت نادراً ما مراجعين اناث دومهم رجال واذا اناث فيكونون من داخل وزارة الدفاع
واني الملم واحجي وياها

- تفضلي ... ونصيت عالاوراق

كالت
- الهام مو
- اي تفضلي
- متعرفيني.. بس اني اعرفج
- بس دقيقه هسه اجيج

كالت
- انتظرج
طبيت اخذت التواقيع وطلعت حتى نسيتها
لكيتها تنتظر واني طولت عليها
- اسفه طولت عليج

- لاعادي كملي شغلج
جريت نفس بتعب وكعدت عالكرسي
- كملت تفضلي شون دخلوج شعجب

كالت
- اني بنت لواء —- وجيت عليج
صفنت عليها
- بيش اكدر اساعدج

كالت
- اني طليقة ميثم
جمدت بمكاني رفعت راسي اباوعلها باوعتلي بتوسل

وكملت كلام
- عندي علي و  تمام
وانفصلت عنه بلحظة غضب منه اثنينا ومدا اكدر اعيش دونه الله يخليج عوفي
لزمت راسي واعاينلها

كالت
- والله هو دينتقم لان كبرت راسي بأبويه وكلي اذا انفصلت عنج مارجعج بعد وتندمين وكلامه صح انغريت ... غروري مسمحلي وكبريائي متحملت اكون تحت امرته رغم حبي اله
وخليت والدي يأذي ويبعده ردت اكسر عينه بس تكسرت اني وولدي

بقيت صافنه عليها
- وهسه ؟
كالت
- انتِ اتركي واني اعرف شون ارجعه الي ولبيتي الله يخليج

وبكل بساطه كدامها شلت الفون ودكيت عليه رد رأساً
ميثم : هلو الهام هاي شعجب
الهام : ميثم عدك اولاد
سكت.. ميثم رد عليه

كال
- اي نعم عدي ٢
- ليش ضميت عليه
- انتِ مسألتي
- متوقعت.. متصورت
- مصار شي هسه  اني  ممقصر عليهم

رفعت راسي باوعتلها مسحت دموعها ونصت
- ميثم كلمن بطريقه ولتوصل احذرر
- ليش شبذر مني كتلج منفصل ومكذبت جنت واضح وياج الهام

- واني ماريدك بعدد  فهمت لتوووصل الي

سكت
- كال نتفاهم
- ماكوو شيي نتفاهم عللليه نترت بأعصاب

همس
- وعليش هلكد معصبه مو ميثم التعلي مره صوتها عليه ولاميثم اليلحك مره هاهيه كلمن بطريق كلمن بطريق الله وياج

سده بوجهي وكعدت لزمت راسي والبنيه تقربت مني كالت

- تحبي؟
باوعتلها ابتسمت هزيت راسي برفض وكتلها
- ارجعي لرجلج محد يفيدج غيره الله يوفقكم بحياتكم

طلعت من يمي واني احس للمره الثانيه بالانكسار

يومين غبت من عملي مثل المريضه محبيته لا بس احس روحي خسرت سكف

داومت ومشت الايام بعد فتره شفته يم المعاون ولاباوعلي فات من يمي ولا التفت بكل شموخ وغرور تعداني نظره مباوع ناحيتي وراح

فتره يله كدرت اتأقلم  واقنع روحي هذا الأحسن الي

خلصت السنه ورسل صارت صف خامس علمي
وازل ثاني متوسط وعسوله ابتدائيه

جنت كلما اشوف روحي مداسيطر اهدد بخالهم او بيت بييتهم ويمشون عدل

اساور رجعت تبات عدنا
ورسل كفت عن ابوها  جانت رسل شاطره بس دومها انتهازيه كم مره ومره انتبه نقص بفلوسي وكمت اضمها كم مره ازل فلوسها تنقص واشتريت الها دخل ابو القفل ومفتاحه عدي

اما عسل مكنت انطيها بيدها اجمعها عدي
فتره وللاسف خالهم توفه بحادث سير على طريق السريع انگلبت سيارته
وتوفه

كانت فجعه للام ولزوجته خطيه حيل انقهرنا عليهم
بس هالشي خله رسل تستفحل تغيرت تغيير مفاجيء مره وحده تغيرت

ومسيطرت بعد
ابد مكدرت اسيطر

تليفون بدل الواحد اربعه عدها الكه واحد تطلع اللخ
عركات وي خواتها وويايه وسرقه فلوس تليفوني

ردت اتخبل
ارقى الملابس الكى عدها منيلج اشتريتها من مصرفي مسيطرت مسيطرت ولان مااكدر اهددها بأحد بعد كمت اضربها ميفيد احجي ميفيد

بالاسبوع مره تدز عليه المرشده الاجتماعيه  وتشكي منها

مره مداومت
مره تعاركت وي البنات
مره تغلط بغلط موحلو
مره جايبه تلفون ومره مكياج تعبتتتني بزعتني

اهملت ازل وعسل من وراها بس ادور واتعارك واحقق وهي لسان ووكحه

لدرجه وصلت حد مره دامد ايدي عليها ولزمت ايدي صيحت

اخر مره تمدين ايدج عليه اني مرصغيره والتهدديني بي مات  كلمن عليه بروحه بعد ومثل ماهو بيت اهلج بيت جدي هذا

خنست صافنه عليها فاكه كل عيني
وعافتني وطبت للغرفه ازل مقبلت عليها كبرت وصارت تعرف الغلط اسمعها تكولها
- عيب عليج هي التكفلت بينا وهي تردها

- خلك عانس غصب عنها تتكفل غير بنات اخوها بعدين وين تودي الفلوس متشوفين محد مكلبها جنها عجوز شعرها شيب ومحد يعاين بوجهه

- اش لج رسل عيب تسمع
- وسمعتهم بلكن تصحه على زمانها لبسها الرسمي ستره  وبنطرون عبالها مغني هاي خطيه حتى كاظم الساهر بطل يلبس ستره النوبه محروكه يا الله فوك القهر  اذنها محركه اييع

الهام...
سكتو واني كل كلمه منها خنجر بكلبي كلامها صح محد يعبرني
واني ليش مخليه الزواج والرجل اول اهتماماتي وطز وليعبرون

كمت اسمعها واغلس مارد عليها
نجحت رسل للجامعه جانت عدها كذا صديق كمت اسمع بيها تطلع وياهم  واغلس

جانت تدز عليه المديره تره ممداومه واسكت  حدما خلصت الثانويه يله ارتاحيت

وانفتح باب الكليه

بدت معاناة جديده  لبس كشخه واني راتبي يزيد  وانطيها من تجي تواجهني بس اني مخربط لبسي وانطي اريد اخلللص  اخلص بلكن ارتاح

فتره بالجامعه والطبه والطلعه   عرفت احد ديصرف عليها بس اكيد مقتبل شي ماكو شي بلاش
لهنا خفت خفت كلش

وكعدت وياها استفسرت منها بصوره مباشره او غير مباشره اريد اطلع نتيجه وحل

كالت
- اني مو زعطوطه انطي شرفي  لتخافين اني افرررره فر واخلي هو يذب الهدايه مرتاح ومتوسل اني رسل مو للومه ياخذ فلوسي ويطفر وعافتني وكامت

مدري صح حجيها مدري يقهر
فتره عدت ازل سجلت وي اساور خصوصي توسل ابو  اساور وي بنته تتسجل وقبلت مدرسين يجون للبيت يدرسوهم ببيتها كبرت تعبت خطيه

وهمه هم كبرو صاروا من يروحون ببيتهم يسوون اكل لروحهم ويتونسون وكمت اقبل تبات عد اساور يوم الي ابوها مسافر تعلقت ارواحهم كلش

وعسل صارت ب٥ ابتدائي
من خلال صفنات رسل وابتساماتها وي روحها عرفتها عاشقه

تمنيت من كلبي اللي حبته يخطبها

هالخمس سنين انكضت ضيم
ليل مانامه
وبس افكر ها خاف تفضحني ها خاف تنهزم وي ولد وخواتها اليوكعون بيها

بس اترقب بس اراقب واعاين وادور تعبتني هلكتني
حدما تغيرت فجأه
انعزلت عنا اكثر تبتسم  تراسل تسرح

خصصت لكل سنه نجاح هديه ذهب من راتب ابوهم  الميعرفون بي

شوي هدأت رسل من دخلت بصومعه العشق
ضعفت وتتأمل روحها بمرايتها
ولاول مره بالتاريخ
تقربت من اختها ازل جانت صف سادس وتقربت منها

وتجي تحجي الي ازل كل اسرارها البريئه  عدي
ارتاحيت رغم عدم معرفتي بالشخص مناسب او لا يكذب عليها او لا بس المهم واحد مو عشره تحاجي
وحجتلي ازل

- للومه  ولد اسمه بشير تعرفت عليه وصارحها باعجابه عده سياره اوبتيما آخر موديل وشكله حلو وابو يشتغل بشركه اهليه واخو عده شركه مال المنيوم طاكين كلش وعده شقه وحده

- ازوله يحبها يعني .. زين ليش ميخطبها
- للومه  هو هسه ثالث بعد سنه يتخرج كلها اتخرج والزم شركه ابويه واخطبج ماريد غيرج

- بلكن يارب المهم هي تحبه
- تموت عليه بس تحجي وياه ليل نهار ويطلعون بالكليه مطاعم تكول فد كريم كلش كريم ممقصر ويايه بشي مدللني

صفنت عرفت الولد متريش لازم شي يليق بي وكمت اجهز من كل عقلي كل ما طلعت اشتري الها شي لو لبس نوم لو قطعه ذهب بدون ماكولها
ولاكول لاحد

جنت مكيفه حخلص وخايفه لايخذلها
ازل اغلب الايام بايته عد بيت اسو لان دروسهم سوه
وامتحنت وطلعت معدل ب٨٠ هي واسو نفس المعدل بالضبط
بس المفاجئه تركو المعدل ودخلو اداره اعمال اثنينهم

وابو اساور دعمهم وشجعهم بوكتها تعاركت وياه ليش معدلها زين ليش تكسرهم طمني بكلمه حتى اشغلهم عدي بالشركه من اسافر همه لازميها
شفت لهفه ازل وتركتها براحتها

ازل : اسو مداصدك
اساور : ازوله مراح نفترق ندخل كليه سوه ونداوم بالشغل سوه
ازل : يارب اني  للومه طتني ورقتين اتسوك بيها ملابس وتجهيزات كليه
اساور : واني هم بابا طاني نروح وي بيبي شتكولين بيبي رغم تعبانه بس عدها ذوق
ازل : خوش

- ازل باعي هذا
- لالا اني اشتري التنوره كبس ناعم وانتي اخذي الكلوش حتى نتتلابس بعدين
- اوك
- باعي هذا  القميص
-اي يخبل اني اخذذ هذا وانتي اخذي هذا شتكولين
- اوك ماشي

ازل...
دنمشي ومكيفين وكفت سياره ابوها كدامنا ونزل يبتسم نزع نظارته الشمسيه همس من يمنا

يابه شون  كمرايتين يتمشن گلبن الشارع گلاب
اساور : ههه واكول الصوت موغريب عليه طلع ابويه هو اني هم شكول وحده يتغزلون بيها
ابو اساور : ليش بابا جنج گمر نيسان

ازل : واني عمو هم حلوه
ابو اساور : ازوله بس عيونج دمار  تكوليلي حلوه والله خايف عليكم من الجامعه هاي شون بلله
ازل : داوم ويانا ههههه

رجعنا للبيت بيومها جنت متحمسه متشوقه اكمل كليه واشتغل ويصير عدي مصرف اول شي اسوي اعزم اسو وابوها

ازل : اسو مدتقبل للومه احف
اساور : اني احاجيها
ازل : خاف ترزلني
اساور : لالا اني احجي رياها قنعت كان بها مقنعت مولازم اصلا شعر وجهج اشكر
ازل : اوك شوكت تجين
اساور : دا انتظر السايق لابسه وكاعده

ازل : اووف بعد اسبوع دوامنا
اساور : اي ههه اكولج شمسوين غده
ازل : مسوين تشريب
اساور : افففف افف افف هسه غير يجي السايق  حموت جوع

ازل....
جتي اساور وانلمينا للغده رسل نجحت صارت ٣ وللومه كالعاده اشترنا كلمن محبس صار عدنا كل وحده كلاده نازكه ومحبس وتراجي وسوار  تغدينا وانفتح موضوع

اساور : عمه الهام بابا حياخذني لاذربيجان عادي اخذ ازول ويايه.

الهام : لااا اصلا جواز ماعدها وشون اخليها تسافر وحدها
اساور : عمه بابا يطلعه عفيه الله يخليج

الهام : لااا ماما لا
رسل :  للومه خليها تغير جو ابد مطالعين احنا
الهام : لاا كلت لا
سكتو
واساور ضاجت
كامت رسل طبت الغرفه شوي وطبينا وراها اني واساور

وسمعناها شي رطب نبض گلبي غركني حنان صوت الفون عالي وهمساته تدك بگلبها وراها بگلبي
اسو متأثرت بس اني مدري شبيه كلبي يدك سريع

رسل : وانت ليش مرحت وياهم
بشير : مالي واهس بعدين اريد احجي وياج
رسل : شنحجي موجننا بالجامعه سوه وسولفنا
بشير : ردت نبقى وحدنا رسوله وذوله معافونا جلبو

رسل : شسوي ياعيني قابل اطردهم اخجل
- هسه ديشوفوني دايخ بيج الوش جلبو تره متقصدين يوغفون ردت بس الزم ايديج
- ميخالف حبيبي اصبر
- احبج رسل مداكدر

ازل...
حجي دخل گلب گلبي صدقته اني قبل رسل صوته يرجف من يحجي ويتوسل بقيت اباوع الها مغمضه تبتسم واسو ترطن يمي

ليش معشت ولاحسيت بأحد هيج طلعت من الغرفه وكعدت بالمطبخ واسو يمي

تلمست شعري كالت
- ها نسشور شعرنا
- يله امشي

ردت بس التهي ردت بس انشغل وانسى السمعته

بدينا نشور وحده للخ ركصنا وتونسنا وجهي كام يضوي من الحركه والحراره صار احمر

لليل دكلها ابوها  كلها راح امرلج اخذج
واجه طلعت اوصلها جنت اتمنى احد يشوف جمالي وشعري
يفوت من يم الباب ويلمحني
بس دنيا ليل منو يلمحني الشارع فارغ

- باي اسو... فتحت الباب طلعت مديت راسي نزل شعري صفح نزل عمو رائد يبتسم

همس
- هلو ازولي وتقرب بوس اساور بيده علاكه باوعلي ابتسم

كال
- هاي شنو صديقتج اسو صايره تخبل.. هاج عمو هاج هاي علاكتج

- ششكرا عمو

مشه وراحو اشر باي بقه يبتسم
مثل واحد  شايف شي حلو
روحي رخت

اول مره شخص يكولي تخبلين
خدودي حومرت زايد عن قبل اتلمسها احسها نار وابتسم

الصار كمت اتذكر كل موقف يجمعنا
انتقاله رهيبه من الطفوله للشباب مراهقتي وينها

وليش تركزن بنضرات عمو رائد الابويه الحنينه

كمت اتذكر حنانه   ودلاله وعدم تفرقتي عن اسو

صفنت ونمل عقلي من تذكرت رسل وشون حاولت وياه وهو رفضها واتذكر اساور من كالت يكول لبيبي لعبت نفسي زعطوطه بكبر بتي

مدري شصار بيه
هاي اني شدافكر
بكد ابويه
شون هيج كدرت احسب
اعوذ بالله اعوذ بالله

طبت عسل ونامت بصفي حتصير بطولي يا الله
شبيج لج روحي لفراشج

عسل : لاماريد حلمت حلم يخوف
ازل : لج عسل عزه بعيني حتروحين للسادس عيب

بقت صافنه عليه باوعتلي بتوسل
- بس اليوم
- نامي يم للومه

- بعدها منايمه للومه دتتفرج
- دنامي لعد نامي

ايام العمر تمشي بغضب مستعجل

ويني اني من كل هذا
صرت ام  بدون احساس الامومه
صرت سكف و ظهر من دون سند و ظهر

صرت عزوه بدون مااكو احد يعزيني  لو يقويني
واني وحدي

بكل ليله دموعي تسترسل بهدوء بدون مااحس تطفي ناري

اشتاقيت احس بگلبي اشتاقيت افكر بأحد اشتاقيت احد يسأل عني  ويهمس بإذني ويشغل دگة گلبي  الفاتره. 

ساعات اباوع لروحي بمرايتي احسب خط خط بوجهي شيبه شيبه بشعري
يوم يوم بعمري

ليش معشت
ليش من يتقدمون ويعرفوني ماكدر اعوف بنات اخويه يتركوني

زين
اني صح لو غلط
وحده وحده راح تشوف حياتها وابقى وحدي
وحدي
وحدي

احجي واتخيل الصدى يرجعلي شون من يفرغ البيت  شو كمت اخاف بوكت جنت اتمنى السكينه والهدوء

طبيت خميت البنات نايمات كلمن تفكيرها يختلف عن غيرها

ازل وشعرها المسرحته نازل للكاع
عسوله وشعرها  الملفلف دون خواتها بشرتها ثلج على ببيتها ام امها بيضه كلش وشعرها جوزي

ورسل اخخخخخ يارسل
جرة حاجبها الطويله  ودقة انفها الرفيع وشفافها الصغيره
نايمه  بعمق اكثر من قبل يمكن لان انتزس گلبها واتطمن

وازل النايمه صفح خصرها المنحني بقوه وكأنها حوريه  بتخصيرتها وجمال انحنائاتها وطولها شون حتكون حياه الجامعيه بالنسبه الها

سديت الباب
ورجعت للمطبخ
الساعه تدك تعلن وصلها الساعه ال٢ بنص الليل

واني كاعده
شمضيعه للومه
شنو الضاع
عمرج لو سنين ايام عمرج
لو لون شعرج وفرحه گلبج

ياترى رافد يتذكرني؟
ياترى عده اطفال؟
يحب زوجته؟
هم يندم مثلي فد يوم لان متحملت امه؟

باوعت بعيوني الذبلت
شكد عمرج للومه صار
٣٤ سنه

اي ٣٤ شبقى من عمرج  شكم سنه
زين شكم سنه. ويروحون ويعوفوج بالهواي ١٠ سنين واصفه بعمر٤٣  سنه وحدي

وحشة الليل والغرف تفرغ وحتى گلبج فارغ شبقى من جمالج؟!
خليت شعري وره اذني وبينت الحرگة
و كأنما ناقصه شي  لخ يكولي  راحت عليج

رجعت الشعر ضميت اذني غسلت وجهي ورحت لفراشي ونمت

زارني اخويه بالمنام
من دون اي كلمه
كان يبتسم بتعب ويمسد على راسي كل تمسيده عبالك اهدأ

غفيت بعمق
حسيت الصبح وكالعاده يوم روتين دوام والبنات مكيفين بالسنه الجديده

ازل الكلها لهفه اجاهم ابو اساور اخذهم هي وبنته

طلعت مثل الشمس خدودها وعيونها الكبار رغم گصتها جبيره بس تخبل

فرت حجابها وتبتسم واني اعاينها باوعتلي

- للومه لايكلي الزي

- مفصل الج ازوله

وطلعت عسل تركض
- للومه شديلي شريط الصدريه سوي فيونكه

تحجي واضفر بشعرها
عدلتها الها وطلعت رسل
بكشختها وتلفونها يدك رسايل تبتسم وترسل وترجع تكمل تعديل كحلتها

شبسرعه كبروا
طلعنا سوه  وقفلت

وصلت عسل ..
ورسل صعدت خطها..
وازل وي ابو اسو
الزي كان مرتب عليها كلش ومكدر يخفي جمال جسمها

اسو كانت اسمن رغم القياس اكبر ماخذته بس ممرتب عليها كثر ازل

طلعت لشغلي اشتغل واصفن  بالي يم ازل
شنو الصار وصرت كلش اخاف عليهم
صدك صارو جزء مني وصرت امهم
صدك يجي يوم ويحبوني يشوفوني مثل امهم

لو ينسوني
لو ينكرون الجميل
لو ميتركوني ومينسوني

خليتها على الله واستمريت بعملي
دااشتغل ملتهيه. ودك تلفوني ابو اساور

- الو
- مرحبا ست الهام
- اهلا اهلا ابو اساور
- هلا بيج بله امر عليج ممكن تبات ازل هالاسبوع عدنا لان راح اسافر والوالده كالت اتصلت بيج وموافقتي

- والله ابو اساور اختها شوي تعلقت بيها الصغيره وتضل ضايجه من تجي

- ها اي حقها  زين خلي تجي وياها بدون زحمه 
خلي اساور عدنا تبات

- لا مترهم صار اسبوعين يمكم

- زين ماشي بس انتي هم خليهم على راحتهم صرنا اهل تره

- والنعم منك ابو اساور بس مااكدر اغفى بالي يضل يمهم

- والله لو امهم متخاف عليهم كدج

ازل كبرت ملامح جسمها وجمالها خوفني عليها  كمت ماامن اعوفها تبات عدهم بالكوه يله

بدت تعاند وتضوج وتتوسل وتدز عسل   تريد تروح يم اساور

واني مره اقبل ومره اعاند
ازل : للومه حبابه مو عيد ميلاد اسو والله ومحضره الها مفاجأه

الهام : لا ازوله مو حجي هذا كبرتي انتِ تره عيب عيب تباتين عدهم

ازل : للومه ماعدهم احد بس بيبي الحجيه الله يخليج الله يخليج

الهام : لاااااا ازل لااااا
ازل : اهووووو ماريد ماريد

الهام : شطلعت هاي احير بيج   بخواتج لو احير بيها كافي عاااد

سكتت وطبت للغرفه تدردم ورسل تتجاوب وياها تبشبش صاروا جبهه ضدي

يتبع

مريم السعدي
—
—