رواية اماً لهن الفصل الثالث 3 - بقلم مريم السعدي

بارت ٢

#أماً_لهُن

#مريم_السعدي

الهام...
رسل تعبتني كلش وبديت بمنحنى بحياتي جديد
صارت ثاني متوسط
وازل صف سادس ابتدائي بكلوريا
و عسل دخلت تمهيدي

وبين هوسه الدوام والدراسه والتعب والركض النهار كله يتعاركون واني افقد اصيح واعيط يخنسون وتبقى رسل تذب حجي متسكت.. متسكت حدما اكوم اضربها بخفيه عاد تسكت

اساور صارت تجي الخميس بليل يذبها ابوها وجايبه كومه شغلات و ياها و حلويات
اسمع ضحكهم وابتسم
اني وافكاري و خذلاني و احساسي بانه خلص عمري وماالي حق بفرصه ثانيه
الندم ياكلني من اتذكر عيونه
لو متحمله
لو صابره على امه
اولنا وتالينا بيت وحد
ليش متحملت محبيت غيره رافد اخذ من روحي جزء بقيت بعده احس بروحي مكامله
يمكن لان الوحيد اللي حبني وتقدم

هالفتره هواي اهملت روحي والتهيت بالبنات مو احساساً مني انه اني ام الهم لا
بس جنت اخاف يصير بيهم شي واتورط

بس بدون مااحس على روحي تعلقت بيهم
من تصير سنطه افز..
وينهم ؟!
عسل وين لغوتها المتسكت عنها
مناگرة ازل ورسل شو ماكو
واكوم ادورهم

رسل جانت دوم وحدها تكعد
وازل هم تقره وعسوله تلون
هواي تحب تلون
دفتر وره دفتر تخلصه
واني خلصانه منها
متمل ابد

مرت سنه او اكثر
رسل صارت ثالث متوسط وبلغت بدت تبين ملامحها الانثويه
وازل اكثر منها
الفرق بينهم ٣ سنين
بس ازل هوايه احسن منها متتعبني ولاتطلع صوتي و رحيمه على عسل وعليه هم وابد مو طماعه.

جانت تجمع بصوره هستيريه تريد تشتري مرايه وجربايه نفس مال غرفه اساور
ورسل يوميه مشتريه شغله تزيد جمالها
يوم حماله اكبر من حجمها حتى تبرز
يوم حزام عالخصر حتى فوك الصدريه يصير محزم الخصر
يوم شال
يوم ساعه
وتتذكر بكل مره انطيها الاسبوعيه

انطيني اكثر من خواتي ميحتاجون كدي اني اكبر
واردها واكللها.. لا ماانطي ترديهن لو لا
يوم تكولي طيني مال عسل.. واردها فلوس عسل تنجمع يمي محد يتدخل
تجاوبني بعصبية وصلافة وكالت ومنو يكول متاخذيها الج

صحت بيها
- ولج هي فلوسي اذا اريد ماانطيها بس اني كل شهر اشوف شمحتاجه ملابس احذيه واشتريلها مالج حق تحاسبين

- اهوووووو شكد فكريه يا اللللله
ضربتها للمره الميه
جنت كلما اضربها اعد ضرباتي. لان اتأذة اكثر منها مو حباً بيها لا.. بس اني محد ضاربني قبل يوجعني احساس اليتم من اضربها ماعرف شحس ايدي تنشل

مره عن مره جازت بس تدردم وي اختها
نوبات حتى ازل تگلب عليها فتره وتفك ونوبات تطول يله تتفهم ليش ضربتها

دوامي شاغلني درجات وتدرجات والسبع يبين هالفتره حتى يصعد
درست فوك شهادتي شهاده لخ واخذتها وصعدت درجتي ولانني ماعدي غياب حصلتها رغم حرب الواسطات بس كدرت احصلها ماعرف المدير الله هداه عليه.. المهم درجتي صعدت وراتبي زاد العيون صارت عليه

صديقاتي ينتقدوني ينتقصون مني
- يحضي لبسي كشخي شبيج
- ليش شبيها هدومي مصار سنه من جهزت
- ادري منين من حاجه ١٥ انتي دفاع بابا دفاع اكشخي
- ماريد هاي هدومي مرتبه ومرتاحه بيها
- زين وجهج سوي شي تنضيف بشره شي
- شبي والله صافي ويخبل

ويتركوني ملو مني
جنت قبل وفاه امي اشارك من يرحون مطعم شي
بس بعد وفاتها اي مطعم مطبيت يضل بالي عالبنات مااكدر وهسه بعد ما زاد راتبي ارتاحيت

صارت بكل مناسبه موعد وطلعه وي البنات
اذا نجحت وحده منهم بدرجات عاليه اخذهم مطعم وهديه خاصه الها
اذا عيد ميلاد وحده منهم مافوته كيكه وهديه بسيطه

والاسبوعيه مستمره مازيدها عن ال١٠
فتره مرت واساور تعلقت بازل كمت اسمع بسوالف المكسره بين البنات وشعر راسي يوكف
مثل المخبله اراقب واتصنت من ينامون خاف بينهم شي كم مره اجه ابوها عليها ولامره.. ولامره طلعت للباب

فد مره داارجع من الدوام شفت ازل نزلت من سياره عاليه وصلت للباب شفتها بوست اساور وتقربت من باب الصدر بوست رجال يطلع ب٣٠ واشرت باي
والرجال التفت عاينلي استغرب

ونزل ايده على صدره
ذيج الكشخه وذيج الهيبه طول بقلافه ورزانه بترتيب كانه تركي يشبه بنته بس بملامح رجوليه مرتبه حيل يلمع كال بلباقه

- العفو السلام عليكم

- أهلاً و عليكم السلام
- عمة ازل مو؟!
- اي اي اهلا بيك
- اني ابو اساور .. بيج اكثر الله يوفقج على هالتربايه لهالبنوتات الحلوات..
ولف ايده على كتف ازل وازل تباوعلها بحنان تبتسم
نزلت اساور تقربت مني بوستني مثل كل مره
- شونج خاله اليوم احنا وصنا ازوله لان بابا جاي من السفر
هزيت راسي صافنه
صفن عليه فهم استغراب نضرتي

كال
- بله امر عليج بلكن ازوله وي اساور تبات هالخميس عدنا
- لالا اعذرني
- مو دنثكل عليكم كل خميس اسو هالمره خل تجي هي واني موجوده ليضل بالج
- لالالا
ابتسم ونصه هز راسه متفهم مسح نضارته بقميصه ولبسها كال
- الله يبارك بيج على هالحرص يله بابا اسو صعدي اترخص اني باي ازوله

- باي عمو شكرا عالهديه
- بالعافيه عمو

وطلع وازل تباوع بفرح
طبيت للبيت راسن عطت بيها
- شون تخلي يبوسج لجج
- عمه شبيج ... برطمت من صيحتي عمه هذا مثل بابا قابل شنو
- متخلين احد غريب يبوووسج ابددد ابددد فاهمهه وبعد متخلي يوصلج

صفنت بعيني بغضب وعيونه مدمعه
- فهمتي لو لااا تره حتى اساور ماخليها تبات عدنا
- لالا عمه والله
سكتت وطبت

بقيت بحسبه تجيبني وحسبه توديني
ثاني يوم كان الخميس جتي اساور عدنا مشتريلها ابوها سوار ذهب مال عيد ميلادها وعيون رسل تحجرت عليه طول فتره الغده

بالليل ديسولفون ويضحكون سمعت صوت تلفون يدك صفنت تلفون منو هذا شوي وطلعت اساور كالت
- خاله بابا يريدج
اخذت الفون صافنه شهالجرأه

رديت متردده
- الو
- الو مساء الخير ست الهام
- أهلاً ابو اساور تفضل
- بله امر عليج ولو دنيا ليل بس بلكن تطلعلي اساور ادري قافله الباب ومتقبلين بس اني بالباب و وتعشيت بره وتنغصت الكم باللفات

- البنات تعشو ابو اساور
- ميخالف مو ليلة الخميس طويله وشوي همه يسهرون وهاي شوي نمنمات لترديني بروح اهلج داكولج بالباب

- مايرد الكريم الا البخيل اخر مره بس رجاءا لتصعب عليه المهمه
- لالا مااتدخل بعد بس هالمره اصلا جداً معجب بطريقه تربيتج وحرصج عليهم لو امهم متحرص هلكد عليهم

سكتت وكمت فتحت القفل صحت اساور طلعت وطلعت وراها ازل عطت بيها وكفت وتباوعلي مزنبره كتلها

- انتظري هنا هسه تجي بقيت مخنزره عليها طلعت اساور لابوها وجريتها من اذنها
- اخررر مره تطلبين هالشي من عده فاهمه
- عمه اني شعليه هو راد يجيب

- عليه ازول عللليه
- والله عمه شبيج
وطبت جوه وزعلت تبجي
- ماريد ماريد كلشي ماريد
- اشش سكتي تروح تسمع
- خل تذبه بالزبل ماريد بعد اي شي

تركتها ورسل طلعت بقت صافنه كالت
- ارتاحيتي هسه شكد معقده تره انتي بيج شي موطبيعي
- انجببببي فوتي نامي يللاااا

عافتني وفاتت تبتسم بسخريه حسيتني باني فعلاً معقده

هل اني فعلا معقده؟!
هل مشدده بتربيتهم وحرصي؟!
طبت اساور وبيدها جيس جبير تحاول تضمه وره ضهرها تركتها شوي وطلعت عسل

كالت
- عمه عادي اكل وياهم لو تزاعليني
ابتسمت لبرائتها
- روحي اكلي عمه
طبت تركض للغرفه
تركتهم وحدهم
حسيت روحي العجوز الشمطاء القاسيه تركتهم براحتهم وكعدت وي روحي
شون راح اربيهم تعبت من هسه

يمكن مضيقه عليهم هواي يمكن اني غلط اسمع ضحكهم وحتى رسل هم صارت تتوالف من تجي اساور يمهم يضلون يضحكون ويسولفون
نص الليل مكدرت انام كمت تسحبت للغرفه اتسمع عليهم جانوا نايمين مديت راسي اغطيهم خاف وحده مكشفه
انتبهت رسل تحركت وتلفلفت زين
حتى راسها
حركه جنت اسويها من احاجي رافد وامي كاعده
خفت شكوكي تعبتني
منين تجيب موبايل بس واتذكرت مبايل اساور
بقيت ادور عليه ماكو

تالي تكشفت كالت
- عمه على شنو تدورين
- ها لا ماكو شي

رجعت تغطت ونامت
طلعت ودكيت عليه من موبايلي والكاه مشغول
رجعت طبيت للغرفه كشفتها خزرتني نترت

- جيبي التلفون
- كالت ياتلفون بس بصياح

رجعت دكيت عليه دك بونه جوه جربايتها
نصيت واخذته صحت
- شعده جوه الجربايه هااااه

جرت عينها ونامت بكل صلافه
تخبلت نترت بيها
- رسل هالاسبوع ماكو اسبوعيه ولا اسبوع الوراه

مردت
عفتها وطلعت اخذت الفون ويايه
طبيت لشتي ترجف
يا الله المن تحاجي
صف ثالث متوسط طفله
طبيت للسجل مكتوب
بابا اخر مكالمه
ادري مسحتها شبسرعه
لزمت راسي بتعب بقيت اكلب اريد فد دليل ماكو
دك تلفون اساور
باوعت رأساً شفته ابوها
غمضت عيني شكو داك هالوكت
رديت ساكته

نتر
- الو الووو
- الو العفو ابو اساور هذا مووكت تلفون تره
- منو انتي
- اني عمه ازل
- انتو دكيتو عليه هسه
صفنت
- منو دك
- ست الهام تلفوني دك ورديت توني صوت بنيه ناعم كالت اني احبك ويوميه اتخيلك زوجي

صفنت جمد الدم بعروكي
كال
- موصوتج و راساً سدته اني عبالي اسو خابرت

معرفت شرد بقيت ساكته
- ست الهام .. الو الو
- الو
سكت و كأنما تفهم
واني اعصابي ترجف طفله شون تعرف هالحجي

بقه ساكت شوي كال
- هونيها وتهون مراهقه متعرف تتصرف
- شسوي ماعرف
كلتها صوتي يرجف من الصدمه

جاوب بحسره
- الله يساعدج ويگويج صعبه بيانها
استغفر الله .. ست الهام ليش متزوجتي والله اقلها خوف من زوجج يصير عدهم مثل ابوهم

- واططب رجل غريب عليهم مشكور استاذ ابو اساور اترخص واعتذر

- لاعادي الله وياج

سديته منه حرت بدنيتي اني كوه عايشه وحايره بروحي النوب مراهقات ووكحه النوبه

ليش دارت بال ليش اهتمت كعدت الصبح بدلت وتحضرت للدوام واني امشي وراها احجي

- رسل ... ليش هيج تسوين موعيب عليج
وازل تباوعلي صافنه واخاف احجي كدامها
وهاي تجر بعينها معاجبها وبصوت عالي ترد
- احبه انتي متعرفين الحب احبه والا اخلي يحبني ويتزوجني

- صفنت عليها لج بعدج صغيره

- اي وحلوه واخبل الا اخلي يموت عليه ويتوسل يتزوجني

ضربت على وجهي اريد اصحى هاي صدك تحجي شالت جنطتها وطلعت ازل صافنه عليه.

تقربت وطبت اساور للغرفه تضفر بشعرها صافنه علينا حست بازل تريد تحجي ويايه طلعت جدا حساسه

ازلل : عمه شبيها رسل عليمن تقصد
الهام : مالج دخل عمه روحي بدلي

ازل : عمه تقصد على ابو اسو مو
صفنت عليها
الهام : شمدريج لج تدرين ومكتيلي

نصت راسها مبرطمه
- عمه ذاك اليوم نطت رساله. لاساور كلتلها طيها لابوج لتفتحيها واساور اخذتها ودتها.

عضيت اصبعي بغضب
- غير تحجين هاي شوكت
- ذيج المره من باتت
- يا اللله شون وياها شوون

راحوا البنات مدارس وصلت عسل ورحت لدوامي اشتغل وبالي طايش. حيل

تالي ما احس الا واحد دك عالميز مثل طرق الباب ٣ طرقات فزيت
- نعم تفضل نترت

ابتسم يتأمل ملامحي كال برزانه
- العفو... نيال الي شغل هالبال

- تفضل رايد شي

- والله معامله وبقه توقيع معاون مدير عام

- طيني... تحققت من الاوراق صفنت بيها نقص

بيها نقص بعدورقه — وورقه. و— وورقه و—
- متمشي بورقه وحده
ومد ورقه ١٠٠ دولار
صفنت عليها وباوعتله
- انت تدري احنا بأي وزاره خضرتك

- وزاره الدفاع غير
باوعتله يبتسم ورتبته. على كتفه. نسر
باوعتله معاجبني

- وتعرف رواتب الدفاع. شكد مو كونك. راجع لنفس الوزاره
- امم بالضبط اعرف
- لعد ليش تصغر نفسك ياعيني

- ههههه تسلملي عيونج المكحله.. كالها باستفزاز
وسكت مميل راسه. ضيق نظره يركز بملامحي

- محتاج شي بعد

كال
- بس مكملت
- مومشكلتي كتلك النقص وين
- زين خليني ادخل عالمعاون مدير عام
- لا ممنوع الا معامله كامله مو فارغلك

ضحك باستفزاز وسكت يعاين لعصبيتي.
- هسه انتي ليش هالكد عصبيه
- تفضل اطلع بره عدي مراجعين ورجاءاً المعاملات تكمل من هذا الشباك ممنوع احد يفوت اياً كانت رتبته

صفن عليه رفع حواجبه مستغرب ابتسم طلع التلفون من جيبه ويعاينلي بصلافه.

واني عين بعين ويا تكتفت اباوعله وحجه.

- الو.. عزيز تكوم تفتح الباب وتكمل اوراقي لو افلش الوزاره على راسك وسده
باوعلي وتكتف نفس تكتيفتي كان بطولي ويعاينلي من فوك ليجوه مبتسم.

وانفتحت باب المكتب مال معاون مدير عام

صاح

- ميثم
والتفت رافع تك حاحب
- تعال فوت

باوعلي وباوعله هز راسه مشه خطوتين ورجع التفت عليه كال
- فنجان گهوه من اديج بس موتسوي مر

نترت
- اني مو گهوجييه
طب وسد الباب يضحك.. شوي وانفتح المايك

- الهام جيبي الختم والبصمه

كمت على اعصابي طبيت اول مطبيت كال
- وين گهوتي لعد

مباوعتله حتى
اخذ المعاون البصمه مني والختم ومشاها المعامله واني منطقت ولا باوعتله

كال
- ومشت المعامله بيج او بدونج بنقص او بدون نقص ها ست الهام شنو رأيج

مرديت عليه
المعاون نطاني الختم وكال
كولي لابو حسين گهوتين مضبوط
هزيت راسي موافقه وطلعت

وكانه جنت ناقصته
كملت شغلي طلع ومعاملته بيده يبتسم اشرلي مستفز يسلم وراح

وكمل اليوم بتعب
اسبوع اسو مجتي ورسل تطب وتطلع مزنبره ماعرف شبيها احجي وياها مترد
تكمل شغل بعصبيه وتطب كمت اخاف منها

وبيوم جنت نايمه وجتي ازل كعدتني.
فزيت
- ها ازل
همست تشاور بخوف
- عمه تلفونج اخذته رسل دتخابر بي

كمزت رحت للغرفه ماهيه وينها اشرتلي ازل مادري باوعت لعسل اشرت فوك
الغرف الفوك فارغه بس فرش مخليه بغرفه والثانيه. بيها. الزوالي
صعدت على كيفي وسمعتها تبجي وتحجي بحركان دم

- متحس بيه اني احبك. اموت عليك بس اتحلم بيك. مااعجبك ... اني موبنتك ... اني داتحلم بيك البس وانزع واتخيلك كدامي

حجت حجي استحي اكوله طبيت للغرفه واخذت التلفون سديته وضربتها وهي كامت تصيح
- معليج ... معليج مني واني اضرب
مالج دخل معنسه تغارين مننني انتي الخليتي يكول هيج مووو

- لاا مو اني بس هو اكيد لعبت روحه لان طفله وساقطه تكبرين شتسوين

صيحت
- تغارين لان اصغر منج واحلى منج وكلهم يباوعون عليه وانتي محروكه ام اذن المحروكه حتى خطيبج عافج

ضربتها ملختها ومسكتت تعبت وعفتها ونزلت التلفون اخر رقم ابو اساور
دز رساله

- عذريني سببتلج مششكله

- ماصار شي اني الاعتذر على اتصالها السخيف

- ميخالف مراهقه. متعرف تتصرف
مرديت لزمت راسي تعبانه حيل تعبت

ثاني يوم راحت رسل للدوام والبنات هم

داومت وهم اجه ميثم فات من يمي وكبل فات للغرفه يباوعلي بإستفزاز.. شو دروح مناقصتك اني..
شوي وطلع وي المعاون
وكف يم ميزي كال
- اي شي تحتاجي هذا رقمي نظرته كانت غير شي بالنسبه لقبل كم يوم وقبل شوي

جاوبت بأدب نفس نبرته
- ممحتاجه تسلم
هز راسه موافق وطلع
بقه رقمه عالميز
شلته خليته بالجنطه كلشي يصير

انتهى الدوام ورجعت للبيت
بنفس اليوم جتي اسو باتت عدنا جانت متجنبه رسل كلش ورسل تحاجيها وهي مترد عليها

لليل نامو واني اعصابي تعبت همزين مجايبه التلفون اساور
واني تلفوني خليت اله رمز
ثاني يوم كان جمعه
للضهر راحت اسو ساعه اقل وخابرتني

- الو عمه
- ها عمه شبيج
- عمه كلادتي ضاعت بلكن تلكوها عدكم
رأساً شكيت برسل لان نفسها دنت عليها

- انتي وين نزعتيها
- منزعتها عمه بركبتي جانت وضاعت
- ميخالف هسه نشوفها بلكن واكعه
- اوك باي

سدته واني محجيت شي ثاني يوم كان سبت وهم مجبت سيره ورسل معتكفه حيل ضوجتني
المصرف انقطع عنها ومهتمت استمرت بالحرب

للاحد طلعو للدوام وطبيت فتشت كناتيرهم تفتش ولكيت الكلاده مقطعه قطع قطع
هيج كم الحقد والخبث عدها
اخذتها وضميتها ورجعت كلشي بمكانه

داارجع والمح تلفون وردي جمدت فتحته
والله تلفون وبي ارقام
محمد
نصير
علي
ابو اساور
و رسايل
( حبيبتي طلعتي شو ماكو)

وغير واحد كاتب
( اليوم انتظرتج بالحله مشفتج)

اخر رساله كانت
( وصلتلج الفلوس والموبايل لو لا)

كمت الطم
نهاية سنه
ابطلها
احبسها بالبيت
وين اولي
حتخزيني هاي

اخذت التلفون وطلعت لدوامي لابيه احجي وافضح روحي ولابيه اسكت نار تاكل بيه
مكمله شغل ولازمه راسي افكر شسوي
وهم نفس الطرقات هالمره بهدوء
رفعت راسي بتعب

كان ميثم.... ابتسم و كأنما ماكو اي مشكله بالدنيا كلها

- شلونج الهام
هزيت راسي ونصيت
- اكو شي مضوجج
هزيت راسي بالرفض وعيوني بالكع
- تحبين تسولفين جر الكرسي وكعد جر نفس و ورث جكاره باوع للشبابيك مدام ماكو مراجعين

باوعتله كان لابس قميص ابيض وبنطرون بيج قماش
شنو هالجراءه العده ومنو سمحله يتدخل البيه كان شوغه روح مابيه حيل احد ولابيه حيل عصبيه

كال
- احجيلي يمكن اساعدج
جاوبته
- ممكن تتفضل لشغلك اني ممحتاجتك

توه ديورث صفن وكعت الجكاره من بين شفته يمكن كان صوتي تعبان كلش

كال
- بيج شي الهام البنات بيهم شي ليش هلكد حزينه
صفنت عكدت حاحبي مغضبه
- يا بنات وانت وين تعرف البنات
- اعرف عنج كلشي الهام كالها برزانه وثقه وكمل كلام
احجيلي لتخافين

- منو الدزك عليه متكولي
جاوب متنهد
- اعرف اخوج اني معرفه بعيده بس اعرفه وصراحه عجبتيني سألت عنج كلولي اخته وبناته هي دتربيهم

- انت مالك اي حق تتدخل كلتها بتعب وغضب عفته وتركته مترخصه بأدب ونزلت جوه بالكافتريا

شوي ووصلت رساله
( عالعموم اي شي تحتاجي رقمي عدج وعدم احترامج الي وتركج اليه بمكتبج يجي يوم نتحاسب عليه واني كتلج
خشيتي مخي عجبتيني بعد اقري السلام على روحج لو انتي بيها لو طالع بيها)

شمرت الفون ولزمت راسي ثكل صار عليه وضغط موكده اني.. اني شابه اريد اعيش حياتي

صديقتي ويايه بالعمل هم كدي بالعمر ونفس الراتب كل سنه تسجل كروبات وتسافر
مخلت ماليزيا
ايران
تركيا
اذربيجان

بس اني محصوره بهمهم والنوب معاجبهم شنو ذنبي اني فكرت ادزهم بيت جدهم وانطيهم راتب اخلللص اخللص اخلص اريد ارتاح من همهم
الفكره تمحورت براسي

رجعت للبيت واني اكبر واصغر الفكره براسي اندار لروحي اسافر اطب واطلع واتونس اعيش حياتي

للليل

طلعت رسل من الغرفه كالت بنتره
- تلفوني وين

باوعتلها رافعه تك حاجب مقويه روحي
ودرت وجهي

صيحت
- تلفوني مالج حق

نترت بيها
- حراميه ... كون ابوج عايش كون امج تشوفج

صفنت عليه
- اني مبايكه صديقتي طتنيا

وكفت وتقربت منها
- وكلاده اساوره هم هي طتجياها

صفنت عليه جرت عينها دتروح وجريت شعرها

صيحت
- دوام ماكو بعددد فااهمه

صيحت
- معلليج مني مو امي انتي معليج

- ماشي ... باجر ادزج بيت جدج واخلص

صفنت عليه ممصدكتني و طبت للغرفه
ازل وعسل صافنين عليه
عسل تقربت مدمعه

- عمه ماريد اروح
- اي ميخالف

وازل هم كالتها
- اني ابقى مااحجي ومااضوجج
هزيت راسي متحلفه لرسل

للصبح داومنا دتطلع رسل رجعتها وقفلت الباب وطلعنا اني وازل وعسل
ضلت تدك الباب وتصيح وتعيط ومهدأت

مكدرت اداوم خابرت اخذت زمنيه ساعتين ودزيت على خالها وببيتها
طبيت للبيت وهي هجمت ضربتني وشرمخت وجهي دفعتها اقوى منها شوي وطب خالها تفاجأت وخنست

وبديت احجي

- اني مداسيطر عليها خلوها يمكم وراتب يوصلها
خالها كال
- ليش وخواتها
- خواتها مسيطره بس رسل طلعت من طوري وماعتقد تقبل بالفضيحه واني مره مااكدر

- كال شمسويه خالوو وببيتها تنتر شمسويه ام لسان

باوعتلي تتوسل واني مرحمتها طلعت الفون كدامه وحجيت عن كلشي هز راسه متحلف كلها
- كومي انتي مومال دوام بعد
ولاول مره بجت وتتوسل ماسويها بعد الظاهر تخاف منه وشايفه منه قساوه
والظاهر عرف شون يخليها تهابه
اخذها جبر ولمت هدومها وتعاينلي تتوسل وتبجي

كسرت كلبي ترددت حاجيته
- عوفها متسويها بعد نتر بيه
- رجااءا بنت اختي اذا غلطت اني اربيها لتتدخلين لهنا وعاشت ايديج والباقي عليه

سكتت واباوعلها انتهت
طلعت من البيت ورحت لدوامي ثانيه مطلعت من راسي بس افكر بيها انسطرت

كملت دوام ورجعت البنات رجعو البيت هاديء حيل ومزعج من الهدوء وبالي مشغول بيها
انصلت بببيتها اسأل عنها كالت زينه دتقره حتى تمتحن

ارتاحيت شوي
وبدت امتحاناتهم تدريسهم صعب ومتعب كملنا اخر يوم رجعت لكيت ازل بالبيت لان ترجع من وكت واسو يمها هالفتره كلها

ميثم يرسل رسايل

( شونج ...
بعدج معصبه ...
خوماضايجه بعدج ...
مديصير مجال امر اشوفج...
اذا تحتاجين شي اتصلي...

ومجنت ارد احسه هواي واثق من روحه

باخر يوم امتحان داسوي غده وازل تحجي عن الاساله وزاري وصعبه بس كانت جدا موفقه

دك تلفوني
بيبيتهم رديت

- الو هله حجيه

- ههله يمه اكولج رسل جتكم
احس السما وكعت على راسي

- شنوو ليش شنو وينها
- وداها خالها تمتحن و ورجع يجيبها يكول ماهي المدرسه فرغت
ضربت على وجهي
- البنيه وين حجيه اروحلج فدوه

- يعني مجتي فدوه شون عدج ارقام صديقاتها
- لا منيلي احجي وارجف لهاتي من الخوف
يبست ورحت للمدرسه لكيت خالها يحجي وي المديره فاير دمه

باوعلي كال
- صديقاتها منو فهميني تره حتخبل

بلعت لساني تخشب جسمي وافكار سوده براسي خاف تروح عد احد خاف يعتدون عليها اخاف يقشمروها

على هالحال لليل ... لليل احنا نفتر من بيت بنيه لبيت مخازي مخلينا صديقه مسألنه عليها عدها

جانت الوجوه تسأل من نسأل وينكم عن بتكم واموت بدمي وين كان تقصيري
دكت الوحده بليل والبنيه ماكو

خالها وببيتها ومرت خالها واني ببيتنا ازل وعسل وعمي وجهاله ومرته

انثبرنا
مخلينا مركز شرطه مستشفى ولازم اربع وعشرين ساعه على غيابها

واني تعبت من الخوف والبجي واكل بروحي واحس روح اخويه تكولي وين عفتيها

وتذكرته
( اي شي تحتاجين اتصلي)

طبيت للغرفه ركض
اتصلت اول رنه رد رأساً و كأنما منتظر

- الوو
- االو سلام عليكم اسفه خاف كعدتك

- لالالا كاعد امري الهام

- ااستاذ ميثم .. وسكتت اني شراح اكوله

كال
- احجي البنات بيهم شي

بجيت ميته فشله
كال بهمس
- احجي لتخافين

- ااستاذ فدوه بنت اخويه الصبح طلعت للامتحان ولحد الان ماكو منها خبر

كال رأساً
- جايج لتخافين
- تندل بيتي
- اعرف كلشي عنج بس حضريلي صورتها
- اوك
سديته منه ودورت صورتها اخر شي طكتها مال بطاقه بكلوريا واباوعلها وابجي

اقل النص ساعه وصل
لابس لبس عسكري
حجه وي الخال وطلعت باوعلي وهداني بنظرته

همس
- قبل وذان الفجر بنت اخوج بفراشها لتخافين

تطمنت ماعرف ليش من حجاها بثقه مدري غركان وجلب بقشة امل

.
.
.
.

يتبع
مريم السعدي