رواية اماً لهن الفصل الثاني 2 - بقلم مريم السعدي

#أماً_لهن
#بارت ١

#مريم_السعدي

- للومه.... للومه.... يوووم
- ها يممممه هاااا
- تعاي اكلج
- جيت استغفر الله .. جيت

صوت النزله العصبيه الترج الدرج ومحجره
- ها يمه شبيج اربع مرات نزلتيني مو دا انطمر باجر عدي دوام

- تعاي خابري اخوج شوفي رجع لو بعده

- اهووو... هسه شعليج الرجال ان رجع وان مارجع
- لج يمه ضل بالي گلبي يصعد وينزل صرت لبكات خابري وخلصي مني

- اللهم طولج ياااروح... جيبي

اخذت الفون من اديها الترجف اثر التقدم بالسن وخابرت عمران
يدككك ومحد يرد
يدككك ومحد يرد
خلصت الدكه وماكو رد

ام عمران : هاااا
للومه : ماكو يمه ميرد تلكي نايم

- دخابري بيبية البنات بلكن رجع ونايم

للومه : صار يمه....
خابرتها للحجية و ردت

- بلي...
- ها حجيه شونج
- هله منو وياي؟

- اهوو حجيه اني للومه
- ها اي عرفتج شونج شونها الوالدة
- زينه الحمد لله
- اكولج ابو رسل اجه؟
- لا والله بطه على بناته ضليت اتاني ارد اقفل الباب وانام

للومه : ها زين دروحي
الحجية : اكولج للومه دتداومين
- اي حجيه دا داوم ليش
- اكولج بلكن تشوفينا وضيفه شي لمحمد كاعد عطال بطال
- حجيه شكالولج رئاسة وزراء هو اني خلگ موظفه
- ليش لعد محمد يكول راتبها ثكيل... اكولج شكد تستلمين
- يااااا عزه حجيه تصبحين على خير امي تصيح
- يا روحي روحي وسلمينا عليها
- يوصل

سديته منها متذمره طبيت لامي وصاحت فززتني
- هااااا ... اجججه رجععع
- لا يوم بعده
- يايمممه الولد گلبي اكلني علي بس لا كتلو سلبو
- يبووو يوم انتي كلما يسافر تعرسين عليه كله من وره صغيرة الكوم هاي عسل متسكت شكو تكولج سافر ابويه تتشكالج
- لج يمه اخوج وين صار اني وين وهاي وين

ضلت تلوب تريد تگوم وتوجي بعكازها ومن رجفتها عرفتها مراح تدبرها ساعدتها واصيح

الهام : هسه وين تردين دكعدي اركدي
ام عمران : داروح اشوف وين صار اروح لبيت نذير يخابرلي احد ماحوود يمه كلبي نار
الهام : يااا يمه دنيا ليل ساعه ١١
ام عمران : اي هو يضل وي جماعته لل١ اسمع هوستهم بالحديقه
الهام : اوي كيفج

توها تطلع ودك تلفون الارضي
ركضت عليه شفت الكاشف بيت اخويه عمران
رديت واجاني صوته

عمران : ها للومه
الهام : ها عمران ... يوم يوم هاي وصل
عمران : هسه امي منو كلها اني سافرت هنه يومين كملت شغل ورجعت
الهام : بتك المضروبه
عمران : عسل موو اوووف هاي لو تطلع محلل سياسي لو سايق تكسي لو حلاقه متقبل غلط
الهام : خبلتني قناه المعارضه
عمران : ههههههه والله لايگلها اللقب كلشي مترضه ديله وين امي
- هاكياها

ام عمران : ها يمه وصلت ... لا ههه شوي ضل بالي ... لا يمه قابل شعدي..... اي شوي ديله روح ارتاح الله وياك يمه

سدته واندارت عليه
- وانتي شكو تكليله على عسوله

الهام : يمه انتي شفتي وجهج شون انكلب بعد شوي تلمين العالم علينا
ام عمران : عود من يصير عدج ضنه ذاك الوكت اشوفج.. يمه ياقساوه گلبج لج انتي عليمن طالعه هاي من توظفتي بالدفاع هيج صرتي

الهام : ياااا هسه اني شايفه جندي شايفه ضابط شو بس اداريه ومكتب حتسوين نجمه ونسر وسيف اوي تصبحين على خير اروح انام ورايه دوام عود بلعي حبوبج لاتنسين

ام عمران : مو انتظرج انتي تنطينياها ام گلب القاسي بلعت بلعت امشي فوتي من وجهي ولي يله غدي غدي

الهام... عفتها وطبيت

هاي اني
للومه دلع الهام
عمري ٢٣ سنه
موظفه بوزارة الدفاع
توني تخرجت و وظفني اخويه بواسطه صديقة

شكلي جدا عادي مو كلش بيضه ولاسمره طولي اعتيادي ورشيقه شعري اهم اهتماماتي بي لان يضم اثر حرگ بإذني شكلة بشع

من جنت صغيره احترگت وكعت اللاله من البوفيه على إذني جنت نايمه جوه البوفيه ولحكلي ابويه بس اذني تعقجت انطعجت للداخل نوعاً ما ولونها تغير جنت اغطيها بشعري

حجابي مو مضبوط يمكن مستخدمته اكثر شي اغطي بي اذني
كل البنات تتزين بترجيه بإذنها الا اني اغطيها بشعري

بعد وفاة والدي بقينا اني وأمي وحدنا اخويه متزوج و عده ٣ بنات واخويه الثاني توفى قبل سبع سنين

للاسف مرت عمران توفت العام الفات بمرض
خطيه عمران تأذه هواي عليها وكل محاولات الحجيه تزوجه بائت بالفشل و خجلنا وي هواي عالم توبنا نخطبله

وهو مرتاح هيج
عده بناته بالترتيب
رسل ، ازل ، عسل

- رسل... رافعه راية (كلشي مالتي)

- ازل ... (بابا خاف يزاعلني وميحبني بعد)
تعلقها بابوها شي فوق المعقول بالذات بعد وفاه امها

اما عسل ... فهاي دلوعة الحجيه وقناه المعارضه
كلشي متقبل كله لا.. وميمشي غير رأيها من هي بنت السنتين

أخويه عمله توصيل العالم سفريات لسوريا ويرجع هاي خميس وجمعه وسبت لان ايام عطلته من الوظيفه

واحنا بكل سفره الحجيه مسويتلنا عرس حدما يرجع عمران
اخويه موظف من ١٨ سنه
حياتنا جداً عاديه واني جداً بسيطه مثل اهلي.. الويايه بالدوام لبسهم وترتيبهم وكشختهم واني اخر همي هالشي بس عدي المهم الذهب اجمع واشتري ذهب

اخويه كاعد بإيجار اكثر من مره كلتله امي بعد وفاه مرته تعال هنا اكعد وميقبل بيبية البنات ام المرحومه امهم وياهم عايشه بيت اخويه والبنات مرتاحات ببيتهم لان هنا شوي امي نحسه بالغرض والترتيب واني هم ماحب هوسه

بعمر ال٢٢ انخطبت لواحد من عشيرتنا جنت مكيفه حتزوج رغم تدخلات امه وخواته بس مغلسه عنهم وببالي اصير اله واعرف اسيطر عليه

حبيته.. هواي حبيته تجي نوبات يحتاج فلوس وانطي من راتبي بيناتنا بس يرجعها بعد فتره فهمته البيننا يبقى بيننا واني ويا واحد
جنت اكبر بعينه والاحظ هالشي بعيونه واني يكبر حبي اله

فتح مشروع عن طريقي داينته مبلغ جبير وفتح بي مشروع والارباح اول ٣ شهور كلها الي حدما سدد المبلغ بقه شي قليل

وصار الي ماكان بالبال
مو كل مره تسلم الجره
واخويه طلع ومرجع لاهو.. لا سيارته..

اختفى
فص ملح وذاب
والناس كلمن يحجي شكل
امي انشلت بعده من القهر
وبناته لاهمه اليتيمات ولا همه الراجع ابوهم

البيبي ام امهم شكت من مصرفهم بعد مرور مدة كالت تره حسره عليه اللكمه وابني مديلحك
وحقهم
ورحت اخذتهم جانو متيتمين٣ مرات
مره امهم
مره ابوهم
مره ببيتهم المتعلقين بيها

رجعتهم بيت ابويه واحس مسؤوليتي كبرت
امي المشلوله
وبنات ٣ وحده توها متوسطه والثانيه خامس ابتدائي والثالثه ٤ سنوات

حرت بأمري وملكيت غير رافد خطيبي جنت متأكده مراح يخذلني متاكده مراح يعوفني
ومأمنه حيل مأمنه بي
بس الصار عكس توقعاتي
بعد ٣ شهور من اختفاء اخويه حجيت وي رافد خطيبي

الهام : حبيبي اني ضايعه بين بناته وامي
رافد : ادري گلبي ادري ميخالف خلي يرحون يم ببيتهم
الهام : گلبي شون اعوفهم همه بيت جدهم كوه اللگمه الهم انوبه ٣ بنات

رافد : لعد شون
الهلم : اسمع مني رافد اني من اول كتلك اني وياك واحد صح؟!
رافد : صح وتدللين
الهام : حبيبي اكول لو نعجل بزواجنا ويصير شي بسيط بيننا حتى تكعد ويايه بيت ابويه هم عيني على امي وبنات اخويه وهم اني وياك منفترق والوضع مامستقر منعرف شيصير.. ها شتكول

صفن شوي وكال
رافد : اعوف امي وخواتي شون ترضيها للومه
الهام : حبيبي اخوك الصغير موجود الله يحفظه وهم انت تمرلهم يوميه

سكت وراها كال
- هذا هو يجرالج
ساعتها الدنيا ماوسعتني لان تأكدت من قراري صح وبديت احضر واهيء نفسي

رافد كان ساكت ودوم حاير حتى من يجي عدنا يحضنني اقصى حد ميكدر يسوي غير شي بيت مليان جهال

ومجنت اگدر اطلع واترك امي والبنات يله يله و وضيفتي

وبيوم من الايام گالي من جننا نحجي بالتلفون الارضي

رافد : حبيبتي امي وخواتي اذا حاجوج شي لتجاوبين ابد
الهام : اوك.. بس ليش شنو الصار!!
رافد : ماكو شي ماريد تطلع منج العيبه
الهام : ماشي بس ردت اكولك شي بعد اسبوع زواجنا
رافد : امم
الهام : وعدي شي ضامته عنك
رافد : وهو؟!

الهام : اذني بيها حرگ وشوي شكلها مو كلش
صفن ساكت وحجه
رافد : يعني شون صايره
الهام : معقوجعه وداخله شكلها مو حلو

بقه ساكت وغير موضوع واني ارتاحيت لان حجيت وخلصت
وره يومين اجاني بس حتى يشوفها وبصعوبه شوفتها اله لليوم ماانسى نظرته عگد حاجبه مثل الشاغت روحه ودار وجهه وغطاها بالشعر
خجلت حيل فشلت وبعدها قبل يومين من الحنه
كان ديجيب غرفه النوم لبيت اهلي ودا انتظر العمال يجيبوها

كاعده و ازل كبالي و وكفت سيارة الحمل من وكفت دا افتح الباب شفت الغرفه اللي اشتريناها سوه مكسره مفلشه المرايه مكسره الميز هم لدرجه طالع الخشب

رجفت غضب وصحت بصاحب السيارة الحمل توقعت صاير حادث

الهام : هاي شنووو.. شمسووين

كال
- شنو احنا هيج حملناها ام البيت كالت هاي الغرفه وجبناها عالعنوان النطانيا ابنهم لهنا

صفنت خلوها بالطرمه ونطيت الكروه وراحو نار نار تغلي بيه كمت متحملت
مشكلتي موظفه وبالدفاع
ومتعلمه من الموظفات مااسكت عن حقي

وكمت خابرت امه كلت احاجيها بهدوء
ردت تضحك
ام رافد : ها للومه عجبتج الغرفه هههه عطرناها وزيناها ودزيناها تردين تاخذين رافد يمج كعيدي موو

وواني انفتحت واصيح واعيط وطلعت وصخ گلبي كله وهي تگولي
- وشدعواج مغثوثه فلوس ابني يجيبلج اغاتها احنا احترك دمنا اني وخواته لان اخذتي ابننا من عدنا

وتخبلت كتلها هاي فلوسي اني التعبت بيها وتشاركنا وسويناها ياحقراء عدج بنات باجر الله يطلعها بيييج

وهي تضحك واني ازيد
تالي تغيرت موجتها وكامت تبجي وتصيح تكولي حرام عليج تاخذين ابني الربيته

واني مستمره اصيح
مااسمع الا عيطه رافد سحب التلفون منها
الهااااام

خنست و ضليت اراجع شحجيت شكلت عرفت تلعب عليه الحقيره
رافد : لج اني شكتلج
الهام : انت دتسمع امك دتشوف خواتك شديسووون

رافد : واني موكتلج ليطلع منج العيب لج شنو هالغلط والحجيييي

سكتت وراها رديت
- اليدك الباب يلكه الجواب شتريد اسكت وامك حايره شمسويه بيه

كال بصياح
- حقها
صفنت عليه
- حقها مو دروح رافد روح

سديته بوجهه صرت نار طبيعتي قويه ماابجي بس والله كدروا يمسون گلبي
حبيته هواي و جنت احسه ذخر
ولغينه العرس
عفته فتره كلت يبرد ويخابرني

والتهيت اسبوع والغرفه بالطرمه مشموره واطب واطلع اغلي
تالي بيوم من الايام داروح للوظيفه الصبح شفت جنطه جهازه مشموره بالطرمه كلها تخبلت عرفت سوالف امه هاي

رجعت من الدوام وخابرتهم طلعتلي امه وتعد وتصف بقيت ساكته ردته هو ردت احاجي

تالي ختمتها كالت
- حيفسخ الخطوبه راح لعمج وكله.. وعمج كله معليه بيناتكم عود هم عدج عم انتي

سديته بوجهه واني هم بردة فعل اخذت جهاز الجابو بعصبيه وذبيته بطرمتهم ورجعت للبيت

للمغرب اجه من الباب شمر عليه حلقتي ويصيح كال
متدكين على امي بعد ومتوصلين ولاتسوين فضيحه انتي الظاهر مو ثوبي والظاهر حجي امي صح انتي من طريق واني من طريق

بقيت ساكته صافنه عليه
وصعد السياره وطلع بعصبيه يومين واجه قرار المحكمه بتبليغ واني مرحت
مره لخ اجه
وهم مرحت مكدرت اخلي عيني بعينه واكول راح يرجع يحبني ميكدر
ووصلت ورقه طلاقي للباب

اقره والدمعه ترجف بعيني كلشي انتهى سنتين تعب وحلم وتخطيط ضيعتها اني ويا

انهاريت بس محد حس عليه
عمي.. مكيفين عدنا عم لادك بابنا ولا سأل

بعدها ركضت بتقاعد عمران وطلع
وبقيت مكسورة گلب بس ضامه كسرتي بعصبيتي
البنات وكحات

- الجبيره لسان وعدها خباثه خبلتني تاذي خواتها اذا نظفوا توصخ وراهم واكول ممنظفين زين

- الوسط تتزعل اقل شي وساعات تكضيها تخابر صديقتها عالارضي

وصار السقوط كعدت بالبيت شهور والضرب والهوسه و مستقبل غير معلوم من غير التسليب والحواسم الي صارت

فلوس الجوه اديه قربت تخلص وببالي اطلب رافد مبلغ مالي مسدده بس لولموت مااتصل وانزل راسي
بس كلت لعمي كلت يخابره يگوله

وفعلا يومين واندكت بابنا
طلعت افتحها
واشوفه كبالي
ارقى سياره ولبس بوكت العالم صارت مسفطه وماعده بله شغل

باوعلي بعيونه كومه حجي
واني بس ساكته واعاينله نزل وطلع فلوس من جيبه ضرف بهدوء وعيونه متبسمره عليه بنص عيني

محجه ولاكال كلمه
مد الضرف تجاهي واني صافنه بعينه

كال
- اسف اذا اخرتهن جنت بغير محافظه
هزيت راسي ساكته ونصيت عيني على ايده اخذ الضرف وانتبه حلقه فضه لابس
صفنت فكيت عيوني
باوعتله رأساً

- تزوجت رافدد ؟!!
كلتها بشهگه بقه صافن بوجهي وعيونه لمعت حرك شفافه توه يحجي ومسحمت لنفسي يشوف ضعفي كدامه سديت الباب وطبيت شي شي بيه ينهار حدما وصلت لغرفتي
بجيت بقهر وادك على صدري وصوت البنات بره يتعاركون

رسل و ازل يتمالخون و عسل تبجي

وثنينهن يصيحن مالتي مالتي.... لللومه
والصياح يدك براسي ... كمت اضرب بالحايط
صافنه على روحي
صرت ام الهم
تركت حياتي
حبيبي الاحبه هاي عيونه تحجي
وصارحت نفسي

لا للومه لا تكذبين على روحج أساساً هو بيد امه أساساً هو الي تركج وراح رأساً خطب وتزوج
عوفي وعيشي حياتج والف من يتمناج وذوله منو الهم؟!
الهم الله

طلعت صيحت
- بسسسسسس بسس شنو هالصياح ادبسزيااااتت
رسل : للومه اخذت مالتي النستله
ازل : والله كذابه اكلت مالتها وهاي مالتي اسألي عسوله.. عسوله اني اكلت نستلتي مو ضميناها اني وياج كلنا الصبح ناكلها بس رسل مقبلت اكلتها بليل

عسل : تهز براسها موافقه وعيونه تلمع بعينها تباوع لرسل بخوف

رسل مهتمت فتحت النستله واكلتها رركض ركض
وصيحت تضحك
- اكلتها ههههاي اكلتها اكلت اثنين على عنادج

وازل ماتت بجي وطبت لغرفه امي بخنيك تبجي
واني بس صافنه على رسل
لبست عباتي ورحت للسوك تسوكت ورجعت اشتريت لازل وعسل جان لازم اعاقبها لرسل

وفعلا كدامها نطيت لازل نستلتين ولعسل نستله
رسل صيحت .. واني

ابتسمت وباوعتلها بهدوء
- حصتج اكلتها ازل لانج البارحه اكلتي حصتها

كتلها هيج لو تخبلت
ولا كأنه صف اول متوسط تكول طفله

كامت تصيح وتبجي عسل حنينه جتي يمها تنطيها حصتها ضربتها واني تخبلت

وكانت اول مره امد ايدي عالبنات ضربت رسل على ايده وانصبغت ايدها

وجعني گلبي واني اعاينها شون انصبغت
يايمه هاي اني شسويت

بعين الصلفه باوعتلي وتخوصرت وتكول
- متعور
- متمدين ايدج على اختج بعد اكسرها
- هي اختي وانتي معليج قابل انتي امنا
- غصب عنج تسمعين كلام والا حتى مصرفج ينگطع
سكتت وجرت عينها وطبت للغرفه.

والدتي بعد اربع شهور توفت عمي تكفل بالفاتحه والدفنه والقرايه ومرت عمي وبناته ويانه

جان مكانها خالي رغم بعد وفاتها راح وجع ايدي وضلعي وكتفي الاشكي منه بسبب شيلها وحطها كم مره باليوم للحمام والاكل والتبديل والتغيير
بس حسيت بضعف فضيع وحدي و ويايه ٣ ايتام.

وزارتنا رجعت انفتحت بعد ما فلوسي خلصت كمت ابيع بالذهب لاجل المصرف اخر قطعه بقت بعتها والحمد لله رجعوا فتحوها

داومت وعفت البنات وحدهم بالبيت جنت اشتغل وراسي ميت حسبه وحسبه

اطفي السركد مال كهرباء خاف ينتلون والغاز افصله والباب اقفلها عليهم واطلع محضرتلهم اكل فاكهه ونساتل

لل٢ ارجع الكه رسل نايمه
وازل وعسل كاعدين يلعبون
كم مره لكيت عسل واكعه من الدرج كمت خليت سياج عالدرج حتى ميصعدون فوك بالذات هي

نوبات اجي الكاهم غادين دم رسل وازل متعاركات
وبنهايه المطاف رسل تنكتل
وأخيراً داوموا
خليت عسوله بحضانه
والبنات رسل متوسطه وازل مدرسه ابتدائي
شوي ارتاحيت رجعتنا سوه غدانا سوه
ودراستهم اللي يحتاجون شي اساعدهم

واني نسيت طعم الراحه بوكت الجنت اول ماارجع انام.. هسه كمت اول ما ارجع اصب نتغده الغده السويته قبل يوم وركض ركض اغسل عسل بينما رسل وازل ينظفون البيت
واني اغسل هدومهم وهدومي واطلع غاديه جنازه وادرسهم ولل٨ بليل نكمل دراسه كبل ننام تعابه ونكعد من ٥ الفجر وهيج كل يوم

الحمد لله تقاعد ابوهم رجعت استلمه بعد القطع بس مكلت الهم عنه رسل كانت تبحوش وكالت :

- بابا مو جان عده راتب ليش مينطوا هسه
- مكطوع لان توفى
- مو اني اريد هدوم وشغلات كومه وانتي بس تشترين لروحج
- شمشتريه لج اكوملج هسه

- اي دباعي حذاء اشتريتي
- اي غير حذائي انكطع صارلي خمس سنين اجربق بي

- اني اريد بوتين مثل صديقاتي
- ماشي من اطلع اتسوك اجيب
- واريد اقلام تلوين
- مو عندج
- مو زينات
- ماعدي غيرهن مترديهن انطيها لخواتج
- اذبها بالزبل وماانطيها الهن

- اي هاي مشكلتج ست رسل
عفتها ودرت وجهي صارت اعصاب لبستها

ازل بلغت قبل اختها معرفت شون اعلمها انسطرت سطر وهي تبجي
ولااني العدي حنيه اعرف اتعامل وياهم حبيبي وحياتي.. طببتها لغرفتي وحجيت وياها كلشي فهمتها وهي تهز راسها ودموعها تجري
اخذت الها احتياطات وتعلمت عليها بقه سر بيناتنا
محد يدري بي من خواتها
عدها صديقتها هم يتيمه ويوميه تحجي بيها
اساور واساور

كانت مدلله اساور متوفيه امها وهالوحده لابوها والظاهر الاب مرتاح مادياً
واساور شيشتري الها ابوها تكوله بعد لازل وهو ميقصر .. الا اني تخبلت
منعتها وبطلت تاخذ وكلتلها عمتي متقبل
نوبات اسمع رسل تحاجيها لازل تكوللها كولي لابو صديقتج ماعدنا فلوس ومن ينطيج نتقاسمها ونشتري شنريد بيها منكول للومه

تخبلت بيومها رسل ما منها جاره شكد حجيت وياها تنكر الكالته حجيت وي ازوله

الهام : ازل بابا توفى وهو يشتغل الكم شغلتين حتى ميخليكم تمدون ايدكم لغيركم وتباوعون على غيركم احنا ممحتاحين متطلبين اي شي منهم ولامن اي احد زين حبيبتي تره بابا بزعل عليج

بجت و كأنما ضامه دموعها بگلبها وتقدمت ناحيتي رادت مني اتقرب الها حضنتها وحضنتني قوي زادت ببجيها لحد ما هدأت

الهام : كافي ازوله سمعيني
ازل : همم
باعي لزمت وجهه الطفولي جنها تفاحه وعيونها متروسه دمع والخدود مبلله

- هاي صديقتج بعد لا كلش تقوين علاقتج بيها
- لاحبابه للومه مو اني احبها مثلي هاي ماعدها ام وبيبيتها تداريها
- لعد متاخذين شي ابد
- اوك
- واني بعد منا وجاي امشيلكم اسبوعيه تدبرون اموركم تجمعون من تردون تشترون شي منها

ابتسمت هزت راسها كالت
- من الراتب مالتج
- اي ازوله من راتبي
- شكراً
- عفواً يله روحي

فجاه دنتغده واندكت الباب كامت رسل تشوف منو
طبت وراها مريه گايده بنوته بكد ازل
ازل من شافتها صيحت

- اسوو
وذيج تصيح
- اندليته باعي موكتلج اندله هسه كلت لبيبي وجابتني باعي بيبي هاي ازوله صديقتي

وكفت غسلت ايدي وابتسم اهلا اهلا
المره وجهه يضحك وبعدها صغيره
طبت وتعاين عالبيت تبتسم وعالبنات
كالت

- متعرفيني ولااني اعرفج بس البنات صديقات
- لا هله بيكم حاجيتلي ازوله عن اسو

- والله اسو ماعدها غير حجت ازل كالت ازل واني اليوم جيتج بطلب
- تفضلي
- فدوه لتخليهم يفتركون
تحجي همس وتعاين عالبنات ازل كامت صاحت لاساور وكعدوا عالميز ياكلون والحلو بيها مخجلت رأساً اخذت وتحجي وتسولف مكيفه طايره وازل تخلي كدامها خضره وزلاطه ولبن وكلسا تحضنها
والبيبي تحجي

- والله متعلقين ببعضهم
- لا حجيه شكو منها
- والله ماعدها احد هناك بس اني وابوها يطلع يسافر ويرد يرجع

- اي ... كلتها دا انتظر اشوف شتريد
كالت
- فأني كلت لو تخليها تبات عدها كم يوم بالاسبوع والله يكيفون

رأساً رفضت وكتلها
- لالا متبات ابد
- فدوه والله تعاي لبيتنا وشوفي ماعدي احد
- لا حجيه عذريني اذا تردين خليها هي تبات عدنا وي البنات عادي

- هااا تقبلون يعني انتي ماعدج ولد هنا مو
- لا والله
- زين منو يدير باله عليكم
- عمي بعد فرعين عنا تلفون واحد يجيني
- ها الله يقويج تدرين كله اجر هذا

سكتت واعاينهم طايره ازل وعسل ورسل تباوع لهدوم اساور وگلادتها ومحبسها النازك

شوي وراحو كملت غدايه واتصفن
وازل تروح وتجي تعاينني
تالي جتي وكعدت وكالت :
ازل : للومه يعني عادي تصير اساور اختي؟!
رسل : اهو مو كافي الاربعه حيصيرون خمسه وهوسه منريد

الهام : اعتقد البيت بيتي ست رسل واني الأرد وعاينت لازوله
اي ازل ماشي خل تجي شوكت متريد بس مو يوميه خميس تجي والجمعه تروح زين
طارت فرح وتضحك وعسوله تعاين تضحك بس رسل بقت مبوزه

بيومها طبيت الها للغرفه جانت تقره باوعتلي كالت
دا اقره شنو تردين غسلت المواعين

الهام : رسل هاي اسبوعيتج من اليوم بعد كل جمعه انطيج اسبوعيه انتي وخواتج
ابتسمت
رسل : ومنين هاي مالتج من راتبج
الهام : اي من راتبي
رسل : شكد ينطوج راتب يعني هواي لو شويه
- ليش تسألين رسل
- هيج اريد اعرف
- معليج تكفي النا الحمد لله
- تكفي اشتري گلاده مثل مال اساور؟!

صفنت عليها تحجي بلهفه غير متوقعه جاوبتها
الگلاده تشتريها من العشره الانطيها الج بالاسبوع تجمعين وتشترين زين رسل

- حيل بعد كومه يله اكدر اجمع انتي اشتريلي واسبوعيتي الي
- ميصصرف هالحجي اسبوعيتج تجمعين منها تشترين هدومج وشتحتاجين معليه بعد

- وين تكفي هاج ماريدها شكد عصيه وفكريه حتى الها متشتري هدوم بس تضم بالفلوس

الهام... بقيت صافنه ذبت الفلوس بالكع وعفتها وطلعت من الغرفه مراهقه ابد مو مال ضرب

بهالفتره تقربت من وحده بالوظيفه اربعينية واسألها دوم عن المراهقات كونها عدها بنات وتعلمني
بس كل النصح مفاد وي رسل

يتبع
مريم السعدي