رواية امقت اعرافهم لكنها حيتني الفصل الحادي عشر 11 - بقلم نور الشمس

ألطريق كله عيني عليها مااخذت وياي احد غير افياء اختها لأن مااريد احد يعرف هيه مدمنه حته امي مااريد
السالفه تطلع وراح يأثر عليها وعلى سمعتنه اما افياء اكيد مراح تحچي
دخلنه العياده چنت حاجز من الليل من انطاني الطبيب الرقم حجزت بس اكدت اسمها ع السكرتير شويه ودخلنه وماقبل الا شخص واحد يدخل وياها
گلت الأفياء انه افوت وياها انتي ضلي هنا

دخلنه ع الطبيب وانطيناه الأوراق والتحاليل الي سويناها والتقرير
الطبيب وخر مناضره من عينه وعدل گعدته وحاچاها

..بابا بنيه مثلچ بعمر الورد شنو الي يخليها تنتحر وتنهي حياتها بهالطريقه منو يستاهل منج تضحيله بروحج وتخسرين دنياتچ واخرتچ

..من سمعت منه كلمة بابا نزلت دمعتي تذكرت حنية والدي جاوبته بصوت تعبان ومبحوح والله مااعرف اني بس ردت راسي يهدأ واخذت حبايتين مافادن اخذت الباقي بالعبه كلها مااعرف انو يصير بيه هيج واني مو ضعيفه حته انتحر ابد ممفكره بالأنتحار ردت اريح راسي وبس

..من شوكت تاخذين هذي الحبوب

..مصار هواي فتره قليله

..يعني شگد بالضبط تتذكرين

..أي اتذكر ..جنت احچي للطبيب وعيني على علي چان يهز رجليه ومبيين علي متوتر ويلعب بالسبحه الي بأيده كل شويه يرفع عينه عليه احس نظراته تخوف عيونه حمر ومبيين عصبي بس جاي يهدأ نفسه مجبور  كمل كلامه الطبيب وياي

..شنو الخلاچ تاخذين هذي الحبوب من شنو تعانين وياطبيب انطاج هالوصفه

..مو من طبيب چانت اكو مشاكل عائليه وچنت اتوتر حيل واقلق اني طبعي اضوج واخاف من المشاكل فضفضت الزملائي وشخص ساعدني وانطاني هذي الحبوب گلي مهدأ مو اكثر وصدگ بديت ارتاح عليها بس چنت كل متزيد المشاكل ازيد الجرعه واحس نفسي مرتاحه وتصير عندي القوه الي تخليني ارد بيها على كل شخص يأذيني

سمعت صوت علي تنهد بصوت وزادت هزة رجله توترت اني من يمي عين عليه وعين ع الطبيب سألته دكتور هيه شبيها هذي الحبوب بيها أثار يعني

..بابا انتي مو طفله ولا مراهقه انتي طالبه جامعيه يعني المفروض تكونين واعيه الحبوب هذي مخدره وجسمچ بده يستجاب الها بصوره سريعه للأسف الحاله الي انتي بيها حالة ادمان تعتبر يراد منچ القوه والشجاعه تتخلصين من هالأفه انتي مستعده الهذا الشي مستعده تكونين شجاعه وتواجهين نفسچ

..من سمعته بقيت مبهوته وصافنه بس دموعي احسها تنزل اربعه اربعه گتله يعني شنو مدمنه يعني هذي الحبوب مخدرات تعتبر يعني مو علاج مهدأ اني مو مدمنه لا راح اگدر اتحمل بدونه وراح تشوفون

..بابا اهدي واني افهمچ الي انطاج الحبوب شنو غايته مااعرف ماكو شخص يحب شخص ينطي هيچ نوع من الحبوب حته لو كان زميل المفروض متأمنين الأي شخص ومتاخذين علاج بدون استشاره
اني واثق انتي قويه وراح تتحملين كلشي حته تتعدين هذي المرحله شگلتي

..اي شي اسوي بس اريد اخلص

..خلص انتي هسه اطلعي انتظري بره واني كلامي راح يكون وي الأخ

طلعت واني اشوف علي بده يسحب نفس قوي وفتح اول ازرار بالدشداشه وعدل گعدته يحاول يصغي للطبيب

الدكتور..اخ علي البنيه يمكن متعرف الأدمان واثاره هيه هسه متحمسه انو تتخلص منه وواضح عليها الصدمه الظاهر صديق السوء هوه الي موصلها الهذي المرحله المشكله اصرارها هذا راح يختفي من يبدي جسمها يطلب العلاج اريدك تحاول تخليها بغرفه خاصه الها بعيد عن اي شخص متثق بي وياريت تكون قريب الها حته تأمن بوجودك والأهم من كل هذا تبعد شكو اداة حاده عنها ممكن تأذي نفسخا والحواليها هيه فتره قليله يرادلها صبر منكم انتو اهلها وهيه الله يكون بعونها

..كل نقطه تكلم عنها الطبيب خليتها ابالي تشكرت منه وطلعت شفتها مقابيلي مخليه راسها على متن اختها وجهه حيل اصفر ذبلانه ولا چنها هذي البنت القويه
اجه ابالي الحچي الحچته وياي بيوم الي اجت بي معقوله چانت تحت تأثير الحبوب لو هيه هذي شخصيتها انه حبيت قوتها بس مااجه ابالي هيه هيچ مامبيين عليها حالة ادمان
احس نفسي تعبت وهذي الشكم يوم المرن عدن عليه بسنه
قربت ومديتلها أيدي يلله علياء توكلي بالله وگومي

..باوعت بعينه واني متردده اشوفه حنين بس وره هذي العيون اكو كميه من القساوه والعصبيه عيونه ابد متوحي الحنيته
بس هوه وگفلي وتعب وياي انطيته ايدي وگمت احس جسمي متكسر ومعدتي الهسه توجعني كل شويه اريد استفرغ بس اجر نفس وامنع نفسي مااعرف اني شبيه وشنو الي صار وياي
افياء سندتني وهوه هم خله ايد وره ظهري ومشيت بخطوات متعثره فتحلي بابا السياره وگعدت افياء قبلي گلها خليها تتمدد وانتي سندي راسها
افياء حاولت تعرف شنو بيه الحد هسه كلشي متعرف
گلها من نوصل افهمچ لو سألوچ بالبيت گولي يرادلها متابعه لأن وضعها الصحي مو شي
بده يجر نفس قوي عبالك مخنوگ
وجهه صار ينطي على حمار
دخلنه جوه تلگتنه عمتي والبنات گلهم زينه هيه عوفوها وتعالي افياء خل اعلمچ على علاجها

دخل وياي للغرفه
وافياء تبعتنه
گلها الي اگوله الج مااريد مخلوق يعرف بي علياء مدمنه ولازم تتعالج من ادمانها واريد منچ مساعده تخلين هذي الغرفه من اي اداة حاده لاسچين ولا مفتاح ولا حته مگراضه مدري شتسموها المهم اريد الغرفه مابيها اي شي ممكن تأذي روحها منه حته لو قراصه
افياء..شيخ فدوه شنو يعني مدمنه منين وشلون مااعرف انه مااعرف كل الأعرفه هذا خليني وياها وحدنه حته افتهم منها

طلعت افياء وعيونه توجهت عليه

..علياء ياهو الي انطاچ هاي الحبوب
..بچيت وماجاوبته شي
..لاتخافين انه اساعدچ واوعدچ مراح اخلي احد يعرف بيچ بس گليلي ياهو انطاج هذي الحبوب

..اريد ابقه وحدي

..على راحتچ انه طالع

..علي

درت الها هاا
..راح تحجزني موو

..مو هيچ انه اريد احررچ من الأنتي بي راح اقفل عليچ الباب ومحد غيرنه اني وافياء ندخلچ

..اني ليش هيچ يصير بيه

..مااعرف انه انتي شنو ومنوو كل الأعرفه انتي بنت عمي وواجبي احميچ حته لو من نفسچ لأن انتي مامثلين روحچ وبس انتي اسم ابوچ واهلچ الي همه اهلي هذا اليربطني بيچ واحاول اساعدچ واطلعين من هالشده

..بس اني مالي احد ابوي وعافني وامي واتخلت عني ليش انت تساعدني

..الج اهلچ وناسچ كلهم يحبوچ وحالچ مو احسن من حالي چنت طفل وخسرت كلشي وعشت لأن اني اريد اعيش مااحب الضعف بيوم ولا اريد اضعف الأي سبب الأنسان بكيفه يگدر يكون شخصيته وبمساعدة الي يحبوه اكيد

..بس اني مااگدر انام بدون الحبوب

..معناها لاتنامين اتحملي 

علي ..

طلعت واحس الصبر بده ينفذ مني وكاقتي قربت تخلص شلون بنيه تدمن ومنو الي وصلها الهالمرحله اذا زميلها خلاها تصير مدمنه الله اليعلم بحال زملائها شنوو وشلون صايرين
اخخخ احس جدي غلط من طرد عمي وخاصتا من عرف هوه صاحب بنات وماقبل يرجع يمنه صح چان مخلي الي خاطر بس لو راجع وبناتنه يربن گبالنه ماصار الي صار
رجعتلي حالة الربوو اليوم شراح يخلصني دورت على البخاخ والعلاج العندي الظاهر مخلص گلت اروح ارتاح وبالليل اطلع اشتريلي علاج
نمت من التعب وماحسيت الا على صوت امي واحس واحد گاعد على صدري اريد اجر التفس مااگدر
..علي علي يمه اگعد ليش قافل الباب على بنت عمك يمه مو هيج خطيه مدري تريد تطلع مدري تريد تشوف احد
..هلا يمه لايضل بالچ موصي افياء ومنطيها نسخه من المفتاح
..اي ليش يايمه
..يمه بدون ليش هيج احسن ..احس النفس ضاع عليه وگفت اريد اطلع اشم الهوه لزمتني الگحه لما تكون حالتي متأزمه كلش تلزمني گحه قويه ومتتركني لمن اتقيأ
طلعت اريد اروح للحمام وصلت الغرفتها عرفتها بدت تفقد اعصابها من طريقة دگها للباب احتاريت بيني وبينها بس جسمي خاوي حته مابيه قوه احاچيها اشرت الأفياء لتفتحين الباب
ورحت للحمام احس هذي اخر انفاسي
لحگتني امي

..يمه علي سوده عليه وين علاجك ليش يمه هيچ ليش تخلي روحك توصل الهالمواصيل

..مااگدر احاجيها بس اشرتلها انطيني الفون وتصيح فاطمه
فاطمه اختي الصغيره طالبة كليه اعتبرها بنتي مو بس اختي هيه بت بت عمتي بس ربينه سوه وچانت ازغر خواتها اجن خواتي زينب وفاطمه اشرت الهن ع التليفون اتصلن بريم ورادن وليد بلغنه يجي

شويه واجوو رافع ووليد واحمد اخذوني للمستشفى ومثل كل مره من حالتي تتأزم ابره بالوريد ومغذي واوكسجين وحبوب لازم استمر عبيهن فتره بس مشكلتي بس لتحسن اگطعهن
رجعت للبيت واحس روحي مكسر اشترولي علاج وصلوني للبيت وراحوو
تمددت وارتاحيت فزيت على صوت ساعه ثنتين بالليل طلعت امشي شفت افياء تبچي وهيه واگفه يم الباب وامي يمها
..نظرات امي الي بلوم وعتب ابد ما اتحمل هيچ نظره
..وجهت كلامي الأفياء ليش انتي هنا

..مااگدر اتركها واشوفها تتعذب

..بس اني فهمتچ كلشي ..شفتيها خاف تريد تطلع محتاجه شي لا قبل شويه اخذتها بس هسه مااعرف شجاها مساع هم هيچ وراها هدأت وهسه زادت حالتها

..اتركوني اني وياها

..علي يمه مايصير هيچ

..يمه انتي كلشي ماتعرفين خليني بظيمي

چنت تعبان وكافي عليه هموم وقضايا الناس الي سالبه وكتي وهسه اجاني هم اكبر مااعرف شلون تصفه وياي

اسمع صوتها
..انطوني وحده فدوه بس وحده اريد ارتاح راسي راح ينفجر

..علياء راح افتح الباب اريد اشوفچ عادي

..انطيني حبايه ومااريد منك كلشي

..علياء احنه شحچينه

..مالي علاقه بالحچيناه راسي يريد يطگ

..زين خل ادخل اتفاهم وياچ واني انطيچ حبايه بس ادخل عادي خلي شي على راسچ

..اي تعال جيب الحبايه وتعال

..اباوع الأمي مامفتهمه كلشي وتريد افهمها  وافياء بس تبچي شلون راح اضم السالفه يارب ساعدني الحمدلله بيتنه چبير وجدي تعبان مايسمع شي بس اول وتالي الناس تعرف اقصد عماني وبناتهم والعالم الي تجينه على طول

فتحت الباب بهدوء ودخلت وقفلته والمفتاح بيدي
..وين الحبايه
..اباوعلها شكلها مو هيه عيونها تعبانه وشعرها منفوش باوعت اكو شال قريب يمها شلته وخليته على راسها
..وين الحبايه انطيني بسرعه رلسي موتني

..علياء ماكو حبايه خل تولي ادمرچ والله
..انت تضحك عليه كلكم نفس الشي
..كلنه منوو
..انت وامي وعلاء
..اني اريد اساعدچ مو اكثر چنت تعبان وگوه احچي مالي خلگ اطول وياها
..لا كلكم تقشمروني اني غبيه موو
..ضليت اباوعلها وساكت مااعرف شحچي
..أي والله غبيه صدگت بواحد ع اساس حبني علمني اصير مدمنه وتزوجني وعافني واني عروس
..يعني الي علمچ ع الحبوب هوه هذا نفسه الي تزوجج

..اي هوه زوجي انطيني حبايه انت مو مسؤول عني زوجي قابل انت شكوو
..زوجج هذا من يامله وشني طينته وعد عليه الا اخلي يركع جوه رجلج نادم بس صيري قويه واتحملي بس هذا الأسبوع وراح تخف الألام

..مااگدر مااگدر

..گالتها وبچت بصوت عالي احس اديه مربطه بساعتها ماتمنيت شي بس اتمنيت علاء بأيدي بس وين يروح الگاه لو يصير بسابع سمه

..علياء انتي شنهي التردينه تردين تموتين بسبب واحد مايستاهل دمعه منچ لو تردين تثبتين اله والغييره انتي قويه وماتهتمين

..اني كلشي مااريد اريد حبايه بس لو احسن شي انت مو بينك وبين امي ثار اخذه مني موتتي وخلصني

..ضحكت بمراره اخذ الثار منچ انتي اجت فرصتي وچنت اگدر اكتل الي نفذ الحكم بأبوي بس تعرفين شنهي المنعني خواتي چان عنده اثنين بنات وولد من امي ماگدرت ايتمهم مثل ماتيتمت رغم اني مااحبهم ومااحس بمشاعر اخوه اتجاهم بس من شفتهم ضعفت

رجعت بذاكرتي لليوم الي سقط بي الحكم بأحتلال العراق سنة الفين وتلاثه

وره ماتأكد للناس سقوط النظام
بدت العالم تصفي حساباتها وبدت الروس الكبار مثل مايسموها تشرد وتطلع من مناطقهم وبعدها يطلعون خارج العراق العالم چانت مكبوته ومن قهرها على شبابها الراحت بدت تتصرف بدون وعي الي واصلين بالدوله بيوتهم احترگت والي انكتل بالطريق والي گدر يطلع

چنه شباب واگفين بوكتها عمامي تأكدوو من دوائر الأمن الي مقدمين بلاغ انو ابوي ظابط متخاذل وموصلين اوراق وكتب الداخل بيته عن طريق امي بمساعدة ام علياء الي هيه اخت ماهر وزوجة عمي بوكتها زاد حقدنه عليها اكثر وشكوكنه تأكدت

چنه شباب واگفين بمداخل المدينه ومخارجها نريد نحفظ منطقتنه من الأغراب الوضع يخوف وماكو سلطه ولد المناطق همه حمو مناطقهم

جنت ملثم بيومها تراب قوي والدنيا حمره وانه عندي ربوو چنه ندور على ماهر كلنه
مرت سياره من يمنه بيها بنات تقريبا متوسطه او ابتظائيه وولد عمره يطلع تسع سنين ومريه گاعده گدام الهسه ماانسه نظراتهم وشلون يترجونه بنظراتهم
اول ماشفتهم انصدمت انه ماهر ماشايفه ولا اعرف رغم چنه منطقه وحده بس بعد مااتزوج امي هوه شال وطلع من اهله
عرفتهم همه من عيون امي هيه نفسها صار سنين ماشايفها بس عرفتها رغم متغيره هواي
طلبت هوياتهم ايده چانت ترجف من انطاني هويته استلمتها وايدي ترجف نفس رجفة ايده بهاي اللحظات حسيتها مو لحظات حسيتهن عمر لازم اقرر اخذ ثاري لو لا اجه ابالي سؤال وسألته
هذول الاطفال الكم
..جاوبتني امي اي هذوله جهالي چانت عيونها مليانه دموع من الخوف شگد كارها وشگد متمني هذي اللحظه الي اطيح بيدي بس من شفت عيونها وعيون البنات ماگدرت يمكن جبنت ويمكن چانت شجاعه
قررت اصير شجاع اكثر منهم ماردت اكتله گبال بناته بوكتها حته امي ماشفعتله بگد خوف بناته وابنه علي چنت ازغر من الولد الي وياهم من انعدم ابوي ماچنت اريدهم يحسون بأحساسي اصعب موقف من گتلهم عبروو ساعات احس روحي خذلت ابوي وساعات احس روحي قوي اتحظيت نفسي قبل الكل

رجعت من ذاكرتي وعيني على علياء

..انتي شمعرفچ بيني وبين امچ ثار وتعرفينه ثار شنوو
..خليت ايدي على راسي كلشي مااعرف

..چا انسي هذا الموضوع ولاتذكريني بي

يتبع

البارت بدون مراجعه